༢༡. མ་ཧཱ་ནི་པཱ་ཏོ
༡. ཝ་ངྒཱི་ས་ཏྠེ་ར་གཱ་ཐཱ
༡༢༡༨. ‘‘ནི་ཀྑ་ནྟཾ ཝ་ཏ མཾ ས་ནྟཾ, ཨ་གཱ་ར་སྨཱ་ན་གཱ་རི་ཡཾ;
ཝི་ཏ་ཀྐཱ ཨུ་པ་དྷཱ་ཝ་ནྟི, པ་ག་བྦྷཱ ཀ་ཎྷ་ཏོ ཨི་མེ.
༡༢༡༩. ‘‘ཨུ་གྒ་པུ་ཏྟཱ མ་ཧི་སྶཱ་སཱ, སི་ཀྑི་ཏཱ ད་ལ༹ྷ་དྷ་མྨི་ནོ [ད་ལ༹ྷ་དྷ་ནྭི་ནོ (སཱི. ཨ་ཊྛ.)];
ས་མ་ནྟཱ པ་རི་ཀི་རེ་ཡྻུཾ, ས་ཧ་སྶཾ ཨ་པ་ལཱ་ཡི་ནཾ.
༡༢༢༠. ‘‘ས་ཙེ་པི ཨེ་ཏྟ་ཀཱ [ཨེ་ཏ་ཏོ (སཾ. ནི. ༡.༢༠༩)] བྷི་ཡྻོ, ཨཱ་ག་མི་སྶ་ནྟི ཨི་ཏྠི་ཡོ;
ནེ་ཝ མཾ བྱཱ་དྷ་ཡི་སྶ་ནྟི [བྱཱ་ཐ་ཡི་སྶ་ནྟི (?)], དྷ་མྨེ ས་མྷི [དྷ་མྨེ་སྭ་མྷི (སྱཱ. ཀ.)] པ་ཏི་ཊྛི་ཏོ.
༡༢༢༡. ‘‘ས་ཀྑཱི ཧི མེ སུ་ཏཾ ཨེ་ཏཾ, བུ་དྡྷ་སྶཱ་དི་ཙྩ་བ་ནྡྷུ་ནོ;
ནི་བྦཱ་ན་ག་མ་ནཾ མ་གྒཾ, ཏ་ཏྠ མེ ནི་ར་ཏོ མ་ནོ.
༡༢༢༢. ‘‘ཨེ་ཝཾ ཙེ མཾ ཝི་ཧ་ར་ནྟཾ, པཱ་པི་མ ཨུ་པ་ག་ཙྪ་སི;
ཏ་ཐཱ མ་ཙྩུ ཀ་རི་སྶཱ་མི, ན མེ མ་གྒ་མྤི ད་ཀྑ་སི.
༡༢༢༣. ‘‘ཨ་ར་ཏི་ཉྩ [ཨ་ར་ཏིཾ (བ་ཧཱུ་སུ)] ར་ཏི་ཉྩ པ་ཧཱ་ཡ, ས་བྦ་སོ གེ་ཧ་སི་ཏ་ཉྩ ཝི་ཏ་ཀྐཾ;
ཝ་ན་ཐཾ ན ཀ་རེ་ཡྻ ཀུ་ཧི་ཉྩི, ནི་བྦ་ན་ཐོ ཨ་ཝ་ན་ཐོ ས [ནི་བྦ་ན་ཐོ ཨ་ར་ཏོ ས ཧི (སཾ. ནི. ༡.༢༡༠)] བྷི་ཀྑུ.
༡༢༢༤. ‘‘ཡ་མི་དྷ པ་ཐ་ཝི་ཉྩ ཝེ་ཧཱ་སཾ, རཱུ་པ་ག་ཏཾ ཛ་ག་ཏོ་ག་དྷཾ ཀི་ཉྩི;
པ་རི་ཛཱི་ཡ་ཏི ས་བྦ་མ་ནི་ཙྩཾ, ཨེ་ཝཾ ས་མེ་ཙྩ ཙ་ར་ནྟི མུ་ཏ་ཏྟཱ.
༡༢༢༥. ‘‘ཨུ་པ་དྷཱི་སུ ཛ་ནཱ ག་དྷི་ཏཱ་སེ, དི་ཊྛ་སུ་ཏེ [དི་ཊྛེ སུ་ཏེ (སཱི.)] པ་ཊི་གྷེ ཙ མུ་ཏེ ཙ;
ཨེ་ཏྠ ཝི་ནོ་ད་ཡ ཚ་ནྡ་མ་ནེ་ཛོ, ཡོ ཧེ་ཏྠ ན ལི་མྤ་ཏི མུ་ནི ཏ་མཱ་ཧུ [ཏཾ མུ་ནི་མཱ་ཧུ (སཾ. ནི. ༡.༢༡༠)].
༡༢༢༦. ‘‘ཨ་ཐ ས་ཊྛི་སི་ཏཱ ས་ཝི་ཏ་ཀྐཱ, པུ་ཐུ་ཛྫ་ན་ཏཱ་ཡ [པུ་ཐཱུ ཛ་ན་ཏཱ་ཡ (སཾ. ནི. ༡.༢༡༠)] ཨ་དྷ་མྨཱ ནི་ཝི་ཊྛཱ;
ན ཙ ཝ་གྒ་ག་ཏ་སྶ ཀུ་ཧི་ཉྩི, ནོ པ་ན དུ་ཊྛུ་ལླ་གཱ་ཧཱི [དུ་ཊྛུ་ལླ་བྷཱ་ཎཱི (སཾ. ནི. ༡.༢༡༠)] ས བྷི་ཀྑུ.
༡༢༢༧. ‘‘ད་བྦོ ཙི་ར་ར་ཏྟ་ས་མཱ་ཧི་ཏོ, ཨ་ཀུ་ཧ་ཀོ ནི་པ་ཀོ ཨ་པི་ཧཱ་ལུ;
ས་ནྟཾ པ་དཾ ཨ་ཛ྄ཛྷ་ག་མཱ མུ་ནི, པ་ཊི་ཙྩ པ་རི་ནི་བྦུ་ཏོ ཀ་ངྑ་ཏི ཀཱ་ལཾ.
༡༢༢༨. ‘‘མཱ་ནཾ པ་ཛ་ཧ་སྶུ གོ་ཏ་མ, མཱ་ན་པ་ཐ་ཉྩ ཛ་ཧ་སྶུ ཨ་སེ་སཾ;
མཱ་ན་པ་ཐ་མྷི ས མུ་ཙྪི་ཏོ, ཝི་པྤ་ཊི་སཱ་རཱི་ཧུ་ཝཱ ཙི་ར་ར་ཏྟཾ.
༡༢༢༩. ‘‘མ་ཀྑེ་ན མ་ཀྑི་ཏཱ པ་ཛཱ, མཱ་ན་ཧ་ཏཱ ནི་ར་ཡཾ པ་པ་ཏ་ནྟི;
སོ་ཙ་ནྟི ཛ་ནཱ ཙི་ར་ར་ཏྟཾ, མཱ་ན་ཧ་ཏཱ ནི་ར་ཡཾ ཨུ་པ་པ་ནྣཱ.
༡༢༣༠. ‘‘ན ཧི སོ་ཙ་ཏི བྷི་ཀྑུ ཀ་དཱ་ཙི, མ་གྒ་ཛི་ནོ ས་མྨཱ པ་ཊི་པ་ནྣོ;
ཀི་ཏྟི་ཉྩ སུ་ཁ་ཉྩཱ་ནུ་བྷོ་ཏི, དྷ་མྨ་ད་སོ་ཏི ཏ་མཱ་ཧུ ཏ་ཐ་ཏྟཾ.
༡༢༣༡. ‘‘ཏ་སྨཱ ཨ་ཁི་ལོ ཨི་དྷ [ཨ་ཁི་ལོ (སཱི.), ཨ་ཁི་ལོ་དྷ (སཾ. ནི. ༡.༢༡༡)] པ་དྷཱ་ན་ཝཱ, ནཱི་ཝ་ར་ཎཱ་ནི པ་ཧཱ་ཡ ཝི་སུ་དྡྷོ;
མཱ་ན་ཉྩ པ་ཧཱ་ཡ ཨ་སེ་སཾ, ཝི་ཛྫཱ་ཡ་ནྟ་ཀ་རོ ས་མི་ཏཱ་ཝཱི.
༡༢༣༢. ‘‘ཀཱ་མ་རཱ་གེ་ན ཌ་ཡ྄ཧཱ་མི, ཙི་ཏྟཾ མེ པ་རི་ཌ་ཡ྄ཧ་ཏི;
སཱ་དྷུ ནི་བྦཱ་པ་ནཾ བྲཱུ་ཧི, ཨ་ནུ་ཀ་མྤཱ་ཡ གོ་ཏ་མ.
༡༢༣༣. ‘‘ས་ཉྙཱ་ཡ ཝི་པ་རི་ཡེ་སཱ, ཙི་ཏྟཾ ཏེ པ་རི་ཌ་ཡ྄ཧ་ཏི;
ནི་མི་ཏྟཾ པ་རི་ཝ་ཛྫེ་ཧི, སུ་བྷཾ རཱ་གཱུ་པ་སཾ་ཧི་ཏཾ ( ) [(ས་ངྑཱ་རེ པ་ར་ཏོ པ་སྶ, དུ་ཀྑ་ཏོ མཱ ཙ ཨ་ཏྟ་ཏོ; ནི་བྦཱ་པེ་ཧི མ་ཧཱ་རཱ་གཾ, མཱ ད་ཡ྄ཧི་ཏྠོ པུ་ན་པྤུ་ནཾ;) (སཱི. སཾ. ནི. ༡.༢༡༢) ཨུ་དྡཱ་ན་གཱ་ཐཱ་ཡཾ ཨེ་ཀ་ས་ཏྟ་ཏཱི་ཏི་ས་ངྑྱཱ ཙ, ཐེ་ར་གཱ་ཐཱ་ཊྛ་ཀ་ཐཱ ཙ པ་སྶི་ཏ་བྦཱ].
༡༢༣༤. ‘‘ཨ་སུ་བྷཱ་ཡ ཙི་ཏྟཾ བྷཱ་ཝེ་ཧི, ཨེ་ཀ་གྒཾ སུ་ས་མཱ་ཧི་ཏཾ;
ས་ཏི ཀཱ་ཡ་ག་ཏཱ ཏྱ་ཏྠུ, ནི་བྦི་དཱ་བ་ཧུ་ལོ བྷ་ཝ.
༡༢༣༥. ‘‘ཨ་ནི་མི་ཏྟ་ཉྩ བྷཱ་ཝེ་ཧི, མཱ་ནཱ་ནུ་ས་ཡ་མུ་ཛྫ་ཧ;
ཏ་ཏོ མཱ་ནཱ་བྷི་ས་མ་ཡཱ, ཨུ་པ་ས་ནྟོ ཙ་རི་སྶ་སི.
༡༢༣༦. ‘‘ཏ་མེ་ཝ ཝཱ་ཙཾ བྷཱ་སེ་ཡྻ, ཡཱ་ཡ་ཏྟཱ་ནཾ ན ཏཱ་པ་ཡེ;
པ་རེ ཙ ན ཝི་ཧིཾ་སེ་ཡྻ, སཱ ཝེ ཝཱ་ཙཱ སུ་བྷཱ་སི་ཏཱ.
༡༢༣༧. ‘‘པི་ཡ་ཝཱ་ཙ་མེ་ཝ བྷཱ་སེ་ཡྻ, ཡཱ ཝཱ་ཙཱ པ་ཊི་ན་ནྡི་ཏཱ;
ཡཾ ཨ་ནཱ་དཱ་ཡ པཱ་པཱ་ནི, པ་རེ་སཾ བྷཱ་ས་ཏེ པི་ཡཾ.
༡༢༣༨. ‘‘ས་ཙྩཾ ཝེ ཨ་མ་ཏཱ ཝཱ་ཙཱ, ཨེ་ས དྷ་མྨོ ས་ན་ནྟ་ནོ;
ས་ཙྩེ ཨ་ཏྠེ ཙ དྷ་མྨེ ཙ, ཨཱ་ཧུ ས་ནྟོ པ་ཏི་ཊྛི་ཏཱ.
༡༢༣༩. ‘‘ཡཾ བུ་དྡྷོ བྷཱ་ས་ཏི ཝཱ་ཙཾ, ཁེ་མཾ ནི་བྦཱ་ན་པ་ཏྟི་ཡཱ;
དུ་ཀྑ་སྶ་ནྟ་ཀི་རི་ཡཱ་ཡ, སཱ ཝེ ཝཱ་ཙཱ་ན་མུ་ཏྟ་མཱ.
༡༢༤༠. ‘‘ག་མྦྷཱི་ར་པ་ཉྙོ མེ་དྷཱ་ཝཱི, མ་གྒཱ་མ་གྒ་སྶ ཀོ་ཝི་དོ;
སཱ་རི་པུ་ཏྟོ མ་ཧཱ་པ་ཉྙོ, དྷ་མྨཾ དེ་སེ་ཏི བྷི་ཀྑུ་ནཾ.
༡༢༤༡. ‘‘ས་ངྑི་ཏྟེ་ན་པི དེ་སེ་ཏི, ཝི་ཏྠཱ་རེ་ན་པི བྷཱ་ས་ཏི;
སཱ་ལི་ཀཱ་ཡི་ཝ ནི་གྒྷོ་སོ, པ་ཊི་བྷཱ་ནཾ ཨུ་དི་ཡྻ་ཏི [ཨུ་དཱི་ར་ཡི (སཱི.), ཨུ་དཱི་ཡྻ་ཏི (སྱཱ.), ཨུ་ད་ཡྻ་ཏི (?) ཨུ་ཊྛ་ཧ་ཏཱི་ཏི ཏཾ་སཾ་ཝ་ཎྞ་ནཱ].
༡༢༤༢. ‘‘ཏ་སྶ ཏཾ དེ་ས་ཡ་ནྟ་སྶ, སུ་ཎ་ནྟི མ་དྷུ་རཾ གི་རཾ;
ས་རེ་ན ར་ཛ་ནཱི་ཡེ་ན, ས་ཝ་ནཱི་ཡེ་ན ཝ་གྒུ་ནཱ;
ཨུ་ད་གྒ་ཙི་ཏྟཱ མུ་དི་ཏཱ, སོ་ཏཾ ཨོ་དྷེ་ནྟི བྷི་ཀྑ་ཝོ.
༡༢༤༣. ‘‘ཨ་ཛྫ པ་ནྣ་ར་སེ ཝི་སུ་དྡྷི་ཡཱ, བྷི་ཀྑཱུ པ་ཉྩ་ས་ཏཱ ས་མཱ་ག་ཏཱ;
སཾ་ཡོ་ཛ་ན་བ་ནྡྷ་ན་ཙྪི་དཱ, ཨ་ནཱི་གྷཱ ཁཱི་ཎ་པུ་ན་བྦྷ་ཝཱ ཨི་སཱི.
༡༢༤༤. ‘‘ཙ་ཀྐ་ཝ་ཏྟཱི ཡ་ཐཱ རཱ་ཛཱ, ཨ་མ་ཙྩ་པ་རི་ཝཱ་རི་ཏོ;
ས་མ་ནྟཱ ཨ་ནུ་པ་རི་ཡེ་ཏི, སཱ་ག་ར་ནྟཾ མ་ཧིཾ ཨི་མཾ.
༡༢༤༥. ‘‘ཨེ་ཝཾ ཝི་ཛི་ཏ་ས་ངྒཱ་མཾ, ས་ཏྠ་ཝཱ་ཧཾ ཨ་ནུ་ཏྟ་རཾ;
སཱ་ཝ་ཀཱ པ་ཡི་རུ་པཱ་ས་ནྟི, ཏེ་ཝི་ཛྫཱ མ་ཙྩུ་ཧཱ་ཡི་ནོ.
༡༢༤༦. ‘‘ས་བྦེ བྷ་ག་ཝ་ཏོ པུ་ཏྟཱ, པ་ལཱ་པེ་ཏྠ ན ཝི་ཛྫ་ཏི;
ཏ་ཎྷཱ་ས་ལླ་སྶ ཧ་ནྟཱ་རཾ, ཝ་ནྡེ ཨཱ་དི་ཙྩ་བ་ནྡྷུ་ནཾ.
༡༢༤༧. ‘‘པ་རོ་ས་ཧ་སྶཾ བྷི་ཀྑཱུ་ནཾ, སུ་ག་ཏཾ པ་ཡི་རུ་པཱ་ས་ཏི;
དེ་སེ་ནྟཾ ཝི་ར་ཛཾ དྷ་མྨཾ, ནི་བྦཱ་ནཾ ཨ་ཀུ་ཏོ་བྷ་ཡཾ.
༡༢༤༨. ‘‘སུ་ཎ་ནྟི དྷ་མྨཾ ཝི་མ་ལཾ, ས་མྨཱ་ས་མྦུ་དྡྷ་དེ་སི་ཏཾ;
སོ་བྷ་ཏི ཝ་ཏ ས་མྦུ་དྡྷོ, བྷི་ཀྑུ་ས་ངྒྷ་པུ་ར་ཀྑ་ཏོ.
༡༢༤༩. ‘‘‘ནཱ་ག་ནཱ་མོ’སི བྷ་ག་ཝཱ, ཨི་སཱི་ནཾ ཨི་སི་ས་ཏྟ་མོ;
མ་ཧཱ་མེ་གྷོ་ཝ ཧུ་ཏྭཱ་ན, སཱ་ཝ་ཀེ ཨ་བྷི་ཝ་སྶ་སི.
༡༢༥༠. ‘‘དི་ཝཱ ཝི་ཧཱ་རཱ ནི་ཀྑ་མྨ, ས་ཏྠུ་ད་སྶ་ན་ཀ་མྱ་ཏཱ;
སཱ་ཝ་ཀོ ཏེ མ་ཧཱ་ཝཱི་ར, པཱ་དེ ཝ་ནྡ་ཏི ཝ་ངྒི་སོ.
༡༢༥༡. ‘‘ཨུ་མྨ་གྒ་པ་ཐཾ མཱ་ར་སྶ, ཨ་བྷི་བྷུ་ཡྻ ཙ་ར་ཏི པ་བྷི་ཛྫ ཁཱི་ལཱ་ནི;
ཏཾ པ་སྶ་ཐ བ་ནྡྷ་པ་མུ་ཉྩ་ཀ་རཾ, ཨ་སི་ཏཾ་ཝ བྷཱ་ག་སོ པ་ཝི་བྷ་ཛྫ.
༡༢༥༢. ‘‘ཨོ་གྷ་སྶ ཧི ནི་ཏ་ར་ཎ་ཏྠཾ, ཨ་ནེ་ཀ་ཝི་ཧི་ཏཾ མ་གྒཾ ཨ་ཀྑཱ་སི;
ཏ་སྨི་ཉྩ ཨ་མ་ཏེ ཨ་ཀྑཱ་ཏེ, དྷ་མྨ་ད་སཱ ཋི་ཏཱ ཨ་སཾ་ཧཱི་རཱ.
༡༢༥༣. ‘‘པ་ཛྫོ་ཏ་ཀ་རོ ཨ་ཏི་ཝི་ཛ྄ཛྷ [ཨ་ཏི་ཝི་ཛ྄ཛྷ དྷ་མྨཾ (སཱི.)], ས་བྦ་ཋི་ཏཱི་ནཾ ཨ་ཏི་ཀྐ་མ་མ་དྡ་ས [ཨ་ཏི་ཀྐ་མ་མ་དྡ (སཱི. ཀ.)];
ཉ་ཏྭཱ ཙ ས་ཙྪི་ཀ་ཏྭཱ ཙ, ཨ་གྒཾ སོ དེ་ས་ཡི ད་ས་དྡྷཱ་ནཾ.
༡༢༥༤. ‘‘ཨེ་ཝཾ སུ་དེ་སི་ཏེ དྷ་མྨེ, ཀོ པ་མཱ་དོ ཝི་ཛཱ་ན་ཏཾ དྷ་མྨཾ;
ཏ་སྨཱ ཧི ཏ་སྶ བྷ་ག་ཝ་ཏོ སཱ་ས་ནེ, ཨ་པྤ་མ་ཏྟོ ས་དཱ ན་མ་སྶ་མ་ནུ་སི་ཀྑེ.
༡༢༥༥. ‘‘བུ་དྡྷཱ་ནུ་བུ་དྡྷོ ཡོ ཐེ་རོ, ཀོ་ཎྜ་ཉྙོ ཏི་བྦ་ནི་ཀྐ་མོ;
ལཱ་བྷཱི སུ་ཁ་ཝི་ཧཱ་རཱ་ནཾ, ཝི་ཝེ་ཀཱ་ནཾ ཨ་བྷི་ཎྷ་སོ.
༡༢༥༦. ‘‘ཡཾ སཱ་ཝ་ཀེ་ན པ་ཏྟ་བྦཾ, ས་ཏྠུ སཱ་ས་ན་ཀཱ་རི་ནཱ;
ས་བྦ་སྶ ཏཾ ཨ་ནུ་པྤ་ཏྟཾ, ཨ་པྤ་མ་ཏྟ་སྶ སི་ཀྑ་ཏོ.
༡༢༥༧. ‘‘མ་ཧཱ་ནུ་བྷཱ་ཝོ ཏེ་ཝི་ཛྫོ, ཙེ་ཏོ་པ་རི་ཡ་ཀོ་ཝི་དོ;
ཀོ་ཎྜ་ཉྙོ བུ་དྡྷ་དཱ་ཡཱ་དོ, པཱ་དེ ཝ་ནྡ་ཏི ས་ཏྠུ་ནོ.
༡༢༥༨. ‘‘ན་ག་སྶ པ་སྶེ ཨཱ་སཱི་ནཾ, མུ་ནིཾ དུ་ཀྑ་སྶ པཱ་ར་གུཾ;
སཱ་ཝ་ཀཱ པ་ཡི་རུ་པཱ་ས་ནྟི, ཏེ་ཝི་ཛྫཱ མ་ཙྩུ་ཧཱ་ཡི་ནོ.
༡༢༥༩. ‘‘ཙེ་ཏ་སཱ [ཏེ ཙེ་ཏ་སཱ (སཾ. ནི. ༡.༢༡༨)] ཨ་ནུ་པ་རི་ཡེ་ཏི, མོ་གྒ་ལླཱ་ནོ མ་ཧི་དྡྷི་ཀོ;
ཙི་ཏྟཾ ནེ་སཾ ས་མ་ནྭེ་སཾ [ས་མ་ནྣེ་སཾ (སཾ. ནི. ༡.༢༡༨)], ཝི་པྤ་མུ་ཏྟཾ ནི་རཱུ་པ་དྷིཾ.
༡༢༦༠. ‘‘ཨེ་ཝཾ ས་བྦ་ངྒ་ས་མྤ་ནྣཾ, མུ་ནིཾ དུ་ཀྑ་སྶ པཱ་ར་གུཾ;
ཨ་ནེ་ཀཱ་ཀཱ་ར་ས་མྤ་ནྣཾ, པ་ཡི་རུ་པཱ་ས་ནྟི གོ་ཏ་མཾ.
༡༢༦༡. ‘‘ཙ་ནྡོ ཡ་ཐཱ ཝི་ག་ཏ་ཝ་ལཱ་ཧ་ཀེ ན་བྷེ, ཝི་རོ་ཙ་ཏི ཝཱི་ཏ་མ་ལོ་ཝ བྷཱ་ཎུ་མཱ;
ཨེ་ཝ་མྤི ཨ་ངྒཱི་ར་ས ཏྭཾ མ་ཧཱ་མུ་ནི, ཨ་ཏི་རོ་ཙ་སི ཡ་ས་སཱ ས་བྦ་ལོ་ཀཾ.
༡༢༦༢. ‘‘ཀཱ་ཝེ་ཡྻ་མ་ཏྟཱ ཝི་ཙ་རི་མྷ པུ་བྦེ, གཱ་མཱ གཱ་མཾ པུ་རཱ པུ་རཾ;
ཨ་ཐ་དྡ་སཱ་མ ས་མྦུ་དྡྷཾ, ས་བྦ་དྷ་མྨཱ་ན པཱ་ར་གུཾ.
༡༢༦༣. ‘‘སོ མེ དྷ་མྨ་མ་དེ་སེ་སི, མུ་ནི དུ་ཀྑ་སྶ པཱ་ར་གཱུ;
དྷ་མྨཾ སུ་ཏྭཱ པ་སཱི་དི་མྷ, ས་དྡྷཱ [ཨ་དྡྷཱ (སཱི. ཨ་ཊྛ.)] ནོ ཨུ་ད་པ་ཛྫ་ཐ.
༡༢༦༤. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, ཁ་ནྡྷེ ཨཱ་ཡ་ཏ་ནཱ་ནི ཙ;
དྷཱ་ཏུ་ཡོ ཙ ཝི་དི་ཏྭཱ་ན, པ་བྦ་ཛིཾ ཨ་ན་གཱ་རི་ཡཾ.
༡༢༦༥. ‘‘བ་ཧཱུ་ནཾ ཝ་ཏ ཨ་ཏྠཱ་ཡ, ཨུ་པྤ་ཛྫ་ནྟི ཏ་ཐཱ་ག་ཏཱ;
ཨི་ཏྠཱི་ནཾ པུ་རི་སཱ་ན་ཉྩ, ཡེ ཏེ སཱ་ས་ན་ཀཱ་ར་ཀཱ.
༡༢༦༦. ‘‘ཏེ་སཾ ཁོ ཝ་ཏ ཨ་ཏྠཱ་ཡ, བོ་དྷི་མ་ཛ྄ཛྷ་ག་མཱ མུ་ནི;
བྷི་ཀྑཱུ་ནཾ བྷི་ཀྑུ་ནཱི་ན་ཉྩ, ཡེ ནི་རཱ་མ་ག་ཏ་དྡ་སཱ.
༡༢༦༧. ‘‘སུ་དེ་སི་ཏཱ ཙ་ཀྑུ་མ་ཏཱ, བུ་དྡྷེ་ནཱ་དི་ཙྩ་བ་ནྡྷུ་ནཱ;
ཙ་ཏྟཱ་རི ཨ་རི་ཡ་ས་ཙྩཱ་ནི, ཨ་ནུ་ཀ་མྤཱ་ཡ པཱ་ཎི་ནཾ.
༡༢༦༨. ‘‘དུ་ཀྑཾ དུ་ཀྑ་ས་མུ་པྤཱ་དཾ, དུ་ཀྑ་སྶ ཙ ཨ་ཏི་ཀྐ་མཾ;
ཨ་རི་ཡཾ ཙ་ཊྛ་ངྒི་ཀཾ མ་གྒཾ, དུ་ཀྑཱུ་པ་ས་མ་གཱ་མི་ནཾ.
༡༢༦༩. ‘‘ཨེ་ཝ་མེ་ཏེ ཏ་ཐཱ ཝུ་ཏྟཱ, དི་ཊྛཱ མེ ཏེ ཡ་ཐཱ ཏ་ཐཱ;
ས་ད་ཏྠོ མེ ཨ་ནུ་པྤ་ཏྟོ, ཀ་ཏཾ བུ་དྡྷ་སྶ སཱ་ས་ནཾ.
༡༢༧༠. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;
སུ་ཝི་བྷ་ཏྟེ་སུ [ས་ཝི་བྷ་ཏྟེ་སུ (སཱི. ཀ.)] དྷ་མྨེ་སུ, ཡཾ སེ་ཊྛཾ ཏ་དུ་པཱ་ག་མིཾ.
༡༢༧༡. ‘‘ཨ་བྷི་ཉྙཱ་པཱ་ར་མི་པྤ་ཏྟོ, སོ་ཏ་དྷཱ་ཏུ ཝི་སོ་དྷི་ཏཱ;
ཏེ་ཝི་ཛྫོ ཨི་དྡྷི་པ་ཏྟོ་མྷི, ཙེ་ཏོ་པ་རི་ཡ་ཀོ་ཝི་དོ.
༡༢༧༢. ‘‘པུ་ཙྪཱ་མི ས་ཏྠཱ་ར་མ་ནོ་མ་པ་ཉྙཾ, དི་ཊྛེ་ཝ དྷ་མྨེ ཡོ ཝི་ཙི་ཀི་ཙྪཱ་ནཾ ཚེ་ཏྟཱ;
ཨ་གྒཱ་ལ༹་ཝེ ཀཱ་ལ་མ་ཀཱ་སི བྷི་ཀྑུ, ཉཱ་ཏོ ཡ་ས་སྶཱི ཨ་བྷི་ནི་བྦུ་ཏ་ཏྟོ.
༡༢༧༣. ‘‘ནི་གྲོ་དྷ་ཀ་པྤོ ཨི་ཏི ཏ་སྶ ནཱ་མཾ, ཏ་ཡཱ ཀ་ཏཾ བྷ་ག་ཝཱ བྲཱ་ཧྨ་ཎ་སྶ;
སོ ཏཾ ན་མ་སྶཾ ཨ་ཙ་རི མུ་ཏྱ་པེ་ཁོ, ཨཱ་ར་དྡྷ་ཝཱི་རི་ཡོ ད་ལ༹ྷ་དྷ་མྨ་ད་སྶཱི.
༡༢༧༤. ‘‘ཏཾ སཱ་ཝ་ཀཾ ས་ཀྐ མ་ཡ་མྤི ས་བྦེ, ཨ་ཉྙཱ་ཏུ་མི་ཙྪཱ་མ ས་མ་ནྟ་ཙ་ཀྑུ;
ས་མ་ཝ་ཊྛི་ཏཱ ནོ ས་ཝ་ནཱ་ཡ སོ་ཏཱ [ཧེ་ཏུཾ (སཱི. སྱཱ.) སུ་ཏྟ་ནི་པཱ་ཏ་ཊྛ་ཀ་ཐཱ པ་སྶི་ཏ་བྦཱ], ཏུ་ཝཾ ནོ ས་ཏྠཱ ཏྭ་མ་ནུ་ཏྟ་རོ་སི’’.
༡༢༧༥. ཚི་ནྡ ནོ ཝི་ཙི་ཀི་ཙྪཾ བྲཱུ་ཧི མེ་ཏཾ, པ་རི་ནི་བྦུ་ཏཾ ཝེ་ད་ཡ བྷཱུ་རི་པ་ཉྙ;
མ་ཛ྄ཛྷེ་ཝ ནོ བྷཱ་ས ས་མ་ནྟ་ཙ་ཀྑུ, ས་ཀྐོ་ཝ དེ་ཝཱ་ན ས་ཧ་སྶ་ནེ་ཏྟོ.
༡༢༧༦. ‘‘ཡེ ཀེ་ཙི ག་ནྠཱ ཨི་དྷ མོ་ཧ་མ་གྒཱ, ཨ་ཉྙཱ་ཎ་པ་ཀྑཱ ཝི་ཙི་ཀི་ཙྪ་ཋཱ་ནཱ;
ཏ་ཐཱ་ག་ཏཾ པ་ཏྭཱ ན ཏེ བྷ་ཝ་ནྟི, ཙ་ཀྑུ་ཉྷི ཨེ་ཏཾ པ་ར་མཾ ན་རཱ་ནཾ.
༡༢༧༧. ‘‘ནོ ཙེ ཧི ཛཱ་ཏུ པུ་རི་སོ ཀི་ལེ་སེ, ཝཱ་ཏོ ཡ་ཐཱ ཨ་བྦྷ་གྷ་ནཾ ཝི་ཧཱ་ནེ;
ཏ་མོ་ཝ་སྶ ནི་ཝུ་ཏོ ས་བྦ་ལོ་ཀོ, ཛོ་ཏི་མ་ནྟོ་པི ན པ་བྷཱ་སེ་ཡྻུཾ [ན ཛོ་ཏི་མ་ནྟོ་པི ན་རཱ ཏ་པེ་ཡྻུཾ (སུ. ནི. ༣༥༠)].
༡༢༧༨. ‘‘དྷཱི་རཱ ཙ པ་ཛྫོ་ཏ་ཀ་རཱ བྷ་ཝ་ནྟི, ཏཾ ཏཾ ཨ་ཧཾ ཝཱི་ར ཏ་ཐེ་ཝ མ་ཉྙེ;
ཝི་པ་སྶི་ནཾ ཛཱ་ན་མུ་པཱ་ག་མི་མྷ, པ་རི་སཱ་སུ ནོ ཨཱ་ཝི་ཀ་རོ་ཧི ཀ་པྤཾ.
༡༢༧༩. ‘‘ཁི་པྤཾ གི་རཾ ཨེ་ར་ཡ ཝ་གྒུ ཝ་གྒུཾ, ཧཾ་སོ་ཝ པ་གྒ་ཡ྄ཧ ས་ཎི་ཀཾ ནི་ཀཱུ་ཛ;
བི་ནྡུ་སྶ་རེ་ན སུ་ཝི་ཀ་པྤི་ཏེ་ན, ས་བྦེ་ཝ ཏེ ཨུ་ཛྫུ་ག་ཏཱ སུ་ཎོ་མ.
༡༢༨༠. ‘‘པ་ཧཱི་ན་ཛཱ་ཏི་མ་ར་ཎཾ ཨ་སེ་སཾ, ནི་གྒ་ཡ྄ཧ དྷོ་ནཾ ཝ་དེ་སྶཱ་མི [པ་ཊི་ཝེ་དི་ཡཱ་མི (སཱི. ཀ.)] དྷ་མྨཾ;
ན ཀཱ་མ་ཀཱ་རོ ཧི [ཧོ་ཏི (སཱི. ཀ.)] པུ་ཐུ་ཛྫ་ནཱ་ནཾ, ས་ངྑེ་ཡྻ་ཀཱ་རོ ཙ [ཝ (བ་ཧཱུ་སུ)] ཏ་ཐཱ་ག་ཏཱ་ནཾ.
༡༢༨༡. ‘‘ས་མྤ་ནྣ་ཝེ་ཡྻཱ་ཀ་ར་ཎཾ ཏ་ཝེ་དཾ, ས་མུ་ཛྫུ་པ་ཉྙ་སྶ ས་མུ་གྒ་ཧཱི་ཏཾ;
ཨ་ཡ་མ་ཉྫ་ལི པ་ཙྪི་མོ སུ་པྤ་ཎཱ་མི་ཏོ, མཱ མོ་ཧ་ཡཱི ཛཱ་ན་མ་ནོ་མ་པ་ཉྙ.
༡༢༨༢. ‘‘པ་རོ་པ་རཾ ཨ་རི་ཡ་དྷ་མྨཾ ཝི་དི་ཏྭཱ, མཱ མོ་ཧ་ཡཱི ཛཱ་ན་མ་ནོ་མ་ཝཱི་རི་ཡ;
ཝཱ་རིཾ ཡ་ཐཱ གྷ་མྨ་ནི གྷ་མྨ་ཏ་ཏྟོ, ཝཱ་ཙཱ་བྷི་ཀ་ངྑཱ་མི སུ་ཏཾ པ་ཝ་སྶ.
༡༢༨༣. ‘‘ཡ་ད་ཏྠི་ཀཾ བྲ་ཧྨ་ཙ་རི་ཡཾ ཨ་ཙ་རཱི, ཀ་པྤཱ་ཡ་ནོ ཀ་ཙྩི་སྶ་ཏཾ ཨ་མོ་གྷཾ;
ནི་བྦཱ་ཡི སོ ཨཱ་དུ ས་ཨུ་པཱ་དི་སེ་སོ [ཨ་ནུ་པཱ་དི་སེ་སཱ (སཱི.), ཨ་ནུ་པཱ་དི་སེ་སོ (ཀ.)], ཡ་ཐཱ ཝི་མུ་ཏྟོ ཨ་ཧུ ཏཾ སུ་ཎོ་མ.
༡༢༨༤. ‘‘‘ཨ་ཙྪེ་ཙྪི ཏ་ཎྷཾ ཨི་དྷ ནཱ་མ་རཱུ་པེ,
(ཨི་ཏི བྷ་ག་ཝཱ) ཀ་ཎྷ་སྶ སོ་ཏཾ དཱི་གྷ་ར་ཏྟཱ་ནུ་ས་ཡི་ཏཾ;
ཨ་ཏཱ་རི ཛཱ་ཏིཾ མ་ར་ཎཾ ཨ་སེ་སཾ’, ཨི་ཙྩ་བྲ་ཝི བྷ་ག་ཝཱ པ་ཉྩ་སེ་ཊྛོ.
༡༢༨༥. ‘‘ཨེ་ས སུ་ཏྭཱ པ་སཱི་དཱ་མི, ཝ་ཙོ ཏེ ཨི་སི་ས་ཏྟ་མ;
ཨ་མོ་གྷཾ ཀི་ར མེ པུ་ཊྛཾ, ན མཾ ཝ་ཉྩེ་སི བྲཱ་ཧྨ་ཎོ.
༡༢༨༦. ‘‘ཡ་ཐཱ ཝཱ་དཱི ཏ་ཐཱ ཀཱ་རཱི, ཨ་ཧུ བུ་དྡྷ་སྶ སཱ་ཝ་ཀོ;
ཨ་ཙྪེ་ཙྪི མ་ཙྩུ་ནོ ཛཱ་ལཾ, ཏ་ཏཾ མཱ་ཡཱ་ཝི་ནོ ད་ལ༹ྷཾ.
༡༢༨༧. ‘‘ཨ་དྡ་ས བྷ་ག་ཝཱ ཨཱ་དིཾ, ཨུ་པཱ་དཱ་ན་སྶ ཀ་པྤི་ཡོ;
ཨ་ཙྩ་གཱ ཝ་ཏ ཀ་པྤཱ་ནོ, མ་ཙྩུ་དྷེ་ཡྻཾ སུ་དུ་ཏྟ་རཾ.
༡༢༨༨. ‘‘ཏཾ དེ་ཝ་དེ་ཝཾ ཝ་ནྡཱ་མི, པུ་ཏྟཾ ཏེ དྭི་པ་དུ་ཏྟ་མ;
ཨ་ནུ་ཛཱ་ཏཾ མ་ཧཱ་ཝཱི་རཾ, ནཱ་གཾ ནཱ་ག་སྶ ཨོ་ར་ས’’ནྟི.
ཨི་ཏྠཾ སུ་དཾ ཨཱ་ཡ་སྨཱ ཝ་ངྒཱི་སོ ཐེ་རོ གཱ་ཐཱ་ཡོ
ཨ་བྷཱ་སི་ཏྠཱ་ཏི.
མ་ཧཱ་ནི་པཱ་ཏོ ནི་ཊྛི་ཏོ.