༥༢. ཙེ་ཏོ་པ་རི་ཡ་ཉཱ་ཎ་ནི་དྡེ་སོ

༡༠༤. ཀ་ཐཾ ཏི་ཎྞཾ ཙི་ཏྟཱ་ནཾ ཝི་པྥཱ་ར་ཏྟཱ ཨི་ནྡྲི་ཡཱ་ནཾ པ་སཱ་ད་ཝ་སེ་ན ནཱ་ན་ཏྟེ་ཀ་ཏྟ་ཝི་ཉྙཱ་ཎ་ཙ་རི་ཡཱ་པ་རི་ཡོ་གཱ་ཧ་ཎེ པ་ཉྙཱ ཙེ་ཏོ་པ་རི་ཡ་ཉཱ་ཎཾ? ཨི་དྷ བྷི་ཀྑུ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི. སོ ཨི་མེ་སུ ཙ་ཏཱུ་སུ ཨི་དྡྷི་པཱ་དེ་སུ ཙི་ཏྟཾ པ་རི་བྷཱ་ཝེ་ཏི པ་རི་ད་མེ་ཏི, མུ་དུཾ ཀ་རོ་ཏི ཀ་མྨ་ནི་ཡཾ. སོ ཨི་མེ་སུ ཙ་ཏཱུ་སུ ཨི་དྡྷི་པཱ་དེ་སུ ཙི་ཏྟཾ པ་རི་བྷཱ་ཝེ་ཏྭཱ པ་རི་ད་མེ་ཏྭཱ, མུ་དུཾ ཀ་རི་ཏྭཱ ཀ་མྨ་ནི་ཡཾ ཨེ་ཝཾ པ་ཛཱ་ནཱ་ཏི – ‘‘ཨི་དཾ རཱུ་པཾ སོ་མ་ན་སྶི་ནྡྲི་ཡ་ས་མུ་ཊྛི་ཏཾ, ཨི་དཾ རཱུ་པཾ དོ་མ་ན་སྶི་ནྡྲི་ཡ་ས་མུ་ཊྛི་ཏཾ, ཨི་དཾ རཱུ་པཾ ཨུ་པེ་ཀྑི་ནྡྲི་ཡ་ས་མུ་ཊྛི་ཏ’’ནྟི. སོ ཏ་ཐཱ་བྷཱ་ཝི་ཏེ་ན ཙི་ཏྟེ་ན པ་རི་སུ་དྡྷེ་ན པ་རི་ཡོ་དཱ་ཏེ་ན ཙེ་ཏོ་པ་རི་ཡ་ཉཱ་ཎཱ་ཡ ཙི་ཏྟཾ ཨ་བྷི་ནཱི་ཧ་ར་ཏི ཨ་བྷི་ནི་ནྣཱ་མེ་ཏི. སོ པ་ར་ས་ཏྟཱ་ནཾ པ་ར་པུ་གྒ་ལཱ་ནཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་ཏི – ས་རཱ་གཾ ཝཱ ཙི་ཏྟཾ ‘‘ས་རཱ་གཾ ཙི་ཏྟ’’ནྟི པ་ཛཱ་ནཱ་ཏི, ཝཱི་ཏ་རཱ་གཾ ཝཱ ཙི་ཏྟཾ ‘‘ཝཱི་ཏ་རཱ་གཾ ཙི་ཏྟ’’ནྟི པ་ཛཱ་ནཱ་ཏི, ས་དོ་སཾ ཝཱ ཙི་ཏྟཾ…པེ… ཝཱི་ཏ་དོ་སཾ ཝཱ ཙི་ཏྟཾ… ས་མོ་ཧཾ ཝཱ ཙི་ཏྟཾ… ཝཱི་ཏ་མོ་ཧཾ ཝཱ ཙི་ཏྟཾ… སཾ་ཁི་ཏྟཾ ཝཱ ཙི་ཏྟཾ… ཝི་ཀྑི་ཏྟཾ ཝཱ ཙི་ཏྟཾ… མ་ཧ་གྒ་ཏཾ ཝཱ ཙི་ཏྟཾ… ཨ་མ་ཧ་གྒ་ཏཾ ཝཱ ཙི་ཏྟཾ… ས་ཨུ་ཏྟ་རཾ ཝཱ ཙི་ཏྟཾ… ཨ་ནུ་ཏྟ་རཾ ཝཱ ཙི་ཏྟཾ… ས་མཱ་ཧི་ཏཾ ཝཱ ཙི་ཏྟཾ… ཨ་ས་མཱ་ཧི་ཏཾ ཝཱ ཙི་ཏྟཾ… ཝི་མུ་ཏྟཾ ཝཱ ཙི་ཏྟཾ… ཨ་ཝི་མུ་ཏྟཾ ཝཱ ཙི་ཏྟཾ ‘‘ཨ་ཝི་མུ་ཏྟཾ ཙི་ཏྟ་ནྟི པ་ཛཱ་ནཱ་ཏི. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཏི་ཎྞཾ ཙི་ཏྟཱ་ནཾ ཝི་པྥཱ་ར་ཏྟཱ ཨི་ནྡྲི་ཡཱ་ནཾ པ་སཱ་ད་ཝ་སེ་ན ནཱ་ན་ཏྟེ་ཀ་ཏྟ་ཝི་ཉྙཱ་ཎ་ཙ་རི་ཡཱ་པ་རི་ཡོ་གཱ་ཧ་ཎེ པ་ཉྙཱ ཙེ་ཏོ་པ་རི་ཡ་ཉཱ་ཎཾ’’.

ཙེ་ཏོ་པ་རི་ཡ་ཉཱ་ཎ་ནི་དྡེ་སོ དྭེ་པ་ཉྙཱ་ས་མོ.