༥. པ་ར་མ་ཊྛ་ཀ་སུ་ཏྟ་ནི་དྡེ་སོ
ཨ་ཐ པ་ར་མ་ཊྛ་ཀ་སུ་ཏྟ་ནི་དྡེ་སཾ ཝ་ཀྑ་ཏི –
༣༡. པ་ར་མ་ནྟི དི་ཊྛཱི་སུ པ་རི་བྦ་སཱ་ནོ, ཡ་དུ་ཏྟ་རིཾ ཀུ་རུ་ཏེ ཛ་ནྟུ ལོ་ཀེ;
ཧཱི་ནཱ་ཏི ཨ་ཉྙེ ཏ་ཏོ ས་བྦ་མཱ་ཧ, ཏ་སྨཱ ཝི་ཝཱ་དཱ་ནི ཨ་ཝཱི་ཏི་ཝ་ཏྟོ.
པ་ར་མ་ནྟི དི་ཊྛཱི་སུ པ་རི་བྦ་སཱ་ནོཏི. ས་ནྟེ་ཀེ ས་མ་ཎ་བྲཱ་ཧྨ་ཎཱ དི་ཊྛི་ག་ཏི་ཀཱ. ཏེ དྭཱ་ས་ཊྛི་ཡཱ དི་ཊྛི་ག་ཏཱ་ནཾ ཨ་ཉྙ་ཏ་ར་ཉྙ་ཏ་རཾ དི་ཊྛི་ག་ཏཾ ‘‘ཨི་དཾ པ་ར་མཾ ཨ་གྒཾ སེ་ཊྛཾ ཝི་སི་ཊྛཾ པཱ་མོ་ཀྑཾ ཨུ་ཏྟ་མཾ པ་ཝ་ར’’ནྟི ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ས་ཀཱ་ཡ ས་ཀཱ་ཡ དི་ཊྛི་ཡཱ ཝ་ས་ནྟི པ་ཝ་ས་ནྟི ཨཱ་ཝ་ས་ནྟི པ་རི་ཝ་ས་ནྟི. ཡ་ཐཱ ཨཱ་གཱ་རི་ཀཱ ཝཱ གྷ་རེ་སུ ཝ་ས་ནྟི, སཱ་པ་ཏྟི་ཀཱ ཝཱ ཨཱ་པ་ཏྟཱི་སུ ཝ་ས་ནྟི, ས་ཀི་ལེ་སཱ ཝཱ ཀི་ལེ་སེ་སུ ཝ་ས་ནྟི; ཨེ་ཝ་མེ་ཝ ས་ནྟེ་ཀེ ས་མ་ཎ་བྲཱ་ཧྨ་ཎཱ དི་ཊྛི་ག་ཏི་ཀཱ. ཏེ དྭཱ་ས་ཊྛི་ཡཱ དི་ཊྛི་ག་ཏཱ་ནཾ ཨ་ཉྙ་ཏ་ར་ཉྙ་ཏ་རཾ དི་ཊྛི་ག་ཏཾ ‘‘ཨི་དཾ པ་ར་མཾ ཨ་གྒཾ སེ་ཊྛཾ ཝི་སི་ཊྛཾ པཱ་མོ་ཀྑཾ ཨུ་ཏྟ་མཾ པ་ཝ་ར’’ནྟི ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ས་ཀཱ་ཡ ས་ཀཱ་ཡ དི་ཊྛི་ཡཱ ཝ་ས་ནྟི པ་ཝ་ས་ནྟི [སཾ་ཝ་ས་ནྟི (སྱཱ.) ན་ཏྠི སཱི་ཧ་ལ༹་པོ་ཏྠ་ཀེ] ཨཱ་ཝ་ས་ནྟི པ་རི་ཝ་ས་ནྟཱི་ཏི – པ་ར་མ་ནྟི དི་ཊྛཱི་སུ པ་རི་བྦ་སཱ་ནོ.
ཡ་དུ་ཏྟ་རིཾ ཀུ་རུ་ཏེ ཛ་ནྟུ ལོ་ཀེཏི. ཡ་དནྟི ཡཾ. ཨུ་ཏྟ་རིཾ ཀུ་རུ་ཏེཏི ཨུ་ཏྟ་རིཾ ཀ་རོ་ཏི, ཨ་གྒཾ སེ་ཊྛཾ ཝི་སི་ཊྛཾ པཱ་མོ་ཀྑཾ ཨུ་ཏྟ་མཾ པ་ཝ་རཾ ཀ་རོ་ཏི ‘‘ཨ་ཡཾ ས་ཏྠཱ ས་བྦ་ཉྙཱུ’’ཏི ཨུ་ཏྟ་རིཾ ཀ་རོ་ཏི, ཨ་གྒཾ སེ་ཊྛཾ ཝི་སི་ཊྛཾ པཱ་མོ་ཀྑཾ ཨུ་ཏྟ་མཾ པ་ཝ་རཾ ཀ་རོ་ཏི. ‘‘ཨ་ཡཾ དྷ་མྨོ སྭཱ་ཀྑཱ་ཏོ…, ཨ་ཡཾ ག་ཎོ སུ་པྤ་ཊི་པ་ནྣོ…, ཨ་ཡཾ དི་ཊྛི བྷ་དྡི་ཀཱ…, ཨ་ཡཾ པ་ཊི་པ་དཱ སུ་པ་ཉྙ་ཏྟཱ…, ཨ་ཡཾ མ་གྒོ ནི་ཡྻཱ་ནི་ཀོ’’ཏི ཨུ་ཏྟ་རིཾ ཀ་རོ་ཏི, ཨ་གྒཾ སེ་ཊྛཾ ཝི་སི་ཊྛཾ པཱ་མོ་ཀྑཾ ཨུ་ཏྟ་མཾ པ་ཝ་རཾ ཀ་རོ་ཏི ནི་བྦ་ཏྟེ་ཏི ཨ་བྷི་ནི་བྦ་ཏྟེ་ཏི. ཛ་ནྟཱུཏི ས་ཏྟོ ན་རོ…པེ… མ་ནུ་ཛོ. ལོ་ཀེཏི ཨ་པཱ་ཡ་ལོ་ཀེ…པེ… ཨཱ་ཡ་ཏ་ན་ལོ་ཀེ་ཏི – ཡ་དུ་ཏྟ་རིཾ ཀུ་རུ་ཏེ ཛ་ནྟུ ལོ་ཀེ.
ཧཱི་ནཱ་ཏི ཨ་ཉྙེ ཏ་ཏོ ས་བྦ་མཱ་ཧཱཏི ཨ་ཏྟ་ནོ ས་ཏྠཱ་རཾ དྷ་མྨ་ཀྑཱ་ནཾ ག་ཎཾ དི་ཊྛིཾ པ་ཊི་པ་དཾ མ་གྒཾ ཋ་པེ་ཏྭཱ ས་བྦེ པ་ར་པྤ་ཝཱ་དེ ཁི་པ་ཏི ཨུ་ཀྑི་པ་ཏི པ་རི་ཀྑི་པ་ཏི. ‘‘སོ ས་ཏྠཱ ན ས་བྦ་ཉྙཱུ, དྷ་མྨོ ན སྭཱ་ཀྑཱ་ཏོ, ག་ཎོ ན སུ་པྤ་ཊི་པ་ནྣོ, དི་ཊྛི ན བྷ་དྡི་ཀཱ, པ་ཊི་པ་དཱ ན སུ་པ་ཉྙ་ཏྟཱ, མ་གྒོ ན ནི་ཡྻཱ་ནི་ཀོ, ན་ཏྠེ་ཏྠ སུ་དྡྷི ཝཱ ཝི་སུ་དྡྷི ཝཱ པ་རི་སུ་དྡྷི ཝཱ མུ་ཏྟི ཝཱ ཝི་མུ་ཏྟི ཝཱ པ་རི་མུ་ཏྟི ཝཱ, ན་ཏྠེ་ཏྠ སུ་ཛ྄ཛྷ་ནྟི ཝཱ ཝི་སུ་ཛ྄ཛྷ་ནྟི ཝཱ པ་རི་སུ་ཛ྄ཛྷ་ནྟི ཝཱ མུ་ཙྩ་ནྟི ཝཱ ཝི་མུ་ཙྩ་ནྟི ཝཱ པ་རི་མུ་ཙྩ་ནྟི ཝཱ, ཧཱི་ནཱ ནི་ཧཱི་ནཱ ཨོ་མ་ཀཱ ལཱ་མ་ཀཱ ཚ་ཏུ་ཀྐཱ པ་རི་ཏྟཱ’’ཏི ཨེ་ཝ་མཱ་ཧ ཨེ་ཝཾ ཀ་ཐེ་ཏི ཨེ་ཝཾ བྷ་ཎ་ཏི ཨེ་ཝཾ དཱི་པ་ཡ་ཏི ཨེ་ཝཾ ཝོ་ཧ་ར་ཏཱི་ཏི – ཧཱི་ནཱ་ཏི ཨ་ཉྙེ ཏ་ཏོ ས་བྦ་མཱ་ཧ.
ཏ་སྨཱ ཝི་ཝཱ་དཱ་ནི ཨ་ཝཱི་ཏི་ཝ་ཏྟོཏི. ཏ་སྨཱཏི ཏཾ་ཀཱ་ར་ཎཱ ཏཾ་ཧེ་ཏུ ཏ་པྤ་ཙྩ་ཡཱ ཏཾ་ནི་དཱ་ནཱ. ཝི་ཝཱ་དཱ་ནཱིཏི དི་ཊྛི་ཀ་ལ་ཧཱ་ནི དི་ཊྛི་བྷ་ཎྜ་ནཱ་ནི དི་ཊྛི་ཝི་གྒ་ཧཱ་ནི དི་ཊྛི་ཝི་ཝཱ་དཱ་ནི དི་ཊྛི་མེ་དྷ་གཱ་ནི ཙ. ཨ་ཝཱི་ཏི་ཝ་ཏྟོཏི ཨ་ན་ཏི་ཀྐ་ནྟོ ཨ་ས་མ་ཏི་ཀྐ་ནྟོ ཨ་ཝཱི་ཏི་ཝ་ཏྟོ་ཏི – ཏ་སྨཱ ཝི་ཝཱ་དཱ་ནི ཨ་ཝཱི་ཏི་ཝ་ཏྟོ.
ཏེ་ནཱ་ཧ བྷ་ག་ཝཱ –
‘‘པ་ར་མ་ནྟི དི་ཊྛཱི་སུ པ་རི་བྦ་སཱ་ནོ, ཡ་དུ་ཏྟ་རིཾ ཀུ་རུ་ཏེ ཛ་ནྟུ ལོ་ཀེ;
ཧཱི་ནཱ་ཏི ཨ་ཉྙེ ཏ་ཏོ ས་བྦ་མཱ་ཧ, ཏ་སྨཱ ཝི་ཝཱ་དཱ་ནི ཨ་ཝཱི་ཏི་ཝ་ཏྟོ’’ཏི.
༣༢. ཡ་ད་ཏྟ་ནཱི པ་སྶ་ཏི ཨཱ་ནི་སཾ་སཾ, དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ;
ཏ་དེ་ཝ སོ ཏ་ཏྠ ས་མུ་གྒ་ཧཱ་ཡ, ནི་ཧཱི་ན་ཏོ པ་སྶ་ཏི ས་བྦ་མ་ཉྙཾ.
ཡ་ད་ཏྟ་ནཱི པ་སྶ་ཏི ཨཱ་ནི་སཾ་སཾ, དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱཏི. ཡ་ད་ཏྟ་ནཱིཏི ཡཾ ཨ་ཏྟ་ནི. ཨ་ཏྟཱ ཝུ་ཙྩ་ཏི དི་ཊྛི་ག་ཏཾ. ཨ་ཏྟ་ནོ དི་ཊྛི་ཡཱ དྭེ ཨཱ་ནི་སཾ་སེ པ་སྶ་ཏི – དི་ཊྛ་དྷ་མྨི་ཀ་ཉྩ ཨཱ་ནི་སཾ་སཾ, ས་མྤ་རཱ་ཡི་ཀ་ཉྩ ཨཱ་ནི་སཾ་སཾ. ཀ་ཏ་མོ དི་ཊྛི་ཡཱ དི་ཊྛ་དྷ་མྨི་ཀོ ཨཱ་ནི་སཾ་སོ? ཡཾ་དི་ཊྛི་ཀོ ས་ཏྠཱ ཧོ་ཏི, ཏཾ་དི་ཊྛི་ཀཱ སཱ་ཝ་ཀཱ ཧོ་ནྟི. ཏཾ་དི་ཊྛི་ཀཾ ས་ཏྠཱ་རཾ སཱ་ཝ་ཀཱ ས་ཀྐ་རོ་ནྟི ག་རུཾ ཀ་རོ་ནྟི མཱ་ནེ་ནྟི པཱུ་ཛེ་ནྟི, ལ་བྷ་ཏི ཙ ཏ་ཏོ་ནི་དཱ་ནཾ ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ. ཨ་ཡཾ དི་ཊྛི་ཡཱ དི་ཊྛ་དྷ་མྨི་ཀོ ཨཱ་ནི་སཾ་སོ. ཀ་ཏ་མོ དི་ཊྛི་ཡཱ ས་མྤ་རཱ་ཡི་ཀོ ཨཱ་ནི་སཾ་སོ? ཨ་ཡཾ དི་ཊྛི ཨ་ལཾ ནཱ་ག་ཏྟཱ་ཡ ཝཱ སུ་པ་ཎྞ་ཏྟཱ་ཡ ཝཱ ཡ་ཀྑ་ཏྟཱ་ཡ ཝཱ ཨ་སུ་ར་ཏྟཱ་ཡ ཝཱ ག་ནྡྷ་བྦ་ཏྟཱ་ཡ ཝཱ མ་ཧཱ་རཱ་ཛ་ཏྟཱ་ཡ ཝཱ ཨི་ནྡ་ཏྟཱ་ཡ ཝཱ བྲ་ཧྨ་ཏྟཱ་ཡ ཝཱ དེ་ཝ་ཏྟཱ་ཡ ཝཱ; ཨ་ཡཾ དི་ཊྛི ཨ་ལཾ སུ་དྡྷི་ཡཱ ཝི་སུ་དྡྷི་ཡཱ པ་རི་སུ་དྡྷི་ཡཱ མུ་ཏྟི་ཡཱ ཝི་མུ་ཏྟི་ཡཱ པ་རི་མུ་ཏྟི་ཡཱ; ཨི་མཱ་ཡ དི་ཊྛི་ཡཱ སུ་ཛ྄ཛྷ་ནྟི ཝི་སུ་ཛ྄ཛྷ་ནྟི པ་རི་སུ་ཛ྄ཛྷ་ནྟི མུ་ཙྩ་ནྟི ཝི་མུ་ཙྩ་ནྟི པ་རི་མུ་ཙྩ་ནྟི; ཨི་མཱ་ཡ དི་ཊྛི་ཡཱ སུ་ཛ྄ཛྷི་སྶཱ་མི ཝི་སུ་ཛ྄ཛྷི་སྶཱ་མི པ་རི་སུ་ཛ྄ཛྷི་སྶཱ་མི མུ་ཙྩི་སྶཱ་མི ཝི་མུ་ཙྩི་སྶཱ་མི པ་རི་མུ་ཙྩི་སྶཱ་མི ཨཱ་ཡ་ཏིཾ ཕ་ལ་པཱ་ཊི་ཀ་ངྑཱི ཧོ་ཏི. ཨ་ཡཾ དི་ཊྛི་ཡཱ ས་མྤ་རཱ་ཡི་ཀོ ཨཱ་ནི་སཾ་སོ. ཨ་ཏྟ་ནོ དི་ཊྛི་ཡཱ ཨི་མེ དྭེ ཨཱ་ནི་སཾ་སེ པ་སྶ་ཏི, དི་ཊྛ་སུ་དྡྷི་ཡཱ་པི དྭེ ཨཱ་ནི་སཾ་སེ པ་སྶ་ཏི, སུ་ཏ་སུ་དྡྷི་ཡཱ་པི དྭེ ཨཱ་ནི་སཾ་སེ པ་སྶ་ཏི, སཱི་ལ་སུ་དྡྷི་ཡཱ་པི དྭེ ཨཱ་ནི་སཾ་སེ པ་སྶ་ཏི, ཝ་ཏ་སུ་དྡྷི་ཡཱ་པི དྭེ ཨཱ་ནི་སཾ་སེ པ་སྶ་ཏི, མུ་ཏ་སུ་དྡྷི་ཡཱ་པི དྭེ ཨཱ་ནི་སཾ་སེ པ་སྶ་ཏི – དི་ཊྛ་དྷ་མྨི་ཀ་ཉྩ ཨཱ་ནི་སཾ་སཾ ས་མྤ་རཱ་ཡི་ཀ་ཉྩ ཨཱ་ནི་སཾ་སཾ. ཀ་ཏ་མོ མུ་ཏ་སུ་དྡྷི་ཡཱ དི་ཊྛ་དྷ་མྨི་ཀོ ཨཱ་ནི་སཾ་སོ? ཡཾ་དི་ཊྛི་ཀོ ས་ཏྠཱ ཧོ་ཏི ཏཾ་དི་ཊྛི་ཀཱ སཱ་ཝ་ཀཱ ཧོ་ནྟི…པེ… ཨ་ཡཾ མུ་ཏ་སུ་དྡྷི་ཡཱ དི་ཊྛ་དྷ་མྨི་ཀོ ཨཱ་ནི་སཾ་སོ. ཀ་ཏ་མོ མུ་ཏ་སུ་དྡྷི་ཡཱ ས་མྤ་རཱ་ཡི་ཀོ ཨཱ་ནི་སཾ་སོ? ཨ་ཡཾ དི་ཊྛི ཨ་ལཾ ནཱ་ག་ཏྟཱ་ཡ ཝཱ…པེ… ཨ་ཡཾ མུ་ཏ་སུ་དྡྷི་ཡཱ ས་མྤ་རཱ་ཡི་ཀོ ཨཱ་ནི་སཾ་སོ. མུ་ཏ་སུ་དྡྷི་ཡཱ་པི ཨི་མེ དྭེ ཨཱ་ནི་སཾ་སེ པ་སྶ་ཏི ད་ཀྑ་ཏི ཨོ་ལོ་ཀེ་ཏི ནི་ཛ྄ཛྷཱ་ཡ་ཏི ཨུ་པ་པ་རི་ཀྑ་ཏཱི་ཏི – ཡ་ད་ཏྟ་ནཱི པ་སྶ་ཏི ཨཱ་ནི་སཾ་སཾ དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ.
ཏ་དེ་ཝ སོ ཏ་ཏྠ ས་མུ་གྒ་ཧཱ་ཡཱཏི. ཏ་དེ་ཝཱཏི ཏཾ དི་ཊྛི་ག་ཏཾ. ཏ་ཏྠཱཏི ས་ཀཱ་ཡ དི་ཊྛི་ཡཱ ས་ཀཱ་ཡ ཁ་ནྟི་ཡཱ ས་ཀཱ་ཡ རུ་ཙི་ཡཱ ས་ཀཱ་ཡ ལ་དྡྷི་ཡཱ. ས་མུ་གྒ་ཧཱ་ཡཱཏི ཨི་དཾ པ་ར་མཾ ཨ་གྒཾ སེ་ཊྛཾ ཝི་སི་ཊྛཾ པཱ་མོ་ཀྑཾ ཨུ་ཏྟ་མཾ པ་ཝ་ར་ནྟི ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ་ཏི – ཏ་དེ་ཝ སོ ཏ་ཏྠ ས་མུ་གྒ་ཧཱ་ཡ.
ནི་ཧཱི་ན་ཏོ པ་སྶ་ཏི ས་བྦ་མ་ཉྙནྟི. ཨ་ཉྙཾ ས་ཏྠཱ་རཾ དྷ་མྨ་ཀྑཱ་ནཾ ག་ཎཾ དི་ཊྛིཾ པ་ཊི་པ་དཾ མ་གྒཾ ཧཱི་ན་ཏོ ནི་ཧཱི་ན་ཏོ ཨོ་མ་ཀ་ཏོ ལཱ་མ་ཀ་ཏོ ཚ་ཏུ་ཀྐ་ཏོ པ་རི་ཏྟ་ཏོ དི་སྶ་ཏི པ་སྶ་ཏི ད་ཀྑ་ཏི ཨོ་ལོ་ཀེ་ཏི ནི་ཛ྄ཛྷཱ་ཡ་ཏི ཨུ་པ་པ་རི་ཀྑ་ཏཱི་ཏི – ནི་ཧཱི་ན་ཏོ པ་སྶ་ཏི ས་བྦ་མ་ཉྙཾ.
ཏེ་ནཱ་ཧ བྷ་ག་ཝཱ –
‘‘ཡ་ད་ཏྟ་ནཱི པ་སྶ་ཏི ཨཱ་ནི་སཾ་སཾ, དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ;
ཏ་དེ་ཝ སོ ཏ་ཏྠ ས་མུ་གྒ་ཧཱ་ཡ, ནི་ཧཱི་ན་ཏོ པ་སྶ་ཏི ས་བྦ་མ་ཉྙ’’ནྟི.
༣༣. ཏཾ ཝཱ་པི [ཙཱ་པི (སཱི.)] ག་ནྠཾ ཀུ་ས་ལཱ ཝ་ད་ནྟི, ཡཾ ནི་སྶི་ཏོ པ་སྶ་ཏི ཧཱི་ན་མ་ཉྙཾ;
ཏ་སྨཱ ཧི དི་ཊྛཾ ཝ སུ་ཏཾ མུ་ཏཾ ཝཱ, སཱི་ལ་བྦ་ཏཾ བྷི་ཀྑུ ན ནི་སྶ་ཡེ་ཡྻ.
ཏཾ ཝཱ་པི ག་ནྠཾ ཀུ་ས་ལཱ ཝ་ད་ནྟཱིཏི. ཀུ་ས་ལཱཏི ཡེ ཏེ ཁ་ནྡྷ་ཀུ་ས་ལཱ དྷཱ་ཏུ་ཀུ་ས་ལཱ ཨཱ་ཡ་ཏ་ན་ཀུ་ས་ལཱ པ་ཊི་ཙྩ་ས་མུ་པྤཱ་ད་ཀུ་ས་ལཱ ས་ཏི་པ་ཊྛཱ་ན་ཀུ་ས་ལཱ ས་མྨ་པྤ་དྷཱ་ན་ཀུ་ས་ལཱ ཨི་དྡྷི་པཱ་ད་ཀུ་ས་ལཱ ཨི་ནྡྲི་ཡ་ཀུ་ས་ལཱ བ་ལ་ཀུ་ས་ལཱ བོ་ཛ྄ཛྷ་ངྒ་ཀུ་ས་ལཱ མ་གྒ་ཀུ་ས་ལཱ ཕ་ལ་ཀུ་ས་ལཱ ནི་བྦཱ་ན་ཀུ་ས་ལཱ, ཏེ ཀུ་ས་ལཱ ཨེ་ཝཾ ཝ་ད་ནྟི – ‘‘ག་ནྠོ ཨེ་སོ, ལ་གྒ་ནཾ ཨེ་ཏཾ, བ་ནྡྷ་ནཾ ཨེ་ཏཾ, པ་ལི་བོ་དྷོ ཨེ་སོ’’ཏི. ཨེ་ཝཾ ཝ་ད་ནྟི ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – ཏཾ ཝཱ་པི ག་ནྠཾ ཀུ་ས་ལཱ ཝ་ད་ནྟི.
ཡཾ ནི་སྶི་ཏོ པ་སྶ་ཏི ཧཱི་ན་མ་ཉྙནྟི. ཡཾ ནི་སྶི་ཏོཏི ཡཾ ས་ཏྠཱ་རཾ དྷ་མྨ་ཀྑཱ་ནཾ ག་ཎཾ དི་ཊྛིཾ པ་ཊི་པ་དཾ མ་གྒཾ ནི་སྶི་ཏོ ས་ནྣི་སྶི་ཏོ ཨ་ལླཱི་ནོ ཨུ་པ་ག་ཏོ ཨ་ཛ྄ཛྷོ་སི་ཏོ ཨ་དྷི་མུ་ཏྟོ. པ་སྶ་ཏི ཧཱི་ན་མ་ཉྙནྟི ཨ་ཉྙཾ ས་ཏྠཱ་རཾ དྷ་མྨ་ཀྑཱ་ནཾ ག་ཎཾ དི་ཊྛིཾ པ་ཊི་པ་དཾ མ་གྒཾ ཧཱི་ན་ཏོ ནི་ཧཱི་ན་ཏོ ཨོ་མ་ཀ་ཏོ ལཱ་མ་ཀ་ཏོ ཚ་ཏུ་ཀྐ་ཏོ པ་རི་ཏྟ་ཏོ དི་སྶ་ཏི པ་སྶ་ཏི ད་ཀྑ་ཏི ཨོ་ལོ་ཀེ་ཏི ནི་ཛ྄ཛྷཱ་ཡ་ཏི ཨུ་པ་ནི་ཛ྄ཛྷཱ་ཡ་ཏི ཨུ་པ་པ་རི་ཀྑ་ཏཱི་ཏི – ཡཾ ནི་སྶི་ཏོ པ་སྶ་ཏི ཧཱི་ན་མ་ཉྙཾ.
ཏ་སྨཱ ཧི དི་ཊྛཾ ཝ སུ་ཏཾ མུ་ཏཾ ཝཱ, སཱི་ལ་བྦ་ཏཾ བྷི་ཀྑུ ན ནི་སྶ་ཡེ་ཡྻཱཏི. ཏ་སྨཱཏི ཏ་སྨཱ ཏཾ་ཀཱ་ར་ཎཱ ཏཾ་ཧེ་ཏུ ཏ་པྤ་ཙྩ་ཡཱ ཏཾ་ནི་དཱ་ནཱ དི་ཊྛཾ ཝཱ དི་ཊྛ་སུ་དྡྷིཾ ཝཱ སུ་ཏཾ ཝཱ སུ་ཏ་སུ་དྡྷིཾ ཝཱ མུ་ཏཾ ཝཱ མུ་ཏ་སུ་དྡྷིཾ ཝཱ སཱི་ལཾ ཝཱ སཱི་ལ་སུ་དྡྷིཾ ཝཱ ཝ་ཏཾ ཝཱ ཝ་ཏ་སུ་དྡྷིཾ ཝཱ ན ནི་སྶ་ཡེ་ཡྻ ན ག་ཎྷེ་ཡྻ ན པ་རཱ་མ་སེ་ཡྻ ནཱ་བྷི་ནི་ཝེ་སེ་ཡྻཱ་ཏི – ཏ་སྨཱ ཧི དི་ཊྛཾ ཝ སུ་ཏཾ མུ་ཏཾ ཝཱ སཱི་ལ་བྦ་ཏཾ བྷི་ཀྑུ ན ནི་སྶ་ཡེ་ཡྻ.
ཏེ་ནཱ་ཧ བྷ་ག་ཝཱ –
‘‘ཏཾ ཝཱ་པི ག་ནྠཾ ཀུ་ས་ལཱ ཝ་ད་ནྟི, ཡཾ ནི་སྶི་ཏོ པ་སྶ་ཏི ཧཱི་ན་མ་ཉྙཾ;
ཏ་སྨཱ ཧི དི་ཊྛཾ ཝ སུ་ཏཾ མུ་ཏཾ ཝཱ, སཱི་ལ་བྦ་ཏཾ བྷི་ཀྑུ ན ནི་སྶ་ཡེ་ཡྻཱ’’ཏི.
༣༤. དི་ཊྛི་མྤི ལོ་ཀ་སྨིཾ ན ཀ་པྤ་ཡེ་ཡྻ, ཉཱ་ཎེ་ན ཝཱ སཱི་ལ་ཝ་ཏེ་ན ཝཱ་པི;
ས་མོ་ཏི ཨ་ཏྟཱ་ན་མ་ནཱུ་པ་ནེ་ཡྻ, ཧཱི་ནོ ན མ་ཉྙེ་ཐ ཝི་སེ་སི ཝཱ་པི.
དི་ཊྛི་མྤི ལོ་ཀ་སྨིཾ ན ཀ་པྤ་ཡེ་ཡྻ, ཉཱ་ཎེ་ན ཝཱ སཱི་ལ་ཝ་ཏེ་ན ཝཱ་པཱིཏི. ཨ་ཊྛ་ས་མཱ་པ་ཏྟི་ཉཱ་ཎེ་ན ཝཱ པ་ཉྩཱ་བྷི་ཉྙཱ་ཉཱ་ཎེ་ན ཝཱ མི་ཙྪཱ་ཉཱ་ཎེ་ན ཝཱ, སཱི་ལེ་ན ཝཱ ཝ་ཏེ་ན ཝཱ སཱི་ལ་བྦ་ཏེ་ན ཝཱ, དི་ཊྛིཾ ན ཀ་པྤ་ཡེ་ཡྻ ན ཛ་ནེ་ཡྻ ན ས་ཉྫ་ནེ་ཡྻ ན ནི་བྦ་ཏྟེ་ཡྻ ན ཨ་བྷི་ནི་བྦ་ཏྟེ་ཡྻ. ལོ་ཀ་སྨིནྟི ཨ་པཱ་ཡ་ལོ་ཀེ…པེ… ཨཱ་ཡ་ཏ་ན་ལོ་ཀེ་ཏི – དི་ཊྛི་མྤི ལོ་ཀ་སྨིཾ ན ཀ་པྤ་ཡེ་ཡྻ ཉཱ་ཎེ་ན ཝཱ སཱི་ལ་ཝ་ཏེ་ན ཝཱ་པི.
ས་མོ་ཏི ཨ་ཏྟཱ་ན་མ་ནཱུ་པ་ནེ་ཡྻཱཏི. ས་དི་སོ་ཧ་མ་སྨཱི་ཏི ཨ་ཏྟཱ་ནཾ ན ཨུ་པ་ནེ་ཡྻ ཛཱ་ཏི་ཡཱ ཝཱ གོ་ཏྟེ་ན ཝཱ ཀོ་ལ་པུ་ཏྟི་ཡེ་ན ཝཱ ཝ་ཎྞ་པོ་ཀྑ་ར་ཏཱ་ཡ ཝཱ དྷ་ནེ་ན ཝཱ ཨ་ཛ྄ཛྷེ་ནེ་ན ཝཱ ཀ་མྨཱ་ཡ་ཏ་ནེ་ན ཝཱ སི་པྤཱ་ཡ་ཏ་ནེ་ན ཝཱ ཝི་ཛྫཱ་ཊྛཱ་ནེ་ན ཝཱ སུ་ཏེ་ན ཝཱ པ་ཊི་བྷཱ་ནེ་ན ཝཱ ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ་ཏི – ས་མོ་ཏི ཨ་ཏྟཱ་ན་མ་ནཱུ་པ་ནེ་ཡྻ.
ཧཱི་ནོ ན མ་ཉྙེ་ཐ ཝི་སེ་སི ཝཱ་པཱིཏི. ཧཱི་ནོ་ཧ་མ་སྨཱི་ཏི ཨ་ཏྟཱ་ནཾ ན ཨུ་པ་ནེ་ཡྻ ཛཱ་ཏི་ཡཱ ཝཱ གོ་ཏྟེ་ན ཝཱ…པེ… ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ. སེ་ཡྻོ་ཧ་མ་སྨཱི་ཏི ཨ་ཏྟཱ་ནཾ ན ཨུ་པ་ནེ་ཡྻ ཛཱ་ཏི་ཡཱ ཝཱ གོ་ཏྟེ་ན ཝཱ…པེ… ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ་ཏི – ཧཱི་ནོ ན མ་ཉྙེ་ཐ ཝི་སེ་སི ཝཱ་པི.
ཏེ་ནཱ་ཧ བྷ་ག་ཝཱ –
‘‘དི་ཊྛི་མྤི ལོ་ཀ་སྨིཾ ན ཀ་པྤ་ཡེ་ཡྻ, ཉཱ་ཎེ་ན ཝཱ སཱི་ལ་ཝ་ཏེ་ན ཝཱ་པི;
ས་མོ་ཏི ཨ་ཏྟཱ་ན་མ་ནཱུ་པ་ནེ་ཡྻ, ཧཱི་ནོ ན མ་ཉྙེ་ཐ ཝི་སེ་སི ཝཱ་པཱི’’ཏི.
༣༥. ཨ་ཏྟཾ པ་ཧཱ་ཡ ཨ་ནུ་པཱ་དི་ཡཱ་ནོ, ཉཱ་ཎེ་ན་པི སོ ནི་སྶ་ཡཾ ནོ ཀ་རོ་ཏི;
ས ཝེ ཝི་ཡ་ཏྟེ་སུ ན ཝ་གྒ་སཱ་རཱི, དི་ཊྛི་མྤི སོ ན པ་ཙྩེ་ཏི ཀི་ཉྩི.
ཨ་ཏྟཾ པ་ཧཱ་ཡ ཨ་ནུ་པཱ་དི་ཡཱ་ནོཏི. ཨ་ཏྟཾ པ་ཧཱ་ཡཱཏི ཨ་ཏྟ་དི་ཊྛིཾ པ་ཧཱ་ཡ. ཨ་ཏྟཾ པ་ཧཱ་ཡཱཏི གཱ་ཧཾ [ཨ་ཏྟ་གཱ་ཧཾ (སཱི. ཀ.)] པ་ཧཱ་ཡ. ཨ་ཏྟཾ པ་ཧཱ་ཡཱཏི ཏ་ཎྷཱ་ཝ་སེ་ན དི་ཊྛི་ཝ་སེ་ན ག་ཧི་ཏཾ པ་རཱ་མ་ཊྛཾ ཨ་བྷི་ནི་ཝི་ཊྛཾ ཨ་ཛ྄ཛྷོ་སི་ཏཾ ཨ་དྷི་མུ་ཏྟཾ པ་ཧཱ་ཡ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མེ་ཏྭཱ་ཏི – ཨ་ཏྟཾ པ་ཧཱ་ཡ. ཨ་ནུ་པཱ་དི་ཡཱ་ནོཏི ཙ་ཏཱུ་ཧི ཨུ་པཱ་དཱ་ནེ་ཧི ཨ་ནུ་པཱ་དི་ཡ་མཱ་ནོ ཨ་ག་ཎྷ་མཱ་ནོ ཨ་པ་རཱ་མཱ་ས་མཱ་ནོ ཨ་ན་བྷི་ནི་ཝི་ས་མཱ་ནོ་ཏི – ཨ་ཏྟཾ པ་ཧཱ་ཡ ཨ་ནུ་པཱ་དི་ཡཱ་ནོ.
ཉཱ་ཎེ་ན་པི སོ ནི་སྶ་ཡཾ ནོ ཀ་རོ་ཏཱིཏི ཨ་ཊྛ་ས་མཱ་པ་ཏྟི་ཉཱ་ཎེ་ན ཝཱ པ་ཉྩཱ་བྷི་ཉྙཱ་ཉཱ་ཎེ་ན ཝཱ མི་ཙྪཱ་ཉཱ་ཎེ་ན ཝཱ ཏ་ཎྷཱ་ནི་སྶ་ཡཾ ཝཱ དི་ཊྛི་ནི་སྶ་ཡཾ ཝཱ ན ཀ་རོ་ཏི ན ཛ་ནེ་ཏི ན ས་ཉྫ་ནེ་ཏི ན ནི་བྦ་ཏྟེ་ཏི ན ཨ་བྷི་ནི་བྦ་ཏྟེ་ཏཱི་ཏི – ཉཱ་ཎེ་ན་པི སོ ནི་སྶ་ཡཾ ནོ ཀ་རོ་ཏི.
ས ཝེ ཝི་ཡ་ཏྟེ་སུ ན ཝ་གྒ་སཱ་རཱིཏི ས ཝེ ཝི་ཡ་ཏྟེ་སུ བྷི་ནྣེ་སུ དྭེ་ཛ྄ཛྷཱ་པ་ནྣེ་སུ དྭེ་ལ༹ྷ་ཀ་ཛཱ་ཏེ་སུ ནཱ་ནཱ་དི་ཊྛི་ཀེ་སུ ནཱ་ནཱ་ཁ་ནྟི་ཀེ་སུ ནཱ་ནཱ་རུ་ཙི་ཀེ་སུ ནཱ་ནཱ་ལ་དྡྷི་ཀེ་སུ ནཱ་ནཱ་དི་ཊྛི་ནི་སྶ་ཡཾ ནི་སྶི་ཏེ་སུ ཚ་ནྡཱ་ག་ཏིཾ ག་ཙྪ་ནྟེ་སུ དོ་སཱ་ག་ཏིཾ ག་ཙྪ་ནྟེ་སུ མོ་ཧཱ་ག་ཏིཾ ག་ཙྪ་ནྟེ་སུ བྷ་ཡཱ་ག་ཏིཾ ག་ཙྪ་ནྟེ་སུ ན ཚ་ནྡཱ་ག་ཏིཾ ག་ཙྪ་ཏི ན དོ་སཱ་ག་ཏིཾ ག་ཙྪ་ཏི ན མོ་ཧཱ་ག་ཏིཾ ག་ཙྪ་ཏི ན བྷ་ཡཱ་ག་ཏིཾ ག་ཙྪ་ཏི ན རཱ་ག་ཝ་སེ་ན ག་ཙྪ་ཏི ན དོ་ས་ཝ་སེ་ན ག་ཙྪ་ཏི ན མོ་ཧ་ཝ་སེ་ན ག་ཙྪ་ཏི ན མཱ་ན་ཝ་སེ་ན ག་ཙྪ་ཏི ན དི་ཊྛི་ཝ་སེ་ན ག་ཙྪ་ཏི ན ཨུ་དྡྷ་ཙྩ་ཝ་སེ་ན ག་ཙྪ་ཏི ན ཝི་ཙི་ཀི་ཙྪཱ་ཝ་སེ་ན ག་ཙྪ་ཏི ན ཨ་ནུ་ས་ཡ་ཝ་སེ་ན ག་ཙྪ་ཏི ན ཝ་གྒེ་ཧི དྷ་མྨེ་ཧི ཡཱ་ཡ་ཏི ནི་ཡྻ་ཏི ཝུ་ཡ྄ཧ་ཏི སཾ་ཧ་རཱི་ཡ་ཏཱི་ཏི – ས ཝེ ཝི་ཡ་ཏྟེ་སུ ན ཝ་གྒ་སཱ་རཱི.
དི་ཊྛི་མྤི སོ ན པ་ཙྩེ་ཏི ཀི་ཉྩཱིཏི. ཏ་སྶ དྭཱ་ས་ཊྛི དི་ཊྛི་ག་ཏཱ་ནི པ་ཧཱི་ནཱ་ནི ས་མུ་ཙྪི་ནྣཱ་ནི ཝཱུ་པ་ས་ནྟཱ་ནི པ་ཊི་པ་སྶ་དྡྷཱ་ནི ཨ་བྷ་བྦུ་པྤ་ཏྟི་ཀཱ་ནི ཉཱ་ཎ་གྒི་ནཱ ད་ཌྜྷཱ་ནི. སོ ཀི་ཉྩི དི་ཊྛི་ག་ཏཾ ན པ་ཙྩེ་ཏི ན པ་ཙྩཱ་ག་ཙྪ་ཏཱི་ཏི – དི་ཊྛི་མྤི སོ ན པ་ཙྩེ་ཏི ཀི་ཉྩི.
ཏེ་ནཱ་ཧ བྷ་ག་ཝཱ –
‘‘ཨ་ཏྟཾ པ་ཧཱ་ཡ ཨ་ནུ་པཱ་དི་ཡཱ་ནོ, ཉཱ་ཎེ་ན་པི སོ ནི་སྶ་ཡཾ ནོ ཀ་རོ་ཏི;
ས ཝེ ཝི་ཡ་ཏྟེ་སུ ན ཝ་གྒ་སཱ་རཱི, དི་ཊྛི་མྤི སོ ན པ་ཙྩེ་ཏི ཀི་ཉྩཱི’’ཏི.
༣༦. ཡ་སྶཱུ་བྷ་ཡ་ནྟེ པ་ཎི་དྷཱི་དྷ ན་ཏྠི, བྷ་ཝཱ་བྷ་ཝཱ་ཡ ཨི་དྷ ཝཱ ཧུ་རཾ ཝཱ;
ནི་ཝེ་ས་ནཱ ཏ་སྶ ན ས་ནྟི ཀེ་ཙི, དྷ་མྨེ་སུ ནི་ཙྪེ་ཡྻ ས་མུ་གྒ་ཧཱི་ཏཾ.
ཡ་སྶཱུ་བྷ་ཡ་ནྟེ པ་ཎི་དྷཱི་དྷ ན་ཏྠི, བྷ་ཝཱ་བྷ་ཝཱ་ཡ ཨི་དྷ ཝཱ ཧུ་རཾ ཝཱཏི ཡ་སྶཱཏི ཨ་ར་ཧ་ཏོ ཁཱི་ཎཱ་ས་ཝ་སྶ. ཨ་ནྟོཏི [ཨ་ནྟཱ་ཏི (སྱཱ.)] ཕ་སྶོ ཨེ་ཀོ ཨ་ནྟོ, ཕ་སྶ་ས་མུ་ད་ཡོ དུ་ཏི་ཡོ ཨ་ནྟོ; ཨ་ཏཱི་ཏོ ཨེ་ཀོ ཨ་ནྟོ, ཨ་ནཱ་ག་ཏོ དུ་ཏི་ཡོ ཨ་ནྟོ; སུ་ཁཱ ཝེ་ད་ནཱ ཨེ་ཀོ ཨ་ནྟོ, དུ་ཀྑཱ ཝེ་ད་ནཱ དུ་ཏི་ཡོ ཨ་ནྟོ; ནཱ་མཾ ཨེ་ཀོ ཨ་ནྟོ, རཱུ་པཾ དུ་ཏི་ཡོ ཨ་ནྟོ; ཚ ཨ་ཛ྄ཛྷ་ཏྟི་ཀཱ་ནི ཨཱ་ཡ་ཏ་ནཱ་ནི ཨེ་ཀོ ཨ་ནྟོ, ཚ བཱ་ཧི་རཱ་ནི ཨཱ་ཡ་ཏ་ནཱ་ནི དུ་ཏི་ཡོ ཨ་ནྟོ; ས་ཀྐཱ་ཡོ ཨེ་ཀོ ཨ་ནྟོ, ས་ཀྐཱ་ཡ་ས་མུ་ད་ཡོ དུ་ཏི་ཡོ ཨ་ནྟོ. པ་ཎི་དྷི ཝུ་ཙྩ་ཏི ཏ་ཎྷཱ. ཡོ རཱ་གོ སཱ་རཱ་གོ…པེ… ཨ་བྷི་ཛ྄ཛྷཱ ལོ་བྷོ ཨ་ཀུ་ས་ལ་མཱུ་ལཾ.
བྷ་ཝཱ་བྷ་ཝཱ་ཡཱཏི བྷ་ཝཱ་བྷ་ཝཱ་ཡ ཀ་མྨ་བྷ་ཝཱ་ཡ པུ་ན་བྦྷ་ཝཱ་ཡ ཀཱ་མ་བྷ་ཝཱ་ཡ, ཀ་མྨ་བྷ་ཝཱ་ཡ ཀཱ་མ་བྷ་ཝཱ་ཡ པུ་ན་བྦྷ་ཝཱ་ཡ རཱུ་པ་བྷ་ཝཱ་ཡ, ཀ་མྨ་བྷ་ཝཱ་ཡ རཱུ་པ་བྷ་ཝཱ་ཡ པུ་ན་བྦྷ་ཝཱ་ཡ ཨ་རཱུ་པ་བྷ་ཝཱ་ཡ, ཀ་མྨ་བྷ་ཝཱ་ཡ ཨ་རཱུ་པ་བྷ་ཝཱ་ཡ པུ་ན་བྦྷ་ཝཱ་ཡ པུ་ན་པྤུ་ན་བྷ་ཝཱ་ཡ པུ་ན་པྤུ་ན་ག་ཏི་ཡཱ པུ་ན་པྤུ་ན་ཨུ་པ་པ་ཏྟི་ཡཱ པུ་ན་པྤུ་ན་པ་ཊི་ས་ནྡྷི་ཡཱ པུ་ན་པྤུ་ན་ཨ་ཏྟ་བྷཱ་ཝཱ་བྷི་ནི་བྦ་ཏྟི་ཡཱ. ཨི་དྷཱཏི ས་ཀ་ཏྟ་བྷཱ་ཝོ, ཧུ་རཱཏི པ་ར་ཏྟ་བྷཱ་ཝོ; ཨི་དྷཱཏི ས་ཀ་རཱུ་པ་ཝེ་ད་ནཱ་ས་ཉྙཱ་ས་ངྑཱ་ར་ཝི་ཉྙཱ་ཎཾ, ཧུ་རཱཏི པ་ར་རཱུ་པ་ཝེ་ད་ནཱ་ས་ཉྙཱ་ས་ངྑཱ་ར་ཝི་ཉྙཱ་ཎཾ; ཨི་དྷཱཏི ཚ ཨ་ཛ྄ཛྷ་ཏྟི་ཀཱ་ནི ཨཱ་ཡ་ཏ་ནཱ་ནི, ཧུ་རཱཏི ཚ བཱ་ཧི་རཱ་ནི ཨཱ་ཡ་ཏ་ནཱ་ནི; ཨི་དྷཱཏི མ་ནུ་སྶ་ལོ་ཀོ, ཧུ་རཱཏི དེ་ཝ་ལོ་ཀོ; ཨི་དྷཱཏི ཀཱ་མ་དྷཱ་ཏུ, ཧུ་རཱཏི རཱུ་པ་དྷཱ་ཏུ ཨ་རཱུ་པ་དྷཱ་ཏུ; ཨི་དྷཱཏི ཀཱ་མ་དྷཱ་ཏུ རཱུ་པ་དྷཱ་ཏུ. ཧུ་རཱཏི ཨ་རཱུ་པ་དྷཱ་ཏུ. ཡ་སྶཱུ་བྷ་ཡ་ནྟེ པ་ཎི་དྷཱི་དྷ ན་ཏྠི བྷ་ཝཱ་བྷ་ཝཱ་ཡ ཨི་དྷ ཝཱ ཧུ་རཾ ཝཱཏི. ཡ་སྶ ཨུ་བྷོ ཨ་ནྟེ ཙ བྷ་ཝཱ་བྷ་ཝཱ་ཡ ཙ ཨི་དྷ ཧུ་ར་ཉྩ པ་ཎི་དྷི ཏ་ཎྷཱ ན་ཏྠི ན ས་ནྟི ན སཾ་ཝི་ཛྫ་ནྟི ནུ་པ་ལ་བྦྷ་ནྟི, པ་ཧཱི་ནཱ ས་མུ་ཙྪི་ནྣཱ ཝཱུ་པ་ས་ནྟཱ པ་ཊི་པ་སྶ་དྡྷཱ ཨ་བྷ་བྦུ་པྤ་ཏྟི་ཀཱ ཉཱ་ཎ་གྒི་ནཱ ད་ཌྜྷཱ་ཏི – ཡ་སྶཱུ་བྷ་ཡ་ནྟེ པ་ཎི་དྷཱི་དྷ ན་ཏྠི བྷ་ཝཱ་བྷ་ཝཱ་ཡ ཨི་དྷ ཝཱ ཧུ་རཾ ཝཱ.
ནི་ཝེ་ས་ནཱ ཏ་སྶ ན ས་ནྟི ཀེ་ཙཱིཏི. ནི་ཝེ་ས་ནཱཏི དྭེ ནི་ཝེ་ས་ནཱ – ཏ་ཎྷཱ་ནི་ཝེ་ས་ནཱ ཙ དི་ཊྛི་ནི་ཝེ་ས་ནཱ ཙ…པེ… ཨ་ཡཾ ཏ་ཎྷཱ་ནི་ཝེ་ས་ནཱ…པེ… ཨ་ཡཾ དི་ཊྛི་ནི་ཝེ་ས་ནཱ. ཏ་སྶཱཏི ཨ་ར་ཧ་ཏོ ཁཱི་ཎཱ་ས་ཝ་སྶ. ནི་ཝེ་ས་ནཱ ཏ་སྶ ན ས་ནྟི ཀེ་ཙཱིཏི ནི་ཝེ་ས་ནཱ ཏ་སྶ ན ས་ནྟི ཀེ་ཙི ན་ཏྠི ན ས་ནྟི ན སཾ་ཝི་ཛྫ་ནྟི ནུ་པ་ལ་བྦྷ་ནྟི, པ་ཧཱི་ནཱ ས་མུ་ཙྪི་ནྣཱ ཝཱུ་པ་ས་ནྟཱ པ་ཊི་པ་སྶ་དྡྷཱ ཨ་བྷ་བྦུ་པྤ་ཏྟི་ཀཱ ཉཱ་ཎ་གྒི་ནཱ ད་ཌྜྷཱ་ཏི – ནི་ཝེ་ས་ནཱ ཏ་སྶ ན ས་ནྟི ཀེ་ཙི.
དྷ་མྨེ་སུ ནི་ཙྪེ་ཡྻ ས་མུ་གྒ་ཧཱི་ཏནྟི. དྷ་མྨེ་སཱུཏི དྭཱ་ས་ཊྛི་ཡཱ དི་ཊྛི་ག་ཏེ་སུ. ནི་ཙྪེ་ཡྻཱཏི ནི་ཙྪི་ནི་ཏྭཱ ཝི་ནི་ཙྪི་ནི་ཏྭཱ ཝི་ཙི་ནི་ཏྭཱ པ་ཝི་ཙི་ནི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ. ས་མུ་གྒ་ཧཱི་ཏནྟི ཨོ་དྷི་གྒཱ་ཧོ བི་ལ་གྒཱ་ཧོ ཝ་ར་གྒཱ་ཧོ ཀོ་ཊྛཱ་ས་གྒཱ་ཧོ ཨུ་ཙྩ་ཡ་གྒཱ་ཧོ ས་མུ་ཙྩ་ཡ་གྒཱ་ཧོ, ‘‘ཨི་དཾ ས་ཙྩཾ ཏ་ཙྪཾ ཏ་ཐཾ བྷཱུ་ཏཾ ཡཱ་ཐཱ་ཝཾ ཨ་ཝི་པ་རཱི་ཏ’’ནྟི ག་ཧི་ཏཾ པ་རཱ་མ་ཊྛཾ ཨ་བྷི་ནི་ཝི་ཊྛཾ ཨ་ཛ྄ཛྷོ་སི་ཏཾ ཨ་དྷི་མུ་ཏྟཾ ན་ཏྠི ན ས་ནྟི ན སཾ་ཝི་ཛྫ་ནྟི ནུ་པ་ལ་བྦྷ་ནྟི, པ་ཧཱི་ནཾ ས་མུ་ཙྪི་ནྣཾ ཝཱུ་པ་ས་ནྟཾ པ་ཊི་པ་སྶ་དྡྷཾ ཨ་བྷ་བྦུ་པྤ་ཏྟི་ཀཾ ཉཱ་ཎ་གྒི་ནཱ ད་ཌྜྷ་ནྟི – དྷ་མྨེ་སུ ནི་ཙྪེ་ཡྻ ས་མུ་གྒ་ཧཱི་ཏཾ.
ཏེ་ནཱ་ཧ བྷ་ག་ཝཱ –
‘‘ཡ་སྶཱུ་བྷ་ཡ་ནྟེ པ་ཎི་དྷཱི་དྷ ན་ཏྠི, བྷ་ཝཱ་བྷ་ཝཱ་ཡ ཨི་དྷ ཝཱ ཧུ་རཾ ཝཱ;
ནི་ཝེ་ས་ནཱ ཏ་སྶ ན ས་ནྟི ཀེ་ཙི, དྷ་མྨེ་སུ ནི་ཙྪེ་ཡྻ ས་མུ་གྒ་ཧཱི་ཏ’’ནྟི.
༣༧. ཏ་སྶཱི་དྷ དི་ཊྛེ ཝ སུ་ཏེ མུ་ཏེ ཝཱ, པ་ཀ་པྤི་ཏཱ ན་ཏྠི ཨ་ཎཱུ་པི ས་ཉྙཱ;
ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡཱ་ནཾ, ཀེ་ནཱི་དྷ ལོ་ཀ་སྨིཾ ཝི་ཀ་པྤ་ཡེ་ཡྻ.
ཏ་སྶཱི་དྷ དི་ཊྛེ ཝ སུ་ཏེ མུ་ཏེ ཝཱ, པ་ཀ་པྤི་ཏཱ ན་ཏྠི ཨ་ཎཱུ་པི ས་ཉྙཱཏི. ཏ་སྶཱཏི ཨ་ར་ཧ་ཏོ ཁཱི་ཎཱ་ས་ཝ་སྶ. ཏ་སྶ དི་ཊྛེ ཝཱ དི་ཊྛ་སུ་དྡྷི་ཡཱ ཝཱ སུ་ཏེ ཝཱ སུ་ཏ་སུ་དྡྷི་ཡཱ ཝཱ མུ་ཏེ ཝཱ མུ་ཏ་སུ་དྡྷི་ཡཱ ཝཱ ས་ཉྙཱ་པུ་བྦ་ངྒ་མ་ཏཱ ས་ཉྙཱ་ཝི་ཀ་པྤ་ཡེ་ཡྻ་ཏཱ ས་ཉྙཱ་ཝི་གྒ་ཧེ་ན ས་ཉྙཱ་ཡ ཨུ་ཊྛ་པི་ཏཱ ས་མུ་ཊྛ་པི་ཏཱ ཀ་པྤི་ཏཱ པ་ཀ་པྤི་ཏཱ ས་ངྑ་ཏཱ ཨ་བྷི་ས་ངྑ་ཏཱ ས་ཎྛ་པི་ཏཱ, དི་ཊྛི ན་ཏྠི ན ས་ནྟི ན སཾ་ཝི་ཛྫ་ནྟི ནུ་པ་ལ་བྦྷ་ནྟི, པ་ཧཱི་ནཱ ས་མུ་ཙྪི་ནྣཱ ཝཱུ་པ་ས་ནྟཱ པ་ཊི་པ་སྶ་དྡྷཱ ཨ་བྷ་བྦུ་པྤ་ཏྟི་ཀཱ ཉཱ་ཎ་གྒི་ནཱ ད་ཌྜྷཱ་ཏི – ཏ་སྶཱི་དྷ དི་ཊྛེ ཝ སུ་ཏེ མུ་ཏེ ཝཱ པ་ཀ་པྤི་ཏཱ ན་ཏྠི ཨ་ཎཱུ་པི ས་ཉྙཱ.
ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡཱ་ནནྟི. བྲཱ་ཧྨ་ཎོ་ཏི ས་ཏྟ་ནྣཾ དྷ་མྨཱ་ནཾ བཱ་ཧི་ཏ་ཏྟཱ བྲཱ་ཧྨ་ཎོ – ས་ཀྐཱ་ཡ་དི་ཊྛི བཱ་ཧི་ཏཱ ཧོ་ཏི…པེ… ཨ་སི་ཏོ ཏཱ་དི པ་ཝུ་ཙྩ་ཏེ ས བྲ་ཧྨཱ. ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡཱ་ན་ནྟི. ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡ་ནྟཾ ཨ་ག་ཎྷ་ནྟཾ ཨ་པ་རཱ་མ་ས་ནྟཾ ཨ་ན་བྷི་ནི་ཝེ་ས་ནྟ་ནྟི – ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡཱ་ནཾ.
ཀེ་ནཱི་དྷ ལོ་ཀ་སྨིཾ ཝི་ཀ་པྤ་ཡེ་ཡྻཱཏི. ཀ་པྤཱཏི དྭེ ཀ་པྤཱ – ཏ་ཎྷཱ་ཀ་པྤོ ཙ དི་ཊྛི་ཀ་པྤོ ཙ…པེ… ཨ་ཡཾ ཏ་ཎྷཱ་ཀ་པྤོ…པེ… ཨ་ཡཾ དི་ཊྛི་ཀ་པྤོ. ཏ་སྶ ཏ་ཎྷཱ་ཀ་པྤོ པ་ཧཱི་ནོ, དི་ཊྛི་ཀ་པྤོ པ་ཊི་ནི་སྶ་ཊྛོ. ཏ་ཎྷཱ་ཀ་པྤ་སྶ པ་ཧཱི་ན་ཏྟཱ, དི་ཊྛི་ཀ་པྤ་སྶ པ་ཊི་ནི་སྶ་ཊྛ་ཏྟཱ ཀེ་ན རཱ་གེ་ན ཀ་པྤེ་ཡྻ ཀེ་ན དོ་སེ་ན ཀ་པྤེ་ཡྻ ཀེ་ན མོ་ཧེ་ན ཀ་པྤེ་ཡྻ ཀེ་ན མཱ་ནེ་ན ཀ་པྤེ་ཡྻ ཀཱ་ཡ དི་ཊྛི་ཡཱ ཀ་པྤེ་ཡྻ ཀེ་ན ཨུ་དྡྷ་ཙྩེ་ན ཀ་པྤེ་ཡྻ ཀཱ་ཡ ཝི་ཙི་ཀི་ཙྪཱ་ཡ ཀ་པྤེ་ཡྻ ཀེ་ཧི ཨ་ནུ་ས་ཡེ་ཧི ཀ་པྤེ་ཡྻ – ར་ཏྟོ་ཏི ཝཱ དུ་ཊྛོ་ཏི ཝཱ མཱུ་ལ༹ྷོ་ཏི ཝཱ ཝི་ནི་བ་དྡྷོ་ཏི ཝཱ པ་རཱ་མ་ཊྛོ་ཏི ཝཱ ཝི་ཀྑེ་པ་ག་ཏོ་ཏི ཝཱ ཨ་ནི་ཊྛ་ངྒ་ཏོ་ཏི ཝཱ ཐཱ་མ་ག་ཏོ་ཏི ཝཱ. ཏེ ཨ་བྷི་ས་ངྑཱ་རཱ པ་ཧཱི་ནཱ. ཨ་བྷི་ས་ངྑཱ་རཱ་ནཾ པ་ཧཱི་ན་ཏྟཱ ག་ཏི་ཡོ ཀེ་ན ཀ་པྤེ་ཡྻ – ནེ་ར་ཡི་ཀོ་ཏི ཝཱ ཏི་ར་ཙྪཱ་ན་ཡོ་ནི་ཀོ་ཏི ཝཱ པེ་ཏྟི་ཝི་ས་ཡི་ཀོ་ཏི ཝཱ མ་ནུ་སྶོ་ཏི ཝཱ དེ་ཝོ་ཏི ཝཱ རཱུ་པཱི་ཏི ཝཱ ཨ་རཱུ་པཱི་ཏི ཝཱ ས་ཉྙཱི་ཏི ཝཱ ཨ་ས་ཉྙཱི་ཏི ཝཱ ནེ་ཝ་ས་ཉྙཱི་ནཱ་ས་ཉྙཱི་ཏི ཝཱ. སོ ཧེ་ཏུ ན་ཏྠི པ་ཙྩ་ཡོ ན་ཏྠི ཀཱ་ར་ཎཾ ན་ཏྠི, ཡེ་ན ཀ་པྤེ་ཡྻ ཝི་ཀ་པྤེ་ཡྻ ཝི་ཀ་པྤཾ ཨཱ་པ་ཛྫེ་ཡྻ. ལོ་ཀ་སྨིནྟི ཨ་པཱ་ཡ་ལོ་ཀེ…པེ… ཨཱ་ཡ་ཏ་ན་ལོ་ཀེ་ཏི – ཀེ་ནཱི་དྷ ལོ་ཀ་སྨིཾ ཝི་ཀ་པྤ་ཡེ་ཡྻ.
ཏེ་ནཱ་ཧ བྷ་ག་ཝཱ –
‘‘ཏ་སྶཱི་དྷ དི་ཊྛེ ཝ སུ་ཏེ མུ་ཏེ ཝཱ, པ་ཀ་པྤི་ཏཱ ན་ཏྠི ཨ་ཎཱུ་པི ས་ཉྙཱ;
ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡཱ་ནཾ, ཀེ་ནཱི་དྷ ལོ་ཀ་སྨིཾ ཝི་ཀ་པྤ་ཡེ་ཡྻཱ’’ཏི.
༣༨. ན ཀ་པྤ་ཡ་ནྟི ན པུ་རེ་ཀྑ་རོ་ནྟི, དྷ་མྨཱ་པི ཏེ་སཾ ན པ་ཊི་ཙྪི་ཏཱ་སེ;
ན བྲཱ་ཧྨ་ཎོ སཱི་ལ་ཝ་ཏེ་ན ནེ་ཡྻོ, པཱ་ར་ངྒ་ཏོ ན པ་ཙྩེ་ཏི ཏཱ་དཱི.
ན ཀ་པྤ་ཡ་ནྟི ན པུ་རེ་ཀྑ་རོ་ནྟཱིཏི. ཀ་པྤཱཏི དྭེ ཀ་པྤཱ – ཏ་ཎྷཱ་ཀ་པྤོ ཙ དི་ཊྛི་ཀ་པྤོ ཙ. ཀ་ཏ་མོ ཏ་ཎྷཱ་ཀ་པྤོ? ཡཱ་ཝ་ཏཱ ཏ་ཎྷཱ་ས་ངྑཱ་ཏེ་ན སཱི་མ་ཀ་ཏཾ མ་རི་ཡཱ་དི་ཀ་ཏཾ ཨོ་དྷི་ཀ་ཏཾ པ་རི་ཡ་ནྟ་ཀ་ཏཾ པ་རི་གྒ་ཧི་ཏཾ མ་མཱ་ཡི་ཏཾ – ‘‘ཨི་དཾ མ་མཾ, ཨེ་ཏཾ མ་མཾ, ཨེ་ཏྟ་ཀཾ མ་མཾ, ཨེ་ཏྟཱ་ཝ་ཏཱ མ་མཾ, མ་མ རཱུ་པཱ ས་དྡཱ ག་ནྡྷཱ ར་སཱ ཕོ་ཊྛ་བྦཱ, ཨ་ཏྠ་ར་ཎཱ པཱ་ཝུ་ར་ཎཱ དཱ་སི་དཱ་སཱ [དཱ་སཱི་དཱ་སཱ (སྱཱ. ཀ.)] ཨ་ཛེ་ལ༹་ཀཱ ཀུ་ཀྐུ་ཊ་སཱུ་ཀ་རཱ ཧ་ཏྠི་ག་ཝཱ་སྶ་ཝ་ལ༹་ཝཱ ཁེ་ཏྟཾ ཝ་ཏྠུ ཧི་ར་ཉྙཾ སུ་ཝ་ཎྞཾ གཱ་མ་ནི་ག་མ་རཱ་ཛ་དྷཱ་ནི་ཡོ ར་ཊྛ་ཉྩ ཛ་ན་པ་དོ ཙ ཀོ་སོ ཙ ཀོ་ཊྛཱ་གཱ་ར་ཉྩ, ཀེ་ཝ་ལ་མྤི མ་ཧཱ་པ་ཐ་ཝིཾ ཏ་ཎྷཱ་ཝ་སེ་ན མ་མཱ་ཡ་ཏི, ཡཱ་ཝ་ཏཱ ཨ་ཊྛ་ས་ཏ་ཏ་ཎྷཱ་ཝི་ཙ་རི་ཏཾ – ཨ་ཡཾ ཏ་ཎྷཱ་ཀ་པྤོ. ཀ་ཏ་མོ དི་ཊྛི་ཀ་པྤོ? ཝཱི་ས་ཏི་ཝ་ཏྠུ་ཀཱ ས་ཀྐཱ་ཡ་དི་ཊྛི, ད་ས་ཝ་ཏྠུ་ཀཱ མི་ཙྪཱ་དི་ཊྛི, ད་ས་ཝ་ཏྠུ་ཀཱ ཨ་ནྟ་གྒཱ་ཧི་ཀཱ་དི་ཊྛི, ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ དི་ཊྛི་ག་ཧ་ནཾ དི་ཊྛི་ཀ་ནྟཱ་རཾ དི་ཊྛི་ཝི་སཱུ་ཀཱ་ཡི་ཀཾ དི་ཊྛི་ཝི་པྥ་ནྡི་ཏཾ དི་ཊྛི་ས་ཉྙོ་ཛ་ནཾ གཱ་ཧོ པ་ཊི་གྒཱ་ཧོ ཨ་བྷི་ནི་ཝེ་སོ པ་རཱ་མཱ་སོ ཀུ་མྨ་གྒོ མི་ཙྪཱ་པ་ཐོ མི་ཙྪ་ཏྟཾ ཏི་ཏྠཱ་ཡ་ཏ་ནཾ ཝི་པ་རི་ཡཱ་ས་གྒཱ་ཧོ [ཝི་པ་རི་ཡེ་ས་གྒཱ་ཧོ (སཱི. སྱཱ. ཀ.)] ཝི་པ་རཱི་ཏ་གྒཱ་ཧོ ཝི་པ་ལླཱ་ས་གྒཱ་ཧོ མི་ཙྪཱ་གཱ་ཧོ, ཨ་ཡཱ་ཐཱ་ཝ་ཀ་སྨིཾ ཡཱ་ཐཱ་ཝ་ཀ་ནྟི གཱ་ཧོ, ཡཱ་ཝ་ཏཱ དྭཱ་ས་ཊྛི དི་ཊྛི་ག་ཏཱ་ནི – ཨ་ཡཾ དི་ཊྛི་ཀ་པྤོ. ཏེ་སཾ ཏ་ཎྷཱ་ཀ་པྤོ པ་ཧཱི་ནོ, དི་ཊྛི་ཀ་པྤོ པ་ཊི་ནི་སྶ་ཊྛོ. ཏ་ཎྷཱ་ཀ་པྤ་སྶ པ་ཧཱི་ན་ཏྟཱ, དི་ཊྛི་ཀ་པྤ་སྶ པ་ཊི་ནི་སྶ་ཊྛ་ཏྟཱ ཏ་ཎྷཱ་ཀ་པྤཾ ཝཱ དི་ཊྛི་ཀ་པྤཾ ཝཱ ན ཀ་པྤེ་ནྟི ན ཛ་ནེ་ནྟི ན ས་ཉྫ་ནེ་ནྟི ན ནི་བྦ་ཏྟེ་ནྟི ན ཨ་བྷི་ནི་བྦ་ཏྟེ་ནྟཱི་ཏི – ན ཀ་པྤ་ཡ་ནྟི.
ན པུ་རེ་ཀྑ་རོ་ནྟཱིཏི. པུ་རེ་ཀྑཱ་རཱཏི དྭེ པུ་རེ་ཀྑཱ་རཱ – ཏ་ཎྷཱ་པུ་རེ་ཀྑཱ་རོ ཙ དི་ཊྛི་པུ་རེ་ཀྑཱ་རོ ཙ…པེ… ཨ་ཡཾ ཏ་ཎྷཱ་པུ་རེ་ཀྑཱ་རོ…པེ… ཨ་ཡཾ དི་ཊྛི་པུ་རེ་ཀྑཱ་རོ. ཏེ་སཾ ཏ་ཎྷཱ་པུ་རེ་ཀྑཱ་རོ པ་ཧཱི་ནོ, དི་ཊྛི་པུ་རེ་ཀྑཱ་རོ པ་ཊི་ནི་སྶ་ཊྛོ. ཏ་ཎྷཱ་པུ་རེ་ཀྑཱ་ར་སྶ པ་ཧཱི་ན་ཏྟཱ, དི་ཊྛི་པུ་རེ་ཀྑཱ་ར་སྶ པ་ཊི་ནི་སྶ་ཊྛ་ཏྟཱ ན ཏ་ཎྷཾ ཝཱ ན དི་ཊྛིཾ ཝཱ པུ་ར་ཏོ ཀ་ཏྭཱ ཙ་ར་ནྟི ན ཏ་ཎྷཱ་དྷ་ཛཱ ན ཏ་ཎྷཱ་ཀེ་ཏཱུ ན ཏ་ཎྷཱ་དྷི་པ་ཏེ་ཡྻཱ ན དི་ཊྛི་དྷ་ཛཱ ན དི་ཊྛི་ཀེ་ཏཱུ ན དི་ཊྛཱ་དྷི་པ་ཏེ་ཡྻཱ. ན ཏ་ཎྷཱ་ཡ ཝཱ ན དི་ཊྛི་ཡཱ ཝཱ པ་རི་ཝཱ་རེ་ཏྭཱ ཙ་ར་ནྟཱི་ཏི – ན ཀ་པྤ་ཡ་ནྟི ན པུ་རེ་ཀྑ་རོ་ནྟི.
དྷ་མྨཱ་པི ཏེ་སཾ ན པ་ཊི་ཙྪི་ཏཱ་སེཏི. དྷ་མྨཱ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི. ཏེ་སནྟི ཏེ་སཾ ཨ་ར་ཧ་ནྟཱ་ནཾ ཁཱི་ཎཱ་ས་ཝཱ་ནཾ. ན པ་ཊི་ཙྪི་ཏཱ་སེཏི ‘‘ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ན པ་ཊི་ཙྪི་ཏཱ་སེ. ‘‘ཨ་ས་སྶ་ཏོ ལོ་ཀོ… ཨ་ནྟ་ཝཱ ལོ་ཀོ… ཨ་ན་ནྟ་ཝཱ ལོ་ཀོ… ཏཾ ཛཱི་ཝཾ ཏཾ ས་རཱི་རཾ… ཨ་ཉྙཾ ཛཱི་ཝཾ ཨ་ཉྙཾ ས་རཱི་རཾ… ཧོ་ཏི ཏ་ཐཱ་ག་ཏོ པ་རཾ མ་ར་ཎཱ… ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ… ཧོ་ཏི ཙ ན ཙ ཧོ་ཏི ཏ་ཐཱ་ག་ཏོ པ་རཾ མ་ར་ཎཱ… ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ན པ་ཊི་ཙྪི་ཏཱ་སེ་ཏི – དྷ་མྨཱ་པི ཏེ་སཾ ན པ་ཊི་ཙྪི་ཏཱ་སེ.
ན བྲཱ་ཧྨ་ཎོ སཱི་ལ་ཝ་ཏེ་ན ནེ་ཡྻོཏི. ནཱཏི པ་ཊི་ཀྑེ་པོ. བྲཱ་ཧྨ་ཎོཏི ས་ཏྟ་ནྣཾ དྷ་མྨཱ་ནཾ བཱ་ཧི་ཏ་ཏྟཱ བྲཱ་ཧྨ་ཎོ – ས་ཀྐཱ་ཡ་དི་ཊྛི བཱ་ཧི་ཏཱ ཧོ་ཏི…པེ… ཨ་སི་ཏོ ཏཱ་དི ཝུ་ཙྩ་ཏེ ས བྲ་ཧྨཱ. ན བྲཱ་ཧྨ་ཎོ སཱི་ལ་ཝ་ཏེ་ན ནེ་ཡྻོཏི. བྲཱ་ཧྨ་ཎོ སཱི་ལེ་ན ཝཱ ཝ་ཏེ་ན ཝཱ སཱི་ལ་བྦ་ཏེ་ན ཝཱ ན ཡཱ་ཡ་ཏི ན ནི་ཡྻ་ཏི ན ཝུ་ཡ྄ཧ་ཏི ན སཾ་ཧ་རཱི་ཡ་ཏཱི་ཏི – ན བྲཱ་ཧྨ་ཎོ སཱི་ལ་ཝ་ཏེ་ན ནེ་ཡྻོ.
པཱ་ར་ངྒ་ཏོ ན པ་ཙྩེ་ཏི ཏཱ་དཱིཏི. པཱ་རཾ ཝུ་ཙྩ་ཏི ཨ་མ་ཏཾ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. སོ པཱ་ར་ངྒ་ཏོ པཱ་ར་པྤ་ཏྟོ ཨ་ནྟ་ག་ཏོ ཨ་ནྟ་པྤ་ཏྟོ ཀོ་ཊི་ག་ཏོ ཀོ་ཊི་པྤ་ཏྟོ [ཝི་ཏྠཱ་རོ] ཛཱ་ཏི་མ་ར་ཎ་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ་ཏི – པཱ་ར་ངྒ་ཏོ. ན པ་ཙྩེ་ཏཱིཏི སོ་ཏཱ་པ་ཏྟི་མ་གྒེ་ན ཡེ ཀི་ལེ་སཱ པ་ཧཱི་ནཱ, ཏེ ཀི་ལེ་སེ ན པུ་ནེ་ཏི ན པ་ཙྩེ་ཏི ན པ་ཙྩཱ་ག་ཙྪ་ཏི. ས་ཀ་དཱ་གཱ་མི་མ་གྒེ་ན ཡེ ཀི་ལེ་སཱ པ་ཧཱི་ནཱ, ཏེ ཀི་ལེ་སེ ན པུ་ནེ་ཏི ན པ་ཙྩེ་ཏི ན པ་ཙྩཱ་ག་ཙྪ་ཏི. ཨ་ནཱ་གཱ་མི་མ་གྒེ་ན ཡེ ཀི་ལེ་སཱ པ་ཧཱི་ནཱ, ཏེ ཀི་ལེ་སེ ན པུ་ནེ་ཏི ན པ་ཙྩེ་ཏི ན པ་ཙྩཱ་ག་ཙྪ་ཏི. ཨ་ར་ཧ་ཏྟ་མ་གྒེ་ན ཡེ ཀི་ལེ་སཱ པ་ཧཱི་ནཱ, ཏེ ཀི་ལེ་སེ ན པུ་ནེ་ཏི ན པ་ཙྩེ་ཏི ན པ་ཙྩཱ་ག་ཙྪ་ཏཱི་ཏི – པཱ་ར་ངྒ་ཏོ ན པ་ཙྩེ་ཏི. ཏཱ་དཱིཏི ཨ་ར་ཧཱ པ་ཉྩ་ཧཱ་ཀཱ་རེ་ཧི ཏཱ་དཱི – ཨི་ཊྛཱ་ནི་ཊྛེ ཏཱ་དཱི, ཙ་ཏྟཱ་ཝཱི་ཏི ཏཱ་དཱི, ཏི་ཎྞཱ་ཝཱི་ཏི ཏཱ་དཱི, མུ་ཏྟཱ་ཝཱི་ཏི ཏཱ་དཱི, ཏཾ་ནི་དྡེ་སཱ ཏཱ་དཱི.
ཀ་ཐཾ ཨ་ར་ཧཱ ཨི་ཊྛཱ་ནི་ཊྛེ ཏཱ་དཱི? ཨ་ར་ཧཱ ལཱ་བྷེ་པི ཏཱ་དཱི, ཨ་ལཱ་བྷེ་པི ཏཱ་དཱི, ཡ་སེ་པི ཏཱ་དཱི, ཨ་ཡ་སེ་པི ཏཱ་དཱི, པ་སཾ་སཱ་ཡ་པི ཏཱ་དཱི, ནི་ནྡཱ་ཡ་པི ཏཱ་དཱི, སུ་ཁེ་པི ཏཱ་དཱི, དུ་ཀྑེ་པི ཏཱ་དཱི. ཨེ་ཀ་ཙྩེ བཱ་ཧཾ [ཨ་ངྒཾ (སཱི.)] ག་ནྡྷེ་ན ལི་མྤེ་ཡྻུཾ, ཨེ་ཀ་ཙྩེ བཱ་ཧཾ [ཨ་ངྒཾ (སཱི.)] ཝཱ་སི་ཡཱ ཏ་ཙྪེ་ཡྻུཾ – ཨ་མུ་སྨིཾ ན་ཏྠི རཱ་གོ, ཨ་མུ་སྨིཾ ན་ཏྠི པ་ཊི་གྷཾ, ཨ་ནུ་ན་ཡ་པ་ཊི་གྷ་ཝི་པྤ་ཧཱི་ནོ ཨུ་གྒྷཱ་ཏི་ནི་གྷཱ་ཏི་ཝཱི་ཏི་ཝ་ཏྟོ ཨ་ནུ་རོ་དྷ་ཝི་རོ་དྷ་ས་མ་ཏི་ཀྐ་ནྟོ. ཨེ་ཝཾ ཨ་ར་ཧཱ ཨི་ཊྛཱ་ནི་ཊྛེ ཏཱ་དཱི.
ཀ་ཐཾ ཨ་ར་ཧཱ ཙ་ཏྟཱ་ཝཱི་ཏི ཏཱ་དཱི? ཨ་ར་ཧ་ཏོ རཱ་གོ ཙ་ཏྟོ ཝ་ནྟོ མུ་ཏྟོ པ་ཧཱི་ནོ པ་ཊི་ནི་སྶ་ཊྛོ. དོ་སོ…པེ… མོ་ཧོ… ཀོ་དྷོ… ཨུ་པ་ནཱ་ཧོ… མ་ཀྑོ… པ་ལཱ༹་སོ… ཨི་སྶཱ… མ་ཙྪ་རི་ཡཾ… མཱ་ཡཱ… སཱ་ཋེ་ཡྻཾ… ཐ་མྦྷོ… སཱ་ར་མྦྷོ… མཱ་ནོ… ཨ་ཏི་མཱ་ནོ… མ་དོ… པ་མཱ་དོ… ས་བྦེ ཀི་ལེ་སཱ… ས་བྦེ དུ་ཙྩ་རི་ཏཱ… ས་བྦེ ད་ར་ཐཱ… ས་བྦེ པ་རི་ལཱ༹་ཧཱ… ས་བྦེ ས་ནྟཱ་པཱ… ས་བྦཱ་ཀུ་ས་ལཱ་བྷི་ས་ངྑཱ་རཱ ཙ་ཏྟཱ ཝ་ནྟཱ མུ་ཏྟཱ པ་ཧཱི་ནཱ པ་ཊི་ནི་སྶ་ཊྛཱ. ཨེ་ཝཾ ཨ་ར་ཧཱ ཙ་ཏྟཱ་ཝཱི་ཏི ཏཱ་དཱི.
ཀ་ཐཾ ཨ་ར་ཧཱ ཏི་ཎྞཱ་ཝཱི་ཏི ཏཱ་དཱི? ཨ་ར་ཧཱ ཀཱ་མོ་གྷཾ ཏི་ཎྞོ བྷ་ཝོ་གྷཾ ཏི་ཎྞོ དི་ཊྛོ་གྷཾ ཏི་ཎྞོ ཨ་ཝི་ཛྫོ་གྷཾ ཏི་ཎྞོ ས་བྦཾ སཾ་སཱ་ར་པ་ཐཾ ཏི་ཎྞོ ཨུ་ཏྟི་ཎྞོ ནི་ཏྟི་ཎྞོ ཨ་ཏི་ཀྐ་ནྟོ ས་མ་ཏི་ཀྐ་ནྟོ ཝཱི་ཏི་ཝ་ཏྟོ. སོ ཝུ་ཊྛ་ཝཱ་སོ ཙི་ཎྞ་ཙ་ར་ཎོ ཛཱ་ཏི་མ་ར་ཎ་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ་ཏི. ཨེ་ཝཾ ཨ་ར་ཧཱ ཏི་ཎྞཱ་ཝཱི་ཏི ཏཱ་དཱི.
ཀ་ཐཾ ཨ་ར་ཧཱ མུ་ཏྟཱ་ཝཱི་ཏི ཏཱ་དཱི? ཨ་ར་ཧ་ཏོ རཱ་གཱ ཙི་ཏྟཾ མུ་ཏྟཾ ཝི་མུ་ཏྟཾ སུ་ཝི་མུ་ཏྟཾ, དོ་སཱ ཙི་ཏྟཾ མུ་ཏྟཾ ཝི་མུ་ཏྟཾ སུ་ཝི་མུ་ཏྟཾ, མོ་ཧཱ ཙི་ཏྟཾ མུ་ཏྟཾ ཝི་མུ་ཏྟཾ སུ་ཝི་མུ་ཏྟཾ, ཀོ་དྷཱ…པེ… ཨུ་པ་ནཱ་ཧཱ… མ་ཀྑཱ… པ་ལཱ༹་སཱ… ཨི་སྶཱ་ཡ… མ་ཙྪ་རི་ཡཱ… མཱ་ཡཱ་ཡ… སཱ་ཋེ་ཡྻཱ… ཐ་མྦྷཱ… སཱ་ར་མྦྷཱ… མཱ་ནཱ… ཨ་ཏི་མཱ་ནཱ… མ་དཱ… པ་མཱ་དཱ… ས་བྦ་ཀི་ལེ་སེ་ཧི… ས་བྦ་དུ་ཙྩ་རི་ཏེ་ཧི… ས་བྦ་ད་ར་ཐེ་ཧི… ས་བྦ་པ་རི་ལཱ༹་ཧེ་ཧི… ས་བྦ་ས་ནྟཱ་པེ་ཧི… ས་བྦཱ་ཀུ་ས་ལཱ་བྷི་ས་ངྑཱ་རེ་ཧི ཙི་ཏྟཾ མུ་ཏྟཾ ཝི་མུ་ཏྟཾ སུ་ཝི་མུ་ཏྟཾ. ཨེ་ཝཾ ཨ་ར་ཧཱ མུ་ཏྟཱ་ཝཱི་ཏི ཏཱ་དཱི.
ཀ་ཐཾ ཨ་ར་ཧཱ ཏཾ་ནི་དྡེ་སཱ ཏཱ་དཱི? ཨ་ར་ཧཱ སཱི་ལེ ས་ཏི སཱི་ལ་ཝཱ་ཏི ཏཾ་ནི་དྡེ་སཱ ཏཱ་དཱི; ས་དྡྷཱ་ཡ ས་ཏི ས་དྡྷོ་ཏི ཏཾ་ནི་དྡེ་སཱ ཏཱ་དཱི; ཝཱི་རི་ཡེ ས་ཏི ཝཱི་རི་ཡ་ཝཱ་ཏི ཏཾ་ནི་དྡེ་སཱ ཏཱ་དཱི; ས་ཏི་ཡཱ ས་ཏི ས་ཏི་མཱ་ཏི ཏཾ་ནི་དྡེ་སཱ ཏཱ་དཱི; ས་མཱ་དྷི་མྷི ས་ཏི ས་མཱ་ཧི་ཏོ་ཏི ཏཾ་ནི་དྡེ་སཱ ཏཱ་དཱི; པ་ཉྙཱ་ཡ ས་ཏི པ་ཉྙ་ཝཱ་ཏི ཏཾ་ནི་དྡེ་སཱ ཏཱ་དཱི; ཝི་ཛྫཱ་ཡ ས་ཏི ཏེ་ཝི་ཛྫོ་ཏི ཏཾ་ནི་དྡེ་སཱ ཏཱ་དཱི; ཨ་བྷི་ཉྙཱ་ཡ ས་ཏི ཚ་ལ༹་བྷི་ཉྙོ་ཏི ཏཾ་ནི་དྡེ་སཱ ཏཱ་དཱི. ཨེ་ཝཾ ཨ་ར་ཧཱ ཏཾ་ནི་དྡེ་སཱ ཏཱ་དཱི་ཏི – པཱ་ར་ངྒ་ཏོ ན པ་ཙྩེ་ཏི ཏཱ་དཱི.
ཏེ་ནཱ་ཧ བྷ་ག་ཝཱ –
‘‘ན ཀ་པྤ་ཡ་ནྟི ན པུ་རེ་ཀྑ་རོ་ནྟི, དྷ་མྨཱ་པི ཏེ་སཾ ན པ་ཊི་ཙྪི་ཏཱ་སེ;
ན བྲཱ་ཧྨ་ཎོ སཱི་ལ་ཝ་ཏེ་ན ནེ་ཡྻོ, པཱ་ར་ངྒ་ཏོ ན པ་ཙྩེ་ཏི ཏཱ་དཱི’’ཏི.
པ་ར་མ་ཊྛ་ཀ་སུ་ཏྟ་ནི་དྡེ་སོ པ་ཉྩ་མོ.