༨. སུ་ཏྟ་ཝེ་བྷ་ངྒི་ཡཾ
༡༡༨. པུ་བྦཱ ཀོ་ཊི ན པ་ཉྙཱ་ཡ་ཏི ཨ་ཝི་ཛྫཱ་ཡ ཙ བྷ་ཝ་ཏ་ཎྷཱ་ཡ ཙ. ཏ་ཏྠ ཨ་ཝི་ཛྫཱ་ནཱི་ཝ་ར་ཎཱ་ནཾ ཏ་ཎྷཱ་སཾ་ཡོ་ཛ་ནཱ་ནཾ ས་ཏྟཱ་ནཾ པུ་བྦ་ཀོ་ཊི ན པ་ཉྙཱ་ཡ་ཏི. ཏ་ཏྠ ཡེ ས་ཏྟཱ ཏ་ཎྷཱ་སཾ་ཡོ་ཛ་ནཱ, ཏེ ཨ་ཛ྄ཛྷོ་སཱ་ན་བ་ཧུ་ལཱ མ་ནྡ་ཝི་པ་སྶ་ཀཱ. ཡེ པ་ན ཨུ་སྶ་ནྣ་དི་ཊྛི་ཀཱ ས་ཏྟཱ, ཏེ ཝི་པ་སྶ་ནཱ་བ་ཧུ་ལཱ མ་ནྡ་ཛ྄ཛྷོ་སཱ་ནཱ.
ཏ་ཏྠ ཏ་ཎྷཱ་ཙ་རི་ཏཱ ས་ཏྟཱ ས་ཏྟ་ས་ཉྙཱ་བྷི་ནི་ཝི་ཊྛཱ ཨ་ནུ་པྤཱ་ད་ཝ་ཡ་ད་སྶི་ནོ. ཏེ པ་ཉྩ་སུ ཁ་ནྡྷེ་སུ ཨ་ཏྟཱ་ནཾ ས་མ་ནུ་པ་སྶ་ནྟི ‘‘རཱུ་པ་ཝ་ནྟཾ ཝཱ ཨ་ཏྟཱ་ནཾ, ཨ་ཏྟ་ནི ཝཱ རཱུ་པཾ, རཱུ་པ་སྨིཾ ཝཱ ཨ་ཏྟཱ་ན’’ནྟི. ཨེ་ཝཾ པ་ཉྩ་ཀྑ་ནྡྷཱ. ཨ་ཉྙེ་ཧི ཁ་ནྡྷེ་ཧི ཨ་ཏྟཱ་ནཾ ས་མ་ནུ་པ་སྶ་ནྟི ཏ་སྶ ཨུ་སྶ་ནྣ་དི་ཊྛི་ཀཱ ས་ཏྟཱ ཝི་པ་སྶ་མཱ་ནཱ ཁ་ནྡྷེ ཨུ་ཛུཾ ཨ་ཏྟ་ཏོ ས་མ་ནུ་པ་སྶ་ནྟི. ཏེ རཱུ་པཾ ཨ་ཏྟ་ཀོ ས་མ་ནུ་པ་སྶ་ནྟི. ཡཾ རཱུ་པཾ, སོ ཨ་ཏྟཱ. ཡོ ཨ་ཧཾ, ཏཾ རཱུ་པཾ. སོ རཱུ་པ་ཝི་ནཱ་སཾ པ་སྶ་ཏི, ཨ་ཡཾ ཨུ་ཙྪེ་ད་ཝཱ་དཱི. ཨི་ཏི པ་ཉྩ་ནྣཾ ཁ་ནྡྷཱ་ནཾ པ་ཋ་མཱ་བྷི་ནི་པཱ་ཏཱ ས་ཀྐཱ་ཡ་དི་ཊྛི་ཡོ པ་ཉྩ ཨུ་ཙྪེ་དཾ བྷ་ཛ་ནྟི ‘‘ཏཾ ཛཱི་ཝཾ ཏཾ ས་རཱི་ར’’ནྟི. ཨེ་ཀ་མེ་ཀ་མྷི ཁ་ནྡྷེ ཏཱི་ཧི པ་དེ་ཧི པ་ཙྪི་མ་ཀེ་ཧི ས་སྶ་ཏཾ བྷ་ཛ་ཏི ‘‘ཨ་ཉྙཾ ཛཱི་ཝཾ ཨ་ཉྙཾ ས་རཱི་ར’’ནྟི. ཨི་ཏོ བ་ཧི་དྡྷཱ་ཏེ པ་བྦ་ཛི་ཏཱ ཏ་ཎྷཱ་ཙ་རི་ཏཱ ཀཱ་མ་སུ་ཁ་ལླི་ཀཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི. ཏེ་ན ཡེ ཙ ནི་སྶ་ནྡེ་ན དི་ཊྛི་ཙ་རི་ཏཱ ཨ་ཏྟ་ཀི་ལ་མ་ཐཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི. ཏེ་ན ཡེ་ཝ དི་ཊྛི་སུ་ཁེ་ན ཨེ་ཏྟཱ་ཝ་ཏཱ བཱ་ཧི་ར་ཀོ པ་ཡོ་གོ.
ཏ་ཏྠ དི་ཊྛི་ཙ་རི་ཏཱ ས་ཏྟཱ ཡེ ཨ་རི་ཡ་དྷ་མྨ་ཝི་ན་ཡཾ ཨོ་ཏ་ར་ནྟི, ཏེ དྷ་མྨཱ་ནུ་སཱ་རི་ནོ ཧོ་ནྟི. ཡེ ཏ་ཎྷཱ་ཙ་རི་ཏཱ ས་ཏྟཱ ཨ་རི་ཡཾ དྷ་མྨ་ཝི་ན་ཡཾ ཨོ་ཏ་ར་ནྟི, ཏེ ས་དྡྷཱ་ནུ་སཱ་རི་ནོ ཧོ་ནྟི.
ཏ་ཏྠ ཡེ དི་ཊྛི་ཙ་རི་ཏཱ ས་ཏྟཱ, ཏེ ཀཱ་མེ་སུ དོ་ས་དི་ཊྛཱི, ན ཙ ཡེ ཀཱ་མེ་སུ ཨ་ནུ་ས་ཡཱ ས་མཱུ་ཧ་ཏཱ, ཏེ ཨ་ཏྟ་ཀི་ལ་མ་ཐཱ་ནུ་ཡོ་ག་མ་ནུ་ཡུ་ཏྟཱ ཝི་ཧ་ར་ནྟི. ཏེ་སཾ ས་ཏྠཱ དྷ་མྨཾ དེ་སེ་ཏི. ཨ་ཉྙོ ཝཱ སཱ་ཝ་ཀོ ཀཱ་མེ་ཧི ན་ཏྠི ཨ་ཏྠོ་ཏི ཏེ ཙ པུ་བྦེ་ཡེ་ཝ ཀཱ་མེ་ཧི ཨ་ན་ཏྠི་ཀཱ ཨི་ཏི ཀཱ་མེ ཨ་པྤ་ཀ་སི་རེ་ན པ་ཊི་ནི་སྶ་ཛྫ་ནྟི. ཏེ ཙེ་ཏ་སི་ཀེ་ན དུ་ཀྑེ་ན ཨ་ན་ཛ྄ཛྷོ་སི་ཏཱ. ཏེ་ན ཝུ་ཙྩ་ཏི ‘‘སུ་ཁཱ པ་ཊི་པ་དཱ’’ཏི. ཡེ པ་ན ཏ་ཎྷཱ་ཙ་རི་ཏཱ ས་ཏྟཱ, ཏེ ཀཱ་མེ་སུ ཨ་ཛ྄ཛྷོ་སི་ཏཱ, ཏེ་སཾ ས་ཏྠཱ ཝཱ དྷ་མྨཾ དེ་སེ་ཏི. ཨ་ཉྙ་ཏ་རོ ཝཱ བྷི་ཀྑུ ཀཱ་མེ་ཧི ན་ཏྠི ཨ་ཏྠོ་ཏི, ཏེ པི་ཡ་རཱུ་པཾ དུ་ཀྑེ་ན པ་ཊི་ནི་སྶ་ཛྫ་ནྟི. ཏེ་ན ཝུ་ཙྩ་ཏི ‘‘དུ་ཀྑཱ པ་ཊི་པ་དཱ’’ཏི. ཨི་ཏི ཨི་མེ ས་བྦ་ས་ཏྟཱ དྭཱི་སུ པ་ཊི་པ་དཱ་སུ ས་མོ་ས་ར་ཎཾ ག་ཙྪ་ནྟི དུ་ཀྑཱ་ཡ་ཉྩ སུ་ཁཱ་ཡ་ཉྩ.
ཏ་ཏྠ ཡེ དི་ཊྛི་ཙ་རི་ཏཱ ས་ཏྟཱ, ཏེ དྭི་དྷཱ མུ་དི་ནྡྲི་ཡཱ ཙ ཏི་ཀྑི་ནྡྲི་ཡཱ ཙ. ཏ་ཏྠ ཡེ དི་ཊྛི་ཙ་རི་ཏཱ ས་ཏྟཱ ཏི་ཀྑི་ནྡྲི་ཡཱ སུ་ཁེ་ན པ་ཊི་ནི་སྶ་ཛྫ་ནྟི, ཁི་པྤ་ཉྩ ཨ་བྷི་ས་མེ་ནྟི, ཏེ་ན ཝུ་ཙྩ་ཏི ‘‘ཁི་པྤཱ་བྷི་ཉྙཱ སུ་ཁཱ པ་ཊི་པ་དཱ’’ཏི. ཏ་ཏྠ ཡེ དི་ཊྛི་ཙ་རི་ཏཱ ས་ཏྟཱ མུ་དི་ནྡྲི་ཡཱ པ་ཋ་མཾ ཏི་ཀྑི་ནྡྲི་ཡཾ ཨུ་པཱ་དཱ་ཡ ད་ནྡྷ་ཏ་རཾ ཨ་བྷི་ས་མེ་ནྟི, ཏེ སུ་ཁེ་ན པ་ཊི་ནི་སྶ་ཛྫ་ནྟི, ད་ནྡྷ་ཉྩ ཨ་བྷི་ས་མེ་ནྟི. ཏེ་ན ཝུ་ཙྩ་ཏི ‘‘སུ་ཁཱ པ་ཊི་པ་དཱ ད་ནྡྷཱ་བྷི་ཉྙཱ’’ཏི. ཏ་ཏྠ ཏ་ཎྷཱ་ཙ་རི་ཏཱ ས་ཏྟཱ དྭི་དྷཱ ཏི་ཀྑི་ནྡྲི་ཡཱ ཙ མུ་དི་ནྡྲི་ཡཱ ཙ. ཏ་ཏྠ ཡེ ཏ་ཎྷཱ་ཙ་རི་ཏཱ ས་ཏྟཱ ཏི་ཀྑི་ནྡྲི་ཡཱ དུ་ཀྑེ་ན པ་ཊི་ནི་སྶ་ཛྫ་ནྟི, ཁི་པྤ་ཉྩ ཨ་བྷི་ས་མེ་ནྟི. ཏེ་ན ཝུ་ཙྩ་ཏི ‘‘དུ་ཀྑཱ པ་ཊི་པ་དཱ ཁི་པྤཱ་བྷི་ཉྙཱ’’ཏི. ཏ་ཏྠ ཡེ ཏ་ཎྷཱ་ཙ་རི་ཏཱ ས་ཏྟཱ མུ་དི་ནྡྲི་ཡཱ པ་ཋ་མཾ ཏི་ཀྑི་ནྡྲི་ཡཾ ཨུ་པཱ་དཱ་ཡ ད་ནྡྷ་ཏ་རཾ ཨ་བྷི་ས་མེ་ནྟི, ཏེ དུ་ཀྑེ་ན པ་ཊི་ནི་སྶ་ཛྫ་ནྟི, ད་ནྡྷ་ཉྩ ཨ་བྷི་ས་མེ་ནྟི. ཏེ་ན ཝུ་ཙྩ་ཏི ‘‘དུ་ཀྑཱ པ་ཊི་པ་དཱ ད་ནྡྷཱ་བྷི་ཉྙཱ’’ཏི. ཨི་མཱ ཙ་ཏ་སྶོ པ་ཊི་པ་དཱ་ཡོ ཨ་པ་ཉྩ་མཱ ཨ་ཚ་ཊྛཱ. ཡེ ཧི ཀེ་ཙི ནི་བྦུ་ཏཱ ནི་བྦཱ་ཡི་སྶ་ནྟི ཝཱ ཨི་མཱ་ཧི ཙ་ཏཱུ་ཧི པ་ཊི་པ་དཱ་ཧི ཨ་ན་ཉྙཱ་ཧི ཨ་ཡཾ པ་ཊི་པ་དཱ་ཙ་ཏུ་ཀྐེ་ན ཀི་ལེ་སེ ནི་དྡི་ས་ཏི. ཡཱ ཙ་ཏུ་ཀྐ་མ་གྒེ་ན ཨ་རི་ཡ་དྷ་མྨེ་སུ ནི་དྡི་སི་ཏ་བྦཱ, ཨ་ཡཾ ཝུ་ཙྩ་ཏི སཱི་ཧ་ཝི་ཀྐཱི་ལི༹་ཏོ ནཱ་མ ན་ཡོ.
༡༡༩. ཏ་ཏྲི་མེ ཙ་ཏྟཱ་རོ ཨཱ་ཧཱ་རཱ. ཙ་ཏྟཱ་རོ ཝི་པ་ལླཱ་སཱ ཨུ་པཱ་དཱ་ནཱ ཡོ་གཱ ག་ནྠཱ ཨཱ་ས་ཝཱ ཨོ་གྷཱ ས་ལླཱ ཝི་ཉྙཱ་ཎ་ཊྛི་ཏི་ཡོ ཨ་ག་ཏི་ག་མ་ནཱ་ཏི, ཨེ་ཝཾ ཨི་མཱ་ནི ས་བྦཱ་ནི ད་ས པ་དཱ་ནི. ཨ་ཡཾ སུ་ཏྟ་སྶ སཾ་ས་ནྡ་ནཱ.
ཙ་ཏྟཱ་རོ ཨཱ་ཧཱ་རཱ. ཏ་ཏྠ ཡོ ཙ ཀ་བ་ལཱི༹་ཀཱ་རོ ཨཱ་ཧཱ་རོ ཡོ ཙ ཕ་སྶོ ཨཱ་ཧཱ་རོ, ཨི་མེ ཏ་ཎྷཱ་ཙ་རི་ཏེ་ན པ་ཧཱ་ཏ་བྦཱ. ཏ་ཏྠ ཡོ ཙ མ་ནོ་ས་ཉྩེ་ཏ་ནཱ་ཧཱ་རོ ཡོ ཙ ཝི་ཉྙཱ་ཎཱ་ཧཱ་རོ, ཨི་མེ དི་ཊྛི་ཙ་རི་ཏེ་ན པ་ཧཱ་ཏ་བྦཱ.
པ་ཋ་མོ ཨཱ་ཧཱ་རོ པ་ཋ་མོ ཝི་པ་ལླཱ་སོ, དུ་ཏི་ཡོ ཨཱ་ཧཱ་རོ དུ་ཏི་ཡོ ཝི་པ་ལླཱ་སོ, ཏ་ཏི་ཡོ ཨཱ་ཧཱ་རོ ཏ་ཏི་ཡོ ཝི་པ་ལླཱ་སོ, ཙ་ཏུ་ཏྠོ ཨཱ་ཧཱ་རོ ཙ་ཏུ་ཏྠོ ཝི་པ་ལླཱ་སོ. ཨི་མེ ཙ་ཏྟཱ་རོ ཝི་པ་ལླཱ་སཱ ཨ་པ་ཉྩ་མཱ ཨ་ཚ་ཊྛཱ. ཨི་ད་ཉྩ པ་མཱ་ཎཱ ཙ་ཏྟཱ་རོ ཨཱ་ཧཱ་རཱ.
ཏ་ཏྠ པ་ཋ་མེ ཝི་པ་ལླཱ་སེ ཋི་ཏོ ཀཱ་མེ ཨུ་པཱ་དི་ཡ་ཏི, ཨི་དཾ ཀཱ་མུ་པཱ་དཱ་ནཾ. དུ་ཏི་ཡེ ཝི་པ་ལླཱ་སེ ཋི་ཏོ ཨ་ནཱ་ག་ཏཾ བྷ་ཝཾ ཨུ་པཱ་དི་ཡ་ཏི, ཨི་དཾ སཱི་ལ་བྦ་ཏུ་པཱ་དཱ་ནཾ. ཏ་ཏི་ཡེ ཝི་པ་ལླཱ་སེ ཋི་ཏོ ཝི་པ་རཱི་ཏོ དི་ཊྛིཾ ཨུ་པཱ་དི་ཡ་ཏི, ཨི་དཾ དི་ཊྛུ་པཱ་དཱ་ནཾ. ཙ་ཏུ་ཏྠེ ཝི་པ་ལླཱ་སེ ཋི་ཏོ ཁ་ནྡྷེ ཨ་ཏྟ་ཏོ ཨུ་པཱ་དི་ཡ་ཏི, ཨི་དཾ ཨ་ཏྟ་ཝཱ་དུ་པཱ་དཱ་ནཾ.
ཏ་ཏྠ ཀཱ་མུ་པཱ་དཱ་ནེ ཋི་ཏོ ཀཱ་མེ ཨ་བྷི་ཛ྄ཛྷཱ་ཡ་ཏི ག་ནྠ་ཏི, ཨ་ཡཾ ཨ་བྷི་ཛ྄ཛྷཱ་ཀཱ་ཡ་ག་ནྠོ. སཱི་ལ་བྦ་ཏུ་པཱ་དཱ་ནེ ཋི་ཏོ བྱཱ་པཱ་དཾ ག་ནྠ་ཏི, ཨ་ཡཾ བྱཱ་པཱ་ད་ཀཱ་ཡ་ག་ནྠོ. དི་ཊྛུ་པཱ་དཱ་ནེ ཋི་ཏོ པ་རཱ་མཱ་སཾ ག་ནྠ་ཏི, ཨ་ཡཾ པ་རཱ་མཱ་ས་ཀཱ་ཡ་ག་ནྠོ. ཨ་ཏྟ་ཝཱ་དུ་པཱ་དཱ་ནེ ཋི་ཏོ པ་པ་ཉྩ་ནྟོ ག་ནྠ་ཏི, ཨ་ཡཾ ཨི་དཾ་ས་ཙྩཱ་བྷི་ནི་ཝེ་སོ ཀཱ་ཡ་ག་ནྠོ.
ཏ་སྶ ག་ནྠི་ཏཱ ཀི་ལེ་སཱ ཨཱ་ས་ཝ་ནྟི. ཀི་ཉྩི པ་ན ཝུ་ཙྩ་ཏི ཝི་པྤ་ཊི་སཱ་རོ. ཡེ ཝི་པྤ་ཊི་སཱ་རཱ [ཡོ ཝི་པྤ་ཊི་སཱ་རོ (པཱི. ཀ.)] ཏེ ཨ་ནུ་ས་ཡཱ. ཏ་ཏྠ ཨ་བྷི་ཛ྄ཛྷཱ་ཀཱ་ཡ་ག་ནྠེ་ན ཀཱ་མཱ་ས་ཝོ, བྱཱ་པཱ་ད་ཀཱ་ཡ་ག་ནྠེ་ན བྷ་ཝཱ་ས་ཝོ, པ་རཱ་མཱ་ས་ཀཱ་ཡ་ག་ནྠེ་ན དི་ཊྛཱ་ས་ཝོ, ཨི་དཾ ས་ཙྩཱ་བྷི་ནི་ཝེ་ས་ཀཱ་ཡ་ག་ནྠེ་ན ཨ་ཝི་ཛྫཱ་ས་ཝོ.
ཏེ ཙ་ཏྟཱ་རོ ཨཱ་ས་ཝཱ ཝེ་པུ་ལླ་བྷཱ་ཝཾ ག་ཏཱ ཨོ་གྷཱ ཧོ་ནྟི, ཏེ་ན ཝུ་ཙྩ་ནྟི ‘‘ཨོ་གྷཱ’’ཏི. ཏ་ཏྠ ཀཱ་མཱ་ས་ཝོ ཀཱ་མོ་གྷོ, བྷ་ཝཱ་ས་ཝོ བྷ་ཝོ་གྷོ, ཨ་ཝི་ཛྫཱ་ས་ཝོ ཨ་ཝི་ཛྫོ་གྷོ, དི་ཊྛཱ་ས་ཝོ དི་ཊྛོ་གྷོ.
ཏེ ཙ་ཏྟཱ་རོ ཨོ་གྷཱ ཨཱ་ས་ཡ་མ་ནུ་པ་ཝི་ཊྛཱ ཨ་ནུ་ས་ཡ་ས་ཧ་ག་ཏཱ ཝུ་ཙྩ་ནྟི. ས་ལླཱ་ཏི ཧ་ད་ཡ་མཱ་ཧ་ཙྩ ཏི་ཊྛ་ནྟཱ. ཏ་ཏྠ ཀཱ་མོ་གྷོ རཱ་ག་ས་ལླཾ, བྷ་ཝོ་གྷོ དོ་ས་ས་ལླཾ, ཨ་ཝི་ཛྫོ་གྷོ མོ་ཧ་ས་ལླཾ, དི་ཊྛོ་གྷོ དི་ཊྛི་ས་ལླཾ.
ཨི་མེ་ཧི ཙ་ཏཱུ་ཧི ས་ལླེ་ཧི པ་རི་ཡཱ་དི་ནྣཾ ཝི་ཉྙཱ་ཎཾ ཙ་ཏཱུ་སུ དྷ་མྨེ་སུ ཏི་ཊྛ་ཏི རཱུ་པེ ཝེ་ད་ནཱ་ཡ ས་ཉྙཱ་ཡ ས་ངྑཱ་རེ་སུ. ཨི་མཱ ཙ་ཏ་སྶོ ཝི་ཉྙཱ་ཎ་ཊྛི་ཏི་ཡོ. ཏ་ཏྠ རཱ་ག་ས་ལླེ་ན ན་ནྡཱུ་པ་སེ་ཙ་ནཾ རཱུ་པཱུ་པ་གཾ ཝི་ཉྙཱ་ཎཾ ཏི་ཊྛ་ཏི. དོ་ས་ས་ལླེ་ན ཝེ་ད་ནཱུ་པ་གཾ མོ་ཧ་ས་ལླེ་ན ས་ཉྙཱུ་པ་གཾ དི་ཊྛི་ས་ལླེ་ན ན་ནྡཱུ་པ་སེ་ཙ་ནཾ ས་ངྑཱ་རཱུ་པ་གཾ ཝི་ཉྙཱ་ཎཾ ཏི་ཊྛ་ཏི.
ཙ་ཏཱུ་ཧི ཝི་ཉྙཱ་ཎ་ཊྛི་ཏཱི་ཧི ཙ་ཏུ་བྦི་དྷཾ ཨ་ག་ཏིཾ ག་ཙྪ་ནྟི ཚ་ནྡཱ དོ་སཱ བྷ་ཡཱ མོ་ཧཱ. རཱ་གེ་ན ཚ་ནྡཱ ཨ་ག་ཏིཾ ག་ཙྪ་ཏི, དོ་སེ་ན དོ་སཱ ཨ་ག་ཏིཾ ག་ཙྪ་ཏི, མོ་ཧེ་ན མོ་ཧཱ ཨ་ག་ཏིཾ ག་ཙྪ་ཏི, དི་ཊྛི་ཡཱ བྷ་ཡཱ ཨ་ག་ཏིཾ ག་ཙྪ་ཏི. ཨི་ཏི ཨི་ད་ཉྩ ཀ་མྨཾ ཨི་མེ ཙ ཀི་ལེ་སཱ. ཨ་ཡཾ སཾ་སཱ་ར་སྶ ཧེ་ཏུ.
༡༢༠. ཏ་ཏྠི་མཱ ཙ་ཏ་སྶོ དི་སཱ ཀ་བ་ལཱི༹་ཀཱ་རཱ་ཧཱ་རོ ‘‘ཨ་སུ་བྷེ སུ་བྷ’’ནྟི ཝི་པ་ལླཱ་སོ ཀཱ་མུ་པཱ་དཱ་ནཾ ཀཱ་མ་ཡོ་གོ ཨ་བྷི་ཛ྄ཛྷཱ་ཀཱ་ཡ་ག་ནྠོ ཀཱ་མཱ་ས་ཝོ ཀཱ་མོ་གྷོ རཱ་ག་ས་ལླཾ རཱུ་པཱུ་པ་གཱ ཝི་ཉྙཱ་ཎ་ཊྛི་ཏི ཚ་ནྡཱ ཨ་ག་ཏི་ག་མ་ནཾ. ཨ་ཡཾ པ་ཋ་མཱ དི་སཱ.
ཕ་སྶོ ཨཱ་ཧཱ་རོ ‘‘དུ་ཀྑེ སུ་ཁ’’ནྟི ཝི་པ་ལླཱ་སོ སཱི་ལ་བྦ་ཏུ་པཱ་དཱ་ནཾ བྷ་ཝ་ཡོ་གོ་བྱཱ་པཱ་དོ ཀཱ་ཡ་ག་ནྠོ བྷ་ཝཱ་ས་ཝོ བྷ་ཝོ་གྷོ དོ་ས་ས་ལླཾ ཝེ་ད་ནཱུ་པ་གཱ ཝི་ཉྙཱ་ཎ་ཊྛི་ཏི དོ་སཱ ཨ་ག་ཏི་ག་མ་ནཾ, ཨ་ཡཾ དུ་ཏི་ཡཱ དི་སཱ.
མ་ནོ་ས་ཉྩེ་ཏ་ནཱ་ཧཱ་རོ ‘‘ཨ་ན་ཏྟ་ནི ཨ་ཏྟཱ’’ཏི ཝི་པ་ལླཱ་སོ དི་ཊྛུ་པཱ་དཱ་ནཾ དི་ཊྛི་ཡོ་གོ པ་རཱ་མཱ་ས་ཀཱ་ཡ་ག་ནྠོ དི་ཊྛཱ་ས་ཝོ དི་ཊྛོ་གྷོ དི་ཊྛི་ས་ལླཾ ས་ཉྙཱུ་པ་གཱ ཝི་ཉྙཱ་ཎ་ཊྛི་ཏི བྷ་ཡཱ ཨ་ག་ཏི་ག་མ་ནཾ. ཨ་ཡཾ ཏ་ཏི་ཡཱ དི་སཱ.
ཝི་ཉྙཱ་ཎཱ་ཧཱ་རོ ‘‘ཨ་ནི་ཙྩེ ནི་ཙྩ’’ནྟི ཝི་པ་ལླཱ་སོ ཨ་ཏྟ་ཝཱ་དུ་པཱ་དཱ་ནཾ ཨ་ཝི་ཛྫཱ་ཡོ་གོ ཨི་དཾ་ས་ཙྩཱ་བྷི་ནི་ཝེ་སོ ཀཱ་ཡ་ག་ནྠོ ཨ་ཝི་ཛྫཱ་ས་ཝོ ཨ་ཝི་ཛྫོ་གྷོ མོ་ཧ་ས་ལླཾ ས་ངྑཱ་རཱུ་པ་གཱ ཝི་ཉྙཱ་ཎ་ཊྛི་ཏི མོ་ཧཱ ཨ་ག་ཏི་ག་མ་ནཾ, ཨ་ཡཾ ཙ་ཏུ་ཏྠཱི དི་སཱ. ཨི་ཏི ཨི་མེ་སཾ ད་ས་ནྣཾ སུ་ཏྟཱ་ནཾ པ་ཋ་མེ་ན པ་དེ་ན པ་ཋ་མཱ་ཡ དི་སཱ་ཡ ཨཱ་ལོ་ཀ་ནཾ. ཨ་ཡཾ ཝུ་ཙྩ་ཏི དི་སཱ་ལོ་ཀ་ནཱ.
ཙ་ཏཱུ་ཧི ཝི་པ་ལླཱ་སེ་ཧི ཨ་ཀུ་ས་ལ་པ་ཀྑེ དི་སཱ་ཝི་ལོ་ཀ་ནཱ ཀི་ལེ་སཾ སཾ་ཡོ་ཛེ་ཏྭཱ ཨ་ཡཾ ཨ་ཀུ་ས་ལ་པ་ཀྑེ དི་སཱ་ཝི་ལོ་ཀ་ནཱ་ཡ བྷཱུ་མི པ་ཉྩ་ནྣཾ ད་ས་ནྣཾ སུ་ཏྟཱ་ནཾ ཡཱ་ནི པ་ཋ་མཱ་ནི པ་དཱ་ནི ཨི་མེ་སཾ དྷ་མྨཱ་ནཾ ཀོ ཨ་ཏྠོ? ཨེ་ཀོ ཨ་ཏྠོ, བྱ་ཉྫ་ན་མེ་ཝ ནཱ་ནཾ. ཨེ་ཝཾ དུ་ཏི་ཡཱ ཨེ་ཝཾ ཏ་ཏི་ཡཱ ཨེ་ཝཾ ཙ་ཏུ་ཏྠཱི. ཨ་ཡཾ པ་ཋ་མཱ སཾ་ས་ནྡ་ནཱ.
ཨི་མི་ནཱ པེ་ཡྻཱ་ལེ་ན ས་བྦེ ཀི་ལེ་སཱ ཙ་ཏཱུ་སུ པ་དེ་སུ པ་ཀྑི་པི་ཏ་བྦཱ. ཏ་ཏོ ཀུ་ས་ལ་པ་ཀྑེ ཙ་ཏ་སྶོ པ་ཊི་པ་དཱ ཙ་ཏྟཱ་རི ཛྷཱ་ནཱ་ནི ཙ་ཏྟཱ་རོ ས་ཏི་པ་ཊྛཱ་ནཱ ཙ་ཏྟཱ་རོ ཝི་ཧཱ་རཱ དི་བྦོ བྲ་ཧྨཱ ཨ་རི་ཡོ ཨཱ་ནེ་ཉྫོ ཙ་ཏྟཱ་རོ ས་མྨ་པྤ་དྷཱ་ནཱ ཙ་ཏྟཱ་རོ ཨ་ཙྪ་རི་ཡཱ ཨ་བྦྷུ་ཏ་དྷ་མྨཱ ཙ་ཏྟཱ་རོ ཨ་དྷི་ཊྛཱ་ནཱ ཙ་ཏྟཱ་རོ ས་མཱ་དྷ་ཡོ ཚ་ནྡ་ས་མཱ་དྷི ཝཱི་རི་ཡ་ས་མཱ་དྷི ཙི་ཏྟ་ས་མཱ་དྷི ཝཱི་མཾ་སཱ་ས་མཱ་དྷི. ཙ་ཏྟཱ་རོ དྷ་མྨཱ སུ་ཁ་བྷཱ་གི་ཡཱ ནཱ་ཉྙ་ཏྲ བོ་ཛ྄ཛྷ་ངྒཱ ནཱ་ཉྙ་ཏྲ ཏ་པ་སཱ ནཱ་ཉྙ་ཏི་ནྡྲི་ཡ་སཾ་ཝ་རཱ ནཱ་ཉྙ་ཏྲ ས་བྦ་ནི་སྶ་གྒཱ ཙ་ཏྟཱ་རི ཨ་པྤ་མཱ་ཎཱ་ནི.
ཏ་ཏྠ དུ་ཀྑཱ པ་ཊི་པ་དཱ ད་ནྡྷཱ་བྷི་ཉྙཱ བྷཱ་ཝི་ཡ་མཱ་ནཱ བ་ཧུ་ལཱི་ཀ་རི་ཡ་མཱ་ནཱ པ་ཋ་མཾ ཛྷཱ་ནཾ པ་རི་པཱུ་རེ་ཏི, པ་ཋ་མཾ ཛྷཱ་ནཾ པ་རི་པུ་ཎྞཾ པ་ཋ་མཾ ས་ཏི་པ་ཊྛཱ་ནཾ པ་རི་པཱུ་རེ་ཏི, པ་ཋ་མཾ ས་ཏི་པ་ཊྛཱ་ནཾ པ་རི་པུ་ཎྞཾ པ་ཋ་མཾ ཝི་ཧཱ་རཾ པ་རི་པཱུ་རེ་ཏི, པ་ཋ་མོ ཝི་ཧཱ་རོ པ་རི་པུ་ཎྞོ པ་ཋ་མཾ ས་མྨ་པྤ་དྷཱ་ནཾ པ་རི་པཱུ་རེ་ཏི, པ་ཋ་མཾ ས་མྨ་པྤ་དྷཱ་ནཾ པ་རི་པུ་ཎྞཾ པ་ཋ་མཾ ཨ་ཙྪ་རི་ཡཾ ཨ་བྦྷུ་ཏ་དྷ་མྨཾ པ་རི་པཱུ་རེ་ཏི, པ་ཋ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ པ་རི་པུ་ཎྞོ པ་ཋ་མཾ ཨ་དྷི་ཊྛཱ་ནཾ པ་རི་པཱུ་རེ་ཏི, པ་ཋ་མཾ ཨ་དྷི་ཊྛཱ་ནཾ པ་རི་པུ་ཎྞཾ ཚ་ནྡ་ས་མཱ་དྷིཾ པ་རི་པཱུ་རེ་ཏི, ཚ་ནྡ་ས་མཱ་དྷི པ་རི་པུ་ཎྞོ ཨི་ནྡྲི་ཡ་སཾ་ཝ་རཾ པ་རི་པཱུ་རེ་ཏི, ཨི་ནྡྲི་ཡ་སཾ་ཝ་རོ པ་རི་པུ་ཎྞོ པ་ཋ་མཾ མེ་ཏྟཱ་ཨ་པྤ་མཱ་ཎཾ པ་རི་པཱུ་རེ་ཏི. ཨེ་ཝཾ ཡཱ་ཝ ས་བྦ་ནི་སྶ་གྒོ ཙ་ཏུ་ཏྠཾ ཨ་པྤ་མཱ་ཎཾ པ་རི་པཱུ་རེ་ཏི.
ཏ་ཏྠ པ་ཋ་མཱ ཙ པ་ཊི་པ་དཱ པ་ཋ་མ་ཉྩ ཛྷཱ་ནཾ པ་ཋ་མ་ཉྩ ས་ཏི་པ་ཊྛཱ་ནཾ པ་ཋ་མོ ཙ ཝི་ཧཱ་རོ པ་ཋ་མ་ཉྩ ས་མྨ་པྤ་དྷཱ་ནཾ པ་ཋ་མོ ཙ ཨ་ཙྪ་རི་ཡོ ཨ་བྦྷུ་ཏོ དྷ་མྨོ ས་ཙྩཱ་དྷི་ཊྛཱ་ན་ཉྩ ཚ་ནྡ་ས་མཱ་དྷི ཙ ཨི་ནྡྲི་ཡ་སཾ་ཝ་རོ ཙ མེ་ཏྟཱ ཙ ཨ་པྤ་མཱ་ཎཾ. ཨ་ཡཾ པ་ཋ་མཱ དི་སཱ.
དུ་ཀྑཱ ཙ [དུ་ཏི་ཡཱ ཙ (ཀ.)] པ་ཊི་པ་དཱ ཁི་པྤཱ་བྷི་ཉྙཱ དུ་ཏི་ཡཾ ཛྷཱ་ནཾ དུ་ཏི་ཡ་ཉྩ ས་ཏི་པ་ཊྛཱ་ནཾ དུ་ཏི་ཡོ ཙ ཝི་ཧཱ་རོ དུ་ཏི་ཡ་ཉྩ ས་མྨ་པྤ་དྷཱ་ནཾ དུ་ཏི་ཡོ ཙ ཨ་ཙྪ་རི་ཡོ ཨ་བྦྷུ་ཏོ དྷ་མྨོ ཙཱ་གཱ་དྷི་ཊྛཱ་ནཾ ཙི་ཏྟ་ས་མཱ་དྷི ཙ་ཏྟཱ་རོ ཨི་དྡྷི་པཱ་དཱ ཀ་རུ་ཎཱ ཙ ཨ་པྤ་མཱ་ཎཾ, ཨ་ཡཾ དུ་ཏི་ཡཱ དི་སཱ.
སུ་ཁཱ ཙ [ཏ་ཏི་ཡཱ ཙ (ཀ.)] པ་ཊི་པ་དཱ ད་ནྡྷཱ་བྷི་ཉྙཱ ཏ་ཏི་ཡ་ཉྩ ཛྷཱ་ནཾ ཏ་ཏི་ཡ་ཉྩ ས་ཏི་པ་ཊྛཱ་ནཾ ཏ་ཏི་ཡོ ཙ ཝི་ཧཱ་རོ ཏ་ཏི་ཡ་ཉྩ ས་མྨ་པྤ་དྷཱ་ནཾ ཏ་ཏི་ཡོ ཙ ཨ་ཙྪ་རི་ཡོ ཨ་བྦྷུ་ཏོ དྷ་མྨོ པ་ཉྙཱ་དྷི་ཊྛཱ་ན་ཉྩ ཝཱི་རི་ཡ་ས་མཱ་དྷི ཙ བོ་ཛ྄ཛྷ་ངྒཱ ཙ མུ་དི་ཏཱ ཙ ཨ་པྤ་མཱ་ཎཾ. ཨ་ཡཾ ཏ་ཏི་ཡཱ དི་སཱ.
སུ་ཁཱ ཙ [ཙ་ཏུ་ཏྠཱི ཙ (ཀ.)] པ་ཊི་པ་དཱ ཁི་པྤཱ་བྷི་ཉྙཱ ཙ་ཏུ་ཏྠཾ ཛྷཱ་ནཾ ཙ་ཏུ་ཏྠ་ཉྩ ས་ཏི་པ་ཊྛཱ་ནཾ ཙ་ཏུ་ཏྠོ ཙ ཝི་ཧཱ་རོ ཙ་ཏུ་ཏྠ་ཉྩ ས་མྨ་པྤ་དྷཱ་ནཾ ཙ་ཏུ་ཏྠོ ཙ ཨ་ཙྪ་རི་ཡོ ཨ་བྦྷུ་ཏོ དྷ་མྨོ ཨུ་པ་ས་མཱ་དྷི་ཊྛཱ་ན་ཉྩ ཝཱི་མཾ་སཱ་ས་མཱ་དྷི ཙ ས་བྦ་ནི་སྶ་གྒོ ཙ ཨུ་པེ་ཀྑཱ ཨ་པྤ་མཱ་ཎ་ཉྩ. ཨ་ཡཾ ཙ་ཏུ་ཏྠཱི དི་སཱ. ཨི་མཱ་སཾ ཙ་ཏ་སྶ་ནྣཾ དི་སཱ་ནཾ ཨཱ་ལོ་ཀ་ནཱ. ཨ་ཡཾ ཝུ་ཙྩ་ཏི དི་སཱ་ལོ་ཀ་ནོ ནཱ་མ ན་ཡོ.
ཏ་ཏྠཱ་ཡཾ ཡོ་ཛ་ནཱ. ཙ་ཏྟཱ་རོ ཙ ཨཱ་ཧཱ་རཱ ཙ་ཏ་སྶོ ཙ པ་ཊི་པ་དཱ, ཙ་ཏྟཱ་རོ ཙ ཝི་པ་ལླཱ་སཱ ཙ་ཏྟཱ་རོ ཙ ས་ཏི་པ་ཊྛཱ་ནཱ, ཙ་ཏྟཱ་རི ཙ ཨུ་པཱ་དཱ་ནཱ་ནི ཙ་ཏྟཱ་རི ཙ ཛྷཱ་ནཱ་ནི ཙ་ཏྟཱ་རོ ཙ ཡོ་གཱ ཝི་ཧཱ་རཱ ཙ, ག་ནྠཱ ཙ ས་མྨ་པྤ་དྷཱ་ནཱ ཙ, ཨཱ་ས་ཝཱ ཙ ཨ་ཙྪ་རི་ཡཱ ཨ་བྦྷུ་ཏ་དྷ་མྨཱ ཙ, ཨོ་གྷཱ ཙ ཨ་དྷི་ཊྛཱ་ནཱ་ནི ཙ, ས་ལླཱ ཙ ས་མཱ་དྷ་ཡོ, ཝི་ཉྙཱ་ཎ་ཊྛི་ཏི་ཡོ ཙ་ཏྟཱ་རོ ཙ སུ་ཁ་བྷཱ་གི་ཡཱ དྷ་མྨཱ, ཙ་ཏྟཱ་རི ཙ ཨ་ག་ཏི་ག་མ་ནཱ་ནི ཙ་ཏྟཱ་རི ཙ ཨ་པྤ་མཱ་ཎཱ་ནི ཨི་ཏི ཀུ་ས་ལཱ་ཀུ་ས་ལཱ་ནཾ པ་ཊི་པ་ཀྑ་ཝ་སེ་ན ཡོ་ཛ་ནཱ, ཨ་ཡཾ ཝུ་ཙྩ་ཏི དི་སཱ་ལོ་ཀ་ནོ ན་ཡོ.
ཏ་སྶ ཙ་ཏྟཱ་རི སཱ་མ་ཉྙ་ཕ་ལཱ་ནི པ་རི་ཡོ་སཱ་ནཾ, ཡོ ཙ དྷ་མྨོ ཀུ་ས་ལཱ་ཀུ་ས་ལ་ནི་དྡེ་སེ པ་ཋ་མོ དི་སཱ་ནི་དྡེ་སོ, ཨི་མ་སྶ སོ་ཏཱ་པ་ཏྟི་ཕ་ལཾ པ་རི་ཡོ་སཱ་ནཾ དུ་ཏི་ཡཾ ས་ཀ་དཱ་གཱ་མི་ཕ་ལཾ, ཏ་ཏི་ཡཾ ཨ་ནཱ་གཱ་མི་ཕ་ལཾ, ཙ་ཏུ་ཏྠཾ ཨ་ར་ཧ་ཏྟ་ཕ་ལཾ.
ཏ་ཏྠ ཀ་ཏ་མོ ཏི་པུ་ཀྑ་ལོ ན་ཡོ? ཡེ ཙ དུ་ཀྑཱ་ཡ པ་ཊི་པ་དཱ་ཡ ད་ནྡྷཱ་བྷི་ཉྙཱ་ཡ ཁི་པྤཱ་བྷི་ཉྙཱ་ཡ ཙ ནི་ཡྻ་ནྟི དྭེ པུ་གྒ་ལཱ, ཡེ ཙ སུ་ཁཱ་ཡ པ་ཊི་པ་དཱ་ཡ ད་ནྡྷཱ་བྷི་ཉྙཱ་ཡ ཁི་པྤཱ་བྷི་ཉྙཱ་ཡ ཙ ནི་ཡྻ་ནྟི དྭེ པུ་གྒ་ལཱ.
ཨི་མེ་སཾ ཙ་ཏུ་ནྣཾ པུ་གྒ་ལཱ་ནཾ ཡོ པུ་གྒ་ལོ སུ་ཁཱ་ཡ པ་ཊི་པ་དཱ་ཡ ད་ནྡྷཱ་བྷི་ཉྙཱ་ཡ ནི་ཡྻཱ་ཏི, ཡོ ཙ པུ་གྒ་ལོ དུ་ཀྑཱ་ཡ པ་ཊི་པ་དཱ་ཡ ཁི་པྤཱ་བྷི་ཉྙཱ་ཡ ནི་ཡྻཱ་ཏི. ཨི་མེ དྭེ པུ་གྒ་ལཱ བྷ་ཝ་ནྟི. ཏ་ཏྠ ཡོ སུ་ཁཱ་ཡ པ་ཊི་པ་དཱ་ཡ ཁི་པྤཱ་བྷི་ཉྙཱ་ཡ ནི་ཡྻཱ་ཏི, ཨ་ཡཾ ཨུ་གྒྷ་ཊི་ཏ་ཉྙཱུ. ཡོ པ་ཙྪི་མོ པུ་གྒ་ལོ སཱ་དྷཱ་ར་ཎོ, ཨ་ཡཾ ཝི་པ་ཉྩི་ཏ་ཉྙཱུ. ཡོ པུ་གྒ་ལོ ད་ནྡྷཱ་བྷི་ཉྙཱ་ཡ དུ་ཀྑཱ་ཡ པ་ཊི་པ་དཱ་ཡ ནི་ཡྻཱ་ཏི, ཨ་ཡཾ ནེ་ཡྻོ. ཨི་མེ ཙ་ཏྟཱ་རོ བྷ་ཝི་ཏྭཱ ཏཱི་ཎི ཧོ་ནྟི, ཏ་ཏྠ ཨུ་གྒྷ་ཊི་ཏ་ཉྙུ་སྶ ས་མ་ཐ་པུ་བྦ་ངྒ་མཱ ཝི་པ་སྶ་ནཱ, ནེ་ཡྻ་སྶ ཝི་པ་སྶ་ནཱ་པུ་བྦ་ངྒ་མོ ས་མ་ཐོ, ཝི་པ་ཉྩི་ཏ་ཉྙུ་སྶ ས་མ་ཐ་ཝི་པ་སྶ་ནཱ ཡུ་ག་ན་དྡྷཱ. ཨུ་གྒྷ་ཊི་ཏ་ཉྙུ་སྶ མུ་དུ་ཀཱ དེ་ས་ནཱ, ནེ་ཡྻ་སྶ ཏི་ཀྑཱ དེ་ས་ནཱ, ཝི་པ་ཉྩི་ཏ་ཉྙུ་སྶ ཏི་ཀྑ་མུ་དུ་ཀཱ དེ་ས་ནཱ.
ཨུ་གྒྷ་ཊི་ཏ་ཉྙུ་སྶ ཨ་དྷི་པ་ཉྙཱ་སི་ཀྑཱ, ནེ་ཡྻ་སྶ ཨ་དྷི་ཙི་ཏྟ་སི་ཀྑཱ, ཝི་པ་ཉྩི་ཏ་ཉྙུ་སྶ ཨ་དྷི་སཱི་ལ་སི་ཀྑཱ. ཨི་ཏི ཨི་མེ་སཾ པུ་གྒ་ལཱ་ནཾ ཙ་ཏཱུ་ཧི པ་ཊི་པ་དཱ་ཧི ནི་ཡྻཱ་ནཾ.
ཏ་ཏྠ ཨ་ཡཾ སཾ་ཀི་ལེ་སོ, ཏཱི་ཎི ཨ་ཀུ་ས་ལ་མཱུ་ལཱ་ནི ཏ་ཡོ ཕ་སྶཱ ཏི་སྶོ ཝེ་ད་ནཱ ཏ་ཡོ ཨུ་པ་ཝི་ཙཱ་རཱ ཏ་ཡོ སཾ་ཀི་ལེ་སཱ ཏ་ཡོ ཝི་ཏ་ཀྐཱ ཏ་ཡོ པ་རི་ལཱ༹་ཧཱ ཏཱི་ཎི ས་ངྑ་ཏ་ལ་ཀྑ་ཎཱ་ནི ཏི་སྶོ དུ་ཀྑ་ཏཱ་ཏི.
ཏཱི་ཎི ཨ་ཀུ་ས་ལ་མཱུ་ལཱ་ནཱི་ཏི ལོ་བྷོ ཨ་ཀུ་ས་ལ་མཱུ་ལཾ, དོ་སོ ཨ་ཀུ་ས་ལ་མཱུ་ལཾ, མོ་ཧོ ཨ་ཀུ་ས་ལ་མཱུ་ལཾ. ཏ་ཡོ ཕ་སྶཱ་ཏི སུ་ཁ་ཝེ་ད་ནཱི་ཡོ ཕ་སྶོ, དུ་ཀྑ་ཝེ་ད་ནཱི་ཡོ ཕ་སྶོ, ཨ་དུ་ཀྑ་མ་སུ་ཁ་ཝེ་ད་ནཱི་ཡོ ཕ་སྶོ. ཏི་སྶོ ཝེ་ད་ནཱ་ཏི སུ་ཁཱ ཝེ་ད་ནཱ དུ་ཀྑཱ ཝེ་ད་ནཱ ཨ་དུ་ཀྑ་མ་སུ་ཁཱ ཝེ་ད་ནཱ. ཏ་ཡོ ཨུ་པ་ཝི་ཙཱ་རཱ་ཏི སོ་མ་ན་སྶོ་པ་ཝི་ཙཱ་རོ དོ་མ་ན་སྶོ་པ་ཝི་ཙཱ་རོ ཨུ་པེ་ཀྑོ་པ་ཝི་ཙཱ་རོ. ཏ་ཡོ སཾ་ཀི་ལེ་སཱ་ཏི རཱ་གོ དོ་སོ མོ་ཧོ. ཏ་ཡོ ཝི་ཏ་ཀྐཱ་ཏི ཀཱ་མ་ཝི་ཏ་ཀྐོ བྱཱ་པཱ་ད་ཝི་ཏ་ཀྐོ ཝི་ཧིཾ་སཱ་ཝི་ཏ་ཀྐོ. ཏ་ཡོ པ་རི་ལཱ༹་ཧཱ་ཏི རཱ་ག་ཛོ དོ་ས་ཛོ མོ་ཧ་ཛོ. ཏཱི་ཎི ས་ངྑ་ཏ་ལ་ཀྑ་ཎཱ་ནཱི་ཏི ཨུ་པྤཱ་དོ ཋི་ཏི ཝ་ཡོ. ཏི་སྶོ དུ་ཀྑ་ཏཱ་ཏི དུ་ཀྑ་དུ་ཀྑ་ཏཱ ཝི་པ་རི་ཎཱ་མ་དུ་ཀྑ་ཏཱ ས་ངྑ་ཏ་དུ་ཀྑ་ཏཱ.
ཏ་ཏྠ ལོ་བྷོ ཨ་ཀུ་ས་ལ་མཱུ་ལཾ ཀུ་ཏོ ས་མུ་ཊྛི་ཏཾ? ཏི་ཝི་དྷཾ ཨཱ་ར་མྨ་ཎཾ མ་ནཱ་པི་ཀཾ ཨ་མ་ནཱ་པི་ཀཾ ཨུ་པེ་ཀྑཱ་ཋཱ་ནི་ཡ་ཉྩ. ཏ་ཏྠ མ་ནཱ་པི་ཀེ་ན ཨཱ་ར་མྨ་ཎེ་ན ལོ་བྷོ ཨ་ཀུ་ས་ལ་མཱུ་ལཾ ས་མུ་ཊྛ་ཧ་ཏི. ཨི་ཏི མ་ནཱ་པི་ཀཱ ཨཱ་ར་མྨ་ཎཱ སུ་ཁ་ཝེ་ད་ནཱི་ཡོ ཕ་སྶོ, སུ་ཁ་ཝེ་ད་ནཱི་ཡཾ ཕ་སྶཾ པ་ཊི་ཙྩ ཨུ་པྤ་ཛྫ་ཏེ སུ་ཁ་ཝེ་ད་ནཱ, སུ་ཁ་ཝེ་ད་ནཾ པ་ཊི་ཙྩ ཨུ་པྤ་ཛྫ་ཏེ སོ་མ་ན་སྶཱུ་པ་ཝི་ཙཱ་རོ, སོ་མ་ན་སྶཱུ་པ་ཝི་ཙཱ་རཾ པ་ཊི་ཙྩ ཨུ་པྤ་ཛྫ་ཏེ རཱ་གོ, རཱ་གཾ པ་ཊི་ཙྩ ཨུ་པྤ་ཛྫ་ཏེ ཀཱ་མ་ཝི་ཏ་ཀྐོ, ཀཱ་མ་ཝི་ཏ་ཀྐཾ པ་ཊི་ཙྩ ཨུ་པྤ་ཛྫ་ཏེ རཱ་ག་ཛོ པ་རི་ལཱ༹་ཧོ རཱ་ག་ཛཾ པ་རི་ལཱ༹་ཧཾ པ་ཊི་ཙྩ ཨུ་པྤ་ཛྫ་ཏེ ཨུ་པྤཱ་དོ ས་ངྑ་ཏ་ལ་ཀྑ་ཎོ, ཨུ་པྤཱ་དཾ ས་ངྑ་ཏ་ལ་ཀྑ་ཎཾ པ་ཊི་ཙྩ ཨུ་པྤ་ཛྫ་ཏེ ཝི་པ་རི་ཎཱ་མ་དུ་ཀྑ་ཏཱ.
དོ་སོ ཨ་ཀུ་ས་ལ་མཱུ་ལཾ ཀུ་ཏོ ས་མུ་ཊྛི་ཏཾ? ཨ་མ་ནཱ་པི་ཀེ་ན ཨཱ་ར་མྨ་ཎེ་ན དོ་སོ ཨ་ཀུ་ས་ལ་མཱུ་ལཾ ས་མུ་ཊྛི་ཏཾ. ཨི་ཏི ཨ་མ་ནཱ་པི་ཀཱ ཨཱ་ར་མྨ་ཎཱ དུ་ཀྑ་ཝེ་ད་ནཱི་ཡོ ཕ་སྶོ, དུ་ཀྑ་ཝེ་ད་ནཱི་ཡཾ ཕ་སྶཾ པ་ཊི་ཙྩ ཨུ་པྤ་ཛྫ་ཏེ དུ་ཀྑ་ཝེ་ད་ནཱ, དུ་ཀྑ་ཝེ་ད་ནཾ པ་ཊི་ཙྩ ཨུ་པྤ་ཛྫ་ཏེ དོ་མ་ན་སྶཱུ་པ་ཝི་ཙཱ་རོ, དོ་མ་ན་སྶཱུ་པ་ཝི་ཙཱ་རཾ པ་ཊི་ཙྩ ཨུ་པྤ་ཛྫ་ཏེ དོ་སོ, དོ་སཾ པ་ཊི་ཙྩ ཨུ་པྤ་ཛྫ་ཏེ བྱཱ་པཱ་ད་ཝི་ཏ་ཀྐོ, བྱཱ་པཱ་ད་ཝི་ཏ་ཀྐཾ པ་ཊི་ཙྩ ཨུ་པྤ་ཛྫ་ཏེ དོ་ས་ཛོ པ་རི་ལཱ༹་ཧོ, དོ་ས་ཛཾ པ་རི་ལཱ༹་ཧཾ པ་ཊི་ཙྩ ཨུ་པྤ་ཛྫ་ཏེ ཋི་ཏ་སྶ ཨ་ཉྙ་ཐ་ཏྟཾ ས་ངྑ་ཏ་ལ་ཀྑ་ཎཾ, ཋི་ཏ་སྶ ཨ་ཉྙ་ཐ་ཏྟཾ ས་ངྑ་ཏ་ལ་ཀྑ་ཎཾ པ་ཊི་ཙྩ ཨུ་པྤ་ཛྫ་ཏེ དུ་ཀྑ་དུ་ཀྑ་ཏཱ ཝེ་ད་ནཱ.
མོ་ཧོ ཨ་ཀུ་ས་ལ་མཱུ་ལཾ ཀུ་ཏོ ས་མུ་ཊྛི་ཏཾ? ཨུ་པེ་ཀྑཱ་ཋཱ་ནི་ཡེ་ན ཨཱ་ར་མྨ་ཎེ་ན མོ་ཧོ ཨ་ཀུ་ས་ལ་མཱུ་ལཾ ས་མུ་ཊྛི་ཏཾ. ཨི་ཏི ཨུ་པེ་ཀྑཱ་ཋཱ་ནི་ཡཱ ཨཱ་ར་མྨ་ཎཱ ཨ་དུ་ཀྑ་མ་སུ་ཁ་ཝེ་ད་ནཱི་ཡོ ཕ་སྶོ, ཨ་དུ་ཀྑ་མ་སུ་ཁ་ཝེ་ད་ནཱི་ཡཾ ཕ་སྶཾ པ་ཊི་ཙྩ ཨུ་པྤ་ཛྫ་ཏེ ཨ་དུ་ཀྑ་མ་སུ་ཁཱ ཝེ་ད་ནཱ, ཨ་དུ་ཀྑ་མ་སུ་ཁ་ཝེ་ད་ནཾ པ་ཊི་ཙྩ ཨུ་པྤ་ཛྫ་ཏེ ཨུ་པེ་ཀྑཱུ་པ་ཝི་ཙཱ་རོ, ཨུ་པེ་ཀྑཱུ་པ་ཝི་ཙཱ་རཾ པ་ཊི་ཙྩ ཨུ་པྤ་ཛྫ་ཏེ མོ་ཧོ, མོ་ཧཾ པ་ཊི་ཙྩ ཨུ་པྤ་ཛྫ་ཏེ ཝི་ཧིཾ་སཱ་ཝི་ཏ་ཀྐོ, ཝི་ཧིཾ་སཱ་ཝི་ཏ་ཀྐཾ པ་ཊི་ཙྩ ཨུ་པྤ་ཛྫ་ཏེ མོ་ཧ་ཛོ པ་རི་ལཱ༹་ཧོ, མོ་ཧ་ཛཾ པ་རི་ལཱ༹་ཧཾ པ་ཊི་ཙྩ ཨུ་པྤ་ཛྫ་ཏེ ཝ་ཡོ ས་ངྑ་ཏ་ལ་ཀྑ་ཎཾ, ཝ་ཡཾ ས་ངྑ་ཏ་ལ་ཀྑ་ཎཾ པ་ཊི་ཙྩ ཨུ་པྤ་ཛྫ་ཏེ ས་ངྑ་ཏ་དུ་ཀྑ་ཏཱ, ཨི་ཏི ཨ་ཡཾ ཏི་ཎྞཾ ཀི་ལེ་སཱ་ནཾ ནི་དྡེ་སོ, ཨ་ཡཾ ཝུ་ཙྩ་ཏེ ཀུ་ས་ལ་པ་ཀྑེ ཏི་པུ་ཀྑ་ལོ ན་ཡོ.
ཨི་ཏི ཏཱི་ཎི ཨ་ཀུ་ས་ལ་མཱུ་ལཱ་ནི ན ཙ་ཏུ་ཏྠཱ་ནི ན པ་ཉྩ་མཱ་ནི, ཏ་ཡོ ཕ་སྶཱ་ཏི ཏི་སྶོ ཝེ་ད་ནཱ ཡཱ་ཝ ས་ངྑ་ཏ་དུ་ཀྑ་ཏཱ་ཏི, ཡོ ཀོ་ཙི ཨ་ཀུ་ས་ལ་པ་ཀྑོ, ས་བྦོ སོ ཏཱི་སུ ཨ་ཀུ་ས་ལ་མཱུ་ལེ་སུ ས་མོ་ས་ར་ཏི.
ཏ་ཏྠ ཀ་ཏ་མོ ཀུ་ས་ལ་པ་ཀྑོ? ཏཱི་ཎི ཀུ་ས་ལ་མཱུ་ལཱ་ནི, ཏི་སྶོ པ་ཉྙཱ སུ་ཏ་མ་ཡཱི པ་ཉྙཱ ཙི་ནྟཱ་མ་ཡཱི པ་ཉྙཱ བྷཱ་ཝ་ནཱ་མ་ཡཱི པ་ཉྙཱ. ཏ་ཡོ ས་མཱ་དྷཱི ས་ཝི་ཏ་ཀྐ་ས་ཝི་ཙཱ་རོ…པེ… ཏི་སྶོ སི་ཀྑཱ ཨ་དྷི་སཱི་ལ་སི་ཀྑཱ…པེ… སི་ཀྑཱ. ཏཱི་ཎི ནི་མི་ཏྟཱ་ནི ས་མ་ཐ་ནི་མི་ཏྟཾ པ་གྒ་ཧ་ནི་མི་ཏྟཾ ཨུ་པེ་ཀྑཱ་ནི་མི་ཏྟཾ. ཏ་ཡོ ཝི་ཏ་ཀྐཱ ནེ་ཀྑ་མྨ་ཝི་ཏ་ཀྐོ…པེ… ཨ་ཝི་ཧིཾ་སཱ་ཝི་ཏ་ཀྐོ. ཏཱི་ཎི ཨི་ནྡྲི་ཡཱ་ནི ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡ་ནྟི ཝི་ཏྠཱ་རོ. ཏ་ཡོ ཨུ་པ་ཝི་ཙཱ་རཱ ནེ་ཀྑ་མྨཱུ་པ་ཝི་ཙཱ་རོ ཨ་བྱཱ་པཱ་དཱུ་པ་ཝི་ཙཱ་རོ ཨ་ཝི་ཧིཾ་སཱུ་པ་ཝི་ཙཱ་རོ. ཏི་སྶོ ཨེ་ས་ནཱ ཀཱ་མེ་ས་ནཱ བྷ་ཝེ་ས་ནཱ བྲ་ཧྨ་ཙ་རི་ཡེ་ས་ནཱ. ཏ་ཡོ ཁ་ནྡྷཱ སཱི་ལ་ཀྑ་ནྡྷོ ས་མཱ་དྷི་ཀྑ་ནྡྷོ པ་ཉྙཱ་ཀྑ་ནྡྷོ.
ཏ་ཏྠ ཡཾ ཨ་ལོ་བྷོ ཀུ་ས་ལ་མཱུ་ལཾ, ཏཾ སུ་ཏ་མ་ཡི་པ་ཉྙཾ པ་རི་པཱུ་རེ་ཏི, སུ་ཏ་མ་ཡཱི པ་ཉྙཱ པ་རི་པུ་ཎྞཱ ས་ཝི་ཏ་ཀྐཾ ས་ཝི་ཙཱ་རཾ ས་མཱ་དྷིཾ པ་རི་པཱུ་རེ་ཏི, ས་ཝི་ཏ་ཀྐོ ས་ཝི་ཙཱ་རོ ས་མཱ་དྷི པ་རི་པུ་ཎྞོ ཨ་དྷི་ཙི་ཏྟ་སི་ཀྑཾ པ་རི་པཱུ་རེ་ཏི, ཨ་དྷི་ཙི་ཏྟ་སི་ཀྑཱ པ་རི་པུ་ཎྞཱ ས་མ་ཐ་ནི་མི་ཏྟཾ པ་རི་པཱུ་རེ་ཏི, ས་མ་ཐ་ནི་མི་ཏྟཾ པ་རི་པུ་ཎྞཾ ནེ་ཀྑ་མྨ་ཝི་ཏ་ཀྐཾ པ་རི་པཱུ་རེ་ཏི, ནེ་ཀྑ་མྨ་ཝི་ཏ་ཀྐོ པ་རི་པུ་ཎྞོ ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ པ་རི་པཱུ་རེ་ཏི, ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ པ་རི་པུ་ཎྞཾ ནེ་ཀྑ་མྨཱུ་པ་ཝི་ཙཱ་རཾ པ་རི་པཱུ་རེ་ཏི, ནེ་ཀྑ་མྨཱུ་པ་ཝི་ཙཱ་རོ པ་རི་པུ་ཎྞོ ཀཱ་མེ་ས་ནཾ པ་ཛ་ཧ་ཏི, ཀཱ་མེ་ས་ན་པྤ་ཧཱ་ནཾ ས་མཱ་དྷི་ཀྑ་ནྡྷཾ པ་རི་པཱུ་རེ་ཏི.
ཨ་དོ་སོ ཀུ་ས་ལ་མཱུ་ལཾ ཙི་ནྟཱ་མ་ཡི་པ་ཉྙཾ པ་རི་པཱུ་རེ་ཏི, ཙི་ནྟཱ་མ་ཡཱི པ་ཉྙཱ པ་རི་པུ་ཎྞཱ ཨ་ཝི་ཏ་ཀྐ་ཝི་ཙཱ་ར་མ་ཏྟཾ ས་མཱ་དྷིཾ པ་རི་པཱུ་རེ་ཏི. ཨ་ཝི་ཏ་ཀྐ་ཝི་ཙཱ་ར་མ་ཏྟོ ས་མཱ་དྷི པ་རི་པུ་ཎྞོ ཨ་དྷི་སཱི་ལ་སི་ཀྑཾ པ་རི་པཱུ་རེ་ཏི, ཨ་དྷི་སཱི་ལ་སི་ཀྑཱ པ་རི་པུ་ཎྞཱ ཨུ་པེ་ཀྑཱ་ནི་མི་ཏྟཾ པ་རི་པཱུ་རེ་ཏི, ཨུ་པེ་ཀྑཱ་ནི་མི་ཏྟཾ པ་རི་པུ་ཎྞཾ ཨ་བྱཱ་པཱ་ད་ཝི་ཏ་ཀྐཾ པ་རི་པཱུ་རེ་ཏི, ཨ་བྱཱ་པཱ་ད་ཝི་ཏ་ཀྐོ པ་རི་པུ་ཎྞོ ཨ་ཉྙི་ནྡྲི་ཡཾ པ་རི་པཱུ་རེ་ཏི, ཨ་ཉྙི་ནྡྲི་ཡཾ པ་རི་པུ་ཎྞཾ ཨ་བྱཱ་པཱ་དཱུ་པ་ཝི་ཙཱ་རཾ པ་རི་པཱུ་རེ་ཏི, ཨ་བྱཱ་པཱ་དཱུ་པ་ཝི་ཙཱ་རོ པ་རི་པུ་ཎྞོ བྷ་ཝེ་ས་ནཾ པ་ཛ་ཧ་ཏི, བྷ་ཝེ་ས་ན་པྤ་ཧཱ་ནཾ སཱི་ལ་ཀྑ་ནྡྷཾ པ་རི་པཱུ་རེ་ཏི.
ཨ་མོ་ཧོ ཀུ་ས་ལ་མཱུ་ལཾ བྷཱ་ཝ་ནཱ་མ་ཡི་པ་ཉྙཾ པ་རི་པཱུ་རེ་ཏི, བྷཱ་ཝ་ནཱ་མ་ཡཱི་པ་ཉྙཱ པ་རི་པུ་ཎྞཱ ཨ་ཝི་ཏ་ཀྐ་ཨ་ཝི་ཙཱ་རཾ ས་མཱ་དྷིཾ པ་རི་པཱུ་རེ་ཏི, ཨ་ཝི་ཏ་ཀྐོ ཨ་ཝི་ཙཱ་རོ ས་མཱ་དྷི པ་རི་པུ་ཎྞོ ཨ་དྷི་པ་ཉྙཱ་སི་ཀྑཾ པ་རི་པཱུ་རེ་ཏི, ཨ་དྷི་པ་ཉྙཱ་སི་ཀྑཱ པ་རི་པུ་ཎྞཱ པ་གྒ་ཧ་ནི་མི་ཏྟཾ པ་རི་པཱུ་རེ་ཏི, པ་གྒ་ཧ་ནི་མི་ཏྟཾ པ་རི་པུ་ཎྞཾ ཨ་ཉྙཱ་ཏཱ་ཝི་ནོ ཨི་ནྡྲི་ཡཾ པ་རི་པཱུ་རེ་ཏི, ཨ་ཉྙཱ་ཏཱ་ཝི་ནོ ཨི་ནྡྲི་ཡཾ པ་རི་པུ་ཎྞཾ ཨ་ཝི་ཧིཾ་སཱུ་པ་ཝི་ཙཱ་རཾ པ་རི་པཱུ་རེ་ཏི, ཨ་ཝི་ཧིཾ་སཱུ་པ་ཝི་ཙཱ་རོ པ་རི་པུ་ཎྞོ བྲ་ཧྨ་ཙ་རི་ཡེ་ས་ནཾ པ་རི་པཱུ་རེ་ཏི, བྲ་ཧྨ་ཙ་རི་ཡེ་ས་ནཱ པ་རི་པུ་ཎྞཱ པ་ཉྙཱ་ཀྑ་ནྡྷཾ པ་རི་པཱུ་རེ་ཏི.
ཨི་ཏི ཨི་མེ ཏ་ཡོ དྷ་མྨཱ ཀུ་ས་ལ་པ་ཀྑི་ཀཱ ས་བྦེ ཀུ་ས་ལཱ དྷ་མྨཱ ཏཱི་ཧི ཏི་ཀ་ནི་དྡེ་སེ་ཧི ནི་དྡི་སི་ཡ་ནྟི ཏཱི་ཎི ཝི་མོ་ཀྑ་མུ་ཁཱ་ནི ཏ་སྶ པ་རི་ཡོ་སཱ་ནཾ. ཏ་ཏྠ པ་ཋ་མེ་ན ཨ་པྤ་ཎི་ཧི་ཏཾ, དུ་ཏི་ཡེ་ན སུ་ཉྙ་ཏཾ, ཏ་ཏི་ཡེ་ན ཨ་ནི་མི་ཏྟཾ. ཨ་ཡཾ ཝུ་ཙྩ་ཏི དུ་ཏི་ཡོ ཏི་པུ་ཀྑ་ལོ ནཱ་མ ན་ཡོ.
ཏ་ཏྠ ཡེ ཨི་མེ ཏ་ཡོ པུ་གྒ་ལཱ ཨུ་གྒྷ་ཊི་ཏ་ཉྙཱུ ཝི་པ་ཉྩི་ཏ་ཉྙཱུ ནེ་ཡྻོ་ཏི. ཨི་མེ་སཾ ཏི་ཎྞཾ པུ་གྒ་ལཱ་ནཾ ཡེ ཙ པུ་གྒ་ལཱ སུ་ཁཱ་ཡ པ་ཊི་པ་དཱ་ཡ ཁི་པྤཱ་བྷི་ཉྙཱ་ཡ, སུ་ཁཱ་ཡ པ་ཊི་པ་དཱ་ཡ ད་ནྡྷཱ་བྷི་ཉྙཱ་ཡ ཙ ནི་ཡྻ་ནྟི, ཏེ དྭེ པུ་གྒ་ལཱ. ཡེ ཙ དྭེ པུ་གྒ་ལཱ དུ་ཀྑཱ་ཡ པ་ཊི་པ་དཱ་ཡ ཁི་པྤཱ་བྷི་ཉྙཱ་ཡ, དུ་ཀྑཱ་ཡ པ་ཊི་པ་དཱ་ཡ ད་ནྡྷཱ་བྷི་ཉྙཱ་ཡ ཙ ནི་ཡྻ་ནྟི, ཨི་མེ ཙ་ཏྟཱ་རོ ཏེ་ན ཝི་སེ་སེ་ན དྭེ བྷ་ཝ་ནྟི དི་ཊྛི་ཙ་རི་ཏོ ཙ ཏ་ཎྷཱ་ཙ་རི་ཏོ ཙ. ཨི་མེ ཙ་ཏྟཱ་རོ བྷ་ཝི་ཏྭཱ ཏ་ཡོ བྷ་ཝ་ནྟི, ཏ་ཡོ བྷ་ཝི་ཏྭཱ དྭེ བྷ་ཝ་ནྟི. ཨི་མེ་སཾ དྭི་ནྣཾ པུ་གྒ་ལཱ་ནཾ ཨ་ཡཾ སཾ་ཀི་ལེ་སོ, ཨ་ཝི་ཛྫཱ ཙ ཏ་ཎྷཱ ཙ, ཨ་ཧི་རི་ཀ་ཉྩ ཨ་ནོ་ཏྟ་པྤ་ཉྩ, ཨ་སྶ་ཏི ཙ ཨ་ས་མྤ་ཛ་ཉྙ་ཉྩ, ནཱི་ཝ་ར་ཎཱ་ནི ཙ སཾ་ཡོ་ཛ་ནཱ་ནི ཙ, ཨ་ཛ྄ཛྷོ་སཱ་ན་ཉྩ ཨ་བྷི་ནི་ཝེ་སོ ཙ, ཨ་ཧཾ་ཀཱ་རོ ཙ མ་མཾ་ཀཱ་རོ ཙ, ཨ་སྶ་དྡྷི་ཡ་ཉྩ དོ་ཝ་ཙ་སྶ་ཉྩ, ཀོ་ས་ཛྫ་ཉྩ ཨ་ཡོ་ནི་སོ ཙ མ་ན་སི་ཀཱ་རོ, ཝི་ཙི་ཀི་ཙྪཱ ཙ ཨ་བྷི་ཛ྄ཛྷཱ ཙ, ཨ་ས་དྡྷ་མྨ་སྶ་ཝ་ན་ཉྩ ཨ་ས་མཱ་པ་ཏྟི ཙ.
ཏ་ཏྠ ཨ་ཝི་ཛྫཱ ཙ ཨ་ཧི་རི་ཀ་ཉྩ ཨ་སྶ་ཏི ཙ ནཱི་ཝ་ར་ཎཱ་ནི ཙ ཨ་ཛ྄ཛྷོ་སཱ་ན་ཉྩ ཨ་ཧཾ་ཀཱ་རོ ཙ ཨ་སྶ་དྡྷི་ཡ་ཉྩ ཀོ་ས་ཛྫ་ཉྩ ཝི་ཙི་ཀི་ཙྪཱ ཙ ཨ་ས་དྡྷ་མྨ་སྶ་ཝ་ན་ཉྩ, ཨ་ཡཾ ཨེ་ཀཱ དི་སཱ.
ཏ་ཎྷཱ ཙ ཨ་ནོ་ཏྟ་པྤ་ཉྩ ཨ་ས་མྤ་ཛ་ཉྙ་ཉྩ སཾ་ཡོ་ཛ་ནཱ་ནི ཙ ཨ་བྷི་ནི་ཝེ་སོ ཙ མ་མཾ་ཀཱ་རོ ཙ དོ་ཝ་ཙ་སྶ་ཏཱ ཙ ཨ་ཡོ་ནི་སོ མ་ན་སི་ཀཱ་རོ ཙ ཨ་བྷི་ཛ྄ཛྷཱ ཙ ཨ་ས་མཱ་པ་ཏྟི ཙ, ཨ་ཡཾ དུ་ཏི་ཡཱ དི་སཱ. ད་ས་ནྣཾ དུ་ཀཱ་ནཾ ད་ས པ་དཱ་ནི པ་ཋ་མཱ་ནི ཀཱ་ཏ་བྦཱ་ནི. སཾ་ཁི་ཏྟེ་ན ཨ་ཏྠཾ ཉཱ་པེ་ནྟི པ་ཊི་པ་ཀྑེ ཀ་ཎྷ་པ་ཀྑ་སྶ ས་བྦེ་སཾ དུ་ཀཱ་ནཾ ད་ས པ་དཱ་ནི དུ་ཏི་ཡ་ཀཱ་ནི, ཨ་ཡཾ དུ་ཏི་ཡཱ དི་སཱ.
ཨི་ཏི ཨ་ཀུ་ས་ལཱ་ནཾ དྷ་མྨཱ་ནཾ དུ་ཀྑ་ནི་དྡེ་སོ, ཨ་ཡཾ ས་མུ་ད་ཡོ. ཡཾ ཏཾ དྷ་མྨཾ ཨ་ཛ྄ཛྷཱ་ཝ་ས་ཏི ནཱ་མ་ཉྩ རཱུ་པ་ཉྩ ཨི་དཾ དུ་ཀྑཾ ཨི་ཏི ཨ་ཡ་ཉྩ ས་མུ་ད་ཡོ, ཨི་ད་ཉྩ དུ་ཀྑཾ, ཨི་མཱ་ནི དྭེ ས་ཙྩཱ་ནི དུ་ཀྑ་ཉྩ ས་མུ་ད་ཡོ ཙ ན་ནྡི་ཡཱ་ཝ་ཊྚ་སྶ ན་ཡ་སྶ པ་ཋ་མ་ནི་དྡེ་སོ.
ཏ་ཏྠ ཀ་ཏ་མོ ཀུ་ས་ལ་པ་ཀྑོ? ས་མ་ཐོ ཙ ཝི་པ་སྶ་ནཱ ཙ, ཝི་ཛྫཱ ཙ ཙ་ར་ཎ་ཉྩ, ས་ཏི ཙ ས་མྤ་ཛ་ཉྙ་ཉྩ, ཧི་རཱི ཙ ཨོ་ཏྟ་པྤ་ཉྩ, ཨ་ཧཾ་ཀཱ་ར་པྤ་ཧཱ་ན་ཉྩ མ་མཾ་ཀཱ་ར་པྤ་ཧཱ་ན་ཉྩ, ས་མྨཱ་ཝཱ་ཡཱ་མོ ཙ ཡོ་ནི་སོ ཙ མ་ན་སི་ཀཱ་རོ, ས་མྨཱ་ས་ཏི ཙ ས་མྨཱ་ས་མཱ་དྷི ཙ, པ་ཉྙཱ ཙ ནི་བྦི་དཱ ཙ, ས་མཱ་པ་ཏྟི ཙ ས་དྡྷ་མྨ་སྶ་ཝ་ན་ཉྩ, སོ་མ་ན་སྶ་ཉྩ དྷ་མྨཱ་ནུ་དྷ་མྨ་པྤ་ཊི་པ་ཏྟི ཙ.
ཏ་ཏྠ ས་མ་ཐོ ཙ ཝི་ཛྫཱ ཙ ས་ཏི ཙ ཧི་རཱི ཙ ཨ་ཧཾ་ཀཱ་ར་པྤ་ཧཱ་ན་ཉྩ ས་མྨཱ་ཝཱ་ཡཱ་མོ ཙ ས་མྨཱ་ས་ཏི ཙ པ་ཉྙཱ ཙ ས་མཱ་པ་ཏྟི ཙ སོ་མ་ན་སྶ་ཉྩ, ཨི་མེ དྷ་མྨཱ ཨེ་ཀཱ དི་སཱ. ཝི་པ་སྶ་ནཱ ཙ ཙ་ར་ཎ་ཉྩ ས་མྤ་ཛ་ཉྙ་ཉྩ ཨོ་ཏྟ་པྤ་ཉྩ མ་མཾ་ཀཱ་ར་པྤ་ཧཱ་ན་ཉྩ ཡོ་ནི་སོ མ་ན་སི་ཀཱ་རོ ཙ ས་མྨཱ་ས་མཱ་དྷི ཙ ནི་བྦི་དཱ ཙ ས་དྡྷ་མྨ་སྶ་ཝ་ན་ཉྩ དྷ་མྨཱ་ནུ་དྷ་མྨ་པྤ་ཊི་པ་ཏྟི ཙ, ཨ་ཡཾ དུ་ཏི་ཡཱ དི་སཱ. ཨི་ཏི ཀུ་ས་ལ་པ་ཀྑེ ཙ ཨ་ཀུ་ས་ལ་པ་ཀྑེ ཙ ན་ནྡི་ཡཱ་ཝ་ཊྚ་སྶ པ་ན ན་ཡ་སྶ ཙ་ཏ་སྶོ དི་སཱ.
ཏཱ་སུ ཡཱ་ནི ཨ་ཀུ་ས་ལ་པ་ཀྑ་སྶ པ་ཋ་མཱ་ནི པ་དཱ་ནི ཨ་ཀུ་ས་ལཱ་ནི ཀུ་ས་ལེ་ཧི པ་ཧཱ་ནཾ ག་ཙྪ་ནྟི, ཏཱ་ནི ཀུ་ས་ལ་པ་ཀྑེ དུ་ཏི་ཡེ་ཧི པ་དེ་ཧི པ་ཧཱ་ནཾ ག་ཙྪ་ནྟི. ཏེ་སཾ པ་ཧཱ་ནཱ རཱ་ག་ཝི་རཱ་གཱ ཙེ་ཏོ་ཝི་མུ་ཏྟི ཡཱ་ནི ཨ་ཀུ་ས་ལ་པ་ཀྑ་སྶ དུ་ཏི་ཡཱ་ནི ཨ་ཀུ་ས་ལ་པ་དཱ་ནི པ་ཧཱ་ནཾ ག་ཙྪ་ནྟི, ཏཱ་ནི ཀུ་ས་ལ་པ་ཀྑ་སྶ པ་ཋ་མེ་ཧི པ་དེ་ཧི པ་ཧཱ་ནཾ ག་ཙྪ་ནྟི. ཏེ་སཾ པ་ཧཱ་ནཱ ཨ་ཝི་ཛྫཱ་ཝི་རཱ་གཱ པ་ཉྙཱ་ཝི་མུ་ཏྟི པ་རི་ཡོ་སཱ་ནཾ. ཨི་མེ་སཾ ཏི་ཎྞཾ ན་ཡཱ་ནཾ པ་ཋ་མོ ན་ཡོ སཱི་ཧ་ཝི་ཀྐཱི་ལི༹་ཏོ ནཱ་མ. ཨ་ཊྛ པ་དཱ་ནི ཙ་ཏྟཱ་རི ཙ ཀུ་ས་ལཱ་ནི ཙ་ཏྟཱ་རི ཙ ཨ་ཀུ་ས་ལཱ་ནི ཨི་མཱ་ནི ཨ་ཊྛ པ་དཱ་ནི མཱུ་ལ་པ་དཱ་ནི, ཨ་ཏྠ་ན་ཡེ་ན དུ་ཏི་ཡོ ཏི་པུ་ཀྑ་ལོ. སོ ཚ་ཧི དྷ་མྨེ་ཧི ནེ་ཏི ཀུ་ས་ལ་མཱུ་ལཱ་ནི ཙ ནེ་ཏི ཨ་ཀུ་ས་ལ་མཱུ་ལཱ་ནི ཙ, ཨི་ཏི ཨི་མཱ་ནི ཚ པ་དཱ་ནི པུ་རི་མ་ཀཱ་ནི ཙ ཨ་ཊྛ མཱུ་ལ་པ་དཱ་ནི ཨི་མཱ་ནི ཙུ་དྡ་ས པ་དཱ་ནི ཨ་ཊྛཱ་ར་ས་ནྣཾ མཱུ་ལ་པ་དཱ་ནཾ. ཏ་ཏྠ ཡོ པ་ཙྪི་མ་ཀོ ན་ཡོ ན་ནྡི་ཡཱ་ཝ་ཊྚོ, སོ ཙ་ཏཱུ་ཧི དྷ་མྨེ་ཧི ནེ་ཏི. ཨ་ཝི་ཛྫཱ་ཡ ཙ ཏ་ཎྷཱ་ཡ ཙ ས་མ་ཐེ་ན ཙ ཝི་པ་སྶ་ནཱ་ཡ ཙ, ཨི་མེ ཙ་ཏྟཱ་རོ དྷ་མྨཱ ཨི་མཱ་ནི ཨ་ཊྛཱ་ར་ས མཱུ་ལ་པ་དཱ་ནི ཏཱི་སུ ན་ཡེ་སུ ནི་དྡི་ཊྛཱ་ནི.
ཏ་ཏྠ ཡཱ་ནི ན་ཝ པ་དཱ་ནི ཀུ་ས་ལཱ་ནི, ཏ་ཏྠ ས་བྦཾ ཀུ་ས་ལཾ ས་མོ་ས་ར་ཏི. ཏེ་ས་ཉྩ ན་ཝ་ནྣཾ མཱུ་ལཱ་ནཾ ཙ་ཏྟཱ་རི པ་དཱ་ནི སཱི་ཧ་ཝི་ཀྐཱི་ལི༹་ཏ་ན་ཡེ ཏཱི་ཎི ཏི་པུ་ཀྑ་ལེ དྭེ ན་ནྡི་ཡཱ་ཝ་ཊྚེ, ཨི་ཙྩེ་ཏེ ཀུ་ས་ལ་སྶ པ་ཀྑཱ. ཏ་ཏྠ ཡཱ་ནི ན་ཝ པ་དཱ་ནི ཀུ་ས་ལཱ་ནི, ཏ་ཏྠ ས་བྦཾ ཀུ་ས་ལཾ ཡུ་ཛྫ་ཏི. ཏ་ཏྠ སཱི་ཧ་ཝི་ཀྐཱི་ལི༹་ཏེ ན་ཡེ ཙ་ཏྟཱ་རི པ་དཱ་ནི ཏཱི་ཎི ཏི་པུ་ཀྑ་ལེ དྭེ ན་ནྡི་ཡཱ་ཝ་ཊྚེ ཨི་མཱ་ནི ན་ཝ པ་དཱ་ནི ཀུ་ས་ལཱ་ནི ནི་དྡི་ཊྛཱ་ནི.
ཏ་ཏྠ ཡཱ་ནི ན་ནྡི་ཡཱ་ཝ་ཊྚེ ན་ཡེ ཙ་ཏྟཱ་རི པ་དཱ་ནི, ཏ་ཏྠ ཨ་ཊྛཱ་ར་ས མཱུ་ལ་པ་དཱ་ནི ས་མོ་ས་ར་ནྟི. ཡ་ཐཱ ཀ་ཐཾ, ས་མ་ཐོ ཙ ཨ་ལོ་བྷོ ཙ ཨ་དོ་སོ ཙ ཨ་སུ་བྷ་ས་ཉྙཱ ཙ དུ་ཀྑ་ས་ཉྙཱ ཙ ཨི་མཱ་ནི ཀུ་ས་ལ་པ་ཀྑེ པ་ཉྩ པ་དཱ་ནི ས་མ་ཐཾ བྷ་ཛ་ནྟི. ཝི་པ་སྶ་ནཱ ཙ ཨ་མོ་ཧོ ཙ ཨ་ནི་ཙྩ་ས་ཉྙཱ ཙ ཨ་ན་ཏྟ་ས་ཉྙཱ ཙ ཨི་མཱ་ནི ཙ་ཏྟཱ་རི པ་དཱ་ནི ཝི་པ་སྶ་ནཾ བྷ་ཛ་ནྟི. ཨི་མཱ་ནི ན་ཝ པ་དཱ་ནི ཀུ་ས་ལཱ་ནི དྭཱི་སུ པ་དེ་སུ ཡོ་ཛི་ཏཱ་ནི, ཏ་ཏྠ ཨ་ཀུ་ས་ལ་པ་ཀྑེ ན་ཝ་ནྣཾ ཨ་ཀུ་ས་ལ་མཱུ་ལ་པ་དཱ་ནཾ ཡཱ ཙ ཏ་ཎྷཱ ཡོ ཙ ལོ་བྷོ ཡོ ཙ དོ་སོ ཡཱ ཙ སུ་བྷ་ས་ཉྙཱ ཡཱ ཙ སུ་ཁ་ས་ཉྙཱ, ཨི་མཱ་ནི པ་ཉྩ པ་དཱ་ནི ཏ་ཎྷཾ བྷ་ཛ་ནྟི. ཡཱ ཙ ཨ་ཝི་ཛྫཱ ཡོ ཙ མོ་ཧོ ཡཱ ཙ ནི་ཙྩ་ས་ཉྙཱ ཡཱ ཙ ཨ་ཏྟ་ས་ཉྙཱ, ཨི་མཱ་ནི ཙ་ཏྟཱ་རི པ་དཱ་ནི ཨ་ཝི་ཛྫཾ བྷ་ཛ་ནྟི. ཨེ་ཏཱ་ནི ན་ཝ པ་དཱ་ནི ཨ་ཀུ་ས་ལཱ་ནི སུ་སཾ་ཁི་ཏྟཱ་ནི. ཨི་ཏི ཏ་ཡོ ན་ཡཱ ཨེ་ཀཾ ན་ཡཾ ན པ་ཝི་ཊྛཱ. ཨེ་ཝཾ ཨ་ཊྛཱ་ར་ས མཱུ་ལ་པ་དཱ་ནི ན་ནྡི་ཡཱ་ཝ་ཊྚ་ན་ཡེ ནི་དྡི་སི་ཏ་བྦཱ་ནི.
ཀ་ཐཾ ཨ་ཊྛཱ་ར་ས མཱུ་ལ་པ་དཱ་ནི, ཏི་པུ་ཀྑ་ལེ ན་ཡེ ཡུ་ཛྫ་ནྟི? ན་ཝ་ནྣཾ པ་དཱ་ནཾ ཀུ་ས་ལཱ་ནཾ, ཝི་པ་སྶ་ནཱ ཙ ཨ་མོ་ཧོ ཙ ཨ་ནི་ཙྩ་ས་ཉྙཱ ཙ ཨ་ན་ཏྟ་ས་ཉྙཱ ཙ, ཨི་མཱ་ནི ཙ་ཏྟཱ་རི པ་དཱ་ནི; ཨ་མོ་ཧོ ཙ ས་མ་ཐོ ཙ ཨ་ལོ་བྷོ ཙ ཨ་སུ་བྷ་ས་ཉྙཱ ཙ, ཨི་མཱ་ནི ཙ་ཏྟཱ་རི པ་དཱ་ནི; ལོ་བྷོ ཙ དོ་སོ ཙ, ཨེ་ཝཾ ཨི་མཱ་ནི ན་ཝ པ་དཱ་ནི ཏཱི་སུ ཀུ་ས་ལེ་སུ ཡོ་ཛེ་ཏ་བྦཱ་ནི. ཏ་ཏྠ ན་ཝ་ནྣཾ པ་དཱ་ནཾ ཨ་ཀུ་ས་ལཱ་ནཾ ཏ་ཎྷཱ ཙ ལོ་བྷོ ཙ སུ་བྷ་ས་ཉྙཱ ཙ སུ་ཁ་ས་ཉྙཱ ཙ, ཨི་མཱ་ནི ཙ་ཏྟཱ་རི པ་དཱ་ནི ལོ་བྷོ ཨ་ཀུ་ས་ལ་མཱུ་ལཾ; ཨ་ཝི་ཛྫཱ ཙ མོ་ཧོ ཙ ནི་ཙྩ་ས་ཉྙཱ ཙ ཨ་ཏྟ་ས་ཉྙཱ ཙ ཨ་ཡཾ མོ་ཧོ ཨ་ཡཾ དོ་སོ, ཡེ ཙ ཨི་མཱ་ནི ན་ཝ པ་དཱ་ནི ཏཱི་སུ ཨ་ཀུ་ས་ལེ་སུ ཡོ་ཛི་ཏཱ་ནི. ཨེ་ཝཾ ཨ་ཊྛཱ་ར་ས མཱུ་ལ་པ་དཱ་ནི ཀུ་ས་ལ་མཱུ་ལེ་སུ ཙ ཡོ་ཛེ་ཏྭཱ ཏི་པུ་ཀྑ་ལེ་ན ན་ཡེ་ན ནི་དྡི་སི་ཏ་བྦཱ་ནི.
ཀ་ཐཾ ཨ་ཊྛཱ་ར་ས མཱུ་ལ་པ་དཱ་ནི སཱི་ཧ་ཝི་ཀྐཱི་ལི༹་ཏེ ན་ཡེ ཡུ་ཛྫ་ནྟི? ཏ་ཎྷཱ ཙ སུ་བྷ་ས་ཉྙཱ ཙ, ཨ་ཡཾ པ་ཋ་མོ ཝི་པ་ལླཱ་སོ. ལོ་བྷོ ཙ སུ་ཁ་ས་ཉྙཱ ཙ, ཨ་ཡཾ དུ་ཏི་ཡོ ཝི་པ་ལླཱ་སོ. ཨ་ཝི་ཛྫཱ ཙ ནི་ཙྩ་ས་ཉྙཱ ཙ, ཨ་ཡཾ ཏ་ཏི་ཡོ ཝི་པ་ལླཱ་སོ. མོ་ཧོ ཙ ཨ་ཏྟ་ས་ཉྙཱ ཙ, ཨ་ཡཾ ཙ་ཏུ་ཏྠོ ཝི་པ་ལླཱ་སོ. ཨི་ཏི ན་ཝ པ་དཱ་ནི ཨ་ཀུ་ས་ལ་མཱུ་ལཱ་ནི ཙ་ཏཱུ་སུ པ་དེ་སུ ཡོ་ཛི་ཏཱ་ནི. ཏ་ཏྠ ན་ཝ་ནྣཾ མཱུ་ལ་པ་དཱ་ནཾ ཀུ་ས་ལཱ་ནཾ ས་མ་ཐོ ཙ ཨ་སུ་བྷ་ས་ཉྙཱ ཙ, ཨི་དཾ པ་ཋ་མཾ ས་ཏི་པ་ཊྛཱ་ནཾ. ཨ་ལོ་བྷོ ཙ དུ་ཀྑ་ས་ཉྙཱ ཙ, ཨི་དཾ དུ་ཏི་ཡཾ ས་ཏི་པ་ཊྛཱ་ནཾ. ཝི་པ་སྶ་ནཱ ཙ ཨ་ནི་ཙྩ་ས་ཉྙཱ ཙ, ཨི་དཾ ཏ་ཏི་ཡཾ ས་ཏི་པ་ཊྛཱ་ནཾ. ཨ་མོ་ཧོ ཙ ཨ་ན་ཏྟ་ས་ཉྙཱ ཙ, ཨི་དཾ ཙ་ཏུ་ཏྠཾ ས་ཏི་པ་ཊྛཱ་ནཾ. ཨི་མཱ་ནི ཨ་ཊྛཱ་ར་ས མཱུ་ལ་པ་དཱ་ནི སཱི་ཧ་ཝི་ཀྐཱི་ལི༹་ཏ་ན་ཡཾ ཨ་ནུ་པ་ཝི་ཊྛཱ་ནི. ཨི་མེ་སཾ ཏི་ཎྞཾ ན་ཡཱ་ནཾ ཡཱ བྷཱུ་མི ཙ ཡོ རཱ་གོ ཙ ཡོ དོ་སོ ཙ ཨེ་ཀཾ ན་ཡཾ པ་ཝི་ས་ཏི. ཨེ་ཀ་སྶ ན་ཡ་སྶ ཨ་ཀུ་ས་ལེ ཝཱ དྷ་མྨེ ཀུ་ས་ལེ ཝཱ དྷ་མྨེ ཝི་ཉྙཱ་ཏེ པ་ཊི་པ་ཀྑོ ཨ་ནྭེ་སི་ཏ་བྦོ, པ་ཊི་པ་ཀྑེ ཨ་ནྭེ་སི་ཏྭཱ སོ ན་ཡོ ནི་དྡི་སི་ཏ་བྦོ, ཏ་མྷི ན་ཡེ ནི་དྡི་ཊྛོ. ཡ་ཐཱ ཨེ་ཀ་མྷི ན་ཡེ ས་བྦེ ན་ཡཱ པ་ཝི་ཊྛཱ ཏ་ཐཱ ནི་དྡི་སི་ཏ་བྦཱ. ཨེ་ཀ་མྷི ཙ ན་ཡེ ཨ་ཊྛཱ་ར་ས མཱུ་ལ་པ་དཱ་ནི པ་ཝི་ཊྛཱ་ནི, ཏ་མྷི དྷ་མྨེ ཝི་ཉྙཱ་ཏེ ས་བྦེ དྷ་མྨཱ ཝི་ཉྙཱ་ཏཱ ཧོ་ནྟི. ཨི་མེ་སཾ ཏི་ཎྞཾ ན་ཡཱ་ནཾ སཱི་ཧ་ཝི་ཀྐཱི་ལི༹་ཏ་ན་ཡ་སྶ ཙ་ཏྟཱ་རི ཕ་ལཱ་ནི པ་རི་ཡོ་སཱ་ནཾ. པ་ཋ་མཱ་ཡ དི་སཱ་ཡ པ་ཋ་མཾ ཕ་ལཾ, དུ་ཏི་ཡཱ་ཡ དི་སཱ་ཡ དུ་ཏི་ཡཾ ཕ་ལཾ, ཏ་ཏི་ཡཱ་ཡ དི་སཱ་ཡ ཏ་ཏི་ཡཾ ཕ་ལཾ, ཙ་ཏུ་ཏྠཱ་ཡ དི་སཱ་ཡ ཙ་ཏུ་ཏྠཾ ཕ་ལཾ. ཏི་པུ་ཀྑ་ལ་སྶ ན་ཡ་སྶ ཏཱི་ཎི ཝི་མོ་ཀྑ་མུ་ཁཱ་ནི པ་རི་ཡོ་སཱ་ནཾ. པ་ཋ་མཱ་ཡ དི་སཱ་ཡ ཨ་པྤ་ཎི་ཧི་ཏཾ, དུ་ཏི་ཡཱ་ཡ དི་སཱ་ཡ སུ་ཉྙ་ཏཾ, ཏ་ཏི་ཡཱ་ཡ དི་སཱ་ཡ ཨ་ནི་མི་ཏྟཾ. ན་ནྡི་ཡཱ་ཝ་ཊྚ་སྶ ན་ཡ་སྶ རཱ་ག་ཝི་རཱ་གཱ ཙེ་ཏོ་ཝི་མུ་ཏྟི ཨ་ཝི་ཛྫཱ་ཝི་རཱ་གཱ ཙ པ་ཉྙཱ་ཝི་མུ་ཏྟི པ་རི་ཡོ་སཱ་ནཾ. པ་ཋ་མཱ་ཡ དི་སཱ་ཡ རཱ་ག་ཝི་རཱ་གཱ ཙེ་ཏོ་ཝི་མུ་ཏྟི, དུ་ཏི་ཡཱ་ཡ དི་སཱ་ཡ ཨ་ཝི་ཛྫཱ་ཝི་རཱ་གཱ པ་ཉྙཱ་ཝི་མུ་ཏྟི. ཨི་མེ ཏ་ཡོ ན་ཡཱ ཨི་མེ་སཾ ཏི་ཎྞཾ ན་ཡཱ་ནཾ ཨ་ཊྛཱ་ར་ས་ནྣཾ མཱུ་ལ་པ་དཱ་ནཾ ཨཱ་ལོ་ཀ་ནཱ, ཨ་ཡཾ ཝུ་ཙྩ་ཏི དི་སཱ་ལོ་ཀ་ནོ [དི་སཱ་ལོ་ཙ་ནོ (ཀ.)] ན་ཡོ. ཨཱ་ལོ་ཀེ་ཏྭཱ་ན ཛཱ་ནཱ་ཏི ‘‘ཨ་ཡཾ དྷ་མྨོ ཨི་མཾ དྷ་མྨཾ བྷ་ཛ་ཏཱི’’ཏི ས་མྨཱ ཡོ་ཛ་ནཱ. ཀུ་ས་ལ་པ་ཀྑེ ཨ་ཀུ་ས་ལ་པ་ཀྑེ ཙ ཨ་ཡཾ ན་ཡོ ཨ་ངྐུ་སོ ནཱ་མ. ཨི་མེ པ་ཉྩ ན་ཡཱ.
ཏ་ཏྠི་མཱ ཨུ་དྡཱ་ན་གཱ་ཐཱ
ཏ་ཎྷཱ ཙ ཨ་ཝི་ཛྫཱ་པི ཙ, ལོ་བྷོ དོ་སོ ཏ་ཐེ་ཝ མོ་ཧོ ཙ;
ཙ་ཏྟཱ་རོ ཙ ཝི་པ་ལླཱ་སཱ, ཀི་ལེ་ས་བྷཱུ་མཱི ན་ཝ པ་དཱ་ནི.
ཡེ ཙ ས་ཏི་པ་ཊྛཱ་ནཱ, ས་མ་ཐོ ཙ ཝི་པ་སྶ་ནཱ ཀུ་ས་ལ་མཱུ་ལཱ;
ཨེ་ཏཾ ས་བྦཾ ཀུ་ས་ལཾ, ཨི་ནྡྲི་ཡ་བྷཱུ་མཱི ན་ཝ པ་དཱ་ནི.
ས་བྦ་ཀུ་ས་ལཾ ན་ཝ་ཧི པ་དེ་ཧི ཡུ་ཛྫ་ཏི, ན་ཝ་ཧི ཙེ་ཝ ཨ་ཀུ་ས་ལཾ;
ཨེ་ཏེ ཏེ མཱུ་ལ་པ་དཱ, ཨུ་བྷ་ཏོ ཨ་ཊྛཱ་ར་ས པ་དཱ་ནི.
ཏ་ཎྷཱ ཙེ་ཝ ཨ་ཝི་ཛྫཱ ཙ, ས་མ་ཐོ ཙ ཝི་པ་སྶ་ནཱ;
ཡོ ནེ་ཏི ས་བྦེ་སུ ཡོ་ག་ཡུ་ཏྟོ, ཨ་ཡཾ ན་ཡོ ན་ནྡི་ཡཱ་ཝ་ཊྚོ.
ཡཾ ཀུ་ས་ལ་མཱུ་ལེ་ཧི, ན་ཡ་ཏི ཀུ་ས་ལ་ཨ་ཀུ་ས་ལ་མཱུ་ལེ་ཧི;
བྷཱུ་ཏཾ ཏ་ཐཾ ཨ་ཝི་ཏ་ཐཾ, ཏི་པུ་ཀྑ་ལཾ ཏཾ ན་ཡཾ ཨཱ་ཧུ.
སོ ནེ་ཏི ཝི་པ་ལླཱ་སེ་ཧི, ཀི་ལེ་ས་ཨི་ནྡྲི་ཡེ་ཧི ཙ;
དྷ་མྨེ ཏཾ ན་ཡཾ ཝི་ན་ཡ་མཱ་ཧུ, སཱི་ཧ་ཝི་ཀྐཱི་ལི༹་ཏཾ ནཱ་མ.
ཝེ་ཡྻཱ་ཀ་ར་ཎེ ཝུ་ཏྟེ, ཀུ་ས་ལ་ཏཱ་ཧི ཨ་ཀུ་ས་ལ་ཏཱ་ཧི ཙ;
ཏ་ཡོ ཨཱ་ལོ་ཀ་ཡ་ཏི, ཨ་ཡཾ ན་ཡོ དི་སཱ་ལོ་ཙ་ནོ ནཱ་མ.
ཨོ་ལོ་ཀེ་ཏྭཱ དི་སཱ་ལོ་ཙ་ནེ་ན, ཨུ་ཀྑི་པི་ཡ ཡཾ ས་མཱ་ནེ་ཏི;
ས་བྦེ ཀུ་ས་ལཱ་ཀུ་ས་ལེ, ཨ་ཡཾ ན་ཡོ ཨ་ངྐུ་སོ ནཱ་མ.
ན་ཡ་ས་མུ་ཊྛཱ་ནཾ.
པེ་ཊ་ཀོ་པ་དེ་སེ མ་ཧཱ་ཀ་ཙྩཱ་ཡ་ན་སྶ ཐེ་ར་སྶ སུ་ཏྟ་ཝི་བྷ་ངྒ་སྶ