༡. ཨེ་ཀཱུ་པོ་ས་ཐི་ཀཱ་ཐེ་རཱི་ཨ་པ་དཱ་ནཾ
༡. ‘‘ན་ག་རེ བ་ནྡྷུ་མ་ཏི་ཡཱ, བ་ནྡྷུ་མཱ ནཱ་མ ཁ་ཏྟི་ཡོ;
དི་ཝ་སེ པུ་ཎྞ་མཱ་ཡ སོ, ཨུ་པ་ཝ་སི ཨུ་པོ་ས་ཐཾ.
༢. ‘‘ཨ་ཧཾ ཏེ་ན ས་མ་ཡེ་ན, ཀུ་མྦྷ་དཱ་སཱི ཨ་ཧཾ ཏ་ཧིཾ;
དི་སྭཱ ས་རཱ་ཛ་ཀཾ སེ་ནཾ, ཨེ་ཝཱ་ཧཾ ཙི་ནྟ་ཡིཾ ཏ་དཱ.
༣. ‘རཱ་ཛཱ་པི ར་ཛྫཾ ཚ་ཌྜེ་ཏྭཱ, ཨུ་པ་ཝ་སི ཨུ་པོ་ས་ཐཾ;
ས་ཕ་ལཾ ནཱུ་ན ཏཾ ཀ་མྨཾ, ཛ་ན་ཀཱ་ཡོ པ་མོ་དི་ཏོ’.
༤. ‘‘ཡོ་ནི་སོ པ་ཙྩ་ཝེ་ཀྑི་ཏྭཱ, དུ་གྒ་ཙྩ་ཉྩ [དུ་གྒ་ཏི་ཉྩ (སྱཱ.)] ད་ལི་དྡ་ཏཾ [ད་ལི༹་དྡ་ཏཾ (སཱི.)];
མཱ་ན་སཾ ས་མྤ་ཧཾ་སི་ཏྭཱ, ཨུ་པ་ཝ་སིཾ ཨུ་པོ་ས་ཐཾ.
༥. ‘‘ཨ་ཧཾ ཨུ་པོ་ས་ཐཾ ཀ་ཏྭཱ, ས་མྨཱ་ས་མྦུ་དྡྷ་སཱ་ས་ནེ;
ཏེ་ན ཀ་མྨེ་ན སུ་ཀ་ཏེ་ན, ཏཱ་ཝ་ཏིཾ་ས་མ་ག་ཙྪ་ཧཾ.
༦. ‘‘ཏ་ཏྠ མེ སུ་ཀ་ཏཾ བྱ་མྷཾ, ཨུ་བྦྷ་ཡོ་ཛ་ན་མུ་གྒ་ཏཾ [ཨུ་དྡྷཾ ཡོ་ཛ་ན་མུ་གྒ་ཏཾ (སཱི. སྱཱ. པཱི.)];
ཀཱུ་ཊཱ་གཱ་ར་ཝ་རཱུ་པེ་ཏཾ, མ་ཧཱ་ས་ན་སུ་བྷཱུ་སི་ཏཾ.
༧. ‘‘ཨ་ཙྪ་རཱ ས་ཏ་ས་ཧ་སྶཱ, ཨུ་པ་ཏི་ཊྛ་ནྟི མཾ ས་དཱ;
ཨ་ཉྙེ དེ་ཝེ ཨ་ཏི་ཀྐ་མྨ, ཨ་ཏི་རོ་ཙཱ་མི ས་བྦ་དཱ.
༨. ‘‘ཙ་ཏུ་ས་ཊྛི དེ་ཝ་རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ;
ཏེ་ས་ཊྛི ཙ་ཀྐ་ཝ་ཏྟཱི་ནཾ, མ་ཧེ་སི་ཏྟ་མ་ཀཱ་ར་ཡིཾ.
༩. ‘‘སུ་ཝ་ཎྞ་ཝ་ཎྞཱ ཧུ་ཏྭཱ་ན, བྷ་ཝེ་སུ སཾ་ས་རཱ་མ་ཧཾ;
ས་བྦ་ཏྠ པ་ཝ་རཱ ཧོ་མི, ཨུ་པོ་ས་ཐ་སྶི་དཾ ཕ་ལཾ.
༡༠. ‘‘ཧ་ཏྠི་ཡཱ་ནཾ ཨ་སྶ་ཡཱ་ནཾ, ར་ཐ་ཡཱ་ན་ཉྩ སཱི་ཝི་ཀཾ [ཀེ་ཝ་ལཾ (སཱི. སྱཱ. པཱི.)];
ལ་བྷཱ་མི ས་བྦ་མེ་ཝེ་ཏཾ, ཨུ་པོ་ས་ཐ་སྶི་དཾ ཕ་ལཾ.
༡༡. ‘‘སོ་ཎྞ་མ་ཡཾ རཱུ་པི་མ་ཡཾ, ཨ་ཐོ་པི ཕ་ལི་ཀཱ་མ་ཡཾ;
ལོ་ཧི་ཏ་ངྒ་མ་ཡ་ཉྩེ་ཝ, ས་བྦཾ པ་ཊི་ལ་བྷཱ་མ་ཧཾ.
༡༢. ‘‘ཀོ་སེ་ཡྻ་ཀ་མྦ་ལི་ཡཱ་ནི, ཁོ་མ་ཀ་པྤཱ་སི་ཀཱ་ནི ཙ;
མ་ཧ་གྒྷཱ་ནི ཙ ཝ་ཏྠཱ་ནི, ས་བྦཾ པ་ཊི་ལ་བྷཱ་མ་ཧཾ.
༡༣. ‘‘ཨ་ནྣཾ པཱ་ནཾ ཁཱ་ད་ནཱི་ཡཾ, ཝ་ཏྠ་སེ་ནཱ་ས་ནཱ་ནི ཙ;
ས་བྦ་མེ་ཏཾ པ་ཊི་ལ་བྷེ, ཨུ་པོ་ས་ཐ་སྶི་དཾ ཕ་ལཾ.
༡༤. ‘‘ཝ་ར་ག་ནྡྷ་ཉྩ མཱ་ལ་ཉྩ, ཙུ་ཎྞ་ཀ་ཉྩ ཝི་ལེ་པ་ནཾ;
ས་བྦ་མེ་ཏཾ པ་ཊི་ལ་བྷེ, ཨུ་པོ་ས་ཐ་སྶི་དཾ ཕ་ལཾ.
༡༥. ‘‘ཀཱུ་ཊཱ་གཱ་ར་ཉྩ པཱ་སཱ་དཾ, མ་ཎྜ་པཾ ཧ་མྨི་ཡཾ གུ་ཧཾ;
ས་བྦ་མེ་ཏཾ པ་ཊི་ལ་བྷེ, ཨུ་པོ་ས་ཐ་སྶི་དཾ ཕ་ལཾ.
༡༦. ‘‘ཛཱ་ཏི་ཡཱ ས་ཏྟ་ཝ་སྶཱ་ཧཾ, པ་བྦ་ཛིཾ ཨ་ན་གཱ་རི་ཡཾ;
ཨ་ཌྜྷ་མཱ་སེ ཨ་ས་མྤ་ཏྟེ, ཨ་ར་ཧ་ཏྟ་མ་པཱ་པུ་ཎིཾ.
༡༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༡༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨུ་པོ་ས་ཐ་སྶི་དཾ ཕ་ལཾ.
༡༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༢༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨེ་ཀཱུ་པོ་ས་ཐི་ཀཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀཱུ་པོ་ས་ཐི་ཀཱ་ཐེ་རི་ཡཱ་པ་དཱ་ནཾ པ་ཋ་མཾ.