༢. ས་ཏི་པ་ཊྛཱ་ན་ཝཱ་རོ

༣༡. ‘‘‘ཨ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ’ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. སཱ ཁོ པ་ནཱ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ བྷཱ་ཝེ་ཏ་བྦཱ་ཏི མེ, བྷི་ཀྑ་ཝེ,…པེ… བྷཱ་ཝི་ཏཱ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’.

‘‘ཨ་ཡཾ ཝེ་ད་ནཱ་སུ…པེ… ཨ་ཡཾ ཙི་ཏྟེ…པེ… ཨ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. སཱ ཁོ པ་ནཱ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ བྷཱ་ཝེ་ཏ་བྦཱ ཏི…པེ… བྷཱ་ཝི་ཏཱ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’.

[ཀ] ‘‘‘ཨ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ’ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ… སཱ ཁོ པ་ནཱ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ བྷཱ་ཝེ་ཏ་བྦཱ་ཏི…པེ… བྷཱ་ཝི་ཏཱ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’.

ཙ་ཀྑུཾ ཨུ་ད་པཱ་དཱི་ཏི – ཀེ་ན་ཊྛེ་ན? ཉཱ་ཎཾ ཨུ་ད་པཱ་དཱི་ཏི – ཀེ་ན་ཊྛེ་ན? པ་ཉྙཱ ཨུ་ད་པཱ་དཱི་ཏི – ཀེ་ན་ཊྛེ་ན? ཝི་ཛྫཱ ཨུ་ད་པཱ་དཱི་ཏི – ཀེ་ན་ཊྛེ་ན? ཨཱ་ལོ་ཀོ ཨུ་ད་པཱ་དཱི་ཏི – ཀེ་ན་ཊྛེ་ན? ཙ་ཀྑུཾ ཨུ་ད་པཱ་དཱིཏི – ད་སྶ་ན་ཊྛེ་ན. ཉཱ་ཎཾ ཨུ་ད་པཱ་དཱིཏི – ཉཱ་ཏ་ཊྛེ་ན. པ་ཉྙཱ ཨུ་ད་པཱ་དཱིཏི – པ་ཛཱ་ན་ན་ཊྛེ་ན. ཝི་ཛྫཱ ཨུ་ད་པཱ་དཱིཏི – པ་ཊི་ཝེ་དྷ་ཊྛེ་ན. ཨཱ་ལོ་ཀོ ཨུ་ད་པཱ་དཱིཏི – ཨོ་བྷཱ་ས་ཊྛེ་ན.

ཙ་ཀྑུཾ དྷ་མྨོ, ཉཱ་ཎཾ དྷ་མྨོ, པ་ཉྙཱ དྷ་མྨོ, ཝི་ཛྫཱ དྷ་མྨོ, ཨཱ་ལོ་ཀོ དྷ་མྨོ. ཨི་མེ པ་ཉྩ དྷ་མྨཱ དྷ་མྨ་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘དྷ་མྨེ་སུ ཉཱ་ཎཾ དྷ་མྨ་པ་ཊི་ས་མྦྷི་དཱ’’.

ད་སྶ་ན་ཊྛོ ཨ་ཏྠོ, ཉཱ་ཏ་ཊྛོ ཨ་ཏྠོ, པ་ཛཱ་ན་ན་ཊྛོ ཨ་ཏྠོ, པ་ཊི་ཝེ་དྷ་ཊྛོ ཨ་ཏྠོ, ཨོ་བྷཱ་ས་ཊྛོ ཨ་ཏྠོ. ཨི་མེ པ་ཉྩ ཨ་ཏྠཱ ཨ་ཏྠ་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘ཨ་ཏྠེ་སུ ཉཱ་ཎཾ ཨ་ཏྠ་པ་ཊི་ས་མྦྷི་དཱ’’.

པ་ཉྩ དྷ་མྨེ ས་ནྡ་སྶེ་ཏུཾ བྱ་ཉྫ་ན་ནི་རུ་ཏྟཱ་བྷི་ལཱ་པཱ, པ་ཉྩ ཨ་ཏྠེ ས་ནྡ་སྶེ་ཏུཾ བྱ་ཉྫ་ན་ནི་རུ་ཏྟཱ་བྷི་ལཱ་པཱ. ཨི་མཱ ད་ས ནི་རུ་ཏྟི་ཡོ ནི་རུ་ཏྟི་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘ནི་རུ་ཏྟཱི་སུ ཉཱ་ཎཾ ནི་རུ་ཏྟི་པ་ཊི་ས་མྦྷི་དཱ’’.

པ་ཉྩ་སུ དྷ་མྨེ་སུ ཉཱ་ཎཱ་ནི, པ་ཉྩ་སུ ཨ་ཏྠེ་སུ ཉཱ་ཎཱ་ནི, ད་ས་སུ ནི་རུ་ཏྟཱི་སུ ཉཱ་ཎཱ་ནི. ཨི་མཱ་ནི ཝཱི་ས་ཏི ཉཱ་ཎཱ་ནི པ་ཊི་བྷཱ་ན་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘པ་ཊི་བྷཱ་ནེ་སུ ཉཱ་ཎཾ པ་ཊི་བྷཱ་ན་པ་ཊི་ས་མྦྷི་དཱ’’.

ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ནེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

[ཁ-གྷ] ‘‘ཨ་ཡཾ ཝེ་ད་ནཱ་སུ…པེ… ཨ་ཡཾ ཙི་ཏྟེ…པེ… ཨ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ… སཱ ཁོ པ་ནཱ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ བྷཱ་ཝེ་ཏ་བྦཱ ཏི…པེ… བྷཱ་ཝི་ཏཱ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ…’’.

དྷ་མྨེ་སུ དྷ་མྨཱ་ནུ་པ་སྶ་ནཱ ས་ཏི་པ་ཊྛཱ་ནེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

ཙ་ཏཱུ་སུ ས་ཏི་པ་ཊྛཱ་ནེ་སུ ས་ཊྛི དྷ་མྨཱ, ས་ཊྛི ཨ་ཏྠཱ, ཝཱི་ས་ཏི་ས་ཏ་ནི་རུ་ཏྟི་ཡོ, ཙ་ཏྟཱ་ལཱི་ས་ཉྩ དྭེ ཙ ཉཱ་ཎ་ས་ཏཱ་ནི.