༦. ཚ་ཊྛ་ཝ་གྒོ

༥༡. ‘‘ཝ་སྶ་ཏི དེ་ཝོ ཡ་ཐཱ སུ་གཱི་ཏཾ, ཚ་ནྣཱ མེ ཀུ་ཊི་ཀཱ སུ་ཁཱ ནི་ཝཱ་ཏཱ;

ཙི་ཏྟཾ སུ་ས་མཱ་ཧི་ཏ་ཉྩ མ་ཡ྄ཧཾ, ཨ་ཐ ཙེ པ་ཏྠ་ཡ་སི པ་ཝ་སྶ དེ་ཝཱ’’ཏི.

… གོ་དྷི་ཀོ ཐེ་རོ….

༥༢. ‘‘ཝ་སྶ་ཏི དེ་ཝོ ཡ་ཐཱ སུ་གཱི་ཏཾ, ཚ་ནྣཱ མེ ཀུ་ཊི་ཀཱ སུ་ཁཱ ནི་ཝཱ་ཏཱ;

ཙི་ཏྟཾ སུ་ས་མཱ་ཧི་ཏ་ཉྩ ཀཱ་ཡེ, ཨ་ཐ ཙེ པ་ཏྠ་ཡ་སི པ་ཝ་སྶ དེ་ཝཱ’’ཏི.

… སུ་བཱ་ཧུ་ཏྠེ་རོ….

༥༣. ‘‘ཝ་སྶ་ཏི དེ་ཝོ ཡ་ཐཱ སུ་གཱི་ཏཾ, ཚ་ནྣཱ མེ ཀུ་ཊི་ཀཱ སུ་ཁཱ ནི་ཝཱ་ཏཱ;

ཏ་སྶཾ ཝི་ཧ་རཱ་མི ཨ་པྤ་མ་ཏྟོ, ཨ་ཐ ཙེ པ་ཏྠ་ཡ་སི པ་ཝ་སྶ དེ་ཝཱ’’ཏི.

… ཝ་ལླི་ཡོ ཐེ་རོ….

༥༤. ‘‘ཝ་སྶ་ཏི དེ་ཝོ ཡ་ཐཱ སུ་གཱི་ཏཾ, ཚ་ནྣཱ མེ ཀུ་ཊི་ཀཱ སུ་ཁཱ ནི་ཝཱ་ཏཱ;

ཏ་སྶཾ ཝི་ཧ་རཱ་མི ཨ་དུ་ཏི་ཡོ, ཨ་ཐ ཙེ པ་ཏྠ་ཡ་སི པ་ཝ་སྶ དེ་ཝཱ’’ཏི.

… ཨུ་ཏྟི་ཡོ ཐེ་རོ….

༥༥. ‘‘ཨཱ་ས་ནྡིཾ ཀུ་ཊི་ཀཾ ཀ་ཏྭཱ, ཨོ་ག་ཡ྄ཧ ཨ་ཉྫ་ནཾ ཝ་ནཾ;

ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ན’’ནྟི.

… ཨ་ཉྫ་ན་ཝ་ནི་ཡོ ཐེ་རོ….

༥༦. ‘‘ཀོ ཀུ་ཊི་ཀཱ་ཡཾ བྷི་ཀྑུ ཀུ་ཊི་ཀཱ་ཡཾ, ཝཱི་ཏ་རཱ་གོ སུ་ས་མཱ་ཧི་ཏ་ཙི་ཏྟོ;

ཨེ་ཝཾ ཛཱ་ནཱ་ཧི ཨཱ་ཝུ་སོ, ཨ་མོ་གྷཱ ཏེ ཀུ་ཊི་ཀཱ ཀ་ཏཱ’’ཏི.

… ཀུ་ཊི་ཝི་ཧཱ་རི་ཏྠེ་རོ….

༥༧. ‘‘ཨ་ཡ་མཱ་ཧུ པུ་རཱ་ཎི་ཡཱ ཀུ་ཊི, ཨ་ཉྙཾ པ་ཏྠ་ཡ་སེ ན་ཝཾ ཀུ་ཊིཾ;

ཨཱ་སཾ ཀུ་ཊི་ཡཱ ཝི་རཱ་ཛ་ཡ, དུ་ཀྑཱ བྷི་ཀྑུ པུ་ན ན་ཝཱ ཀུ་ཊཱི’’ཏི.

… དུ་ཏི་ཡ་ཀུ་ཊི་ཝི་ཧཱ་རི་ཏྠེ་རོ….

༥༨. ‘‘ར་མ་ཎཱི་ཡཱ མེ ཀུ་ཊི་ཀཱ, ས་དྡྷཱ་དེ་ཡྻཱ མ་ནོ་ར་མཱ;

ན མེ ཨ་ཏྠོ ཀུ་མཱ་རཱི་ཧི, ཡེ་སཾ ཨ་ཏྠོ ཏ་ཧིཾ ག་ཙྪ་ཐ ནཱ་རི་ཡོ’’ཏི.

… ར་མ་ཎཱི་ཡ་ཀུ་ཊི་ཀོ ཐེ་རོ….

༥༩. ‘‘ས་དྡྷཱ་ཡཱ་ཧཾ པ་བྦ་ཛི་ཏོ, ཨ་ར་ཉྙེ མེ ཀུ་ཊི་ཀཱ ཀ་ཏཱ;

ཨ་པྤ་མ་ཏྟོ ཙ ཨཱ་ཏཱ་པཱི, ས་མྤ་ཛཱ་ནོ པ་ཏི་སྶ་ཏོ’’ཏི [པ་ཊི་སྶ་ཏོ་ཏི (ཀ.)].

… ཀོ་ས་ལ་ཝི་ཧཱ་རི་ཏྠེ་རོ….

༦༠. ‘‘ཏེ མེ ཨི་ཛ྄ཛྷིཾ་སུ ས་ངྐ་པྤཱ, ཡ་ད་ཏྠོ པཱ་ཝི་སིཾ ཀུ་ཊིཾ;

ཝི་ཛྫཱ་ཝི་མུ་ཏྟིཾ པ་ཙྩེ་སཾ, མཱ་ནཱ་ནུ་ས་ཡ་མུ་ཛྫ་ཧ’’ནྟི.

… སཱི་ཝ་ལི་ཏྠེ་རོ….

ཝ་གྒོ ཚ་ཊྛོ ནི་ཊྛི་ཏོ.

ཏ་སྶུ་དྡཱ་ནཾ –

གོ་དྷི་ཀོ ཙ སུ་བཱ་ཧུ ཙ, ཝ་ལླི་ཡོ ཨུ་ཏྟི་ཡོ ཨི་སི;

ཨ་ཉྫ་ན་ཝ་ནི་ཡོ ཐེ་རོ, དུ་ཝེ ཀུ་ཊི་ཝི་ཧཱ་རི་ནོ;

ར་མ་ཎཱི་ཡ་ཀུ་ཊི་ཀོ ཙ, ཀོ་ས་ལ་ཝ྄ཧ་ཡ་སཱི་ཝ་ལཱི་ཏི.