༥. ཀུ་ཉྫ་ར་ཝི་མཱ་ན་ཝ་ཏྠུ
༣༡. ‘‘ཀུ་ཉྫ་རོ ཏེ ཝ་རཱ་རོ་ཧོ, ནཱ་ནཱ་ར་ཏ་ན་ཀ་པྤ་ནོ;
རུ་ཙི་རོ ཐཱ་མ་ཝཱ ཛ་ཝ་ས་མྤ་ནྣོ, ཨཱ་ཀཱ་ས་མྷི ས་མཱི་ཧ་ཏི.
༣༢. ‘‘པ་དུ་མི པ་དྨ [པ་དུ་མ… (སཱི. སྱཱ.) ཨེ་ཝ་མུ་པ་རི་པི] པ་ཏྟ་ཀྑི, པ་དྨུ་པྤ་ལ་ཛུ་ཏི་ནྡྷ་རོ;
པ་དྨ་ཙུ་ཎྞཱ་བྷི་ཀི་ཎྞ་ངྒོ, སོ་ཎྞ་པོ་ཀྑ་ར་མཱ་ལ་དྷཱ [… མཱ་ལ་ཝཱ (སཱི. སྱཱ.)].
༣༣. ‘‘པ་དུ་མཱ་ནུ་ས་ཊཾ མ་གྒཾ, པ་དྨ་པ་ཏྟ་ཝི་བྷཱུ་སི་ཏཾ.
ཋི་ཏཾ ཝ་གྒུ་མ་ནུ་གྒྷཱ་ཏཱི, མི་ཏཾ ག་ཙྪ་ཏི ཝཱ་ར་ཎོ.
༣༤. ‘‘ཏ་སྶ པ་ཀྐ་མ་མཱ་ན་སྶ, སོ་ཎྞ་ཀཾ་སཱ ར་ཏི་སྶ་རཱ;
ཏེ་སཾ སུ་ཡྻ་ཏི ནི་གྒྷོ་སོ, ཏུ་རི་ཡེ པ་ཉྩ་ངྒི་ཀེ ཡ་ཐཱ.
༣༥. ‘‘ཏ་སྶ ནཱ་ག་སྶ ཁ་ནྡྷ་མྷི, སུ་ཙི་ཝ་ཏྠཱ ཨ་ལ་ངྐ་ཏཱ;
མ་ཧ་ནྟཾ ཨ་ཙྪ་རཱ་ས་ངྒྷཾ, ཝ་ཎྞེ་ན ཨ་ཏི་རོ་ཙ་སི.
༣༦. ‘‘དཱ་ན་སྶ ཏེ ཨི་དཾ ཕ་ལཾ, ཨ་ཐོ སཱི་ལ་སྶ ཝཱ པ་ན;
ཨ་ཐོ ཨ་ཉྫ་ལི་ཀ་མྨ་སྶ, ཏཾ མེ ཨ་ཀྑཱ་ཧི པུ་ཙྪི་ཏཱ’’ཏི;
༣༧. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༣༨. ‘‘དི་སྭཱ་ན གུ་ཎ་ས་མྤ་ནྣཾ, ཛྷཱ་ཡིཾ ཛྷཱ་ན་ར་ཏཾ ས་ཏཾ;
ཨ་དཱ་སིཾ པུ་པྥཱ་བྷི་ཀི་ཎྞཾ, ཨཱ་ས་ནཾ དུ་སྶ་ས་ནྠ་ཏཾ.
༣༩. ‘‘ཨུ་པ་ཌྜྷཾ པ་དྨ་མཱ་ལཱ་ཧཾ, ཨཱ་ས་ན་སྶ ས་མ་ནྟ་ཏོ;
ཨ་བྦྷོ་ཀི་རི་སྶཾ པ་ཏྟེ་ཧི, པ་ས་ནྣཱ སེ་ཧི པཱ་ཎི་བྷི.
༤༠. ‘‘ཏ་སྶ ཀ་མྨ་ཀུ་ས་ལ་སྶ [ཀ་མྨ་སྶ ཀུ་ས་ལ་སྶ (སཱི. པཱི.)], ཨི་དཾ མེ ཨཱི་དི་སཾ ཕ་ལཾ;
ས་ཀྐཱ་རོ ག་རུ་ཀཱ་རོ ཙ, དེ་ཝཱ་ནཾ ཨ་པ་ཙི་ཏཱ ཨ་ཧཾ.
༤༡. ‘‘ཡོ ཝེ ས་མྨཱ་ཝི་མུ་ཏྟཱ་ནཾ, ས་ནྟཱ་ནཾ བྲ་ཧྨ་ཙཱ་རི་ནཾ;
པ་ས་ནྣོ ཨཱ་ས་ནཾ ད་ཛྫཱ, ཨེ་ཝཾ ན་ནྡེ ཡ་ཐཱ ཨ་ཧཾ.
༤༢. ‘‘ཏ་སྨཱ ཧི ཨ་ཏྟ་ཀཱ་མེ་ན [ཨ་ཏྠ་ཀཱ་མེ་ན (ཀ.)], མ་ཧ་ཏྟ་མ་བྷི་ཀ་ངྑ་ཏཱ;
ཨཱ་ས་ནཾ དཱ་ཏ་བྦཾ ཧོ་ཏི, ས་རཱི་ར་ནྟི་མ་དྷཱ་རི་ན’’ནྟི.
ཀུ་ཉྫ་ར་ཝི་མཱ་ནཾ པ་ཉྩ་མཾ.