༥. ས་སྶ་ཏ་དི་ཊྛི་ནི་དྡེ་སོ

༡༣༨. ས་ཀྐཱ་ཡ་ཝ་ཏྠུ་ཀཱ་ཡ ས་སྶ་ཏ་དི་ཊྛི་ཡཱ ཀ་ཏ་མེ་ཧི པ་ནྣ་ར་ས་ཧི ཨཱ་ཀཱ་རེ་ཧི ཨ་བྷི་ནི་ཝེ་སོ ཧོ་ཏི? ཨི་དྷ ཨ་སྶུ་ཏ་ཝཱ པུ་ཐུ་ཛྫ་ནོ ཨ་རི་ཡཱ་ནཾ ཨ་ད་སྶཱ་ཝཱི ཨ་རི་ཡ་དྷ་མྨ་སྶ ཨ་ཀོ་ཝི་དོ ཨ་རི་ཡ་དྷ་མྨེ ཨ་ཝི་ནཱི་ཏོ ས་པྤུ་རི་སཱ་ནཾ ཨ་ད་སྶཱ་ཝཱི ས་པྤུ་རི་ས་དྷ་མྨ་སྶ ཨ་ཀོ་ཝི་དོ ས་པྤུ་རི་ས་དྷ་མྨེ ཨ་ཝི་ནཱི་ཏོ རཱུ་པ་ཝ་ནྟཾ ཝཱ ཨ་ཏྟཱ་ནཾ ཨ་ཏྟ་ནི ཝཱ རཱུ་པཾ རཱུ་པ་སྨིཾ ཝཱ ཨ་ཏྟཱ་ནཾ. ཝེ་ད་ནཱ་ཝ་ནྟཾ ཝཱ ཨ་ཏྟཱ་ནཾ…པེ… ས་ཉྙཱ་ཝ་ནྟཾ ཝཱ ཨ་ཏྟཱ་ནཾ… ས་ངྑཱ་ར་ཝ་ནྟཾ ཝཱ ཨ་ཏྟཱ་ནཾ… ཝི་ཉྙཱ་ཎ་ཝ་ནྟཾ ཝཱ ཨ་ཏྟཱ་ནཾ ཨ་ཏྟ་ནི ཝཱ ཝི་ཉྙཱ་ཎཾ ཝི་ཉྙཱ་ཎ་སྨིཾ ཝཱ ཨ་ཏྟཱ་ནཾ.

ཀ་ཐཾ རཱུ་པ་ཝ་ནྟཾ ཨ་ཏྟཱ་ནཾ ས་མ་ནུ་པ་སྶ་ཏི? ཨི་དྷེ་ཀ་ཙྩོ ཝེ་ད་ནཾ… ས་ཉྙཾ… ས་ངྑཱ་རེ… ཝི་ཉྙཱ་ཎཾ ཨ་ཏྟ་ཏོ ས་མ་ནུ་པ་སྶ་ཏི. ཏ་སྶ ཨེ་ཝཾ ཧོ་ཏི – ‘‘ཨ་ཡཾ ཁོ མེ ཨ་ཏྟཱ. སོ ཁོ པ་ན མེ ཨ་ཡཾ ཨ་ཏྟཱ ཨི་མི་ནཱ རཱུ་པེ་ན རཱུ་པ་ཝཱ’’ཏི. རཱུ་པ་ཝ་ནྟཾ ཨ་ཏྟཱ་ནཾ ས་མ་ནུ་པ་སྶ་ཏི. སེ་ཡྻ་ཐཱ་པི རུ་ཀྑོ ཚཱ་ཡཱ་ས་མྤ་ནྣོ ཨ་སྶ. ཏ་མེ་ནཾ པུ་རི་སོ ཨེ་ཝཾ ཝ་དེ་ཡྻ – ‘‘ཨ་ཡཾ རུ་ཀྑོ, ཨ་ཡཾ ཚཱ་ཡཱ; ཨ་ཉྙོ རུ་ཀྑོ, ཨ་ཉྙཱ ཚཱ་ཡཱ. སོ ཁོ པ་ནཱ་ཡཾ རུ་ཀྑོ ཨི་མཱ་ཡ ཚཱ་ཡཱ་ཡ ཚཱ་ཡཱ་ཝཱ’’ཏི. ཚཱ་ཡཱ་ཝ་ནྟཾ རུ་ཀྑཾ ས་མ་ནུ་པ་སྶ་ཏི. ཨེ་ཝ་མེ་ཝཾ ཨི་དྷེ་ཀ་ཙྩོ ཝེ་ད་ནཾ…པེ… ཨ་ཡཾ པ་ཋ་མཱ ས་ཀྐཱ་ཡ་ཝ་ཏྠུ་ཀཱ ས་སྶ་ཏ་དི་ཊྛི. ས་སྶ་ཏ་དི་ཊྛི མི་ཙྪཱ་དི་ཊྛི…པེ… ཨི་མཱ་ནི ས་ཉྙོ་ཛ་ནཱ་ནི, ན ཙ དི་ཊྛི་ཡོ. ཨེ་ཝཾ རཱུ་པ་ཝ་ནྟཾ ཨ་ཏྟཱ་ནཾ ས་མ་ནུ་པ་སྶ་ཏི…པེ… ས་ཀྐཱ་ཡ་ཝ་ཏྠུ་ཀཱ་ཡ ས་སྶ་ཏ་དི་ཊྛི་ཡཱ ཨི་མེ་ཧི པ་ནྣ་ར་ས་ཧི ཨཱ་ཀཱ་རེ་ཧི ཨ་བྷི་ནི་ཝེ་སོ ཧོ་ཏི.

ས་སྶ་ཏ་དི་ཊྛི་ནི་དྡེ་སོ པ་ཉྩ་མོ.