༥. ཝི་རཱ་ག་ཀ་ཐཱ
༢༨. ཝི་རཱ་གོ མ་གྒོ, ཝི་མུ་ཏྟི ཕ་ལཾ. ཀ་ཐཾ ཝི་རཱ་གོ མ་གྒོ? སོ་ཏཱ་པ་ཏྟི་མ་གྒ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི མི་ཙྪཱ་དི་ཊྛི་ཡཱ ཝི་ར་ཛྫ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་ར་ཛྫ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་ར་ཛྫ་ཏི. ཝི་རཱ་གོ ཝི་རཱ་གཱ་ར་མྨ་ཎོ ཝི་རཱ་ག་གོ་ཙ་རོ ཝི་རཱ་གེ ས་མུ་དཱ་ག་ཏོ [ས་མུ་པཱ་ག་ཏོ (སྱཱ.)] ཝི་རཱ་གེ ཋི་ཏོ ཝི་རཱ་གེ པ་ཏི་ཊྛི་ཏོ.
ཝི་རཱ་གོཏི དྭེ ཝི་རཱ་གཱ – ནི་བྦཱ་ན་ཉྩ ཝི་རཱ་གོ, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་རཱ་གཱ ཧོ་ནྟཱི་ཏི – ཝི་རཱ་གཱ. ས་ཧ་ཛཱ་ཏཱ་ནི ས་ཏྟ་ངྒཱ་ནི ཝི་རཱ་གཾ ག་ཙྪ་ནྟཱི་ཏི – ཝི་རཱ་གོ མ་གྒོ. ཨེ་ཏེ་ན མ་གྒེ་ན བུ་དྡྷཱ ཙ སཱ་ཝ་ཀཱ ཙ ཨ་ག་ཏཾ དི་སཾ ནི་བྦཱ་ནཾ ག་ཙྪ་ནྟཱི་ཏི – ཨ་ཊྛ་ངྒི་ཀོ མ་གྒོ. ཡཱ་ཝ་ཏཱ པུ་ཐུ་ས་མ་ཎ་བྲཱ་ཧྨ་ཎཱ་ནཾ པ་ར་པྤ་ཝཱ་དཱ་ནཾ མ་གྒཱ, ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ཨ་གྒོ ཙ སེ་ཊྛོ ཙ པཱ་མོ་ཀྑོ [ཝི་མོ་ཀྑོ (སྱཱ.), མོ་ཀྑོ (ཨ་ཊྛ.)] ཙ ཨུ་ཏྟ་མོ ཙ པ་ཝ་རོ ཙཱ་ཏི – མ་གྒཱ་ནཾ ཨ་ཊྛ་ངྒི་ཀོ སེ་ཊྛོ.
ཨ་བྷི་ནི་རོ་པ་ན་ཊྛེ་ན ས་མྨཱ་ས་ངྐ་པྤོ མི་ཙྪཱ་ས་ངྐ་པྤཱ ཝི་ར་ཛྫ་ཏི. པ་རི་གྒ་ཧ་ཊྛེ་ན ས་མྨཱ་ཝཱ་ཙཱ མི་ཙྪཱ་ཝཱ་ཙཱ་ཡ ཝི་ར་ཛྫ་ཏི. ས་མུ་ཊྛཱ་ན་ཊྛེ་ན ས་མྨཱ་ཀ་མྨ་ནྟོ མི་ཙྪཱ་ཀ་མྨ་ནྟཱ ཝི་ར་ཛྫ་ཏི. ཝོ་དཱ་ན་ཊྛེ་ན ས་མྨཱ་ཨཱ་ཛཱི་ཝོ མི་ཙྪཱ་ཨཱ་ཛཱི་ཝཱ ཝི་ར་ཛྫ་ཏི. པ་གྒ་ཧ་ཊྛེ་ན ས་མྨཱ་ཝཱ་ཡཱ་མོ མི་ཙྪཱ་ཝཱ་ཡཱ་མཱ ཝི་ར་ཛྫ་ཏི. ཨུ་པ་ཊྛཱ་ན་ཊྛེ་ན ས་མྨཱ་ས་ཏི མི་ཙྪཱ་ས་ཏི་ཡཱ ཝི་ར་ཛྫ་ཏི. ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི མི་ཙྪཱ་ས་མཱ་དྷི་ཏོ ཝི་ར་ཛྫ་ཏི. ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་ར་ཛྫ་ཏི. བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་ར་ཛྫ་ཏི. ཝི་རཱ་གོ ཝི་རཱ་གཱ་ར་མྨ་ཎོ ཝི་རཱ་ག་གོ་ཙ་རོ ཝི་རཱ་གེ ས་མུ་དཱ་ག་ཏོ ཝི་རཱ་གེ ཋི་ཏོ ཝི་རཱ་གེ པ་ཏི་ཊྛི་ཏོ.
ཝི་རཱ་གོཏི དྭེ ཝི་རཱ་གཱ – ནི་བྦཱ་ན་ཉྩ ཝི་རཱ་གོ, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་རཱ་གཱ ཧོ་ནྟཱི་ཏི – ཝི་རཱ་གཱ. ས་ཧ་ཛཱ་ཏཱ་ནི ས་ཏྟ་ངྒཱ་ནི ཝི་རཱ་གཾ ག་ཙྪ་ནྟཱི་ཏི – ཝི་རཱ་གོ མ་གྒོ. ཨེ་ཏེ་ན མ་གྒེ་ན བུ་དྡྷཱ ཙ སཱ་ཝ་ཀཱ ཙ ཨ་ག་ཏཾ དི་སཾ ནི་བྦཱ་ནཾ ག་ཙྪ་ནྟཱི་ཏི – ཨ་ཊྛ་ངྒི་ཀོ མ་གྒོ. ཡཱ་ཝ་ཏཱ པུ་ཐུ་ས་མ་ཎ་བྲཱ་ཧྨ་ཎཱ་ནཾ པ་ར་པྤ་ཝཱ་དཱ་ནཾ མ་གྒཱ, ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ཨ་གྒོ ཙ སེ་ཊྛོ ཙ པཱ་མོ་ཀྑོ ཙ ཨུ་ཏྟ་མོ ཙ པ་ཝ་རོ ཙཱ་ཏི – མ་གྒཱ་ནཾ ཨ་ཊྛ་ངྒི་ཀོ སེ་ཊྛོ.
ས་ཀ་དཱ་གཱ་མི་མ་གྒ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི…པེ… ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི ཨོ་ལཱ༹་རི་ཀཱ ཀཱ་མ་རཱ་ག་ས་ཉྙོ་ཛ་ནཱ པ་ཊི་གྷ་ས་ཉྙོ་ཛ་ནཱ ཨོ་ལཱ༹་རི་ཀཱ ཀཱ་མ་རཱ་གཱ་ནུ་ས་ཡཱ པ་ཊི་གྷཱ་ནུ་ས་ཡཱ ཝི་ར་ཛྫ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་ར་ཛྫ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་ར་ཛྫ་ཏི. ཝི་རཱ་གོ ཝི་རཱ་གཱ་ར་མྨ་ཎོ ཝི་རཱ་ག་གོ་ཙ་རོ ཝི་རཱ་གེ ས་མུ་དཱ་ག་ཏོ ཝི་རཱ་གེ ཋི་ཏོ ཝི་རཱ་གེ པ་ཏི་ཊྛི་ཏོ.
ཝི་རཱ་གོཏི དྭེ ཝི་རཱ་གཱ – ནི་བྦཱ་ན་ཉྩ ཝི་རཱ་གོ, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་རཱ་གཱ ཧོ་ནྟཱི་ཏི – ཝི་རཱ་གཱ. ས་ཧ་ཛཱ་ཏཱ་ནི ས་ཏྟ་ངྒཱ་ནི ཝི་རཱ་གཾ ག་ཙྪ་ནྟཱི་ཏི – ཝི་རཱ་གོ མ་གྒོ. ཨེ་ཏེ་ན མ་གྒེ་ན བུ་དྡྷཱ ཙ སཱ་ཝ་ཀཱ ཙ ཨ་ག་ཏཾ དི་སཾ ནི་བྦཱ་ནཾ ག་ཙྪ་ནྟཱི་ཏི – ཨ་ཊྛ་ངྒི་ཀོ མ་གྒོ. ཡཱ་ཝ་ཏཱ པུ་ཐུ་ས་མ་ཎ་བྲཱ་ཧྨ་ཎཱ་ནཾ པ་ར་པྤ་ཝཱ་དཱ་ནཾ མ་གྒཱ. ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ཨ་གྒོ ཙ སེ་ཊྛོ ཙ པཱ་མོ་ཀྑོ ཙ ཨུ་ཏྟ་མོ ཙ པ་ཝ་རོ ཙཱ་ཏི – མ་གྒཱ་ནཾ ཨ་ཊྛ་ངྒི་ཀོ སེ་ཊྛོ.
ཨ་ནཱ་གཱ་མི་མ་གྒ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི…པེ… ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི ཨ་ནུ་ས་ཧ་ག་ཏཱ ཀཱ་མ་རཱ་ག་ས་ཉྙོ་ཛ་ནཱ པ་ཊི་གྷ་ས་ཉྙོ་ཛ་ནཱ ཨ་ནུ་ས་ཧ་ག་ཏཱ ཀཱ་མ་རཱ་གཱ་ནུ་ས་ཡཱ པ་ཊི་གྷཱ་ནུ་ས་ཡཱ ཝི་ར་ཛྫ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་ར་ཛྫ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་ར་ཛྫ་ཏི. ཝི་རཱ་གོ ཝི་རཱ་གཱ་ར་མྨ་ཎོ…པེ… མ་གྒཱ་ནཾ ཨ་ཊྛ་ངྒི་ཀོ སེ་ཊྛོ.
ཨ་ར་ཧ་ཏྟ་མ་གྒ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི…པེ… ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི རཱུ་པ་རཱ་གཱ ཨ་རཱུ་པ་རཱ་གཱ མཱ་ནཱ ཨུ་དྡྷ་ཙྩཱ ཨ་ཝི་ཛྫཱ་ཡ མཱ་ནཱ་ནུ་ས་ཡཱ བྷ་ཝ་རཱ་གཱ་ནུ་ས་ཡཱ ཨ་ཝི་ཛྫཱ་ནུ་ས་ཡཱ ཝི་ར་ཛྫ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་ར་ཛྫ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་ར་ཛྫ་ཏི ཝི་རཱ་གོ ཝི་རཱ་གཱ་ར་མྨ་ཎོ ཝི་རཱ་ག་གོ་ཙ་རོ ཝི་རཱ་གེ ས་མུ་དཱ་ག་ཏོ ཝི་རཱ་གེ ཋི་ཏོ ཝི་རཱ་གེ པ་ཏི་ཊྛི་ཏོ.
ཝི་རཱ་གོཏི དྭེ ཝི་རཱ་གཱ – ནི་བྦཱ་ན་ཉྩ ཝི་རཱ་གོ, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་རཱ་གཱ ཧོ་ནྟཱི་ཏི – ཝི་རཱ་གཱ. ས་ཧ་ཛཱ་ཏཱ་ནི ས་ཏྟ་ངྒཱ་ནི ཝི་རཱ་གཾ ག་ཙྪ་ནྟཱི་ཏི – ཝི་རཱ་གོ མ་གྒོ. ཨེ་ཏེ་ན མ་གྒེ་ན བུ་དྡྷཱ ཙ སཱ་ཝ་ཀཱ ཙ ཨ་ག་ཏཾ དི་སཾ ནི་བྦཱ་ནཾ ག་ཙྪ་ནྟཱི་ཏི – ཨ་ཊྛ་ངྒི་ཀོ མ་གྒོ. ཡཱ་ཝ་ཏཱ པུ་ཐུ་ས་མ་ཎ་བྲཱ་ཧྨ་ཎཱ་ནཾ པ་ར་པྤ་ཝཱ་དཱ་ནཾ མ་གྒཱ. ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ ཨ་གྒོ ཙ སེ་ཊྛོ ཙ པཱ་མོ་ཀྑོ ཙ ཨུ་ཏྟ་མོ ཙ པ་ཝ་རོ ཙཱ་ཏི – མ་གྒཱ་ནཾ ཨ་ཊྛ་ངྒི་ཀོ སེ་ཊྛོ.
ད་སྶ་ན་ཝི་རཱ་གོ ས་མྨཱ་དི་ཊྛི. ཨ་བྷི་ནི་རོ་པ་ན་ཝི་རཱ་གོ ས་མྨཱ་ས་ངྐ་པྤོ. པ་རི་གྒ་ཧ་ཝི་རཱ་གོ ས་མྨཱ་ཝཱ་ཙཱ. ས་མུ་ཊྛཱ་ན་ཝི་རཱ་གོ ས་མྨཱ་ཀ་མྨ་ནྟོ. ཝོ་དཱ་ན་ཝི་རཱ་གོ ས་མྨཱ་ཨཱ་ཛཱི་ཝོ. པ་གྒ་ཧ་ཝི་རཱ་གོ ས་མྨཱ་ཝཱ་ཡཱ་མོ. ཨུ་པ་ཊྛཱ་ན་ཝི་རཱ་གོ ས་མྨཱ་ས་ཏི. ཨ་ཝི་ཀྑེ་པ་ཝི་རཱ་གོ ས་མྨཱ་ས་མཱ་དྷི. ཨུ་པ་ཊྛཱ་ན་ཝི་རཱ་གོ ས་ཏི་ས་མྦོ་ཛ྄ཛྷ་ངྒོ. པ་ཝི་ཙ་ཡ་ཝི་རཱ་གོ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ. པ་གྒ་ཧ་ཝི་རཱ་གོ ཝཱི་རི་ཡ་ས་མྦོ་ཛ྄ཛྷ་ངྒོ. ཕ་ར་ཎ་ཝི་རཱ་གོ པཱི་ཏི་ས་མྦོ་ཛ྄ཛྷ་ངྒོ. ཨུ་པ་ས་མ་ཝི་རཱ་གོ པ་སྶ་དྡྷི་ས་མྦོ་ཛ྄ཛྷ་ངྒོ. ཨ་ཝི་ཀྑེ་པ་ཝི་རཱ་གོ ས་མཱ་དྷི་ས་མྦོ་ཛ྄ཛྷ་ངྒོ. པ་ཊི་ས་ངྑཱ་ན་ཝི་རཱ་གོ ཨུ་པེ་ཀྑཱ་ས་མྦོ་ཛ྄ཛྷ་ངྒོ. ཨ་སྶ་དྡྷི་ཡེ ཨ་ཀ་མྤི་ཡ་ཝི་རཱ་གོ ས་དྡྷཱ་བ་ལཾ. ཀོ་ས་ཛྫེ ཨ་ཀ་མྤི་ཡ་ཝི་རཱ་གོ ཝཱི་རི་ཡ་བ་ལཾ. པ་མཱ་དེ ཨ་ཀ་མྤི་ཡ་ཝི་རཱ་གོ ས་ཏི་བ་ལཾ. ཨུ་དྡྷ་ཙྩེ ཨ་ཀ་མྤི་ཡ་ཝི་རཱ་གོ ས་མཱ་དྷི་བ་ལཾ. ཨ་ཝི་ཛྫཱ་ཡ ཨ་ཀ་མྤི་ཡ་ཝི་རཱ་གོ པ་ཉྙཱ་བ་ལཾ. ཨ་དྷི་མོ་ཀྑ་ཝི་རཱ་གོ ས་དྡྷི་ནྡྲི་ཡཾ. པ་གྒ་ཧ་ཝི་རཱ་གོ ཝཱི་རི་ཡི་ནྡྲི་ཡཾ. ཨུ་པ་ཊྛཱ་ན་ཝི་རཱ་གོ ས་ཏི་ནྡྲི་ཡཾ. ཨ་ཝི་ཀྑེ་པ་ཝི་རཱ་གོ ས་མཱ་དྷི་ནྡྲི་ཡཾ. ད་སྶ་ན་ཝི་རཱ་གོ པ་ཉྙི་ནྡྲི་ཡཾ. ཨཱ་དྷི་པ་ཏེ་ཡྻ་ཊྛེ་ན ཨི་ནྡྲི་ཡཱ་ནི ཝི་རཱ་གོ. ཨ་ཀ་མྤི་ཡ་ཊྛེ་ན བ་ལཾ ཝི་རཱ་གོ. ནི་ཡྻཱ་ན་ཊྛེ་ན བོ་ཛ྄ཛྷ་ངྒཱ ཝི་རཱ་གོ. ཧེ་ཏུ་ཊྛེ་ན མ་གྒོ ཝི་རཱ་གོ. ཨུ་པ་ཊྛཱ་ན་ཊྛེ་ན ས་ཏི་པ་ཊྛཱ་ནཱ ཝི་རཱ་གོ. པ་ད་ཧ་ན་ཊྛེ་ན ས་མྨ་པྤ་དྷཱ་ནཱ ཝི་རཱ་གོ. ཨི་ཛ྄ཛྷ་ན་ཊྛེ་ན ཨི་དྡྷི་པཱ་དཱ ཝི་རཱ་གོ. ཏ་ཐ་ཊྛེ་ན ས་ཙྩཱ ཝི་རཱ་གོ. ཨ་ཝི་ཀྑེ་པ་ཊྛེ་ན ས་མ་ཐོ ཝི་རཱ་གོ. ཨ་ནུ་པ་སྶ་ན་ཊྛེ་ན ཝི་པ་སྶ་ནཱ ཝི་རཱ་གོ. ཨེ་ཀ་ར་ས་ཊྛེ་ན ས་མ་ཐ་ཝི་པ་སྶ་ནཱ ཝི་རཱ་གོ. ཨ་ན་ཏི་ཝ་ཏྟ་ན་ཊྛེ་ན ཡུ་ག་ན་དྡྷཾ ཝི་རཱ་གོ. སཾ་ཝ་ར་ཊྛེ་ན སཱི་ལ་ཝི་སུ་དྡྷི ཝི་རཱ་གོ. ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི ཝི་རཱ་གོ. ད་སྶ་ན་ཊྛེ་ན དི་ཊྛི་ཝི་སུ་དྡྷི ཝི་རཱ་གོ. ཝི་མུ་ཏྟ་ཊྛེ་ན ཝི་མོ་ཀྑོ ཝི་རཱ་གོ. པ་ཊི་ཝེ་དྷ་ཊྛེ་ན ཝི་ཛྫཱ ཝི་རཱ་གོ. པ་རི་ཙྩཱ་ག་ཊྛེ་ན ཝི་མུ་ཏྟི ཝི་རཱ་གོ. ས་མུ་ཙྪེ་ད་ཊྛེ་ན ཁ་ཡེ ཉཱ་ཎཾ ཝི་རཱ་གོ. ཚ་ནྡོ མཱུ་ལ་ཊྛེ་ན ཝི་རཱ་གོ. མ་ན་སི་ཀཱ་རོ ས་མུ་ཊྛཱ་ན་ཊྛེ་ན ཝི་རཱ་གོ. ཕ་སྶོ ས་མོ་དྷཱ་ན་ཊྛེ་ན ཝི་རཱ་གོ. ཝེ་ད་ནཱ ས་མོ་ས་ར་ཎ་ཊྛེ་ན ཝི་རཱ་གོ. ས་མཱ་དྷི པ་མུ་ཁ་ཊྛེ་ན ཝི་རཱ་གོ. ས་ཏི ཨཱ་དྷི་པ་ཏེ་ཡྻ་ཊྛེ་ན ཝི་རཱ་གོ. པ་ཉྙཱ ཏ་ཏུ་ཏྟ་ར་ཊྛེ་ན ཝི་རཱ་གོ. ཝི་མུ་ཏྟི སཱ་ར་ཊྛེ་ན ཝི་རཱ་གོ. ཨ་མ་ཏོ་ག་དྷཾ ནི་བྦཱ་ནཾ པ་རི་ཡོ་སཱ་ན་ཊྛེ་ན མ་གྒོ.
ད་སྶ་ན་མ་གྒོ ས་མྨཱ་དི་ཊྛི, ཨ་བྷི་ནི་རོ་པ་ན་མ་གྒོ ས་མྨཱ་ས་ངྐ་པྤོ…པེ… ཨ་མ་ཏོ་ག་དྷཾ ནི་བྦཱ་ནཾ པ་རི་ཡོ་སཱ་ན་ཊྛེ་ན མ་གྒོ. ཨེ་ཝཾ ཝི་རཱ་གོ མ་གྒོ.
༢༩. ཀ་ཐཾ ཝི་མུ་ཏྟི ཕ་ལཾ? སོ་ཏཱ་པ་ཏྟི་ཕ་ལ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི མི་ཙྪཱ་དི་ཊྛི་ཡཱ ཝི་མུ་ཏྟཱ ཧོ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་མུ་ཏྟཱ ཧོ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་མུ་ཏྟཱ ཧོ་ཏི, ཝི་མུ་ཏྟི ཝི་མུ་ཏྟཱ་ར་མྨ་ཎཱ ཝི་མུ་ཏྟི་གོ་ཙ་རཱ ཝི་མུ་ཏྟི་ཡཱ ས་མུ་དཱ་ག་ཏཱ ཝི་མུ་ཏྟི་ཡཱ ཋི་ཏཱ ཝི་མུ་ཏྟི་ཡཱ པ་ཏི་ཊྛི་ཏཱ. ཝི་མུ་ཏྟཱིཏི དྭེ མུ་ཏྟི་ཡོ – ནི་བྦཱ་ན་ཉྩ ཝི་མུ་ཏྟི, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཙ ཝི་མུ་ཏྟཱ ཧོ་ནྟཱི་ཏི – ཝི་མུ་ཏྟི ཕ་ལཾ.
ཨ་བྷི་ནི་རོ་པ་ན་ཊྛེ་ན ས་མྨཱ་ས་ངྐ་པྤོ མི་ཙྪཱ་ས་ངྐ་པྤཱ ཝི་མུ་ཏྟོ ཧོ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་མུ་ཏྟོ ཧོ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་མུ་ཏྟོ ཧོ་ཏི, ཝི་མུ་ཏྟི ཝི་མུ་ཏྟཱ་ར་མྨ་ཎཱ ཝི་མུ་ཏྟི་གོ་ཙ་རཱ ཝི་མུ་ཏྟི་ཡཱ ས་མུ་དཱ་ག་ཏཱ ཝི་མུ་ཏྟི་ཡཱ ཋི་ཏཱ ཝི་མུ་ཏྟི་ཡཱ པ་ཏི་ཊྛི་ཏཱ. ཝི་མུ་ཏྟཱིཏི དྭེ ཝི་མུ་ཏྟི་ཡོ – ནི་བྦཱ་ན་ཉྩ ཝི་མུ་ཏྟི, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་མུ་ཏྟཱ ཧོ་ནྟཱི་ཏི – ཝི་མུ་ཏྟི ཕ་ལཾ.
པ་རི་གྒ་ཧ་ཊྛེ་ན ས་མྨཱ་ཝཱ་ཙཱ མི་ཙྪཱ་ཝཱ་ཙཱ་ཡ ཝི་མུ་ཏྟཱ ཧོ་ཏི, ས་མུ་ཊྛཱ་ན་ཊྛེ་ན ས་མྨཱ་ཀ་མྨ་ནྟོ མི་ཙྪཱ་ཀ་མྨ་ནྟཱ ཝི་མུ་ཏྟོ ཧོ་ཏི, ཝོ་དཱ་ན་ཊྛེ་ན ས་མྨཱ་ཨཱ་ཛཱི་ཝོ མི་ཙྪཱ་ཨཱ་ཛཱི་ཝཱ ཝི་མུ་ཏྟོ ཧོ་ཏི, པ་གྒ་ཧ་ཊྛེ་ན ས་མྨཱ་ཝཱ་ཡཱ་མོ མི་ཙྪཱ་ཝཱ་ཡཱ་མཱ ཝི་མུ་ཏྟོ ཧོ་ཏི, ཨུ་པ་ཊྛཱ་ན་ཊྛེ་ན ས་མྨཱ་ས་ཏི མི་ཙྪཱ་ས་ཏི་ཡཱ ཝི་མུ་ཏྟཱ ཧོ་ཏི, ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི མི་ཙྪཱ་ས་མཱ་དྷི་ཏོ ཝི་མུ་ཏྟོ ཧོ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་མུ་ཏྟོ ཧོ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་མུ་ཏྟོ ཧོ་ཏི, ཝི་མུ་ཏྟི ཝི་མུ་ཏྟཱ་ར་མྨ་ཎཱ ཝི་མུ་ཏྟི་གོ་ཙ་རཱ ཝི་མུ་ཏྟི་ཡཱ ས་མུ་དཱ་ག་ཏཱ ཝི་མུ་ཏྟི་ཡཱ ཋི་ཏཱ ཝི་མུ་ཏྟི་ཡཱ པ་ཏི་ཊྛི་ཏཱ. ཝི་མུ་ཏྟཱི་ཏི. དྭེ ཝི་མུ་ཏྟི་ཡོ – ནི་བྦཱ་ན་ཉྩ ཝི་མུ་ཏྟི, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་མུ་ཏྟཱ ཧོ་ནྟཱི་ཏི – ཝི་མུ་ཏྟི ཕ་ལཾ.
ས་ཀ་དཱ་གཱ་མི་ཕ་ལ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི…པེ… ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི ཨོ་ལཱ༹་རི་ཀཱ ཀཱ་མ་རཱ་ག་ས་ཉྙོ་ཛ་ནཱ པ་ཊི་གྷ་ས་ཉྙོ་ཛ་ནཱ ཨོ་ལཱ༹་རི་ཀཱ ཀཱ་མ་རཱ་གཱ་ནུ་ས་ཡཱ པ་ཊི་གྷཱ་ནུ་ས་ཡཱ ཝི་མུ་ཏྟོ ཧོ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་མུ་ཏྟོ ཧོ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་མུ་ཏྟོ ཧོ་ཏི, ཝི་མུ་ཏྟི ཝི་མུ་ཏྟཱ་ར་མྨ་ཎཱ ཝི་མུ་ཏྟི་གོ་ཙ་རཱ ཝི་མུ་ཏྟི་ཡཱ ས་མུ་དཱ་ག་ཏཱ ཝི་མུ་ཏྟི་ཡཱ ཋི་ཏཱ ཝི་མུ་ཏྟི་ཡཱ པ་ཏི་ཊྛི་ཏཱ. ཝི་མུ་ཏྟཱིཏི དྭེ ཝི་མུ་ཏྟི་ཡོ – ནི་བྦཱ་ན་ཉྩ ཝི་མུ་ཏྟི, ཡེ ཙ ནི་བྦཱ་ནཱ་ར་མྨ་ཎ་ཏཱ་ཛཱ་ཏཱ དྷ་མྨཱ ས་བྦེ ཝི་མུ་ཏྟཱ ཧོ་ནྟཱི་ཏི – ཝི་མུ་ཏྟི ཕ་ལཾ.
ཨ་ནཱ་གཱ་མི་ཕ་ལ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི…པེ… ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི ཨ་ནུ་ས་ཧ་ག་ཏཱ ཀཱ་མ་རཱ་ག་ས་ཉྙོ་ཛ་ནཱ པ་ཊི་གྷ་ས་ཉྙོ་ཛ་ནཱ ཨ་ནུ་ས་ཧ་ག་ཏཱ ཀཱ་མ་རཱ་གཱ་ནུ་ས་ཡཱ པ་ཊི་གྷཱ་ནུ་ས་ཡཱ ཝི་མུ་ཏྟོ ཧོ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་མུ་ཏྟོ ཧོ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་མུ་ཏྟོ ཧོ་ཏི, ཝི་མུ་ཏྟི ཝི་མུ་ཏྟཱ་ར་མྨ་ཎཱ ཝི་མུ་ཏྟི་གོ་ཙ་རཱ ཝི་མུ་ཏྟི་ཡཱ ས་མུ་དཱ་ག་ཏཱ ཝི་མུ་ཏྟི་ཡཱ ཋི་ཏཱ ཝི་མུ་ཏྟི་ཡཱ པ་ཏི་ཊྛི་ཏཱ…པེ….
ཨ་ར་ཧ་ཏྟ་ཕ་ལ་ཀྑ་ཎེ ད་སྶ་ན་ཊྛེ་ན ས་མྨཱ་དི་ཊྛི…པེ… ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷི རཱུ་པ་རཱ་གཱ ཨ་རཱུ་པ་རཱ་གཱ མཱ་ནཱ ཨུ་དྡྷ་ཙྩཱ ཨ་ཝི་ཛྫཱ་ཡ མཱ་ནཱ་ནུ་ས་ཡཱ བྷ་ཝ་རཱ་གཱ་ནུ་ས་ཡཱ ཨ་ཝི་ཛྫཱ་ནུ་ས་ཡཱ ཝི་མུ་ཏྟོ ཧོ་ཏི, ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝི་མུ་ཏྟོ ཧོ་ཏི, བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝི་མུ་ཏྟོ ཧོ་ཏི, ཝི་མུ་ཏྟི ཝི་མུ་ཏྟཱ་ར་མྨ་ཎཱ ཝི་མུ་ཏྟི་གོ་ཙ་རཱ ཝི་མུ་ཏྟི་ཡཱ ས་མུ་དཱ་ག་ཏཱ ཝི་མུ་ཏྟི་ཡཱ ཋི་ཏཱ ཝི་མུ་ཏྟི་ཡཱ པ་ཏི་ཊྛི་ཏཱ. ཝི་མུ་ཏྟཱིཏི དྭེ ཝི་མུ་ཏྟི་ཡོ – ནི་བྦཱ་ན་ཉྩ ཝི་མུ་ཏྟི, ཡེ ཙ ནི་བྦཱ་ནཱ་ར་མྨ་ཎ་ཏཱ ཛཱ་ཏཱ དྷ་མྨཱ ས་བྦེ ཝི་མུ་ཏྟཱ ཧོ་ནྟཱི་ཏི – ཝི་མུ་ཏྟི ཕ་ལཾ.
ད་སྶ་ན་ཝི་མུ་ཏྟི ས་མྨཱ་དི་ཊྛི…པེ… ཨ་ཝི་ཀྑེ་པ་ཝི་མུ་ཏྟི ས་མྨཱ་ས་མཱ་དྷི, ཨུ་པ་ཊྛཱ་ན་ཝི་མུ་ཏྟི ས་ཏི་ས་མྦོ་ཛ྄ཛྷ་ངྒོ, པ་ཊི་ས་ངྑཱ་ན་ཝི་མུ་ཏྟི ཨུ་པེ་ཀྑཱ་ས་མྦོ་ཛ྄ཛྷ་ངྒོ. ཨ་སྶ་དྡྷི་ཡེ ཨ་ཀ་མྤི་ཡ་ཝི་མུ་ཏྟི ས་དྡྷཱ་བ་ལཾ…པེ… ཨ་ཝི་ཛྫཱ་ཡ ཨ་ཀ་མྤི་ཡ་ཝི་མུ་ཏྟི པ་ཉྙཱ་བ་ལཾ. ཨ་དྷི་མོ་ཀྑ་ཝི་མུ་ཏྟི ས་དྡྷི་ནྡྲི་ཡཾ…པེ… ད་སྶ་ན་ཝི་མུ་ཏྟི པ་ཉྙི་ནྡྲི་ཡཾ.
ཨཱ་དྷི་པ་ཏེ་ཡྻ་ཊྛེ་ན ཨི་ནྡྲི་ཡཱ ཝི་མུ་ཏྟི. ཨ་ཀ་མྤི་ཡ་ཊྛེ་ན བ་ལཱ ཝི་མུ་ཏྟི, ནི་ཡྻཱ་ན་ཊྛེ་ན བོ་ཛ྄ཛྷ་ངྒཱ ཝི་མུ་ཏྟི, ཧེ་ཏུ་ཊྛེ་ན མ་གྒོ ཝི་མུ་ཏྟི, ཨུ་པ་ཊྛཱ་ན་ཊྛེ་ན ས་ཏི་པ་ཊྛཱ་ནཱ ཝི་མུ་ཏྟི, པ་ད་ཧ་ན་ཊྛེ་ན ས་མྨ་པྤ་དྷཱ་ནཱ ཝི་མུ་ཏྟི, ཨི་ཛ྄ཛྷ་ན་ཊྛེ་ན ཨི་དྡྷི་པཱ་དཱ ཝི་མུ་ཏྟི, ཏ་ཐ་ཊྛེ་ན ས་ཙྩཱ ཝི་མུ་ཏྟི, ཨ་ཝི་ཀྑེ་པ་ཊྛེ་ན ས་མ་ཐོ ཝི་མུ་ཏྟི, ཨ་ནུ་པ་སྶ་ན་ཊྛེ་ན ཝི་པ་སྶ་ནཱ ཝི་མུ་ཏྟི, ཨེ་ཀ་ར་ས་ཊྛེ་ན ས་མ་ཐ་ཝི་པ་སྶ་ནཱ ཝི་མུ་ཏྟི, ཨ་ན་ཏི་ཝ་ཏྟ་ན་ཊྛེ་ན ཡུ་ག་ན་དྡྷཾ ཝི་མུ་ཏྟི, སཾ་ཝ་ར་ཊྛེ་ན སཱི་ལ་ཝི་སུ་དྡྷི ཝི་མུ་ཏྟི, ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི ཝི་མུ་ཏྟི, ད་སྶ་ན་ཊྛེ་ན དི་ཊྛི་ཝི་སུ་དྡྷི ཝི་མུ་ཏྟི, ཝི་མུ་ཏྟ་ཊྛེ་ན ཝི་མོ་ཀྑོ ཝི་མུ་ཏྟི, པ་ཊི་ཝེ་དྷ་ཊྛེ་ན ཝི་ཛྫཱ ཝི་མུ་ཏྟི, པ་རི་ཙྩཱ་ག་ཊྛེ་ན ཝི་མུ་ཏྟི ཝི་མུ་ཏྟི, པ་ཊི་པྤ་སྶ་དྡྷི་ཡ་ཊྛེ་ན ཨ་ནུ་པྤཱ་དེ ཉཱ་ཎཾ ཝི་མུ་ཏྟི, ཚ་ནྡོ མཱུ་ལ་ཊྛེ་ན ཝི་མུ་ཏྟི, མ་ན་སི་ཀཱ་རོ ས་མུ་ཊྛཱ་ན་ཊྛེ་ན ཝི་མུ་ཏྟི, ཕ་སྶོ ས་མོ་དྷཱ་ན་ཊྛེ་ན ཝི་མུ་ཏྟི, ཝེ་ད་ནཱ ས་མོ་ས་ར་ཎ་ཊྛེ་ན ཝི་མུ་ཏྟི, ས་མཱ་དྷི པ་མུ་ཁ་ཊྛེ་ན ཝི་མུ་ཏྟི, ས་ཏི ཨཱ་དྷི་པ་ཏེ་ཡྻ་ཊྛེ་ན ཝི་མུ་ཏྟི, པ་ཉྙཱ ཏ་ཏུ་ཏྟ་ར་ཊྛེ་ན ཝི་མུ་ཏྟི, ཝི་མུ་ཏྟི སཱ་ར་ཊྛེ་ན ཝི་མུ་ཏྟི, ཨ་མ་ཏོ་ག་དྷཾ ནི་བྦཱ་ནཾ པ་རི་ཡོ་སཱ་ན་ཊྛེ་ན ཝི་མུ་ཏྟི. ཨེ་ཝཾ ཝི་མུ་ཏྟི ཕ་ལཾ. ཨེ་ཝཾ ཝི་རཱ་གོ མ་གྒོ, ཝི་མུ་ཏྟི ཕ་ལ་ནྟི.
ཝི་རཱ་ག་ཀ་ཐཱ ནི་ཊྛི་ཏཱ.