༡༧. ཀེ་ས་ཀཱ་རཱི་ཝི་མཱ་ན་ཝ་ཏྠུ
༡༥༠. ‘‘ཨི་དཾ ཝི་མཱ་ནཾ རུ་ཙི་རཾ པ་བྷ་སྶ་རཾ, ཝེ་ལུ༹་རི་ཡ་ཐ་མྦྷཾ ས་ཏ་ཏཾ སུ་ནི་མྨི་ཏཾ;
སུ་ཝ་ཎྞ་རུ་ཀྑེ་ཧི ས་མ་ནྟ་མོ་ཏྠ་ཏཾ, ཋཱ་ནཾ མ་མཾ ཀ་མྨ་ཝི་པཱ་ཀ་ས་མྦྷ་ཝཾ.
༡༥༡. ‘‘ཏ་ཏྲཱུ་པ་པ་ནྣཱ པུ་རི་མ་ཙྪ་རཱ ཨི་མཱ, ས་ཏཾ ས་ཧ་སྶཱ་ནི ས་ཀེ་ན ཀ་མྨུ་ནཱ;
ཏུ་ཝཾ་སི ཨ་ཛ྄ཛྷུ་པ་ག་ཏཱ ཡ་ས་སྶི་ནཱི, ཨོ་བྷཱ་ས་ཡཾ ཏི་ཊྛ་སི པུ་བྦ་དེ་ཝ་ཏཱ.
༡༥༢. ‘‘ས་སཱི ཨ་དྷི་གྒ་ཡ྄ཧ ཡ་ཐཱ ཝི་རོ་ཙ་ཏི, ན་ཀྑ་ཏྟ་རཱ་ཛཱ་རི་ཝ ཏཱ་ར་ཀཱ་ག་ཎཾ;
ཏ་ཐེ་ཝ ཏྭཾ ཨ་ཙྪ་རཱ་ས་ངྒ་ཎཾ [ཨ་ཙྪ་རཱ་ས་ངྒ་མཾ (སཱི.)] ཨི་མཾ, ད་དྡ་ལླ་མཱ་ནཱ ཡ་ས་སཱ ཝི་རོ་ཙ་སི.
༡༥༣. ‘‘ཀུ་ཏོ ནུ ཨཱ་ག་མྨ ཨ་ནོ་མ་ད་སྶ་ནེ, ཨུ་པ་པ་ནྣཱ ཏྭཾ བྷ་ཝ་ནཾ མ་མཾ ཨི་དཾ;
བྲ་ཧྨཾ་ཝ དེ་ཝཱ ཏི་ད་སཱ ས་ཧི་ནྡ་ཀཱ, ས་བྦེ ན ཏ་པྤཱ་མ་སེ ད་སྶ་ནེ་ན ཏ’’ནྟི.
༡༥༤. ‘‘ཡ་མེ་ཏཾ ས་ཀྐ ཨ་ནུ་པུ་ཙྪ་སེ མ་མཾ, ‘ཀུ་ཏོ ཙུ་ཏཱ ཏྭཾ ཨི་དྷ ཨཱ་ག་ཏཱ’ཏི [ཀུ་ཏོ ཙུ་ཏཱ ཨི་དྷ ཨཱ་ག་ཏཱ ཏུ་ཝཾ (སྱཱ.), ཀུ་ཏོ ཙུ་ཏཱ་ཡ ཨཱ་ག་ཏི ཏ་ཝ (པཱི.)];
བཱ་རཱ་ཎ་སཱི ནཱ་མ པུ་ར་ཏྠི ཀཱ་སི་ནཾ, ཏ་ཏྠ ཨ་ཧོ་སིཾ པུ་རེ ཀེ་ས་ཀཱ་རི་ཀཱ.
༡༥༥. ‘‘བུ་དྡྷེ ཙ དྷ་མྨེ ཙ པ་ས་ནྣ་མཱ་ན་སཱ, ས་ངྒྷེ ཙ ཨེ་ཀ་ནྟ་ག་ཏཱ ཨ་སཾ་ས་ཡཱ;
ཨ་ཁ་ཎྜ་སི་ཀྑཱ་པ་དཱ ཨཱ་ག་ཏ་པྥ་ལཱ, ས་མྦོ་དྷི་དྷ་མྨེ ནི་ཡ་ཏཱ ཨ་ནཱ་མ་ཡཱ’’ཏི.
༡༥༦. ‘‘ཏ་ནྟྱཱ་བྷི་ན་ནྡཱ་མ་སེ སྭཱ་ག་ཏ་ཉྩ [སཱ་ག་ཏ་ཉྩ (སཱི.)] ཏེ, དྷ་མྨེ་ན ཙ ཏྭཾ ཡ་ས་སཱ ཝི་རོ་ཙ་སི;
བུ་དྡྷེ ཙ དྷ་མྨེ ཙ པ་ས་ནྣ་མཱ་ན་སེ, ས་ངྒྷེ ཙ ཨེ་ཀ་ནྟ་ག་ཏེ ཨ་སཾ་ས་ཡེ;
ཨ་ཁ་ཎྜ་སི་ཀྑཱ་པ་དེ ཨཱ་ག་ཏ་པྥ་ལེ, ས་མྦོ་དྷི་དྷ་མྨེ ནི་ཡ་ཏེ ཨ་ནཱ་མ་ཡེ’’ཏི.
ཀེ་ས་ཀཱ་རཱི་ཝི་མཱ་ནཾ ས་ཏྟ་ར་ས་མཾ.
པཱི་ཋ་ཝ་གྒོ པ་ཋ་མོ ནི་ཊྛི་ཏོ.
ཏ་སྶུ་དྡཱ་ནཾ –
པ་ཉྩ པཱི་ཋཱ ཏ་ཡོ ནཱ་ཝཱ, དཱི་པ་ཏི་ལ་ད་ཀྑི་ཎཱ དྭེ;
པ་ཏི དྭེ སུ་ཎི་སཱ ཨུ་ཏྟ་རཱ, སི་རི་མཱ ཀེ་ས་ཀཱ་རི་ཀཱ;
ཝ་གྒོ ཏེ་ན པ་ཝུ་ཙྩ་ཏཱི་ཏི.