༡༢. དུ་ཏི་ཡ་པ་ཏི་བྦ་ཏཱ་ཝི་མཱ་ན་ཝ་ཏྠུ
༡༠༡. ‘‘ཝེ་ལུ༹་རི་ཡ་ཐ་མྦྷཾ རུ་ཙི་རཾ པ་བྷ་སྶ་རཾ, ཝི་མཱ་ན་མཱ་རུ་ཡ྄ཧ ཨ་ནེ་ཀ་ཙི་ཏྟཾ;
ཏ་ཏྠ་ཙྪ་སི དེ་ཝི མ་ཧཱ་ནུ་བྷཱ་ཝེ, ཨུ་ཙྩཱ་ཝ་ཙཱ ཨི་དྡྷི ཝི་ཀུ་བྦ་མཱ་ནཱ;
ཨི་མཱ ཙ ཏེ ཨ་ཙྪ་རཱ་ཡོ ས་མ་ནྟ་ཏོ, ན་ཙྩ་ནྟི གཱ་ཡ་ནྟི པ་མོ་ད་ཡ་ནྟི ཙ.
༡༠༢. ‘‘དེ་ཝི་དྡྷི་པ་ཏྟཱ་སི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༡༠༣. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༡༠༤. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏཱ, ཨུ་པཱ་སི་ཀཱ ཙ་ཀྑུ་མ་ཏོ ཨ་ཧོ་སིཾ;
པཱ་ཎཱ་ཏི་པཱ་ཏཱ ཝི་ར་ཏཱ ཨ་ཧོ་སིཾ, ལོ་ཀེ ཨ་དི་ནྣཾ པ་རི་ཝ་ཛྫ་ཡི་སྶཾ.
༡༠༥. ‘‘ཨ་མ་ཛྫ་པཱ ནོ ཙ [ནཱ་པི (སྱཱ.)] མུ་སཱ ཨ་བྷཱ་ཎིཾ [ཨ་བྷཱ་སིཾ (ཀ.)], ས་ཀེ་ན སཱ་མི་ནཱ [སཱ་མི་ནཱ་ཝ (སཱི.)] ཨ་ཧོ་སིཾ ཏུ་ཊྛཱ;
ཨ་ནྣ་ཉྩ པཱ་ན་ཉྩ པ་ས་ནྣ་ཙི་ཏྟཱ, ས་ཀྐ་ཙྩ དཱ་ནཾ ཝི་པུ་ལཾ ཨ་དཱ་སིཾ.
༡༠༦. ‘‘ཏེ་ན མེ་ཏཱ་དི་སོ ཝ་ཎྞོ, ཏེ་ན མེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ མེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༠༧. ‘‘ཨ་ཀྑཱ་མི ཏེ བྷི་ཀྑུ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏཱ ཡ་མ་ཀཱ་སི པུ་ཉྙཾ;
ཏེ་ན་མྷི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.
དུ་ཏི་ཡ་པ་ཏི་བྦ་ཏཱ་ཝི་མཱ་ནཾ དྭཱ་ད་ས་མཾ.