༨. ཨ་ཊྛ་མ་ཝ་གྒོ

༧༡. ‘‘སུ་སུ་ཁུ་མ་ནི་པུ་ཎ་ཏྠ་ད་སྶི་ནཱ, མ་ཏི་ཀུ་ས་ལེ་ན ནི་ཝཱ་ཏ་ཝུ་ཏྟི་ནཱ;

སཾ་སེ་ཝི་ཏ་ཝུ་དྡྷ་སཱི་ལི་ནཱ [སཾ་སེ་ཝི་ཏ་བུ་དྡྷ་སཱི་ལི་ནཱ (ཀ.)], ནི་བྦཱ་ནཾ ན ཧི ཏེ་ན དུ་ལླ་བྷ’’ནྟི.

… ཝ་ཙྪ་པཱ་ལོ ཐེ་རོ….

༧༢. ‘‘ཡ་ཐཱ ཀ་ལཱི༹་རོ སུ་སུ ཝ་ཌྜྷི་ཏ་གྒོ, དུ་ནྣི་ཀྑ་མོ ཧོ་ཏི པ་སཱ་ཁ་ཛཱ་ཏོ;

ཨེ་ཝཾ ཨ་ཧཾ བྷ་རི་ཡཱ་ཡཱ་ནི་ཏཱ་ཡ, ཨ་ནུ་མ་ཉྙཾ མཾ པ་བྦ་ཛི་ཏོ་མྷི དཱ་ནཱི’’ཏི.

… ཨཱ་ཏུ་མོ ཐེ་རོ….

༧༣. ‘‘ཛི་ཎྞ་ཉྩ དི་སྭཱ དུ་ཁི་ཏ་ཉྩ བྱཱ་དྷི་ཏཾ, མ་ཏ་ཉྩ དི་སྭཱ ག་ཏ་མཱ་ཡུ་ས་ངྑ་ཡཾ;

ཏ་ཏོ ཨ་ཧཾ ནི་ཀྑ་མི་ཏཱུ་ན པ་བྦ་ཛིཾ, པ་ཧཱ་ཡ ཀཱ་མཱ་ནི མ་ནོ་ར་མཱ་ནཱི’’ཏི.

… མཱ་ཎ་ཝོ ཐེ་རོ….

༧༤. ‘‘ཀཱ་མ་ཙྪ་ནྡོ ཙ བྱཱ་པཱ་དོ, ཐི་ན་མི་དྡྷ་ཉྩ [ཐཱི་ན་མི་དྡྷ་ཉྩ (སཱི. སྱཱ.)] བྷི་ཀྑུ་ནོ;

ཨུ་དྡྷ་ཙྩཾ ཝི་ཙི་ཀི་ཙྪཱ ཙ, ས་བྦ་སོ་ཝ ན ཝི་ཛྫ་ཏཱི’’ཏི.

… སུ་ཡཱ་མ་ནོ ཐེ་རོ….

༧༥. ‘‘སཱ་དྷུ སུ་ཝི་ཧི་ཏཱ་ན ད་སྶ་ནཾ, ཀ་ངྑཱ ཚི་ཛྫ་ཏི བུ་དྡྷི ཝ་ཌྜྷ་ཏི;

བཱ་ལ་མྤི ཀ་རོ་ནྟི པ་ཎྜི་ཏཾ, ཏ་སྨཱ སཱ་དྷུ ས་ཏཾ ས་མཱ་ག་མོ’’ཏི.

… སུ་སཱ་ར་དོ ཐེ་རོ….

༧༦. ‘‘ཨུ་པྤ་ཏ་ནྟེ་སུ ནི་པ་ཏེ, ནི་པ་ཏ་ནྟེ་སུ ཨུ་པྤ་ཏེ;

ཝ་སེ ཨ་ཝ་ས་མཱ་ནེ་སུ, ར་མ་མཱ་ནེ་སུ ནོ ར་མེ’’ཏི.

… པི་ཡ་ཉྫ་ཧོ ཐེ་རོ….

༧༧. ‘‘ཨི་དཾ པུ་རེ ཙི་ཏྟ་མ་ཙཱ་རི ཙཱ་རི་ཀཾ, ཡེ་ནི་ཙྪ་ཀཾ ཡ་ཏྠ་ཀཱ་མཾ ཡ་ཐཱ་སུ་ཁཾ;

ཏ་ད་ཛྫ་ཧཾ ནི་གྒ་ཧེ་སྶཱ་མི ཡོ་ནི་སོ, ཧ་ཏྠི་པྤ་བྷི་ནྣཾ ཝི་ཡ ཨ་ངྐུ་ས་གྒ་ཧོ’’ཏི.

… ཧ་ཏྠཱ་རོ་ཧ་པུ་ཏྟོ ཐེ་རོ….

༧༨. ‘‘ཨ་ནེ་ཀ་ཛཱ་ཏི་སཾ་སཱ་རཾ, ས་ནྡྷཱ་ཝི་སྶཾ ཨ་ནི་བྦི་སཾ;

ཏ་སྶ མེ དུ་ཀྑ་ཛཱ་ཏ་སྶ, དུ་ཀྑ་ཀྑ་ནྡྷོ ཨ་པ་ར་དྡྷོ’’ཏི.

… མེ་ཎྜ་སི་རོ ཐེ་རོ….

༧༩. ‘‘ས་བྦོ རཱ་གོ པ་ཧཱི་ནོ མེ, ས་བྦོ དོ་སོ ས་མཱུ་ཧ་ཏོ;

ས་བྦོ མེ ཝི་ག་ཏོ མོ་ཧོ, སཱི་ཏི་བྷཱུ་ཏོ་སྨི ནི་བྦུ་ཏོ’’ཏི.

… ར་ཀྑི་ཏོ ཐེ་རོ….

༨༠. ‘‘ཡཾ མ་ཡཱ པ་ཀ་ཏཾ ཀ་མྨཾ, ཨ་པྤཾ ཝཱ ཡ་དི ཝཱ བ་ཧུཾ;

ས་བྦ་མེ་ཏཾ པ་རི་ཀྑཱི་ཎཾ, ན་ཏྠི དཱ་ནི པུ་ན་བྦྷ་ཝོ’’ཏི.

… ཨུ་གྒོ ཐེ་རོ….

ཝ་གྒོ ཨ་ཊྛ་མོ ནི་ཊྛི་ཏོ.

ཏ་སྶུ་དྡཱ་ནཾ –

ཝ་ཙྪ་པཱ་ལོ ཙ ཡོ ཐེ་རོ, ཨཱ་ཏུ་མོ མཱ་ཎ་ཝོ ཨི་སི;

སུ་ཡཱ་མ་ནོ སུ་སཱ་ར་དོ, ཐེ་རོ ཡོ ཙ པི་ཡ་ཉྫ་ཧོ;

ཨཱ་རོ་ཧ་པུ་ཏྟོ མེ་ཎྜ་སི་རོ, ར་ཀྑི་ཏོ ཨུ་གྒ་ས་ཝ྄ཧ་ཡོ་ཏི.