༢. ཙི་ཏྟ་ལ་ཏཱ་ཝ་གྒོ
༡. དཱ་སི་ཝི་མཱ་ན་ཝ་ཏྠུ
༡༥༧. ‘‘ཨ་པི ས་ཀྐོ་ཝ དེ་ཝི་ནྡོ, ར་མྨེ ཙི་ཏྟ་ལ་ཏཱ་ཝ་ནེ;
ས་མ་ནྟཱ ཨ་ནུ་པ་རི་ཡཱ་སི, ནཱ་རཱི་ག་ཎ་པུ་ར་ཀྑ་ཏཱ;
ཨོ་བྷཱ་སེ་ནྟཱི དི་སཱ ས་བྦཱ, ཨོ་ས་དྷཱི ཝི་ཡ ཏཱ་ར་ཀཱ.
༡༥༨. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༥༩. ‘‘པུ་ཙྪཱ་མི ཏཾ དེ་ཝི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༡༦༠. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༡༦༡. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏཱ, དཱ་སཱི ཨ་ཧོ་སིཾ པ་ར་པེ་སྶི་ཡཱ [པ་ར་པེ་སི་ཡཱ (ཀ.)] ཀུ་ལེ.
༡༦༢. ‘‘ཨུ་པཱ་སི་ཀཱ ཙ་ཀྑུ་མ་ཏོ, གོ་ཏ་མ་སྶ ཡ་ས་སྶི་ནོ;
ཏ་སྶཱ མེ ནི་ཀྐ་མོ ཨཱ་སི, སཱ་ས་ནེ ཏ་སྶ ཏཱ་དི་ནོ.
༡༦༣. ‘‘ཀཱ་མཾ བྷི་ཛྫ་ཏུ་ཡཾ ཀཱ་ཡོ, ནེ་ཝ ཨ་ཏྠེ་ཏྠ ས་ཎྛ་ནཾ [ས་ནྠ་ནཾ (སཱི. སྱཱ. པཱི.)];
སི་ཀྑཱ་པ་དཱ་ནཾ པ་ཉྩ་ནྣཾ, མ་གྒོ སོ་ཝ་ཏྠི་ཀོ སི་ཝོ.
༡༦༤. ‘‘ཨ་ཀ་ཎྚ་ཀོ ཨ་ག་ཧ་ནོ, ཨུ་ཛུ ས་བྦྷི པ་ཝེ་དི་ཏོ;
ནི་ཀྐ་མ་སྶ ཕ་ལཾ པ་སྶ, ཡ་ཐི་དཾ པཱ་པུ་ཎི་ཏྠི་ཀཱ.
༡༦༥. ‘‘ཨཱ་མ་ནྟ་ནི་ཀཱ ར་ཉྙོ་མྷི, ས་ཀྐ་སྶ ཝ་ས་ཝ་ཏྟི་ནོ;
ས་ཊྛི ཏུ་རི་ཡ [ཏུ་རི་ཡ (སཱི. སྱཱ. པཱི.)] ས་ཧ་སྶཱ་ནི, པ་ཊི་བོ་དྷཾ ཀ་རོ་ནྟི མེ.
༡༦༦. ‘‘ཨཱ་ལ་མྦོ ག་གྒ་རོ [ག་གྒ་མོ (སྱཱ.), བྷ་གྒ་རོ (ཀ.)] བྷཱི་མོ [བྷི་མྨོ (ཀ.)], སཱ་དྷུ་ཝཱ་དཱི ཙ སཾ་ས་ཡོ;
པོ་ཀྑ་རོ ཙ སུ་ཕ་སྶོ ཙ, ཝི་ཎཱ་མོ་ཀྑཱ [ཝི་ལཱ་མོ་ཀྑཱ (ཀ.)] ཙ ནཱ་རི་ཡོ.
༡༦༧. ‘‘ན་ནྡཱ ཙེ་ཝ སུ་ན་ནྡཱ ཙ, སོ་ཎ་དི་ནྣཱ སུ་ཙི་མྷི་ཏཱ [སུ་ཙི་མྦྷི་ཀཱ (སྱཱ.)];
ཨ་ལ་མྦུ་སཱ མི་སྶ་ཀེ་སཱི ཙ, པུ་ཎྜ་རཱི་ཀཱ་ཏི དཱ་རུ་ཎཱི.
༡༦༨. ‘‘ཨེ་ཎཱི་ཕ་སྶཱ སུ་ཕ་སྶཱ ཙ, སུ་བྷ་དྡཱ མུ་དུ་ཝཱ་དི་ནཱི;
ཨེ་ཏཱ ཙ་ཉྙཱ ཙ སེ་ཡྻཱ་སེ, ཨ་ཙྪ་རཱ་ནཾ པ་བོ་དྷི་ཀཱ.
༡༦༩. ‘‘ཏཱ མཾ ཀཱ་ལེ་ནུ་པཱ་ག་ནྟྭཱ, ཨ་བྷི་བྷཱ་ས་ནྟི དེ་ཝ་ཏཱ;
ཧ་ནྡ ན་ཙྩཱ་མ གཱ་ཡཱ་མ, ཧ་ནྡ ཏཾ ར་མ་ཡཱ་མ་སེ.
༡༧༠. ‘‘ན་ཡི་དཾ ཨ་ཀ་ཏ་པུ་ཉྙཱ་ནཾ, ཀ་ཏ་པུ་ཉྙཱ་ན་མེ་ཝི་དཾ;
ཨ་སོ་ཀཾ ན་ནྡ་ནཾ ར་མྨཾ, ཏི་ད་སཱ་ནཾ མ་ཧཱ་ཝ་ནཾ.
༡༧༡. ‘‘སུ་ཁཾ ཨ་ཀ་ཏ་པུ་ཉྙཱ་ནཾ, ཨི་དྷ ན་ཏྠི པ་ར་ཏྠ ཙ;
སུ་ཁ་ཉྩ ཀ་ཏ་པུ་ཉྙཱ་ནཾ, ཨི་དྷ ཙེ་ཝ པ་ར་ཏྠ ཙ.
༡༧༢. ‘‘ཏེ་སཾ ས་ཧ་བྱ་ཀཱ་མཱ་ནཾ, ཀ་ཏྟ་བྦཾ ཀུ་ས་ལཾ བ་ཧུཾ;
ཀ་ཏ་པུ་ཉྙཱ ཧི མོ་ད་ནྟི, ས་གྒེ བྷོ་ག་ས་མ་ངྒི་ནོ’’ཏི.
དཱ་སི་ཝི་མཱ་ནཾ པ་ཋ་མཾ.
༢. ལ་ཁུ་མཱ་ཝི་མཱ་ན་ཝ་ཏྠུ
༡༧༣. ‘‘ཨ་བྷི་ཀྐ་ནྟེ་ན ཝ་ཎྞེ་ན, ཡཱ ཏྭཾ ཏི་ཊྛ་སི དེ་ཝ་ཏེ;
ཨོ་བྷཱ་སེ་ནྟཱི དི་སཱ ས་བྦཱ, ཨོ་ས་དྷཱི ཝི་ཡ ཏཱ་ར་ཀཱ.
༡༧༤. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༧༥. ‘‘པུ་ཙྪཱ་མི ཏཾ དེ་ཝི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༡༧༦. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༡༧༧. ‘‘ཀེ་ཝ་ཊྚ་དྭཱ་རཱ ནི་ཀྑ་མྨ, ཨ་ཧུ མ་ཡ྄ཧཾ ནི་ཝེ་ས་ནཾ;
ཏ་ཏྠ ས་ཉྩ་ར་མཱ་ནཱ་ནཾ, སཱ་ཝ་ཀཱ་ནཾ མ་ཧེ་སི་ནཾ.
༡༧༨. ‘‘ཨོ་ད་ནཾ ཀུ་མྨཱ་སཾ [སཱ་ཀཾ (སཱི.)] ཌཱ་ཀཾ, ལོ་ཎ་སོ་ཝཱི་ར་ཀ་ཉྩ་ཧཾ;
ཨ་དཱ་སིཾ ཨུ་ཛུ་བྷཱུ་ཏེ་སུ, ཝི་པྤ་ས་ནྣེ་ན ཙེ་ཏ་སཱ.
༡༧༩. ‘‘ཙཱ་ཏུ་དྡ་སིཾ པ་ཉྩ་ད་སིཾ, ཡཱ ཙ པ་ཀྑ་སྶ ཨ་ཊྛ་མཱི;
པཱ་ཊི་ཧཱ་རི་ཡ་པ་ཀྑ་ཉྩ, ཨ་ཊྛ་ངྒ་སུ་ས་མཱ་ག་ཏཾ.
༡༨༠. ‘‘ཨུ་པོ་ས་ཐཾ ཨུ་པ་ཝ་སི་སྶཾ, ས་དཱ སཱི་ལེ་སུ སཾ་ཝུ་ཏཱ;
ས་ཉྙ་མཱ སཾ་ཝི་བྷཱ་གཱ ཙ, ཝི་མཱ་ནཾ ཨཱ་ཝ་སཱ་མ་ཧཾ.
༡༨༡. ‘‘པཱ་ཎཱ་ཏི་པཱ་ཏཱ ཝི་ར་ཏཱ, མུ་སཱ་ཝཱ་དཱ ཙ ས་ཉྙ་ཏཱ;
ཐེ་ཡྻཱ ཙ ཨ་ཏི་ཙཱ་རཱ ཙ, མ་ཛྫ་པཱ་ནཱ ཙ ཨཱ་ར་ཀཱ.
༡༨༢. ‘‘པ་ཉྩ་སི་ཀྑཱ་པ་དེ ར་ཏཱ, ཨ་རི་ཡ་ས་ཙྩཱ་ན ཀོ་ཝི་དཱ;
ཨུ་པཱ་སི་ཀཱ ཙ་ཀྑུ་མ་ཏོ, གོ་ཏ་མ་སྶ ཡ་ས་སྶི་ནོ.
༡༨༣. ‘‘ཏེ་ན མེ་ཏཱ་དི་སོ ཝ་ཎྞོ…པེ… ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི་ཏི.
‘‘མ་མ ཙ, བྷ་ནྟེ, ཝ་ཙ་ནེ་ན བྷ་ག་ཝ་ཏོ པཱ་དེ སི་ར་སཱ ཝ་ནྡེ་ཡྻཱ་སི – ‘ལ་ཁུ་མཱ ནཱ་མ,བྷ་ནྟེ,ཨུ་པཱ་སི་ཀཱ བྷ་ག་ཝ་ཏོ པཱ་དེ སི་ར་སཱ ཝ་ནྡ་ཏཱི’ཏི. ཨ་ན་ཙྪ་རི་ཡཾ ཁོ པ་ནེ་ཏཾ, བྷ་ནྟེ, ཡཾ མཾ བྷ་ག་ཝཱ ཨ་ཉྙ་ཏ་ར་སྨིཾ སཱ་མ་ཉྙ་ཕ་ལེ བྱཱ་ཀ་རེ་ཡྻ [བྱཱ་ཀ་རེ་ཡྻཱ་ཏི (?)]. ཏཾ བྷ་ག་ཝཱ ས་ཀ་དཱ་གཱ་མི་ཕ་ལེ བྱཱ་ཀཱ་སཱི’’ཏི.
ལ་ཁུ་མཱ་ཝི་མཱ་ནཾ དུ་ཏི་ཡཾ.
༣. ཨཱ་ཙཱ་མ་དཱ་ཡི་ཀཱ་ཝི་མཱ་ན་ཝ་ཏྠུ
༡༨༥. ‘‘པི་ཎྜཱ་ཡ ཏེ ཙ་ར་ནྟ་སྶ, ཏུ་ཎྷཱི་བྷཱུ་ཏ་སྶ ཏི་ཊྛ་ཏོ;
ད་ལི་དྡཱ ཀ་པ་ཎཱ ནཱ་རཱི, པ་རཱ་གཱ་རཾ ཨ་པ་སྶི་ཏཱ [ཨ་ཝ་སྶི་ཏཱ (སཱི.)].
༡༨༦. ‘‘ཡཱ ཏེ ཨ་དཱ་སི ཨཱ་ཙཱ་མཾ, པ་ས་ནྣཱ སེ་ཧི པཱ་ཎི་བྷི;
སཱ ཧི་ཏྭཱ མཱ་ནུ་སཾ དེ་ཧཾ, ཀཾ ནུ སཱ དི་ས་ཏཾ ག་ཏཱ’’ཏི.
༡༨༧. ‘‘པི་ཎྜཱ་ཡ མེ ཙ་ར་ནྟ་སྶ, ཏུ་ཎྷཱི་བྷཱུ་ཏ་སྶ ཏི་ཊྛ་ཏོ;
ད་ལི་དྡཱ ཀ་པ་ཎཱ ནཱ་རཱི, པ་རཱ་གཱ་རཾ ཨ་པ་སྶི་ཏཱ.
༡༨༨. ‘‘ཡཱ མེ ཨ་དཱ་སི ཨཱ་ཙཱ་མཾ, པ་ས་ནྣཱ སེ་ཧི པཱ་ཎི་བྷི;
སཱ ཧི་ཏྭཱ མཱ་ནུ་སཾ དེ་ཧཾ, ཝི་པྤ་མུ་ཏྟཱ ཨི་ཏོ ཙུ་ཏཱ.
༡༨༩. ‘‘ནི་མྨཱ་ན་ར་ཏི་ནོ ནཱ་མ, ས་ནྟི དེ་ཝཱ མ་ཧི་དྡྷི་ཀཱ;
ཏ་ཏྠ སཱ སུ་ཁི་ཏཱ ནཱ་རཱི, མོ་ད་ཏཱ་ཙཱ་མ་དཱ་ཡི་ཀཱ’’ཏི.
༡༩༠. ‘‘ཨ་ཧོ དཱ་ནཾ ཝ་རཱ་ཀི་ཡཱ, ཀ་སྶ་པེ སུ་པྤ་ཏི་ཊྛི་ཏཾ;
པ་རཱ་བྷ་ཏེ་ན དཱ་ནེ་ན, ཨི་ཛ྄ཛྷི་ཏྠ ཝ་ཏ ད་ཀྑི་ཎཱ.
༡༩༡. ‘‘ཡཱ མ་ཧེ་སི་ཏྟཾ ཀཱ་རེ་ཡྻ, ཙ་ཀྐ་ཝ་ཏྟི་སྶ རཱ་ཛི་ནོ;
ནཱ་རཱི ས་བྦ་ངྒ་ཀ་ལྱཱ་ཎཱི, བྷ་ཏྟུ ཙཱ་ནོ་མ་ད་སྶི་ཀཱ;
ཨེ་ཏ་སྶཱ་ཙཱ་མ་དཱ་ན་སྶ, ཀ་ལཾ ནཱ་གྒྷ་ཏི སོ་ལ༹་སིཾ.
༡༩༢. ‘‘ས་ཏཾ ནི་ཀྑཱ ས་ཏཾ ཨ་སྶཱ, ས་ཏཾ ཨ་སྶ་ཏ་རཱི་ར་ཐཱ;
ས་ཏཾ ཀ་ཉྙཱ་ས་ཧ་སྶཱ་ནི, ཨཱ་མུ་ཏྟ་མ་ཎི་ཀུ་ཎྜ་ལཱ;
ཨེ་ཏ་སྶཱ་ཙཱ་མ་དཱ་ན་སྶ, ཀ་ལཾ ནཱ་གྒྷ་ནྟི སོ་ལ༹་སིཾ.
༡༩༣. ‘‘ས་ཏཾ ཧེ་མ་ཝ་ཏཱ ནཱ་གཱ, ཨཱི་སཱ་ད་ནྟཱ ཨུ་རཱུ་ལ༹ྷ་ཝཱ;
སུ་ཝ་ཎྞ་ཀ་ཙྪཱ མཱ་ཏ་ངྒཱ, ཧེ་མ་ཀ་པྤ་ན་ཝཱ་ས་སཱ [ཧེ་མ་ཀ་པྤ་ནི་ཝཱ་ས་སཱ (སྱཱ. ཀ.)];
ཨེ་ཏ་སྶཱ་ཙཱ་མ་དཱ་ན་སྶ, ཀ་ལཾ ནཱ་གྒྷ་ཏི སོ་ལ༹་སིཾ.
༡༩༤. ‘‘ཙ་ཏུ་ནྣ་མ་པི དཱི་པཱ་ནཾ, ཨི་སྶ་རཾ ཡོ་དྷ ཀཱ་ར་ཡེ;
ཨེ་ཏ་སྶཱ་ཙཱ་མ་དཱ་ན་སྶ, ཀ་ལཾ ནཱ་གྒྷ་ཏི སོ་ལ༹་སི’’ནྟི.
ཨཱ་ཙཱ་མ་དཱ་ཡི་ཀཱ་ཝི་མཱ་ནཾ ཏ་ཏི་ཡཾ.
༤. ཙ་ཎྜཱ་ལི་ཝི་མཱ་ན་ཝ་ཏྠུ
༡༩༥. ‘‘ཙ་ཎྜཱ་ལི ཝ་ནྡ པཱ་དཱ་ནི, གོ་ཏ་མ་སྶ ཡ་ས་སྶི་ནོ;
ཏ་མེ་ཝ [ཏ་ཝེ་ཝ (སཱི.)] ཨ་ནུ་ཀ་མྤཱ་ཡ, ཨ་ཊྛཱ་སི ཨི་སི་ས་ཏྟ་མོ [ཨི་སི་སུ་ཏྟ་མོ (སཱི.)].
༡༩༦. ‘‘ཨ་བྷི་པྤ་སཱ་དེ་ཧི མ་ནཾ, ཨ་ར་ཧ་ནྟ་མྷི ཏཱ་དི་ནི [ཏཱ་དི་ནེ (སྱཱ. ཀ.)];
ཁི་པྤཾ པ་ཉྫ་ལི་ཀཱ ཝ་ནྡ, པ་རི་ཏྟཾ ཏ་ཝ ཛཱི་ཝི་ཏ’’ནྟི.
༡༩༧. ཙོ་དི་ཏཱ བྷཱ་ཝི་ཏ་ཏྟེ་ན, ས་རཱི་ར་ནྟི་མ་དྷཱ་རི་ནཱ;
ཙ་ཎྜཱ་ལཱི ཝ་ནྡི པཱ་དཱ་ནི, གོ་ཏ་མ་སྶ ཡ་ས་སྶི་ནོ.
༡༩༨. ཏ་མེ་ནཾ ཨ་ཝ་དྷཱི གཱ་ཝཱི, ཙ་ཎྜཱ་ལིཾ པ་ཉྫ་ལིཾ ཋི་ཏཾ;
ན་མ་སྶ་མཱ་ནཾ ས་མྦུ་དྡྷཾ, ཨ་ནྡྷ་ཀཱ་རེ པ་བྷ་ངྐ་ར་ནྟི.
༡༩༩. ‘‘ཁཱི་ཎཱ་ས་ཝཾ ཝི་ག་ཏ་ར་ཛཾ ཨ་ནེ་ཛཾ, ཨེ་ཀཾ ཨ་ར་ཉྙ་མྷི ར་ཧོ ནི་སི་ནྣཾ;
དེ་ཝི་དྡྷི་པ་ཏྟཱ ཨུ་པ་ས་ངྐ་མི་ཏྭཱ, ཝ་ནྡཱ་མི ཏཾ ཝཱི་ར མ་ཧཱ་ནུ་བྷཱ་ཝ’’ནྟི.
༢༠༠. ‘‘སུ་ཝ་ཎྞ་ཝ་ཎྞཱ ཛ་ལི་ཏཱ མ་ཧཱ་ཡ་སཱ, ཝི་མཱ་ན་མོ་རུ་ཡ྄ཧ ཨ་ནེ་ཀ་ཙི་ཏྟཱ;
པ་རི་ཝཱ་རི་ཏཱ ཨ་ཙྪ་རཱ་ས་ངྒ་ཎེ་ན [ཨ་ཙྪ་རཱ་ནཾ ག་ཎེ་ན (སཱི.)], ཀཱ ཏྭཾ སུ་བྷེ དེ་ཝ་ཏེ ཝ་ནྡ་སེ མ་མ’’ནྟི.
༢༠༡. ‘‘ཨ་ཧཾ བྷ་དྡ་ནྟེ ཙ་ཎྜཱ་ལཱི, ཏ་ཡཱ ཝཱི་རེ་ན [ཐེ་རེ་ན (ཀ.)] པེ་སི་ཏཱ;
ཝ་ནྡིཾ ཨ་ར་ཧ་ཏོ པཱ་དེ, གོ་ཏ་མ་སྶ ཡ་ས་སྶི་ནོ.
༢༠༢. ‘‘སཱ་ཧཾ ཝ་ནྡི་ཏྭཱ [ཝ་ནྡི་ཏྭ (སཱི.)] པཱ་དཱ་ནི, ཙུ་ཏཱ ཙ་ཎྜཱ་ལ་ཡོ་ནི་ཡཱ;
ཝི་མཱ་ནཾ ས་བྦ་ཏོ བྷ་དྡཾ, ཨུ་པ་པ་ནྣ་མྷི ན་ནྡ་ནེ.
༢༠༣. ‘‘ཨ་ཙྪ་རཱ་ནཾ ས་ཏ་ས་ཧ་སྶཾ, པུ་ར་ཀྑ་ཏྭཱ་ན [པུ་ར་ཀྑི་ཏྭཱ མཾ (སྱཱ. ཀ.)] ཏི་ཊྛ་ཏི;
ཏཱ་སཱ་ཧཾ པ་ཝ་རཱ སེ་ཊྛཱ, ཝ་ཎྞེ་ན ཡ་ས་སཱ་ཡུ་ནཱ.
༢༠༤. ‘‘པ་ཧཱུ་ཏ་ཀ་ཏ་ཀ་ལྱཱ་ཎཱ, ས་མྤ་ཛཱ་ནཱ པ་ཊི་སྶ་ཏཱ [པ་ཏི་སྶ་ཏཱ (སཱི. སྱཱ.)];
མུ་ནིཾ ཀཱ་རུ་ཎི་ཀཾ ལོ་ཀེ, ཏཾ བྷ་ནྟེ ཝ་ནྡི་ཏུ་མཱ་ག་ཏཱ’’ཏི.
༢༠༥. ཨི་དཾ ཝ་ཏྭཱ་ན ཙ་ཎྜཱ་ལཱི, ཀ་ཏ་ཉྙཱུ ཀ་ཏ་ཝེ་དི་ནཱི;
ཝ་ནྡི་ཏྭཱ ཨ་ར་ཧ་ཏོ པཱ་དེ, ཏ་ཏྠེ་ཝ་ནྟ་ར་དྷཱ་ཡ་ཐཱ་ཏི [ཏ་ཏྠེ་ཝ་ནྟ་ར་དྷཱ་ཡ་ཏཱི་ཏི (སྱཱ. ཀ.)].
ཙ་ཎྜཱ་ལི་ཝི་མཱ་ནཾ ཙ་ཏུ་ཏྠཾ.
༥. བྷ་དྡི་ཏྠི་ཝི་མཱ་ན་ཝ་ཏྠུ
༢༠༦. ‘‘ནཱི་ལཱ པཱི་ཏཱ ཙ ཀཱ་ལཱ༹ ཙ, མ་ཉྫི་ཊྛཱ [མ་ཉྫེ་ཊྛཱ (སཱི.), མ་ཉྫ་ཊྛཱ (པཱི.)] ཨ་ཐ ལོ་ཧི་ཏཱ;
ཨུ་ཙྩཱ་ཝ་ཙཱ་ནཾ ཝ་ཎྞཱ་ནཾ, ཀི་ཉྫ་ཀྑ་པ་རི་ཝཱ་རི་ཏཱ.
༢༠༧. ‘‘མ་ནྡཱ་ར་ཝཱ་ནཾ པུ་པྥཱ་ནཾ, མཱ་ལཾ དྷཱ་རེ་སི མུ་དྡྷ་ནི;
ན་ཡི་མེ ཨ་ཉྙེ་སུ ཀཱ་ཡེ་སུ, རུ་ཀྑཱ ས་ནྟི སུ་མེ་དྷ་སེ.
༢༠༨. ‘‘ཀེ་ན ཀཱ་ཡཾ ཨུ་པ་པ་ནྣཱ, ཏཱ་ཝ་ཏིཾ་སཾ ཡ་ས་སྶི་ནཱི;
དེ་ཝ་ཏེ པུ་ཙྪི་ཏཱ་ཙི་ཀྑ, ཀི་སྶ ཀ་མྨ་སྶི་དཾ ཕ་ལ’’ནྟི.
༢༠༩. ‘‘བྷ་དྡི་ཏྠི་ཀཱ་ཏི [བྷ་དྡི་ཏྠཱི་ཏི (སཱི.)] མཾ ཨ་ཉྙཾ་སུ, ཀི་མི་ལཱ་ཡཾ ཨུ་པཱ་སི་ཀཱ;
ས་དྡྷཱ སཱི་ལེ་ན ས་མྤ་ནྣཱ, སཾ་ཝི་བྷཱ་ག་ར་ཏཱ ས་དཱ.
༢༡༠. ‘‘ཨ་ཙྪཱ་ད་ན་ཉྩ བྷ་ཏྟ་ཉྩ, སེ་ནཱ་ས་ནཾ པ་དཱི་པི་ཡཾ;
ཨ་དཱ་སིཾ ཨུ་ཛུ་བྷཱུ་ཏེ་སུ, ཝི་པྤ་ས་ནྣེ་ན ཙེ་ཏ་སཱ.
༢༡༡. ‘‘ཙཱ་ཏུ་དྡ་སིཾ པ་ཉྩ་ད་སིཾ, ཡཱ ཙ པ་ཀྑ་སྶ ཨ་ཊྛ་མཱི;
པཱ་ཊི་ཧཱ་རི་ཡ་པ་ཀྑ་ཉྩ, ཨ་ཊྛ་ངྒ་སུ་ས་མཱ་ག་ཏཾ.
༢༡༢. ‘‘ཨུ་པོ་ས་ཐཾ ཨུ་པ་ཝ་སི་སྶཾ, ས་དཱ སཱི་ལེ་སུ སཾ་ཝུ་ཏཱ;
ས་ཉྙ་མཱ སཾ་ཝི་བྷཱ་གཱ ཙ, ཝི་མཱ་ནཾ ཨཱ་ཝ་སཱ་མ་ཧཾ.
༢༡༣. ‘‘པཱ་ཎཱ་ཏི་པཱ་ཏཱ ཝི་ར་ཏཱ, མུ་སཱ་ཝཱ་དཱ ཙ ས་ཉྙ་ཏཱ;
ཐེ་ཡྻཱ ཙ ཨ་ཏི་ཙཱ་རཱ ཙ, མ་ཛྫ་པཱ་ནཱ ཙ ཨཱ་ར་ཀཱ.
༢༡༤. ‘‘པ་ཉྩ་སི་ཀྑཱ་པ་དེ ར་ཏཱ, ཨ་རི་ཡ་ས་ཙྩཱ་ན ཀོ་ཝི་དཱ;
ཨུ་པཱ་སི་ཀཱ ཙ་ཀྑུ་མ་ཏོ, ཨ་པྤ་མཱ་ད་ཝི་ཧཱ་རི་ནཱི.
ཀ་ཏཱ་ཝཱ་སཱ ཀ་ཏ་ཀུ་ས་ལཱ ཏ་ཏོ ཙུ་ཏཱ [ཀ་ཏཱ་ཝ་ཀཱ་སཱ ཀ་ཏ་ཀུ་ས་ལཱ (ཀ.)],
ས་ཡཾ པ་བྷཱ ཨ་ནུ་ཝི་ཙ་རཱ་མི ན་ནྡ་ནཾ.
༢༡༥. ‘‘བྷི་ཀྑཱུ ཙཱ་ཧཾ པ་ར་མ་ཧི་ཏཱ་ནུ་ཀ་མྤ་ཀེ, ཨ་བྷོ་ཛ་ཡིཾ ཏ་པ་སྶི་ཡུ་གཾ མ་ཧཱ་མུ་ནིཾ;
ཀ་ཏཱ་ཝཱ་སཱ ཀ་ཏ་ཀུ་ས་ལཱ ཏ་ཏོ ཙུ་ཏཱ [ཀ་ཏཱ་ཝ་ཀཱ་སཱ ཀ་ཏ་ཀུ་ས་ལཱ (ཀ.)], ས་ཡཾ པ་བྷཱ ཨ་ནུ་ཝི་ཙ་རཱ་མི ན་ནྡ་ནཾ.
༢༡༦. ‘‘ཨ་ཊྛ་ངྒི་ཀཾ ཨ་པ་རི་མི་ཏཾ སུ་ཁཱ་ཝ་ཧཾ, ཨུ་པོ་ས་ཐཾ ས་ཏ་ཏ་མུ་པཱ་ཝ་སིཾ ཨ་ཧཾ;
ཀ་ཏཱ་ཝཱ་སཱ ཀ་ཏ་ཀུ་ས་ལཱ ཏ་ཏོ ཙུ་ཏཱ [ཀ་ཏཱ་ཝ་ཀཱ་སཱ ཀ་ཏ་ཀུ་ས་ལཱ (ཀ.)], ས་ཡཾ པ་བྷཱ ཨ་ནུ་ཝི་ཙ་རཱ་མི ན་ནྡ་ན’’ནྟི.
བྷ་དྡི་ཏྠི་ཝི་མཱ་ནཾ [བྷ་དྡི་ཏྠི་ཀཱ་ཝི་མཱ་ནཾ (སྱཱ.)] པ་ཉྩ་མཾ.
༦. སོ་ཎ་དི་ནྣཱ་ཝི་མཱ་ན་ཝ་ཏྠུ
༢༡༧. ‘‘ཨ་བྷི་ཀྐ་ནྟེ་ན ཝ་ཎྞེ་ན, ཡཱ ཏྭཾ ཏི་ཊྛ་སི དེ་ཝ་ཏེ;
ཨོ་བྷཱ་སེ་ནྟཱི དི་སཱ ས་བྦཱ, ཨོ་ས་དྷཱི ཝི་ཡ ཏཱ་ར་ཀཱ.
༢༡༨. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༢༡༩. ‘‘པུ་ཙྪཱ་མི ཏཾ དེ་ཝི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༢༢༠. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༢༢༡. ‘‘སོ་ཎ་དི་ནྣཱ་ཏི མཾ ཨ་ཉྙཾ་སུ, ནཱ་ལ༹་ནྡཱ་ཡཾ ཨུ་པཱ་སི་ཀཱ;
ས་དྡྷཱ སཱི་ལེ་ན ས་མྤ་ནྣཱ, སཾ་ཝི་བྷཱ་ག་ར་ཏཱ ས་དཱ.
༢༢༢. ‘‘ཨ་ཙྪཱ་ད་ན་ཉྩ བྷ་ཏྟ་ཉྩ, སེ་ནཱ་ས་ནཾ པ་དཱི་པི་ཡཾ;
ཨ་དཱ་སིཾ ཨུ་ཛུ་བྷཱུ་ཏེ་སུ, ཝི་པྤ་ས་ནྣེ་ན ཙེ་ཏ་སཱ.
༢༢༣. ‘‘ཙཱ་ཏུ་དྡ་སིཾ པ་ཉྩ་ད་སིཾ, ཡཱ ཙ པ་ཀྑ་སྶ ཨ་ཊྛ་མཱི;
པཱ་ཊི་ཧཱ་རི་ཡ་པ་ཀྑ་ཉྩ, ཨ་ཊྛ་ངྒ་སུ་ས་མཱ་ག་ཏཾ.
༢༢༤. ‘‘ཨུ་པོ་ས་ཐཾ ཨུ་པ་ཝ་སི་སྶཾ, ས་དཱ སཱི་ལེ་སུ སཾ་ཝུ་ཏཱ;