༧. ཝ་ས་ལ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠིཾ པི་ཎྜཱ་ཡ པཱ་ཝི་སི. ཏེ་ན ཁོ པ་ན ས་མ་ཡེ་ན ཨ་གྒི་ཀ་བྷཱ་ར་དྭཱ་ཛ་སྶ བྲཱ་ཧྨ་ཎ་སྶ ནི་ཝེ་ས་ནེ ཨ་གྒི པ་ཛྫ་ལི་ཏོ ཧོ་ཏི ཨཱ་ཧུ་ཏི པ་གྒ་ཧི་ཏཱ. ཨ་ཐ ཁོ བྷ་ག་ཝཱ སཱ་ཝ་ཏྠི་ཡཾ ས་པ་དཱ་ནཾ པི་ཎྜཱ་ཡ ཙ་ར་མཱ་ནོ ཡེ་ན ཨ་གྒི་ཀ་བྷཱ་ར་དྭཱ་ཛ་སྶ བྲཱ་ཧྨ་ཎ་སྶ ནི་ཝེ་ས་ནཾ ཏེ་ནུ་པ་ས་ངྐ་མི.
ཨ་དྡ་སཱ ཁོ ཨ་གྒི་ཀ་བྷཱ་ར་དྭཱ་ཛོ བྲཱ་ཧྨ་ཎོ བྷ་ག་ཝ་ནྟཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཏ་ཏྲེ་ཝ [ཨ་ཏྲེ་ཝ (སྱཱ. ཀ.)], མུ་ཎྜ་ཀ; ཏ་ཏྲེ་ཝ, ས་མ་ཎ་ཀ; ཏ་ཏྲེ་ཝ, ཝ་ས་ལ་ཀ ཏི་ཊྛཱ་ཧཱི’’ཏི.
ཨེ་ཝཾ ཝུ་ཏྟེ, བྷ་ག་ཝཱ ཨ་གྒི་ཀ་བྷཱ་ར་དྭཱ་ཛཾ བྲཱ་ཧྨ་ཎཾ ཨེ་ཏ་ད་ཝོ་ཙ – ‘‘ཛཱ་ནཱ་སི པ་ན ཏྭཾ, བྲཱ་ཧྨ་ཎ, ཝ་ས་ལཾ ཝཱ ཝ་ས་ལ་ཀ་ར་ཎེ ཝཱ དྷ་མྨེ’’ཏི? ‘‘ན ཁྭཱ་ཧཾ, བྷོ གོ་ཏ་མ, ཛཱ་ནཱ་མི ཝ་ས་ལཾ ཝཱ ཝ་ས་ལ་ཀ་ར་ཎེ ཝཱ དྷ་མྨེ; སཱ་དྷུ མེ བྷ་ཝཾ གོ་ཏ་མོ ཏ་ཐཱ དྷ་མྨཾ དེ་སེ་ཏུ, ཡ་ཐཱ་ཧཾ ཛཱ་ནེ་ཡྻཾ ཝ་ས་ལཾ ཝཱ ཝ་ས་ལ་ཀ་ར་ཎེ ཝཱ དྷ་མྨེ’’ཏི. ‘‘ཏེ་ན ཧི, བྲཱ་ཧྨ་ཎ, སུ་ཎཱ་ཧི, སཱ་དྷུ་ཀཾ མ་ན་སི ཀ་རོ་ཧི; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷོ’’ཏི ཁོ ཨ་གྒི་ཀ་བྷཱ་ར་དྭཱ་ཛོ བྲཱ་ཧྨ་ཎོ བྷ་ག་ཝ་ཏོ པ་ཙྩ་སྶོ་སི. བྷ་ག་ཝཱ ཨེ་ཏ་ད་ཝོ་ཙ –
༡༡༦. ‘‘ཀོ་དྷ་ནོ ཨུ་པ་ནཱ་ཧཱི ཙ, པཱ་པ་མ་ཀྑཱི ཙ ཡོ ན་རོ;
ཝི་པ་ནྣ་དི་ཊྛི མཱ་ཡཱ་ཝཱི, ཏཾ ཛ་ཉྙཱ ཝ་ས་ལོ ཨི་ཏི.
༡༡༧. ‘‘ཨེ་ཀ་ཛཾ ཝཱ དྭི་ཛཾ [དི་ཛཾ (པཱི.)] ཝཱ་པི, ཡོ་དྷ པཱ་ཎཾ ཝི་ཧིཾ་ས་ཏི;
ཡ་སྶ པཱ་ཎེ ད་ཡཱ ན་ཏྠི, ཏཾ ཛ་ཉྙཱ ཝ་ས་ལོ ཨི་ཏི.
༡༡༨. ‘‘ཡོ ཧ་ནྟི པ་རི་རུ་ནྡྷ་ཏི [ཨུ་པ་རུ་ནྡྷེ་ཏི (སྱཱ.), ཨུ་པ་རུ་ནྡྷ་ཏི (ཀ.)], གཱ་མཱ་ནི ནི་ག་མཱ་ནི ཙ;
ནི་གྒཱ་ཧ་ཀོ [ནི་གྒྷཱ་ཏ་ཀོ (?)] ས་མ་ཉྙཱ་ཏོ, ཏཾ ཛ་ཉྙཱ ཝ་ས་ལོ ཨི་ཏི.
༡༡༩. ‘‘གཱ་མེ ཝཱ ཡ་དི ཝཱ ར་ཉྙེ, ཡཾ པ་རེ་སཾ མ་མཱ་ཡི་ཏཾ;
ཐེ་ཡྻཱ ཨ་དི་ནྣ་མཱ་དེ་ཏི [ཨ་དི་ནྣཾ ཨཱ་དི་ཡ་ཏི (སཱི. པཱི.)], ཏཾ ཛ་ཉྙཱ ཝ་ས་ལོ ཨི་ཏི.
༡༢༠. ‘‘ཡོ ཧ་ཝེ ཨི་ཎ་མཱ་དཱ་ཡ, ཙུ་ཛྫ་མཱ་ནོ [བྷུ་ཉྫ་མཱ་ནོ (?)] པ་ལཱ་ཡ་ཏི;
ན ཧི ཏེ ཨི་ཎ་མ་ཏྠཱི་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༢༡. ‘‘ཡོ ཝེ ཀི་ཉྩི་ཀྑ་ཀ་མྱ་ཏཱ, པ་ནྠ་སྨིཾ ཝ་ཛ་ནྟཾ ཛ་ནཾ;
ཧ་ནྟྭཱ ཀི་ཉྩི་ཀྑ་མཱ་དེ་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༢༢. ‘‘ཨ་ཏྟ་ཧེ་ཏུ པ་ར་ཧེ་ཏུ, དྷ་ན་ཧེ་ཏུ ཙ [དྷ་ན་ཧེ་ཏུ ཝ (ཀ.)] ཡོ ན་རོ;
ས་ཀྑི་པུ་ཊྛོ མུ་སཱ བྲཱུ་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༢༣. ‘‘ཡོ ཉཱ་ཏཱི་ནཾ ས་ཁཱི་ནཾ ཝཱ, དཱ་རེ་སུ པ་ཊི་དི་སྶ་ཏི;
སཱ་ཧ་སཱ [ས་ཧ་སཱ (སཱི. སྱཱ.)] ས་མྤི་ཡེ་ན ཝཱ, ཏཾ ཛ་ཉྙཱ ཝ་ས་ལོ ཨི་ཏི.
༡༢༤. ‘‘ཡོ མཱ་ཏ་རཾ པི་ཏ་རཾ ཝཱ, ཛི་ཎྞ་ཀཾ ག་ཏ་ཡོ་བྦ་ནཾ;
པ་ཧུ ས་ནྟོ ན བྷ་ར་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༢༥. ‘‘ཡོ མཱ་ཏ་རཾ པི་ཏ་རཾ ཝཱ, བྷཱ་ཏ་རཾ བྷ་གི་ནིཾ ས་སུཾ;
ཧ་ནྟི རོ་སེ་ཏི ཝཱ་ཙཱ་ཡ, ཏཾ ཛ་ཉྙཱ ཝ་ས་ལོ ཨི་ཏི.
༡༢༦. ‘‘ཡོ ཨ་ཏྠཾ པུ་ཙྪི་ཏོ ས་ནྟོ, ཨ་ན་ཏྠ་མ་ནུ་སཱ་ས་ཏི;
པ་ཊི་ཙྪ་ནྣེ་ན མ་ནྟེ་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༢༧. ‘‘ཡོ ཀ་ཏྭཱ པཱ་པ་ཀཾ ཀ་མྨཾ, མཱ མཾ ཛ་ཉྙཱ་ཏི ཨི་ཙྪ་ཏི [ཝི་བྷ. ༨༩༤ པ་སྶི་ཏ་བྦཾ];
ཡོ པ་ཊི་ཙྪ་ནྣ་ཀ་མྨ་ནྟོ, ཏཾ ཛ་ཉྙཱ ཝ་ས་ལོ ཨི་ཏི.
༡༢༨. ‘‘ཡོ ཝེ པ་ར་ཀུ་ལཾ ག་ནྟྭཱ, བྷུ་ཏྭཱ་ན [སུ་ཏྭཱ ཙ (སྱཱ. ཀ.)] སུ་ཙི་བྷོ་ཛ་ནཾ;
ཨཱ་ག་ཏཾ ན་པྤ་ཊི་པཱུ་ཛེ་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༢༩. ‘‘ཡོ བྲཱ་ཧྨ་ཎཾ ས་མ་ཎཾ ཝཱ, ཨ་ཉྙཾ ཝཱ་པི ཝ་ནི་བྦ་ཀཾ;
མུ་སཱ་ཝཱ་དེ་ན ཝ་ཉྩེ་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༣༠. ‘‘ཡོ བྲཱ་ཧྨ་ཎཾ ས་མ་ཎཾ ཝཱ, བྷ་ཏྟ་ཀཱ་ལེ ཨུ་པ་ཊྛི་ཏེ;
རོ་སེ་ཏི ཝཱ་ཙཱ ན ཙ དེ་ཏི, ཏཾ ཛ་ཉྙཱ ཝ་ས་ལོ ཨི་ཏི.
༡༣༡. ‘‘ཨ་ས་ཏཾ ཡོ་དྷ པ་བྲཱུ་ཏི, མོ་ཧེ་ན པ་ལི་གུ་ཎྛི་ཏོ;
ཀི་ཉྩི་ཀྑཾ ནི་ཛི་གཱི་སཱ་ནོ [ནི་ཛི་གིཾ་སཱ་ནོ (སཱི. སྱཱ. ཀཾ. པཱི.)], ཏཾ ཛ་ཉྙཱ ཝ་ས་ལོ ཨི་ཏི.
༡༣༢. ‘‘ཡོ ཙ་ཏྟཱ་ནཾ ས་མུ་ཀྐཾ་སེ, པ་རེ ཙ མ་ཝ་ཛཱ་ནཱ་ཏི [མ་ཝ་ཛཱ་ན་ཏི (སཱི. སྱཱ. པཱི.)];
ནི་ཧཱི་ནོ སེ་ན མཱ་ནེ་ན, ཏཾ ཛ་ཉྙཱ ཝ་ས་ལོ ཨི་ཏི.
༡༣༣. ‘‘རོ་ས་ཀོ ཀ་ད་རི་ཡོ ཙ, པཱ་པི་ཙྪོ མ་ཙྪ་རཱི ས་ཋོ;
ཨ་ཧི་རི་ཀོ ཨ་ནོ་ཏྟ་པྤཱི, ཏཾ ཛ་ཉྙཱ ཝ་ས་ལོ ཨི་ཏི.
༡༣༤. ‘‘ཡོ བུ་དྡྷཾ པ་རི་བྷཱ་ས་ཏི, ཨ་ཐ ཝཱ ཏ་སྶ སཱ་ཝ་ཀཾ;
པ་རི་བྦཱ་ཛཾ [པ་རི་བྦ་ཛཾ (ཀ.), པ་རི་བྦཱ་ཛ་ཀཾ (སྱཱ. ཀཾ.)] ག་ཧ་ཊྛཾ ཝཱ, ཏཾ ཛ་ཉྙཱ ཝ་ས་ལོ ཨི་ཏི.
༡༣༥. ‘‘ཡོ ཝེ ཨ་ན་ར་ཧཾ [ཨ་ན་ར་ཧཱ (སཱི. པཱི.)] ས་ནྟོ, ཨ་ར་ཧཾ པ་ཊི་ཛཱ་ནཱ་ཏི [པ་ཊི་ཛཱ་ན་ཏི (སཱི. སྱཱ. པཱི.)];
ཙོ་རོ ས་བྲ་ཧྨ་ཀེ ལོ་ཀེ, ཨེ་སོ ཁོ ཝ་ས་ལཱ་དྷ་མོ.
༡༣༦. ‘‘ཨེ་ཏེ ཁོ ཝ་ས་ལཱ ཝུ་ཏྟཱ, མ་ཡཱ ཡེ་ཏེ པ་ཀཱ་སི་ཏཱ;
ན ཛ་ཙྩཱ ཝ་ས་ལོ ཧོ་ཏི, ན ཛ་ཙྩཱ ཧོ་ཏི བྲཱ་ཧྨ་ཎོ;
ཀ་མྨུ་ནཱ [ཀ་མྨ་ནཱ (སཱི. པཱི.)] ཝ་ས་ལོ ཧོ་ཏི, ཀ་མྨུ་ནཱ ཧོ་ཏི བྲཱ་ཧྨ་ཎོ.
༡༣༧. ‘‘ཏ་ད་མི་ནཱ་པི ཛཱ་ནཱ་ཐ, ཡ་ཐཱ་མེ་དཾ [ཡ་ཐཱ་པེ་དཾ (ཀ.)] ནི་ད་སྶ་ནཾ;
ཙ་ཎྜཱ་ལ་པུ་ཏྟོ སོ་པཱ་ཀོ [ས་པཱ་ཀོ (?)], མཱ་ཏ་ངྒོ ཨི་ཏི ཝི་སྶུ་ཏོ.
༡༣༨. ‘‘སོ ཡ་སཾ པ་ར་མཾ པ་ཏྟོ [སོ ཡ་ས་པྤ་ར་མ་པྤ་ཏྟོ (སྱཱ. ཀ.)], མཱ་ཏ་ངྒོ ཡཾ སུ་དུ་ལླ་བྷཾ;
ཨཱ་ག་ཙྪུཾ ཏ་སྶུ་པ་ཊྛཱ་ནཾ, ཁ་ཏྟི་ཡཱ བྲཱ་ཧྨ་ཎཱ བ་ཧཱུ.
༡༣༩. ‘‘དེ་ཝ་ཡཱ་ནཾ ཨ་བྷི་རུ་ཡ྄ཧ, ཝི་ར་ཛཾ སོ མ་ཧཱ་པ་ཐཾ;
ཀཱ་མ་རཱ་གཾ ཝི་རཱ་ཛེ་ཏྭཱ, བྲ་ཧྨ་ལོ་ཀཱུ་པ་གོ ཨ་ཧུ;
ན ནཾ ཛཱ་ཏི ནི་ཝཱ་རེ་སི, བྲ་ཧྨ་ལོ་ཀཱུ་པ་པ་ཏྟི་ཡཱ.
༡༤༠. ‘‘ཨ་ཛ྄ཛྷཱ་ཡ་ཀ་ཀུ་ལེ ཛཱ་ཏཱ, བྲཱ་ཧྨ་ཎཱ མ་ནྟ་བ་ནྡྷ་ཝཱ;
ཏེ ཙ པཱ་པེ་སུ ཀ་མྨེ་སུ, ཨ་བྷི་ཎྷ་མུ་པ་དི་སྶ་རེ.
༡༤༡. ‘‘དི་ཊྛེ་ཝ དྷ་མྨེ གཱ་ར་ཡ྄ཧཱ, ས་མྤ་རཱ་ཡེ ཙ དུ་གྒ་ཏི;
ན ནེ ཛཱ་ཏི ནི་ཝཱ་རེ་ཏི, དུ་གྒ་ཏྱཱ [དུ་གྒ་ཙྩཱ (སཱི. སྱཱ. ཀཾ. པཱི.)] ག་ར་ཧཱ་ཡ ཝཱ.
༡༤༢. ‘‘ན ཛ་ཙྩཱ ཝ་ས་ལོ ཧོ་ཏི, ན ཛ་ཙྩཱ ཧོ་ཏི བྲཱ་ཧྨ་ཎོ;
ཀ་མྨུ་ནཱ ཝ་ས་ལོ ཧོ་ཏི, ཀ་མྨུ་ནཱ ཧོ་ཏི བྲཱ་ཧྨ་ཎོ’’ཏི.
ཨེ་ཝཾ ཝུ་ཏྟེ, ཨ་གྒི་ཀ་བྷཱ་ར་དྭཱ་ཛོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷོ གོ་ཏ་མ…པེ… ཨུ་པཱ་ས་ཀཾ མཾ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི.
ཝ་ས་ལ་སུ་ཏྟཾ ས་ཏྟ་མཾ ནི་ཊྛི་ཏཾ.