༡༦. པི་ངྒི་ཡ་མཱ་ཎ་ཝ་པུ་ཙྪཱ
༡༡༢༦. ‘‘ཛི་ཎྞོ་ཧ་མ་སྨི ཨ་བ་ལོ ཝཱི་ཏ་ཝ་ཎྞོ, (ཨི་ཙྩཱ་ཡ་སྨཱ པི་ངྒི་ཡོ)
ནེ་ཏྟཱ ན སུ་དྡྷཱ ས་ཝ་ནཾ ན ཕཱ་སུ;
མཱ་ཧཾ ན་སྶཾ མོ་མུ་ཧོ ཨ་ནྟ་རཱ་ཝ
ཨཱ་ཙི་ཀྑ དྷ་མྨཾ ཡ་མ་ཧཾ ཝི་ཛ་ཉྙཾ;
ཛཱ་ཏི་ཛ་རཱ་ཡ ཨི་དྷ ཝི་པྤ་ཧཱ་ནཾ’’.
༡༡༢༧. ‘‘དི་སྭཱ་ན རཱུ་པེ་སུ ཝི་ཧ་ཉྙ་མཱ་ནེ, (པི་ངྒི་ཡཱ་ཏི བྷ་ག་ཝཱ)
རུ་པྤ་ནྟི རཱུ་པེ་སུ ཛ་ནཱ པ་མ་ཏྟཱ;
ཏ་སྨཱ ཏུ་ཝཾ པི་ངྒི་ཡ ཨ་པྤ་མ་ཏྟོ,
ཛ་ཧ་སྶུ རཱུ་པཾ ཨ་པུ་ན་བྦྷ་ཝཱ་ཡ’’.
༡༡༢༨. ‘‘དི་སཱ ཙ་ཏ་སྶོ ཝི་དི་སཱ ཙ་ཏ་སྶོ, ཨུ་དྡྷཾ ཨ་དྷོ ད་ས དི་སཱ ཨི་མཱ་ཡོ;
ན ཏུ་ཡ྄ཧཾ ཨ་དི་ཊྛཾ ཨ་སུ་ཏཾ ཨ་མུ་ཏཾ [ཨ་སུ་ཏཾ ཨ་མུ་ཏཾ ཝཱ (སཱི.), ཨ་སུ་ཏཱ་མུ་ཏཾ ཝཱ (སྱཱ.), ཨ་སུ་ཏཾ’མུ་ཏཾ ཝཱ (པཱི.)], ཨ་ཐོ ཨ་ཝི་ཉྙཱ་ཏཾ ཀི་ཉྩ་ན་མ་ཏྠི [ཀི་ཉྩི མ་ཏྠི (སྱཱ.), ཀི་ཉྩི ན་ཏྠི (པཱི.), ཀི་ཉྩི་ན་མ་ཏྠི (ཀ.)] ལོ་ཀེ;
ཨཱ་ཙི་ཀྑ དྷ་མྨཾ ཡ་མ་ཧཾ ཝི་ཛ་ཉྙཾ, ཛཱ་ཏི་ཛ་རཱ་ཡ ཨི་དྷ ཝི་པྤ་ཧཱ་ནཾ’’.
༡༡༢༩. ‘‘ཏ་ཎྷཱ་དྷི་པ་ནྣེ མ་ནུ་ཛེ པེ་ཀྑ་མཱ་ནོ, (པི་ངྒི་ཡཱ་ཏི བྷ་ག་ཝཱ)
ས་ནྟཱ་པ་ཛཱ་ཏེ ཛ་ར་སཱ པ་རེ་ཏེ;
ཏ་སྨཱ ཏུ་ཝཾ པི་ངྒི་ཡ ཨ་པྤ་མ་ཏྟོ, ཛ་ཧ་སྶུ ཏ་ཎྷཾ ཨ་པུ་ན་བྦྷ་ཝཱ་ཡཱ’’ཏི.
པི་ངྒི་ཡ་མཱ་ཎ་ཝ་པུ་ཙྪཱ སོ་ལ༹་ས་མཱ ནི་ཊྛི་ཏཱ.
པཱ་རཱ་ཡ་ན་ཏྠུ་ཏི་གཱ་ཐཱ
ཨི་ད་མ་ཝོ་ཙ བྷ་ག་ཝཱ མ་ག་དྷེ་སུ ཝི་ཧ་ར་ནྟོ པཱ་སཱ་ཎ་ཀེ ཙེ་ཏི་ཡེ, པ་རི་ཙཱ་ར་ཀ་སོ་ལ༹་སཱ་ནཾ [པ་རི་ཙཱ་ར་ཀ་སོ་ལ༹་ས་ནྣཾ (སྱཱ. ཀ.)] བྲཱ་ཧྨ་ཎཱ་ནཾ ཨ་ཛ྄ཛྷི་ཊྛོ པུ་ཊྛོ པུ་ཊྛོ པ་ཉྷཾ [པ་ཉྷེ (སཱི. པཱི.)] བྱཱ་ཀཱ་སི. ཨེ་ཀ་མེ་ཀ་སྶ ཙེ་པི པ་ཉྷ་སྶ ཨ་ཏྠ་མ་ཉྙཱ་ཡ དྷ་མྨ་མ་ཉྙཱ་ཡ དྷ་མྨཱ་ནུ་དྷ་མྨཾ པ་ཊི་པ་ཛྫེ་ཡྻ, ག་ཙྪེ་ཡྻེ་ཝ ཛ་རཱ་མ་ར་ཎ་སྶ པཱ་རཾ. པཱ་ར་ངྒ་མ་ནཱི་ཡཱ ཨི་མེ དྷ་མྨཱ་ཏི, ཏ་སྨཱ ཨི་མ་སྶ དྷ་མྨ་པ་རི་ཡཱ་ཡ་སྶ པཱ་རཱ་ཡ་ན་ནྟེ་ཝ [པཱ་རཱ་ཡ་ཎཾ་ཏྭེ་ཝ (སཱི. ཨ་ཊྛ.)] ཨ་དྷི་ཝ་ཙ་ནཾ.
༡༡༣༠. ཨ་ཛི་ཏོ ཏི་སྶ་མེ་ཏྟེ་ཡྻོ, པུ་ཎྞ་ཀོ ཨ་ཐ མེ་ཏྟ་གཱུ;
དྷོ་ཏ་ཀོ ཨུ་པ་སཱི་ཝོ ཙ, ན་ནྡོ ཙ ཨ་ཐ ཧེ་མ་ཀོ.
༡༡༣༡. ཏོ་དེ་ཡྻ-ཀ་པྤཱ དུ་བྷ་ཡོ, ཛ་ཏུ་ཀ་ཎྞཱི ཙ པ་ཎྜི་ཏོ;
བྷ་དྲཱ་ཝུ་དྷོ ཨུ་ད་ཡོ ཙ, པོ་སཱ་ལོ ཙཱ་པི བྲཱ་ཧྨ་ཎོ;
མོ་གྷ་རཱ་ཛཱ ཙ མེ་དྷཱ་ཝཱི, པི་ངྒི་ཡོ ཙ མ་ཧཱ་ཨི་སི.
༡༡༣༢. ཨེ་ཏེ བུ་དྡྷཾ ཨུ་པཱ་ག་ཙྪུཾ, ས་མྤ་ནྣ་ཙ་ར་ཎཾ ཨི་སིཾ;
པུ་ཙྪ་ནྟཱ ནི་པུ་ཎེ པ་ཉྷེ, བུ་དྡྷ་སེ་ཊྛཾ ཨུ་པཱ་ག་མུཾ.
༡༡༣༣. ཏེ་སཾ བུ་དྡྷོ པ་བྱཱ་ཀཱ་སི, པ་ཉྷེ པུ་ཊྛོ ཡ་ཐཱ་ཏ་ཐཾ;
པ་ཉྷཱ་ནཾ ཝེ་ཡྻཱ་ཀ་ར་ཎེ་ན, ཏོ་སེ་སི བྲཱ་ཧྨ་ཎེ མུ་ནི.
༡༡༣༤. ཏེ ཏོ་སི་ཏཱ ཙ་ཀྑུ་མ་ཏཱ, བུ་དྡྷེ་ནཱ་དི་ཙྩ་བ་ནྡྷུ་ནཱ;
བྲ་ཧྨ་ཙ་རི་ཡ་མ་ཙ་རིཾ་སུ, ཝ་ར་པ་ཉྙ་སྶ ས་ནྟི་ཀེ.
༡༡༣༥. ཨེ་ཀ་མེ་ཀ་སྶ པ་ཉྷ་སྶ, ཡ་ཐཱ བུ་དྡྷེ་ན དེ་སི་ཏཾ;
ཏ་ཐཱ ཡོ པ་ཊི་པ་ཛྫེ་ཡྻ, ག་ཙྪེ པཱ་རཾ ཨ་པཱ་ར་ཏོ.
༡༡༣༦. ཨ་པཱ་རཱ པཱ་རཾ ག་ཙྪེ་ཡྻ, བྷཱ་ཝེ་ནྟོ མ་གྒ་མུ་ཏྟ་མཾ;
མ་གྒོ སོ པཱ་རཾ ག་མ་ནཱ་ཡ, ཏ་སྨཱ པཱ་རཱ་ཡ་ནཾ ཨི་ཏི.
པཱ་རཱ་ཡ་ནཱ་ནུ་གཱི་ཏི་གཱ་ཐཱ
༡༡༣༧. ‘‘པཱ་རཱ་ཡ་ན་མ་ནུ་གཱ་ཡི་སྶཾ, (ཨི་ཙྩཱ་ཡ་སྨཱ པི་ངྒི་ཡོ)
ཡ་ཐཱ་དྡ་ཀྑི ཏ་ཐཱ་ཀྑཱ་སི, ཝི་མ་ལོ བྷཱུ་རི་མེ་དྷ་སོ;
ནི་ཀྐཱ་མོ ནི་བྦ་ནོ [ནི་བྦུ་ཏོ (སྱཱ.)] ནཱ་གོ, ཀི་སྶ ཧེ་ཏུ མུ་སཱ བྷ་ཎེ.
༡༡༣༨. ‘‘པ་ཧཱི་ན་མ་ལ་མོ་ཧ་སྶ, མཱ་ན་མ་ཀྑ་པྤ་ཧཱ་ཡི་ནོ;
ཧ་ནྡཱ་ཧཾ ཀི་ཏྟ་ཡི་སྶཱ་མི, གི་རཾ ཝ་ཎྞཱུ་པ་ས་ཉྷི་ཏཾ.
༡༡༣༩. ‘‘ཏ་མོ་ནུ་དོ བུ་དྡྷོ ས་མ་ནྟ་ཙ་ཀྑུ, ལོ་ཀ་ནྟ་གཱུ ས་བྦ་བྷ་ཝཱ་ཏི་ཝ་ཏྟོ;
ཨ་ནཱ་ས་ཝོ ས་བྦ་དུ་ཀྑ་པ་ཧཱི་ནོ, ས་ཙྩ་ཝ྄ཧ་ཡོ བྲ་ཧྨེ ཨུ་པཱ་སི་ཏོ མེ.
༡༡༤༠. ‘‘དི་ཛོ ཡ་ཐཱ ཀུ་བྦ་ན་ཀཾ པ་ཧཱ་ཡ, བ་ཧུ་པྥ་ལཾ ཀཱ་ན་ན་མཱ་ཝ་སེ་ཡྻ;
ཨེ་ཝཾ པ་ཧཾ ཨ་པྤ་ད་སྶེ པ་ཧཱ་ཡ, མ་ཧོ་ད་དྷིཾ ཧཾ་སོ་རི་ཝ ཨ་ཛ྄ཛྷ་པ་ཏྟོ.
༡༡༤༡. ‘‘ཡེ་མེ པུ་བྦེ ཝི་ཡཱ་ཀཾ་སུ, ཧུ་རཾ གོ་ཏ་མ་སཱ་ས་ནཱ;
ཨི་ཙྩཱ་སི ཨི་ཏི བྷ་ཝི་སྶ་ཏི;
ས་བྦཾ ཏཾ ཨི་ཏི་ཧི་ཏི་ཧཾ, ས་བྦཾ ཏཾ ཏ་ཀྐ་ཝ་ཌྜྷ་ནཾ.
༡༡༤༢. ‘‘ཨེ་ཀོ ཏ་མ་ནུ་དཱ་སི་ནོ, ཛུ་ཏི་མཱ སོ པ་བྷ་ངྐ་རོ;
གོ་ཏ་མོ བྷཱུ་རི་པ་ཉྙཱ་ཎོ, གོ་ཏ་མོ བྷཱུ་རི་མེ་དྷ་སོ.
༡༡༤༣. ‘‘ཡོ མེ དྷ་མྨ་མ་དེ་སེ་སི, ས་ནྡི་ཊྛི་ཀ་མ་ཀཱ་ལི་ཀཾ;
ཏ་ཎྷ་ཀྑ་ཡ་མ་ནཱི་ཏི་ཀཾ, ཡ་སྶ ན་ཏྠི ཨུ་པ་མཱ ཀྭ་ཙི’’.
༡༡༤༤. ‘‘ཀིཾ་ནུ ཏ་མྷཱ ཝི་པྤ་ཝ་ས་སི, མུ་ཧུ་ཏྟ་མ་པི པི་ངྒི་ཡ;
གོ་ཏ་མཱ བྷཱུ་རི་པ་ཉྙཱ་ཎཱ, གོ་ཏ་མཱ བྷཱུ་རི་མེ་དྷ་སཱ.
༡༡༤༥. ‘‘ཡོ ཏེ དྷ་མྨ་མ་དེ་སེ་སི, ས་ནྡི་ཊྛི་ཀ་མ་ཀཱ་ལི་ཀཾ;
ཏ་ཎྷ་ཀྑ་ཡ་མ་ནཱི་ཏི་ཀཾ, ཡ་སྶ ན་ཏྠི ཨུ་པ་མཱ ཀྭ་ཙི’’.
༡༡༤༦. ‘‘ནཱ་ཧཾ ཏ་མྷཱ ཝི་པྤ་ཝ་སཱ་མི, མུ་ཧུ་ཏྟ་མ་པི བྲཱ་ཧྨ་ཎ;
གོ་ཏ་མཱ བྷཱུ་རི་པ་ཉྙཱ་ཎཱ, གོ་ཏ་མཱ བྷཱུ་རི་མེ་དྷ་སཱ.
༡༡༤༧. ‘‘ཡོ མེ དྷ་མྨ་མ་དེ་སེ་སི, ས་ནྡི་ཊྛི་ཀ་མ་ཀཱ་ལི་ཀཾ;
ཏ་ཎྷ་ཀྑ་ཡ་མ་ནཱི་ཏི་ཀཾ, ཡ་སྶ ན་ཏྠི ཨུ་པ་མཱ ཀྭ་ཙི.
༡༡༤༨. ‘‘པ་སྶཱ་མི ནཾ མ་ན་སཱ ཙ་ཀྑུ་ནཱ་ཝ, ར་ཏྟི་ནྡི་ཝཾ བྲཱ་ཧྨ་ཎ ཨ་པྤ་མ་ཏྟོ;
ན་མ་སྶ་མཱ་ནོ ཝི་ཝ་སེ་མི ར་ཏྟིཾ, ཏེ་ནེ་ཝ མ་ཉྙཱ་མི ཨ་ཝི་པྤ་ཝཱ་སཾ.
༡༡༤༩. ‘‘ས་དྡྷཱ ཙ པཱི་ཏི ཙ མ་ནོ ས་ཏི ཙ, ནཱ་པེ་ནྟི མེ གོ་ཏ་མ་སཱ་ས་ན་མྷཱ;
ཡཾ ཡཾ དི་སཾ ཝ་ཛ་ཏི བྷཱུ་རི་པ་ཉྙོ, ས ཏེ་ན ཏེ་ནེ་ཝ ན་ཏོ་ཧ་མ་སྨི.
༡༡༥༠. ‘‘ཛི་ཎྞ་སྶ མེ དུ་བྦ་ལ་ཐཱ་མ་ཀ་སྶ, ཏེ་ནེ་ཝ ཀཱ་ཡོ ན པ་ལེ་ཏི ཏ་ཏྠ;
སཾ་ཀ་པྤ་ཡ་ནྟཱ་ཡ [སཾ་ཀ་པྤ་ཡ་ཏྟཱ་ཡ (སཱི.)] ཝ་ཛཱ་མི ནི་ཙྩཾ, མ་ནོ ཧི མེ བྲཱ་ཧྨ་ཎ ཏེ་ན ཡུ་ཏྟོ.
༡༡༥༡. ‘‘པ་ངྐེ ས་ཡཱ་ནོ པ་རི་ཕ་ནྡ་མཱ་ནོ, དཱི་པཱ དཱི་པཾ ཨུ་པ་པླ་ཝིཾ [ཨུ་པ་ལླ་ཝིཾ (སྱཱ. ནི་དྡེ་ས)];
ཨ་ཐ་དྡ་སཱ་སིཾ ས་མྦུ་དྡྷཾ, ཨོ་གྷ་ཏི་ཎྞ་མ་ནཱ་ས་ཝཾ’’.
༡༡༥༢. ‘‘ཡ་ཐཱ ཨ་ཧཱུ ཝ་ཀྐ་ལི མུ་ཏྟ་ས་དྡྷོ, བྷ་དྲཱ་ཝུ་དྷོ ཨཱ་ལ༹་ཝི གོ་ཏ་མོ ཙ;
ཨེ་ཝ་མེ་ཝ ཏྭ་མྤི པ་མུ་ཉྩ་སྶུ ས་དྡྷཾ,
ག་མི་སྶ་སི ཏྭཾ པི་ངྒི་ཡ མ་ཙྩུ་དྷེ་ཡྻ་སྶ པཱ་རཾ’’ [མ་ཙྩུ་དྷེ་ཡྻ་པཱ་རཾ (སཱི.)].
༡༡༥༣. ‘‘ཨེ་ས བྷི་ཡྻོ པ་སཱི་དཱ་མི, སུ་ཏྭཱ་ན མུ་ནི་ནོ ཝ་ཙོ;
ཝི་ཝ་ཊྚ་ཙྪ་དོ ས་མྦུ་དྡྷོ, ཨ་ཁི་ལོ པ་ཊི་བྷཱ་ན་ཝཱ.
༡༡༥༤. ‘‘ཨ་དྷི་དེ་ཝེ ཨ་བྷི་ཉྙཱ་ཡ, ས་བྦཾ ཝེ་དི ཝ་རོ་ཝ་རཾ [པ་རོ ཝ་རཾ (སཱི. སྱཱ.), པ་རོ པ་རཾ (ནི་དྡེ་ས)];
པ་ཉྷཱ་ན་ནྟ་ཀ་རོ ས་ཏྠཱ, ཀ་ངྑཱི་ནཾ པ་ཊི་ཛཱ་ན་ཏཾ.
༡༡༥༥. ‘‘ཨ་སཾ་ཧཱི་རཾ ཨ་ས་ངྐུ་པྤཾ, ཡ་སྶ ན་ཏྠི ཨུ་པ་མཱ ཀྭ་ཙི;
ཨ་དྡྷཱ ག་མི་སྶཱ་མི ན མེ་ཏྠ ཀ་ངྑཱ, ཨེ་ཝཾ མཾ དྷཱ་རེ་ཧི ཨ་དྷི་མུ་ཏྟ་ཙི་ཏྟ’’ནྟི.
པཱ་རཱ་ཡ་ན་ཝ་གྒོ པ་ཉྩ་མོ ནི་ཊྛི་ཏོ.