༦. པ་ཊི་ས་མྦྷི་དཱ་ཀ་ཐཱ

༡. དྷ་མྨ་ཙ་ཀྐ་པ་ཝ་ཏྟ་ན་ཝཱ་རོ

༣༠. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ བཱ་རཱ་ཎ་སི་ཡཾ ཝི་ཧ་ར་ཏི ཨི་སི་པ་ཏ་ནེ མི་ག་དཱ་ཡེ. ཏ་ཏྲ ཁོ བྷ་ག་ཝཱ པ་ཉྩ་ཝ་གྒི་ཡེ བྷི་ཀྑཱུ ཨཱ་མ་ནྟེ་སི –

‘‘དྭེ་མེ, བྷི་ཀྑ་ཝེ, ཨ་ནྟཱ པ་བྦ་ཛི་ཏེ་ན ན སེ་ཝི་ཏ་བྦཱ. ཀ་ཏ་མེ དྭེ? ཡོ ཙཱ་ཡཾ ཀཱ་མེ་སུ ཀཱ་མ་སུ་ཁ་ལླི་ཀཱ་ནུ་ཡོ་གོ ཧཱི་ནོ ག་མྨོ པོ་ཐུ་ཛྫ་ནི་ཀོ ཨ་ན་རི་ཡོ ཨ་ན་ཏྠ་སཾ་ཧི་ཏོ; ཡོ ཙཱ་ཡཾ ཨ་ཏྟ་ཀི་ལ་མ་ཐཱ་ནུ་ཡོ་གོ དུ་ཀྑོ ཨ་ན་རི་ཡོ ཨ་ན་ཏྠ་སཾ་ཧི་ཏོ. ཨེ་ཏེ ཁོ [ཨེ་ཏེ ཏེ (སྱཱ. ཀ. སཱི. ཨ་ཊྛ.) སཾ. ནི. ༥.༡༠༨༡; མ་ཧཱ་ཝ. ༡༣ པ་སྶི་ཏ་བྦཱ], བྷི་ཀྑ་ཝེ, ཨུ་བྷོ ཨ་ནྟེ ཨ་ནུ་པ་ག་མྨ མ་ཛ྄ཛྷི་མཱ པ་ཊི་པ་དཱ ཏ་ཐཱ་ག་ཏེ་ན ཨ་བྷི་ས་མྦུ་དྡྷཱ ཙ་ཀྑུ་ཀ་ར་ཎཱི ཉཱ་ཎ་ཀ་ར་ཎཱི ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.

‘‘ཀ་ཏ་མཱ ཙ སཱ, བྷི་ཀྑ་ཝེ, མ་ཛ྄ཛྷི་མཱ པ་ཊི་པ་དཱ ཏ་ཐཱ་ག་ཏེ་ན ཨ་བྷི་ས་མྦུ་དྡྷཱ ཙ་ཀྑུ་ཀ་ར་ཎཱི ཉཱ་ཎ་ཀ་ར་ཎཱི ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨ་ཡཾ ཁོ སཱ, བྷི་ཀྑ་ཝེ, མ་ཛ྄ཛྷི་མཱ པ་ཊི་པ་དཱ ཏ་ཐཱ་ག་ཏེ་ན ཨ་བྷི་ས་མྦུ་དྡྷཱ ཙ་ཀྑུ་ཀ་ར་ཎཱི ཉཱ་ཎ་ཀ་ར་ཎཱི ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.

‘‘ཨི་དཾ ཁོ པ་ན, བྷི་ཀྑ་ཝེ, དུ་ཀྑཾ ཨ་རི་ཡ་ས་ཙྩཾ. ཛཱ་ཏི་པི དུ་ཀྑཱ, ཛ་རཱ་པི དུ་ཀྑཱ, བྱཱ་དྷི་པི དུ་ཀྑོ, མ་ར་ཎ་མྤི དུ་ཀྑཾ, ཨ་པྤི་ཡེ་ཧི ས་མྤ་ཡོ་གོ དུ་ཀྑོ, པི་ཡེ་ཧི ཝི་པྤ་ཡོ་གོ དུ་ཀྑོ, ཡ་མྤི་ཙྪཾ ན ལ་བྷ་ཏི ཏ་མྤི དུ་ཀྑཾ; སཾ་ཁི་ཏྟེ་ན པ་ཉྩུ་པཱ་དཱ་ན་ཀྑ་ནྡྷཱ དུ་ཀྑཱ. ཨི་དཾ ཁོ པ་ན, བྷི་ཀྑ་ཝེ, དུ་ཀྑ་ས་མུ་ད་ཡཾ ཨ་རི་ཡ་ས་ཙྩཾ – ཡཱ་ཡཾ ཏ་ཎྷཱ པོ་ནོ་བྷ་ཝི་ཀཱ ན་ནྡི་རཱ་ག་ས་ཧ་ག་ཏཱ ཏ་ཏྲ་ཏ་ཏྲཱ་བྷི་ན་ནྡི་ནཱི, སེ་ཡྻ་ཐི་དཾ – ཀཱ་མ་ཏ་ཎྷཱ, བྷ་ཝ་ཏ་ཎྷཱ, ཝི་བྷ་ཝ་ཏ་ཎྷཱ. ཨི་དཾ ཁོ པ་ན, བྷི་ཀྑ་ཝེ, དུ་ཀྑ་ནི་རོ་དྷཾ ཨ་རི་ཡ་ས་ཙྩཾ – ཡོ ཏ་སྶཱ་ཡེ་ཝ ཏ་ཎྷཱ་ཡ ཨ་སེ་ས་ཝི་རཱ་ག་ནི་རོ་དྷོ ཙཱ་གོ པ་ཊི་ནི་སྶ་གྒོ མུ་ཏྟི ཨ་ནཱ་ལ་ཡོ. ཨི་དཾ ཁོ པ་ན, བྷི་ཀྑ་ཝེ, དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩཾ – ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི.

‘‘‘ཨི་དཾ དུ་ཀྑཾ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑཾ ཨ་རི་ཡ་ས་ཙྩཾ པ་རི་ཉྙེ་ཡྻ’ནྟི མེ, བྷི་ཀྑ་ཝེ…པེ… པ་རི་ཉྙཱ་ཏ་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི.

‘‘‘ཨི་དཾ དུ་ཀྑ་ས་མུ་ད་ཡཾ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑ་ས་མུ་ད་ཡཾ ཨ་རི་ཡ་ས་ཙྩཾ པ་ཧཱ་ཏ་བྦ’ནྟི མེ, བྷི་ཀྑ་ཝེ…པེ… པ་ཧཱི་ན་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི.

‘‘‘ཨི་དཾ དུ་ཀྑ་ནི་རོ་དྷཾ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑ་ནི་རོ་དྷཾ ཨ་རི་ཡ་ས་ཙྩཾ ས་ཙྪི་ཀཱ་ཏ་བྦ’ནྟི མེ, བྷི་ཀྑ་ཝེ…པེ… ས་ཙྪི་ཀ་ཏ་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི.

‘‘‘ཨི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩཾ བྷཱ་ཝེ་ཏ་བྦ’ནྟི མེ, བྷི་ཀྑ་ཝེ…པེ… བྷཱ་ཝི་ཏ་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི.

‘‘ཡཱ་ཝ་ཀཱི་ཝ་ཉྩ མེ, བྷི་ཀྑ་ཝེ, ཨི་མེ་སུ ཙ་ཏཱུ་སུ ཨ་རི་ཡ་ས་ཙྩེ་སུ ཨེ་ཝཾ ཏི་པ་རི་ཝ་ཊྚཾ དྭཱ་ད་སཱ་ཀཱ་རཾ ཡ་ཐཱ་བྷཱུ་ཏཾ ཉཱ་ཎ་ད་སྶ་ནཾ ན སུ་ཝི་སུ་དྡྷཾ ཨ་ཧོ་སི, ནེ་ཝ ཏཱ་ཝཱ་ཧཾ, བྷི་ཀྑ་ཝེ, ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ‘ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ’ཏི པ་ཙྩ་ཉྙཱ་སིཾ. ཡ་ཏོ ཙ ཁོ མེ, བྷི་ཀྑ་ཝེ, ཨི་མེ་སུ ཙ་ཏཱུ་སུ ཨ་རི་ཡ་ས་ཙྩེ་སུ ཨེ་ཝཾ ཏི་པ་རི་ཝ་ཊྚཾ དྭཱ་ད་སཱ་ཀཱ་རཾ ཡ་ཐཱ་བྷཱུ་ཏཾ ཉཱ་ཎ་ད་སྶ་ནཾ སུ་ཝི་སུ་དྡྷཾ ཨ་ཧོ་སི, ཨ་ཐཱ་ཧཾ, བྷི་ཀྑ་ཝེ, ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ‘ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ’ཏི པ་ཙྩ་ཉྙཱ་སིཾ. ཉཱ་ཎ་ཉྩ པ་ན མེ ད་སྶ་ནཾ ཨུ་ད་པཱ་དི – ‘ཨ་ཀུ་པྤཱ མེ ཝི་མུ་ཏྟི, ཨ་ཡ་མ་ནྟི་མཱ ཛཱ་ཏི, ན་ཏྠི དཱ་ནི པུ་ན་བྦྷ་ཝོ’’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནཱ པ་ཉྩ་ཝ་གྒི་ཡཱ བྷི་ཀྑཱུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡུ་ནྟི.

ཨི་མ་སྨི་ཉྩ པ་ན ཝེ་ཡྻཱ་ཀ་ར་ཎ་སྨིཾ བྷ་ཉྙ་མཱ་ནེ ཨཱ་ཡ་སྨ་ཏོ ཀོ་ཎྜ་ཉྙ་སྶ ཝི་ར་ཛཾ ཝཱི་ཏ་མ་ལཾ དྷ་མྨ་ཙ་ཀྑུཾ ཨུ་ད་པཱ་དི – ‘‘ཡཾ ཀི་ཉྩི ས་མུ་ད་ཡ་དྷ་མྨཾ, ས་བྦཾ ཏཾ ནི་རོ་དྷ་དྷ་མྨ’’ནྟི.

པ་ཝ་ཏྟི་ཏེ ཙ པ་ན བྷ་ག་ཝ་ཏཱ དྷ་མྨ་ཙ་ཀྐེ བྷུ་མྨཱ [བྷཱུ་མཱ (ཀ.)] དེ་ཝཱ ས་དྡ་མ་ནུ་སྶཱ་ཝེ་སུཾ – ‘‘ཨེ་ཏཾ བྷ་ག་ཝ་ཏཱ བཱ་རཱ་ཎ་སི་ཡཾ ཨི་སི་པ་ཏ་ནེ མི་ག་དཱ་ཡེ ཨ་ནུ་ཏྟ་རཾ དྷ་མྨ་ཙ་ཀྐཾ པ་ཝ་ཏྟི་ཏཾ ཨ་པྤ་ཊི་ཝ་ཏྟི་ཡཾ ས་མ་ཎེ་ན ཝཱ བྲཱ་ཧྨ་ཎེ་ན ཝཱ དེ་ཝེ་ན ཝཱ མཱ་རེ་ན ཝཱ བྲ་ཧྨུ་ནཱ ཝཱ ཀེ་ན་ཙི ཝཱ ལོ་ཀ་སྨི’’ནྟི. བྷུ་མྨཱ་ནཾ དེ་ཝཱ་ནཾ ས་དྡཾ སུ་ཏྭཱ ཙཱ་ཏུ་མ་ཧཱ་རཱ་ཛི་ཀཱ [ཙཱ་ཏུ་མྨ་ཧཱ་རཱ་ཛི་ཀཱ (སྱཱ.)] དེ་ཝཱ ས་དྡ་མ་ནུ་སྶཱ་ཝེ་སུཾ…པེ… ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ ས་དྡཾ སུ་ཏྭཱ ཏཱ་ཝ་ཏིཾ་སཱ དེ་ཝཱ…པེ… ཡཱ་མཱ དེ་ཝཱ…པེ… ཏུ་སི་ཏཱ དེ་ཝཱ…པེ… ནི་མྨཱ་ན་ར་ཏཱི དེ་ཝཱ…པེ… པ་ར་ནི་མྨི་ཏ་ཝ་ས་ཝ་ཏྟཱི དེ་ཝཱ…པེ… བྲ་ཧྨ་ཀཱ་ཡི་ཀཱ དེ་ཝཱ ས་དྡ་མ་ནུ་སྶཱ་ཝེ་སུཾ – ‘‘ཨེ་ཏཾ བྷ་ག་ཝ་ཏཱ བཱ་རཱ་ཎ་སི་ཡཾ ཨི་སི་པ་ཏ་ནེ མི་ག་དཱ་ཡེ ཨ་ནུ་ཏྟ་རཾ དྷ་མྨ་ཙ་ཀྐཾ པ་ཝ་ཏྟི་ཏཾ ཨ་པྤ་ཊི་ཝ་ཏྟི་ཡཾ ས་མ་ཎེ་ན ཝཱ བྲཱ་ཧྨ་ཎེ་ན ཝཱ དེ་ཝེ་ན ཝཱ མཱ་རེ་ན ཝཱ བྲ་ཧྨུ་ནཱ ཝཱ ཀེ་ན་ཙི ཝཱ ལོ་ཀ་སྨི’’ནྟི.

ཨི་ཏི་ཧ ཏེ་ན ཁ་ཎེ་ན ཏེ་ན ལ་ཡེ་ན ཏེ་ན མུ་ཧུ་ཏྟེ་ན ཡཱ་ཝ བྲ་ཧྨ་ལོ་ཀཱ ས་དྡོ ཨ་བྦྷུ་གྒ་ཙྪི. ཨ་ཡ་ཉྩ ད་ས་ས་ཧ་སྶཱི ལོ་ཀ་དྷཱ་ཏུ སཾ་ཀ་མྤི ས་མྤ་ཀ་མྤི ས་མྤ་ཝེ་དྷི, ཨ་པྤ་མཱ་ཎོ ཙ ཨུ་ལཱ༹་རོ ཨོ་བྷཱ་སོ ལོ་ཀེ པཱ་ཏུ་ར་ཧོ་སི ཨ་ཏི་ཀྐ་མྨ [ཨ་ཏི་ཀྐ་མྨེ་ཝ (སྱཱ. ཀ.) སཾ. ནི. ༥.༡༠༨༡ པ་སྶི་ཏ་བྦཱ] དེ་ཝཱ་ནཾ དེ་ཝཱ་ནུ་བྷཱ་ཝ་ནྟི.

ཨ་ཐ ཁོ བྷ་ག་ཝཱ ཨི་མཾ ཨུ་དཱ་ནཾ ཨུ་དཱ་ནེ་སི – ‘‘ཨ་ཉྙཱ་སི ཝ་ཏ, བྷོ, ཀོ་ཎྜ་ཉྙོ; ཨ་ཉྙཱ་སི ཝ་ཏ, བྷོ, ཀོ་ཎྜ་ཉྙོ’’ཏི. ཨི་ཏི ཧི་དཾ ཨཱ་ཡ་སྨ་ཏོ ཀོ་ཎྜ་ཉྙ་སྶ ཨ་ཉྙཱ་སི་ཀོ་ཎྜ་ཉྙོ ཏྭེ་ཝ [ཨ་ཉྙཱ་ཀོ་ཎྜ་ཉྙོ་ཏྭེ་ཝ (སྱཱ.)] ནཱ་མཾ ཨ་ཧོ་སི.

[ཀ] ‘ཨི་དཾ དུ་ཀྑཾ ཨ་རི་ཡ་ས་ཙྩ’ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’.

ཙ་ཀྑུཾ ཨུ་ད་པཱ་དཱི་ཏི – ཀེ་ན་ཊྛེ་ན? ཉཱ་ཎཾ ཨུ་ད་པཱ་དཱི་ཏི – ཀེ་ན་ཊྛེ་ན? པ་ཉྙཱ ཨུ་ད་པཱ་དཱི་ཏི – ཀེ་ན་ཊྛེ་ན? ཝི་ཛྫཱ ཨུ་ད་པཱ་དཱི་ཏི – ཀེ་ན་ཊྛེ་ན? ཨཱ་ལོ་ཀོ ཨུ་ད་པཱ་དཱི་ཏི – ཀེ་ན་ཊྛེ་ན? ཙ་ཀྑུཾ ཨུ་ད་པཱ་དཱིཏི – ད་སྶ་ན་ཊྛེ་ན. ཉཱ་ཎཾ ཨུ་ད་པཱ་དཱིཏི – ཉཱ་ཏ་ཊྛེ་ན. པ་ཉྙཱ ཨུ་ད་པཱ་དཱིཏི – པ་ཛཱ་ན་ན་ཊྛེ་ན. ཝི་ཛྫཱ ཨུ་ད་པཱ་དཱིཏི – པ་ཊི་ཝེ་དྷ་ཊྛེ་ན. ཨཱ་ལོ་ཀོ ཨུ་ད་པཱ་དཱིཏི – ཨོ་བྷཱ་ས་ཊྛེ་ན.

ཙ་ཀྑུཾ དྷ་མྨོ, ཉཱ་ཎཾ དྷ་མྨོ, པ་ཉྙཱ དྷ་མྨོ, ཝི་ཛྫཱ དྷ་མྨོ, ཨཱ་ལོ་ཀོ དྷ་མྨོ. ཨི་མེ པ་ཉྩ དྷ་མྨཱ དྷ་མྨ་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘དྷ་མྨེ་སུ ཉཱ་ཎཾ དྷ་མྨ་པ་ཊི་ས་མྦྷི་དཱ’’.

ད་སྶ་ན་ཊྛོ ཨ་ཏྠོ, ཉཱ་ཏ་ཊྛོ ཨ་ཏྠོ, པ་ཛཱ་ན་ན་ཊྛོ ཨ་ཏྠོ, པ་ཊི་ཝེ་དྷ་ཊྛོ ཨ་ཏྠོ, ཨོ་བྷཱ་ས་ཊྛོ ཨ་ཏྠོ. ཨི་མེ པ་ཉྩ ཨ་ཏྠཱ ཨ་ཏྠ་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘ཨ་ཏྠེ་སུ ཉཱ་ཎཾ ཨ་ཏྠ་པ་ཊི་ས་མྦྷི་དཱ’’.

པ་ཉྩ དྷ་མྨེ ས་ནྡ་སྶེ་ཏུཾ བྱ་ཉྫ་ན་ནི་རུ་ཏྟཱ་བྷི་ལཱ་པཱ, པ་ཉྩ ཨ་ཏྠེ ས་ནྡ་སྶེ་ཏུཾ བྱ་ཉྫ་ན་ནི་རུ་ཏྟཱ་བྷི་ལཱ་པཱ. ཨི་མཱ ད་ས ནི་རུ་ཏྟི་ཡཱ ནི་རུ་ཏྟི་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘ནི་རུ་ཏྟཱི་སུ ཉཱ་ཎཾ ནི་རུ་ཏྟི་པ་ཊི་ས་མྦྷི་དཱ’’.

པ་ཉྩ་སུ དྷ་མྨེ་སུ ཉཱ་ཎཱ་ནི, པ་ཉྩ་སུ ཨ་ཏྠེ་སུ ཉཱ་ཎཱ་ནི, ད་ས་སུ ནི་རུ་ཏྟཱི་སུ ཉཱ་ཎཱ་ནི. ཨི་མཱ་ནི ཝཱི་ས་ཏི ཉཱ་ཎཱ་ནི པ་ཊི་བྷཱ་ན་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘པ་ཊི་བྷཱ་ནེ་སུ ཉཱ་ཎཾ པ་ཊི་བྷཱ་ན་པ་ཊི་ས་མྦྷི་དཱ’’.

‘‘‘ཏཾ ཁོ པ་ནི་དཾ དུ་ཀྑཾ ཨ་རི་ཡ་ས་ཙྩཾ པ་རི་ཉྙེ་ཡྻ’ནྟི…པེ… པ་རི་ཉྙཱ་ཏ་ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’.

པ་ཉྩ དྷ་མྨེ ས་ནྡ་སྶེ་ཏུཾ བྱ་ཉྫ་ན་ནི་རུ་ཏྟཱ་བྷི་ལཱ་པཱ, པ་ཉྩ ཨ་ཏྠེ ས་ནྡ་སྶེ་ཏུཾ བྱ་ཉྫ་ན་ནི་རུ་ཏྟཱ་བྷི་ལཱ་པཱ. ཨི་མཱ ད་ས ནི་རུ་ཏྟི་ཡོ ནི་རུ་ཏྟི་པ་ཊི་ས་མྦྷི་དཱ་ཡ ཨཱ་ར་མྨ་ཎཱ ཙེ་ཝ ཧོ་ནྟི གོ་ཙ་རཱ ཙ. ཡེ ཏ་སྶཱ ཨཱ་ར་མྨ་ཎཱ ཏེ ཏ་སྶཱ གོ་ཙ་རཱ. ཡེ ཏ་སྶཱ གོ་ཙ་རཱ ཏེ ཏ་སྶཱ ཨཱ་ར་མྨ་ཎཱ. ཏེ་ན ཝུ་ཙྩ་ཏི – ‘‘ནི་རུ་ཏྟཱི་སུ ཉཱ་ཎཾ ནི་རུ་ཏྟི་པ་ཊི་ས་མྦྷི་དཱ’’.

དུ་ཀྑེ ཨ་རི་ཡ་ས་ཙྩེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

[ཁ] ‘‘‘ཨི་དཾ དུ་ཀྑ་ས་མུ་ད་ཡཾ ཨ་རི་ཡ་ས་ཙྩ’ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑ་ས་མུ་ད་ཡཾ ཨ་རི་ཡ་ས་ཙྩཾ པ་ཧཱ་ཏ་བྦ’ནྟི…པེ… པ་ཧཱི་ན་ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ. … ཨཱ་ལོ་ཀོ ཨུ་ད་པཱ་དི…པེ…’’.

དུ་ཀྑ་ས་མུ་ད་ཡེ ཨ་རི་ཡ་ས་ཙྩེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

[ག] ‘‘‘ཨི་དཾ དུ་ཀྑ་ནི་རོ་དྷཾ ཨ་རི་ཡ་ས་ཙྩ’ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑ་ནི་རོ་དྷཾ ཨ་རི་ཡ་ས་ཙྩཾ ས་ཙྪི་ཀཱ་ཏ་བྦ’ནྟི…པེ… ས་ཙྪི་ཀ་ཏ་ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ…’’.

དུ་ཀྑ་ནི་རོ་དྷེ ཨ་རི་ཡ་ས་ཙྩེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

[གྷ] ‘‘‘ཨི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩ’ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩཾ བྷཱ་ཝེ་ཏ་བྦ’ནྟི…པེ… བྷཱ་ཝི་ཏ་ནྟི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ…’’.

དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཨ་རི་ཡ་ས་ཙྩེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

ཙ་ཏཱུ་སུ ཨ་རི་ཡ་ས་ཙྩེ་སུ ས་ཊྛི དྷ་མྨཱ, ས་ཊྛི ཨ་ཏྠཱ, ཝཱི་ས་ཏི་ས་ཏ་ནི་རུ་ཏྟི་ཡོ, ཙ་ཏྟཱ་ལཱི་ས་ཉྩ དྭེ ཙ ཉཱ་ཎ་ས་ཏཱ་ནི.

༢. ས་ཏི་པ་ཊྛཱ་ན་ཝཱ་རོ

༣༡. ‘‘‘ཨ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ’ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. སཱ ཁོ པ་ནཱ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ བྷཱ་ཝེ་ཏ་བྦཱ་ཏི མེ, བྷི་ཀྑ་ཝེ,…པེ… བྷཱ་ཝི་ཏཱ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’.

‘‘ཨ་ཡཾ ཝེ་ད་ནཱ་སུ…པེ… ཨ་ཡཾ ཙི་ཏྟེ…པེ… ཨ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. སཱ ཁོ པ་ནཱ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ བྷཱ་ཝེ་ཏ་བྦཱ ཏི…པེ… བྷཱ་ཝི་ཏཱ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’.

[ཀ] ‘‘‘ཨ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ’ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ… སཱ ཁོ པ་ནཱ་ཡཾ ཀཱ་ཡེ ཀཱ་ཡཱ་ནུ་པ་སྶ་ནཱ བྷཱ་ཝེ་ཏ་བྦཱ་ཏི…པེ… བྷཱ་ཝི་ཏཱ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’.

ཙ་ཀྑུཾ ཨུ་ད་པཱ་དཱི་ཏི – ཀེ་ན་ཊྛེ་ན? ཉཱ་ཎཾ ཨུ་ད་པཱ་དཱི་ཏི – ཀེ་ན་ཊྛེ་ན? པ་ཉྙཱ ཨུ་ད་པཱ་དཱི་ཏི – ཀེ་ན་ཊྛེ་ན? ཝི་ཛྫཱ ཨུ་ད་པཱ་དཱི་ཏི – ཀེ་ན་ཊྛེ་ན? ཨཱ་ལོ་ཀོ ཨུ་ད་པཱ་དཱི་ཏི – ཀེ་ན་ཊྛེ་ན? ཙ་ཀྑུཾ ཨུ་ད་པཱ་དཱིཏི – ད་སྶ་ན་ཊྛེ་ན. ཉཱ་ཎཾ ཨུ་ད་པཱ་དཱིཏི – ཉཱ་ཏ་ཊྛེ་ན. པ་ཉྙཱ ཨུ་ད་པཱ་དཱིཏི – པ་ཛཱ་ན་ན་ཊྛེ་ན. ཝི་ཛྫཱ ཨུ་ད་པཱ་དཱིཏི – པ་ཊི་ཝེ་དྷ་ཊྛེ་ན. ཨཱ་ལོ་ཀོ ཨུ་ད་པཱ་དཱིཏི – ཨོ་བྷཱ་ས་ཊྛེ་ན.

ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ནེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

[ཁ-གྷ] ‘‘ཨ་ཡཾ ཝེ་ད་ནཱ་སུ…པེ… ཨ་ཡཾ ཙི་ཏྟེ…པེ… ཨ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ… སཱ ཁོ པ་ནཱ་ཡཾ དྷ་མྨེ་སུ དྷ་མྨཱ་ནུ་པ་སྶ་ནཱ བྷཱ་ཝེ་ཏ་བྦཱ ཏི…པེ… བྷཱ་ཝི་ཏཱ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ…’’.

དྷ་མྨེ་སུ དྷ་མྨཱ་ནུ་པ་སྶ་ནཱ ས་ཏི་པ་ཊྛཱ་ནེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

ཙ་ཏཱུ་སུ ས་ཏི་པ་ཊྛཱ་ནེ་སུ ས་ཊྛི དྷ་མྨཱ, ས་ཊྛི ཨ་ཏྠཱ, ཝཱི་ས་ཏི་ས་ཏ་ནི་རུ་ཏྟི་ཡོ, ཙ་ཏྟཱ་ལཱི་ས་ཉྩ དྭེ ཙ ཉཱ་ཎ་ས་ཏཱ་ནི.

༣. ཨི་དྡྷི་པཱ་ད་ཝཱ་རོ

༣༢. ‘‘ཨ་ཡཾ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. སོ ཁོ པ་ནཱ་ཡཾ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ བྷཱ་ཝེ་ཏ་བྦོ་ཏི མེ, བྷི་ཀྑ་ཝེ…པེ… བྷཱ་ཝི་ཏོ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི.

‘‘ཨ་ཡཾ ཝཱི་རི་ཡ་ས་མཱ་དྷི…པེ… ཨ་ཡཾ ཙི་ཏྟ་ས་མཱ་དྷི…པེ… ཨ་ཡཾ ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. སོ ཁོ པ་ནཱ་ཡཾ ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ བྷཱ་ཝེ་ཏ་བྦོ་ཏི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’.

[ཀ] ‘‘‘ཨ་ཡཾ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ’ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ… སོ ཁོ པ་ནཱ་ཡཾ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ བྷཱ་ཝེ་ཏ་བྦོ་ཏི…པེ… བྷཱ་ཝི་ཏོ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’.

ཙ་ཀྑུཾ ཨུ་ད་པཱ་དཱི་ཏི – ཀེ་ན་ཊྛེ་ན? ཉཱ་ཎཾ ཨུ་ད་པཱ་དཱི་ཏི – ཀེ་ན་ཊྛེ་ན? པ་ཉྙཱ ཨུ་ད་པཱ་དཱི་ཏི – ཀེ་ན་ཊྛེ་ན? ཝི་ཛྫཱ ཨུ་ད་པཱ་དཱི་ཏི – ཀེ་ན་ཊྛེ་ན? ཨཱ་ལོ་ཀོ ཨུ་ད་པཱ་དཱི་ཏི – ཀེ་ན་ཊྛེ་ན? ཙ་ཀྑུཾ ཨུ་ད་པཱ་དཱིཏི – ད་སྶ་ན་ཊྛེ་ན. ཉཱ་ཎཾ ཨུ་ད་པཱ་དཱིཏི – ཉཱ་ཏ་ཊྛེ་ན. པ་ཉྙཱ ཨུ་ད་པཱ་དཱིཏི – པ་ཛཱ་ན་ན་ཊྛེ་ན. ཝི་ཛྫཱ ཨུ་ད་པཱ་དཱིཏི – པ་ཊི་ཝེ་དྷ་ཊྛེ་ན. ཨཱ་ལོ་ཀོ ཨུ་ད་པཱ་དཱིཏི – ཨོ་བྷཱ་ས་ཊྛེ་ན.

ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏེ ཨི་དྡྷི་པཱ་དེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

[ཁ-གྷ] ‘‘ཨ་ཡཾ ཝཱི་རི་ཡ་ས་མཱ་དྷི…པེ… ཨ་ཡཾ ཙི་ཏྟ་ས་མཱ་དྷི…པེ… ཨ་ཡཾ ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ… སོ ཁོ པ་ནཱ་ཡཾ ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏོ ཨི་དྡྷི་པཱ་དོ བྷཱ་ཝེ་ཏ་བྦོ་ཏི…པེ… བྷཱ་ཝི་ཏོ་ཏི པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི…པེ…’’.

ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏེ ཨི་དྡྷི་པཱ་དེ པ་ནྣ་ར་ས དྷ་མྨཱ, པ་ནྣ་ར་ས ཨ་ཏྠཱ, ཏིཾ་ས ནི་རུ་ཏྟི་ཡོ, ས་ཊྛི ཉཱ་ཎཱ་ནི.

ཙ་ཏཱུ་སུ ཨི་དྡྷི་པཱ་དེ་སུ ས་ཊྛི དྷ་མྨཱ, ས་ཊྛི ཨ་ཏྠཱ, ཝཱི་ས་ཏི་ས་ཏ་ནི་རུ་ཏྟི་ཡོ, ཙ་ཏྟཱ་ལཱི་ས་ཉྩ དྭེ ཙ ཉཱ་ཎ་ས་ཏཱ་ནི.

༤. ས་ཏྟ་བོ་དྷི་ས་ཏྟ་ཝཱ་རོ

༣༣. ‘‘‘ས་མུ་ད་ཡོ ས་མུ་ད་ཡོ’ཏི ཁོ, བྷི་ཀྑ་ཝེ, ཝི་པ་སྶི་སྶ བོ་དྷི་ས་ཏྟ་སྶ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ནི་རོ་དྷོ ནི་རོ་དྷོ’ཏི ཁོ, བྷི་ཀྑ་ཝེ, ཝི་པ་སྶི་སྶ བོ་དྷི་ས་ཏྟ་སྶ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. ཝི་པ་སྶི་སྶ བོ་དྷི་ས་ཏྟ་སྶ ཝེ་ཡྻཱ་ཀ་ར་ཎེ ད་ས དྷ་མྨཱ, ད་ས ཨ་ཏྠཱ, ཝཱི་ས་ཏི ནི་རུ་ཏྟི་ཡོ, ཙ་ཏྟཱ་ལཱི་སཾ [ཙ་ཏྟཱ་ལཱི་ས (ཀ.)] ཉཱ་ཎཱ་ནི.

‘‘‘ས་མུ་ད་ཡོ ས་མུ་ད་ཡོ’ཏི ཁོ, བྷི་ཀྑ་ཝེ, སི་ཁི་སྶ བོ་དྷི་ས་ཏྟ་སྶ…པེ… ཝེ་སྶ་བྷུ་སྶ བོ་དྷི་ས་ཏྟ་སྶ…པེ… ཀ་ཀུ་ས་ནྡྷ་སྶ བོ་དྷི་ས་ཏྟ་སྶ…པེ… ཀོ་ཎཱ་ག་མ་ན་སྶ བོ་དྷི་ས་ཏྟ་སྶ…པེ… ཀ་སྶ་པ་སྶ བོ་དྷི་ས་ཏྟ་སྶ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ནི་རོ་དྷོ ནི་རོ་དྷོ’ཏི ཁོ, བྷི་ཀྑ་ཝེ, ཀ་སྶ་པ་སྶ བོ་དྷི་ས་ཏྟ་སྶ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. ཀ་སྶ་པ་སྶ བོ་དྷི་ས་ཏྟ་སྶ ཝེ་ཡྻཱ་ཀ་ར་ཎེ ད་ས དྷ་མྨཱ, ད་ས ཨ་ཏྠཱ, ཝཱི་ས་ཏི ནི་རུ་ཏྟི་ཡོ, ཙ་ཏྟཱ་ལཱི་ས ཉཱ་ཎཱ་ནི.

‘‘‘ས་མུ་ད་ཡོ ས་མུ་ད་ཡོ’ཏི ཁོ, བྷི་ཀྑ་ཝེ, གོ་ཏ་མ་སྶ བོ་དྷི་ས་ཏྟ་སྶ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ནི་རོ་དྷོ ནི་རོ་དྷོ’ཏི ཁོ, བྷི་ཀྑ་ཝེ, གོ་ཏ་མ་སྶ བོ་དྷི་ས་ཏྟ་སྶ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. གོ་ཏ་མ་སྶ བོ་དྷི་ས་ཏྟ་སྶ ཝེ་ཡྻཱ་ཀ་ར་ཎེ ད་ས དྷ་མྨཱ, ད་ས ཨ་ཏྠཱ, ཝཱི་ས་ཏི ནི་རུ་ཏྟི་ཡོ, ཙ་ཏྟཱ་ལཱི་ས ཉཱ་ཎཱ་ནི.

ས་ཏྟ་ནྣཾ བོ་དྷི་ས་ཏྟཱ་ནཾ ས་ཏྟ་སུ ཝེ་ཡྻཱ་ཀ་ར་ཎེ་སུ ས་ཏྟ་ཏི དྷ་མྨཱ, ས་ཏྟ་ཏི ཨ་ཏྠཱ, ཙ་ཏྟཱ་ལཱི་ས་ས་ཏཾ [ཙ་ཏྟཱ་རཱི་ས་ས་ཏཱ (སྱཱ.)] ནི་རུ་ཏྟི་ཡོ, ཨ་སཱི་ཏི ཙ དྭེ ཙ ཉཱ་ཎ་ས་ཏཱ་ནི.

༥. ཨ་བྷི་ཉྙཱ་དི་ཝཱ་རོ

༣༤. ‘‘‘ཡཱ་ཝ་ཏཱ ཨ་བྷི་ཉྙཱ་ཡ ཨ་བྷི་ཉྙ་ཊྛོ ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ ཨ་བྷི་ཉྙ་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’. ཨ་བྷི་ཉྙཱ་ཡ ཨ་བྷི་ཉྙ་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

‘‘‘ཡཱ་ཝ་ཏཱ པ་རི་ཉྙཱ་ཡ པ་རི་ཉྙ་ཊྛོ…པེ… ཡཱ་ཝ་ཏཱ པ་ཧཱ་ན་སྶ པ་ཧཱ་ན་ཊྛོ…པེ… ཡཱ་ཝ་ཏཱ བྷཱ་ཝ་ནཱ་ཡ བྷཱ་ཝ་ན་ཊྛོ…པེ… ཡཱ་ཝ་ཏཱ ས་ཙྪི་ཀི་རི་ཡཱ་ཡ ས་ཙྪི་ཀི་རི་ཡ་ཊྛོ ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ ས་ཙྪི་ཀི་རི་ཡ་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’. ས་ཙྪི་ཀི་རི་ཡཱ་ཡ ས་ཙྪི་ཀི་རི་ཡ་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

ཨ་བྷི་ཉྙཱ་ཡ ཨ་བྷི་ཉྙ་ཊྛེ, པ་རི་ཉྙཱ་ཡ པ་རི་ཉྙ་ཊྛེ, པ་ཧཱ་ནཱ་ཡ པ་ཧཱ་ན་ཊྛེ, བྷཱ་ཝ་ནཱ་ཡ བྷཱ་ཝ་ན་ཊྛེ, ས་ཙྪི་ཀི་རི་ཡཱ་ཡ ས་ཙྪི་ཀི་རི་ཡ་ཊྛེ པ་ཉྩ་ཝཱི་ས་ས་ཏཾ དྷ་མྨཱ, པ་ཉྩ་ཝཱི་ས་ས་ཏཾ ཨ་ཏྠཱ, ཨ་ཌྜྷ་ཏེ་ཡྻཱ་ནི ནི་རུ་ཏྟི་ས་ཏཱ་ནི, པ་ཉྩ ཉཱ་ཎ་ས་ཏཱ་ནི.

༦. ཁ་ནྡྷཱ་དི་ཝཱ་རོ

༣༥. ‘‘‘ཡཱ་ཝ་ཏཱ ཁ་ནྡྷཱ་ནཾ ཁ་ནྡྷ་ཊྛོ, ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ ཁ་ནྡྷ་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’. ཁ་ནྡྷཱ་ནཾ ཁ་ནྡྷ་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

‘‘‘ཡཱ་ཝ་ཏཱ དྷཱ་ཏཱུ་ནཾ དྷཱ་ཏུ་ཊྛོ…པེ… ཡཱ་ཝ་ཏཱ ཨཱ་ཡ་ཏ་ནཱ་ནཾ ཨཱ་ཡ་ཏ་ན་ཊྛོ…པེ… ཡཱ་ཝ་ཏཱ ས་ངྑ་ཏཱ་ནཾ ས་ངྑ་ཏ་ཊྛོ…པེ… ཡཱ་ཝ་ཏཱ ཨ་ས་ངྑ་ཏ་སྶ ཨ་ས་ངྑ་ཏ་ཊྛོ ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ ཨ་ས་ངྑ་ཏ་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. ཨ་ས་ངྑ་ཏ་སྶ ཨ་ས་ངྑ་ཏ་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

ཁ་ནྡྷཱ་ནཾ ཁ་ནྡྷ་ཊྛེ, དྷཱ་ཏཱུ་ནཾ དྷཱ་ཏུ་ཊྛེ, ཨཱ་ཡ་ཏ་ནཱ་ནཾ ཨཱ་ཡ་ཏ་ན་ཊྛེ ས་ངྑ་ཏཱ་ནཾ ས་ངྑ་ཏ་ཊྛེ, ཨ་ས་ངྑ་ཏ་སྶ ཨ་ས་ངྑ་ཏ་ཊྛེ པ་ཉྩ་ཝཱི་ས་ཏི་ས་ཏཾ དྷ་མྨཱ, པ་ཉྩ་ཝཱི་ས་ཏི་ས་ཏཾ ཨ་ཏྠཱ, ཨ་ཌྜྷ་ཏེ་ཡྻཱ་ནི ནི་རུ་ཏྟི་ས་ཏཱ་ནི, པ་ཉྩ ཉཱ་ཎ་ས་ཏཱ་ནི.

༧. ས་ཙྩ་ཝཱ་རོ

༣༦. ‘‘‘ཡཱ་ཝ་ཏཱ དུ་ཀྑ་སྶ དུ་ཀྑ་ཊྛོ, ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ དུ་ཀྑ་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’. དུ་ཀྑ་སྶ དུ་ཀྑ་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

‘‘‘ཡཱ་ཝ་ཏཱ ས་མུ་ད་ཡ་སྶ ས་མུ་ད་ཡ་ཊྛོ…པེ… ཡཱ་ཝ་ཏཱ ནི་རོ་དྷ་སྶ ནི་རོ་དྷ་ཊྛོ…པེ… ཡཱ་ཝ་ཏཱ མ་གྒ་སྶ མ་གྒ་ཊྛོ ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ མ་གྒ་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. མ་གྒ་སྶ མ་གྒ་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

ཙ་ཏཱུ་སུ ཨ་རི་ཡ་ས་ཙྩེ་སུ ས་ཏཾ དྷ་མྨཱ, ས་ཏཾ ཨ་ཏྠཱ, དྭེ ནི་རུ་ཏྟི་ས་ཏཱ་ནི, ཙ་ཏྟཱ་རི ཉཱ་ཎ་ས་ཏཱ་ནི.

༨. པ་ཊི་ས་མྦྷི་དཱ་ཝཱ་རོ

༣༧. ‘‘‘ཡཱ་ཝ་ཏཱ ཨ་ཏྠ་པ་ཊི་ས་མྦྷི་དཱ་ཡ ཨ་ཏྠ་པ་ཊི་ས་མྦྷི་ད་ཊྛོ, ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ ཨ་ཏྠ་པ་ཊི་ས་མྦྷི་ད་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. ཨ་ཏྠ་པ་ཊི་ས་མྦྷི་དཱ་ཡ ཨ་ཏྠ་པ་ཊི་ས་མྦྷི་ད་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

‘‘‘ཡཱ་ཝ་ཏཱ དྷ་མྨ་པ་ཊི་ས་མྦྷི་དཱ་ཡ དྷ་མྨ་པ་ཊི་ས་མྦྷི་ད་ཊྛོ…པེ… ཡཱ་ཝ་ཏཱ ནི་རུ་ཏྟི་པ་ཊི་ས་མྦྷི་དཱ་ཡ ནི་རུ་ཏྟི་པ་ཊི་ས་མྦྷི་ད་ཊྛོ…པེ… ཡཱ་ཝ་ཏཱ པ་ཊི་བྷཱ་ན་པ་ཊི་ས་མྦྷི་དཱ་ཡ པ་ཊི་བྷཱ་ན་པ་ཊི་ས་མྦྷི་ད་ཊྛོ, ཉཱ་ཏོ དི་ཊྛོ ཝི་དི་ཏོ ས་ཙྪི་ཀ་ཏོ ཕ་སྶི་ཏོ པ་ཉྙཱ་ཡ. ཨ་ཕ་སྶི་ཏོ པ་ཉྙཱ་ཡ པ་ཊི་བྷཱ་ན་པ་ཊི་ས་མྦྷི་ད་ཊྛོ ན་ཏྠཱི’ཏི – ཙ་ཀྑུཾ ཨུ་ད་པཱ་དི …པེ… ཨཱ་ལོ་ཀོ ཨུ་ད་པཱ་དི’’. པ་ཊི་བྷཱ་ན་པ་ཊི་ས་མྦྷི་ད་ཊྛེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

ཙ་ཏཱུ་སུ པ་ཊི་ས་མྦྷི་དཱ་སུ ས་ཏཾ དྷ་མྨཱ, ས་ཏཾ ཨ་ཏྠཱ, དྭེ ནི་རུ་ཏྟི་ས་ཏཱ་ནི, ཙ་ཏྟཱ་རི ཉཱ་ཎ་ས་ཏཱ་ནི.

༩. ཚ་བུ་དྡྷ་དྷ་མྨ་ཝཱ་རོ

༣༨. ‘‘‘ཡཱ་ཝ་ཏཱ ཨི་ནྡྲི་ཡ་པ་རོ་པ་རི་ཡ་ཏྟེ ཉཱ་ཎཾ, ཉཱ་ཏཾ དི་ཊྛཾ ཝི་དི་ཏཾ ས་ཙྪི་ཀ་ཏཾ ཕ་སྶི་ཏཾ པ་ཉྙཱ་ཡ. ཨ་ཕ་སྶི་ཏཾ པ་ཉྙཱ་ཡ ཨི་ནྡྲི་ཡ་པ་རོ་པ་རི་ཡ་ཏྟེ ཉཱ་ཎཾ ན་ཏྠཱི’ཏི – ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི’’. ཨི་ནྡྲི་ཡ་པ་རོ་པ་རི་ཡ་ཏྟེ ཉཱ་ཎེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

‘‘‘ཡཱ་ཝ་ཏཱ ས་ཏྟཱ་ནཾ ཨཱ་ས་ཡཱ་ནུ་ས་ཡེ ཉཱ་ཎཾ…པེ… ཡཱ་ཝ་ཏཱ ཡ་མ་ཀ་པཱ་ཊི་ཧཱི་རེ ཉཱ་ཎཾ …པེ… ཡཱ་ཝ་ཏཱ མ་ཧཱ་ཀ་རུ་ཎཱ་ས་མཱ་པ་ཏྟི་ཡཱ ཉཱ་ཎཾ…པེ… ཡཱ་ཝ་ཏཱ ས་བྦ་ཉྙུ་ཏ་ཉྙཱ་ཎཾ…པེ… ཡཱ་ཝ་ཏཱ ཨ་ནཱ་ཝ་ར་ཎཾ ཉཱ་ཎཾ, ཉཱ་ཏཾ དི་ཊྛཾ ཝི་དི་ཏཾ ས་ཙྪི་ཀ་ཏཾ ཕ་སྶི་ཏཾ པ་ཉྙཱ་ཡ. ཨ་ཕ་སྶི་ཏཾ པ་ཉྙཱ་ཡ ཨ་ནཱ་ཝ་ར་ཎཾ ཉཱ་ཎཾ ན་ཏྠཱི’ཏི – ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི’’. ཨ་ནཱ་ཝ་ར་ཎེ ཉཱ་ཎེ པ་ཉྩ་ཝཱི་ས་ཏི དྷ་མྨཱ, པ་ཉྩ་ཝཱི་ས་ཏི ཨ་ཏྠཱ, པ་ཉྙཱ་ས ནི་རུ་ཏྟི་ཡོ, ས་ཏཾ ཉཱ་ཎཱ་ནི.

ཚ་སུ བུ་དྡྷ་དྷ་མྨེ་སུ དི་ཡ་ཌྜྷ་ས་ཏཾ དྷ་མྨཱ, དི་ཡ་ཌྜྷ་ས་ཏཾ ཨ་ཏྠཱ, ཏཱི་ཎི ནི་རུ་ཏྟི་ས་ཏཱ་ནི, ཚ ཉཱ་ཎ་ས་ཏཱ་ནི.

པ་ཊི་ས་མྦྷི་དཱ་དྷི་ཀ་ར་ཎེ [པ་ཊི་ས་མྦྷི་དཱ་པ་ཀ་ར་ཎེ (སྱཱ.)] ཨ་ཌྜྷ་ན་ཝ་དྷ་མྨ་ས་ཏཱ་ནི [ཨ་ཌྜྷ་ན་ཝ་མཱ་ནི དྷ་མྨ་ས་ཏཱ་ནི (སྱཱ.), ཨ་ཌྜྷ་ན་ཝ་མ་དྷ་མྨ་ས་ཏཱ་ནི (ཀ.)], ཨ་ཌྜྷ་ན་ཝ་ཨ་ཏྠ་ས་ཏཱ་ནི, ནི་རུ་ཏྟི་ས་ཧ་སྶ་ཉྩ ས་ཏྟ ཙ ནི་རུ་ཏྟི་ས་ཏཱ་ནི, ཏཱི་ཎི ཙ ཉཱ་ཎ་ས་ཧ་སྶཱ་ནི, ཙ་ཏྟཱ་རི ཙ ཉཱ་ཎ་ས་ཏཱ་ནཱི་ཏི.

པ་ཊི་ས་མྦྷི་དཱ་ཀ་ཐཱ ནི་ཊྛི་ཏཱ.