༤༤-༤༩. ཚ་ཝི་ཝ་ཊྚ་ཉཱ་ཎ་ནི་དྡེ་སོ
༩༥. ཀ་ཐཾ ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ? ནེ་ཀྑ་མྨཱ་དྷི་པ་ཏ་ཏྟཱ པ་ཉྙཱ ཀཱ་མ་ཙྪ་ནྡ་ཏོ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. ཨ་བྱཱ་པཱ་དཱ་དྷི་པ་ཏ་ཏྟཱ པ་ཉྙཱ བྱཱ་པཱ་ད་ཏོ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. ཨཱ་ལོ་ཀ་ས་ཉྙཱ་དྷི་པ་ཏ་ཏྟཱ པ་ཉྙཱ ཐི་ན་མི་དྡྷ་ཏོ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. ཨ་ཝི་ཀྑེ་པཱ་དྷི་པ་ཏ་ཏྟཱ པ་ཉྙཱ ཨུ་དྡྷ་ཙྩ་ཏོ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. དྷ་མྨ་ཝ་ཝ་ཏྠཱ་ནཱ་དྷི་པ་ཏ་ཏྟཱ པ་ཉྙཱ ཝི་ཙི་ཀི་ཙྪཱ་ཡ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. ཉཱ་ཎཱ་དྷི་པ་ཏ་ཏྟཱ པ་ཉྙཱ ཨ་ཝི་ཛྫཱ་ཡ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. པཱ་མོ་ཛྫཱ་དྷི་པ་ཏ་ཏྟཱ པ་ཉྙཱ ཨ་ར་ཏི་ཡཱ ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. པ་ཋ་མ་ཛ྄ཛྷཱ་ནཱ་དྷི་པ་ཏ་ཏྟཱ པ་ཉྙཱ ནཱི་ཝ་ར་ཎེ་ཧི ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ…པེ… ཨ་ར་ཧ་ཏྟ་མ་གྒཱ་དྷི་པ་ཏ་ཏྟཱ པ་ཉྙཱ ས་བྦ་ཀི་ལེ་སེ་ཧི ས་ཉྙཱ་ཡ ཝི་ཝ་ཊྚ་ཏཱི་ཏི – ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཨ་དྷི་པ་ཏ་ཏྟཱ པ་ཉྙཱ ས་ཉྙཱ་ཝི་ཝ་ཊྚེ ཉཱ་ཎཾ’’.
༩༦. ཀ་ཐཾ ནཱ་ན་ཏྟེ པ་ཉྙཱ ཙེ་ཏོ་ཝི་ཝ་ཊྚེ ཉཱ་ཎཾ? ཀཱ་མ་ཙྪ་ནྡོ ནཱ་ན་ཏྟཾ, ནེ་ཀྑ་མྨཾ ཨེ་ཀ་ཏྟཾ. ནེ་ཀྑ་མྨེ་ཀ་ཏྟཾ ཙེ་ཏ་ཡ་ཏོ ཀཱ་མ་ཙྪ་ནྡ་ཏོ ཙི་ཏྟཾ ཝི་ཝ་ཊྚ་ཏཱི་ཏི – ནཱ་ན་ཏྟེ པ་ཉྙཱ ཙེ་ཏོ་ཝི་ཝ་ཊྚེ ཉཱ་ཎཾ. བྱཱ་པཱ་དོ ནཱ་ན་ཏྟཾ, ཨ་བྱཱ་པཱ་དོ ཨེ་ཀ་ཏྟཾ. ཨ་བྱཱ་པཱ་དེ་ཀ་ཏྟཾ ཙེ་ཏ་ཡ་ཏོ བྱཱ་པཱ་ད་ཏོ ཙི་ཏྟཾ ཝི་ཝ་ཊྚ་ཏཱི་ཏི – ནཱ་ན་ཏྟེ པ་ཉྙཱ ཙེ་ཏོ་ཝི་ཝ་ཊྚེ ཉཱ་ཎཾ. ཐི་ན་མི་དྡྷཾ ནཱ་ན་ཏྟཾ, ཨཱ་ལོ་ཀ་ས་ཉྙཱ ཨེ་ཀ་ཏྟཾ. ཨཱ་ལོ་ཀ་ས་ཉྙེ་ཀ་ཏྟཾ ཙེ་ཏ་ཡ་ཏོ ཐི་ན་མི་དྡྷ་ཏོ ཙི་ཏྟཾ ཝི་ཝ་ཊྚ་ཏཱི་ཏི – ནཱ་ན་ཏྟེ པ་ཉྙཱ ཙེ་ཏོ་ཝི་ཝ་ཊྚེ ཉཱ་ཎཾ…པེ… ས་བྦ་ཀི་ལེ་སཱ ནཱ་ན་ཏྟཾ, ཨ་ར་ཧ་ཏྟ་མ་གྒོ ཨེ་ཀ་ཏྟཾ. ཨ་ར་ཧ་ཏྟ་མ་གྒེ་ཀ་ཏྟཾ ཙེ་ཏ་ཡ་ཏོ ས་བྦ་ཀི་ལེ་སེ་ཧི ཙི་ཏྟཾ ཝི་ཝ་ཊྚ་ཏཱི་ཏི – ནཱ་ན་ཏྟེ པ་ཉྙཱ ཙེ་ཏོ་ཝི་ཝ་ཊྚེ ཉཱ་ཎཾ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ནཱ་ན་ཏྟེ པ་ཉྙཱ ཙེ་ཏོ་ཝི་ཝ་ཊྚེ ཉཱ་ཎཾ’’.
༩༧. ཀ་ཐཾ ཨ་དྷི་ཊྛཱ་ནེ པ་ཉྙཱ ཙི་ཏྟ་ཝི་ཝ་ཊྚེ ཉཱ་ཎཾ? ཀཱ་མ་ཙྪ་ནྡཾ པ་ཛ་ཧ་ནྟོ ནེ་ཀྑ་མྨ་ཝ་སེ་ན ཙི་ཏྟཾ ཨ་དྷི་ཊྛཱ་ཏཱི་ཏི – ཨ་དྷི་ཊྛཱ་ནེ པ་ཉྙཱ ཙི་ཏྟ་ཝི་ཝ་ཊྚེ ཉཱ་ཎཾ. བྱཱ་པཱ་དཾ པ་ཛ་ཧ་ནྟོ ཨ་བྱཱ་པཱ་ད་ཝ་སེ་ན ཙི་ཏྟཾ ཨ་དྷི་ཊྛཱ་ཏཱི་ཏི – ཨ་དྷི་ཊྛཱ་ནེ པ་ཉྙཱ ཙི་ཏྟ་ཝི་ཝ་ཊྚེ ཉཱ་ཎཾ. ཐི་ན་མི་དྡྷཾ པ་ཛ་ཧ་ནྟོ ཨཱ་ལོ་ཀ་ས་ཉྙཱ་ཝ་སེ་ན ཙི་ཏྟཾ ཨ་དྷི་ཊྛཱ་ཏཱི་ཏི – ཨ་དྷི་ཊྛཱ་ནེ པ་ཉྙཱ ཙི་ཏྟ་ཝི་ཝ་ཊྚེ ཉཱ་ཎཾ…པེ… ས་བྦ་ཀི་ལེ་སེ པ་ཛ་ཧ་ནྟོ ཨ་ར་ཧ་ཏྟ་མ་གྒ་ཝ་སེ་ན ཙི་ཏྟཾ ཨ་དྷི་ཊྛཱ་ཏཱི་ཏི – ཨ་དྷི་ཊྛཱ་ནེ པ་ཉྙཱ ཙི་ཏྟ་ཝི་ཝ་ཊྚེ ཉཱ་ཎཾ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཨ་དྷི་ཊྛཱ་ནེ པ་ཉྙཱ ཙི་ཏྟ་ཝི་ཝ་ཊྚེ ཉཱ་ཎཾ’’.
༩༨. ཀ་ཐཾ སུ་ཉྙ་ཏེ པ་ཉྙཱ ཉཱ་ཎ་ཝི་ཝ་ཊྚེ ཉཱ་ཎཾ? ‘‘ཙ་ཀྑུ སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ’’ཏི ཡ་ཐཱ་བྷཱུ་ཏཾ ཛཱ་ན་ཏོ [པ་ཛཱ་ན་ཏོ (སྱཱ.)] པ་སྶ་ཏོ ཙ་ཀྑཱ་བྷི་ནི་ཝེ་ས་ཏོ [ཀཱ་མཱ་བྷི་ནི་ཝེ་ས་ཏོ (སྱཱ.) ཨ་ཊྛ་ཀ་ཐཱ ཨོ་ལོ་ཀེ་ཏ་བྦཱ] ཉཱ་ཎཾ ཝི་ཝ་ཊྚ་ཏཱི་ཏི – སུ་ཉྙ་ཏེ པ་ཉྙཱ ཉཱ་ཎ་ཝི་ཝ་ཊྚེ ཉཱ་ཎཾ. ‘‘སོ་ཏཾ སུ་ཉྙཾ…པེ… གྷཱ་ནཾ སུ་ཉྙཾ… ཛི་ཝ྄ཧཱ སུ་ཉྙཱ… ཀཱ་ཡོ སུ་ཉྙོ… མ་ནོ སུ་ཉྙོ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ’’ཏི ཡ་ཐཱ་བྷཱུ་ཏཾ ཛཱ་ན་ཏོ པ་སྶ་ཏོ མ་ནཱ་བྷི་ནི་ཝེ་ས་ཏོ ཉཱ་ཎཾ ཝི་ཝ་ཊྚ་ཏཱི་ཏི – སུ་ཉྙ་ཏེ པ་ཉྙཱ ཉཱ་ཎ་ཝི་ཝ་ཊྚེ ཉཱ་ཎཾ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘སུ་ཉྙ་ཏེ པ་ཉྙཱ ཉཱ་ཎ་ཝི་ཝ་ཊྚེ ཉཱ་ཎཾ’’.
༩༩. ཀ་ཐཾ ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ? ནེ་ཀྑ་མྨེ་ན ཀཱ་མ་ཙྪ་ནྡཾ ཝོ་ས་ཛྫ་ཏཱི་ཏི – ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ. ཨ་བྱཱ་པཱ་དེ་ན བྱཱ་པཱ་དཾ ཝོ་ས་ཛྫ་ཏཱི་ཏི – ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ. ཨཱ་ལོ་ཀ་ས་ཉྙཱ་ཡ ཐི་ན་མི་དྡྷཾ ཝོ་ས་ཛྫ་ཏཱི་ཏི – ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ. ཨ་ཝི་ཀྑེ་པེ་ན ཨུ་དྡྷ་ཙྩཾ ཝོ་ས་ཛྫ་ཏཱི་ཏི – ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ. དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཾ ཝོ་ས་ཛྫ་ཏཱི་ཏི – ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ…པེ… ཨ་ར་ཧ་ཏྟ་མ་གྒེ་ན ས་བྦ་ཀི་ལེ་སེ ཝོ་ས་ཛྫ་ཏཱི་ཏི – ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཝོ་ས་གྒེ པ་ཉྙཱ ཝི་མོ་ཀྑ་ཝི་ཝ་ཊྚེ ཉཱ་ཎཾ’’.
༡༠༠. ཀ་ཐཾ ཏ་ཐ་ཊྛེ པ་ཉྙཱ ས་ཙྩ་ཝི་ཝ་ཊྚེ ཉཱ་ཎཾ? དུ་ཀྑ་སྶ པཱི་ལ༹་ན་ཊྛཾ ས་ངྑ་ཏ་ཊྛཾ ས་ནྟཱ་པ་ཊྛཾ ཝི་པ་རི་ཎཱ་མ་ཊྛཾ པ་རི་ཛཱ་ན་ནྟོ ཝི་ཝ་ཊྚ་ཏཱི་ཏི – ཏ་ཐ་ཊྛེ པ་ཉྙཱ ས་ཙྩ་ཝི་ཝ་ཊྚེ ཉཱ་ཎཾ. ས་མུ་ད་ཡ་སྶ ཨཱ་ཡཱུ་ཧ་ན་ཊྛཾ ནི་དཱ་ན་ཊྛཾ ས་ཉྙོ་ག་ཊྛཾ པ་ལི་བོ་དྷ་ཊྛཾ པ་ཛ་ཧ་ནྟོ ཝི་ཝ་ཊྚ་ཏཱི་ཏི – ཏ་ཐ་ཊྛེ པ་ཉྙཱ ས་ཙྩ་ཝི་ཝ་ཊྚེ ཉཱ་ཎཾ. ནི་རོ་དྷ་སྶ ནི་སྶ་ར་ཎ་ཊྛཾ ཝི་ཝེ་ཀ་ཊྛཾ ཨ་ས་ངྑ་ཏ་ཊྛཾ ཨ་མ་ཏ་ཊྛཾ ས་ཙྪི་ཀ་རོ་ནྟོ ཝི་ཝ་ཊྚ་ཏཱི་ཏི – ཏ་ཐ་ཊྛེ པ་ཉྙཱ ས་ཙྩ་ཝི་ཝ་ཊྚེ ཉཱ་ཎཾ. མ་གྒ་སྶ ནི་ཡྻཱ་ན་ཊྛཾ ཧེ་ཏུ་ཊྛཾ ད་སྶ་ན་ཊྛཾ ཨཱ་དྷི་པ་ཏེ་ཡྻ་ཊྛཾ བྷཱ་ཝེ་ནྟོ ཝི་ཝ་ཊྚ་ཏཱི་ཏི – ཏ་ཐ་ཊྛེ པ་ཉྙཱ ས་ཙྩ་ཝི་ཝ་ཊྚེ ཉཱ་ཎཾ.
ས་ཉྙཱ་ཝི་ཝ་ཊྚོ, ཙེ་ཏོ་ཝི་ཝ་ཊྚོ, ཙི་ཏྟ་ཝི་ཝ་ཊྚོ, ཉཱ་ཎ་ཝི་ཝ་ཊྚོ, ཝི་མོ་ཀྑ་ཝི་ཝ་ཊྚོ, ས་ཙྩ་ཝི་ཝ་ཊྚོ. ས་ཉྫཱ་ན་ནྟོ ཝི་ཝ་ཊྚ་ཏཱི་ཏི – ས་ཉྙཱ་ཝི་ཝ་ཊྚོ. ཙེ་ཏ་ཡ་ནྟོ ཝི་ཝ་ཊྚ་ཏཱི་ཏི – ཙེ་ཏོ་ཝི་ཝ་ཊྚོ. ཝི་ཛཱ་ན་ནྟོ ཝི་ཝ་ཊྚ་ཏཱི་ཏི – ཙི་ཏྟ་ཝི་ཝ་ཊྚོ. ཉཱ་ཎཾ ཀ་རོ་ནྟོ ཝི་ཝ་ཊྚ་ཏཱི་ཏི – ཉཱ་ཎ་ཝི་ཝ་ཊྚོ. ཝོ་ས་ཛྫ་ནྟོ ཝི་ཝ་ཊྚ་ཏཱི་ཏི – ཝི་མོ་ཀྑ་ཝི་ཝ་ཊྚོ. ཏ་ཐ་ཊྛེ ཝི་ཝ་ཊྚ་ཏཱི་ཏི – ས་ཙྩ་ཝི་ཝ་ཊྚོ.
ཡ་ཏྠ ས་ཉྙཱ་ཝི་ཝ་ཊྚོ, ཏ་ཏྠ ཙེ་ཏོ་ཝི་ཝ་ཊྚོ. ཡ་ཏྠ ཙེ་ཏོ་ཝི་ཝ་ཊྚོ, ཏ་ཏྠ ས་ཉྙཱ་ཝི་ཝ་ཊྚོ. ཡ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཏ་ཏྠ ཙི་ཏྟ་ཝི་ཝ་ཊྚོ. ཡ་ཏྠ ཙི་ཏྟ་ཝི་ཝ་ཊྚོ, ཏ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ. ཡ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཙི་ཏྟ་ཝི་ཝ་ཊྚོ, ཏ་ཏྠ ཉཱ་ཎ་ཝི་ཝ་ཊྚོ. ཡ་ཏྠ ཉཱ་ཎ་ཝི་ཝ་ཊྚོ, ཏ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཙི་ཏྟ་ཝི་ཝ་ཊྚོ. ཡ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཙི་ཏྟ་ཝི་ཝ་ཊྚོ ཉཱ་ཎ་ཝི་ཝ་ཊྚོ, ཏ་ཏྠ ཝི་མོ་ཀྑ་ཝི་ཝ་ཊྚོ. ཡ་ཏྠ ཝི་མོ་ཀྑ་ཝི་ཝ་ཊྚོ, ཏ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཙི་ཏྟ་ཝི་ཝ་ཊྚོ ཉཱ་ཎ་ཝི་ཝ་ཊྚོ. ཡ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཙི་ཏྟ་ཝི་ཝ་ཊྚོ ཉཱ་ཎ་ཝི་ཝ་ཊྚོ ཝི་མོ་ཀྑ་ཝི་ཝ་ཊྚོ, ཏ་ཏྠ ས་ཙྩ་ཝི་ཝ་ཊྚོ. ཡ་ཏྠ ས་ཙྩ་ཝི་ཝ་ཊྚོ, ཏ་ཏྠ ས་ཉྙཱ་ཝི་ཝ་ཊྚོ ཙེ་ཏོ་ཝི་ཝ་ཊྚོ ཙི་ཏྟ་ཝི་ཝ་ཊྚོ ཉཱ་ཎ་ཝི་ཝ་ཊྚོ ཝི་མོ་ཀྑ་ཝི་ཝ་ཊྚོ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཏ་ཐ་ཊྛེ པ་ཉྙཱ ས་ཙྩ་ཝི་ཝ་ཊྚེ ཉཱ་ཎཾ’’.
ཚ་ཝི་ཝ་ཊྚ་ཉཱ་ཎ་ནི་དྡེ་སོ ན་ཝ་ཙ་ཏྟཱ་ལཱི་ས་མོ.