༦. ཛ་རཱ་སུ་ཏྟ་ནི་དྡེ་སོ
ཨ་ཐ ཛ་རཱ་སུ་ཏྟ་ནི་དྡེ་སཾ ཝ་ཀྑ་ཏི –
༣༩. ཨ་པྤཾ ཝ་ཏ ཛཱི་ཝི་ཏཾ ཨི་དཾ, ཨོ་རཾ ཝ་སྶ་ས་ཏཱ་པི མི་ཡྻ་ཏི [མཱི་ཡ་ཏི (སཱི.)] ;
ཡོ ཙེ་པི ཨ་ཏི་ཙྩ ཛཱི་ཝ་ཏི, ཨ་ཐ ཁོ སོ ཛ་ར་སཱ་པི མི་ཡྻ་ཏི.
ཨ་པྤཾ ཝ་ཏ ཛཱི་ཝི་ཏཾ ཨི་དནྟི. ཛཱི་ཝི་ཏནྟི ཨཱ་ཡུ ཋི་ཏི ཡ་པ་ནཱ ཡཱ་པ་ནཱ ཨི་རི་ཡ་ནཱ ཝ་ཏྟ་ནཱ པཱ་ལ་ནཱ ཛཱི་ཝི་ཏཾ ཛཱི་ཝི་ཏི་ནྡྲི་ཡཾ. ཨ་པི ཙ, དྭཱི་ཧི ཀཱ་ར་ཎེ་ཧི ཨ་པྤ་ཀཾ ཛཱི་ཝི་ཏཾ ཐོ་ཀཾ ཛཱི་ཝི་ཏཾ – ཋི་ཏི་པ་རི་ཏྟ་ཏཱ་ཡ ཝཱ ཨ་པྤ་ཀཾ ཛཱི་ཝི་ཏཾ, ས་ར་ས་པ་རི་ཏྟ་ཏཱ་ཡ ཝཱ ཨ་པྤ་ཀཾ ཛཱི་ཝི་ཏཾ. ཀ་ཐཾ ཋི་ཏི་པ་རི་ཏྟ་ཏཱ་ཡ ཝཱ ཨ་པྤ་ཀཾ ཛཱི་ཝི་ཏཾ? ཨ་ཏཱི་ཏེ ཙི་ཏྟ་ཀྑ་ཎེ ཛཱི་ཝི་ཏྠ, ན ཛཱི་ཝ་ཏི ན ཛཱི་ཝི་སྶ་ཏི; ཨ་ནཱ་ག་ཏེ ཙི་ཏྟ་ཀྑ་ཎེ ཛཱི་ཝི་སྶ་ཏི, ན ཛཱི་ཝ་ཏི ན ཛཱི་ཝི་ཏྠ; པ་ཙྩུ་པྤ་ནྣེ ཙི་ཏྟ་ཀྑ་ཎེ ཛཱི་ཝ་ཏི, ན ཛཱི་ཝི་ཏྠ ན ཛཱི་ཝི་སྶ་ཏི.
‘‘ཛཱི་ཝི་ཏཾ ཨ་ཏྟ་བྷཱ་ཝོ ཙ, སུ་ཁ་དུ་ཀྑཱ ཙ ཀེ་ཝ་ལཱ;
ཨེ་ཀ་ཙི་ཏྟ་ས་མཱ་ཡུ་ཏྟཱ, ལ་ཧུ་སོ ཝ་ཏྟ་ཏེ ཁ་ཎོ.
‘‘ཙུ་ལླཱ་སཱི་ཏི་ས་ཧ་སྶཱ་ནི, ཀ་པྤཱ ཏི་ཊྛ་ནྟི ཡེ མ་རཱུ;
ན ཏྭེ་ཝ ཏེ་པི ཛཱི་ཝ་ནྟི, དྭཱི་ཧི ཙི་ཏྟེ་ཧི སཾ་ཡུ་ཏཱ [ས་མོ་ཧི་ཏཱ (སཱི. སྱཱ. ཀ.)].
‘‘ཡེ ནི་རུ་དྡྷཱ མ་ར་ནྟ་སྶ, ཏི་ཊྛ་མཱ་ན་སྶ ཝཱ ཨི་དྷ;
ས་བྦེ་པི ས་དི་སཱ ཁ་ནྡྷཱ, ག་ཏཱ ཨ་པྤ་ཊི་ས་ནྡྷི་ཀཱ.
‘‘ཨ་ན་ནྟ་རཱ ཙ ཡེ བྷ་གྒཱ, ཡེ ཙ བྷ་གྒཱ ཨ་ནཱ་ག་ཏཱ;
ཏ་ད་ནྟ་རེ ནི་རུ་དྡྷཱ་ནཾ, ཝེ་ས་མཾ ན་ཏྠི ལ་ཀྑ་ཎེ.
‘‘ཨ་ནི་བྦ་ཏྟེ་ན ན ཛཱ་ཏོ, པ་ཙྩུ་པྤ་ནྣེ་ན ཛཱི་ཝ་ཏི;
ཙི་ཏྟ་བྷ་གྒཱ མ་ཏོ ལོ་ཀོ, པ་ཉྙ་ཏྟི པ་ར་མ་ཏྠི་ཡཱ.
‘‘ཡ་ཐཱ ནི་ནྣཱ པ་ཝ་ཏྟ་ནྟི, ཚ་ནྡེ་ན པ་རི་ཎཱ་མི་ཏཱ;
ཨ་ཙྪི་ནྣ་དྷཱ་རཱ ཝ་ཏྟ་ནྟི, ས་ལཱ༹་ཡ་ཏ་ན་པ་ཙྩ་ཡཱ.
‘‘ཨ་ནི་དྷཱ་ན་ག་ཏཱ བྷ་གྒཱ, པུ་ཉྫོ ན་ཏྠི ཨ་ནཱ་ག་ཏེ;
ནི་བྦ་ཏྟཱ ཡེ ཙ ཏི་ཊྛ་ནྟི, ཨཱ་ར་གྒེ སཱ་ས་པཱུ་པ་མཱ.
‘‘ནི་བྦ་ཏྟཱ་ན་ཉྩ དྷ་མྨཱ་ནཾ, བྷ་ངྒོ ནེ་སཾ པུ་ར་ཀྑ་ཏོ;
པ་ལོ་ཀ་དྷ་མྨཱ ཏི་ཊྛ་ནྟི, པུ་རཱ་ཎེ་ཧི ཨ་མི་སྶི་ཏཱ.
‘‘ཨ་ད་སྶ་ན་ཏོ ཨཱ་ཡ་ནྟི, བྷ་ངྒཱ ག་ཙྪ་ནྟི ད་སྶ་ནཾ;
ཝི་ཛྫུ་པྤཱ་དོ་ཝ ཨཱ་ཀཱ་སེ, ཨུ་པྤ་ཛྫ་ནྟི ཝ་ཡ་ནྟི ཙཱ’’ཏི.
ཨེ་ཝཾ ཋི་ཏི་པ་རི་ཏྟ་ཏཱ་ཡ ཨ་པྤ་ཀཾ ཛཱི་ཝི་ཏཾ.
ཀ་ཐཾ ས་ར་ས་པ་རི་ཏྟ་ཏཱ་ཡ ཨ་པྤ་ཀཾ ཛཱི་ཝི་ཏཾ? ཨ་སྶཱ་སཱུ་པ་ནི་བ་དྡྷཾ [ཨ་སྶཱ་སཱུ་པ་ནི་བ་ནྡྷཾ (ཀ.)] ཛཱི་ཝི་ཏཾ, པ་སྶཱ་སཱུ་པ་ནི་བ་དྡྷཾ ཛཱི་ཝི་ཏཾ, ཨ་སྶཱ་ས་པ་སྶཱ་སཱུ་པ་ནི་བ་དྡྷཾ ཛཱི་ཝི་ཏཾ, མ་ཧཱ་བྷཱུ་ཏཱུ་པ་ནི་བ་དྡྷཾ ཛཱི་ཝི་ཏཾ, ཀ་བ་ལཱི༹་ཀཱ་རཱ་ཧཱ་རཱུ་པ་ནི་བ་དྡྷཾ ཛཱི་ཝི་ཏཾ, ཨུ་སྨཱུ་པ་ནི་བ་དྡྷཾ ཛཱི་ཝི་ཏཾ, ཝི་ཉྙཱ་ཎཱུ་པ་ནི་བ་དྡྷཾ ཛཱི་ཝི་ཏཾ. མཱུ་ལ་མྤི ཨི་མེ་སཾ དུ་བྦ་ལཾ, པུ་བྦ་ཧེ་ཏཱུ་པི ཨི་མེ་སཾ དུ་བྦ་ལཱ, ཡེ པ་ཙྩ་ཡཱ ཏེ་པི དུ་བྦ་ལཱ, ཡེ་པི པ་བྷཱ་ཝི་ཀཱ ཏེ་པི དུ་བྦ་ལཱ, ས་ཧ་བྷཱུ་པི ཨི་མེ་སཾ དུ་བྦ་ལཱ, ས་མྤ་ཡོ་གཱ་པི ཨི་མེ་སཾ དུ་བྦ་ལཱ, ས་ཧ་ཛཱ་པི ཨི་མེ་སཾ དུ་བྦ་ལཱ, ཡཱ་པི པ་ཡོ་ཛི་ཀཱ སཱ་པི དུ་བྦ་ལཱ. ཨ་ཉྙ་མ་ཉྙཾ ཨི་མེ ནི་ཙྩ་དུ་བྦ་ལཱ, ཨ་ཉྙ་མ་ཉྙཾ ཨ་ན་ཝ་ཊྛི་ཏཱ ཨི་མེ. ཨ་ཉྙ་མ་ཉྙཾ པ་རི་པཱ་ཏ་ཡ་ནྟི ཨི་མེ, ཨ་ཉྙ་མ་ཉྙ་སྶ ཧི ན་ཏྠི ཏཱ་ཡི་ཏཱ, ན ཙཱ་པི ཋ་པེ་ནྟི ཨ་ཉྙ་མ་ཉྙཾ ཨི་མེ. ཡོ་པི ནི་བྦ་ཏྟ་ཀོ སོ ན ཝི་ཛྫ་ཏི.
‘‘ན ཙ ཀེ་ན་ཙི ཀོ་ཙི ཧཱ་ཡ་ཏི, ག་ནྡྷ་བྦཱ ཙ ཨི་མེ ཧི ས་བྦ་སོ;
པུ་རི་མེ་ཧི པ་བྷཱ་ཝི་ཀཱ ཨི་མེ, ཡེ་པི པ་བྷཱ་ཝི་ཀཱ ཏེ པུ་རེ མ་ཏཱ;
པུ་རི་མཱ་པི ཙ པ་ཙྪི་མཱ་པི ཙ, ཨ་ཉྙ་མ་ཉྙཾ ན ཀ་དཱ་ཙི མ་དྡ་སཾ་སཱུ’’ཏི.
ཨེ་ཝཾ ས་ར་ས་པ་རི་ཏྟ་ཏཱ་ཡ ཨ་པྤ་ཀཾ ཛཱི་ཝི་ཏཾ.
ཨ་པི ཙ, ཙཱ་ཏུ་མ་ཧཱ་རཱ་ཛི་ཀཱ་ནཾ [ཙཱ་ཏུ་མྨ་ཧཱ་རཱ་ཛི་ཀཱ་ནཾ (སཱི. སྱཱ.)] དེ་ཝཱ་ནཾ ཛཱི་ཝི་ཏཾ ཨུ་པཱ་དཱ་ཡ མ་ནུ་སྶཱ་ནཾ ཨ་པྤ་ཀཾ ཛཱི་ཝི་ཏཾ པ་རི་ཏྟཾ ཛཱི་ཝི་ཏཾ ཐོ་ཀཾ ཛཱི་ཝི་ཏཾ ཁ་ཎི་ཀཾ ཛཱི་ཝི་ཏཾ ལ་ཧུ་ཀཾ ཛཱི་ཝི་ཏཾ ཨི་ཏྟ་རཾ ཛཱི་ཝི་ཏཾ ཨ་ན་དྡྷ་ནཱི་ཡཾ ཛཱི་ཝི་ཏཾ ན་ཙི་ར་ཊྛི་ཏི་ཀཾ ཛཱི་ཝི་ཏཾ. ཏཱ་ཝ་ཏིཾ་སཱ་ནཾ དེ་ཝཱ་ནཾ…པེ… ཡཱ་མཱ་ནཾ དེ་ཝཱ་ནཾ… ཏུ་སི་ཏཱ་ནཾ དེ་ཝཱ་ནཾ… ནི་མྨཱ་ན་ར་ཏཱི་ནཾ དེ་ཝཱ་ནཾ… པ་ར་ནི་མྨི་ཏ་ཝ་ས་ཝ་ཏྟཱི་ནཾ དེ་ཝཱ་ནཾ… བྲ་ཧྨ་ཀཱ་ཡི་ཀཱ་ནཾ དེ་ཝཱ་ནཾ ཛཱི་ཝི་ཏཾ ཨུ་པཱ་དཱ་ཡ མ་ནུ་སྶཱ་ནཾ ཨ་པྤ་ཀཾ ཛཱི་ཝི་ཏཾ པ་རི་ཏྟཾ ཛཱི་ཝི་ཏཾ ཐོ་ཀཾ ཛཱི་ཝི་ཏཾ ཁ་ཎི་ཀཾ ཛཱི་ཝི་ཏཾ ལ་ཧུ་ཀཾ ཛཱི་ཝི་ཏཾ ཨི་ཏྟ་རཾ ཛཱི་ཝི་ཏཾ ཨ་ན་དྡྷ་ནཱི་ཡཾ ཛཱི་ཝི་ཏཾ ན་ཙི་ར་ཊྛི་ཏི་ཀཾ ཛཱི་ཝི་ཏཾ. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཨ་པྤ་མི་དཾ, བྷི་ཀྑ་ཝེ, མ་ནུ་སྶཱ་ནཾ ཨཱ་ཡུ, ག་མ་ནི་ཡོ ས་མྤ་རཱ་ཡོ, མ་ནྟཱ་ཡ བོ་དྡྷ་བྦཾ, ཀ་ཏྟ་བྦཾ ཀུ་ས་ལཾ, ཙ་རི་ཏ་བྦཾ བྲ་ཧྨ་ཙ་རི་ཡཾ, ན་ཏྠི ཛཱ་ཏ་སྶ ཨ་མ་ར་ཎཾ. ཡོ, བྷི་ཀྑ་ཝེ, ཙི་རཾ ཛཱི་ཝ་ཏི, སོ ཝ་སྶ་ས་ཏཾ ཨ་པྤཾ ཝཱ བྷི་ཡྻོ.
‘‘ཨ་པྤ་མཱ་ཡུ མ་ནུ་སྶཱ་ནཾ, ཧཱི་ལེ༹་ཡྻ ནཾ སུ་པོ་རི་སོ;
ཙ་རེ་ཡྻཱ་དི་ཏྟ་སཱི་སོ་ཝ ན་ཏྠི མ་ཙྩུ་སྶ་ནཱ་ག་མོ.
‘‘ཨ་ཙྩ་ཡ་ནྟི ཨ་ཧོ་ར་ཏྟཱ, ཛཱི་ཝི་ཏཾ ཨུ་པ་རུ་ཛ྄ཛྷ་ཏི;
ཨཱ་ཡུ ཁི་ཡྻ་ཏི མ་ཙྩཱ་ནཾ, ཀུ་ནྣ་དཱི་ནཾ་ཝ ཨོ་ད་ཀ’’ནྟི.
ཨ་པྤཾ ཝ་ཏ ཛཱི་ཝི་ཏཾ ཨི་དཾ.
ཨོ་རཾ ཝ་སྶ་ས་ཏཱ་པི མི་ཡྻ་ཏཱིཏི. ཀ་ལ་ལ་ཀཱ་ལེ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, ཨ་བྦུ་ད་ཀཱ་ལེ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, པེ་སི་ཀཱ་ལེ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, གྷ་ན་ཀཱ་ལེ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, པ་སཱ་ཁ་ཀཱ་ལེ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, ཛཱ་ཏ་མ་ཏྟོ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, སཱུ་ཏི་གྷ་རེ་པི [པ་སཱུ་ཏི་གྷ་རེ (སྱཱ.), སཱུ་ཏི་ཀ་གྷ་རེ (ཀ.)] ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, ཨ་དྡྷ་མཱ་སི་ཀོ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, མཱ་སི་ཀོ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, དྭེ་མཱ་སི་ཀོ་པི…པེ… ཏེ་མཱ་སི་ཀོ་པི… ཙ་ཏུ་མཱ་སི་ཀོ་པི… པ་ཉྩ་མཱ་སི་ཀོ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, ཚ་མཱ་སི་ཀོ་པི… ས་ཏྟ་མཱ་སི་ཀོ་པི… ཨ་ཊྛ་མཱ་སི་ཀོ་པི… ན་ཝ་མཱ་སི་ཀོ་པི… ད་ས་མཱ་སི་ཀོ་པི… སཾ་ཝ་ཙྪ་རི་ཀོ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, དྭེ་ཝ་སྶི་ཀོ་པི… ཏི་ཝ་སྶི་ཀོ་པི… ཙ་ཏུ་ཝ་སྶི་ཀོ་པི… པ་ཉྩ་ཝ་སྶི་ཀོ་པི … ཚ་ཝ་སྶི་ཀོ་པི… ས་ཏྟ་ཝ་སྶི་ཀོ་པི… ཨ་ཊྛ་ཝ་སྶི་ཀོ་པི… ན་ཝ་ཝ་སྶི་ཀོ་པི… ད་ས་ཝ་སྶི་ཀོ་པི… ཝཱི་ས་ཏི་ཝ་སྶི་ཀོ་པི… ཏིཾ་ས་ཝ་སྶི་ཀོ་པི… ཙ་ཏྟཱ་རཱི་ས་ཝ་སྶི་ཀོ་པི… པ་ཉྙཱ་ས་ཝ་སྶི་ཀོ་པི… ས་ཊྛི་ཝ་སྶི་ཀོ་པི… ས་ཏྟ་ཏི་ཝ་སྶི་ཀོ་པི… ཨ་སཱི་ཏི་ཝ་སྶི་ཀོ་པི… ན་ཝུ་ཏི་ཝ་སྶི་ཀོ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏཱི་ཏི – ཨོ་རཾ ཝ་སྶ་ས་ཏཱ་པི མི་ཡྻ་ཏི.
ཡོ ཙེ་པི ཨ་ཏི་ཙྩ ཛཱི་ཝ་ཏཱིཏི. ཡོ ཝ་སྶ་ས་ཏཾ ཨ་ཏི་ཀྐ་མི་ཏྭཱ ཛཱི་ཝ་ཏི སོ ཨེ་ཀཾ ཝཱ ཝ་སྶཾ ཛཱི་ཝ་ཏི, དྭེ ཝཱ ཝ་སྶཱ་ནི ཛཱི་ཝ་ཏི, ཏཱི་ཎི ཝཱ ཝ་སྶཱ་ནི ཛཱི་ཝ་ཏི, ཙ་ཏྟཱ་རི ཝཱ ཝ་སྶཱ་ནི ཛཱི་ཝ་ཏི, པ་ཉྩ ཝཱ ཝ་སྶཱ་ནི ཛཱི་ཝ་ཏི…པེ… ད་ས ཝཱ ཝ་སྶཱ་ནི ཛཱི་ཝ་ཏི, ཝཱི་ས་ཏི ཝཱ ཝ་སྶཱ་ནི ཛཱི་ཝ་ཏི, ཏིཾ་སཾ ཝཱ ཝ་སྶཱ་ནི ཛཱི་ཝ་ཏི, ཙ་ཏྟཱ་རཱི་སཾ ཝཱ ཝ་སྶཱ་ནི ཛཱི་ཝ་ཏཱི་ཏི – ཡོ ཙེ་པི ཨ་ཏི་ཙྩ ཛཱི་ཝ་ཏི. ཨ་ཐ ཁོ སོ ཛ་ར་སཱ་པི མི་ཡྻ་ཏཱིཏི. ཡ་དཱ ཛི་ཎྞོ ཧོ་ཏི ཝུ་དྡྷོ མ་ཧ་ལླ་ཀོ ཨ་དྡྷ་ག་ཏོ ཝ་ཡོ་ཨ་ནུ་པྤ་ཏྟོ ཁ་ཎྜ་ད་ནྟོ པ་ལི་ཏ་ཀེ་སོ ཝི་ལཱུ་ནཾ ཁ་ལི་ཏ་སི་རོ [ཁ་ལི་ཏཾ སི་རོ (སཱི.)] ཝ་ལི་ནཾ ཏི་ལ་ཀཱ་ཧ་ཏ་ག་ཏྟོ ཝ་ངྐོ བྷོ་གྒོ ད་ཎྜ་པ་རཱ་ཡ་ནོ, སོ ཛ་རཱ་ཡ་པི ཙ་ཝ་ཏི མ་ར་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, ན་ཏྠི མ་ར་ཎ་མྷཱ མོ་ཀྑོ.
‘‘ཕ་ལཱ་ན་མི་ཝ པ་ཀྐཱ་ནཾ, པཱ་ཏོ པ་ཏ་ན་ཏོ [པ་པ་ཏ་ཏོ (སཱི.)] བྷ་ཡཾ;
ཨེ་ཝཾ ཛཱ་ཏཱ་ན མ་ཙྩཱ་ནཾ, ནི་ཙྩཾ མ་ར་ཎ་ཏོ བྷ་ཡཾ.
‘‘ཡ་ཐཱ་པི ཀུ་མྦྷ་ཀཱ་ར་སྶ, ཀ་ཏཱ མ་ཏྟི་ཀ་བྷཱ་ཛ་ནཱ;
ས་བྦེ བྷེ་ད་ན་པ་རི་ཡ་ནྟཱ, ཨེ་ཝཾ མ་ཙྩཱ་ན ཛཱི་ཝི་ཏཾ.
‘‘ད་ཧ་རཱ ཙ མ་ཧ་ནྟཱ ཙ, ཡེ བཱ་ལཱ ཡེ ཙ པ་ཎྜི་ཏཱ;
ས་བྦེ མ་ཙྩུ་ཝ་སཾ ཡ་ནྟི, ས་བྦེ མ་ཙྩུ་པ་རཱ་ཡ་ནཱ.
‘‘ཏེ་སཾ མ་ཙྩུ་པ་རེ་ཏཱ་ནཾ, ག་ཙྪ་ཏཾ པ་ར་ལོ་ཀ་ཏོ;
ན པི་ཏཱ ཏཱ་ཡ་ཏེ པུ་ཏྟཾ, ཉཱ་ཏཱི ཝཱ པ་ན ཉཱ་ཏ་ཀེ.
‘‘པེ་ཀྑ་ཏ་ཉྙེ་ཝ ཉཱ་ཏཱི་ནཾ, པ་སྶ ལཱ་ལ་པྤ་ཏཾ པུ་ཐུ;
ཨེ་ཀ་མེ་ཀོ་ཝ མ་ཙྩཱ་ནཾ, གོ་ཝ་ཛ྄ཛྷོ ཝི་ཡ ནི་ཡྻ་ཏི;
ཨེ་ཝ་མ་བྦྷཱ་ཧ་ཏོ ལོ་ཀོ, མ་ཙྩུ་ནཱ ཙ ཛ་རཱ་ཡ ཙཱ’’ཏི.
ཨ་ཐ ཁོ སོ ཛ་ར་སཱ་པི མི་ཡྻ་ཏི.
ཏེ་ནཱ་ཧ བྷ་ག་ཝཱ –
‘‘ཨ་པྤཾ ཝ་ཏ ཛཱི་ཝི་ཏཾ ཨི་དཾ, ཨོ་རཾ ཝ་སྶ་ས་ཏཱ་པི མི་ཡྻ་ཏི;
ཡོ ཙེ་པི ཨ་ཏི་ཙྩ ཛཱི་ཝ་ཏི, ཨ་ཐ ཁོ སོ ཛ་ར་སཱ་པི མི་ཡྻ་ཏཱི’’ཏི.
༤༠. སོ་ཙ་ནྟི ཛ་ནཱ མ་མཱ་ཡི་ཏེ, ན ཧི ས་ནྟི ནི་ཙྩཱ པ་རི་གྒ་ཧཱ;
ཝི་ནཱ་བྷཱ་ཝཾ ས་ནྟ་མེ་ཝི་དཾ, ཨི་ཏི དི་སྭཱ ནཱ་གཱ་ར་མཱ་ཝ་སེ.
སོ་ཙ་ནྟི ཛ་ནཱ མ་མཱ་ཡི་ཏེཏི. ཛ་ནཱཏི ཁ་ཏྟི་ཡཱ ཙ བྲཱ་ཧྨ་ཎཱ ཙ ཝེ་སྶཱ ཙ སུ་དྡཱ ཙ ག་ཧ་ཊྛཱ ཙ པ་བྦ་ཛི་ཏཱ ཙ དེ་ཝཱ ཙ མ་ནུ་སྶཱ ཙ. མ་མ་ཏྟཱཏི དྭེ མ་མ་ཏྟཱ – ཏ་ཎྷཱ་མ་མ་ཏྟ་ཉྩ དི་ཊྛི་མ་མ་ཏྟ་ཉྩ…པེ… ཨི་དཾ ཏ་ཎྷཱ་མ་མ་ཏྟཾ…པེ… ཨི་དཾ དི་ཊྛི་མ་མ་ཏྟཾ. མ་མཱ་ཡི་ཏཾ ཝ་ཏྠུཾ ཨ་ཙྪེ་ད་ས་ངྐི་ནོ་པི སོ་ཙ་ནྟི, ཨ་ཙྪི་ཛྫ་ནྟེ་པི སོ་ཙ་ནྟི, ཨ་ཙྪི་ནྣེ་པི སོ་ཙ་ནྟི. མ་མཱ་ཡི་ཏཾ ཝ་ཏྠུཾ ཝི་པ་རི་ཎཱ་མ་ས་ངྐི་ནོ་པི སོ་ཙ་ནྟི, ཝི་པ་རི་ཎཱ་མ་ནྟེ་པི སོ་ཙ་ནྟི, ཝི་པ་རི་ཎ་ཏེ་པི སོ་ཙ་ནྟི ཀི་ལ་མ་ནྟི པ་རི་དེ་ཝ་ནྟི ཨུ་ར་ཏྟཱ་ལི༹ཾ ཀ་ནྡ་ནྟི ས་མྨོ་ཧཾ ཨཱ་པ་ཛྫ་ནྟཱི་ཏི – སོ་ཙ་ནྟི ཛ་ནཱ མ་མཱ་ཡི་ཏེ.
ན ཧི ས་ནྟི ནི་ཙྩཱ པ་རི་གྒ་ཧཱཏི. དྭེ པ་རི་གྒ་ཧཱ – ཏ་ཎྷཱ་པ་རི་གྒ་ཧོ ཙ དི་ཊྛི་པ་རི་གྒ་ཧོ ཙ…པེ… ཨ་ཡཾ ཏ་ཎྷཱ་པ་རི་གྒ་ཧོ…པེ… ཨ་ཡཾ དི་ཊྛི་པ་རི་གྒ་ཧོ. ཏ་ཎྷཱ་པ་རི་གྒ་ཧོ ཨ་ནི་ཙྩོ ས་ངྑ་ཏོ པ་ཊི་ཙྩ་ས་མུ་པྤ་ནྣོ ཁ་ཡ་དྷ་མྨོ ཝ་ཡ་དྷ་མྨོ ཝི་རཱ་ག་དྷ་མྨོ ནི་རོ་དྷ་དྷ་མྨོ ཝི་པ་རི་ཎཱ་མ་དྷ་མྨོ. དི་ཊྛི་པ་རི་གྒ་ཧོ་པི ཨ་ནི་ཙྩོ ས་ངྑ་ཏོ པ་ཊི་ཙྩ་ས་མུ་པྤ་ནྣོ ཁ་ཡ་དྷ་མྨོ ཝ་ཡ་དྷ་མྨོ ཝི་རཱ་ག་དྷ་མྨོ ནི་རོ་དྷ་དྷ་མྨོ ཝི་པ་རི་ཎཱ་མ་དྷ་མྨོ. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘པ་སྶ་ཐ ནོ ཏུ་མྷེ, བྷི་ཀྑ་ཝེ, ཏཾ པ་རི་གྒ་ཧཾ ཡྭཱ་ཡཾ པ་རི་གྒ་ཧོ ནི་ཙྩོ དྷུ་ཝོ ས་སྶ་ཏོ ཨ་ཝི་པ་རི་ཎཱ་མ་དྷ་མྨོ ས་སྶ་ཏི་ས་མཾ ཏ་ཐེ་ཝ ཋ་སྶ་ཏཱི’’ཏི? ‘‘ནོ ཧེ་ཏཾ, བྷ་ནྟེ’’. ‘‘སཱ་དྷུ, བྷི་ཀྑ་ཝེ! ཨ་ཧ་མྤི ཁོ ཨེ་ཏཾ, བྷི་ཀྑ་ཝེ, པ་རི་གྒ་ཧཾ ན ས་མ་ནུ་པ་སྶཱ་མི, ཡྭཱ་ཡཾ པ་རི་གྒ་ཧོ ནི་ཙྩོ དྷུ་ཝོ ས་སྶ་ཏོ ཨ་ཝི་པ་རི་ཎཱ་མ་དྷ་མྨོ ས་སྶ་ཏི་ས་མཾ ཏ་ཐེ་ཝ ཋ་སྶ་ཏཱི’’ཏི. པ་རི་གྒ་ཧཱ ནི་ཙྩཱ དྷུ་ཝཱ ས་སྶ་ཏཱ ཨ་ཝི་པ་རི་ཎཱ་མ་དྷ་མྨཱ ན་ཏྠི ན ས་ནྟི ན སཾ་ཝི་ཛྫ་ནྟི ན ལ་བྦྷ་ནྟཱི་ཏི – ན ཧི ས་ནྟི ནི་ཙྩཱ པ་རི་གྒ་ཧཱ.
ཝི་ནཱ་བྷཱ་ཝཾ ས་ནྟ་མེ་ཝི་དནྟི. ནཱ་ནཱ་བྷཱ་ཝེ ཝི་ནཱ་བྷཱ་ཝེ ཨ་ཉྙ་ཐཱ་བྷཱ་ཝེ ས་ནྟེ སཾ་ཝི་ཛྫ་མཱ་ནེ ཨུ་པ་ལ་བྦྷི་ཡ་མཱ་ནེ. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཨ་ལཾ, ཨཱ་ན་ནྡ! མཱ སོ་ཙི མཱ པ་རི་དེ་ཝི. ན་ནུ ཨེ་ཏཾ, ཨཱ་ན་ནྡ, མ་ཡཱ པ་ཊི་ཀ་ཙྩེ་ཝ [པ་ཊི་ག་ཙྩེ་ཝ (སཱི.)] ཨ་ཀྑཱ་ཏཾ – ‘ས་བྦེ་ཧེ་ཝ པི་ཡེ་ཧི མ་ནཱ་པེ་ཧི ནཱ་ནཱ་བྷཱ་ཝོ ཝི་ནཱ་བྷཱ་ཝོ ཨ་ཉྙ་ཐཱ་བྷཱ་ཝོ. ཏཾ ཀུ་ཏེ་ཏྠ, ཨཱ་ན་ནྡ, ལ་བྦྷཱ – ཡཾ ཏཾ ཛཱ་ཏཾ བྷཱུ་ཏཾ ས་ངྑ་ཏཾ པ་ལོ་ཀ་དྷ་མྨཾ ཏཾ ཝ་ཏ མཱ པ་ལུ་ཛྫཱི’ཏི! ནེ་ཏཾ ཋཱ་ནཾ ཝི་ཛྫ་ཏི. པུ་རི་མཱ་ནཾ པུ་རི་མཱ་ནཾ ཁ་ནྡྷཱ་ནཾ དྷཱ་ཏཱུ་ནཾ ཨཱ་ཡ་ཏ་ནཱ་ནཾ ཝི་པ་རི་ཎཱ་མ་ཉྙ་ཐཱ་བྷཱ་ཝཱ པ་ཙྪི་མཱ པ་ཙྪི་མཱ ཁ་ནྡྷཱ ཙ དྷཱ་ཏུ་ཡོ ཙ ཨཱ་ཡ་ཏ་ནཱ་ནི ཙ པ་ཝ་ཏྟ་ནྟཱི’’ཏི – ཝི་ནཱ་བྷཱ་ཝཾ ས་ནྟ་མེ་ཝི་དཾ.
ཨི་ཏི དི་སྭཱ ནཱ་གཱ་ར་མཱ་ཝ་སེཏི. ཨི་ཏཱིཏི པ་ད་ས་ནྡྷི པ་ད་སཾ་ས་གྒོ པ་ད་པཱ་རི་པཱུ་རཱི ཨ་ཀྑ་ར་ས་མ་ཝཱ་ཡོ བྱ་ཉྫ་ན་སི་ལི་ཊྛ་ཏཱ པ་དཱ་ནུ་པུ་བྦ་ཏཱ་པེ་ཏཾ. ཨི་ཏཱིཏི ཨི་ཏི དི་སྭཱ པ་སྶི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ མ་མ་ཏྟེ་སཱུ་ཏི – ཨི་ཏི དི་སྭཱ. ནཱ་གཱ་ར་མཱ་ཝ་སེཏི ས་བྦཾ གྷ་རཱ་ཝཱ་ས་པ་ལི་བོ་དྷཾ ཚི་ནྡི་ཏྭཱ པུ་ཏྟ་དཱ་ར་པ་ལི་བོ་དྷཾ ཚི་ནྡི་ཏྭཱ ཉཱ་ཏི་པ་ལི་བོ་དྷཾ ཚི་ནྡི་ཏྭཱ མི་ཏྟཱ་མ་ཙྩ་པ་ལི་བོ་དྷཾ ཚི་ནྡི་ཏྭཱ ས་ནྣི་དྷི་པ་ལི་བོ་དྷཾ ཚི་ནྡི་ཏྭཱ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏྭཱ ཨ་ཀི་ཉྩ་ན་བྷཱ་ཝཾ ཨུ་པ་ག་ནྟྭཱ ཨེ་ཀོ ཙ་རེ་ཡྻ ཝི་ཧ་རེ་ཡྻ ཨི་རི་ཡེ་ཡྻ ཝ་ཏྟེ་ཡྻ པཱ་ལེ་ཡྻ ཡ་པེ་ཡྻ ཡཱ་པེ་ཡྻཱ་ཏི – ཨི་ཏི དི་སྭཱ ནཱ་གཱ་ར་མཱ་ཝ་སེ.
ཏེ་ནཱ་ཧ བྷ་ག་ཝཱ –
‘‘སོ་ཙ་ནྟི ཛ་ནཱ མ་མཱ་ཡི་ཏེ, ན ཧི ས་ནྟི ནི་ཙྩཱ པ་རི་གྒ་ཧཱ;
ཝི་ནཱ་བྷཱ་ཝཾ ས་ནྟ་མེ་ཝི་དཾ, ཨི་ཏི དི་སྭཱ ནཱ་གཱ་ར་མཱ་ཝ་སེ’’ཏི.
༤༡. མ་ར་ཎེ་ན་པི ཏཾ པ་ཧཱི་ཡ་ཏི [པ་ཧི་ཡྻ་ཏི (ཀ.)] ཡཾ པུ་རི་སོ མ་མི་ད་ནྟི མ་ཉྙ་ཏི;
ཨེ་ཏ་མྤི ཝི་དི་ཏྭཱ་ན [ཨེ་ཏཾ དི་སྭཱ་ན (སཱི. ཀ.)] པ་ཎྜི་ཏོ, ན མ་མ་ཏྟཱ་ཡ ན་མེ་ཐ མཱ་མ་ཀོ.
མ་ར་ཎེ་ན་པི ཏཾ པ་ཧཱི་ཡ་ཏཱིཏི. མ་ར་ཎནྟི ཡཱ ཏེ་སཾ ཏེ་སཾ ས་ཏྟཱ་ནཾ ཏ་མྷཱ ཏ་མྷཱ ས་ཏྟ་ནི་ཀཱ་ཡཱ ཙུ་ཏི ཙ་ཝ་ན་ཏཱ བྷེ་དོ ཨ་ནྟ་ར་དྷཱ་ནཾ མ་ཙྩུ་མ་ར་ཎཾ ཀཱ་ལཾ་ཀི་རི་ཡཱ ཁ་ནྡྷཱ་ནཾ བྷེ་དོ ཀ་ལེ༹་ཝ་ར་སྶ ནི་ཀྑེ་པོ ཛཱི་ཝི་ཏི་ནྡྲི་ཡ་སྶུ་པ་ཙྪེ་དོ. ཏནྟི རཱུ་པ་ག་ཏཾ ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ. པ་ཧཱི་ཡ་ཏཱིཏི པ་ཧཱི་ཡ་ཏི ཛ་ཧཱི་ཡ་ཏི ཝི་ཛ་ཧཱི་ཡ་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི. བྷཱ་སི་ཏ་མྤི ཧེ་ཏཾ –
‘‘པུ་བྦེ་ཝ མ་ཙྩཾ ཝི་ཛ་ཧ་ནྟི བྷོ་གཱ, མ་ཙྩོ་ཝ ནེ པུ་བྦ་ཏ་རཾ ཛ་ཧཱ་ཏི;
ཨ་ས་སྶ་ཏཱ བྷོ་གི་ནོ ཀཱ་མ་ཀཱ་མཱི, ཏ་སྨཱ ན སོ་ཙཱ་མ་ཧཾ སོ་ཀ་ཀཱ་ལེ.
‘‘ཨུ་དེ་ཏི ཨཱ་པཱུ་ར་ཏི ཝེ་ཏི ཙ་ནྡོ, ཨ་ཏྟཾ ག་མེ་ཏྭཱ་ན པ་ལེ་ཏི སཱུ་རི་ཡོ;
ཝི་དི་ཏཱ མ་ཡཱ ས་ཏྟུ་ཀ ལོ་ཀ་དྷ་མྨཱ, ཏ་སྨཱ ན སོ་ཙཱ་མ་ཧཾ སོ་ཀ་ཀཱ་ལེ’’ཏི.
མ་ར་ཎེ་ན་པི ཏཾ པ་ཧཱི་ཡ་ཏི. ཡཾ པུ་རི་སོ མ་མི་ད་ནྟི མ་ཉྙ་ཏཱིཏི. ཡནྟི རཱུ་པ་ག་ཏཾ ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ. པུ་རི་སོཏི ས་ངྑཱ ས་མ་ཉྙཱ པ་ཉྙ་ཏྟི ཝོ་ཧཱ་རོ [ལོ་ཀ་ཝོ་ཧཱ་རོ (སྱཱ.)] ནཱ་མཾ ནཱ་མ་ཀ་མྨཾ ནཱ་མ་དྷེ་ཡྻཾ ནི་རུ་ཏྟི བྱ་ཉྫ་ནཾ ཨ་བྷི་ལཱ་པོ. མ་མི་ད་ནྟི མ་ཉྙ་ཏཱིཏི ཏ་ཎྷཱ་མ་ཉྙ་ནཱ་ཡ མ་ཉྙ་ཏི, དི་ཊྛི་མ་ཉྙ་ནཱ་ཡ མ་ཉྙ་ཏི, མཱ་ན་མ་ཉྙ་ནཱ་ཡ མ་ཉྙ་ཏི, ཀི་ལེ་ས་མ་ཉྙ་ནཱ་ཡ མ་ཉྙ་ཏི, དུ་ཙྩ་རི་ཏ་མ་ཉྙ་ནཱ་ཡ མ་ཉྙ་ཏི, པ་ཡོ་ག་མ་ཉྙ་ནཱ་ཡ མ་ཉྙ་ཏི, ཝི་པཱ་ཀ་མ་ཉྙ་ནཱ་ཡ མ་ཉྙ་ཏཱི་ཏི – ཡཾ པུ་རི་སོ མ་མི་ད་ནྟི མ་ཉྙ་ཏི.
ཨེ་ཏ་མྤི ཝི་དི་ཏྭཱ་ན པ་ཎྜི་ཏོཏི. ཨེ་ཏཾ ཨཱ་དཱི་ན་ཝཾ ཉ་ཏྭཱ ཛཱ་ནི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ མ་མ་ཏྟེ་སཱུ་ཏི, ཨེ་ཏ་མྤི ཝི་དི་ཏྭཱ པ་ཎྜི་ཏོ དྷཱི་རོ པ་ཎྜི་ཏོ པ་ཉྙ་ཝཱ བུ་དྡྷི་མཱ ཉཱ་ཎཱི ཝི་བྷཱ་ཝཱི མེ་དྷཱ་ཝཱི་ཏི – ཨེ་ཏ་མྤི ཝི་དི་ཏྭཱ་ན པ་ཎྜི་ཏོ.
ན མ་མ་ཏྟཱ་ཡ ན་མེ་ཐ མཱ་མ་ཀོཏི. མ་མ་ཏྟཱཏི དྭེ མ་མ་ཏྟཱ – ཏ་ཎྷཱ་མ་མ་ཏྟ་ཉྩ དི་ཊྛི་མ་མ་ཏྟ་ཉྩ…པེ… ཨི་དཾ ཏ་ཎྷཱ་མ་མ་ཏྟཾ…པེ… ཨི་དཾ དི་ཊྛི་མ་མ་ཏྟཾ. མཱ་མ་ཀོཏི བུ་དྡྷ་མཱ་མ་ཀོ དྷ་མྨ་མཱ་མ་ཀོ ས་ངྒྷ་མཱ་མ་ཀོ. སོ བྷ་ག་ཝ་ནྟཾ མ་མཱ་ཡ་ཏི, བྷ་ག་ཝཱ ཏཾ པུ་གྒ་ལཾ པ་རི་གྒ་ཎྷཱ་ཏི. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཡེ ཏེ, བྷི་ཀྑ་ཝེ, བྷི་ཀྑཱུ ཀུ་ཧཱ ཐ་དྡྷཱ [བ་དྡྷཱ (ཀ.) ཨི་ཏི་ཝུ. ༡༠༨] ལ་པཱ སི་ངྒཱི ཨུ་ནྣ་ལཱ༹ ཨ་ས་མཱ་ཧི་ཏཱ, ན མེ ཏེ, བྷི་ཀྑ་ཝེ, བྷི་ཀྑཱུ མཱ་མ་ཀཱ; ཨ་པ་ག་ཏཱ ཙ ཏེ, བྷི་ཀྑ་ཝེ, བྷི་ཀྑཱུ ཨི་མ་སྨཱ དྷ་མྨ་ཝི་ན་ཡཱ. ན ཙ ཏེ ཨི་མ་སྨིཾ དྷ་མྨ་ཝི་ན་ཡེ ཝུ་དྡྷིཾ ཝི་རཱུ་ལ༹ྷིཾ ཝེ་པུ་ལླཾ ཨཱ་པ་ཛྫ་ནྟི. ཡེ ཙ ཁོ ཏེ, བྷི་ཀྑ་ཝེ, བྷི་ཀྑཱུ ནི་ཀྐུ་ཧཱ ནི་ལླ་པཱ དྷཱི་རཱ ཨ་ཏྠ་དྡྷཱ སུ་ས་མཱ་ཧི་ཏཱ, ཏེ ཁོ མེ, བྷི་ཀྑ་ཝེ, བྷི་ཀྑཱུ མཱ་མ་ཀཱ; ཨ་ན་པ་ག་ཏཱ ཙ ཏེ, བྷི་ཀྑ་ཝེ, བྷི་ཀྑཱུ ཨི་མ་སྨཱ དྷ་མྨ་ཝི་ན་ཡཱ. ཏེ ཙ ཨི་མ་སྨིཾ དྷ་མྨ་ཝི་ན་ཡེ ཝུ་དྡྷིཾ ཝི་རཱུ་ལ༹ྷིཾ ཝེ་པུ་ལླཾ ཨཱ་པ་ཛྫ་ནྟི’’.
‘‘ཀུ་ཧཱ ཐ་དྡྷཱ ལ་པཱ སི་ངྒཱི, ཨུ་ནྣ་ལཱ༹ ཨ་ས་མཱ་ཧི་ཏཱ;
ན ཏེ དྷ་མྨེ ཝི་རཱུ་ཧ་ནྟི, ས་མྨཱ་ས་མྦུ་དྡྷ་དེ་སི་ཏེ.
‘‘ནི་ཀྐུ་ཧཱ ནི་ལླ་པཱ དྷཱི་རཱ, ཨ་ཏྠ་དྡྷཱ སུ་ས་མཱ་ཧི་ཏཱ;
ཏེ ཝེ དྷ་མྨེ ཝི་རཱུ་ཧ་ནྟི, ས་མྨཱ་ས་མྦུ་དྡྷ་དེ་སི་ཏེ’’.
ན མ་མ་ཏྟཱ་ཡ ན་མེ་ཐ མཱ་མ་ཀོཏི. མཱ་མ་ཀོ ཏ་ཎྷཱ་མ་མ་ཏྟཾ པ་ཧཱ་ཡ དི་ཊྛི་མ་མ་ཏྟཾ པ་ཊི་ནི་སྶ་ཛྫི་ཏྭཱ མ་མ་ཏྟཱ་ཡ ན ན་མེ་ཡྻ ན ཨོ་ན་མེ་ཡྻ, ན ཏཾ་ནི་ནྣོ ཨ་སྶ ན ཏ་པྤོ་ཎོ ན ཏ་པྤ་བྦྷཱ་རོ ན ཏ་ད་དྷི་མུ་ཏྟོ ན ཏ་ད་དྷི་པ་ཏེ་ཡྻོ་ཏི – ན མ་མ་ཏྟཱ་ཡ ན་མེ་ཐ མཱ་མ་ཀོ.
ཏེ་ནཱ་ཧ བྷ་ག་ཝཱ –
‘‘མ་ར་ཎེ་ན་པི ཏཾ པ་ཧཱི་ཡ་ཏི, ཡཾ པུ་རི་སོ མ་མི་ད་ནྟི མ་ཉྙ་ཏི;
ཨེ་ཏ་མྤི ཝི་དི་ཏྭཱ་ན པ་ཎྜི་ཏོ, ན མ་མ་ཏྟཱ་ཡ ན་མེ་ཐ མཱ་མ་ཀོ’’ཏི.
༤༢. སུ་པི་ནེ་ན ཡ་ཐཱ་པི ས་ངྒ་ཏཾ, པ་ཊི་བུ་དྡྷོ པུ་རི་སོ ན པ་སྶ་ཏི;
ཨེ་ཝ་མྤི པི་ཡཱ་ཡི་ཏཾ ཛ་ནཾ, པེ་ཏཾ ཀཱ་ལ་ངྐ་ཏཾ [ཀཱ་ལ་ཀ་ཏཾ (སཱི. སྱཱ.)] ན པ་སྶ་ཏི.
སུ་པི་ནེ་ན ཡ་ཐཱ་པི ས་ངྒ་ཏནྟི. ས་ངྒ་ཏཾ ས་མཱ་ག་ཏཾ ས་མཱ་ཧི་ཏཾ ས་ནྣི་པ་ཏི་ཏ་ནྟི – སུ་པི་ནེ་ན ཡ་ཐཱ་པི ས་ངྒ་ཏཾ. པ་ཊི་བུ་དྡྷོ པུ་རི་སོ ན པ་སྶ་ཏཱིཏི ཡ་ཐཱ པུ་རི་སོ སུ་པི་ན་ག་ཏོ ཙ་ནྡཾ པ་སྶ་ཏི, སཱུ་རི་ཡཾ པ་སྶ་ཏི, མ་ཧཱ་ས་མུ་དྡཾ པ་སྶ་ཏི, སི་ནེ་རུཾ པ་བྦ་ཏ་རཱ་ཛཱ་ནཾ པ་སྶ་ཏི, ཧ་ཏྠིཾ པ་སྶ་ཏི, ཨ་སྶཾ པ་སྶ་ཏི, ར་ཐཾ པ་སྶ་ཏི, པ་ཏྟིཾ པ་སྶ་ཏི, སེ་ནཱ་བྱཱུ་ཧཾ པ་སྶ་ཏི, ཨཱ་རཱ་མ་རཱ་མ་ཎེ་ཡྻ་ཀཾ པ་སྶ་ཏི, ཝ་ན་རཱ་མ་ཎེ་ཡྻ་ཀཾ…པེ… བྷཱུ་མི་རཱ་མ་ཎེ་ཡྻ་ཀཾ… པོ་ཀྑ་ར་ཎཱི་རཱ་མ་ཎེ་ཡྻ་ཀཾ པ་སྶ་ཏི; པ་ཊི་བུ་དྡྷོ ན ཀི་ཉྩི པ་སྶ་ཏཱི་ཏི – པ་ཊི་བུ་དྡྷོ པུ་རི་སོ ན པ་སྶ་ཏི.
ཨེ་ཝ་མྤི པི་ཡཱ་ཡི་ཏཾ ཛ་ནནྟི. ཨེ་ཝནྟི ཨོ་པ་མྨ་ས་མྤ་ཊི་པཱ་ད་ནཾ. པི་ཡཱ་ཡི་ཏཾ ཛ་ནནྟི མ་མཱ་ཡི་ཏཾ ཛ་ནཾ མཱ་ཏ་རཾ ཝཱ པི་ཏ་རཾ ཝཱ བྷཱ་ཏ་རཾ ཝཱ བྷ་གི་ནིཾ ཝཱ པུ་ཏྟཾ ཝཱ དྷཱི་ཏ་རཾ ཝཱ མི་ཏྟཾ ཝཱ ཨ་མ་ཙྩཾ ཝཱ ཉཱ་ཏིཾ ཝཱ སཱ་ལོ་ཧི་ཏཾ ཝཱ་ཏི – ཨེ་ཝ་མྤི པི་ཡཱ་ཡི་ཏཾ ཛ་ནཾ.
པེ་ཏཾ ཀཱ་ལ་ངྐ་ཏཾ ན པ་སྶ་ཏཱིཏི. པེ་ཏོ ཝུ་ཙྩ་ཏི མ་ཏོ. ཀཱ་ལ་ངྐ་ཏཾ ན པ་སྶ་ཏི ན ད་ཀྑ་ཏི ནཱ་དྷི་ག་ཙྪ་ཏི ན ཝི་ནྡ་ཏི ན པ་ཊི་ལ་བྷ་ཏཱི་ཏི – པེ་ཏཾ ཀཱ་ལ་ངྐ་ཏཾ ན པ་སྶ་ཏི.
ཏེ་ནཱ་ཧ བྷ་ག་ཝཱ –
‘‘སུ་པི་ནེ་ན ཡ་ཐཱ་པི ས་ངྒ་ཏཾ, པ་ཊི་བུ་དྡྷོ པུ་རི་སོ ན པ་སྶ་ཏི;
ཨེ་ཝ་མྤི པི་ཡཱ་ཡི་ཏཾ ཛ་ནཾ, པེ་ཏཾ ཀཱ་ལ་ངྐ་ཏཾ ན པ་སྶ་ཏཱི’’ཏི.
༤༣. དི་ཊྛཱ་པི སུ་ཏཱ་པི ཏེ ཛ་ནཱ, ཡེ་སཾ ནཱ་མ་མི་དཾ པ་ཝུ་ཙྩ་ཏི;
ནཱ་མཾ་ཡེ་ཝཱ་ཝ་སི་སྶ་ཏི, [ནཱ་མ་མེ་ཝཱ’ཝ་སི་སྶ་ཏི (སཱི. སྱཱ.)] ཨ་ཀྑེ་ཡྻཾ པེ་ཏ་སྶ ཛ་ནྟུ་ནོ.
དི་ཊྛཱ་པི སུ་ཏཱ་པི ཏེ ཛ་ནཱཏི. དི་ཊྛཱཏི ཡེ ཙ་ཀྑུ་ཝི་ཉྙཱ་ཎཱ་བྷི་ས་མྦྷཱུ་ཏཱ. སུ་ཏཱཏི ཡེ སོ་ཏ་ཝི་ཉྙཱ་ཎཱ་བྷི་ས་མྦྷཱུ་ཏཱ. ཏེ ཛ་ནཱཏི ཁ་ཏྟི་ཡཱ ཙ བྲཱ་ཧྨ་ཎཱ ཙ ཝེ་སྶཱ ཙ སུ་དྡཱ ཙ ག་ཧ་ཊྛཱ ཙ པ་བྦ་ཛི་ཏཱ ཙ དེ་ཝཱ ཙ མ་ནུ་སྶཱ ཙཱ་ཏི – དི་ཊྛཱ་པི སུ་ཏཱ་པི ཏེ ཛ་ནཱ.
ཡེ་སཾ ནཱ་མ་མི་དཾ པ་ཝུ་ཙྩ་ཏཱིཏི. ཡེ་སནྟི ཡེ་སཾ ཁ་ཏྟི་ཡཱ་ནཾ བྲཱ་ཧྨ་ཎཱ་ནཾ ཝེ་སྶཱ་ནཾ སུ་དྡཱ་ནཾ ག་ཧ་ཊྛཱ་ནཾ པ་བྦ་ཛི་ཏཱ་ནཾ དེ་ཝཱ་ནཾ མ་ནུ་སྶཱ་ནཾ. ནཱ་མནྟི ས་ངྑཱ ས་མ་ཉྙཱ པ་ཉྙ་ཏྟི ཝོ་ཧཱ་རོ ནཱ་མཾ ནཱ་མ་ཀ་མྨཾ ནཱ་མ་དྷེ་ཡྻཾ ནི་རུ་ཏྟི བྱ་ཉྫ་ནཾ ཨ་བྷི་ལཱ་པོ. པ་ཝུ་ཙྩ་ཏཱིཏི ཝུ་ཙྩ་ཏི པ་ཝུ་ཙྩ་ཏི ཀ་ཐཱི་ཡ་ཏི བྷ་ཎཱི་ཡ་ཏི དཱི་པཱི་ཡ་ཏི ཝོ་ཧ་རཱི་ཡ་ཏཱི་ཏི – ཡེ་སཾ ནཱ་མ་མི་དཾ པ་ཝུ་ཙྩ་ཏི.
ནཱ་མཾ་ཡེ་ཝཱ་ཝ་སི་སྶ་ཏི ཨ་ཀྑེ་ཡྻནྟི. རཱུ་པ་ག་ཏཾ ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ པ་ཧཱི་ཡ་ཏི ཛ་ཧཱི་ཡ་ཏི ཝི་ཛ་ཧཱི་ཡ་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི, ནཱ་མཾ་ཡེ་ཝཱ་ཝ་སི་སྶ་ཏི. ཨ་ཀྑེ་ཡྻནྟི. ཨ་ཀྑཱ་ཏུཾ ཀ་ཐེ་ཏུཾ བྷ་ཎི་ཏུཾ དཱི་པ་ཡི་ཏུཾ ཝོ་ཧ་རི་ཏུ་ནྟི – ནཱ་མཾ ཨེ་ཝཱ་ཝ་སི་སྶ་ཏི ཨ་ཀྑེ་ཡྻཾ. པེ་ཏ་སྶ ཛ་ནྟུ་ནོཏི. པེ་ཏ་སྶཱཏི མ་ཏ་སྶ ཀཱ་ལ་ངྐ་ཏ་སྶ. ཛ་ནྟུ་ནོཏི ས་ཏྟ་སྶ ན་ར་སྶ མཱ་ན་ཝ་སྶ པོ་ས་སྶ པུ་གྒ་ལ་སྶ ཛཱི་ཝ་སྶ ཛཱ་གུ་སྶ ཛ་ནྟུ་སྶ ཨི་ནྡ་གུ་སྶ མ་ནུ་ཛ་སྶཱ་ཏི – པེ་ཏ་སྶ ཛ་ནྟུ་ནོ.
ཏེ་ནཱ་ཧ བྷ་ག་ཝཱ –
‘‘དི་ཊྛཱ་པི སུ་ཏཱ་པི ཏེ ཛ་ནཱ, ཡེ་སཾ ནཱ་མ་མི་དཾ པ་ཝུ་ཙྩ་ཏི;
ནཱ་མཾ་ཡེ་ཝཱ་ཝ་སི་སྶ་ཏི, ཨ་ཀྑེ་ཡྻཾ པེ་ཏ་སྶ ཛ་ནྟུ་ནོ’’ཏི.
༤༤. སོ་ཀ་པྤ་རི་དེ་ཝ་མ་ཙྪ་རཾ, ན པ་ཛ་ཧ་ནྟི གི་དྡྷཱ མ་མཱ་ཡི་ཏེ;
ཏ་སྨཱ མུ་ན་ཡོ པ་རི་གྒ་ཧཾ, ཧི་ཏྭཱ ཨ་ཙ་རིཾ་སུ ཁེ་མ་ད་སྶི་ནོ.
སོ་ཀ་པྤ་རི་དེ་ཝ་མ་ཙྪ་རཾ ན པ་ཛ་ཧ་ནྟི གི་དྡྷཱ མ་མཱ་ཡི་ཏེཏི. སོ་ཀོཏི ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ བྷོ་ག་བྱ་ས་ནེ་ན ཝཱ ཕུ་ཊྛ་སྶ རོ་ག་བྱ་ས་ནེ་ན ཝཱ ཕུ་ཊྛ་སྶ སཱི་ལ་བྱ་ས་ནེ་ན ཝཱ ཕུ་ཊྛ་སྶ དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ སོ་ཀོ སོ་ཙ་ནཱ སོ་ཙི་ཏ་ཏྟཾ ཨ་ནྟོ་སོ་ཀོ ཨ་ནྟོ་པ་རི་སོ་ཀོ ཨ་ནྟོ་དཱ་ཧོ ཨ་ནྟོ་པ་རི་དཱ་ཧོ [ཨ་ནྟོ་ཌཱ་ཧོ ཨ་ནྟོ་པ་རི་ཌཱ་ཧོ (སྱཱ.)] ཙེ་ཏ་སོ པ་རི་ཛ྄ཛྷཱ་ཡ་ནཱ དོ་མ་ན་སྶཾ སོ་ཀ་ས་ལླཾ. པ་རི་དེ་ཝོཏི ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ…པེ… དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ ཨཱ་དེ་ཝོ པ་རི་དེ་ཝོ ཨཱ་དེ་ཝ་ནཱ པ་རི་དེ་ཝ་ནཱ ཨཱ་དེ་ཝི་ཏ་ཏྟཾ པ་རི་དེ་ཝི་ཏ་ཏྟཾ ཝཱ་ཙཱ པ་ལཱ་པོ ཝི་པྤ་ལཱ་པོ ལཱ་ལ་པྤོ ལཱ་ལ་པྤཱ་ཡ་ནཱ ལཱ་ལ་པྤཱ་ཡི་ཏ་ཏྟཾ. མ་ཙྪ་རི་ཡནྟི པ་ཉྩ མ་ཙྪ་རི་ཡཱ་ནི – ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ. ཡཾ ཨེ་ཝ་རཱུ་པཾ མ་ཙྪ་རི་ཡཾ མ་ཙྪ་རཱ་ཡ་ནཱ མ་ཙྪ་རཱ་ཡི་ཏ་ཏྟཾ ཝེ་ཝི་ཙྪཾ ཀ་ད་རི་ཡཾ ཀ་ཊུ་ཀ་ཉྩུ་ཀ་ཏཱ ཨ་གྒ་ཧི་ཏ་ཏྟཾ ཙི་ཏྟ་སྶ – ཨི་དཾ ཝུ་ཙྩ་ཏི མ་ཙྪ་རི་ཡཾ. ཨ་པི ཙ ཁ་ནྡྷ་མ་ཙྪ་རི་ཡ་མྤི མ་ཙྪ་རི་ཡཾ, དྷཱ་ཏུ་མ་ཙྪ་རི་ཡ་མྤི མ་ཙྪ་རི་ཡཾ, ཨཱ་ཡ་ཏ་ན་མ་ཙྪ་རི་ཡ་མྤི མ་ཙྪ་རི་ཡཾ གཱ་ཧོ – ཨི་དཾ ཝུ་ཙྩ་ཏི མ་ཙྪ་རི་ཡཾ. གེ་དྷོ ཝུ་ཙྩ་ཏི ཏ་ཎྷཱ. ཡོ རཱ་གོ སཱ་རཱ་གོ…པེ… ཨ་བྷི་ཛ྄ཛྷཱ ལོ་བྷོ ཨ་ཀུ་ས་ལ་མཱུ་ལཾ. མ་མ་ཏྟཱཏི དྭེ མ་མ་ཏྟཱ – ཏ་ཎྷཱ་མ་མ་ཏྟ་ཉྩ དི་ཊྛི་མ་མ་ཏྟ་ཉྩ …པེ… ཨི་དཾ ཏ་ཎྷཱ་མ་མ་ཏྟཾ…པེ… ཨི་དཾ དི་ཊྛི་མ་མ་ཏྟཾ. མ་མཱ་ཡི་ཏཾ ཝ་ཏྠུཾ ཨ་ཙྪེ་ད་ས་ངྐི་ནོ་པི སོ་ཙ་ནྟི, ཨ་ཙྪི་ཛྫ་ནྟེ་པི སོ་ཙ་ནྟི, ཨ་ཙྪི་ནྣེ་པི སོ་ཙ་ནྟི, མ་མཱ་ཡི་ཏཾ ཝ་ཏྠུཾ ཝི་པ་རི་ཎཱ་མ་ས་ངྐི་ནོ་པི སོ་ཙ་ནྟི, ཝི་པ་རི་ཎཱ་མ་ནྟེ་པི སོ་ཙ་ནྟི, ཝི་པ་རི་ཎ་ཏེ་པི སོ་ཙ་ནྟི, མ་མཱ་ཡི་ཏཾ ཝ་ཏྠུཾ ཨ་ཙྪེ་ད་ས་ངྐི་ནོ་པི པ་རི་དེ་ཝ་ནྟི, ཨ་ཙྪི་ཛྫ་ནྟེ་པི པ་རི་དེ་ཝ་ནྟི, ཨ་ཙྪི་ནྣེ་པི པ་རི་དེ་ཝ་ནྟི. མ་མཱ་ཡི་ཏཾ ཝ་ཏྠུཾ ཝི་པ་རི་ཎཱ་མ་ས་ངྐི་ནོ་པི པ་རི་དེ་ཝ་ནྟི, ཝི་པ་རི་ཎཱ་མ་ནྟེ་པི པ་རི་དེ་ཝ་ནྟི, ཝི་པ་རི་ཎ་ཏེ་པི པ་རི་དེ་ཝ་ནྟི. མ་མཱ་ཡི་ཏཾ ཝ་ཏྠུཾ ར་ཀྑ་ནྟི གོ་པེ་ནྟི པ་རི་གྒ་ཎྷ་ནྟི མ་མཱ་ཡ་ནྟི མ་ཙྪ་རཱ་ཡ་ནྟི; མ་མཱ་ཡི་ཏ་སྨིཾ ཝ་ཏྠུ་སྨིཾ སོ་ཀཾ ན ཛ་ཧ་ནྟི, པ་རི་དེ་ཝཾ ན ཛ་ཧ་ནྟི, མ་ཙྪ་རི་ཡཾ ན ཛ་ཧ་ནྟི, གེ་དྷཾ ན ཛ་ཧ་ནྟི ན་པྤ་ཛ་ཧ་ནྟི ན ཝི་ནོ་དེ་ནྟི ན བྱ་ནྟིཾ ཀ་རོ་ནྟི ན ཨ་ན་བྷཱ་ཝཾ ག་མེ་ནྟཱི་ཏི – སོ་ཀ་པྤ་རི་དེ་ཝ་མ་ཙྪ་རཾ ན་པྤ་ཛ་ཧ་ནྟི གི་དྡྷཱ མ་མཱ་ཡི་ཏེ.
ཏ་སྨཱ མུ་ན་ཡོ པ་རི་གྒ་ཧཾ, ཧི་ཏྭཱ ཨ་ཙ་རིཾ་སུ ཁེ་མ་ད་སྶི་ནོཏི. ཏ་སྨཱཏི ཏ་སྨཱ ཏཾ་ཀཱ་ར་ཎཱ ཏཾ་ཧེ་ཏུ ཏ་པྤ་ཙྩ་ཡཱ ཏཾ་ནི་དཱ་ནཱ ཨེ་ཏཾ ཨཱ་དཱི་ན་ཝཾ ས་མྤ་སྶ་མཱ་ནཱ མ་མ་ཏྟེ་སཱུ་ཏི – ཏ་སྨཱ. མུ་ན་ཡོཏི མོ་ནཾ ཝུ་ཙྩ་ཏི ཉཱ་ཎཾ. ཡཱ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི. ཏེ་ན ཉཱ་ཎེ་ན ས་མ་ནྣཱ་ག་ཏཱ མུ་ན་ཡོ མོ་ན་པྤ་ཏྟཱ. ཏཱི་ཎི མོ་ནེ་ཡྻཱ་ནི – ཀཱ་ཡ་མོ་ནེ་ཡྻཾ, ཝ་ཙཱི་མོ་ནེ་ཡྻཾ, མ་ནོ་མོ་ནེ་ཡྻཾ…པེ… ས་ངྒ་ཛཱ་ལ་མ་ཏི་ཙྩ སོ མུ་ནི. པ་རི་གྒ་ཧོཏི དྭེ པ་རི་གྒ་ཧཱ – ཏ་ཎྷཱ་པ་རི་གྒ་ཧོ ཙ དི་ཊྛི་པ་རི་གྒ་ཧོ ཙ…པེ… ཨ་ཡཾ ཏ་ཎྷཱ་པ་རི་གྒ་ཧོ…པེ… ཨ་ཡཾ དི་ཊྛི་པ་རི་གྒ་ཧོ. མུ་ན་ཡོ ཏ་ཎྷཱ་པ་རི་གྒ་ཧཾ པ་རི་ཙྩ་ཛི་ཏྭཱ དི་ཊྛི་པ་རི་གྒ་ཧཾ པ་ཊི་ནི་སྶ་ཛྫི་ཏྭཱ ཙ་ཛི་ཏྭཱ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མེ་ཏྭཱ ཨ་ཙ་རིཾ་སུ ཝི་ཧ་རིཾ་སུ ཨི་རི་ཡིཾ་སུ ཝ་ཏྟིཾ་སུ པཱ་ལིཾ་སུ ཡ་པིཾ་སུ ཡཱ་པིཾ་སུ. ཁེ་མ་ད་སྶི་ནོཏི ཁེ་མཾ ཝུ་ཙྩ་ཏི ཨ་མ་ཏཾ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཁེ་མ་ད་སྶི་ནོཏི ཁེ་མ་ད་སྶི་ནོ ཏཱ་ཎ་ད་སྶི་ནོ ལེ་ཎ་ད་སྶི་ནོ ས་ར་ཎ་ད་སྶི་ནོ ཨ་བྷ་ཡ་ད་སྶི་ནོ ཨ་ཙྩུ་ཏ་ད་སྶི་ནོ ཨ་མ་ཏ་ད་སྶི་ནོ ནི་བྦཱ་ན་ད་སྶི་ནོ་ཏི – ཏ་སྨཱ མུ་ན་ཡོ པ་རི་གྒ་ཧཾ ཧི་ཏྭཱ ཨ་ཙ་རིཾ་སུ ཁེ་མ་ད་སྶི་ནོ.
ཏེ་ནཱ་ཧ བྷ་ག་ཝཱ –
‘‘སོ་ཀ་པྤ་རི་དེ་ཝ་མ་ཙྪ་རཾ, ན ཛ་ཧ་ནྟི གི་དྡྷཱ མ་མཱ་ཡི་ཏེ;
ཏ་སྨཱ མུ་ན་ཡོ པ་རི་གྒ་ཧཾ, ཧི་ཏྭཱ ཨ་ཙ་རིཾ་སུ ཁེ་མ་ད་སྶི་ནོ’’ཏི.
༤༥. པ་ཏི་ལཱི་ན་ཙ་ར་སྶ བྷི་ཀྑུ་ནོ, བྷ་ཛ་མཱ་ན་སྶ ཝི་ཝི་ཏྟ་མཱ་ས་ནཾ;
སཱ་མ་གྒི་ཡ་མཱ་ཧུ ཏ་སྶ ཏཾ, ཡོ ཨ་ཏྟཱ་ནཾ བྷ་ཝ་ནེ ན ད་སྶ་ཡེ.
པ་ཏི་ལཱི་ན་ཙ་ར་སྶ བྷི་ཀྑུ་ནོཏི. པ་ཏི་ལཱི་ན་ཙ་རཱ ཝུ་ཙྩ་ནྟི ས་ཏྟ སེ་ཀྑཱ [སེ་ཁཱ (སཱི. སྱཱ.)]. ཨ་ར་ཧཱ པ་ཏི་ལཱི་ནོ. ཀིཾ་ཀཱ་ར་ཎཱ པ་ཏི་ལཱི་ན་ཙ་རཱ ཝུ་ཙྩ་ནྟི ས་ཏྟ སེ་ཀྑཱ? ཏེ ཏ་ཏོ ཏ་ཏོ ཙི་ཏྟཾ པ་ཏི་ལཱི་ནེ་ནྟཱ པ་ཏི་ཀུ་ཊེ་ནྟཱ པ་ཏི་ཝ་ཊྚེ་ནྟཱ ས་ནྣི་རུ་དྡྷ་ནྟཱ [ས་ནྣི་རུ་མྦྷེ་ནྟཱ (སཱི.)] ས་ནྣི་གྒ་ཎྷ་ནྟཱ ས་ནྣི་ཝཱ་རེ་ནྟཱ ར་ཀྑ་ནྟཱ གོ་པེ་ནྟཱ ཙ་ར་ནྟི ཝི་ཙ་ར་ནྟི ཝི་ཧ་ར་ནྟི ཨི་རི་ཡ་ནྟི ཝ་ཏྟེ་ནྟི པཱ་ལེ་ནྟི ཡ་པེ་ནྟི ཡཱ་པེ་ནྟི, ཙ་ཀྑུ་དྭཱ་རེ ཙི་ཏྟཾ པ་ཏི་ལཱི་ནེ་ནྟཱ པ་ཏི་ཀུ་ཊེ་ནྟཱ པ་ཏི་ཝ་ཊྚེ་ནྟཱ ས་ནྣི་རུ་དྡྷ་ནྟཱ ས་ནྣི་གྒ་ཎྷ་ནྟཱ ས་ནྣི་ཝཱ་རེ་ནྟཱ ར་ཀྑ་ནྟཱ གོ་པེ་ནྟཱ ཙ་ར་ནྟི ཝི་ཙ་ར་ནྟི ཝི་ཧ་ར་ནྟི ཨི་རི་ཡ་ནྟི ཝ་ཏྟེ་ནྟི པཱ་ལེ་ནྟི ཡ་པེ་ནྟི ཡཱ་པེ་ནྟི, སོ་ཏ་དྭཱ་རེ ཙི་ཏྟཾ…པེ… གྷཱ་ན་དྭཱ་རེ ཙི་ཏྟཾ… ཛི་ཝ྄ཧཱ་དྭཱ་རེ ཙི་ཏྟཾ… ཀཱ་ཡ་དྭཱ་རེ ཙི་ཏྟཾ… མ་ནོ་དྭཱ་རེ ཙི་ཏྟཾ པ་ཏི་ལཱི་ནེ་ནྟཱ པ་ཏི་ཀུ་ཊེ་ནྟཱ པ་ཏི་ཝ་ཊྚེ་ནྟཱ ས་ནྣི་རུ་དྡྷ་ནྟཱ ས་ནྣི་གྒ་ཎྷ་ནྟཱ ས་ནྣི་ཝཱ་རེ་ནྟཱ ར་ཀྑ་ནྟཱ གོ་པེ་ནྟཱ ཙ་ར་ནྟི ཝི་ཙ་ར་ནྟི ཝི་ཧ་ར་ནྟི ཨི་རི་ཡ་ནྟི ཝ་ཏྟེ་ནྟི པཱ་ལེ་ནྟི ཡ་པེ་ནྟི ཡཱ་པེ་ནྟི. ཡ་ཐཱ ཀུ་ཀྐུ་ཊ་པ་ཏྟཾ ཝཱ ནྷཱ་རུ་ད་དྡུ་ལཾ ཝཱ ཨ་གྒི་མྷི པ་ཀྑི་ཏྟཾ པ་ཏི་ལཱི་ཡ་ཏི པ་ཏི་ཀུ་ཊ་ཏི པ་ཏི་ཝ་ཊྚ་ཏི ན ས་མྤ་སཱ་རི་ཡ་ཏི; ཨེ་ཝ་མེ་ཝ ཏ་ཏོ ཏ་ཏོ ཙི་ཏྟཾ པ་ཏི་ལཱི་ནེ་ནྟཱ པ་ཏི་ཀུ་ཊེ་ནྟཱ པ་ཏི་ཝ་ཊྚེ་ནྟཱ ས་ནྣི་རུ་དྡྷ་ནྟཱ ས་ནྣི་གྒ་ཎྷ་ནྟཱ ས་ནྣི་ཝཱ་རེ་ནྟཱ ར་ཀྑ་ནྟཱ གོ་པེ་ནྟཱ ཙ་ར་ནྟི ཝི་ཙ་ར་ནྟི ཝི་ཧ་ར་ནྟི ཨི་རི་ཡ་ནྟི ཝ་ཏྟེ་ནྟི པཱ་ལེ་ནྟི ཡ་པེ་ནྟི ཡཱ་པེ་ནྟི, ཙ་ཀྑུ་དྭཱ་རེ ཙི་ཏྟཾ…པེ… སོ་ཏ་དྭཱ་རེ ཙི་ཏྟཾ… གྷཱ་ན་དྭཱ་རེ ཙི་ཏྟཾ… ཛི་ཝ྄ཧཱ་དྭཱ་རེ ཙི་ཏྟཾ… ཀཱ་ཡ་དྭཱ་རེ ཙི་ཏྟཾ… མ་ནོ་དྭཱ་རེ ཙི་ཏྟཾ པ་ཏི་ལཱི་ནེ་ནྟཱ པ་ཏི་ཀུ་ཊེ་ནྟཱ པ་ཏི་ཝ་ཊྚེ་ནྟཱ ས་ནྣི་རུ་དྡྷ་ནྟཱ ས་ནྣི་གྒ་ཎྷ་ནྟཱ ས་ནྣི་ཝཱ་རེ་ནྟཱ ར་ཀྑ་ནྟཱ གོ་པེ་ནྟཱ ཙ་ར་ནྟི ཝི་ཙ་ར་ནྟི ཝི་ཧ་ར་ནྟི ཨི་རི་ཡ་ནྟི ཝ་ཏྟེ་ནྟི པཱ་ལེ་ནྟི ཡ་པེ་ནྟི ཡཱ་པེ་ནྟི. ཏཾ་ཀཱ་ར་ཎཱ པ་ཏི་ལཱི་ན་ཙ་རཱ ཝུ་ཙྩ་ནྟི ས་ཏྟ སེ་ཀྑཱ. བྷི་ཀྑུ་ནོཏི པུ་ཐུ་ཛྫ་ན་ཀ་ལྱཱ་ཎ་ཀ་སྶ ཝཱ བྷི་ཀྑུ་ནོ སེ་ཀྑ་སྶ ཝཱ བྷི་ཀྑུ་ནོ་ཏི – པ་ཏི་ལཱི་ན་ཙ་ར་སྶ བྷི་ཀྑུ་ནོ.
བྷ་ཛ་མཱ་ན་སྶ ཝི་ཝི་ཏྟ་མཱ་ས་ནནྟི ཨཱ་ས་ནཾ ཝུ་ཙྩ་ཏི ཡ་ཏྠ ནི་སཱི་ད་ནྟི – མ་ཉྩོ པཱི་ཋཾ བྷི་སི ཏ་ཊྚི་ཀཱ ཙ་མྨ་ཁ་ཎྜོ ཏི་ཎ་ས་ནྠཱ་རོ པ་ཎྞ་ས་ནྠཱ་རོ པ་ལཱ་ལ་ས་ནྠཱ་རོ. ཏཾ ཨཱ་ས་ནཾ ཨ་ས་པྤཱ་ཡ་རཱུ་པ་ད་སྶ་ནེ་ན རི་ཏྟཾ ཝི་ཝི་ཏྟཾ པ་ཝི་ཝི་ཏྟཾ, ཨ་ས་པྤཱ་ཡ་ས་དྡ་སྶ་ཝ་ནེ་ན རི་ཏྟཾ ཝི་ཝི་ཏྟཾ པ་ཝི་ཝི་ཏྟཾ, ཨ་ས་པྤཱ་ཡ་ག་ནྡྷ་གྷཱ་ཡ་ནེ་ན… ཨ་ས་པྤཱ་ཡ་ར་ས་སཱ་ཡ་ནེ་ན… ཨ་ས་པྤཱ་ཡ་ཕོ་ཊྛ་བྦ་ཕུ་ས་ནེ་ན… ཨ་ས་པྤཱ་ཡེ་ཧི པ་ཉྩ་ཧི ཀཱ་མ་གུ་ཎེ་ཧི རི་ཏྟཾ ཝི་ཝི་ཏྟཾ པ་ཝི་ཝི་ཏྟཾ. ཏཾ ཝི་ཝི་ཏྟཾ ཨཱ་ས་ནཾ བྷ་ཛ་ཏོ ས་མྦྷ་ཛ་ཏོ སེ་ཝ་ཏོ ནི་སེ་ཝ་ཏོ སཾ་སེ་ཝ་ཏོ པ་ཊི་སེ་ཝ་ཏོ་ཏི – བྷ་ཛ་མཱ་ན་སྶ ཝི་ཝི་ཏྟ་མཱ་ས་ནཾ.
སཱ་མ་གྒི་ཡ་མཱ་ཧུ ཏ་སྶ ཏཾ, ཡོ ཨ་ཏྟཱ་ནཾ བྷ་ཝ་ནེ ན ད་སྶ་ཡེཏི. སཱ་མ་གྒི་ཡོཏི ཏི་སྶོ སཱ་མ་གྒི་ཡོ – ག་ཎ་སཱ་མ་གྒཱི, དྷ་མྨ་སཱ་མ་གྒཱི, ཨ་ན་བྷི་ནི་བྦ་ཏྟི་སཱ་མ་གྒཱི. ཀ་ཏ་མཱ ག་ཎ་སཱ་མ་གྒཱི? བ་ཧུ ཙེ་པི བྷི་ཀྑཱུ ས་མ་གྒཱ ས་མྨོ་ད་མཱ་ནཱ ཨ་ཝི་ཝ་ད་མཱ་ནཱ ཁཱི་རོ་ད་ཀཱི་བྷཱུ་ཏཱ ཨ་ཉྙ་མ་ཉྙཾ པི་ཡ་ཙ་ཀྑཱུ་ཧི ས་མྤ་སྶ་ནྟཱ ཝི་ཧ་ར་ནྟི – ཨ་ཡཾ ག་ཎ་སཱ་མ་གྒཱི. ཀ་ཏ་མཱ དྷ་མྨ་སཱ་མ་གྒཱི? ཙ་ཏྟཱ་རོ ས་ཏི་པ་ཊྛཱ་ནཱ, ཙ་ཏྟཱ་རོ ས་མྨ་པྤ་དྷཱ་ནཱ, ཙ་ཏྟཱ་རོ ཨི་དྡྷི་པཱ་དཱ, པ་ཉྩི་ནྡྲི་ཡཱ་ནི, པ་ཉྩ བ་ལཱ་ནི, ས་ཏྟ བོ་ཛ྄ཛྷ་ངྒཱ, ཨ་རི་ཡོ ཨ་ཊྛ་ངྒི་ཀོ མ་གྒོ. ཏེ ཨེ་ཀ་ཏོ པ་ཀྑ་ནྡ་ནྟི པ་སཱི་ད་ནྟི ས་མྤ་ཏི་ཊྛ་ནྟི ཝི་མུ་ཙྩ་ནྟི; ན ཏེ་སཾ དྷ་མྨཱ་ནཾ ཝི་ཝཱ་དོ པ་ཝི་ཝཱ་དོ ཨ་ཏྠི – ཨ་ཡཾ དྷ་མྨ་སཱ་མ་གྒཱི. ཀ་ཏ་མཱ ཨ་ན་བྷི་ནི་བྦ་ཏྟི་སཱ་མ་གྒཱི? བ་ཧུ ཙེ་པི བྷི་ཀྑཱུ ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ པ་རི་ནི་བྦཱ་ཡ་ནྟི; ན ཏེ་སཾ ནི་བྦཱ་ན་དྷཱ་ཏུ་ཡཱ [ཏེ་ན (སཱི.)] ཨཱུ་ན་ཏྟཾ ཝཱ པུ་ཎྞ་ཏྟཾ ཝཱ པ་ཉྙཱ་ཡ་ཏི – ཨ་ཡཾ ཨ་ན་བྷི་ནི་བྦ་ཏྟི་སཱ་མ་གྒཱི. བྷ་ཝ་ནེཏི ནེ་ར་ཡི་ཀཱ་ནཾ ནི་ར་ཡོ བྷ་ཝ་ནཾ, ཏི་ར་ཙྪཱ་ན་ཡོ་ནི་ཀཱ་ནཾ ཏི་ར་ཙྪཱ་ན་ཡོ་ནི བྷ་ཝ་ནཾ, པེ་ཏྟི་ཝི་ས་ཡི་ཀཱ་ནཾ པེ་ཏྟི་ཝི་ས་ཡོ བྷ་ཝ་ནཾ, མ་ནུ་སྶཱ་ནཾ མ་ནུ་སྶ་ལོ་ཀོ བྷ་ཝ་ནཾ, དེ་ཝཱ་ནཾ དེ་ཝ་ལོ་ཀོ བྷ་ཝ་ན་ནྟི. སཱ་མ་གྒི་ཡ་མཱ་ཧུ ཏ་སྶ ཏཾ, ཡོ ཨ་ཏྟཱ་ནཾ བྷ་ཝ་ནེ ན ད་སྶ་ཡེཏི. ཏ་སྶེ་སཱ སཱ་མ་གྒཱི ཨེ་ཏཾ ཚ་ནྣཾ ཨེ་ཏཾ པ་ཏི་རཱུ་པཾ ཨེ་ཏཾ ཨ་ནུ་ཙྪ་ཝི་ཀཾ ཨེ་ཏཾ ཨ་ནུ་ལོ་མཾ, ཡོ ཨེ་ཝཾ པ་ཊི་ཙྪ་ནྣེ ནི་ར་ཡེ ཨ་ཏྟཱ་ནཾ ན ད་སྶེ་ཡྻ, ཏི་ར་ཙྪཱ་ན་ཡོ་ནི་ཡཾ ཨ་ཏྟཱ་ནཾ ན ད་སྶེ་ཡྻ, པེ་ཏྟི་ཝི་ས་ཡེ ཨ་ཏྟཱ་ནཾ ན ད་སྶེ་ཡྻ, མ་ནུ་སྶ་ལོ་ཀེ ཨ་ཏྟཱ་ནཾ ན ད་སྶེ་ཡྻ, དེ་ཝ་ལོ་ཀེ ཨ་ཏྟཱ་ནཾ ན ད་སྶེ་ཡྻཱ་ཏི ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – སཱ་མ་གྒི་ཡ་མཱ་ཧུ ཏ་སྶ ཏཾ, ཡོ ཨ་ཏྟཱ་ནཾ བྷ་ཝ་ནེ ན ད་སྶ་ཡེ.
ཏེ་ནཱ་ཧ བྷ་ག་ཝཱ –
‘‘པ་ཏི་ལཱི་ན་ཙ་ར་སྶ བྷི་ཀྑུ་ནོ, བྷ་ཛ་མཱ་ན་སྶ ཝི་ཝི་ཏྟ་མཱ་ས་ནཾ;
སཱ་མ་གྒི་ཡ་མཱ་ཧུ ཏ་སྶ ཏཾ, ཡོ ཨ་ཏྟཱ་ནཾ བྷ་ཝ་ནེ ན ད་སྶ་ཡེ’’ཏི.
༤༦. ས་བྦ་ཏྠ མུ་ནཱི ཨ་ནི་སྶི་ཏོ, ན པི་ཡཾ ཀུ་བྦ་ཏི ནོ་པི ཨ་པྤི་ཡཾ;
ཏ་སྨིཾ པ་རི་དེ་ཝ་མ་ཙྪ་རཾ, པ་ཎྞེ ཝཱ་རི ཡ་ཐཱ ན ལི་མྤ་ཏི.
ས་བྦ་ཏྠ མུ་ནཱི ཨ་ནི་སྶི་ཏོཏི. ས་བྦཾ ཝུ་ཙྩ་ཏི དྭཱ་ད་སཱ་ཡ་ཏ་ནཱ་ནི – ཙ་ཀྑུ་ཉྩེ་ཝ རཱུ་པཱ ཙ, སོ་ཏ་ཉྩ ས་དྡཱ ཙ, གྷཱ་ན་ཉྩ ག་ནྡྷཱ ཙ, ཛི་ཝ྄ཧཱ ཙ ར་སཱ ཙ, ཀཱ་ཡོ ཙ ཕོ་ཊྛ་བྦཱ ཙ, མ་ནོ ཙ དྷ་མྨཱ ཙ. མུ་ནཱིཏི. མོ་ནཾ ཝུ་ཙྩ་ཏི ཉཱ་ཎཾ…པེ… ས་ངྒ་ཛཱ་ལ་མ་ཏི་ཙྩ སོ མུ་ནི. ཨ་ནི་སྶི་ཏོཏི. དྭེ ནི་སྶ་ཡཱ – ཏ་ཎྷཱ་ནི་སྶ་ཡོ ཙ དི་ཊྛི་ནི་སྶ་ཡོ ཙ…པེ… ཨ་ཡཾ ཏ་ཎྷཱ་ནི་སྶ་ཡོ…པེ… ཨ་ཡཾ དི་ཊྛི་ནི་སྶ་ཡོ. མུ་ནི ཏ་ཎྷཱ་ནི་སྶ་ཡཾ པ་ཧཱ་ཡ དི་ཊྛི་ནི་སྶ་ཡཾ པ་ཊི་ནི་སྶ་ཛྫི་ཏྭཱ ཙ་ཀྑུཾ ཨ་ནི་སྶི་ཏོ སོ་ཏཾ ཨ་ནི་སྶི་ཏོ གྷཱ་ནཾ ཨ་ནི་སྶི་ཏོ ཛི་ཝ྄ཧཾ ཨ་ནི་སྶི་ཏོ ཀཱ་ཡཾ ཨ་ནི་སྶི་ཏོ མ་ནཾ ཨ་ནི་སྶི་ཏོ རཱུ་པེ… ས་དྡེ… ག་ནྡྷེ… ར་སེ… ཕོ་ཊྛ་བྦེ… དྷ་མྨེ… ཀུ་ལཾ… ག་ཎཾ… ཨཱ་ཝཱ་སཾ… ལཱ་བྷཾ… ཡ་སཾ… པ་སཾ་སཾ… སུ་ཁཾ… ཙཱི་ཝ་རཾ… པི་ཎྜ་པཱ་ཏཾ… སེ་ནཱ་ས་ནཾ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ… ཀཱ་མ་དྷཱ་ཏུཾ… རཱུ་པ་དྷཱ་ཏུཾ… ཨ་རཱུ་པ་དྷཱ་ཏུཾ… ཀཱ་མ་བྷ་ཝཾ… རཱུ་པ་བྷ་ཝཾ… ཨ་རཱུ་པ་བྷ་ཝཾ… ས་ཉྙཱ་བྷ་ཝཾ… ཨ་ས་ཉྙཱ་བྷ་ཝཾ … ནེ་ཝ་ས་ཉྙཱ་ནཱ་ས་ཉྙཱ་བྷ་ཝཾ… ཨེ་ཀ་ཝོ་ཀཱ་ར་བྷ་ཝཾ… ཙ་ཏུ་ཝོ་ཀཱ་ར་བྷ་ཝཾ… པ་ཉྩ་ཝོ་ཀཱ་ར་བྷ་ཝཾ… ཨ་ཏཱི་ཏཾ… ཨ་ནཱ་ག་ཏཾ… པ་ཙྩུ་པྤ་ནྣཾ… དི་ཊྛཾ… སུ་ཏཾ… མུ་ཏཾ… ཝི་ཉྙཱ་ཏཾ… ས་བྦེ དྷ་མྨེ ཨ་ནི་སྶི་ཏོ ཨ་ན་ལླཱི་ནོ ཨ་ནུ་པ་ག་ཏོ ཨ་ན་ཛ྄ཛྷོ་སི་ཏོ ཨ་ན་དྷི་མུ་ཏྟོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་ར་ཏཱི་ཏི – ས་བྦ་ཏྠ མུ་ནི ཨ་ནི་སྶི་ཏོ.
ན པི་ཡཾ ཀུ་བྦ་ཏི ནོ་པི ཨ་པྤི་ཡནྟི. པི་ཡཱཏི དྭེ པི་ཡཱ – ས་ཏྟཱ ཝཱ ས་ངྑཱ་རཱ ཝཱ. ཀ་ཏ་མེ ས་ཏྟཱ པི་ཡཱ? ཨི་དྷ ཡ་སྶ ཏེ ཧོ་ནྟི ཨ་ཏྠ་ཀཱ་མཱ ཧི་ཏ་ཀཱ་མཱ ཕཱ་སུ་ཀཱ་མཱ ཡོ་ག་ཀྑེ་མ་ཀཱ་མཱ མཱ་ཏཱ ཝཱ པི་ཏཱ ཝཱ བྷཱ་ཏཱ ཝཱ བྷ་གི་ནཱི ཝཱ པུ་ཏྟཱ ཝཱ དྷཱི་ཏ་རཱ ཝཱ མི་ཏྟཱ ཝཱ ཨ་མ་ཙྩཱ ཝཱ ཉཱ་ཏཱི ཝཱ སཱ་ལོ་ཧི་ཏཱ ཝཱ – ཨི་མེ ས་ཏྟཱ པི་ཡཱ. ཀ་ཏ་མེ ས་ངྑཱ་རཱ པི་ཡཱ? མ་ནཱ་པི་ཀཱ རཱུ་པཱ མ་ནཱ་པི་ཀཱ ས་དྡཱ མ་ནཱ་པི་ཀཱ ག་ནྡྷཱ མ་ནཱ་པི་ཀཱ ར་སཱ མ་ནཱ་པི་ཀཱ ཕོ་ཊྛ་བྦཱ – ཨི་མེ ས་ངྑཱ་རཱ པི་ཡཱ. ཨ་པྤི་ཡཱཏི དྭེ ཨ་པྤི་ཡཱ – ས་ཏྟཱ ཝཱ ས་ངྑཱ་རཱ ཝཱ. ཀ་ཏ་མེ ས་ཏྟཱ ཨ་པྤི་ཡཱ? ཨི་དྷ ཡ་སྶ ཏེ ཧོ་ནྟི ཨ་ན་ཏྠ་ཀཱ་མཱ ཨ་ཧི་ཏ་ཀཱ་མཱ ཨ་ཕཱ་སུ་ཀཱ་མཱ ཨ་ཡོ་ག་ཀྑེ་མ་ཀཱ་མཱ ཛཱི་ཝི་ཏཱ ཝོ་རོ་པེ་ཏུ་ཀཱ་མཱ – ཨི་མེ ས་ཏྟཱ ཨ་པྤི་ཡཱ. ཀ་ཏ་མེ ས་ངྑཱ་རཱ ཨ་པྤི་ཡཱ? ཨ་མ་ནཱ་པི་ཀཱ རཱུ་པཱ ཨ་མ་ནཱ་པི་ཀཱ ས་དྡཱ ཨ་མ་ནཱ་པི་ཀཱ ག་ནྡྷཱ ཨ་མ་ནཱ་པི་ཀཱ ར་སཱ ཨ་མ་ནཱ་པི་ཀཱ ཕོ་ཊྛ་བྦཱ – ཨི་མེ ས་ངྑཱ་རཱ ཨ་པྤི་ཡཱ. ན པི་ཡཾ ཀུ་བྦ་ཏི ནོ་པི ཨ་པྤི་ཡནྟི. ‘‘ཨ་ཡཾ མེ ས་ཏྟོ པི་ཡོ, ཨི་མེ ཙ ས་ངྑཱ་རཱ མ་ནཱ་པཱ’’ཏི རཱ་ག་ཝ་སེ་ན པི་ཡཾ ན ཀ་རོ་ཏི; ‘‘ཨ་ཡཾ མེ ས་ཏྟོ ཨ་པྤི་ཡོ, ཨི་མེ ཙ ས་ངྑཱ་རཱ ཨ་མ་ནཱ་པཱ’’ཏི པ་ཊི་གྷ་ཝ་སེ་ན ཨ་པྤི་ཡཾ ན ཀ་རོ་ཏི ན ཛ་ནེ་ཏི ན ས་ཉྫ་ནེ་ཏི ན ནི་བྦ་ཏྟེ་ཏི ནཱ་བྷི་ནི་བྦ་ཏྟེ་ཏཱི་ཏི – ན པི་ཡཾ ཀུ་བྦ་ཏི ནོ་པི ཨ་པྤི་ཡཾ.
ཏ་སྨིཾ པ་རི་དེ་ཝ་མ་ཙྪ་རཾ པ་ཎྞེ ཝཱ་རི ཡ་ཐཱ ན ལི་མྤ་ཏཱིཏི. ཏ་སྨིནྟི ཏ་སྨིཾ པུ་གྒ་ལེ ཨ་ར་ཧ་ནྟེ ཁཱི་ཎཱ་ས་ཝེ. པ་རི་དེ་ཝོཏི ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ བྷོ་ག་བྱ་ས་ནེ་ན ཝཱ ཕུ་ཊྛ་སྶ རོ་ག་བྱ་ས་ནེ་ན ཝཱ ཕུ་ཊྛ་སྶ སཱི་ལ་བྱ་ས་ནེ་ན ཝཱ ཕུ་ཊྛ་སྶ དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ ཨཱ་དེ་ཝོ པ་རི་དེ་ཝོ ཨཱ་དེ་ཝ་ནཱ པ་རི་དེ་ཝ་ནཱ ཨཱ་དེ་ཝི་ཏ་ཏྟཾ པ་རི་དེ་ཝི་ཏ་ཏྟཾ ཝཱ་ཙཱ པ་ལཱ་པོ ཝི་པྤ་ལཱ་པོ ལཱ་ལ་པྤོ ལཱ་ལ་པྤཱ་ཡ་ནཱ ལཱ་ལ་པྤཱ་ཡི་ཏ་ཏྟཾ. མ་ཙྪ་རི་ཡནྟི པ་ཉྩ མ་ཙྪ་རི་ཡཱ་ནི – ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ. ཡཾ ཨེ་ཝ་རཱུ་པཾ མ་ཙྪ་རི་ཡཾ མ་ཙྪ་རཱ་ཡ་ནཱ མ་ཙྪ་རཱ་ཡི་ཏ་ཏྟཾ ཝེ་ཝི་ཙྪཾ ཀ་ད་རི་ཡཾ ཀ་ཊུ་ཀ་ཉྩུ་ཀ་ཏཱ ཨ་གྒ་ཧི་ཏ་ཏྟཾ ཙི་ཏྟ་སྶ – ཨི་དཾ ཝུ་ཙྩ་ཏི མ་ཙྪ་རི་ཡཾ. ཨ་པི ཙ ཁ་ནྡྷ་མ་ཙྪ་རི་ཡ་མྤི མ་ཙྪ་རི་ཡཾ, དྷཱ་ཏུ་མ་ཙྪ་རི་ཡ་མྤི མ་ཙྪ་རི་ཡཾ, ཨཱ་ཡ་ཏ་ན་མ་ཙྪ་རི་ཡ་མྤི མ་ཙྪ་རི་ཡཾ གཱ་ཧོ – ཨི་དཾ ཝུ་ཙྩ་ཏི མ་ཙྪ་རི་ཡཾ.
པ་ཎྞེ ཝཱ་རི ཡ་ཐཱ ན ལི་མྤ་ཏཱིཏི. པ་ཎྞཾ ཝུ་ཙྩ་ཏི པ་དུ་མ་པ་ཏྟཾ. ཝཱ་རི ཝུ་ཙྩ་ཏི ཨུ་ད་ཀཾ. ཡ་ཐཱ ཝཱ་རི པ་དུ་མ་པ་ཏྟཾ ན ལི་མྤ་ཏི ན པ་ལི་མྤ་ཏི ན ཨུ་པ་ལི་མྤ་ཏི ཨ་ལི་ཏྟཾ ཨ་པ་ལི་ཏྟཾ ཨ་ནུ་པ་ལི་ཏྟཾ, ཨེ་ཝ་མེ་ཝ ཏ་སྨིཾ པུ་གྒ་ལེ ཨ་ར་ཧ་ནྟེ ཁཱི་ཎཱ་ས་ཝེ པ་རི་དེ་ཝོ མ་ཙྪ་རི་ཡ་ཉྩ ན ལི་མྤ་ཏི ན པ་ལི་མྤ་ཏི ན ཨུ་པ་ལི་མྤ་ཏི ཨ་ལི་ཏྟཱ ཨ་པ་ལི་ཏྟཱ ཨ་ནུ་པ་ལི་ཏྟཱ. སོ ཙ པུ་གྒ་ལོ ཨ་ར་ཧ་ནྟོ ཏེ་ཧི ཀི་ལེ་སེ་ཧི ན ལི་མྤ་ཏི ན པ་ལི་མྤ་ཏི ན ཨུ་པ་ལི་མྤ་ཏི ཨ་ལི་ཏྟོ ཨ་པ་ལི་ཏྟོ ཨ་ནུ་པ་ལི་ཏྟོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་ར་ཏཱི་ཏི – ཏ་སྨིཾ པ་རི་དེ་ཝ་མ་ཙྪ་རཾ པ་ཎྞེ ཝཱ་རི ཡ་ཐཱ ན ལི་མྤ་ཏི.
ཏེ་ནཱ་ཧ བྷ་ག་ཝཱ –
‘‘ས་བྦ་ཏྠ མུ་ནཱི ཨ་ནི་སྶི་ཏོ, ན པི་ཡཾ ཀུ་བྦ་ཏི ནོ་པི ཨ་པྤི་ཡཾ;
ཏ་སྨིཾ པ་རི་དེ་ཝ་མ་ཙྪ་རཾ, པ་ཎྞེ ཝཱ་རི ཡ་ཐཱ ན ལི་མྤ་ཏཱི’’ཏི.
༤༧. ཨུ་ད་བི་ནྡུ ཡ་ཐཱ་པི པོ་ཀྑ་རེ, པ་དུ་མེ ཝཱ་རི ཡ་ཐཱ ན ལི་མྤ་ཏི;
ཨེ་ཝཾ མུ་ནི ནོ་པ་ལི་མྤ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ [དི་ཊྛ་སུ་ཏེ མུ་ཏེ་སུ (སཱི.), དི་ཊྛ་སུ་ཏཾ མུ་ཏེ་སུ (སྱཱ. ཀ.)] ཝཱ.
ཨུ་ད་བི་ནྡུ ཡ་ཐཱ་པི པོ་ཀྑ་རེཏི. ཨུ་ད་བི་ནྡུ ཝུ་ཙྩ་ཏི ཨུ་ད་ཀ་ཐེ་ཝོ. པོ་ཀྑ་རཾ ཝུ་ཙྩ་ཏི པ་དུ་མ་པ་ཏྟཾ. ཡ་ཐཱ ཨུ་ད་བི་ནྡུ པ་དུ་མ་པ་ཏྟེ ན ལི་མྤ་ཏི ན པ་ལི་མྤ་ཏི ན ཨུ་པ་ལི་མྤ་ཏི ཨ་ལི་ཏྟཾ ཨ་པ་ལི་ཏྟཾ ཨ་ནུ་པ་ལི་ཏྟ་ནྟི – ཨུ་ད་བི་ནྡུ ཡ་ཐཱ་པི པོ་ཀྑ་རེ. པ་དུ་མེ ཝཱ་རི ཡ་ཐཱ ན ལི་མྤ་ཏཱིཏི. པ་དུ་མཾ ཝུ་ཙྩ་ཏི པ་དུ་མ་པུ་པྥཾ. ཝཱ་རི ཝུ་ཙྩ་ཏི ཨུ་ད་ཀཾ. ཡ་ཐཱ ཝཱ་རི པ་དུ་མ་པུ་པྥཾ ན ལི་མྤ་ཏི ན པ་ལི་མྤ་ཏི ན ཨུ་པ་ལི་མྤ་ཏི ཨ་ལི་ཏྟཾ ཨ་པ་ལི་ཏྟཾ ཨ་ནུ་པ་ལི་ཏྟ་ནྟི – པ་དུ་མེ ཝཱ་རི ཡ་ཐཱ ན ལི་མྤ་ཏི.
ཨེ་ཝཾ མུ་ནི ནོ་པ་ལི་མྤ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱཏི. ཨེ་ཝནྟི ཨོ་པ་མྨ་ས་མྤ་ཊི་པཱ་ད་ནཾ. མུ་ནཱིཏི. མོ་ནཾ ཝུ་ཙྩ་ཏི ཉཱ་ཎཾ…པེ… ས་ངྒ་ཛཱ་ལ་མ་ཏི་ཙྩ སོ མུ་ནི. ལེ་པཱཏི དྭེ ལེ་པཱ – ཏ་ཎྷཱ་ལེ་པོ ཙ དི་ཊྛི་ལེ་པོ ཙ…པེ… ཨ་ཡཾ ཏ་ཎྷཱ་ལེ་པོ…པེ… ཨ་ཡཾ དི་ཊྛི་ལེ་པོ. མུ་ནི ཏ་ཎྷཱ་ལེ་པཾ པ་ཧཱ་ཡ དི་ཊྛི་ལེ་པཾ པ་ཊི་ནི་སྶ་ཛྫི་ཏྭཱ དི་ཊྛེ ན ལི་མྤ་ཏི, སུ་ཏེ ན ལི་མྤ་ཏི, མུ་ཏེ ན ལི་མྤ་ཏི, ཝི་ཉྙཱ་ཏེ ན ལི་མྤ་ཏི ན པ་ལི་མྤ་ཏི ན ཨུ་པ་ལི་མྤ་ཏི ཨ་ལི་ཏྟོ ཨ་པ་ལི་ཏྟོ ཨ་ནུ་པ་ལི་ཏྟོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་ར་ཏཱི་ཏི – ཨེ་ཝཾ མུ་ནི ནོ་པ་ལི་མྤ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱ.
ཏེ་ནཱ་ཧ བྷ་ག་ཝཱ –
‘‘ཨུ་ད་བི་ནྡུ ཡ་ཐཱ་པི པོ་ཀྑ་རེ, པ་དུ་མེ ཝཱ་རི ཡ་ཐཱ ན ལི་མྤ་ཏི;
ཨེ་ཝཾ མུ་ནི ནོ་པ་ལི་མྤ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱ’’ཏི.
༤༨. དྷོ་ནོ ན ཧི ཏེ་ན མ་ཉྙ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱ;
ནཱ་ཉྙེ་ན ཝི་སུ་དྡྷི་མི་ཙྪ་ཏི, ན ཧི སོ ར་ཛྫ་ཏི ནོ ཝི་ར་ཛྫ་ཏི.
དྷོ་ནོ ན ཧི ཏེ་ན མ་ཉྙ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱཏི. དྷོ་ནོཏི དྷོ་ནཱ ཝུ་ཙྩ་ཏི པ་ཉྙཱ. ཡཱ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི. ཀིཾ་ཀཱ་ར་ཎཱ དྷོ་ནཱ ཝུ་ཙྩ་ཏི པ་ཉྙཱ? ཏཱ་ཡ པ་ཉྙཱ་ཡ ཀཱ་ཡ་དུ་ཙྩ་རི་ཏཾ དྷུ་ཏ་ཉྩ དྷོ་ཏ ཙ ས་ནྡྷོ་ཏ་ཉྩ ནི་དྡྷོ་ཏ་ཉྩ, ཝ་ཙཱི་དུ་ཙྩ་རི་ཏཾ…པེ… མ་ནོ་དུ་ཙྩ་རི་ཏཾ དྷུ་ཏ་ཉྩ དྷོ་ཏ་ཉྩ ས་ནྡྷོ་ཏ་ཉྩ ནི་དྡྷོ་ཏ་ཉྩ, རཱ་གོ དྷུ་ཏོ ཙ དྷོ་ཏོ ཙ ས་ནྡྷོ་ཏོ ཙ ནི་དྡྷོ་ཏོ ཙ, དོ་སོ… མོ་ཧོ… ཀོ་དྷོ… ཨུ་པ་ནཱ་ཧོ… མ་ཀྑོ… པ་ལཱ༹་སོ… ཨི་སྶཱ… མ་ཙྪ་རི་ཡཾ… མཱ་ཡཱ… སཱ་ཋེ་ཡྻཾ… ཐ་མྦྷོ… སཱ་ར་མྦྷོ… མཱ་ནོ… ཨ་ཏི་མཱ་ནོ… མ་དོ… པ་མཱ་དོ… ས་བྦེ ཀི་ལེ་སཱ… ས་བྦེ དུ་ཙྩ་རི་ཏཱ… ས་བྦེ ད་ར་ཐཱ… ས་བྦེ པ་རི་ལཱ༹་ཧཱ… ས་བྦེ ས་ནྟཱ་པཱ… ས་བྦཱ་ཀུ་ས་ལཱ་བྷི་ས་ངྑཱ་རཱ དྷུ་ཏཱ ཙ དྷོ་ཏཱ ཙ ས་ནྡྷོ་ཏཱ ཙ ནི་དྡྷོ་ཏཱ ཙ. ཏཾ་ཀཱ་ར་ཎཱ དྷོ་ནཱ ཝུ་ཙྩ་ཏི པ་ཉྙཱ.
ཨ་ཐ ཝཱ ས་མྨཱ་དི་ཊྛི་ཡཱ མི་ཙྪཱ་དི་ཊྛི དྷུ་ཏཱ ཙ དྷོ་ཏཱ ཙ ས་ནྡྷོ་ཏཱ ཙ ནི་དྡྷོ་ཏཱ ཙ, ས་མྨཱ་ས་ངྐ་པྤེ་ན མི་ཙྪཱ་ས་ངྐ་པྤོ དྷུ་ཏོ ཙ དྷོ་ཏོ ཙ ས་ནྡྷོ་ཏོ ཙ ནི་དྡྷོ་ཏོ ཙ, ས་མྨཱ་ཝཱ་ཙཱ་ཡ མི་ཙྪཱ་ཝཱ་ཙཱ དྷུ་ཏཱ ཙ… ས་མྨཱ་ཀ་མྨ་ནྟེ་ན མི་ཙྪཱ་ཀ་མྨ་ནྟོ དྷུ་ཏོ ཙ… ས་མྨཱ་ཨཱ་ཛཱི་ཝེ་ན མི་ཙྪཱ་ཨཱ་ཛཱི་ཝོ དྷུ་ཏོ ཙ… ས་མྨཱ་ཝཱ་ཡཱ་མེ་ན མི་ཙྪཱ་ཝཱ་ཡཱ་མོ དྷུ་ཏོ ཙ… ས་མྨཱ་ས་ཏི་ཡཱ མི་ཙྪཱ་ས་ཏི དྷུ་ཏཱ ཙ… ས་མྨཱ་ས་མཱ་དྷི་ནཱ མི་ཙྪཱ་ས་མཱ་དྷི དྷུ་ཏོ ཙ… ས་མྨཱ་ཉཱ་ཎེ་ན མི་ཙྪཱ་ཉཱ་ཎཾ དྷུ་ཏ་ཉྩ… ས་མྨཱ་ཝི་མུ་ཏྟི་ཡཱ མི་ཙྪཱ་ཝི་མུ་ཏྟི དྷུ་ཏཱ ཙ དྷོ་ཏཱ ཙ ས་ནྡྷོ་ཏཱ ཙ ནི་དྡྷོ་ཏཱ ཙ.
ཨ་ཐ ཝཱ ཨ་རི་ཡེ་ན ཨ་ཊྛ་ངྒི་ཀེ་ན མ་གྒེ་ན ས་བྦེ ཀི་ལེ་སཱ… ས་བྦེ དུ་ཙྩ་རི་ཏཱ… ས་བྦེ ད་ར་ཐཱ… ས་བྦེ པ་རི་ལཱ༹་ཧཱ… ས་བྦེ ས་ནྟཱ་པཱ… ས་བྦཱ་ཀུ་ས་ལཱ་བྷི་ས་ངྑཱ་རཱ དྷུ་ཏཱ ཙ དྷོ་ཏཱ ཙ ས་ནྡྷོ་ཏཱ ཙ ནི་དྡྷོ་ཏཱ ཙ. ཨ་ར་ཧཱ ཨི་མེ་ཧི དྷོ་ནེ་ཧི དྷ་མྨེ་ཧི ཨུ་པེ་ཏོ ས་མུ་པེ་ཏོ ཨུ་པ་ག་ཏོ ས་མུ་པ་ག་ཏོ ཨུ་པ་པ་ནྣོ ས་མུ་པ་པ་ནྣོ ས་མ་ནྣཱ་ག་ཏོ. ཏ་སྨཱ ཨ་ར་ཧཱ དྷོ་ནོ. སོ དྷུ་ཏ་རཱ་གོ དྷུ་ཏ་པཱ་པོ དྷུ་ཏ་ཀི་ལེ་སོ དྷུ་ཏ་པ་རི་ལཱ༹་ཧོ་ཏི – དྷོ་ནོ.
དྷོ་ནོ ན ཧི ཏེ་ན མ་ཉྙ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱཏི. དྷོ་ནོ དི་ཊྛཾ ན མ་ཉྙ་ཏི, དི་ཊྛ་སྨིཾ ན མ་ཉྙ་ཏི, དི་ཊྛ་ཏོ ན མ་ཉྙ་ཏི, དི་ཊྛཱ མེ་ཏི ན མ་ཉྙ་ཏི; སུ་ཏཾ ན མ་ཉྙ་ཏི, སུ་ཏ་སྨིཾ ན མ་ཉྙ་ཏི, སུ་ཏ་ཏོ ན མ་ཉྙ་ཏི, སུ་ཏཾ མེ་ཏི ན མ་ཉྙ་ཏི; མུ་ཏཾ ན མ་ཉྙ་ཏི, མུ་ཏ་སྨིཾ ན མ་ཉྙ་ཏི, མུ་ཏ་ཏོ ན མ་ཉྙ་ཏི, མུ་ཏཾ མེ་ཏི ན མ་ཉྙ་ཏི; ཝི་ཉྙཱ་ཏཾ ན མ་ཉྙ་ཏི, ཝི་ཉྙཱ་ཏ་སྨིཾ ན མ་ཉྙ་ཏི, ཝི་ཉྙཱ་ཏ་ཏོ ན མ་ཉྙ་ཏི, ཝི་ཉྙཱ་ཏཾ མེ་ཏི ན མ་ཉྙ་ཏི. ཝུ་ཏྟ་མྤི ཧེ་ཏཾ བྷ་ག་ཝ་ཏཱ – ‘‘ཨ་སྨཱི་ཏི, བྷི་ཀྑ་ཝེ, མ་ཉྙི་ཏ་མེ་ཏཾ, ཨ་ཡ་མ་ཧ་མ་སྨཱི་ཏི མ་ཉྙི་ཏ་མེ་ཏཾ, བྷ་ཝི་སྶ་ནྟི མ་ཉྙི་ཏ་མེ་ཏཾ, ན བྷ་ཝི་སྶ་ནྟི མ་ཉྙི་ཏ་མེ་ཏཾ, རཱུ་པཱི བྷ་ཝི་སྶ་ནྟི མ་ཉྙི་ཏ་མེ་ཏཾ, ཨ་རཱུ་པཱི བྷ་ཝི་སྶ་ནྟི མ་ཉྙི་ཏ་མེ་ཏཾ, ས་ཉྙཱི བྷ་ཝི་སྶ་ནྟི མ་ཉྙི་ཏ་མེ་ཏཾ, ཨ་ས་ཉྙཱི བྷ་ཝི་སྶ་ནྟི མ་ཉྙི་ཏ་མེ་ཏཾ, ནེ་ཝ་ས་ཉྙཱི་ནཱ་ས་ཉྙཱི བྷ་ཝི་སྶ་ནྟི མ་ཉྙི་ཏ་མེ་ཏཾ. མ་ཉྙི་ཏཾ [མ་ཉྙི་ཏཾ ཧི (སཱི.)], བྷི་ཀྑ་ཝེ, རོ་གོ, མ་ཉྙི་ཏཾ ག་ཎྜོ, མ་ཉྙི་ཏཾ ས་ལླཾ, མ་ཉྙི་ཏཾ ཨུ་པ་དྡ་ཝོ. ཏ་སྨཱ་ཏི་ཧ, བྷི་ཀྑ་ཝེ, ཨ་མ་ཉྙ་མཱ་ནེ་ན ཙེ་ཏ་སཱ ཝི་ཧ་རི་སྶཱ་མཱ་ཏི, ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི – དྷོ་ནོ ན ཧི ཏེ་ན མ་ཉྙ་ཏི ཡ་དི་དཾ དི་ཊྛ་སུ་ཏ་མུ་ཏེ་སུ ཝཱ.
ནཱ་ཉྙེ་ན ཝི་སུ་དྡྷི་མི་ཙྪ་ཏཱིཏི. དྷོ་ནོ ཨ་ཉྙེ་ན ཨ་སུ་དྡྷི་མ་གྒེ་ན མི་ཙྪཱ་པ་ཊི་པ་དཱ་ཡ ཨ་ནི་ཡྻཱ་ནི་ཀ་པ་ཐེ་ན ཨ་ཉྙ་ཏྲ ས་ཏི་པ་ཊྛཱ་ནེ་ཧི ཨ་ཉྙ་ཏྲ ས་མྨ་པྤ་དྷཱ་ནེ་ཧི ཨ་ཉྙ་ཏྲ ཨི་དྡྷི་པཱ་དེ་ཧི ཨ་ཉྙ་ཏྲ ཨི་ནྡྲི་ཡེ་ཧི ཨ་ཉྙ་ཏྲ བ་ལེ་ཧི ཨ་ཉྙ་ཏྲ བོ་ཛ྄ཛྷ་ངྒེ་ཧི ཨ་ཉྙ་ཏྲ ཨ་རི་ཡཱ ཨ་ཊྛ་ངྒི་ཀཱ མ་གྒཱ སུ་དྡྷིཾ ཝི་སུ་དྡྷིཾ པ་རི་སུ་དྡྷིཾ མུ་ཏྟིཾ ཝི་མུ་ཏྟིཾ པ་རི་མུ་ཏྟིཾ ན ཨི་ཙྪ་ཏི ན སཱ་དི་ཡ་ཏི ན པ་ཏྠེ་ཏི ན པི་ཧེ་ཏི ནཱ་བྷི་ཛ་པྤ་ཏཱི་ཏི – ནཱ་ཉྙེ་ན ཝི་སུ་དྡྷི་མི་ཙྪ་ཏི.
ན ཧི སོ ར་ཛྫ་ཏི ནོ ཝི་ར་ཛྫ་ཏཱིཏི. ས་བྦེ བཱ་ལ་པུ་ཐུ་ཛྫ་ནཱ ར་ཛྫ་ནྟི, པུ་ཐུ་ཛྫ་ན་ཀ་ལྱཱ་ཎ་ཀཾ ཨུ་པཱ་དཱ་ཡ ས་ཏྟ སེ་ཀྑཱ ཝི་ར་ཛྫ་ནྟི; ཨ་ར་ཧཱ ནེ་ཝ ར་ཛྫ་ཏི ནོ ཝི་ར་ཛྫ་ཏི. ཝི་ར་ཏྟོ སོ ཁ་ཡཱ རཱ་ག་སྶ ཝཱི་ཏ་རཱ་ག་ཏྟཱ, ཁ་ཡཱ དོ་ས་སྶ ཝཱི་ཏ་དོ་ས་ཏྟཱ, ཁ་ཡཱ མོ་ཧ་སྶ ཝཱི་ཏ་མོ་ཧ་ཏྟཱ. སོ ཝུ་ཊྛ་ཝཱ་སོ ཙི་ཎྞ་ཙ་ར་ཎོ…པེ… ཛཱ་ཏི་ཛ་རཱ་མ་ར་ཎ་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ་ཏི – ན ཧི སོ ར་ཛྫ་ཏི ནོ ཝི་ར་ཛྫ་ཏི.
ཏེ་ནཱ་ཧ བྷ་ག་ཝཱ –
‘‘དྷོ་ནོ ན ཧི ཏེ་ན མ་ཉྙ་ཏི, ཡ་དི་དཾ དི་ཊྛ་སུ་ཏ་མུ་ཏེ་སུ ཝཱ;
ནཱ་ཉྙེ་ན ཝི་སུ་དྡྷི་མི་ཙྪ་ཏི, ན ཧི སོ ར་ཛྫ་ཏི ནོ ཝི་ར་ཛྫ་ཏཱི’’ཏི.
ཛ་རཱ་སུ་ཏྟ་ནི་དྡེ་སོ ཚ་ཊྛོ.