༢. དུ་ཏི་ཡ་ཝ་གྒོ

༡༡. ‘‘པཱ་མོ་ཛྫ་བ་ཧུ་ལོ བྷི་ཀྑུ, དྷ་མྨེ བུ་དྡྷ་པྤ་ཝེ་དི་ཏེ;

ཨ་དྷི་ག་ཙྪེ པ་དཾ ས་ནྟཾ, ས་ངྑཱ་རཱུ་པ་ས་མཾ སུ་ཁ’’ནྟི.

… ཙཱུ་ལ༹་ཝ་ཙྪོ [ཙཱུ་ལ་ག་ཝ་ཙྪོ (སཱི.)] ཐེ་རོ….

༡༢. ‘‘པ་ཉྙཱ་བ་ལཱི སཱི་ལ་ཝ་ཏཱུ་པ་པ་ནྣོ, ས་མཱ་ཧི་ཏོ ཛྷཱ་ན་ར་ཏོ ས་ཏཱི་མཱ;

ཡ་ད་ཏྠི་ཡཾ བྷོ་ཛ་ནཾ བྷུ་ཉྫ་མཱ་ནོ, ཀ་ངྑེ་ཐ ཀཱ་ལཾ ཨི་དྷ ཝཱི་ཏ་རཱ་གོ’’ཏི.

… མ་ཧཱ་ཝ་ཙྪོ [མ་ཧཱ་ག་ཝ་ཙྪོ (སཱི.)] ཐེ་རོ….

༡༣. ‘‘ནཱི་ལ་བྦྷ་ཝ་ཎྞཱ རུ་ཙི་རཱ, སཱི་ཏ་ཝཱ་རཱི སུ་ཙི་ནྡྷ་རཱ;

ཨི་ནྡ་གོ་པ་ཀ་ས་ཉྪ་ནྣཱ, ཏེ སེ་ལཱ ར་མ་ཡ་ནྟི མ’’ནྟི.

… ཝ་ན་ཝ་ཙྪོ ཐེ་རོ….

༡༤. ‘‘ཨུ་པ་ཛ྄ཛྷཱ་ཡོ མཾ ཨ་ཝ་ཙ, ཨི་ཏོ ག་ཙྪཱ་མ སཱི་ཝ་ཀ;

གཱ་མེ མེ ཝ་ས་ཏི ཀཱ་ཡོ, ཨ་ར་ཉྙཾ མེ ག་ཏོ མ་ནོ;

སེ་མཱ་ན་ཀོ་པི ག་ཙྪཱ་མི, ན་ཏྠི ས་ངྒོ ཝི་ཛཱ་ན་ཏ’’ནྟི.

… སི་ཝ་ཀོ སཱ་མ་ཎེ་རོ….

༡༥. ‘‘པ་ཉྩ ཚི་ནྡེ པ་ཉྩ ཛ་ཧེ, པ་ཉྩ ཙུ་ཏྟ་རི བྷཱ་ཝ་ཡེ;

པ་ཉྩ་ས་ངྒཱ་ཏི་གོ བྷི་ཀྑུ, ཨོ་གྷ་ཏི་ཎྞོ་ཏི ཝུ་ཙྩ་ཏཱི’’ཏི.

… ཀུ་ཎྜ་དྷཱ་ནོ ཐེ་རོ….

༡༦. ‘‘ཡ་ཐཱ་པི བྷ་དྡོ ཨཱ་ཛ་ཉྙོ, ན་ངྒ་ལཱ་ཝ་ཏྟ་ནཱི སི་ཁཱི;

ག་ཙྪ་ཏི ཨ་པྤ་ཀ་སི་རེ་ན, ཨེ་ཝཾ ར་ཏྟི་ནྡི་ཝཱ མ་མ;

ག་ཙྪ་ནྟི ཨ་པྤ་ཀ་སི་རེ་ན, སུ་ཁེ ལ་དྡྷེ ནི་རཱ་མི་སེ’’ཏི.

… བེ་ལ་ཊྛ་སཱི་སོ ཐེ་རོ….

༡༧. ‘‘མི་དྡྷཱི ཡ་དཱ ཧོ་ཏི མ་ཧ་གྒྷ་སོ ཙ, ནི་དྡཱ་ཡི་ཏཱ ས་མྤ་རི་ཝ་ཏྟ་སཱ་ཡཱི;

མ་ཧཱ་ཝ་རཱ་ཧོ་ཝ ནི་ཝཱ་པ་པུ་ཊྛོ, པུ་ན་པྤུ་ནཾ ག་བྦྷ་མུ་པེ་ཏི མ་ནྡོ’’ཏི.

… དཱ་ས་ཀོ ཐེ་རོ….

༡༨. ‘‘ཨ་ཧུ བུ་དྡྷ་སྶ དཱ་ཡཱ་དོ, བྷི་ཀྑུ བྷེ་ས་ཀ་ལཱ༹་ཝ་ནེ;

ཀེ་ཝ་ལཾ ཨ་ཊྛི་ས་ཉྙཱ་ཡ, ཨ་ཕ་རཱི པ་ཐ་ཝིཾ [པ་ཋ་ཝིཾ (སཱི. སྱཱ.)] ཨི་མཾ;

མ་ཉྙེ་ཧཾ ཀཱ་མ་རཱ་གཾ སོ, ཁི་པྤ་མེ་ཝ པ་ཧི་སྶ་ཏཱི’’ཏི [པ་ཧཱི་ཡ་བྷི (ས་བྦ་ཏྠ པཱ་ལི༹་ཡཾ)].

… སི་ངྒཱ་ལ་པི་ཏཱ [སཱི་གཱ་ལ་པི་ཏཱ (སཱི.)] ཐེ་རོ….

༡༩. [དྷ. པ. ༨༠, ༡༤༥ དྷ་མྨ་པ་དེ་པི] ‘‘ཨུ་ད་ཀཾ ཧི ན་ཡ་ནྟི ནེ་ཏྟི་ཀཱ, ཨུ་སུ་ཀཱ་རཱ ན་མ་ཡ་ནྟི [ད་མ་ཡ་ནྟི (ཀ.)] ཏེ་ཛ་ནཾ;

དཱ་རུཾ ན་མ་ཡ་ནྟི ཏ་ཙྪ་ཀཱ, ཨ་ཏྟཱ་ནཾ ད་མ་ཡ་ནྟི སུ་བྦ་ཏཱ’’ཏི.

… ཀུ་ལོ [ཀུ་ཎྜ་ལོ (སཱི.), ཀུ་ལོ༹ (སྱཱ. ཀ.)] ཐེ་རོ….

༢༠. ‘‘མ་ར་ཎེ མེ བྷ་ཡཾ ན་ཏྠི, ནི་ཀ་ནྟི ན་ཏྠི ཛཱི་ཝི་ཏེ;

ས་ནྡེ་ཧཾ ནི་ཀྑི་པི་སྶཱ་མི, ས་མྤ་ཛཱ་ནོ པ་ཊི་སྶ་ཏོ’’ཏི [པ་ཏི་སྶ་ཏོ་ཏི (སཱི. སྱཱ.)].

… ཨ་ཛི་ཏོ ཐེ་རོ ….

ཝ་གྒོ དུ་ཏི་ཡོ ནི་ཊྛི་ཏོ.

ཏ་སྶུ་དྡཱ་ནཾ –

ཙཱུ་ལ༹་ཝ་ཙྪོ མ་ཧཱ་ཝ་ཙྪོ, ཝ་ན་ཝ་ཙྪོ ཙ སཱི་ཝ་ཀོ;

ཀུ་ཎྜ་དྷཱ་ནོ ཙ བེ་ལ་ཊྛི, དཱ་ས་ཀོ ཙ ཏ་ཏོ་པ་རི;

སི་ངྒཱ་ལ་པི་ཏི་ཀོ ཐེ་རོ, ཀུ་ལོ ཙ ཨ་ཛི་ཏོ ད་སཱ་ཏི.