༡༡. པ་ཋ་མ་པ་ཏི་བྦ་ཏཱ་ཝི་མཱ་ན་ཝ་ཏྠུ

༩༣. ‘‘ཀོ་ཉྩཱ མ་ཡཱུ་རཱ དི་ཝི་ཡཱ ཙ ཧཾ་སཱ, ཝ་གྒུ་སྶ་རཱ ཀོ་ཀི་ལཱ ས་མྤ་ཏ་ནྟི;

པུ་པྥཱ་བྷི་ཀི་ཎྞཾ ར་མྨ་མི་དཾ ཝི་མཱ་ནཾ, ཨ་ནེ་ཀ་ཙི་ཏྟཾ ན་ར་ནཱ་རི་སེ་ཝི་ཏཾ [ན་ར་ནཱ་རཱི་བྷི སེ་ཝི་ཏཾ (ཀ.)].

༩༤. ‘‘ཏ་ཏྠ་ཙྪ་སི དེ་ཝི མ་ཧཱ་ནུ་བྷཱ་ཝེ, ཨི་དྡྷཱི ཝི་ཀུ་བྦ་ནྟི ཨ་ནེ་ཀ་རཱུ་པཱ;

ཨི་མཱ ཙ ཏེ ཨ་ཙྪ་རཱ་ཡོ ས་མ་ནྟ་ཏོ, ན་ཙྩ་ནྟི གཱ་ཡ་ནྟི པ་མོ་ད་ཡ་ནྟི ཙ.

༩༥. ‘‘དེ་ཝི་དྡྷི་པ་ཏྟཱ་སི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;

ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.

༩༦. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;

པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.

༩༧. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏཱ, པ་ཏི་བྦ་ཏཱ་ན་ཉྙ་མ་ནཱ ཨ་ཧོ་སིཾ;

མཱ་ཏཱ་ཝ པུ་ཏྟཾ ཨ་ནུ་ར་ཀྑ་མཱ་ནཱ, ཀུ་དྡྷཱ་པི་ཧཾ [ཀུ་དྡྷཱ་པ་ཧཾ (སཱི.)] ན་པྥ་རུ་སཾ ཨ་ཝོ་ཙཾ.

༩༨. ‘‘ས་ཙྩེ ཋི་ཏཱ མོ་ས་ཝ་ཛྫཾ པ་ཧཱ་ཡ, དཱ་ནེ ར་ཏཱ ས་ངྒ་ཧི་ཏ་ཏྟ་བྷཱ་ཝཱ;

ཨ་ནྣ་ཉྩ པཱ་ན་ཉྩ པ་ས་ནྣ་ཙི་ཏྟཱ, ས་ཀྐ་ཙྩ དཱ་ནཾ ཝི་པུ་ལཾ ཨ་དཱ་སིཾ.

༩༩. ‘‘ཏེ་ན མེ་ཏཱ་དི་སོ ཝ་ཎྞོ, ཏེ་ན མེ ཨི་དྷ མི་ཛ྄ཛྷ་ཏི;

ཨུ་པྤ་ཛྫ་ནྟི ཙ མེ བྷོ་གཱ, ཡེ ཀེ་ཙི མ་ན་སོ པི་ཡཱ.

༡༠༠. ‘‘ཨ་ཀྑཱ་མི ཏེ བྷི་ཀྑུ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏཱ ཡ་མ་ཀཱ་སི པུ་ཉྙཾ;

ཏེ་ན་མྷི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.

པ་ཋ་མ་པ་ཏི་བྦ་ཏཱ་ཝི་མཱ་ནཾ ཨེ་ཀཱ་ད་ས་མཾ.