༥༡. སོ་ཏ་དྷཱ་ཏུ་ཝི་སུ་དྡྷི་ཉཱ་ཎ་ནི་དྡེ་སོ

༡༠༣. ཀ་ཐཾ ཝི་ཏ་ཀྐ་ཝི་པྥཱ་ར་ཝ་སེ་ན ནཱ་ན་ཏྟེ་ཀ་ཏྟ་ས་དྡ་ནི་མི་ཏྟཱ་ནཾ པ་རི་ཡོ་གཱ་ཧ་ཎེ པ་ཉྙཱ སོ་ཏ་དྷཱ་ཏུ་ཝི་སུ་དྡྷི་ཉཱ་ཎཾ? ཨི་དྷ བྷི་ཀྑུ ཚ་ནྡ་ས་མཱ་དྷི…པེ… ཝཱི་རི་ཡ་ས་མཱ་དྷི… ཙི་ཏྟ་ས་མཱ་དྷི… ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི. སོ ཨི་མེ་སུ ཙ་ཏཱུ་སུ ཨི་དྡྷི་པཱ་དེ་སུ ཙི་ཏྟཾ པ་རི་བྷཱ་ཝེ་ཏི པ་རི་ད་མེ་ཏི, མུ་དུཾ ཀ་རོ་ཏི ཀ་མྨ་ནི་ཡཾ. སོ ཨི་མེ་སུ ཙ་ཏཱུ་སུ ཨི་དྡྷི་པཱ་དེ་སུ ཙི་ཏྟཾ པ་རི་བྷཱ་ཝེ་ཏྭཱ པ་རི་ད་མེ་ཏྭཱ, མུ་དུཾ ཀ་རི་ཏྭཱ ཀ་མྨ་ནི་ཡཾ དཱུ་རེ་པི ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ས་ནྟི་ཀེ་པི ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ཨོ་ལཱ༹་རི་ཀཱ་ན་མྤི ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, སུ་ཁུ་མཱ་ན་མྤི ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ས་ཎྷ་ས་ཎྷཱ་ན་མྤི ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, པུ་ར་ཏྠི་མཱ་ཡ་པི དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, པ་ཙྪི་མཱ་ཡ་པི དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ཨུ་ཏྟ་རཱ་ཡ་པི དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ད་ཀྑི་ཎཱ་ཡ་པི དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, པུ་ར་ཏྠི་མཱ་ཡ་པི ཨ་ནུ་དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, པ་ཙྪི་མཱ་ཡ་པི ཨ་ནུ་དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ཨུ་ཏྟ་རཱ་ཡ་པི ཨ་ནུ་དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ད་ཀྑི་ཎཱ་ཡ་པི ཨ་ནུ་དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ཧེ་ཊྛི་མཱ་ཡ་པི དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི, ཨུ་པ་རི་མཱ་ཡ་པི དི་སཱ་ཡ ས་དྡཱ་ནཾ ས་དྡ་ནི་མི་ཏྟཾ མ་ན་སི ཀ་རོ་ཏི. སོ ཏ་ཐཱ་བྷཱ་ཝི་ཏེ་ན ཙི་ཏྟེ་ན པ་རི་སུ་དྡྷེ་ན པ་རི་ཡོ་དཱ་ཏེ་ན སོ་ཏ་དྷཱ་ཏུ་ཝི་སུ་དྡྷི་ཉཱ་ཎཱ་ཡ ཙི་ཏྟཾ ཨ་བྷི་ནཱི་ཧ་ར་ཏི ཨ་བྷི་ནི་ནྣཱ་མེ་ཏི. སོ དི་བྦཱ་ཡ སོ་ཏ་དྷཱ་ཏུ་ཡཱ ཝི་སུ་དྡྷཱ་ཡ ཨ་ཏི་ཀྐ་ནྟ་མཱ་ནུ་སི་ཀཱ་ཡ ཨུ་བྷོ ས་དྡེ སུ་ཎཱ་ཏི – དི་བྦེ ཙ མཱ་ནུ་སེ ཙ ཡེ དཱུ་རེ ས་ནྟི་ཀེ ཙ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཝི་ཏ་ཀྐ་ཝི་པྥཱ་ར་ཝ་སེ་ན ནཱ་ན་ཏྟེ་ཀ་ཏྟ་ས་དྡ་ནི་མི་ཏྟཱ་ནཾ པ་རི་ཡོ་གཱ་ཧ་ཎེ པ་ཉྙཱ སོ་ཏ་དྷཱ་ཏུ་ཝི་སུ་དྡྷི་ཉཱ་ཎཾ’’.

སོ་ཏ་དྷཱ་ཏུ་ཝི་སུ་དྡྷི་ཉཱ་ཎ་ནི་དྡེ་སོ ཨེ་ཀ་པ་ཉྙཱ་ས་མོ.