༥༠. ཨི་དྡྷི་ཝི་དྷ་ཉཱ་ཎ་ནི་དྡེ་སོ

༡༠༡. ཀ་ཐཾ ཀཱ་ཡ་མྤི ཙི་ཏྟ་མྤི ཨེ་ཀ་ཝ་ཝ་ཏྠཱ་ན་ཏཱ སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཨ་དྷི་ཊྛཱ་ན་ཝ་སེ་ན ཨི་ཛ྄ཛྷ་ན་ཊྛེ པ་ཉྙཱ ཨི་དྡྷི་ཝི་དྷེ ཉཱ་ཎཾ? ཨི་དྷ བྷི་ཀྑུ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཙི་ཏྟ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི. སོ ཨི་མེ་སུ ཙ་ཏཱུ་སུ ཨི་དྡྷི་པཱ་དེ་སུ ཙི་ཏྟཾ པ་རི་བྷཱ་ཝེ་ཏི པ་རི་ད་མེ་ཏི, མུ་དུཾ ཀ་རོ་ཏི ཀ་མྨ་ནི་ཡཾ. སོ ཨི་མེ་སུ ཙ་ཏཱུ་སུ ཨི་དྡྷི་པཱ་དེ་སུ ཙི་ཏྟཾ པ་རི་བྷཱ་ཝེ་ཏྭཱ པ་རི་ད་མེ་ཏྭཱ མུ་དུཾ ཀ་རི་ཏྭཱ ཀ་མྨ་ནི་ཡཾ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, ཀཱ་ཡ་ཝ་སེ་ན ཙི་ཏྟཾ པ་རི་ཎཱ་མེ་ཏི, ཙི་ཏྟ་ཝ་སེ་ན ཀཱ་ཡཾ པ་རི་ཎཱ་མེ་ཏི, ཀཱ་ཡ་ཝ་སེ་ན ཙི་ཏྟཾ ཨ་དྷི་ཊྛཱ་ཏི, ཙི་ཏྟ་ཝ་སེ་ན ཀཱ་ཡཾ ཨ་དྷི་ཊྛཱ་ཏི; ཀཱ་ཡ་ཝ་སེ་ན ཙི་ཏྟཾ པ་རི་ཎཱ་མེ་ཏྭཱ ཙི་ཏྟ་ཝ་སེ་ན ཀཱ་ཡཾ པ་རི་ཎཱ་མེ་ཏྭཱ ཀཱ་ཡ་ཝ་སེ་ན ཙི་ཏྟཾ ཨ་དྷི་ཊྛ་ཧི་ཏྭཱ ཙི་ཏྟ་ཝ་སེ་ན ཀཱ་ཡཾ ཨ་དྷི་ཊྛ་ཧི་ཏྭཱ སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི. སོ ཏ་ཐཱ་བྷཱ་ཝི་ཏེ་ན ཙི་ཏྟེ་ན པ་རི་སུ་དྡྷེ་ན པ་རི་ཡོ་དཱ་ཏེ་ན ཨི་དྡྷི་ཝི་དྷ་ཉཱ་ཎཱ་ཡ ཙི་ཏྟཾ ཨ་བྷི་ནཱི་ཧ་ར་ཏི ཨ་བྷི་ནི་ནྣཱ་མེ་ཏི. སོ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི.

༡༠༢. ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི, བ་ཧུ་དྷཱ་པི ཧུ་ཏྭཱ ཨེ་ཀོ ཧོ་ཏི; ཨཱ་ཝི་བྷཱ་ཝཾ ཏི་རོ་བྷཱ་ཝཾ; ཏི་རོ་ཀུ་ཊྚཾ [ཏི་རོ་ཀུ་ཌྜཾ (སྱཱ.)] ཏི་རོ་པཱ་ཀཱ་རཾ ཏི་རོ་པ་བྦ་ཏཾ ཨ་ས་ཛྫ་མཱ་ནོ ག་ཙྪ་ཏི, སེ་ཡྻ་ཐཱ་པི ཨཱ་ཀཱ་སེ; པ་ཐ་ཝི་ཡཱ་པི ཨུ་མྨུ་ཛྫ་ནི་མུ་ཛྫཾ ཀ་རོ་ཏི, སེ་ཡྻ་ཐཱ་པི ཨུ་ད་ཀེ; ཨུ་ད་ཀེ་པི ཨ་བྷི་ཛྫ་མཱ་ནེ ག་ཙྪ་ཏི, སེ་ཡྻ་ཐཱ་པི པ་ཐ་ཝི་ཡཾ; ཨཱ་ཀཱ་སེ་པི པ་ལླ་ངྐེ་ན ཀ་མ་ཏི [ཙ་ངྐ་མ་ཏི (སྱཱ.) དཱི. ནི. ༡.༢༣༨ པ་སྶི་ཏ་བྦཱ] སེ་ཡྻ་ཐཱ་པི པ་ཀྑཱི ས་ཀུ་ཎོ ཨི་མེ་པི ཙ་ནྡི་མ་སཱུ་རི་ཡེ ཨེ་ཝཾ་མ་ཧི་དྡྷི་ཀེ ཨེ་ཝཾ་མ་ཧཱ་ནུ་བྷཱ་ཝེ པཱ་ཎི་ནཱ པ་རཱ་མ་ས་ཏི [པ་རི་མ་ས་ཏི (སྱཱ.)] པ་རི་མ་ཛྫ་ཏི; ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཀཱ་ཡ་མྤི ཙི་ཏྟ་མྤི ཨེ་ཀ་ཝ་ཝ་ཏྠཱ་ན་ཏཱ སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཨ་དྷི་ཊྛཱ་ན་ཝ་སེ་ན ཨི་ཛ྄ཛྷ་ན་ཊྛེ པ་ཉྙཱ ཨི་དྡྷི་ཝི་དྷེ ཉཱ་ཎཾ’’.

ཨི་དྡྷི་ཝི་དྷ་ཉཱ་ཎ་ནི་དྡེ་སོ པ་ཉྙཱ་ས་མོ.