༣. ཏ་ཏི་ཡ་ཝ་གྒོ

༢༡. ‘‘ནཱ་ཧཾ བྷ་ཡ་སྶ བྷཱ་ཡཱ་མི, ས་ཏྠཱ ནོ ཨ་མ་ཏ་སྶ ཀོ་ཝི་དོ;

ཡ་ཏྠ བྷ་ཡཾ ནཱ་ཝ་ཏི་ཊྛ་ཏི, ཏེ་ན མ་གྒེ་ན ཝ་ཛ་ནྟི བྷི་ཀྑ་ཝོ’’ཏི.

… ནི་གྲོ་དྷོ ཐེ་རོ….

༢༢. ‘‘ནཱི་ལཱ སུ་གཱི་ཝཱ སི་ཁི་ནོ, མོ་རཱ ཀཱ་ར་མྦྷི་ཡཾ [ཀཱ་རཾ་ཝི་ཡཾ (སཱི.), ཀཱ་ར་ཝི་ཡཾ (སྱཱ.)] ཨ་བྷི་ན་ད་ནྟི;

ཏེ སཱི་ཏ་ཝཱ་ཏ་ཀཱི་ལི༹་ཏཱ [སཱི་ཏ་ཝཱ་ཏ་ཀ་དྡི་ཏ་ཀ་ལི་ཏཱ (སཱི.), སཱི་ཏ་ཝཱ་ཏ་ཀ་ལི་ཏཱ (སྱཱ.)], སུ་ཏྟཾ ཛྷཱ་ཡཾ [ཛྷཱ་ནཾ (སྱཱ.), ཛྷཱ་ཡིཾ (?)] ནི་བོ་དྷེ་ནྟཱི’’ཏི.

… ཙི་ཏྟ་ཀོ ཐེ་རོ….

༢༣. ‘‘ཨ་ཧཾ ཁོ ཝེ་ལུ༹་གུ་མྦ་སྨིཾ, བྷུ་ཏྭཱ་ན མ་དྷུ་པཱ་ཡ་སཾ;

པ་ད་ཀྑི་ཎཾ ས་མྨ་ས་ནྟོ, ཁ་ནྡྷཱ་ནཾ ཨུ་ད་ཡ་བྦ་ཡཾ;

སཱ་ནུཾ པ་ཊི་ག་མི་སྶཱ་མི, ཝི་ཝེ་ཀ་མ་ནུ་བྲཱུ་ཧ་ཡ’’ནྟི.

… གོ་སཱ་ལོ ཐེ་རོ….

༢༤. ‘‘ཨ་ནུ་ཝ་སྶི་ཀོ པ་བྦ་ཛི་ཏོ, པ་སྶ དྷ་མྨ་སུ་དྷ་མྨ་ཏཾ;

ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ན’’ནྟི.

… སུ་ག་ནྡྷོ ཐེ་རོ….

༢༥. ‘‘ཨོ་བྷཱ་ས་ཛཱ་ཏཾ ཕ་ལ་གཾ, ཙི་ཏྟཾ ཡ་སྶ ཨ་བྷི་ཎྷ་སོ;

ཏཱ་དི་སཾ བྷི་ཀྑུ་མཱ་ས་ཛྫ, ཀ་ཎྷ དུ་ཀྑཾ ནི་ག་ཙྪ་སཱི’’ཏི.

… ན་ནྡི་ཡོ ཐེ་རོ….

༢༦. ‘‘སུ་ཏྭཱ སུ་བྷཱ་སི་ཏཾ ཝཱ་ཙཾ, བུ་དྡྷ་སྶཱ་དི་ཙྩ་བ་ནྡྷུ་ནོ;

པ་ཙྩ་བྱ་དྷིཾ ཧི ནི་པུ་ཎཾ, ཝཱ་ལ་གྒཾ ཨུ་སུ་ནཱ ཡ་ཐཱ’’ཏི.

… ཨ་བྷ་ཡོ ཐེ་རོ….

༢༧. ‘‘ད་བྦཾ ཀུ་སཾ པོ་ཊ་ཀི་ལཾ, ཨུ་སཱི་རཾ མུ་ཉྫ་པ་བྦ་ཛཾ;

ཨུ་ར་སཱ པ་ནུ་དི་སྶཱ་མི, ཝི་ཝེ་ཀ་མ་ནུ་བྲཱུ་ཧ་ཡ’’ནྟི.

… ལོ་མ་ས་ཀ་ངྒི་ཡོ ཐེ་རོ….

༢༨. ‘‘ཀ་ཙྩི ནོ ཝ་ཏྠ་པ་སུ་ཏོ, ཀ་ཙྩི ནོ བྷཱུ་ས་ནཱ་ར་ཏོ;

ཀ་ཙྩི སཱི་ལ་མ་ཡཾ ག་ནྡྷཾ, ཀིཾ ཏྭཾ ཝཱ་ཡ་སི [ཀ་ཙྩི སཱི་ལ་མ་ཡཾ ག་ནྡྷཾ, ཏྭཾ ཝཱ་སི (སྱཱ.)] ནེ་ཏ་རཱ པ་ཛཱ’’ཏི.

… ཛ་མྦུ་གཱ་མི་ཀ་པུ་ཏྟོ ཐེ་རོ….

༢༩. ‘‘ས་མུ་ནྣ་མ་ཡ་མ་ཏྟཱ་ནཾ, ཨུ་སུ་ཀཱ་རོ་ཝ ཏེ་ཛ་ནཾ;

ཙི་ཏྟཾ ཨུ་ཛུཾ ཀ་རི་ཏྭཱ་ན, ཨ་ཝི་ཛྫཾ བྷི་ནྡ ཧཱ་རི་ཏཱ’’ཏི.

… ཧཱ་རི་ཏོ ཐེ་རོ….

༣༠. ‘‘ཨཱ་བཱ་དྷེ མེ ས་མུ་པྤ་ནྣེ, ས་ཏི མེ ཨུ་ད་པ་ཛྫ་ཐ;

ཨཱ་བཱ་དྷོ མེ ས་མུ་པྤ་ནྣོ, ཀཱ་ལོ མེ ན་པྤ་མ་ཛྫི་ཏུ’’ནྟི.

… ཨུ་ཏྟི་ཡོ ཐེ་རོ….

ཝ་གྒོ ཏ་ཏི་ཡོ ནི་ཊྛི་ཏོ.

ཏ་སྶུ་དྡཱ་ནཾ –

ནི་གྲོ་དྷོ ཙི་ཏྟ་ཀོ ཐེ་རོ, གོ་སཱ་ལ་ཐེ་རོ སུ་ག་ནྡྷོ;

ན་ནྡི་ཡོ ཨ་བྷ་ཡོ ཐེ་རོ, ཐེ་རོ ལོ་མ་ས་ཀ་ངྒི་ཡོ;

ཛ་མྦུ་གཱ་མི་ཀ་པུ་ཏྟོ ཙ, ཧཱ་རི་ཏོ ཨུ་ཏྟི་ཡོ ཨི་སཱི་ཏི.