༢. གུ་ཧ་ཊྛ་ཀ་སུ་ཏྟཾ
༧༧༨. ས་ཏྟོ གུ་ཧཱ་ཡཾ བ་ཧུ་ནཱ་བྷི་ཚ་ནྣོ, ཏི་ཊྛཾ ན་རོ མོ་ཧ་ན་སྨིཾ པ་གཱ་ལ༹ྷོ;
དཱུ་རེ ཝི་ཝེ་ཀཱ ཧི ཏ་ཐཱ་ཝི་དྷོ སོ, ཀཱ་མཱ ཧི ལོ་ཀེ ན ཧི སུ་པྤ་ཧཱ་ཡཱ.
༧༧༩. ཨི་ཙྪཱ་ནི་དཱ་ནཱ བྷ་ཝ་སཱ་ཏ་བ་དྡྷཱ, ཏེ དུ་པྤ་མུ་ཉྩཱ ན ཧི ཨ་ཉྙ་མོ་ཀྑཱ;
པ་ཙྪཱ པུ་རེ ཝཱ་པི ཨ་པེ་ཀྑ་མཱ་ནཱ, ཨི་མེ་ཝ ཀཱ་མེ པུ་རི་མེ་ཝ ཛ་པྤཾ.
༧༨༠. ཀཱ་མེ་སུ གི་དྡྷཱ པ་སུ་ཏཱ པ་མཱུ་ལ༹ྷཱ, ཨ་ཝ་དཱ་ནི་ཡཱ ཏེ ཝི་ས་མེ ནི་ཝི་ཊྛཱ;
དུ་ཀྑཱུ་པ་ནཱི་ཏཱ པ་རི་དེ་ཝ་ཡ་ནྟི, ཀིཾ་སཱུ བྷ་ཝི་སྶཱ་མ ཨི་ཏོ ཙུ་ཏཱ་སེ.
༧༨༡. ཏ་སྨཱ ཧི སི་ཀྑེ་ཐ ཨི་དྷེ་ཝ ཛ་ནྟུ, ཡཾ ཀི་ཉྩི ཛ་ཉྙཱ ཝི་ས་མ་ནྟི ལོ་ཀེ;
ན ཏ་སྶ ཧེ་ཏཱུ ཝི་ས་མཾ ཙ་རེ་ཡྻ, ཨ་པྤ་ཉྷི་དཾ ཛཱི་ཝི་ཏ་མཱ་ཧུ དྷཱི་རཱ.
༧༨༢. པ་སྶཱ་མི ལོ་ཀེ པ་རི་ཕ་ནྡ་མཱ་ནཾ, པ་ཛཾ ཨི་མཾ ཏ་ཎྷ་ག་ཏཾ བྷ་ཝེ་སུ;
ཧཱི་ནཱ ན་རཱ མ་ཙྩུ་མུ་ཁེ ལ་པ་ནྟི, ཨ་ཝཱི་ཏ་ཏ་ཎྷཱ་སེ བྷ་ཝཱ་བྷ་ཝེ་སུ.
༧༨༣. མ་མཱ་ཡི་ཏེ པ་སྶ་ཐ ཕ་ནྡ་མཱ་ནེ, མ་ཙྪེ་ཝ ཨ་པྤོ་ད་ཀེ ཁཱི་ཎ་སོ་ཏེ;
ཨེ་ཏ་མྤི དི་སྭཱ ཨ་མ་མོ ཙ་རེ་ཡྻ, བྷ་ཝེ་སུ ཨཱ་ས་ཏྟི་མ་ཀུ་བྦ་མཱ་ནོ.
༧༨༤. ཨུ་བྷོ་སུ ཨ་ནྟེ་སུ ཝི་ནེ་ཡྻ ཚ་ནྡཾ, ཕ་སྶཾ པ་རི་ཉྙཱ་ཡ ཨ་ནཱ་ནུ་གི་དྡྷོ;
ཡ་ད་ཏྟ་ག་ར་ཧཱི ཏ་ད་ཀུ་བྦ་མཱ་ནོ, ན ལི་པྤ་ཏཱི [ན ལི་མྤ་ཏཱི (སྱཱ. ཀ.)] དི་ཊྛ་སུ་ཏེ་སུ དྷཱི་རོ.
༧༨༥. ས་ཉྙཾ པ་རི་ཉྙཱ ཝི་ཏ་རེ་ཡྻ ཨོ་གྷཾ, པ་རི་གྒ་ཧེ་སུ མུ་ནི ནོ་པ་ལི་ཏྟོ;
ཨ་བྦཱུ་ལ༹ྷ་ས་ལློ ཙ་ར་མ་པྤ་མ་ཏྟོ, ནཱ་སཱི་ས་ཏཱི [ནཱ་སིཾ་ས་ཏཱི (སཱི. སྱཱ. པཱི.)] ལོ་ཀ་མི་མཾ པ་ར་ཉྩཱ་ཏི.
གུ་ཧ་ཊྛ་ཀ་སུ་ཏྟཾ དུ་ཏི་ཡཾ ནི་ཊྛི་ཏཾ.