༤. ཧུཾ་ཧུ་ངྐ་སུ་ཏྟཾ

༤. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཨུ་རུ་ཝེ་ལཱ་ཡཾ ཝི་ཧ་ར་ཏི ན་ཛྫཱ ནེ་ར་ཉྫ་རཱ་ཡ ཏཱི་རེ ཨ་ཛ་པཱ་ལ་ནི་གྲོ་དྷེ པ་ཋ་མཱ་བྷི་ས་མྦུ་དྡྷོ. ཏེ་ན ཁོ པ་ན ས་མ་ཡེ་ན བྷ་ག་ཝཱ ས་ཏྟཱ་ཧཾ ཨེ་ཀ་པ་ལླ་ངྐེ་ན ནི་སི་ནྣོ ཧོ་ཏི ཝི་མུ་ཏྟི་སུ་ཁ་པ་ཊི་སཾ་ཝེ་དཱི. ཨ་ཐ ཁོ བྷ་ག་ཝཱ ཏ་སྶ ས་ཏྟཱ་ཧ་སྶ ཨ་ཙྩ་ཡེ་ན ཏ་མྷཱ ས་མཱ་དྷི་མྷཱ ཝུ་ཊྛཱ་སི.

ཨ་ཐ ཁོ ཨ་ཉྙ་ཏ་རོ ཧུཾ་ཧུ་ངྐ་ཛཱ་ཏི་ཀོ [ཧུ་ཧུ་ངྐ་ཛཱ་ཏི་ཀོ (སཱི. སྱཱ. ཀཾ. པཱི.)] བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ སོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀི་ཏྟཱ་ཝ་ཏཱ ནུ ཁོ, བྷོ གོ་ཏ་མ, བྲཱ་ཧྨ་ཎོ ཧོ་ཏི, ཀ་ཏ་མེ ཙ པ་ན བྲཱ་ཧྨ་ཎ་ཀ་ར་ཎཱ [བྲཱ་ཧྨ་ཎ་ཀཱ་ར་ཀཱ (ཀ.)] དྷ་མྨཱ’’ཏི?

ཨ་ཐ ཁོ བྷ་ག་ཝཱ ཨེ་ཏ་མ་ཏྠཾ ཝི་དི་ཏྭཱ ཏཱ་ཡཾ ཝེ་ལཱ་ཡཾ ཨི་མཾ ཨུ་དཱ་ནཾ ཨུ་དཱ་ནེ་སི –

‘‘ཡོ བྲཱ་ཧྨ་ཎོ བཱ་ཧི་ཏ་པཱ་པ་དྷ་མྨོ,

ནི་ཧུཾ་ཧུ་ངྐོ [ནི་ཧུ་ཧུ་ངྐོ (སཱི. སྱཱ. ཀཾ པཱི.)] ནི་ཀྐ་སཱ་ཝོ ཡ་ཏ་ཏྟོ;

ཝེ་ད་ནྟ་གཱུ ཝཱུ་སི་ཏ་བྲ་ཧྨ་ཙ་རི་ཡོ,

དྷ་མྨེ་ན སོ བྲ་ཧྨ་ཝཱ་དཾ ཝ་དེ་ཡྻ;

ཡ་སྶུ་སྶ་དཱ ན་ཏྠི ཀུ་ཧི་ཉྩི ལོ་ཀེ’’ཏི. ཙ་ཏུ་ཏྠཾ;