༡. སུ་མེ་དྷཱ་ཐེ་རཱི་ཨ་པ་དཱ་ནཾ
ཨ་ཐ ཐེ་རི་ཀཱ་པ་དཱ་ནཱ་ནི སུ་ཎཱ་ཐ –
༡. ‘‘བྷ་ག་ཝ་ཏི ཀོ་ཎཱ་ག་མ་ནེ, ས་ངྒྷཱ་རཱ་མ་མྷི ན་ཝ་ནི་ཝེ་ས་ན་མྷི [ནི་ཝེ་ས་མྷི (སྱཱ.)];
ས་ཁི་ཡོ ཏི་སྶོ ཛ་ནི་ཡོ, ཝི་ཧཱ་ར་དཱ་ནཾ ཨ་དཱ་སི་མྷ.
༢. ‘‘ད་ས་ཀྑ་ཏྟུཾ ས་ཏ་ཀྑ་ཏྟུཾ, ད་ས་ས་ཏ་ཀྑ་ཏྟུཾ ས་ཏཱ་ན་ཉྩ ས་ཏ་ཀྑ་ཏྟུཾ [ས་ཏཱ་ནི ཙ ས་ཏྟ་ཀྑ་ཏྟུཾ (སཱི. ཀ.)];
དེ་ཝེ་སུ ཨུ་པ་པ་ཛྫི་མྷ, ཀོ ཝཱ་དོ མཱ་ནུ་སེ བྷ་ཝེ.
༣. ‘‘དེ་ཝེ མ་ཧི་དྡྷི་ཀཱ ཨ་ཧུ་མྷ, མཱ་ནུ་ས་ཀ་མྷི ཀོ ཝཱ་དོ;
ས་ཏྟ་ར་ཏ་ན་མ་ཧེ་སཱི [ས་ཏྟ་ར་ཏ་ན་སྶ མ་ཧེ་སཱི (སཱི. པཱི.)], ཨི་ཏྠི་ར་ཏ་ནཾ ཨ་ཧཾ བྷ་ཝིཾ.
༤. ‘‘ཨི་དྷ ས་ཉྩི་ཏ་ཀུ་ས་ལཱ [ཏ་ཏྠ ས་ཉྩི་ཏཾ ཀུ་ས་ལཾ (སྱཱ.)], སུ་ས་མི་དྡྷ་ཀུ་ལ་པྤ་ཛཱ;
དྷ་ན་ཉྫཱ་ནཱི ཙ ཁེ་མཱ ཙ, ཨ་ཧ་མྤི ཙ ཏ་ཡོ ཛ་ནཱ.
༥. ‘‘ཨཱ་རཱ་མཾ སུ་ཀ་ཏཾ ཀ་ཏྭཱ, ས་བྦཱ་ཝ་ཡ་ཝ་མ་ཎྜི་ཏཾ;
བུ་དྡྷ་པྤ་མུ་ཁ་ས་ངྒྷ་སྶ, ནི་ཡྻཱ་དེ་ཏྭཱ ས་མོ་དི་ཏཱ.
༦. ‘‘ཡ་ཏྠ ཡ་ཏྠཱུ་པ་པ་ཛྫཱ་མི, ཏ་སྶ ཀ་མྨ་སྶ ཝཱ་ཧ་སཱ;
དེ་ཝེ་སུ ཨ་གྒ་ཏཾ པ་ཏྟཱ, མ་ནུ་སྶེ་སུ ཏ་ཐེ་ཝ ཙ.
༧. ‘‘ཨི་མ་སྨིཾ་ཡེ་ཝ ཀ་པྤ་མྷི, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༨. ‘‘ཨུ་པ་ཊྛཱ་ཀོ མ་ཧེ་སི་སྶ, ཏ་དཱ ཨཱ་སི ན་རི་སྶ་རོ;
ཀཱ་སི་རཱ་ཛཱ ཀི་ཀཱི ནཱ་མ, བཱ་རཱ་ཎ་སི་པུ་རུ་ཏྟ་མེ.
༩. ‘‘ཏ་སྶཱ་སུཾ ས་ཏྟ དྷཱི་ཏ་རོ, རཱ་ཛ་ཀ་ཉྙཱ སུ་ཁེ་དྷི་ཏཱ [སུ་ཁེ་ཐི་ཏཱ (སྱཱ.)];
བུ་དྡྷོ་པ་ཊྛཱ་ན་ནི་ར་ཏཱ, བྲ་ཧྨ་ཙ་རི་ཡཾ ཙ་རིཾ་སུ ཏཱ.
༡༠. ‘‘ཏཱ་སཾ ས་ཧཱ་ཡི་ཀཱ ཧུ་ཏྭཱ, སཱི་ལེ་སུ སུ་ས་མཱ་ཧི་ཏཱ;
ད་ཏྭཱ དཱ་ནཱ་ནི ས་ཀྐ་ཙྩཾ, ཨ་གཱ་རེ་ཝ ཝ་ཏཾ [ཨ་གཱ་རེ་ཝ ཝ་ཏྟཾ (སྱཱ.)] ཙ་རིཾ.
༡༡. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་སཱུ་པ་གཱ ཨ་ཧཾ.
༡༢. ‘‘ཏ་ཏོ ཙུ་ཏཱ ཡཱ་མ་མ་གཾ [ཡཱ་མ་ས་གྒཾ (སྱཱ.)], ཏ་ཏོ་ཧཾ ཏུ་སི་ཏཾ ག་ཏཱ;
ཏ་ཏོ ཙ ནི་མྨཱ་ན་ར་ཏིཾ, ཝ་ས་ཝ་ཏྟི་པུ་རཾ ཏ་ཏོ.
༡༣. ‘‘ཡ་ཏྠ ཡ་ཏྠཱུ་པ་པ་ཛྫཱ་མི, པུ་ཉྙ་ཀ་མྨ་ས་མོ་ཧི་ཏཱ;
ཏ་ཏྠ ཏ་ཏྠེ་ཝ རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ.
༡༤. ‘‘ཏ་ཏོ ཙུ་ཏཱ མ་ནུ་སྶ་ཏྟེ, རཱ་ཛཱུ་ནཾ ཙ་ཀྐ་ཝ་ཏྟི་ནཾ;
མ་ཎྜ་ལཱི་ན་ཉྩ རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ.
༡༥. ‘‘ས་མྤ་ཏྟི་མ་ནུ་བྷོ་ཏྭཱ་ན, དེ་ཝེ་སུ མཱ་ནུ་སེ་སུ ཙ;
ས་བྦ་ཏྠ སུ་ཁི་ཏཱ ཧུ་ཏྭཱ, ནེ་ཀ་ཛཱ་ཏཱི་སུ སཾ་ས་རིཾ.
༡༦. ‘‘སོ ཧེ་ཏུ ཙ སོ པ་བྷ་ཝོ, ཏ་མྨཱུ་ལཾ སཱ་ས་ནེ ཁ་མཾ [ཏ་མྨཱུ་ལཾ སཱ ཙ སཱ་ས་ནེ ཁ་ནྟི (སཱི. པཱི. ཀ.)];
པ་ཋ་མཾ ཏཾ ས་མོ་དྷཱ་ནཾ, ཏཾ དྷ་མྨ་ར་ཏཱ་ཡ ནི་བྦཱ་ནཾ [ནི་བྦུ་ཏཾ (སྱཱ.)].
༡༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གཱི་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝཱ.
༡༨. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ [བུ་དྡྷ་སེ་ཊྛ་སྶ (སཱི. སྱཱ. ཀ.)] ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༡༩. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ སུ་མེ་དྷཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སུ་མེ་དྷཱ་ཐེ་རི་ཡཱ་པ་དཱ་ནཾ པ་ཋ་མཾ.