༢༠. ས་ཊྛི་ནི་པཱ་ཏོ
༡. མ་ཧཱ་མོ་གྒ་ལླཱ་ན་ཏྠེ་ར་གཱ་ཐཱ
༡༡༤༩. ‘‘ཨཱ་ར་ཉྙི་ཀཱ པི་ཎྜ་པཱ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དཱ་ལེ་མུ མ་ཙྩུ་ནོ སེ་ནཾ, ཨ་ཛ྄ཛྷ་ཏྟཾ སུ་ས་མཱ་ཧི་ཏཱ.
༡༡༥༠. ‘‘ཨཱ་ར་ཉྙི་ཀཱ པི་ཎྜ་པཱ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དྷུ་ནཱ་མ མ་ཙྩུ་ནོ སེ་ནཾ, ན་ལཱ༹་གཱ་རཾ་ཝ ཀུ་ཉྫ་རོ.
༡༡༥༡. ‘‘རུ་ཀྑ་མཱུ་ལི་ཀཱ སཱ་ཏ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དཱ་ལེ་མུ མ་ཙྩུ་ནོ སེ་ནཾ, ཨ་ཛ྄ཛྷ་ཏྟཾ སུ་ས་མཱ་ཧི་ཏཱ.
༡༡༥༢. ‘‘རུ་ཀྑ་མཱུ་ལི་ཀཱ སཱ་ཏ་ཏི་ཀཱ, ཨུ་ཉྪཱ་པ་ཏྟཱ་ག་ཏེ ར་ཏཱ;
དྷུ་ནཱ་མ མ་ཙྩུ་ནོ སེ་ནཾ, ན་ལཱ༹་གཱ་རཾ་ཝ ཀུ་ཉྫ་རོ.
༡༡༥༣. ‘‘ཨ་ཊྛི་ཀ་ངྐ་ལ་ཀུ་ཊི་ཀེ, མཾ་ས་ནྷཱ་རུ་པ་སི་བྦི་ཏེ;
དྷི་ར་ཏྠུ པུ་རེ དུ་གྒ་ནྡྷེ, པ་ར་ག་ཏྟེ མ་མཱ་ཡ་སེ.
༡༡༥༤. ‘‘གཱུ་ཐ་བྷ་སྟེ ཏ་ཙོ་ན་དྡྷེ, ཨུ་ར་ག་ཎྜི་པི་སཱ་ཙི་ནི;
ན་ཝ སོ་ཏཱ་ནི ཏེ ཀཱ་ཡེ, ཡཱ་ནི ས་ནྡ་ནྟི ས་བྦ་དཱ.
༡༡༥༥. ‘‘ཏ་ཝ ས་རཱི་རཾ ན་ཝ་སོ་ཏཾ, དུ་གྒ་ནྡྷ་ཀ་རཾ པ་རི་བ་ནྡྷཾ;
བྷི་ཀྑུ པ་རི་ཝ་ཛྫ་ཡ་ཏེ ཏཾ, མཱི་ལ༹ྷཾ ཙ ཡ་ཐཱ སུ་ཙི་ཀཱ་མོ.
༡༡༥༦. ‘‘ཨེ་ཝ་ཉྩེ ཏཾ ཛ་ནོ ཛ་ཉྙཱ, ཡ་ཐཱ ཛཱ་ནཱ་མི ཏཾ ཨ་ཧཾ;
ཨཱ་ར་ཀཱ པ་རི་ཝ་ཛྫེ་ཡྻ, གཱུ་ཐ་ཊྛཱ་ནཾ་ཝ པཱ་ཝུ་སེ’’.
༡༡༥༧. ‘‘ཨེ་ཝ་མེ་ཏཾ མ་ཧཱ་ཝཱི་ར, ཡ་ཐཱ ས་མ་ཎ བྷཱ་ས་སི;
ཨེ་ཏྠ ཙེ་ཀེ ཝི་སཱི་ད་ནྟི, པ་ངྐ་མྷི་ཝ ཛ་ར་གྒ་ཝོ.
༡༡༥༨. ‘‘ཨཱ་ཀཱ་ས་མྷི ཧ་ལི་དྡི་ཡཱ, ཡོ མ་ཉྙེ་ཐ ར་ཛེ་ཏ་ཝེ;
ཨ་ཉྙེ་ན ཝཱ་པི ར་ངྒེ་ན, ཝི་གྷཱ་ཏུ་ད་ཡ་མེ་ཝ ཏཾ.
༡༡༥༩. ‘‘ཏ་དཱ་ཀཱ་ས་ས་མཾ ཙི་ཏྟཾ, ཨ་ཛ྄ཛྷ་ཏྟཾ སུ་ས་མཱ་ཧི་ཏཾ;
མཱ པཱ་པ་ཙི་ཏྟེ ཨཱ་སཱ་དི, ཨ་གྒི་ཁ་ནྡྷཾ་ཝ པ་ཀྑི་མཱ.
༡༡༦༠. ‘‘པ་སྶ ཙི་ཏྟ་ཀ་ཏཾ བི་མྦཾ, ཨ་རུ་ཀཱ་ཡཾ ས་མུ་སྶི་ཏཾ;
ཨཱ་ཏུ་རཾ བ་ཧུ་ས་ངྐ་པྤཾ, ཡ་སྶ ན་ཏྠི དྷུ་ཝཾ ཋི་ཏི.
༡༡༦༡. ‘‘པ་སྶ ཙི་ཏྟ་ཀ་ཏཾ རཱུ་པཾ, མ་ཎི་ནཱ ཀུ་ཎྜ་ལེ་ན ཙ;
ཨ་ཊྛིཾ ཏ་ཙེ་ན ཨོ་ན་དྡྷཾ, ས་ཧ ཝ་ཏྠེ་ཧི སོ་བྷ་ཏི.
༡༡༦༢. ‘‘ཨ་ལ་ཏྟ་ཀ་ཀ་ཏཱ པཱ་དཱ, མུ་ཁཾ ཙུ་ཎྞ་ཀ་མ་ཀྑི་ཏཾ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༡༡༦༣. ‘‘ཨ་ཊྛ་པ་ད་ཀ་ཏཱ ཀེ་སཱ, ནེ་ཏྟཱ ཨ་ཉྫ་ན་མ་ཀྑི་ཏཱ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༡༡༦༤. ‘‘ཨ་ཉྫ་ནཱི་ཝ ན་ཝཱ ཙི་ཏྟཱ, པཱུ་ཏི་ཀཱ་ཡོ ཨ་ལ་ངྐ་ཏོ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༡༡༦༥. ‘‘ཨོ་ད་ཧི མི་ག་ཝོ པཱ་སཾ, ནཱ་ས་དཱ ཝཱ་གུ་རཾ མི་གོ;
བྷུ་ཏྭཱ ནི་ཝཱ་པཾ ག་ཙྪཱ་མ, ཀ་དྡ་ནྟེ མི་ག་བ་ནྡྷ་ཀེ.
༡༡༦༦. ‘‘ཚི་ནྣོ པཱ་སོ མི་ག་ཝ་སྶ, ནཱ་ས་དཱ ཝཱ་གུ་རཾ མི་གོ;
བྷུ་ཏྭཱ ནི་ཝཱ་པཾ ག་ཙྪཱ་མ, སོ་ཙ་ནྟེ མི་ག་ལུ་དྡ་ཀེ.
༡༡༦༧. ‘‘ཏ་དཱ་སི ཡཾ བྷིཾ་ས་ན་ཀཾ, ཏ་དཱ་སི ལོ་མ་ཧཾ་ས་ནཾ;
ཨ་ནེ་ཀཱ་ཀཱ་ར་ས་མྤ་ནྣེ, སཱ་རི་པུ་ཏྟ་མྷི ནི་བྦུ་ཏེ.
༡༡༦༨. [དཱི. ནི. ༢.༢༢༡, ༢༧༢; སཾ. ནི. ༡.༡༨༦; ༢.༡༤༣; ཨ་པ. ཐེ་ར ༡.༢.༡༡༥; ཛཱ. ༡.༡.༩༥] ‘‘ཨ་ནི་ཙྩཱ ཝ་ཏ ས་ངྑཱ་རཱ ཨུ་པྤཱ་ད་ཝ་ཡ དྷ་མྨི་ནོ.
ཨུ་པ་ཛྫི་ཏྭཱ ནི་རུ་ཛ྄ཛྷ་ནྟི, ཏེ་སཾ ཝཱུ་པ་ས་མོ སུ་ཁོ.
༡༡༦༩. ‘‘སུ་ཁུ་མཾ ཏེ པ་ཊི་ཝི་ཛ྄ཛྷ་ནྟི, ཝཱ་ལ་གྒཾ ཨུ་སུ་ནཱ ཡ་ཐཱ;
ཡེ པ་ཉྩ་ཀྑ་ནྡྷེ པ་སྶ་ནྟི, པ་ར་ཏོ ནོ ཙ ཨ་ཏྟ་ཏོ.
༡༡༧༠. ‘‘ཡེ ཙ པ་སྶ་ནྟི ས་ངྑཱ་རེ, པ་ར་ཏོ ནོ ཙ ཨ་ཏྟ་ཏོ;
པ་ཙྩ་བྱཱ་དྷིཾ་སུ ནི་པུ་ཎཾ, ཝཱ་ལ་གྒཾ ཨུ་སུ་ནཱ ཡ་ཐཱ.
༡༡༧༡. [སཾ. ནི. ༡.༢༡, ༩༧] ‘‘ས་ཏྟི་ཡཱ ཝི་ཡ ཨོ་མ་ཊྛོ, ཌ་ཡ྄ཧ་མཱ་ནོ་ཝ མ་ཏྠ་ཀེ;
ཀཱ་མ་རཱ་ག་པྤ་ཧཱ་ནཱ་ཡ, ས་ཏོ བྷི་ཀྑུ པ་རི་བྦ་ཛེ.
༡༡༧༢. [སཾ. ནི. ༡.༢༡, ༩༧]‘‘ས་ཏྟི་ཡཱ ཝི་ཡ ཨོ་མ་ཊྛོ, ཌ་ཡ྄ཧ་མཱ་ནོ་ཝ མ་ཏྠ་ཀེ;
བྷ་ཝ་རཱ་ག་པྤ་ཧཱ་ནཱ་ཡ, ས་ཏོ བྷི་ཀྑུ པ་རི་བྦ་ཛེ’’.
༡༡༧༣. ‘‘ཙོ་དི་ཏོ བྷཱ་ཝི་ཏ་ཏྟེ་ན, ས་རཱི་ར་ནྟི་མ་དྷཱ་རི་ནཱ;
མི་གཱ་ར་མཱ་ཏུ་པཱ་སཱ་དཾ, པཱ་ད་ངྒུ་ཊྛེ་ན ཀ་མྤ་ཡིཾ.
༡༡༧༤. ‘‘ན་ཡི་དཾ སི་ཐི་ལ་མཱ་ར་བྦྷ, ན་ཡི་དཾ ཨ་པྤེ་ན ཐཱ་མ་སཱ;
ནི་བྦཱ་ན་མ་དྷི་ག་ནྟ་བྦཾ, ས་བྦ་ག་ནྠ-པ་མོ་ཙ་ནཾ.
༡༡༧༥. ‘‘ཨ་ཡ་ཉྩ ད་ཧ་རོ བྷི་ཀྑུ, ཨ་ཡ་མུ་ཏྟ་མ་པོ་རི་སོ;
དྷཱ་རེ་ཏི ཨ་ནྟི་མཾ དེ་ཧཾ, ཛེ་ཏྭཱ མཱ་རཾ ས་ཝཱ་ཧི་ནིཾ [ས་ཝཱ་ཧ་ནཾ (ཀ.)].
༡༡༧༦. ‘‘ཝི་ཝ་ར་མ་ནུ་པ་བྷ་ནྟི ཝི་ཛྫུ་ཏཱ, ཝེ་བྷཱ་ར་སྶ ཙ པ་ཎྜ་ཝ་སྶ ཙ;
ན་ག་ཝི་ཝ་ར་ག་ཏོ ཛྷཱ་ཡ་ཏི, པུ་ཏྟོ ཨ་པྤ་ཊི་མ་སྶ ཏཱ་དི་ནོ.
༡༡༧༧. ‘‘ཨུ་པ་ས་ནྟོ ཨུ་པ་ར་ཏོ, པ་ནྟ་སེ་ནཱ་ས་ནོ མུ་ནི;
དཱ་ཡཱ་དོ བུ་དྡྷ་སེ་ཊྛ་སྶ, བྲ་ཧྨུ་ནཱ ཨ་བྷི་ཝ་ནྡི་ཏོ.
༡༡༧༨. ‘‘ཨུ་པ་ས་ནྟཾ ཨུ་པ་ར་ཏཾ, པ་ནྟ་སེ་ནཱ་ས་ནཾ མུ་ནིཾ;
དཱ་ཡཱ་དཾ བུ་དྡྷ་སེ་ཊྛ་སྶ, ཝ་ནྡ བྲཱ་ཧྨ་ཎ ཀ་སྶ་པཾ.
༡༡༧༩. ‘‘ཡོ ཙ ཛཱ་ཏི་ས་ཏཾ ག་ཙྪེ, ས་བྦཱ བྲཱ་ཧྨ་ཎ་ཛཱ་ཏི་ཡོ;
སོ་ཏྟི་ཡོ ཝེ་ད་ས་མྤ་ནྣོ, མ་ནུ་སྶེ་སུ པུ་ན་པྤུ་ནཾ.
༡༡༨༠. ‘‘ཨ་ཛ྄ཛྷཱ་ཡ་ཀོ་པི ཙེ ཨ་སྶ, ཏི་ཎྞཾ ཝེ་དཱ་ན པཱ་ར་གཱུ;
ཨེ་ཏ་སྶ ཝ་ནྡ་ནཱ་ཡེ་ཏཾ, ཀ་ལཾ ནཱ་གྒྷ་ཏི སོ་ལ༹་སིཾ.
༡༡༨༡. ‘‘ཡོ སོ ཨ་ཊྛ ཝི་མོ་ཀྑཱ་ནི, པུ་རེ་བྷ་ཏྟཾ ཨ་ཕ་སྶ་ཡི [ཨ་པ་སྶ་ཡི (སཱི. ཀ.), ཨ་ཕུ་སྶ་ཡི (སྱཱ.)];
ཨ་ནུ་ལོ་མཾ པ་ཊི་ལོ་མཾ, ཏ་ཏོ པི་ཎྜཱ་ཡ ག་ཙྪ་ཏི.
༡༡༨༢. ‘‘ཏཱ་དི་སཾ བྷི་ཀྑུཾ མཱ་སཱ་དི [མཱ ཧ་ནི (སཱི.)], མཱ་ཏྟཱ་ནཾ ཁ་ཎི བྲཱ་ཧྨ་ཎ;
ཨ་བྷི་པྤ་སཱ་དེ་ཧི མ་ནཾ, ཨ་ར་ཧ་ནྟ་མྷི ཏཱ་དི་ནེ;
ཁི་པྤཾ པ་ཉྫ་ལི་ཀོ ཝ་ནྡ, མཱ ཏེ ཝི་ཛ་ཊི མ་ཏྠ་ཀཾ.
༡༡༨༣. ‘‘ནེ་སོ པ་སྶ་ཏི ས་དྡྷ་མྨཾ, སཾ་སཱ་རེ་ན པུ་ར་ཀྑ་ཏོ;
ཨ་དྷོ་ག་མཾ ཛི་མྷ་པ་ཐཾ, ཀུ་མྨ་གྒ་མ་ནུ་དྷཱ་ཝ་ཏི.
༡༡༨༤. ‘‘ཀི་མཱི་ཝ མཱི་ལ༹ྷ་ས་ལླི་ཏྟོ, ས་ངྑཱ་རེ ཨ་དྷི་མུ་ཙྪི་ཏོ;
པ་གཱ་ལ༹ྷོ ལཱ་བྷ་ས་ཀྐཱ་རེ, ཏུ་ཙྪོ ག་ཙྪ་ཏི པོ་ཊྛི་ལོ.
༡༡༨༥. ‘‘ཨི་མ་ཉྩ པ་སྶ ཨཱ་ཡ་ནྟཾ, སཱ་རི་པུ་ཏྟཾ སུ་ད་སྶ་ནཾ;
ཝི་མུ་ཏྟཾ ཨུ་བྷ་ཏོ་བྷཱ་གེ, ཨ་ཛ྄ཛྷ་ཏྟཾ སུ་ས་མཱ་ཧི་ཏཾ.
༡༡༨༦. ‘‘ཝི་ས་ལླཾ ཁཱི་ཎ་སཾ་ཡོ་གཾ, ཏེ་ཝི་ཛྫཾ མ་ཙྩུ་ཧཱ་ཡི་ནཾ;
ད་ཀྑི་ཎེ་ཡྻཾ མ་ནུ་སྶཱ་ནཾ, པུ་ཉྙ་ཀྑེ་ཏྟཾ ཨ་ནུ་ཏྟ་རཾ.
༡༡༨༧. ‘‘ཨེ་ཏེ ས་མྦ་ཧུ་ལཱ དེ་ཝཱ, ཨི་དྡྷི་མ་ནྟོ ཡ་ས་སྶི་ནོ;
ད་ས དེ་ཝ་ས་ཧ་སྶཱ་ནི, ས་བྦེ བྲ་ཧྨ་པུ་རོ་ཧི་ཏཱ;
མོ་གྒ་ལླཱ་ནཾ ན་མ་སྶ་ནྟཱ, ཏི་ཊྛ་ནྟི པ་ཉྫ་ལཱི་ཀ་ཏཱ.
༡༡༨༨. ‘‘‘ན་མོ ཏེ པུ་རི་སཱ་ཛ་ཉྙ, ན་མོ ཏེ པུ་རི་སུ་ཏྟ་མ;
ཡ་སྶ ཏེ ཨཱ་ས་ཝཱ ཁཱི་ཎཱ, ད་ཀྑི་ཎེ་ཡྻོ་སི མཱ་རི་ས’.
༡༡༨༩. ‘‘པཱུ་ཛི་ཏོ ན་ར་དེ་ཝེ་ན, ཨུ་པྤ་ནྣོ མ་ར་ཎཱ་བྷི་བྷཱུ;
པུ་ཎྜ་རཱི་ཀཾ་ཝ ཏོ་ཡེ་ན, ས་ངྑཱ་རེ་ནུ་པ་ལི་པྤ་ཏི.
༡༡༩༠. ‘‘ཡ་སྶ མུ་ཧུ་ཏྟེ་ན ས་ཧ་སྶ་དྷཱ ལོ་ཀོ, སཾ་ཝི་དི་ཏོ ས་བྲ་ཧྨ་ཀ་པྤོ ཝ་སི;
ཨི་དྡྷི་གུ་ཎེ ཙུ་ཏུ་པ་པཱ་ཏེ ཀཱ་ལེ, པ་སྶ་ཏི དེ་ཝ་ཏཱ ས བྷི་ཀྑུ.
༡༡༩༡. ‘‘སཱ་རི་པུ་ཏྟོ་ཝ པ་ཉྙཱ་ཡ, སཱི་ལེ་ན ཨུ་པ་ས་མེ་ན ཙ;
ཡོ་པི པཱ་ར་ངྒ་ཏོ བྷི་ཀྑུ, ཨེ་ཏཱ་ཝ་པ་ར་མོ སི་ཡཱ.
༡༡༩༢. ‘‘ཀོ་ཊི་ས་ཏ་ས་ཧ་སྶ་སྶ, ཨ་ཏྟ་བྷཱ་ཝཾ ཁ་ཎེ་ན ནི་མྨི་ནེ;
ཨ་ཧཾ ཝི་ཀུ་བྦ་ནཱ་སུ ཀུ་ས་ལོ, ཝ་སཱི་བྷཱུ་ཏོ་མྷི ཨི་དྡྷི་ཡཱ.
༡༡༩༣. ‘‘ས་མཱ་དྷི་ཝི་ཛྫཱ་ཝ་སི་པཱ་ར་མཱི་ག་ཏོ, མོ་གྒ་ལླཱ་ན་གོ་ཏྟོ ཨ་སི་ཏ་སྶ སཱ་ས་ནེ;
དྷཱི་རོ ས་མུ་ཙྪི་ནྡི ས་མཱ་ཧི་ཏི་ནྡྲི་ཡོ, ནཱ་གོ ཡ་ཐཱ པཱུ་ཏི་ལ་ཏཾ་ཝ བ་ནྡྷ་ནཾ.
༡༡༩༤. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༡༡༩༥. ‘‘ཡ་སྶ ཙ་ཏྠཱ་ཡ པ་བྦ་ཛི་ཏོ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༡༡༩༦. [མ. ནི. ༡.༥༡༣] ‘‘ཀཱི་དི་སོ ནི་ར་ཡོ ཨཱ་སི, ཡ་ཏྠ དུ་སྶཱི ཨ་པ་ཙྩ་ཐ;
ཝི་དྷུ་རཾ སཱ་ཝ་ཀ་མཱ་ས་ཛྫ, ཀ་ཀུ་ས་ནྡྷ་ཉྩ བྲཱ་ཧྨ་ཎཾ.
༡༡༩༧. ‘‘ས་ཏཾ ཨཱ་སི ཨ་ཡོ་ས་ངྐཱུ, ས་བྦེ པ་ཙྩ་ཏྟ་ཝེ་ད་ནཱ;
ཨཱི་དི་སོ ནི་ར་ཡོ ཨཱ་སི, ཡ་ཏྠ དུ་སྶཱི ཨ་པ་ཙྩ་ཐ;
ཝི་དྷུ་རཾ སཱ་ཝ་ཀ་མཱ་ས་ཛྫ, ཀ་ཀུ་ས་ནྡྷ་ཉྩ བྲཱ་ཧྨ་ཎཾ.
༡༡༩༨. ‘‘ཡོ ཨེ་ཏ་མ་བྷི་ཛཱ་ནཱ་ཏི, བྷི་ཀྑུ བུ་དྡྷ་སྶ སཱ་ཝ་ཀོ;
ཏཱ་དི་སཾ བྷི་ཀྑུ་མཱ་ས་ཛྫ, ཀ་ཎྷ དུ་ཀྑཾ ནི་ག་ཙྪ་སི.
༡༡༩༩. ‘‘མ་ཛ྄ཛྷེ་ས་ར་སྨིཾ [ས་ར་སྶ (སཱི.), སཱ་ག་ར་སྨིཾ (ཀ.)] ཏི་ཊྛ་ནྟི, ཝི་མཱ་ནཱ ཀ་པྤ་ཋཱ་ཡི་ནོ;
ཝེ་ལུ༹་རི་ཡ་ཝ་ཎྞཱ རུ་ཙི་རཱ, ཨ་ཙྩི་མ་ནྟོ པ་བྷ་སྶ་རཱ;
ཨ་ཙྪ་རཱ ཏ་ཏྠ ན་ཙྩ་ནྟི, པུ་ཐུ ནཱ་ན་ཏྟ་ཝ་ཎྞི་ཡོ.
༡༢༠༠. ‘‘ཡོ ཨེ་ཏ་མ་བྷི་ཛཱ་ནཱ་ཏི…པེ… ཀ་ཎྷ དུ་ཀྑཾ ནི་ག་ཙྪ་སི.
༡༢༠༡. ‘‘ཡོ ཝེ བུ་དྡྷེ་ན ཙོ་དི་ཏོ, བྷི་ཀྑུ་ས་ངྒྷ་སྶ པེ་ཀྑ་ཏོ;
མི་གཱ་ར་མཱ་ཏུ་པཱ་སཱ་དཾ, པཱ་ད་ངྒུ་ཊྛེ་ན ཀ་མྤ་ཡི.
༡༢༠༢. ‘‘ཡོ ཨེ་ཏ་མ་བྷི་ཛཱ་ནཱ་ཏི…པེ… ཀ་ཎྷ དུ་ཀྑཾ ནི་ག་ཙྪ་སི.
༡༢༠༣. ‘‘ཡོ ཝེ་ཛ་ཡ་ནྟ་པཱ་སཱ་དཾ, པཱ་ད་ངྒུ་ཊྛེ་ན ཀ་མྤ་ཡི;
ཨི་དྡྷི་བ་ལེ་ནུ་པ་ཏྠ་དྡྷོ, སཾ་ཝེ་ཛེ་སི ཙ དེ་ཝ་ཏཱ.
༡༢༠༤. ‘‘ཡོ ཨེ་ཏ་མ་བྷི་ཛཱ་ནཱ་ཏི…པེ… ཀ་ཎྷ དུ་ཀྑཾ ནི་ག་ཙྪ་སི.
༡༢༠༤. ‘‘ཡོ ཨེ་ཏ་མ་བྷི་ཛཱ་ནཱ་ཏི…པེ… ཀ་ཎྷ དུ་ཀྑཾ ནི་ག་ཙྪ་སི.
༡༢༠༥. ‘‘ཡོ ཝེ་ཛ་ཡ་ནྟ་པཱ་སཱ་དེ, ས་ཀྐཾ སོ པ་རི་པུ་ཙྪ་ཏི;
ཨ་པི ཨཱ་ཝུ་སོ ཛཱ་ནཱ་སི, ཏ་ཎྷ་ཀྑ་ཡ་ཝི་མུ་ཏྟི་ཡོ;
ཏ་སྶ ས་ཀྐོ ཝི་ཡཱ་ཀཱ་སི, པ་ཉྷཾ པུ་ཊྛོ ཡ་ཐཱ་ཏ་ཐཾ.
༡༢༠༦. ‘‘ཡོ ཨེ་ཏ་མ་བྷི་ཛཱ་ནཱ་ཏི…པེ… ཀ་ཎྷ དུ་ཀྑཾ ནི་ག་ཙྪ་སི.
༡༢༠༧. ‘‘ཡོ བྲ་ཧྨཱ་ནཾ པ་རི་པུ་ཙྪ་ཏི, སུ་དྷ་མྨཱ་ཡཾ ཋི་ཏོ [སུ་དྷ་མྨཱ་ཡཱ’བྷི་ཏོ (སྱཱ.)] ས་བྷཾ;
ཨ་ཛྫཱ་པི ཏྱཱ་ཝུ་སོ སཱ དི་ཊྛི, ཡཱ ཏེ དི་ཊྛི པུ་རེ ཨ་ཧུ;
པ་སྶ་སི ཝཱི་ཏི་ཝ་ཏྟ་ནྟཾ, བྲ་ཧྨ་ལོ་ཀེ པ་བྷ་སྶ་རཾ.
༡༢༠༨. ‘‘ཏ་སྶ བྲ་ཧྨཱ ཝི་ཡཱ་ཀཱ་སི, པ་ཉྷཾ པུ་ཊྛོ ཡ་ཐཱ་ཏ་ཐཾ;
ན མེ མཱ་རི་ས སཱ དི་ཊྛི, ཡཱ མེ དི་ཊྛི པུ་རེ ཨ་ཧུ.
༡༢༠༩. ‘‘པ་སྶཱ་མི ཝཱི་ཏི་ཝ་ཏྟ་ནྟཾ, བྲ་ཧྨ་ལོ་ཀེ པ་བྷ་སྶ་རཾ;
སོ་ཧཾ ཨ་ཛྫ ཀ་ཐཾ ཝ་ཛྫཾ, ཨ་ཧཾ ནི་ཙྩོ་མྷི ས་སྶ་ཏོ.
༡༢༡༠. ‘‘ཡོ ཨེ་ཏ་མ་བྷི་ཛཱ་ནཱ་ཏི…པེ… ཀ་ཎྷ དུ་ཀྑཾ ནི་ག་ཙྪ་སི.
༡༢༡༡. ‘‘ཡོ མ་ཧཱ་ནེ་རུ་ནོ ཀཱུ་ཊཾ, ཝི་མོ་ཀྑེ་ན ཨ་ཕ་སྶ་ཡི [ཨ་པ་སྶ་ཡི (སཱི. ཀ.)];
ཝ་ནཾ པུ་བྦ་ཝི་དེ་ཧཱ་ནཾ, ཡེ ཙ བྷཱུ་མི་ས་ཡཱ ན་རཱ.
༡༢༡༢. ‘‘ཡོ ཨེ་ཏ་མ་བྷི་ཛཱ་ནཱ་ཏི, བྷི་ཀྑུ བུ་དྡྷ་སྶ སཱ་ཝ་ཀོ;
ཏཱ་དི་སཾ བྷི་ཀྑུ་མཱ་ས་ཛྫ, ཀ་ཎྷ དུ་ཀྑཾ ནི་ག་ཙྪ་སི.
༡༢༡༣. ‘‘ན ཝེ ཨ་གྒི ཙེ་ཏ་ཡ་ཏི, ཨ་ཧཾ བཱ་ལཾ ཌ་ཧཱ་མཱི་ཏི;
བཱ་ལོ་ཝ ཛ་ལི་ཏཾ ཨ་གྒིཾ, ཨཱ་ས་ཛྫ ནཾ པ་ཌ་ཡ྄ཧ་ཏི.
༡༢༡༤. ‘‘ཨེ་ཝ་མེ་ཝ ཏུ་ཝཾ མཱ་ར, ཨཱ་ས་ཛྫ ནཾ ཏ་ཐཱ་ག་ཏཾ;
ས་ཡཾ ཌ་ཧི་སྶ་སི ཨ་ཏྟཱ་ནཾ, བཱ་ལོ ཨ་གྒིཾ་ཝ ས་མྥུ་སཾ.
༡༢༡༥. ‘‘ཨ་པུ་ཉྙཾ པ་ས་ཝཱི མཱ་རོ, ཨཱ་ས་ཛྫ ནཾ ཏ་ཐཱ་ག་ཏཾ;
ཀིཾ ནུ མ་ཉྙ་སི པཱ་པི་མ, ན མེ པཱ་པཾ ཝི་པ་ཙྩ་ཏི.
༡༢༡༦. ‘‘ཀ་ར་ཏོ ཏེ ཙཱི་ཡ་ཏེ [མི་ཡྻ་ཏེ (ས་བྦ་ཏྠ) མ. ནི. ༡.༥༡༣ པ་སྶི་ཏ་བྦཾ] པཱ་པཾ, ཙི་ར་ར་ཏྟཱ་ཡ ཨ་ནྟ་ཀ;
མཱ་ར ནི་བྦི་ནྡ བུ་དྡྷ་མྷཱ, ཨཱ་སཾ མཱ་ཀཱ་སི བྷི་ཀྑུ་སུ.
༡༢༡༧. ‘‘ཨི་ཏི མཱ་རཾ ཨ་ཏ་ཛྫེ་སི, བྷི་ཀྑུ བྷེ་ས་ཀ་ལཱ༹་ཝ་ནེ;
ཏ་ཏོ སོ དུ་མྨ་ནོ ཡ་ཀྑོ, ཏ་ཏྠེ་ཝ་ནྟ་ར་དྷཱ་ཡ་ཐཱ’’ཏི.
ཨི་ཏྠཾ སུ་དཾ ཨཱ་ཡ་སྨཱ མ་ཧཱ་མོ་གྒ་ལླཱ་ནོ [མ་ཧཱ་མོ་གྒ་ལཱ་ནོ (ཀ.)] ཐེ་རོ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་ཊྛི་ནི་པཱ་ཏོ ནི་ཊྛི་ཏོ.