༢. པ་དྷཱ་ན་སུ་ཏྟཾ
༤༢༧. ‘‘ཏཾ མཾ པ་དྷཱ་ན་པ་ཧི་ཏ་ཏྟཾ, ན་དིཾ ནེ་ར་ཉྫ་རཾ པ་ཏི;
ཝི་པ་ར་ཀྐ་མྨ ཛྷཱ་ཡ་ནྟཾ, ཡོ་ག་ཀྑེ་མ་སྶ པ་ཏྟི་ཡཱ.
༤༢༨. ‘‘ན་མུ་ཙཱི ཀ་རུ་ཎཾ ཝཱ་ཙཾ, བྷཱ་ས་མཱ་ནོ ཨུ་པཱ་ག་མི;
‘ཀི་སོ ཏྭ་མ་སི དུ་བྦ་ཎྞོ, ས་ནྟི་ཀེ མ་ར་ཎཾ ཏ་ཝ.
༤༢༩. ‘‘‘ས་ཧ་སྶ་བྷཱ་གོ མ་ར་ཎ་སྶ, ཨེ་ཀཾ་སོ ཏ་ཝ ཛཱི་ཝི་ཏཾ;
ཛཱི་ཝ བྷོ ཛཱི་ཝི་ཏཾ སེ་ཡྻོ, ཛཱི་ཝཾ པུ་ཉྙཱ་ནི ཀཱ་ཧ་སི.
༤༣༠. ‘‘‘ཙ་ར་ཏོ ཙ ཏེ བྲ་ཧྨ་ཙ་རི་ཡཾ, ཨ་གྒི་ཧུ་ཏྟ་ཉྩ ཛཱུ་ཧ་ཏོ;
པ་ཧཱུ་ཏཾ ཙཱི་ཡ་ཏེ པུ་ཉྙཾ, ཀིཾ པ་དྷཱ་ནེ་ན ཀཱ་ཧ་སི.
༤༣༡. ‘‘‘དུ་གྒོ མ་གྒོ པ་དྷཱ་ནཱ་ཡ, དུ་ཀྐ་རོ དུ་ར་བྷི་ས་མྦྷ་ཝོ’’’;
ཨི་མཱ གཱ་ཐཱ བྷ་ཎཾ མཱ་རོ, ཨ་ཊྛཱ བུ་དྡྷ་སྶ ས་ནྟི་ཀེ.
༤༣༢. ཏཾ ཏ་ཐཱ་ཝཱ་དི་ནཾ མཱ་རཾ, བྷ་ག་ཝཱ ཨེ་ཏ་ད་བྲ་ཝི;
‘‘པ་མ་ཏྟ་བ་ནྡྷུ པཱ་པི་མ, ཡེ་ན་ཏྠེ་ན [སེ་ན་ཏྠེ་ན (?), ཨ་ཏྟ་ནོ ཨ་ཏྠེ་ན (ཨ་ཊྛ. སཾ་ཝ་ཎྞ་ནཱ)] ཨི་དྷཱ་ག་ཏོ.
༤༣༣. ‘‘ཨ་ཎུ་མ་ཏྟོ་པི [ཨ་ཎུ་མ་ཏྟེ་ན་པི (སཱི. སྱཱ.)] པུ་ཉྙེ་ན, ཨ་ཏྠོ མ་ཡ྄ཧཾ ན ཝི་ཛྫ་ཏི;
ཡེ་ས་ཉྩ ཨ་ཏྠོ པུ་ཉྙེ་ན, ཏེ མཱ་རོ ཝ་ཏྟུ་མ་ར་ཧ་ཏི.
༤༣༤. ‘‘ཨ་ཏྠི ས་དྡྷཱ ཏ་ཐཱ [ཏ་ཏོ (སཱི. པཱི.), ཏ་པོ (སྱཱ. ཀ.)] ཝཱི་རི་ཡཾ, པ་ཉྙཱ ཙ མ་མ ཝི་ཛྫ་ཏི;
ཨེ་ཝཾ མཾ པ་ཧི་ཏ་ཏྟ་མྤི, ཀིཾ ཛཱི་ཝ་མ་ནུ་པུ་ཙྪ་སི.
༤༣༥. ‘‘ན་དཱི་ན་མ་པི སོ་ཏཱ་ནི, ཨ་ཡཾ ཝཱ་ཏོ ཝི་སོ་ས་ཡེ;
ཀི་ཉྩ མེ པ་ཧི་ཏ་ཏྟ་སྶ, ལོ་ཧི་ཏཾ ནུ་པ་སུ་སྶ་ཡེ.
༤༣༦. ‘‘ལོ་ཧི་ཏེ སུ་སྶ་མཱ་ན་མྷི, པི་ཏྟཾ སེ་མྷ་ཉྩ སུ་སྶ་ཏི;
མཾ་སེ་སུ ཁཱི་ཡ་མཱ་ནེ་སུ, བྷི་ཡྻོ ཙི་ཏྟཾ པ་སཱི་ད་ཏི;
བྷི་ཡྻོ ས་ཏི ཙ པ་ཉྙཱ ཙ, ས་མཱ་དྷི མ་མ ཏི་ཊྛ་ཏི.
༤༣༧. ‘‘ཏ་སྶ མེ་ཝཾ ཝི་ཧ་ར་ཏོ, པ་ཏྟ་སྶུ་ཏྟ་མ་ཝེ་ད་ནཾ;
ཀཱ་མེ་སུ [ཀཱ་མེ (སཱི. སྱཱ.)] ནཱ་པེ་ཀྑ་ཏེ ཙི་ཏྟཾ, པ་སྶ ས་ཏྟ་སྶ སུ་དྡྷ་ཏཾ.
༤༣༨. ‘‘ཀཱ་མཱ ཏེ པ་ཋ་མཱ སེ་ནཱ, དུ་ཏི་ཡཱ ཨ་ར་ཏི ཝུ་ཙྩ་ཏི;
ཏ་ཏི་ཡཱ ཁུ་པྤི་པཱ་སཱ ཏེ, ཙ་ཏུ་ཏྠཱི ཏ་ཎྷཱ པ་ཝུ་ཙྩ་ཏི.
༤༣༩. ‘‘པ་ཉྩ་མཾ [པ་ཉྩ་མཱི (སཱི. པཱི.)] ཐི་ན་མི་དྡྷཾ ཏེ, ཚ་ཊྛཱ བྷཱི་རཱུ པ་ཝུ་ཙྩ་ཏི;
ས་ཏྟ་མཱི ཝི་ཙི་ཀི་ཙྪཱ ཏེ, མ་ཀྑོ ཐ་མྦྷོ ཏེ ཨ་ཊྛ་མོ.
༤༤༠. ‘‘ལཱ་བྷོ སི་ལོ་ཀོ ས་ཀྐཱ་རོ, མི་ཙྪཱ་ལ་དྡྷོ ཙ ཡོ ཡ་སོ;
ཡོ ཙ་ཏྟཱ་ནཾ ས་མུ་ཀྐཾ་སེ, པ་རེ ཙ ཨ་ཝ་ཛཱ་ན་ཏི.
༤༤༡. ‘‘ཨེ་སཱ ན་མུ་ཙི ཏེ སེ་ནཱ, ཀ་ཎྷ་སྶཱ་བྷི་པྤ་ཧཱ་རི་ནཱི;
ན ནཾ ཨ་སཱུ་རོ ཛི་ནཱ་ཏི, ཛེ་ཏྭཱ ཙ ལ་བྷ་ཏེ སུ་ཁཾ.
༤༤༢. ‘‘ཨེ་ས མུ་ཉྫཾ པ་རི་ཧ་རེ, དྷི་ར་ཏྠུ མ་མ [ཨི་ད (ཀ.)] ཛཱི་ཝི་ཏཾ;
ས་ངྒཱ་མེ མེ མ་ཏཾ སེ་ཡྻོ, ཡཾ ཙེ ཛཱི་ཝེ པ་རཱ་ཛི་ཏོ.
༤༤༣. ‘‘པ་གཱ་ལ༹ྷེ་ཏྠ ན དི་སྶ་ནྟི, ཨེ་ཀེ ས་མ་ཎ་བྲཱ་ཧྨ་ཎཱ;
ཏ་ཉྩ མ་གྒཾ ན ཛཱ་ན་ནྟི, ཡེ་ན ག་ཙྪ་ནྟི སུ་བྦ་ཏཱ.
༤༤༤. ‘‘ས་མ་ནྟཱ དྷ་ཛི་ནིཾ དི་སྭཱ, ཡུ་ཏྟཾ མཱ་རཾ ས་ཝཱ་ཧ་ནཾ;
ཡུ་དྡྷཱ་ཡ པ་ཙྩུ་གྒ་ཙྪཱ་མི, མཱ མཾ ཋཱ་ནཱ ཨ་ཙཱ་ཝ་ཡི.
༤༤༥. ‘‘ཡཾ ཏེ ཏཾ ན་པྤ་ས་ཧ་ཏི, སེ་ནཾ ལོ་ཀོ ས་དེ་ཝ་ཀོ;
ཏཾ ཏེ པ་ཉྙཱ་ཡ བྷེ་ཙྪཱ་མི [ག་ཙྪཱ་མི (སཱི.), ཝེ་ཙྪཱ་མི (སྱཱ.), ཝ་ཛ྄ཛྷཱ་མི (ཀ.)], ཨཱ་མཾ པ་ཏྟཾ་ཝ ཨ་སྨ་ནཱ [པ་ཀྐཾ་ཝ ཨ་མུ་ནཱ (ཀ.)].
༤༤༦. ‘‘ཝ་སཱི་ཀ་རི་ཏྭཱ [ཝ་སིཾ ཀ་རི་ཏྭཱ (བ་ཧཱུ་སུ)] ས་ངྐ་པྤཾ, ས་ཏི་ཉྩ སཱུ་པ་ཏི་ཊྛི་ཏཾ;
ར་ཊྛཱ ར་ཊྛཾ ཝི་ཙ་རི་སྶཾ, སཱ་ཝ་ཀེ ཝི་ན་ཡཾ པུ་ཐཱུ.
༤༤༧. ‘‘ཏེ ཨ་པྤ་མ་ཏྟཱ པ་ཧི་ཏ་ཏྟཱ, མ་མ སཱ་ས་ན་ཀཱ་ར་ཀཱ;
ཨ་ཀཱ་མ་སྶ [ཨ་ཀཱ་མཱ (ཀ.)] ཏེ ག་མི་སྶ་ནྟི, ཡ་ཏྠ ག་ནྟྭཱ ན སོ་ཙ་རེ’’.
༤༤༨. ‘‘ས་ཏྟ ཝ་སྶཱ་ནི བྷ་ག་ཝ་ནྟཾ, ཨ་ནུ་བ་ནྡྷིཾ པ་དཱ་པ་དཾ;
ཨོ་ཏཱ་རཾ ནཱ་དྷི་ག་ཙྪི་སྶཾ, ས་མྦུ་དྡྷ་སྶ ས་ཏཱི་མ་ཏོ.
༤༤༩. ‘‘མེ་ད་ཝ་ཎྞཾ་ཝ པཱ་སཱ་ཎཾ, ཝཱ་ཡ་སོ ཨ་ནུ་པ་རི་ཡ་གཱ;
ཨ་པེ་ཏྠ མུ་དུཾ [མུ་དུ (སཱི.)] ཝི་ནྡེ་མ, ཨ་པི ཨ་སྶཱ་ད་ནཱ སི་ཡཱ.
༤༥༠. ‘‘ཨ་ལ་དྡྷཱ ཏ་ཏྠ ཨ་སྶཱ་དཾ, ཝཱ་ཡ་སེ་ཏྟོ ཨ་པ་ཀྐ་མི;
ཀཱ་ཀོ་ཝ སེ་ལ་མཱ་ས་ཛྫ, ནི་བྦི་ཛྫཱ་པེ་མ གོ་ཏ་མཾ’’.
༤༥༡. ཏ་སྶ སོ་ཀ་པ་རེ་ཏ་སྶ, ཝཱི་ཎཱ ཀ་ཙྪཱ ཨ་བྷ་སྶ་ཐ;
ཏ་ཏོ སོ དུ་མྨ་ནོ ཡ་ཀྑོ, ཏ་ཏྠེ་ཝ་ནྟ་ར་དྷཱ་ཡ་ཐཱ་ཏི.
པ་དྷཱ་ན་སུ་ཏྟཾ དུ་ཏི་ཡཾ ནི་ཊྛི་ཏཾ.