༡༥. ཨ་ཏྟ་ད་ཎྜ་སུ་ཏྟ་ནི་དྡེ་སོ
ཨ་ཐ ཨ་ཏྟ་ད་ཎྜ་སུ་ཏྟ་ནི་དྡེ་སཾ ཝ་ཀྑ་ཏི –
༡༧༠. ཨ་ཏྟ་ད་ཎྜཱ བྷ་ཡཾ ཛཱ་ཏཾ, ཛ་ནཾ པ་སྶ་ཐ མེ་དྷ་གཾ;
སཾ་ཝེ་གཾ ཀི་ཏྟ་ཡི་སྶཱ་མི, ཡ་ཐཱ སཾ་ཝི་ཛི་ཏཾ མ་ཡཱ.
ཨ་ཏྟ་ད་ཎྜཱ བྷ་ཡཾ ཛཱ་ཏནྟི. ད་ཎྜཱཏི ཏ་ཡོ ད་ཎྜཱ – ཀཱ་ཡ་ད་ཎྜོ, ཝ་ཙཱི་ད་ཎྜོ, མ་ནོ་ད་ཎྜོ. ཏི་ཝི་དྷཾ ཀཱ་ཡ་དུ་ཙྩ་རི་ཏཾ ཀཱ་ཡ་ད་ཎྜོ, ཙ་ཏུ་བྦི་དྷཾ ཝ་ཙཱི་དུ་ཙྩ་རི་ཏཾ ཝ་ཙཱི་ད་ཎྜོ, ཏི་ཝི་དྷཾ མ་ནོ་དུ་ཙྩ་རི་ཏཾ མ་ནོ་ད་ཎྜོ. བྷ་ཡནྟི དྭེ བྷ་ཡཱ་ནི – དི་ཊྛ་དྷ་མྨི་ཀ་ཉྩ བྷ་ཡཾ ས་མྤ་རཱ་ཡི་ཀ་ཉྩ བྷ་ཡཾ. ཀ་ཏ་མཾ དི་ཊྛ་དྷ་མྨི་ཀཾ བྷ་ཡཾ? ཨི་དྷེ་ཀ་ཙྩོ ཀཱ་ཡེ་ན དུ་ཙྩ་རི་ཏཾ ཙ་ར་ཏི, ཝཱ་ཙཱ་ཡ དུ་ཙྩ་རི་ཏཾ ཙ་ར་ཏི, མ་ན་སཱ དུ་ཙྩ་རི་ཏཾ ཙ་ར་ཏི, པཱ་ཎ་མྤི ཧ་ན་ཏི, ཨ་དི་ནྣ་མྤི ཨཱ་དི་ཡ་ཏི, ས་ནྡྷི་མྤི ཚི་ནྡ་ཏི, ནི་ལློ་པ་མྤི ཧ་ར་ཏི, ཨེ་ཀཱ་གཱ་རི་ཀ་མྤི ཀ་རོ་ཏི, པ་རི་པ་ནྠེ་པི ཏི་ཊྛ་ཏི, པ་ར་དཱ་ར་མྤི ག་ཙྪ་ཏི, མུ་སཱ་པི བྷ་ཎ་ཏི. ཏ་མེ་ནཾ ག་ཧེ་ཏྭཱ ར་ཉྙོ ད་སྶེ་ནྟི – ‘‘ཨ་ཡཾ, དེ་ཝ, ཙོ་རོ ཨཱ་གུ་ཙཱ་རཱི. ཨི་མ་སྶ ཡཾ ཨི་ཙྪ་སི ཏཾ ད་ཎྜཾ པ་ཎེ་ཧཱི’’ཏི. ཏ་མེ་ནཾ རཱ་ཛཱ པ་རི་བྷཱ་ས་ཏི. སོ པ་རི་བྷཱ་ས་པ་ཙྩ་ཡཱ བྷ་ཡ་མྤི ཨུ་པྤཱ་དེ་ཏི, དུ་ཀྑཾ དོ་མ་ན་སྶཾ [དུ་ཀྑ་དོ་མ་ན་སྶཾ (སྱཱ.)] པ་ཊི་སཾ་ཝེ་དེ་ཏི. ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ.
ཨེ་ཏྟ་ཀེ་ན་པི རཱ་ཛཱ ན ཏུ་སྶ་ཏི. ཏ་མེ་ནཾ རཱ་ཛཱ བ་ནྡྷཱ་པེ་ཏི ཨ་ནྡུ་བ་ནྡྷ་ནེ་ན ཝཱ ར་ཛྫུ་བ་ནྡྷ་ནེ་ན ཝཱ ས་ངྑ་ལི་ཀ་བ་ནྡྷ་ནེ་ན ཝཱ ཝེ་ཏྟ་བ་ནྡྷ་ནེ་ན ཝཱ ལ་ཏཱ་བ་ནྡྷ་ནེ་ན ཝཱ པ་ཀྑེ་པ་བ་ནྡྷ་ནེ་ན ཝཱ [པེ་ཀྑ་བ་ནྡྷ་ནེ་ན ཝཱ (སྱཱ.)] པ་རི་ཀྑེ་པ་བ་ནྡྷ་ནེ་ན ཝཱ གཱ་མ་བ་ནྡྷ་ནེ་ན ཝཱ ནི་ག་མ་བ་ནྡྷ་ནེ་ན ཝཱ ན་ག་ར་བ་ནྡྷ་ནེ་ན ཝཱ ར་ཊྛ་བ་ནྡྷ་ནེ་ན ཝཱ ཛ་ན་པ་ད་བ་ནྡྷ་ནེ་ན ཝཱ ཨ་ནྟ་མ་སོ ས་ཝ་ཙ་ནཱི་ཡ་མྤི ཀ་རོ་ཏི – ‘‘ན ཏེ ལ་བྦྷཱ ཨི་ཏོ པ་ཀྐ་མི་ཏུ’’ནྟི. སོ བ་ནྡྷ་ན་པ་ཙྩ་ཡཱ་པི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ.
ཨེ་ཏྟ་ཀེ་ན་པི རཱ་ཛཱ ན ཏུ་སྶ་ཏི. རཱ་ཛཱ ཏ་སྶ དྷ་ནཾ ཨཱ་ཧ་རཱ་པེ་ཏི – ས་ཏཾ ཝཱ ས་ཧ་སྶཾ ཝཱ ས་ཏ་ས་ཧ་སྶཾ ཝཱ. སོ དྷ་ན་ཛཱ་ནི་པ་ཙྩ་ཡཱ་པི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ.
ཨེ་ཏྟ་ཀེ་ན་པི རཱ་ཛཱ ན ཏུ་སྶ་ཏི. ཏ་མེ་ནཾ རཱ་ཛཱ ཝི་ཝི་དྷཱ ཀ་མྨ་ཀཱ་ར་ཎཱ ཀཱ་རཱ་པེ་ཏི – ཀ་སཱ་ཧི་པི ཏཱ་ལེ༹་ཏི, ཝེ་ཏྟེ་ཧི་པི ཏཱ་ལེ༹་ཏི, ཨ་ཌྜྷ་ད་ཎྜ་ཀེ་ཧི་པི ཏཱ་ལེ༹་ཏི, ཧ་ཏྠ་མྤི ཚི་ནྡ་ཏི, པཱ་ད་མྤི ཚི་ནྡ་ཏི, ཧ་ཏྠ་པཱ་ད་མྤི ཚི་ནྡ་ཏི, ཀ་ཎྞ་མྤི ཚི་ནྡ་ཏི, ནཱ་ས་མྤི ཚི་ནྡ་ཏི, ཀ་ཎྞ་ནཱ་ས་མྤི ཚི་ནྡ་ཏི, བི་ལ་ངྒ་ཐཱ་ལི་ཀ་མྤི ཀ་རོ་ཏི, ས་ངྑ་མུ་ཎྜི་ཀ་མྤི ཀ་རོ་ཏི, རཱ་ཧུ་མུ་ཁ་མྤི ཀ་རོ་ཏི, ཛོ་ཏི་མཱ་ལི་ཀ་མྤི ཀ་རོ་ཏི, ཧ་ཏྠ་པ་ཛྫོ་ཏི་ཀ་མྤི ཀ་རོ་ཏི, ཨེ་ར་ཀ་པ་ཏྟི་ཀ་མྤི ཀ་རོ་ཏི, ཙཱི་ར་ཀ་ཝཱ་སི་ཀ་མྤི ཀ་རོ་ཏི, ཨེ་ཎེ་ཡྻ་ཀ་མྤི ཀ་རོ་ཏི, བ་ལི༹་ས་མཾ་སི་ཀ་མྤི ཀ་རོ་ཏི, ཀ་ཧཱ་པ་ཎི་ཀ་མྤི ཀ་རོ་ཏི, ཁཱ་རཱ་པ་ཏ་ཙྪི་ཀ་མྤི ཀ་རོ་ཏི, པ་ལི་གྷ་པ་རི་ཝ་ཏྟ་ཀ་མྤི ཀ་རོ་ཏི, པ་ལཱ་ལ་པཱི་ཋ་ཀ་མྤི ཀ་རོ་ཏི, ཏ་ཏྟེ་ན་པི ཏེ་ལེ་ན ཨོ་སི་ཉྩ་ཏི, སུ་ན་ཁེ་ཧི་པི ཁཱ་དཱ་པེ་ཏི, ཛཱི་ཝ་ནྟ་མྤི སཱུ་ལེ ཨུ་ཏྟཱ་སེ་ཏི, ཨ་སི་ནཱ་པི སཱི་སཾ ཚི་ནྡ་ཏི. སོ ཀ་མྨ་ཀཱ་ར་ཎ་པ་ཙྩ་ཡཱ་པི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ. རཱ་ཛཱ ཨི་མེ་སཾ ཙ་ཏུ་ནྣཾ ད་ཎྜཱ་ནཾ ཨི་སྶ་རོ.
སོ ས་ཀེ་ན ཀ་མྨེ་ན ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ཏི. ཏ་མེ་ནཾ ནི་ར་ཡ་པཱ་ལཱ པ་ཉྩ་ཝི་དྷ་བ་ནྡྷ་ནཾ ནཱ་མ ཀ་མྨ་ཀཱ་ར་ཎཾ ཀཱ་རེ་ནྟི – ཏ་ཏྟཾ ཨ་ཡོ་ཁི་ལཾ ཧ་ཏྠེ ག་མེ་ནྟི, ཏ་ཏྟཾ ཨ་ཡོ་ཁི་ལཾ དུ་ཏི་ཡེ ཧ་ཏྠེ ག་མེ་ནྟི, ཏ་ཏྟཾ ཨ་ཡོ་ཁི་ལཾ པཱ་དེ ག་མེ་ནྟི, ཏ་ཏྟཾ ཨ་ཡོ་ཁི་ལཾ དུ་ཏི་ཡེ པཱ་དེ ག་མེ་ནྟི, ཏ་ཏྟཾ ཨ་ཡོ་ཁི་ལཾ མ་ཛ྄ཛྷེ ཨུ་ར་སྨིཾ ག་མེ་ནྟི. སོ ཏ་ཏྠ དུ་ཀྑཱ ཏི་བྦཱ [ཏི་པྤཱ (སྱཱ.)] ཀ་ཊུ་ཀཱ ཝེ་ད་ནཱ ཝེ་དེ་ཏི; ན ཙ ཏཱ་ཝ ཀཱ་ལཾ་ཀ་རོ་ཏི ཡཱ་ཝ ན ཏཾ པཱ་པ་ཀ་མྨཾ བྱ་ནྟཱི་ཧོ་ཏི. ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ.
ཏ་མེ་ནཾ ནི་ར་ཡ་པཱ་ལཱ སཾ་ཝེ་སེ་ཏྭཱ [སཾ་ཝེ་སི་ཏྭཱ (སྱཱ.) མ. ནི. ༣.༢༦༧] ཀུ་ཋཱ་རཱི་ཧི [ཀུ་དྷཱ་རཱི་ཧི (སྱཱ. ཀ.)] ཏ་ཙྪེ་ནྟི. སོ ཏ་ཏྠ དུ་ཀྑཱ ཏི་བྦཱ ཀ་ཊུ་ཀཱ ཝེ་ད་ནཱ ཝེ་དེ་ཏི; ན ཙ ཏཱ་ཝ ཀཱ་ལཾ་ཀ་རོ་ཏི ཡཱ་ཝ ན ཏཾ པཱ་པ་ཀ་མྨཾ བྱ་ནྟཱི་ཧོ་ཏི. ཏ་མེ་ནཾ ནི་ར་ཡ་པཱ་ལཱ ཨུ་དྡྷཾ་པཱ་དཾ [ཨུ་དྡྷ་པཱ་དཾ (སཱི.)] ཨ་དྷོ་སི་རཾ ག་ཧེ་ཏྭཱ ཝཱ་སཱི་ཧི ཏ་ཙྪེ་ནྟི. ཏ་མེ་ནཾ ནི་ར་ཡ་པཱ་ལཱ ར་ཐེ ཡོ་ཛེ་ཏྭཱ ཨཱ་དི་ཏྟཱ་ཡ པ་ཐ་ཝི་ཡཱ ས་མྤ་ཛྫ་ལི་ཏཱ་ཡ ས་ཛོ་ཏི་བྷཱུ་ཏཱ་ཡ སཱ་རེ་ནྟི་པི པ་ཙྩཱ་སཱ་རེ་ནྟི་པི [ཧཱ་རེ་ནྟི་པི པ་ཙྩཱ་ཧཱ་རེ་ནྟི་པི (སཱི. ཀ.)] …པེ… ཏ་མེ་ནཾ ནི་ར་ཡ་པཱ་ལཱ མ་ཧ་ནྟཾ ཨ་ངྒཱ་ར་པ་བྦ་ཏཾ ཨཱ་དི་ཏྟཾ ས་མྤ་ཛྫ་ལི་ཏཾ ས་ཛོ་ཏི་བྷཱུ་ཏཾ ཨཱ་རོ་པེ་ནྟི་པི ཨོ་རོ་པེ་ནྟི་པི…པེ… ཏ་མེ་ནཾ ནི་ར་ཡ་པཱ་ལཱ ཨུ་དྡྷཾ་པཱ་དཾ ཨ་དྷོ་སི་རཾ ག་ཧེ་ཏྭཱ ཏ་ཏྟཱ་ཡ ལོ་ཧ་ཀུ་མྦྷི་ཡཱ པ་ཀྑི་པ་ནྟི ཨཱ་དི་ཏྟཱ་ཡ ས་མྤ་ཛྫ་ལི་ཏཱ་ཡ ས་ཛོ་ཏི་བྷཱུ་ཏཱ་ཡ. སོ ཏ་ཏྠ ཕེ་ཎུ་དྡེ་ཧ་ཀཾ པ་ཙྩ་ཏི. སོ ཏ་ཏྠ ཕེ་ཎུ་དྡེ་ཧ་ཀཾ པ་ཙྩ་མཱ་ནོ ས་ཀི་མྤི ཨུ་དྡྷཾ ག་ཙྪ་ཏི, ས་ཀི་མྤི ཨ་དྷོ ག་ཙྪ་ཏི, ས་ཀི་མྤི ཏི་རི་ཡཾ ག་ཙྪ་ཏི. སོ ཏ་ཏྠ དུ་ཀྑཱ ཏི་བྦཱ ཀ་ཊུ་ཀཱ ཝེ་ད་ནཱ ཝེ་དེ་ཏི; ན ཙ ཏཱ་ཝ ཀཱ་ལཾ་ཀ་རོ་ཏི ཡཱ་ཝ ན ཏཾ པཱ་པ་ཀ་མྨཾ བྱ་ནྟཱི་ཧོ་ཏི. ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ. ཏ་མེ་ནཾ ནི་ར་ཡ་པཱ་ལཱ མ་ཧཱ་ནི་ར་ཡེ པ་ཀྑི་པ་ནྟི. སོ ཁོ པ་ན མ་ཧཱ་ནི་ར་ཡོ –
‘‘ཙ་ཏུ་ཀྐ་ཎྞོ ཙ་ཏུ་དྭཱ་རོ, ཝི་བྷ་ཏྟོ བྷཱ་ག་སོ མི་ཏོ;
ཨ་ཡོ་པཱ་ཀཱ་ར་པ་རི་ཡ་ནྟོ [… པ་རི་ཡ་ཏྟོ (སྱཱ. ཀ.)], ཨ་ཡ་སཱ པ་ཊི་ཀུ་ཛྫི་ཏོ.
‘‘ཏ་སྶ ཨ་ཡོ་མ་ཡཱ བྷཱུ་མི, ཛ་ལི་ཏཱ ཏེ་ཛ་སཱ ཡུ་ཏཱ;
ས་མ་ནྟཱ ཡོ་ཛ་ན་ས་ཏཾ, ཕ་རི་ཏྭཱ ཏི་ཊྛ་ཏི ས་བྦ་དཱ.
‘‘ཀ་ད་རི་ཡཱ་ཏ་པ་ནཱ གྷོ་རཱ, ཨ་ཙྩི་མ་ནྟོ དུ་རཱ་ས་དཱ;
ལོ་མ་ཧཾ་ས་ན་རཱུ་པཱ ཙ, བྷི་སྨཱ པ་ཊི་བྷ་ཡཱ དུ་ཁཱ.
‘‘པུ་ར་ཏྠི་མཱ་ཡ བྷི་ཏྟི་ཡཱ, ཨ་ཙྩི་ཀྑ་ནྡྷོ ས་མུ་ཊྛི་ཏོ;
ད་ཧ་ནྟོ པཱ་པ་ཀ་མྨ་ནྟེ, པ་ཙྪི་མཱ་ཡ པ་ཊི་ཧ་ཉྙ་ཏི.
‘‘པ་ཙྪི་མཱ་ཡ ཙ བྷི་ཏྟི་ཡཱ, ཨ་ཙྩི་ཀྑ་ནྡྷོ ས་མུ་ཊྛི་ཏོ;
ད་ཧ་ནྟོ པཱ་པ་ཀ་མྨ་ནྟེ, པུ་ར་ཏྠི་མཱ་ཡ པ་ཊི་ཧ་ཉྙ་ཏི.
‘‘ཨུ་ཏྟ་རཱ་ཡ ཙ བྷི་ཏྟི་ཡཱ, ཨ་ཙྩི་ཀྑ་ནྡྷོ ས་མུ་ཊྛི་ཏོ;
ད་ཧ་ནྟོ པཱ་པ་ཀ་མྨ་ནྟེ, ད་ཀྑི་ཎཱ་ཡ པ་ཊི་ཧ་ཉྙ་ཏི.
‘‘ད་ཀྑི་ཎཱ་ཡ ཙ བྷི་ཏྟི་ཡཱ, ཨ་ཙྩི་ཀྑ་ནྡྷོ ས་མུ་ཊྛི་ཏོ;
ད་ཧ་ནྟོ པཱ་པ་ཀ་མྨ་ནྟེ, ཨུ་ཏྟ་རཱ་ཡ པ་ཊི་ཧ་ཉྙ་ཏི.
‘‘ཧེ་ཊྛ་ཏོ ཙ ས་མུ་ཊྛཱ་ཡ, ཨ་ཙྩི་ཀྑ་ནྡྷོ བྷ་ཡཱ་ན་ཀོ;
ད་ཧ་ནྟོ པཱ་པ་ཀ་མྨ་ནྟེ, ཚ་ད་ན་སྨིཾ པ་ཊི་ཧ་ཉྙ་ཏི.
‘‘ཚ་ད་ན་མྷཱ ས་མུ་ཊྛཱ་ཡ, ཨ་ཙྩི་ཀྑ་ནྡྷོ བྷ་ཡཱ་ན་ཀོ;
ད་ཧ་ནྟོ པཱ་པ་ཀ་མྨ་ནྟེ, བྷཱུ་མི་ཡཾ པ་ཊི་ཧ་ཉྙ་ཏི.
‘‘ཨ་ཡོ་ཀ་པཱ་ལ་མཱ་དི་ཏྟཾ, ས་ནྟ་ཏྟཾ ཛ་ལི་ཏཾ ཡ་ཐཱ;
ཨེ་ཝཾ ཨ་ཝཱི་ཙི་ནི་ར་ཡོ, ཧེ་ཊྛཱ ཨུ་པ་རི པ་སྶ་ཏོ.
‘‘ཏ་ཏྠ ས་ཏྟཱ མ་ཧཱ་ལུ་དྡཱ, མ་ཧཱ་ཀི་བྦི་ས་ཀཱ་རི་ནོ;
ཨ་ཙྩ་ནྟ་པཱ་པ་ཀ་མྨ་ནྟཱ, པ་ཙྩ་ནྟི ན ཙ མི་ཡྻ་རེ [མཱི་ཡ་རེ (སཱི.)].
‘‘ཛཱ་ཏ་ཝེ་ད་ས་མོ ཀཱ་ཡོ, ཏེ་སཾ ནི་ར་ཡ་ཝཱ་སི་ནཾ;
པ་སྶ ཀ་མྨཱ་ནཾ ད་ལ༹ྷ་ཏྟཾ, ན བྷ་སྨཱ ཧོ་ཏི ན་པཱི མ་སི.
‘‘པུ་ར་ཏྠི་མེ་ན་པི དྷཱ་ཝ་ནྟི, ཏ་ཏོ དྷཱ་ཝ་ནྟི པ་ཙྪི་མཾ;
ཨུ་ཏྟ་རེ་ན་པི དྷཱ་ཝ་ནྟི, ཏ་ཏོ དྷཱ་ཝ་ནྟི ད་ཀྑི་ཎཾ.
‘‘ཡཾ ཡཾ དི་སཾ པ་དྷཱ་ཝ་ནྟི [དི་ས་མྤི དྷཱ་ཝ་ནྟི (སྱཱ.)], ཏཾ ཏཾ དྭཱ་རཾ པི་དྷཱི་ཡ་ཏི [པི་ཐཱི་ཡ་ཏི (སཱི. སྱཱ.)];
ཨ་བྷི་ནི་ཀྑ་མི་ཏཱ་སཱ ཏེ, ས་ཏྟཱ མོ་ཀྑ་ག་ཝེ་སི་ནོ.
‘‘ན ཏེ ཏ་ཏོ ནི་ཀྑ་མི་ཏུཾ, ལ་བྷ་ནྟི ཀ་མྨ་པ་ཙྩ་ཡཱ;
ཏེ་ས་ཉྩ པཱ་པ་ཀ་མྨ་ནྟཾ, ཨ་ཝི་པ་ཀྐཾ ཀ་ཏཾ བ་ཧུ’’ནྟི.
ཨེ་ཏཾ བྷ་ཡཾ དུ་ཀྑཾ དོ་མ་ན་སྶཾ ཀུ་ཏོ ཏ་སྶ? ཨ་ཏྟ་ད་ཎྜ་ཏོ ཛཱ་ཏཾ ས་ཉྫཱ་ཏཾ ནི་བྦ་ཏྟཾ ཨ་བྷི་ནི་བྦ་ཏྟཾ པཱ་ཏུ་བྷཱུ་ཏཾ. ཡཱ་ནི ཙ ནེ་ར་ཡི་ཀཱ་ནི དུ་ཀྑཱ་ནི ཡཱ་ནི ཙ ཏི་ར་ཙྪཱ་ན་ཡོ་ནི་ཀཱ་ནི དུ་ཀྑཱ་ནི ཡཱ་ནི ཙ པེ་ཏྟི་ཝི་ས་ཡི་ཀཱ་ནི དུ་ཀྑཱ་ནི ཡཱ་ནི ཙ མཱ་ནུ་སི་ཀཱ་ནི དུ་ཀྑཱ་ནི; ཏཱ་ནི ཀུ་ཏོ ཛཱ་ཏཱ་ནི ཀུ་ཏོ ས་ཉྫཱ་ཏཱ་ནི ཀུ་ཏོ ནི་བྦ་ཏྟཱ་ནི ཀུ་ཏོ ཨ་བྷི་ནི་བྦ་ཏྟཱ་ནི ཀུ་ཏོ པཱ་ཏུ་བྷཱུ་ཏཱ་ནི? ཨ་ཏྟ་ད་ཎྜ་ཏོ ཛཱ་ཏཱ་ནི ས་ཉྫཱ་ཏཱ་ནི ནི་བྦ་ཏྟཱ་ནི ཨ་བྷི་ནི་བྦ་ཏྟཱ་ནི པཱ་ཏུ་བྷཱུ་ཏཱ་ནཱི་ཏི – ཨ་ཏྟ་ད་ཎྜཱ བྷ་ཡཾ ཛཱ་ཏཾ.
ཛ་ནཾ པ་སྶ་ཐ མེ་དྷ་གནྟི. ཛ་ནནྟི ཁ་ཏྟི་ཡཱ ཙ བྲཱ་ཧྨ་ཎཱ ཙ ཝེ་སྶཱ ཙ སུ་དྡཱ ཙ ག་ཧ་ཊྛཱ ཙ པ་བྦ་ཛི་ཏཱ ཙ དེ་ཝཱ ཙ མ་ནུ་སྶཱ ཙ མེ་དྷ་གཾ ཛ་ནཾ ཀ་ལ་ཧཾ ཛ་ནཾ ཝི་རུ་དྡྷཾ ཛ་ནཾ པ་ཊི་ཝི་རུ་དྡྷཾ ཛ་ནཾ ཨཱ་ཧ་ཏཾ ཛ་ནཾ པ་ཙྩཱ་ཧ་ཏཾ ཛ་ནཾ ཨཱ་གྷཱ་ཏི་ཏཾ ཛ་ནཾ པ་ཙྩཱ་གྷཱ་ཏི་ཏཾ ཛ་ནཾ པ་སྶ་ཐ ད་ཀྑ་ཐ ཨོ་ལོ་ཀེ་ཐ ནི་ཛ྄ཛྷཱ་ཡེ་ཐ ཨུ་པ་པ་རི་ཀྑ་ཐཱ་ཏི – ཛ་ནཾ པ་སྶ་ཐ མེ་དྷ་གཾ.
སཾ་ཝེ་གཾ ཀི་ཏྟ་ཡི་སྶཱ་མཱིཏི. སཾ་ཝེ་གཾ ཨུ་བྦེ་གཾ ཨུ་ཏྲཱ་སཾ བྷ་ཡཾ པཱི་ལ༹་ནཾ གྷ་ཊྚ་ནཾ ཨུ་པ་དྡ་ཝཾ ཨུ་པ་ས་གྒཾ. ཀི་ཏྟ་ཡི་སྶཱ་མཱིཏི པ་ཀི་ཏྟ་ཡི་སྶཱ་མི ཨཱ་ཙི་ཀྑི་སྶཱ་མི དེ་སེ་སྶཱ་མི པ་ཉྙ་པེ་སྶཱ་མི པ་ཊྛ་པེ་སྶཱ་མི ཝི་ཝ་རི་སྶཱ་མི ཝི་བྷ་ཛི་སྶཱ་མི ཨུ་ཏྟཱ་ནཱི་ཀ་རི་སྶཱ་མི པ་ཀཱ་སི་སྶཱ་མཱི་ཏི – སཾ་ཝེ་གཾ ཀི་ཏྟ་ཡི་སྶཱ་མི.
ཡ་ཐཱ སཾ་ཝི་ཛི་ཏཾ མ་ཡཱཏི. ཡ་ཐཱ མ་ཡཱ ཨ་ཏྟ་ནཱ་ཡེ་ཝ ཨ་ཏྟཱ་ནཾ སཾ་ཝེ་ཛི་ཏོ ཨུ་བྦེ་ཛི་ཏོ སཾ་ཝེ་ག་མཱ་པཱ་དི་ཏོ་ཏི – ཡ་ཐཱ སཾ་ཝི་ཛི་ཏཾ མ་ཡཱ.
ཏེ་ནཱ་ཧ བྷ་ག་ཝཱ –
‘‘ཨ་ཏྟ་ད་ཎྜཱ བྷ་ཡཾ ཛཱ་ཏཾ, ཛ་ནཾ པ་སྶ་ཐ མེ་དྷ་གཾ;
སཾ་ཝེ་གཾ ཀི་ཏྟ་ཡི་སྶཱ་མི, ཡ་ཐཱ སཾ་ཝི་ཛི་ཏཾ མ་ཡཱ’’ཏི.
༡༧༡. ཕ་ནྡ་མཱ་ནཾ པ་ཛཾ དི་སྭཱ, མ་ཙྪེ ཨ་པྤོ་ད་ཀེ ཡ་ཐཱ;
ཨ་ཉྙ་མ་ཉྙེ་ཧི བྱཱ་རུ་དྡྷེ, དི་སྭཱ མཾ བྷ་ཡ་མཱ་ཝི་སི.
ཕ་ནྡ་མཱ་ནཾ པ་ཛཾ དི་སྭཱཏི. པ་ཛཱཏི ས་ཏྟཱ་དྷི་ཝ་ཙ་ནཾ. པ་ཛཾ ཏ་ཎྷཱ་ཕ་ནྡ་ནཱ་ཡ ཕ་ནྡ་མཱ་ནཾ དི་ཊྛི་ཕ་ནྡ་ནཱ་ཡ ཕ་ནྡ་མཱ་ནཾ ཀི་ལེ་ས་ཕ་ནྡ་ནཱ་ཡ ཕ་ནྡ་མཱ་ནཾ དུ་ཙྩ་རི་ཏ་ཕ་ནྡ་ནཱ་ཡ ཕ་ནྡ་མཱ་ནཾ པ་ཡོ་ག་ཕ་ནྡ་ནཱ་ཡ ཕ་ནྡ་མཱ་ནཾ ཝི་པཱ་ཀ་ཕ་ནྡ་ནཱ་ཡ ཕ་ནྡ་མཱ་ནཾ ར་ཏྟཾ རཱ་གེ་ན ཕ་ནྡ་མཱ་ནཾ དུ་ཊྛཾ དོ་སེ་ན ཕ་ནྡ་མཱ་ནཾ མཱུ་ལ༹ྷཾ མོ་ཧེ་ན ཕ་ནྡ་མཱ་ནཾ ཝི་ནི་བ་དྡྷཾ མཱ་ནེ་ན ཕ་ནྡ་མཱ་ནཾ པ་རཱ་མ་ཊྛཾ དི་ཊྛི་ཡཱ ཕ་ནྡ་མཱ་ནཾ ཝི་ཀྑེ་པ་ག་ཏཾ ཨུ་དྡྷ་ཙྩེ་ན ཕ་ནྡ་མཱ་ནཾ ཨ་ནི་ཊྛ་ངྒ་ཏཾ ཝི་ཙི་ཀི་ཙྪཱ་ཡ ཕ་ནྡ་མཱ་ནཾ ཐཱ་མ་ག་ཏཾ ཨ་ནུ་ས་ཡེ་ཧི ཕ་ནྡ་མཱ་ནཾ ལཱ་བྷེ་ན ཕ་ནྡ་མཱ་ནཾ ཨ་ལཱ་བྷེ་ན ཕ་ནྡ་མཱ་ནཾ ཡ་སེ་ན ཕ་ནྡ་མཱ་ནཾ ཨ་ཡ་སེ་ན ཕ་ནྡ་མཱ་ནཾ པ་སཾ་སཱ་ཡ ཕ་ནྡ་མཱ་ནཾ ནི་ནྡཱ་ཡ ཕ་ནྡ་མཱ་ནཾ སུ་ཁེ་ན ཕ་ནྡ་མཱ་ནཾ དུ་ཀྑེ་ན ཕ་ནྡ་མཱ་ནཾ ཛཱ་ཏི་ཡཱ ཕ་ནྡ་མཱ་ནཾ ཛ་རཱ་ཡ ཕ་ནྡ་མཱ་ནཾ བྱཱ་དྷི་ནཱ ཕ་ནྡ་མཱ་ནཾ མ་ར་ཎེ་ན ཕ་ནྡ་མཱ་ནཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སེ་ཧི ཕ་ནྡ་མཱ་ནཾ ནེ་ར་ཡི་ཀེ་ན དུ་ཀྑེ་ན ཕ་ནྡ་མཱ་ནཾ ཏི་ར་ཙྪཱ་ན་ཡོ་ནི་ཀེ་ན དུ་ཀྑེ་ན ཕ་ནྡ་མཱ་ནཾ པེ་ཏྟི་ཝི་ས་ཡི་ཀེ་ན དུ་ཀྑེ་ན ཕ་ནྡ་མཱ་ནཾ མཱ་ནུ་སི་ཀེ་ན དུ་ཀྑེ་ན ཕ་ནྡ་མཱ་ནཾ ག་བྦྷོ་ཀྐ་ནྟི་མཱུ་ལ་ཀེ་ན དུ་ཀྑེ་ན… ག་བྦྷ་ཊྛི་ཏི་མཱུ་ལ་ཀེ་ན [ག་བྦྷེ་ཋི་ཏཱི་མཱུ་ལ་ཀེ་ན (ཀ.) མ་ཧཱ་ནི. ༡༡] དུ་ཀྑེ་ན… ག་བྦྷཱ་ཝུ་ཊྛཱ་ན་མཱུ་ལ་ཀེ་ན དུ་ཀྑེ་ན… ཛཱ་ཏ་སྶཱུ་པ་ནི་བ་ནྡྷ་ཀེ་ན དུ་ཀྑེ་ན… ཛཱ་ཏ་སྶ པ་རཱ་དྷེ་ཡྻ་ཀེ་ན དུ་ཀྑེ་ན… ཨ་ཏྟཱུ་པ་ཀྐ་མེ་ན དུ་ཀྑེ་ན… པ་རཱུ་པ་ཀྐ་མེ་ན དུ་ཀྑེ་ན… དུ་ཀྑ་དུ་ཀྑེ་ན… ས་ངྑཱ་ར་དུ་ཀྑེ་ན… ཝི་པ་རི་ཎཱ་མ་དུ་ཀྑེ་ན… ཙ་ཀྑུ་རོ་གེ་ན དུ་ཀྑེ་ན… སོ་ཏ་རོ་གེ་ན … གྷཱ་ན་རོ་གེ་ན… ཛི་ཝ྄ཧཱ་རོ་གེ་ན … ཀཱ་ཡ་རོ་གེ་ན… སཱི་ས་རོ་གེ་ན … ཀ་ཎྞ་རོ་གེ་ན… མུ་ཁ་རོ་གེ་ན… ད་ནྟ་རོ་གེ་ན… ཀཱ་སེ་ན… སཱ་སེ་ན… པི་ནཱ་སེ་ན… ཌཱ་ཧེ་ན… ཛ་རེ་ན… ཀུ་ཙྪི་རོ་གེ་ན… མུ་ཙྪཱ་ཡ… པ་ཀྑ་ནྡི་ཀཱ་ཡ… སཱུ་ལཱ་ཡ… ཝི་སཱུ་ཙི་ཀཱ་ཡ… ཀུ་ཊྛེ་ན… ག་ཎྜེ་ན… ཀི་ལཱ་སེ་ན… སོ་སེ་ན… ཨ་པ་མཱ་རེ་ན… ད་དྡུ་ཡཱ… ཀ་ཎྜུ་ཡཱ… ཀ་ཙྪུ་ཡཱ… ར་ཁ་སཱ་ཡ… ཝི་ཏ་ཙྪི་ཀཱ་ཡ… ལོ་ཧི་ཏེ་ན… པི་ཏྟེ་ན… མ་དྷུ་མེ་ཧེ་ན… ཨཾ་སཱ་ཡ… པཱི་ལ༹་ཀཱ་ཡ… བྷ་ག་ནྡ་ལེ་ན… པི་ཏྟ་ས་མུ་ཊྛཱ་ནེ་ན ཨཱ་བཱ་དྷེ་ན… སེ་མྷ་ས་མུ་ཊྛཱ་ནེ་ན ཨཱ་བཱ་དྷེ་ན… ཝཱ་ཏ་ས་མུ་ཊྛཱ་ནེ་ན ཨཱ་བཱ་དྷེ་ན… ས་ནྣི་པཱ་ཏི་ཀེ་ན ཨཱ་བཱ་དྷེ་ན… ཨུ་ཏུ་པ་རི་ཎཱ་མ་ཛེ་ན ཨཱ་བཱ་དྷེ་ན… ཝི་ས་མ་པ་རི་ཧཱ་ར་ཛེ་ན ཨཱ་བཱ་དྷེ་ན … ཨོ་པ་ཀྐ་མི་ཀེ་ན ཨཱ་བཱ་དྷེ་ན… ཀ་མྨ་ཝི་པཱ་ཀ་ཛེ་ན ཨཱ་བཱ་དྷེ་ན… སཱི་ཏེ་ན… ཨུ་ཎྷེ་ན… ཛི་གྷ་ཙྪཱ་ཡ… པི་པཱ་སཱ་ཡ… ཨུ་ཙྩཱ་རེ་ན… པ་སྶཱ་ཝེ་ན… ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶེ་ན དུ་ཀྑེ་ན… མཱ་ཏུ་མ་ར་ཎེ་ན དུ་ཀྑེ་ན… པི་ཏུ་མ་ར་ཎེ་ན དུ་ཀྑེ་ན… བྷཱ་ཏུ་མ་ར་ཎེ་ན དུ་ཀྑེ་ན… བྷ་གི་ནི་མ་ར་ཎེ་ན དུ་ཀྑེ་ན… པུ་ཏྟ་མ་ར་ཎེ་ན དུ་ཀྑེ་ན… དྷཱི་ཏུ་མ་ར་ཎེ་ན དུ་ཀྑེ་ན… ཉཱ་ཏི་མ་ར་ཎེ་ན དུ་ཀྑེ་ན… བྷོ་ག་བྱ་ས་ནེ་ན དུ་ཀྑེ་ན… རོ་ག་བྱ་ས་ནེ་ན དུ་ཀྑེ་ན… སཱི་ལ་བྱ་ས་ནེ་ན དུ་ཀྑེ་ན… དི་ཊྛི་བྱ་ས་ནེ་ན དུ་ཀྑེ་ན ཕ་ནྡ་མཱ་ནཾ ས་མྥ་ནྡ་མཱ་ནཾ ཝི་པྥ་ནྡ་མཱ་ནཾ ཝེ་དྷ་མཱ་ནཾ པ་ཝེ་དྷ་མཱ་ནཾ ས་མྤ་ཝེ་དྷ་མཱ་ནཾ. དི་སྭཱཏི དི་སྭཱ པ་སྶི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ་ཏི – ཕ་ནྡ་མཱ་ནཾ པ་ཛཾ དི་སྭཱ.
མ་ཙྪེ ཨ་པྤོ་ད་ཀེ ཡ་ཐཱཏི ཡ་ཐཱ མ་ཙྪཱ ཨ་པྤོ་ད་ཀེ ཨུ་ད་ཀ་པ་རི་ཡཱ་དཱ་ནེ ཀཱ་ཀེ་ཧི ཝཱ ཀུ་ལ་ལེ་ཧི ཝཱ བ་ལཱ་ཀཱ་ཧི ཝཱ པ་རི་པཱ་ཏི་ཡ་མཱ་ནཱ ཨུ་ཀྑི་པི་ཡ་མཱ་ནཱ ཁ་ཛྫ་མཱ་ནཱ ཕ་ནྡ་ནྟི ས་མྥ་ནྡ་ནྟི ཝི་པྥ་ནྡ་ནྟི ཝེ་དྷ་ནྟི པ་ཝེ་དྷ་ནྟི ས་མྤ་ཝེ་དྷ་ནྟི; ཨེ་ཝ་མེ་ཝ པ་ཛཱ ཏ་ཎྷཱ་ཕ་ནྡ་ནཱ་ཡ ཕ་ནྡ་ནྟི…པེ… དི་ཊྛི་བྱ་ས་ནེ་ན དུ་ཀྑེ་ན ཕ་ནྡ་ནྟི ས་མྥ་ནྡ་ནྟི ཝི་པྥ་ནྡ་ནྟི ཝེ་དྷ་ནྟི པ་ཝེ་དྷ་ནྟི ས་མྤ་ཝེ་དྷ་ནྟཱི་ཏི – མ་ཙྪེ ཨ་པྤོ་ད་ཀེ ཡ་ཐཱ.
ཨ་ཉྙ་མ་ཉྙེ་ཧི བྱཱ་རུ་དྡྷེཏི ཨ་ཉྙ་མ་ཉྙཾ ས་ཏྟཱ ཝི་རུ་དྡྷཱ པ་ཊི་ཝི་རུ་དྡྷཱ ཨཱ་ཧ་ཏཱ པ་ཙྩཱ་ཧ་ཏཱ ཨཱ་གྷཱ་ཏི་ཏཱ པ་ཙྩཱ་གྷཱ་ཏི་ཏཱ. རཱ་ཛཱ་ནོ་པི རཱ་ཛཱུ་ཧི ཝི་ཝ་ད་ནྟི, ཁ་ཏྟི་ཡཱ་པི ཁ་ཏྟི་ཡེ་ཧི ཝི་ཝ་ད་ནྟི, བྲཱ་ཧྨ་ཎཱ་པི བྲཱ་ཧྨ་ཎེ་ཧི ཝི་ཝ་ད་ནྟི, ག་ཧ་པ་ཏཱི་པི ག་ཧ་པ་ཏཱི་ཧི ཝི་ཝ་ད་ནྟི, མཱ་ཏཱ་པི པུ་ཏྟེ་ན ཝི་ཝ་ད་ཏི, པུ་ཏྟོ་པི མཱ་ཏ་རཱ ཝི་ཝ་ད་ཏི, པི་ཏཱ་པི པུ་ཏྟེ་ན ཝི་ཝ་ད་ཏི, པུ་ཏྟོ་པི པི་ཏ་རཱ ཝི་ཝ་ད་ཏི, བྷཱ་ཏཱ་པི བྷཱ་ཏ་རཱ ཝི་ཝ་ད་ཏི, བྷ་གི་ནཱི་པི བྷ་གི་ནི་ཡཱ ཝི་ཝ་ད་ཏི, བྷཱ་ཏཱ་པི བྷ་གི་ནི་ཡཱ ཝི་ཝ་ད་ཏི, བྷ་གི་ནི་པི བྷཱ་ཏ་རཱ ཝི་ཝ་ད་ཏི, ས་ཧཱ་ཡོ་པི ས་ཧཱ་ཡེ་ན ཝི་ཝ་ད་ཏི; ཏེ ཏ་ཏྠ ཀ་ལ་ཧ་ཝི་གྒ་ཧ་ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ པཱ་ཎཱི་ཧི་པི ཨུ་པ་ཀྐ་མ་ནྟི, ལེ་ཌྜཱུ་ཧི་པི ཨུ་པ་ཀྐ་མ་ནྟི, ད་ཎྜེ་ཧི་པི ཨུ་པ་ཀྐ་མ་ནྟི, ས་ཏྠེ་ཧི་པི ཨུ་པ་ཀྐ་མ་ནྟི, ཏེ ཏ་ཏྠ མ་ར་ཎ་མྤི ནི་ག་ཙྪ་ནྟི མ་ར་ཎ་མ་ཏྟ་མྤི དུ་ཀྑ་ནྟི – ཨ་ཉྙ་མ་ཉྙེ་ཧི བྱཱ་རུ་དྡྷེ.
དི་སྭཱ མཾ བྷ་ཡ་མཱ་ཝི་སཱིཏི. དི་སྭཱཏི དི་སྭཱ པ་སྶི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ བྷ་ཡཾ པཱི་ལ༹་ནཾ གྷ་ཊྚ་ནཾ ཨུ་པ་དྡ་ཝོ ཨུ་པ་ས་གྒོ ཨཱ་ཝི་སཱི་ཏི [ཨཱ་ཝཱི་སཱི་ཏི (སཱི.), ཨཱ་ཝི་ས་ཏཱི་ཏི (སྱཱ.)] – དི་སྭཱ མཾ བྷ་ཡ་མཱ་ཝི་སི.
ཏེ་ནཱ་ཧ བྷ་ག་ཝཱ –
‘‘ཕ་ནྡ་མཱ་ནཾ པ་ཛཾ དི་སྭཱ, མ་ཙྪེ ཨ་པྤོ་ད་ཀེ ཡ་ཐཱ;
ཨ་ཉྙ་མ་ཉྙེ་ཧི བྱཱ་རུ་དྡྷེ, དི་སྭཱ མཾ བྷ་ཡ་མཱ་ཝི་སཱི’’ཏི.
༡༧༢. ས་མ་ནྟ་མ་སཱ་རོ ལོ་ཀོ, དི་སཱ ས་བྦཱ ས་མེ་རི་ཏཱ;
ཨི་ཙྪཾ བྷ་ཝ་ན་མ་ཏྟ་ནོ, ནཱ་དྡ་སཱ་སིཾ ཨ་ནོ་སི་ཏཾ.
ས་མ་ནྟ་མ་སཱ་རོ ལོ་ཀོཏི. ལོ་ཀོཏི ནི་ར་ཡ་ལོ་ཀོ ཏི་ར་ཙྪཱ་ན་ཡོ་ནི་ལོ་ཀོ པེ་ཏྟི་ཝི་ས་ཡ་ལོ་ཀོ མ་ནུ་སྶ་ལོ་ཀོ དེ་ཝ་ལོ་ཀོ, ཁ་ནྡྷ་ལོ་ཀོ དྷཱ་ཏུ་ལོ་ཀོ ཨཱ་ཡ་ཏ་ན་ལོ་ཀོ, ཨ་ཡཾ ལོ་ཀོ པ་རོ ལོ་ཀོ, བྲ་ཧྨ་ལོ་ཀོ དེ་ཝ་ལོ་ཀོ – ཨ་ཡཾ ཝུ་ཙྩ་ཏི ལོ་ཀོ. ནི་ར་ཡ་ལོ་ཀོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ ནི་ཙྩ་སཱ་ར་སཱ་རེ་ན ཝཱ སུ་ཁ་སཱ་ར་སཱ་རེ་ན ཝཱ ཨ་ཏྟ་སཱ་ར་སཱ་རེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཏི་ར་ཙྪཱ་ན་ཡོ་ནི་ལོ་ཀོ…པེ… པེ་ཏྟི་ཝི་ས་ཡ་ལོ་ཀོ… མ་ནུ་སྶ་ལོ་ཀོ… དེ་ཝ་ལོ་ཀོ… ཁ་ནྡྷ་ལོ་ཀོ… དྷཱ་ཏུ་ལོ་ཀོ… ཨཱ་ཡ་ཏ་ན་ལོ་ཀོ… ཨ་ཡཾ ལོ་ཀོ… པ་རོ ལོ་ཀོ… བྲ་ཧྨ་ལོ་ཀོ… དེ་ཝ་ལོ་ཀོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ ནི་ཙྩ་སཱ་ར་སཱ་རེ་ན ཝཱ སུ་ཁ་སཱ་ར་སཱ་རེ་ན ཝཱ ཨ་ཏྟ་སཱ་ར་སཱ་རེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ.
ཡ་ཐཱ པ་ན ན་ལོ༹ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ ཨེ་ར་ཎྜོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ ཨུ་དུ་མྦ་རོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ སེ་ཏ་ཀ་ཙྪོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ པཱ་རི་བྷ་དྡ་ཀོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ ཕེ་ཎ་པི་ཎྜོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ ཨུ་ད་ཀ་པུ་བྦུ་ལ༹ཾ [བུ་བྦུ་ལ་ཀཾ (སཱི.), པུ་བྦུ་ལ༹་ཀཾ (སྱཱ.)] ཨ་སཱ་རཾ ནི་སྶཱ་རཾ སཱ་རཱ་པ་ག་ཏཾ, ཡ་ཐཱ མ་རཱི་ཙི ཨ་སཱ་རཱ ནི་སྶཱ་རཱ སཱ་རཱ་པ་ག་ཏཱ, ཡ་ཐཱ ཀ་ད་ལི་ཀྑ་ནྡྷོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ, ཡ་ཐཱ མཱ་ཡཱ ཨ་སཱ་རཱ ནི་སྶཱ་རཱ སཱ་རཱ་པ་ག་ཏཱ; ཨེ་ཝ་མེ་ཝ ནི་ར་ཡ་ལོ་ཀོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ ནི་ཙྩ་སཱ་ར་སཱ་རེ་ན ཝཱ སུ་ཁ་སཱ་ར་སཱ་རེ་ན ཝཱ ཨ་ཏྟ་སཱ་ར་སཱ་རེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ.
ཏི་ར་ཙྪཱ་ན་ཡོ་ནི་ལོ་ཀོ… པེ་ཏྟི་ཝི་ས་ཡ་ལོ་ཀོ… མ་ནུ་སྶ་ལོ་ཀོ… དེ་ཝ་ལོ་ཀོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ ནི་ཙྩ་སཱ་ར་སཱ་རེ་ན ཝཱ སུ་ཁ་སཱ་ར་སཱ་རེ་ན ཝཱ ཨ་ཏྟ་སཱ་ར་སཱ་རེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཁ་ནྡྷ་ལོ་ཀོ… དྷཱ་ཏུ་ལོ་ཀོ… ཨཱ་ཡ་ཏ་ན་ལོ་ཀོ… ཨ་ཡཾ ལོ་ཀོ… པ་རོ ལོ་ཀོ… བྲ་ཧྨ་ལོ་ཀོ… དེ་ཝ་ལོ་ཀོ ཨ་སཱ་རོ ནི་སྶཱ་རོ སཱ་རཱ་པ་ག་ཏོ ནི་ཙྩ་སཱ་ར་སཱ་རེ་ན ཝཱ སུ་ཁ་སཱ་ར་སཱ་རེ་ན ཝཱ ཨ་ཏྟ་སཱ་ར་སཱ་རེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ་ཏི – ས་མ་ནྟ་མ་སཱ་རོ ལོ་ཀོ.
དི་སཱ ས་བྦཱ ས་མེ་རི་ཏཱཏི. ཡེ པུ་ར་ཏྠི་མཱ་ཡ དི་སཱ་ཡ ས་ངྑཱ་རཱ, ཏེ་པི ཨེ་རི་ཏཱ ས་མེ་རི་ཏཱ ཙ་ལི་ཏཱ གྷ་ཊྚི་ཏཱ ཨ་ནི་ཙྩ་ཏཱ་ཡ ཛཱ་ཏི་ཡཱ ཨ་ནུ་ག་ཏཱ ཛ་རཱ་ཡ ཨ་ནུ་ས་ཊཱ བྱཱ་དྷི་ནཱ ཨ་བྷི་བྷཱུ་ཏཱ མ་ར་ཎེ་ན ཨ་བྦྷཱ་ཧ་ཏཱ དུ་ཀྑེ པ་ཏི་ཊྛི་ཏཱ ཨ་ཏཱ་ཎཱ ཨ་ལེ་ཎཱ ཨ་ས་ར་ཎཱ ཨ་ས་ར་ཎཱི་བྷཱུ་ཏཱ. ཡེ པ་ཙྪི་མཱ་ཡ དི་སཱ་ཡ ས་ངྑཱ་རཱ…པེ… ཡེ ཨུ་ཏྟ་རཱ་ཡ དི་སཱ་ཡ ས་ངྑཱ་རཱ… ཡེ ད་ཀྑི་ཎཱ་ཡ དི་སཱ་ཡ ས་ངྑཱ་རཱ… ཡེ པུ་ར་ཏྠི་མཱ་ཡ ཨ་ནུ་དི་སཱ་ཡ ས་ངྑཱ་རཱ… ཡེ པ་ཙྪི་མཱ་ཡ ཨ་ནུ་དི་སཱ་ཡ ས་ངྑཱ་རཱ… ཡེ ཨུ་ཏྟ་རཱ་ཡ ཨ་ནུ་དི་སཱ་ཡ ས་ངྑཱ་རཱ… ཡེ ད་ཀྑི་ཎཱ་ཡ ཨ་ནུ་དི་སཱ་ཡ ས་ངྑཱ་རཱ… ཡེ ཧེ་ཊྛི་མཱ་ཡ དི་སཱ་ཡ ས་ངྑཱ་རཱ… ཡེ ཨུ་པ་རི་མཱ་ཡ དི་སཱ་ཡ ས་ངྑཱ་རཱ… ཡེ ད་ས་སུ དི་སཱ་སུ ས་ངྑཱ་རཱ, ཏེ་པི ཨེ་རི་ཏཱ ས་མེ་རི་ཏཱ ཙ་ལི་ཏཱ གྷ་ཊྚི་ཏཱ ཨ་ནི་ཙྩ་ཏཱ་ཡ ཛཱ་ཏི་ཡཱ ཨ་ནུ་ག་ཏཱ ཛ་རཱ་ཡ ཨ་ནུ་ས་ཊཱ བྱཱ་དྷི་ནཱ ཨ་བྷི་བྷཱུ་ཏཱ མ་ར་ཎེ་ན ཨ་བྦྷཱ་ཧ་ཏཱ དུ་ཀྑེ པ་ཏི་ཊྛི་ཏཱ ཨ་ཏཱ་ཎཱ ཨ་ལེ་ཎཱ ཨ་ས་ར་ཎཱ ཨ་ས་ར་ཎཱི་བྷཱུ་ཏཱ. བྷཱ་སི་ཏ་མྤི ཙེ་ཏཾ –
‘‘ཀི་ཉྩཱ་པི ཙེ་ཏཾ ཛ་ལ་ཏཱི ཝི་མཱ་ནཾ, ཨོ་བྷཱ་ས་ཡཾ ཨུ་ཏྟ་རི་ཡཾ དི་སཱ་ཡ;
རཱུ་པེ ར་ཎཾ དི་སྭཱ ས་དཱ པ་ཝེ་དྷི་ཏཾ, ཏ་སྨཱ ན རཱུ་པེ ར་མ་ཏཱི སུ་མེ་དྷོ.
‘‘མ་ཙྩུ་ནཱ་བྦྷཱ་ཧ་ཏོ ལོ་ཀོ, ཛ་རཱ་ཡ པ་རི་ཝཱ་རི་ཏོ;
ཏ་ཎྷཱ་ས་ལླེ་ན ཨོ་ཏི་ཎྞོ, ཨི་ཙྪཱ་དྷཱུ་མཱ་ཡི་ཏོ [ཨི་ཙྪཱ་དྷུ་མཱ་ཡི་ཀོ (སྱཱ.)] ས་དཱ.
‘‘ས་བྦོ ཨཱ་དཱི་པི་ཏོ ལོ་ཀོ, ས་བྦོ ལོ་ཀོ པ་དྷཱུ་པི་ཏོ;
ས་བྦོ པ་ཛྫ་ལི་ཏོ ལོ་ཀོ, ས་བྦོ ལོ་ཀོ པ་ཀ་མྤི་ཏོ’’ཏི.
དི་སཱ ས་བྦཱ ས་མེ་རི་ཏཱ.
ཨི་ཙྪཾ བྷ་ཝ་ན་མ་ཏྟ་ནོཏི. ཨ་ཏྟ་ནོ བྷ་ཝ་ནཾ ཏཱ་ཎཾ ལེ་ཎཾ ས་ར་ཎཾ ག་ཏིཾ པ་རཱ་ཡ་ནཾ ཨི་ཙྪ་ནྟོ སཱ་དི་ཡ་ནྟོ པ་ཏྠ་ཡ་ནྟོ པི་ཧ་ཡ་ནྟོ ཨ་བྷི་ཛ་པྤ་ནྟོ་ཏི – ཨི་ཙྪཾ བྷ་ཝ་ན་མ་ཏྟ་ནོ. ནཱ་དྡ་སཱ་སིཾ ཨ་ནོ་སི་ཏནྟི. ཨ་ཛ྄ཛྷོ་སི་ཏཾ་ཡེ་ཝ ཨ་དྡ་སཾ, ཨ་ན་ཛ྄ཛྷོ་སི་ཏཾ ནཱ་དྡ་སཾ, ས་བྦཾ ཡོ་བྦ་ཉྙཾ ཛ་རཱ་ཡ ཨོ་སི་ཏཾ, ས་བྦཾ ཨཱ་རོ་གྱཾ བྱཱ་དྷི་ནཱ ཨོ་སི་ཏཾ, ས་བྦཾ ཛཱི་ཝི་ཏཾ མ་ར་ཎེ་ན ཨོ་སི་ཏཾ, ས་བྦཾ ལཱ་བྷཾ ཨ་ལཱ་བྷེ་ན ཨོ་སི་ཏཾ, ས་བྦཾ ཡ་སཾ ཨ་ཡ་སེ་ན ཨོ་སི་ཏཾ, ས་བྦཾ པ་སཾ་སཾ ནི་ནྡཱ་ཡ ཨོ་སི་ཏཾ, ས་བྦཾ སུ་ཁཾ དུ་ཀྑེ་ན ཨོ་སི་ཏཾ.
‘‘ལཱ་བྷོ ཨ་ལཱ་བྷོ ཡ་སོ ཨ་ཡ་སོ ཙ, ནི་ནྡཱ པ་སཾ་སཱ ཙ སུ་ཁཾ དུ་ཁ་ཉྩ;
ཨེ་ཏེ ཨ་ནི་ཙྩཱ མ་ནུ་ཛེ་སུ དྷ་མྨཱ, ཨ་ས་སྶ་ཏཱ ཝི་པ་རི་ཎཱ་མ་དྷ་མྨཱ’’ཏི.
ནཱ་དྡ་སཱ་སིཾ ཨ་ནོ་སི་ཏཾ.
ཏེ་ནཱ་ཧ བྷ་ག་ཝཱ –
‘‘ས་མ་ནྟ་མ་སཱ་རོ ལོ་ཀོ, དི་སཱ ས་བྦཱ ས་མེ་རི་ཏཱ;
ཨི་ཙྪཾ བྷ་ཝ་ན་མ་ཏྟ་ནོ, ནཱ་དྡ་སཱ་སིཾ ཨ་ནོ་སི་ཏ’’ནྟི.
༡༧༣. ཨོ་སཱ་ནེ ཏྭེ་ཝ བྱཱ་རུ་དྡྷེ, དི་སྭཱ མེ ཨ་ར་ཏཱི ཨ་ཧུ;
ཨ་ཐེ་ཏྠ ས་ལླ་མ་དྡ་ཀྑིཾ, དུ་དྡ་སཾ ཧ་ད་ཡ་སྶི་ཏཾ.
ཨོ་སཱ་ནེ ཏྭེ་ཝ བྱཱ་རུ་དྡྷེཏི. ཨོ་སཱ་ནེ ཏྭེ་ཝཱཏི ས་བྦཾ ཡོ་བྦ་ཉྙཾ ཛ་རཱ ཨོ་སཱ་པེ་ཏི, ས་བྦཾ ཨཱ་རོ་གྱཾ བྱཱ་དྷི ཨོ་སཱ་པེ་ཏི, ས་བྦཾ ཛཱི་ཝི་ཏཾ མ་ར་ཎཾ ཨོ་སཱ་པེ་ཏི, ས་བྦཾ ལཱ་བྷཾ ཨ་ལཱ་བྷོ ཨོ་སཱ་པེ་ཏི, ས་བྦཾ ཡ་སཾ ཨ་ཡ་སོ ཨོ་སཱ་པེ་ཏི, ས་བྦཾ པ་སཾ་སཾ ནི་ནྡཱ ཨོ་སཱ་པེ་ཏི, ས་བྦཾ སུ་ཁཾ དུ་ཀྑཾ ཨོ་སཱ་པེ་ཏཱི་ཏི – ཨོ་སཱ་ནེ ཏྭེ་ཝ. བྱཱ་རུ་དྡྷེཏི ཡོ་བྦ་ཉྙ་ཀཱ་མཱ ས་ཏྟཱ ཛ་རཱ་ཡ པ་ཊི་ཝི་རུ་དྡྷཱ, ཨཱ་རོ་གྱ་ཀཱ་མཱ ས་ཏྟཱ བྱཱ་དྷི་ནཱ པ་ཊི་ཝི་རུ་དྡྷཱ, ཛཱི་ཝི་ཏུ་ཀཱ་མཱ ས་ཏྟཱ མ་ར་ཎེ་ན པ་ཊི་ཝི་རུ་དྡྷཱ, ལཱ་བྷ་ཀཱ་མཱ ས་ཏྟཱ ཨ་ལཱ་བྷེ་ན པ་ཊི་ཝི་རུ་དྡྷཱ, ཡ་ས་ཀཱ་མཱ ས་ཏྟཱ ཨ་ཡ་སེ་ན པ་ཊི་ཝི་རུ་དྡྷཱ, པ་སཾ་ས་ཀཱ་མཱ ས་ཏྟཱ ནི་ནྡཱ་ཡ པ་ཊི་ཝི་རུ་དྡྷཱ, སུ་ཁ་ཀཱ་མཱ ས་ཏྟཱ དུ་ཀྑེ་ན པ་ཊི་ཝི་རུ་དྡྷཱ ཨཱ་ཧ་ཏཱ པ་ཙྩཱ་ཧ་ཏཱ ཨཱ་གྷཱ་ཏི་ཏཱ པ་ཙྩཱ་གྷཱ་ཏི་ཏཱ་ཏི – ཨོ་སཱ་ནེ ཏྭེ་ཝ བྱཱ་རུ་དྡྷེ.
དི་སྭཱ མེ ཨ་ར་ཏཱི ཨ་ཧཱུཏི. དི་སྭཱཏི དི་སྭཱ པ་སྶི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ་ཏི – དི་སྭཱ. མེ ཨ་ར་ཏཱིཏི ཡཱ ཨ་ར་ཏི ཡཱ ཨ་ན་བྷི་ར་ཏི ཡཱ ཨ་ན་བྷི་ར་མ་ནཱ ཡཱ ཨུ་ཀྐ་ཎྛི་ཏཱ ཡཱ པ་རི་ཏ་སི་ཏཱ ཨ་ཧཱུ་ཏི – དི་སྭཱ མེ ཨ་ར་ཏཱི ཨ་ཧུ.
ཨ་ཐེ་ཏྠ ས་ལླ་མ་དྡ་ཀྑིནྟི. ཨ་ཐཱཏི པ་ད་ས་ནྡྷི…པེ… པ་དཱ་ནུ་པུ་བྦ་ཏཱ་པེ་ཏཾ – ཨ་ཐཱ་ཏི. ཨེ་ཏྠཱཏི ས་ཏྟེ་སུ. ས་ལླནྟི ས་ཏྟ ས་ལླཱ་ནི – རཱ་ག་ས་ལླཾ, དོ་ས་ས་ལླཾ, མོ་ཧ་ས་ལླཾ, མཱ་ན་ས་ལླཾ, དི་ཊྛི་ས་ལླཾ, སོ་ཀ་ས་ལླཾ, ཀ་ཐཾ་ཀ་ཐཱ་ས་ལླཾ. ཨ་དྡ་ཀྑིནྟི ཨ་དྡ་སཾ ཨ་ད་ཀྑིཾ ཨ་པ་སྶིཾ པ་ཊི་ཝི་ཛ྄ཛྷི་ནྟི – ཨ་ཐེ་ཏྠ ས་ལླ་མ་དྡ་ཀྑིཾ.
དུ་དྡ་སཾ ཧ་ད་ཡ་སྶི་ཏནྟི. དུ་དྡ་སནྟི དུ་དྡ་སཾ དུ་དྡ་ཀྑཾ དུ་པྤ་སྶཾ དུ་བྦུ་ཛ྄ཛྷཾ དུ་ར་ནུ་བུ་ཛ྄ཛྷཾ དུ་པྤ་ཊི་ཝི་ཛ྄ཛྷ་ནྟི – དུ་དྡ་སཾ. ཧ་ད་ཡ་སྶི་ཏནྟི ཧ་ད་ཡཾ ཝུ་ཙྩ་ཏི ཙི་ཏྟཾ. ཡཾ ཙི་ཏྟཾ མ་ནོ མཱ་ན་སཾ ཧ་ད་ཡཾ པ་ཎྜ་རཾ མ་ནོ མ་ནཱ་ཡ་ཏ་ནཾ མ་ནི་ནྡྲི་ཡཾ ཝི་ཉྙཱ་ཎཾ ཝི་ཉྙཱ་ཎ་ཀྑ་ནྡྷོ ཏ་ཛྫཱ མ་ནོ་ཝི་ཉྙཱ་ཎ་དྷཱ་ཏུ. ཧ་ད་ཡ་སྶི་ཏནྟི ཧ་ད་ཡ་ནི་སྶི་ཏཾ ཙི་ཏྟ་སི་ཏཾ ཙི་ཏྟ་ནི་སྶི་ཏཾ ཙི་ཏྟེ་ན ས་ཧ་ག་ཏཾ ས་ཧ་ཛཱ་ཏཾ སཾ་ས་ཊྛཾ ས་མྤ་ཡུ་ཏྟཾ ཨེ་ཀུ་པྤཱ་དཾ ཨེ་ཀ་ནི་རོ་དྷཾ ཨེ་ཀ་ཝ་ཏྠུ་ཀཾ ཨེ་ཀཱ་ར་མྨ་ཎ་ནྟི – དུ་དྡ་སཾ ཧ་ད་ཡ་སྶི་ཏཾ.
ཏེ་ནཱ་ཧ བྷ་ག་ཝཱ –
‘‘ཨོ་སཱ་ནེ ཏྭེ་ཝ བྱཱ་རུ་དྡྷེ, དི་སྭཱ མེ ཨ་ར་ཏཱི ཨ་ཧུ;
ཨ་ཐེ་ཏྠ ས་ལླ་མ་དྡ་ཀྑིཾ, དུ་དྡ་སཾ ཧ་ད་ཡ་སྶི་ཏ’’ནྟི.
༡༧༤. ཡེ་ན ས་ལླེ་ན ཨོ་ཏི་ཎྞོ, དི་སཱ ས་བྦཱ ཝི་དྷཱ་ཝ་ཏི;
ཏ་མེ་ཝ ས་ལླ་མ་བྦུ་ཡ྄ཧ, ན དྷཱ་ཝ་ཏི ན སཱི་ད་ཏི.
ཡེ་ན ས་ལླེ་ན ཨོ་ཏི་ཎྞོ, དི་སཱ ས་བྦཱ ཝི་དྷཱ་ཝ་ཏཱིཏི. ས་ལླནྟི. ས་ཏྟ ས་ལླཱ་ནི – རཱ་ག་ས་ལླཾ, དོ་ས་ས་ལླཾ, མོ་ཧ་ས་ལླཾ, མཱ་ན་ས་ལླཾ, དི་ཊྛི་ས་ལླཾ, སོ་ཀ་ས་ལླཾ, ཀ་ཐཾ་ཀ་ཐཱ་ས་ལླཾ. ཀ་ཏ་མཾ རཱ་ག་ས་ལླཾ? ཡོ རཱ་གོ སཱ་རཱ་གོ ཨ་ནུ་ན་ཡོ ཨ་ནུ་རོ་དྷོ ན་ནྡི་རཱ་གོ ཙི་ཏྟ་སྶ སཱ་རཱ་གོ…པེ… ཨ་བྷི་ཛ྄ཛྷཱ ལོ་བྷོ ཨ་ཀུ་ས་ལ་མཱུ་ལཾ – ཨི་དཾ རཱ་ག་ས་ལླཾ.
ཀ་ཏ་མཾ དོ་ས་ས་ལླཾ? ‘‘ཨ་ན་ཏྠཾ མེ ཨ་ཙ་རཱི’’ཏི ཨཱ་གྷཱ་ཏོ ཛཱ་ཡ་ཏི ‘‘ཨ་ན་ཏྠཾ མེ ཙ་ར་ཏཱི’’ཏི ཨཱ་གྷཱ་ཏོ ཛཱ་ཡ་ཏི, ‘‘ཨ་ན་ཏྠཾ མེ ཙ་རི་སྶ་ཏཱི’’ཏི ཨཱ་གྷཱ་ཏོ ཛཱ་ཡ་ཏི…པེ… ཙ་ཎྜི་ཀྐཾ ཨ་སུ་རོ་པོ ཨ་ན་ཏྟ་མ་ན་ཏཱ ཙི་ཏྟ་སྶ – ཨི་དཾ དོ་ས་ས་ལླཾ.
ཀ་ཏ་མཾ མོ་ཧ་ས་ལླཾ? དུ་ཀྑེ ཨ་ཉྙཱ་ཎཾ…པེ… དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཨ་ཉྙཱ་ཎཾ, པུ་བྦ་ནྟེ ཨ་ཉྙཱ་ཎཾ, ཨ་པ་ར་ནྟེ ཨ་ཉྙཱ་ཎཾ, པུ་བྦ་ནྟཱ་པ་ར་ནྟེ ཨ་ཉྙཱ་ཎཾ, ཨི་ད་པྤ་ཙྩ་ཡ་ཏཱ་པ་ཊི་ཙྩ་ས་མུ་པྤ་ནྣེ་སུ དྷ་མྨེ་སུ ཨ་ཉྙཱ་ཎཾ. ཡཾ ཨེ་ཝ་རཱུ་པཾ ཨ་ད་སྶ་ནཾ ཨ་ན་བྷི་ས་མ་ཡོ ཨ་ན་ནུ་བོ་དྷོ ཨ་ས་མྦོ་དྷོ ཨ་པྤ་ཊི་ཝེ་དྷོ ཨ་ས་ངྒཱ་ཧ་ཎཱ ཨ་པ་རི་ཡོ་གཱ་ཧ་ཎཱ [ཨ་ས་ངྒཱ་ཧ་ཏཱ ཨ་པ་རི་ཡོ་གཱ་ཧ་ཏཱ (སྱཱ.), ཨ་ས་ངྒཱ་ཧ་ནཱ ཨ་པ་རི་ཡོ་གཱ་ཧ་ནཱ (ཀ.)] ཨ་ས་མ་པེ་ཀྑ་ནཱ ཨ་པ་ཙྩ་ཝེ་ཀྑ་ནཱ ཨ་པ་ཙྩ་ཀྑ་ཀ་མྨཾ དུ་མྨེ་ཛ྄ཛྷཾ བཱ་ལྱཾ མོ་ཧོ པ་མོ་ཧོ ས་མྨོ་ཧོ ཨ་ཝི་ཛྫཱ ཨ་ཝི་ཛྫོ་གྷོ ཨ་ཝི་ཛྫཱ་ཡོ་གོ ཨ་ཝི་ཛྫཱ་ནུ་ས་ཡོ ཨ་ཝི་ཛྫཱ་པ་རི་ཡུ་ཊྛཱ་ནཾ ཨ་ཝི་ཛྫཱ་ལ་ངྒཱི མོ་ཧོ ཨ་ཀུ་ས་ལ་མཱུ་ལཾ – ཨི་དཾ མོ་ཧ་ས་ལླཾ.
ཀ་ཏ་མཾ མཱ་ན་ས་ལླཾ? ‘‘སེ་ཡྻོ་ཧ་མ་སྨཱི’’ཏི མཱ་ནོ, ‘‘ས་དི་སོ་ཧ་མ་སྨཱི’’ཏི མཱ་ནོ, ‘‘ཧཱི་ནོ་ཧ་མ་སྨཱི’’ཏི མཱ་ནོ. ཡོ ཨེ་ཝ་རཱུ་པོ མཱ་ནོ མ་ཉྙ་ནཱ མ་ཉྙི་ཏ་ཏྟཾ ཨུ་ནྣ་ཏི ཨུ་ནྣ་མོ དྷ་ཛོ ས་མྤ་གྒཱ་ཧོ ཀེ་ཏུ་ཀ་མྱ་ཏཱ ཙི་ཏྟ་སྶ – ཨི་དཾ མཱ་ན་ས་ལླཾ.
ཀ་ཏ་མཾ དི་ཊྛི་ས་ལླཾ? ཝཱི་ས་ཏི་ཝ་ཏྠུ་ཀཱ ས་ཀྐཱ་ཡ་དི་ཊྛི, ད་ས་ཝ་ཏྠུ་ཀཱ མི་ཙྪཱ་དི་ཊྛི, ད་ས་ཝ་ཏྠུ་ཀཱ ཨ་ནྟ་གྒཱ་ཧི་ཀཱ དི་ཊྛི. ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ དི་ཊྛི་ག་ཧ་ནཾ དི་ཊྛི་ཀ་ནྟཱ་རོ དི་ཊྛི་ཝི་སཱུ་ཀཱ་ཡི་ཀཾ དི་ཊྛི་ཝི་པྥ་ནྡི་ཏཾ དི་ཊྛི་ས་ཉྙོ་ཛ་ནཾ གཱ་ཧོ པ་ཊི་གྒཱ་ཧོ ཨ་བྷི་ནི་ཝེ་སོ པ་རཱ་མཱ་སོ ཀུ་མྨ་གྒོ [ཀུ་མ་གྒོ (ཀ.) མ་ཧཱ་ནི. ༣༨] མི་ཙྪཱ་པ་ཐོ མི་ཙྪ་ཏྟཾ ཏི་ཏྠཱ་ཡ་ཏ་ནཾ ཝི་པ་རི་ཡཱ་ས་གྒཱ་ཧོ ཝི་པ་རཱི་ཏ་གྒཱ་ཧོ ཝི་པ་ལླཱ་ས་གྒཱ་ཧོ མི་ཙྪཱ་གཱ་ཧོ ཨ་ཡཱ་ཐཱ་ཝ་ཀ་སྨིཾ ‘‘ཡཱ་ཐཱ་ཝ་ཀ’’ནྟི གཱ་ཧོ ཡཱ་ཝ་ཏཱ དྭཱ་ས་ཊྛི དི་ཊྛི་ག་ཏཱ་ནི – ཨི་དཾ དི་ཊྛི་ས་ལླཾ.
ཀ་ཏ་མཾ སོ་ཀ་ས་ལླཾ? ཉཱ་ཏི་བྱ་ས་ནེ་ན ཝཱ ཕུ་ཊྛ་སྶ རོ་ག་བྱ་ས་ནེ་ན ཝཱ ཕུ་ཊྛ་སྶ བྷོ་ག་བྱ་ས་ནེ་ན ཝཱ ཕུ་ཊྛ་སྶ སཱི་ལ་བྱ་ས་ནེ་ན ཝཱ ཕུ་ཊྛ་སྶ དི་ཊྛི་བྱ་ས་ནེ་ན ཝཱ ཕུ་ཊྛ་སྶ ཨ་ཉྙ་ཏ་ར་ཉྙ་ཏ་རེ་ན བྱ་ས་ནེ་ན ས་མ་ནྣཱ་ག་ཏ་སྶ ཨ་ཉྙ་ཏ་ར་ཉྙ་ཏ་རེ་ན དུ་ཀྑ་དྷ་མྨེ་ན ཕུ་ཊྛ་སྶ སོ་ཀོ སོ་ཙ་ནཱ སོ་ཙི་ཏ་ཏྟཾ ཨ་ནྟོ་སོ་ཀོ ཨ་ནྟོ་པ་རི་སོ་ཀོ ཨ་ནྟོ་ཌཱ་ཧོ ཨ་ནྟོ་པ་རི་ཌཱ་ཧོ ཙེ་ཏ་སོ པ་རི་ཛ྄ཛྷཱ་ཡ་ནཱ དོ་མ་ན་སྶཾ – ཨི་དཾ སོ་ཀ་ས་ལླཾ.
ཀ་ཏ་མཾ ཀ་ཐཾ་ཀ་ཐཱ་ས་ལླཾ? དུ་ཀྑེ ཀ་ངྑཱ, དུ་ཀྑ་ས་མུ་ད་ཡེ ཀ་ངྑཱ, དུ་ཀྑ་ནི་རོ་དྷེ ཀ་ངྑཱ, དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཀ་ངྑཱ, པུ་བྦ་ནྟེ ཀ་ངྑཱ, ཨ་པ་ར་ནྟེ ཀ་ངྑཱ, པུ་བྦ་ནྟཱ་པ་ར་ནྟེ ཀ་ངྑཱ, ཨི་ད་པྤ་ཙྩ་ཡ་ཏཱ་པ་ཊི་ཙྩ་ས་མུ་པྤ་ནྣེ་སུ དྷ་མྨེ་སུ ཀ་ངྑཱ. ཡཱ ཨེ་ཝ་རཱུ་པཱ ཀ་ངྑཱ ཀ་ངྑཱ་ཡ་ནཱ ཀ་ངྑཱ་ཡི་ཏ་ཏྟཾ ཝི་མ་ཏི ཝི་ཙི་ཀི་ཙྪཱ དྭེ་ལ༹ྷ་ཀཾ དྭེ་དྷཱ་པ་ཐོ སཾ་ས་ཡོ ཨ་ནེ་ཀཾ་ས་གྒཱ་ཧོ ཨཱ་ས་པྤ་ནཱ པ་རི་ས་པྤ་ནཱ ཨ་པ་རི་ཡོ་གཱ་ཧ་ཎཱ ཚ་མྦྷི་ཏ་ཏྟཾ ཙི་ཏྟ་སྶ མ་ནོ་ཝི་ལེ་ཁོ – ཨི་དཾ ཀ་ཐཾ་ཀ་ཐཱ་ས་ལླཾ.
ཡེ་ན ས་ལླེ་ན ཨོ་ཏི་ཎྞོ, དི་སཱ ས་བྦཱ ཝི་དྷཱ་ཝ་ཏཱིཏི. རཱ་ག་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ ཀཱ་ཡེ་ན དུ་ཙྩ་རི་ཏཾ ཙ་ར་ཏི, ཝཱ་ཙཱ་ཡ དུ་ཙྩ་རི་ཏཾ ཙ་ར་ཏི, མ་ན་སཱ དུ་ཙྩ་རི་ཏཾ ཙ་ར་ཏི, པཱ་ཎ་མྤི ཧ་ན་ཏི, ཨ་དི་ནྣ་མྤི ཨཱ་དི་ཡ་ཏི, ས་ནྡྷི་མྤི ཚི་ནྡ་ཏི, ནི་ལློ་པ་མྤི ཧ་ར་ཏི, ཨེ་ཀཱ་གཱ་རི་ཀ་མྤི ཀ་རོ་ཏི, པ་རི་པ་ནྠེ་པི ཏི་ཊྛ་ཏི, པ་ར་དཱ་ར་མྤི ག་ཙྪ་ཏི, མུ་སཱ་པི བྷ་ཎ་ཏི; ཨེ་ཝ་མྤི རཱ་ག་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི. ཨ་ཐ ཝཱ རཱ་ག་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ བྷོ་གེ པ་རི་ཡེ་ས་ནྟོ ནཱ་ཝཱ་ཡ མ་ཧཱ་ས་མུ་དྡཾ པ་ཀྑ་ནྡ་ཏི. སཱི་ཏ་སྶ པུ་ར་ཀྑ་ཏོ ཨུ་ཎྷ་སྶ པུ་ར་ཀྑ་ཏོ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶེ་ཧི པཱི་ལི༹་ཡ་མཱ་ནོ [རི་སྶ་མཱ་ནོ (སཱི. སྱཱ.)] ཁུ་པྤི་པཱ་སཱ་ཡ མི་ཡྻ་མཱ་ནོ ཏི་གུ་མྦཾ ག་ཙྪ་ཏི, ཏ་ཀྐོ་ལཾ ག་ཙྪ་ཏི, ཏ་ཀྐ་སཱི་ལཾ ག་ཙྪ་ཏི, ཀཱ་ལ༹་མུ་ཁཾ ག་ཙྪ་ཏི, པུ་ར་པཱུ་རཾ ག་ཙྪ་ཏི, ཝེ་སུ་ངྒཾ ག་ཙྪ་ཏི, ཝེ་རཱ་པ་ཐཾ ག་ཙྪ་ཏི, ཛ་ཝཾ ག་ཙྪ་ཏི, ཏཱ་མ་ལིཾ ག་ཙྪ་ཏི, ཝ་ངྐཾ ག་ཙྪ་ཏི, ཨེ་ལ༹་བ་ནྡྷ་ནཾ ག་ཙྪ་ཏི, སུ་ཝ་ཎྞ་ཀཱུ་ཊཾ ག་ཙྪ་ཏི, སུ་ཝ་ཎྞ་བྷཱུ་མིཾ ག་ཙྪ་ཏི, ཏ་མྦ་པ་ཎྞིཾ ག་ཙྪ་ཏི, སུ་པྤཱ་ད་ཀཾ [སུ་པྤཱ་ར་ཀཾ (སཱི. ཀ.), སུ་པྤཱ་རཾ (སྱཱ.)] ག་ཙྪ་ཏི, བྷཱ་རུ་ཀ་ཙྪཾ ག་ཙྪ་ཏི, སུ་ར་ཊྛཾ ག་ཙྪ་ཏི, བྷ་ངྒ་ལོ་ཀཾ [ཨ་ངྒ་ལོ་ཀཾ (སཱི.), ཨ་ངྒ་ཎེ་ཀཾ (སྱཱ.)] ག་ཙྪ་ཏི, བྷ་ངྒ་ཎཾ [ག་ངྒ་ཎཾ (སཱི. སྱཱ.)] ག་ཙྪ་ཏི, པ་ར་མ་བྷ་ངྒ་ཎཾ ག་ཙྪ་ཏི, ཡོ་ནཾ ག་ཙྪ་ཏི, པ་ར་མ་ཡོ་ནཾ ག་ཙྪ་ཏི, ཝི་ན་ཀཾ ག་ཙྪ་ཏི, མཱུ་ལ་པ་དཾ ག་ཙྪ་ཏི, མ་རུ་ཀ་ནྟཱ་རཾ ག་ཙྪ་ཏི, ཛ་ཎྞུ་པ་ཐཾ ག་ཙྪ་ཏི, ཨ་ཛ་པ་ཐཾ ག་ཙྪ་ཏི, མེ་ཎྜ་པ་ཐཾ ག་ཙྪ་ཏི, ས་ངྐུ་པ་ཐཾ ག་ཙྪ་ཏི, ཚ་ཏྟ་པ་ཐཾ ག་ཙྪ་ཏི, ཝཾ་ས་པ་ཐཾ ག་ཙྪ་ཏི, ས་ཀུ་ཎ་པ་ཐཾ ག་ཙྪ་ཏི, མཱུ་སི་ཀ་པ་ཐཾ ག་ཙྪ་ཏི, ད་རི་པ་ཐཾ ག་ཙྪ་ཏི, ཝེ་ཏྟཱ་ཙཱ་རཾ ག་ཙྪ་ཏི; པ་རི་ཡེ་ས་ནྟོ ན ལ་བྷ་ཏི, ཨ་ལཱ་བྷ་མཱུ་ལ་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི, པ་རི་ཡེ་ས་ནྟོ ལ་བྷ་ཏི, ལ་དྡྷཱ ཨཱ་ར་ཀྑ་མཱུ་ལ་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི ‘‘ཀི་ནྟི མེ བྷོ་གེ ནེ་ཝ རཱ་ཛཱ་ནོ ཧ་རེ་ཡྻུཾ ན ཙོ་རཱ ཧ་རེ་ཡྻུཾ ན ཨ་གྒི ད་ཧེ་ཡྻ ན ཨུ་ད་ཀཾ ཝ་ཧེ་ཡྻ ན ཨ་པྤི་ཡཱ དཱ་ཡཱ་དཱ ཧ་རེ་ཡྻུ’’ནྟི. ཏ་སྶ ཨེ་ཝཾ ཨཱ་ར་ཀྑ་ཏོ གོ་པ་ཡ་ཏོ ཏེ བྷོ་གཱ ཝི་པྤ་ལུ་ཛྫ་ནྟི, སོ ཝི་པྤ་ཡོ་ག་མཱུ་ལ་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. ཨེ་ཝ་མྤི རཱ་ག་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི.
དོ་ས་ས་ལླེ་ན…པེ… མོ་ཧ་ས་ལླེ་ན… མཱ་ན་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ ཀཱ་ཡེ་ན དུ་ཙྩ་རི་ཏཾ ཙ་ར་ཏི, ཝཱ་ཙཱ་ཡ དུ་ཙྩ་རི་ཏཾ ཙ་ར་ཏི, མ་ན་སཱ དུ་ཙྩ་རི་ཏཾ ཙ་ར་ཏི, པཱ་ཎ་མྤི ཧ་ན་ཏི, ཨ་དི་ནྣ་མྤི ཨཱ་དི་ཡ་ཏི, ས་ནྡྷི་མྤི ཚི་ནྡ་ཏི, ནི་ལློ་པ་མྤི ཧ་ར་ཏི, ཨེ་ཀཱ་གཱ་རི་ཀ་མྤི ཀ་རོ་ཏི, པ་རི་པ་ནྠེ་པི ཏི་ཊྛ་ཏི, པ་ར་དཱ་ར་མྤི ག་ཙྪ་ཏི, མུ་སཱ་པི བྷ་ཎ་ཏི. ཨེ་ཝཾ མཱ་ན་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི.
དི་ཊྛི་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ ཨ་ཙེ་ལ་ཀོ ཧོ་ཏི མུ་ཏྟཱ་ཙཱ་རོ ཧ་ཏྠཱ་པ་ལེ་ཁ་ནོ [ཧ་ཏྠཱ་ཝ་ལེ་ཁ་ནོ (སྱཱ.)], ན ཨེ་ཧི་བྷ་ད་ནྟི་ཀོ, ན ཏི་ཊྛ་བྷ་ད་ནྟི་ཀོ; ནཱ་བྷི་ཧ་ཊཾ, ན ཨུ་དྡི་སྶ་ཀ་ཏཾ, ན ནི་མ་ནྟ་ནཾ སཱ་དི་ཡ་ཏི, སོ ན ཀུ་མྦྷི་མུ་ཁཱ པ་ཊི་གྒ་ཎྷཱ་ཏི, ན ཀ་ལོ༹་པི་མུ་ཁཱ [ཁ་ལོ༹་པི་མུ་ཁཱ (སཱི.)] པ་ཊི་གྒ་ཎྷཱ་ཏི, ན ཨེ་ལ༹་ཀ་མ་ནྟ་རཾ, ན ད་ཎྜ་མ་ནྟ་རཾ, ན མུ་ས་ལ་མ་ནྟ་རཾ, ན དྭི་ནྣཾ བྷུ་ཉྫ་མཱ་ནཱ་ནཾ, ན ག་བྦྷི་ནི་ཡཱ, ན པཱ་ཡ་མཱ་ནཱ་ཡ, ན པུ་རི་ས་ནྟ་ར་ག་ཏཱ་ཡ, ན སཾ་ཀི་ཏྟཱི་སུ, ན ཡ་ཏྠ སཱ ཨུ་པ་ཊྛི་ཏོ ཧོ་ཏི, ན ཡ་ཏྠ མ་ཀྑི་ཀཱ ས་ཎྜ་ས་ཎྜ་ཙཱ་རི་ནཱི. ན མ་ཙྪཾ ན མཾ་སཾ ན སུ་རཾ ན མེ་ར་ཡཾ ན ཐུ་སོ་ད་ཀཾ པི་ཝ་ཏི. སོ ཨེ་ཀཱ་གཱ་རི་ཀོ ཝཱ ཧོ་ཏི ཨེ་ཀཱ་ལོ་པི་ཀོ, དྭཱ་གཱ་རི་ཀོ ཝཱ ཧོ་ཏི དྭཱ་ལོ་པི་ཀོ…པེ… ས་ཏྟཱ་གཱ་རི་ཀོ ཝཱ ཧོ་ཏི ས་ཏྟཱ་ལོ་པི་ཀོ. ཨེ་ཀི་སྶཱ་པི བྷ་ཏྟི་ཡཱ ཡཱ་པེ་ཏི, དྭཱི་ཧི་པི བྷ་ཏྟཱི་ཧི ཡཱ་པེ་ཏི…པེ… ས་ཏྟ་ཧི་པི བྷ་ཏྟཱི་ཧི ཡཱ་པེ་ཏི. ཨེ་ཀཱ་ཧི་ཀ་མྤི ཨཱ་ཧཱ་རཾ ཨཱ་ཧཱ་རེ་ཏི, དྭཱི་ཧི་ཀ་མྤི ཨཱ་ཧཱ་རཾ ཨཱ་ཧཱ་རེ་ཏི…པེ… ས་ཏྟཱ་ཧི་ཀ་མྤི ཨཱ་ཧཱ་རཾ ཨཱ་ཧཱ་རེ་ཏི. ཨི་ཏི ཨེ་ཝ་རཱུ་པཾ ཨ་ཌྜྷ་མཱ་སི་ཀ་མྤི པ་རི་ཡཱ་ཡ་བྷ་ཏྟ་བྷོ་ཛ་ནཱ་ནུ་ཡོ་ག་མ་ནུ་ཡུ་ཏྟོ ཝི་ཧ་ར་ཏི. ཨེ་ཝ་མྤི དི་ཊྛི་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི.
ཨ་ཐ ཝཱ དི་ཊྛི་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ སོ སཱ་ཀ་བྷ་ཀྑོ ཝཱ ཧོ་ཏི, སཱ་མཱ་ཀ་བྷ་ཀྑོ ཝཱ ཧོ་ཏི, ནཱི་ཝཱ་ར་བྷ་ཀྑོ ཝཱ ཧོ་ཏི, ད་དྡུ་ལ་བྷ་ཀྑོ ཝཱ ཧོ་ཏི, ཧ་ཊ་བྷ་ཀྑོ ཝཱ ཧོ་ཏི, ཀ་ཎ་བྷ་ཀྑོ ཝཱ ཧོ་ཏི, ཨཱ་ཙཱ་མ་བྷ་ཀྑོ ཝཱ ཧོ་ཏི, པི་ཉྙཱ་ཀ་བྷ་ཀྑོ ཝཱ ཧོ་ཏི, ཏི་ལ་བྷ་ཀྑོ ཝཱ ཧོ་ཏི, ཏི་ཎ་བྷ་ཀྑོ ཝཱ ཧོ་ཏི, གོ་མ་ཡ་བྷ་ཀྑོ ཝཱ ཧོ་ཏི, ཝ་ན་མཱུ་ལ་ཕ་ལཱ་ཧཱ་རོ ཡཱ་པེ་ཏི པ་ཝ་ཏྟ་ཕ་ལ་བྷོ་ཛ་ནོ. སོ སཱ་ཎཱ་ནི་པི དྷཱ་རེ་ཏི, མ་སཱ་ཎཱ་ནི་པི དྷཱ་རེ་ཏི, ཚ་ཝ་དུ་སྶཱ་ནི་པི དྷཱ་རེ་ཏི, པཾ་སུ་ཀཱུ་ལཱ་ནི་པི དྷཱ་རེ་ཏི, ཏི་རཱི་ཊཱ་ནི་པི དྷཱ་རེ་ཏི, ཨ་ཛི་ནཱ་ནི་པི དྷཱ་རེ་ཏི, ཨ་ཛི་ན་ཀྑི་པ་མྤི དྷཱ་རེ་ཏི, ཀུ་ས་ཙཱི་ར་མྤི དྷཱ་རེ་ཏི, ཝཱ་ཀ་ཙཱི་ར་མྤི དྷཱ་རེ་ཏི, ཕ་ལ་ཀ་ཙཱི་ར་མྤི དྷཱ་རེ་ཏི, ཀེ་ས་ཀ་མྦ་ལ་མྤི དྷཱ་རེ་ཏི, ཨུ་ལཱུ་ཀ་པ་ཀྑ་མྤི དྷཱ་རེ་ཏི, ཀེ་ས་མ་སྶུ་ལོ་ཙ་ཀོ་པི ཧོ་ཏི, ཀེ་ས་མ་སྶུ་ལོ་ཙ་ནཱ་ནུ་ཡོ་ག་མ་ནུ་ཡུ་ཏྟོ ཝི་ཧ་ར་ཏི. ཨུ་བྦྷ་ཊྛ་ཀོ་པི ཧོ་ཏི ཨཱ་ས་ན་པ་ཊི་ཀྑི་ཏྟོ, ཨུ་ཀྐུ་ཊི་ཀོ་པི ཧོ་ཏི ཨུ་ཀྐུ་ཊི་ཀ་པྤ་དྷཱ་ན་མ་ནུ་ཡུ་ཏྟོ, ཀ་ཎྚ་ཀཱ་པ་སྶ་ཡི་ཀོ ཧོ་ཏི, ཀ་ཎྚ་ཀཱ་པ་སྶ་ཡེ སེ་ཡྻཾ ཀ་པྤེ་ཏི, ཕ་ལ་ཀ་སེ་ཡྻ་མྤི ཀ་པྤེ་ཏི, ཐ་ཎྜི་ལ་སེ་ཡྻ་མྤི ཀ་པྤེ་ཏི, ཨེ་ཀཱ་པ་སྶ་ཡི་ཀོ ཧོ་ཏི ར་ཛོ་ཛ་ལླ་དྷ་རོ, ཨ་བྦྷོ་ཀཱ་སི་ཀོ་པི ཧོ་ཏི ཡ་ཐཱ་ས་ནྠ་ཏི་ཀོ, ཝེ་ཀ་ཊི་ཀོ་པི ཧོ་ཏི ཝི་ཀ་ཊ་བྷོ་ཛ་ནཱ་ནུ་ཡོ་ག་མ་ནུ་ཡུ་ཏྟོ, ཨ་པཱ་ན་ཀོ་པི ཧོ་ཏི ཨ་པཱ་ན་ཀ་ཏྟ་མ་ནུ་ཡུ་ཏྟོ, སཱ་ཡ་ཏ་ཏི་ཡ་ཀ་མྤི ཨུ་ད་ཀོ་རོ་ཧ་ནཱ་ནུ་ཡོ་ག་མ་ནུ་ཡུ་ཏྟོ ཝི་ཧ་ར་ཏི. ཨི་ཏི ཨེ་ཝ་རཱུ་པཾ ཨ་ནེ་ཀ་ཝི་ཧི་ཏཾ ཀཱ་ཡ་སྶ ཨཱ་ཏཱ་པ་ན་པ་རི་ཏཱ་པ་ནཱ་ནུ་ཡོ་ག་མ་ནུ་ཡུ་ཏྟོ ཝི་ཧ་ར་ཏི. ཨེ་ཝ་མྤི དི་ཊྛི་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི.
སོ་ཀ་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ སོ་ཙ་ཏི ཀི་ལ་མ་ཏི པ་རི་དེ་ཝ་ཏི ཨུ་ར་ཏྟཱ་ལི༹ཾ ཀ་ནྡ་ཏི ས་མྨོ་ཧཾ ཨཱ་པ་ཛྫ་ཏི. ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘བྷཱུ་ཏ་པུ་བྦཾ, བྲཱ་ཧྨ་ཎ, ཨི་མི་སྶཱ་ཡེ་ཝ སཱ་ཝ་ཏྠི་ཡཱ ཨ་ཉྙ་ཏ་རི་སྶཱ ཨི་ཏྠི་ཡཱ མཱ་ཏཱ ཀཱ་ལ་མ་ཀཱ་སི. སཱ ཏ་སྶཱ ཀཱ་ལཾ ཀི་རི་ཡཱ་ཡ ཨུ་མྨ་ཏྟི་ཀཱ ཁི་ཏྟ་ཙི་ཏྟཱ ར་ཐི་ཡཱ་ཡ ར་ཐི་ཡཾ, སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ ཨུ་པ་ས་ངྐ་མི་ཏྭཱ ཨེ་ཝ་མཱ་ཧ – ‘ཨ་པི མེ མཱ་ཏ་རཾ ཨ་དྡ་སྶ་ཐ, ཨ་པི མེ མཱ་ཏ་རཾ ཨ་དྡ་སྶ་ཐཱ’ཏི.
‘‘བྷཱུ་ཏ་པུ་བྦཾ, བྲཱ་ཧྨ་ཎ, ཨི་མི་སྶཱ་ཡེ་ཝ སཱ་ཝ་ཏྠི་ཡཱ ཨ་ཉྙ་ཏ་རི་སྶཱ ཨི་ཏྠི་ཡཱ པི་ཏཱ ཀཱ་ལ་མ་ཀཱ་སི… བྷཱ་ཏཱ ཀཱ་ལ་མ་ཀཱ་སི… བྷ་གི་ནཱི ཀཱ་ལ་མ་ཀཱ་སི… པུ་ཏྟོ ཀཱ་ལ་མ་ཀཱ་སི… དྷཱི་ཏཱ ཀཱ་ལ་མ་ཀཱ་སི… སཱ་མི་ཀོ ཀཱ་ལ་མ་ཀཱ་སི. སཱ ཏ་སྶ ཀཱ་ལཾ ཀི་རི་ཡཱ་ཡ ཨུ་མྨ་ཏྟི་ཀཱ ཁི་ཏྟ་ཙི་ཏྟཱ ར་ཐི་ཡཱ་ཡ ར་ཐི་ཡཾ, སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ ཨུ་པ་ས་ངྐ་མི་ཏྭཱ ཨེ་ཝ་མཱ་ཧ – ‘ཨ་པི མེ སཱ་མི་ཀཾ ཨ་དྡ་སྶ་ཐ, ཨ་པི མེ སཱ་མི་ཀཾ ཨ་དྡ་སྶ་ཐཱ’ཏི.
‘‘བྷཱུ་ཏ་པུ་བྦཾ, བྲཱ་ཧྨ་ཎ, ཨི་མི་སྶཱ་ཡེ་ཝ སཱ་ཝ་ཏྠི་ཡཱ ཨ་ཉྙ་ཏ་ར་སྶ པུ་རི་ས་སྶ མཱ་ཏཱ ཀཱ་ལ་མ་ཀཱ་སི. སོ ཏ་སྶཱ ཀཱ་ལཾ ཀི་རི་ཡཱ་ཡ ཨུ་མྨ་ཏྟ་ཀོ ཁི་ཏྟ་ཙི་ཏྟོ ར་ཐི་ཡཱ་ཡ ར་ཐི་ཡཾ, སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ ཨུ་པ་ས་ངྐ་མི་ཏྭཱ ཨེ་ཝ་མཱ་ཧ – ‘ཨ་པི མེ མཱ་ཏ་རཾ ཨ་དྡ་སྶ་ཐ, ཨ་པི མེ མཱ་ཏ་རཾ ཨ་དྡ་སྶ་ཐཱ’ཏི.
‘‘བྷཱུ་ཏ་པུ་བྦཾ, བྲཱ་ཧྨ་ཎ, ཨི་མི་སྶཱ་ཡེ་ཝ སཱ་ཝ་ཏྠི་ཡཱ ཨ་ཉྙ་ཏ་ར་སྶ པུ་རི་ས་སྶ པི་ཏཱ ཀཱ་ལ་མ་ཀཱ་སི… བྷཱ་ཏཱ ཀཱ་ལ་མ་ཀཱ་སི… བྷ་གི་ནཱི ཀཱ་ལ་མ་ཀཱ་སི… པུ་ཏྟོ ཀཱ་ལ་མ་ཀཱ་སི… དྷཱི་ཏཱ ཀཱ་ལ་མ་ཀཱ་སི… པ་ཛཱ་པ་ཏི ཀཱ་ལ་མ་ཀཱ་སི. སོ ཏ་སྶཱ ཀཱ་ལཾ ཀི་རི་ཡཱ་ཡ ཨུ་མྨ་ཏྟ་ཀོ ཁི་ཏྟ་ཙི་ཏྟོ ར་ཐི་ཡཱ་ཡ ར་ཐི་ཡཾ, སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ ཨུ་པ་ས་ངྐ་མི་ཏྭཱ ཨེ་ཝ་མཱ་ཧ – ‘ཨ་པི མེ པ་ཛཱ་པ་ཏིཾ ཨ་དྡ་སྶ་ཐ, ཨ་པི མེ པ་ཛཱ་པ་ཏིཾ ཨ་དྡ་སྶ་ཐཱ’ཏི.
‘‘བྷཱུ་ཏ་པུ་བྦཾ, བྲཱ་ཧྨ་ཎ, ཨི་མི་སྶཱ་ཡེ་ཝ སཱ་ཝ་ཏྠི་ཡཱ ཨ་ཉྙ་ཏ་རཱ ཨི་ཏྠཱི ཉཱ་ཏི་ཀུ་ལཾ ཨ་ག་མཱ་སི. ཏ་སྶཱ ཏེ ཉཱ་ཏ་ཀཱ སཱ་མི་ཀཾ ཨ་ཙྪི་ནྡི་ཏྭཱ ཨ་ཉྙ་སྶ དཱ་ཏུ་ཀཱ་མཱ, སཱ ཙ ནཾ ན ཨི་ཙྪ་ཏི. ཨ་ཐ ཁོ སཱ ཨི་ཏྠཱི སཱ་མི་ཀཾ ཨེ་ཏ་ད་ཝོ་ཙ – ‘ཨི་མེ, ཨ་ཡྻ་པུ་ཏྟ, ཉཱ་ཏ་ཀཱ ཏ་ཝ ཨ་ཙྪི་ནྡི་ཏྭཱ ཨ་ཉྙ་སྶ དཱ་ཏུ་ཀཱ་མཱ, ཨུ་བྷོ མ་ཡཾ མ་རི་སྶཱ་མཱ’ཏི. ཨ་ཐ ཁོ སོ པུ་རི་སོ ཏཾ ཨི་ཏྠིཾ དྭི་དྷཱ ཚེ་ཏྭཱ ཨ་ཏྟཱ་ནཾ ཨོ་པཱ་ཏེ་ཏི – ‘ཨུ་བྷོ པེ་ཙྩ བྷ་ཝི་སྶཱ་མཱ’’’ཏི. ཨེ་ཝཾ སོ་ཀ་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི.
ཀ་ཐཾ་ཀ་ཐཱ་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ སཾ་ས་ཡ་པ་ཀྑ་ནྡོ ཧོ་ཏི ཝི་མ་ཏི་པ་ཀྑ་ནྡོ དྭེ་ལ༹ྷ་ཀ་ཛཱ་ཏོ – ‘‘ཨ་ཧོ་སིཾ ནུ ཁོ ཨ་ཧཾ ཨ་ཏཱི་ཏ་མ་དྡྷཱ་ནཾ, ན་ནུ ཁོ ཨ་ཧོ་སིཾ ཨ་ཏཱི་ཏ་མ་དྡྷཱ་ནཾ, ཀིཾ ནུ ཁོ ཨ་ཧོ་སིཾ ཨ་ཏཱི་ཏ་མ་དྡྷཱ་ནཾ, ཀ་ཐཾ ནུ ཁོ ཨ་ཧོ་སིཾ ཨ་ཏཱི་ཏ་མ་དྡྷཱ་ནཾ, ཀིཾ ཧུ་ཏྭཱ ཀིཾ ཨ་ཧོ་སིཾ ནུ ཁོ ཨ་ཏཱི་ཏ་མ་དྡྷཱ་ནཾ, བྷ་ཝི་སྶཱ་མི ནུ ཁོ ཨ་ཧཾ ཨ་ནཱ་ག་ཏ་མ་དྡྷཱ་ནཾ, ན་ནུ ཁོ བྷ་ཝི་སྶཱ་མི ཨ་ནཱ་ག་ཏ་མ་དྡྷཱ་ནཾ, ཀིཾ ནུ ཁོ བྷ་ཝི་སྶཱ་མི ཨ་ནཱ་ག་ཏ་མ་དྡྷཱ་ནཾ, ཀ་ཐཾ ནུ ཁོ བྷ་ཝི་སྶཱ་མི ཨ་ནཱ་ག་ཏ་མ་དྡྷཱ་ནཾ, ཀིཾ ཧུ་ཏྭཱ ཀིཾ བྷ་ཝི་སྶཱ་མི ནུ ཁོ ཨ་ནཱ་ག་ཏ་མ་དྡྷཱ་ནཾ, ཨེ་ཏ་ར་ཧི ཝཱ པ་ཙྩུ་པྤ་ནྣཾ ཨ་དྡྷཱ་ནཾ ཨ་ཛ྄ཛྷ་ཏྟཾ ཀ་ཐཾ་ཀ་ཐཱི ཧོ་ཏི, ཨ་ཧཾ ནུ ཁོ་སྨི, ནོ ནུ ཁོ་སྨི, ཀིཾ ནུ ཁོ་སྨི ཀ་ཐཾ ནུ ཁོ་སྨི, ཨ་ཡཾ ནུ ཁོ ས་ཏྟོ ཀུ་ཏོ ཨཱ་ག་ཏོ, སོ ཀུ་ཧིཾ གཱ་མཱི བྷ་ཝི་སྶ་ཏཱི’’ཏི. ཨེ་ཝཾ ཀ་ཐཾ་ཀ་ཐཱ་ས་ལླེ་ན ཨོ་ཏི་ཎྞོ ཝི་དྡྷོ ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏི.
ཏེ ས་ལླེ ཨ་བྷི་ས་ངྑ་རོ་ཏི; ཏེ ས་ལླེ ཨ་བྷི་ས་ངྑ་རོ་ནྟོ ས་ལླཱ་བྷི་ས་ངྑཱ་ར་ཝ་སེ་ན པུ་ར་ཏྠི་མཾ དི་སཾ དྷཱ་ཝ་ཏི, པ་ཙྪི་མཾ དི་སཾ དྷཱ་ཝ་ཏི, ཨུ་ཏྟ་རཾ དི་སཾ དྷཱ་ཝ་ཏི, ད་ཀྑི་ཎཾ དི་སཾ དྷཱ་ཝ་ཏི. ཏེ ས་ལླཱ་བྷི་ས་ངྑཱ་རཱ ཨ་པྤ་ཧཱི་ནཱ; ས་ལླཱ་བྷི་ས་ངྑཱ་རཱ་ནཾ ཨ་པྤ་ཧཱི་ན་ཏྟཱ ག་ཏི་ཡཱ དྷཱ་ཝ་ཏི, ནི་ར་ཡེ དྷཱ་ཝ་ཏི, ཏི་ར་ཙྪཱ་ན་ཡོ་ནི་ཡཱ དྷཱ་ཝ་ཏི, པེ་ཏྟི་ཝི་ས་ཡེ དྷཱ་ཝ་ཏི, མ་ནུ་སྶ་ལོ་ཀེ དྷཱ་ཝ་ཏི, དེ་ཝ་ལོ་ཀེ དྷཱ་ཝ་ཏི, ག་ཏི་ཡཱ ག་ཏིཾ, ཨུ་པ་པ་ཏྟི་ཡཱ ཨུ་པ་པ་ཏྟིཾ, པ་ཊི་ས་ནྡྷི་ཡཱ པ་ཊི་ས་ནྡྷིཾ, བྷ་ཝེ་ན བྷ་ཝཾ, སཾ་སཱ་རེ་ན སཾ་སཱ་རཾ, ཝ་ཊྚེ་ན ཝ་ཊྚཾ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏཱི་ཏི – ཡེ་ན ས་ལླེ་ན ཨོ་ཏི་ཎྞོ དི་སཱ ས་བྦཱ ཝི་དྷཱ་ཝ་ཏི.
ཏ་མེ་ཝ ས་ལླ་མ་བྦུ་ཡ྄ཧ, ན དྷཱ་ཝ་ཏི ན སཱི་ད་ཏཱིཏི. ཏ་མེ་ཝ རཱ་ག་ས་ལླཾ དོ་ས་ས་ལླཾ མོ་ཧ་ས་ལླཾ མཱ་ན་ས་ལླཾ དི་ཊྛི་ས་ལླཾ སོ་ཀ་ས་ལླཾ ཀ་ཐཾ་ཀ་ཐཱ་ས་ལླཾ ཨ་བྦུ་ཡ྄ཧ ཨ་བྦུ་ཧི་ཏྭཱ ཨུ་དྡྷ་རི་ཏྭཱ ས་མུ་དྡྷ་རི་ཏྭཱ ཨུ་པྤཱ་ཊ་ཡི་ཏྭཱ ས་མུ་པྤཱ་ཊ་ཡི་ཏྭཱ [ཨུ་པྤཱ་ད་ཡི་ཏྭཱ ས་མུ་པྤཱ་ད་ཡི་ཏྭཱ (སྱཱ. ཀ.)] པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མེ་ཏྭཱ ནེ་ཝ པུ་ར་ཏྠི་མཾ དི་སཾ དྷཱ་ཝ་ཏི ན པ་ཙྪི་མཾ དི་སཾ དྷཱ་ཝ་ཏི ན ཨུ་ཏྟ་རཾ དི་སཾ དྷཱ་ཝ་ཏི ན ད་ཀྑི་ཎཾ དི་སཾ དྷཱ་ཝ་ཏི. ཏེ ས་ལླཱ་བྷི་ས་ངྑཱ་རཱ པ་ཧཱི་ནཱ; ས་ལླཱ་བྷི་ས་ངྑཱ་རཱ་ནཾ པ་ཧཱི་ན་ཏྟཱ ག་ཏི་ཡཱ ན དྷཱ་ཝ་ཏི, ནི་ར་ཡེ ན དྷཱ་ཝ་ཏི, ཏི་ར་ཙྪཱ་ན་ཡོ་ནི་ཡཱ ན དྷཱ་ཝ་ཏི, པེ་ཏྟི་ཝི་ས་ཡེ ན དྷཱ་ཝ་ཏི, མ་ནུ་སྶ་ལོ་ཀེ ན དྷཱ་ཝ་ཏི, དེ་ཝ་ལོ་ཀེ ན དྷཱ་ཝ་ཏི, ན ག་ཏི་ཡཱ ག་ཏིཾ, ན ཨུ་པ་པ་ཏྟི་ཡཱ ཨུ་པ་པ་ཏྟིཾ, ན པ་ཊི་ས་ནྡྷི་ཡཱ པ་ཊི་ས་ནྡྷིཾ, ན བྷ་ཝེ་ན བྷ་ཝཾ, ན སཾ་སཱ་རེ་ན སཾ་སཱ་རཾ, ན ཝ་ཊྚེ་ན ཝ་ཊྚཾ དྷཱ་ཝ་ཏི ཝི་དྷཱ་ཝ་ཏི ས་ནྡྷཱ་ཝ་ཏི སཾ་ས་ར་ཏཱི་ཏི – ཏ་མེ་ཝ ས་ལླ་མ་བྦུ་ཡ྄ཧ ན དྷཱ་ཝ་ཏི. ན སཱི་ད་ཏཱིཏི ཀཱ་མོ་གྷེ ན སཱི་ད་ཏི, བྷ་ཝོ་གྷེ ན སཱི་ད་ཏི, དི་ཊྛོ་གྷེ ན སཱི་ད་ཏི, ཨ་ཝི་ཛྫོ་གྷེ ན སཱི་ད་ཏི, ན སཾ་སཱི་ད་ཏི ན ཨོ་སཱི་ད་ཏི ན ཨ་ཝ་སཱི་ད་ཏི ན ག་ཙྪ་ཏི ན ཨ་ཝ་ག་ཙྪ་ཏཱི་ཏི – ཏ་མེ་ཝ ས་ལླ་མ་བྦུ་ཡ྄ཧ, ན དྷཱ་ཝ་ཏི ན སཱི་ད་ཏི.
ཏེ་ནཱ་ཧ བྷ་ག་ཝཱ –
‘‘ཡེ་ན ས་ལླེ་ན ཨོ་ཏི་ཎྞོ, དི་སཱ ས་བྦཱ ཝི་དྷཱ་ཝ་ཏི;
ཏ་མེ་ཝ ས་ལླ་མ་བྦུ་ཡ྄ཧ, ན དྷཱ་ཝ་ཏི ན སཱི་ད་ཏཱི’’ཏི.
༡༧༥. ཏ་ཏྠ སི་ཀྑཱ་ནུ་གཱི་ཡ་ནྟི, ཡཱ་ནི ལོ་ཀེ ག་དྷི་ཏཱ་ནི;
ན ཏེ་སུ པ་སུ་ཏོ སི་ཡཱ, ནི་བྦི་ཛ྄ཛྷ ས་བྦ་སོ ཀཱ་མེ;
སི་ཀྑེ ནི་བྦཱ་ན་མ་ཏྟ་ནོ.
ཏ་ཏྠ སི་ཀྑཱ་ནུ་གཱི་ཡ་ནྟི, ཡཱ་ནི ལོ་ཀེ ག་དྷི་ཏཱ་ནཱིཏི. སི་ཀྑཱཏི ཧ་ཏྠི་སི་ཀྑཱ ཨ་སྶ་སི་ཀྑཱ ར་ཐ་སི་ཀྑཱ དྷ་ནུ་སི་ཀྑཱ སཱ་ལཱ་ཀི་ཡཾ ས་ལླ་ཀ་ཏྟི་ཡཾ ཀཱ་ཡ་ཏི་ཀི་ཙྪཾ བྷཱུ་ཏི་ཡཾ ཀོ་མཱ་ར་བྷ་ཙྩཾ [ཀོ་མཱ་ར་ཏི་ཀི་ཙྪཾ (སྱཱ.), ཀོ་མཱ་ར་ས་ཙྩཾ (ཀ.)]. ཨ་ནུ་གཱི་ཡ་ནྟཱིཏི གཱི་ཡ་ནྟི ནི་གྒཱི་ཡ་ནྟི ཀ་ཐཱི་ཡ་ནྟི བྷ་ཎཱི་ཡ་ནྟི དཱི་པཱི་ཡ་ནྟི ཝོ་ཧ་རཱི་ཡ་ནྟི. ཨ་ཐ ཝཱ གཱི་ཡ་ནྟི ག་ཎྷཱི་ཡ་ནྟི ཨུ་གྒ་ཎྷཱི་ཡ་ནྟི དྷཱ་རཱི་ཡ་ནྟི ཨུ་པ་དྷཱ་རཱི་ཡ་ནྟི ཨུ་པ་ལ་ཀྑཱི་ཡ་ནྟི ག་དྷི་ཏ་པ་ཊི་ལཱ་བྷཱ་ཡ. ག་དྷི་ཏཱ ཝུ་ཙྩ་ནྟི པ་ཉྩ ཀཱ་མ་གུ་ཎཱ – ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་ས་ཉྷི་ཏཱ ར་ཛ་ནཱི་ཡཱ, སོ་ཏ་ཝི་ཉྙེ་ཡྻཱ ས་དྡཱ…པེ… གྷཱ་ན་ཝི་ཉྙེ་ཡྻཱ ག་ནྡྷཱ… ཛི་ཝ྄ཧཱ་ཝི་ཉྙེ་ཡྻཱ ར་སཱ… ཀཱ་ཡ་ཝི་ཉྙེ་ཡྻཱ ཕོ་ཊྛ་བྦཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་ས་ཉྷི་ཏཱ ར་ཛ་ནཱི་ཡཱ. ཀིཾ་ཀཱ་ར་ཎཱ ག་དྷི་ཏཱ ཝུ་ཙྩ་ནྟི པ་ཉྩ ཀཱ་མ་གུ་ཎཱ? ཡེ་བྷུ་ཡྻེ་ན དེ་ཝ་མ་ནུ་སྶཱ པ་ཉྩ ཀཱ་མ་གུ་ཎེ ཨི་ཙྪ་ནྟི སཱ་དི་ཡ་ནྟི པ་ཏྠ་ཡ་ནྟི པི་ཧ་ཡ་ནྟི ཨ་བྷི་ཛ་པྤ་ནྟི ཏཾ་ཀཱ་ར་ཎཱ ག་དྷི་ཏཱ ཝུ་ཙྩ་ནྟི པ་ཉྩ ཀཱ་མ་གུ་ཎཱ. ལོ་ཀེཏི མ་ནུ་སྶ་ལོ་ཀེ་ཏི – ཏ་ཏྠ སི་ཀྑཱ་ནུ་གཱི་ཡ་ནྟི, ཡཱ་ནི ལོ་ཀེ ག་དྷི་ཏཱ་ནི.
ན ཏེ་སུ པ་སུ་ཏོ སི་ཡཱཏི. ཏཱ་སུ ཝཱ སི་ཀྑཱ་སུ ཏེ་སུ ཝཱ པ་ཉྩ་སུ ཀཱ་མ་གུ་ཎེ་སུ ན པ་སུ་ཏོ སི་ཡཱ, ན ཏ་ནྣི་ནྣོ ཨ་སྶ, ན ཏ་པྤོ་ཎོ, ན ཏ་པྤ་བྦྷཱ་རོ, ན ཏ་ད་དྷི་མུ་ཏྟོ, ན ཏ་ད་དྷི་པ་ཏེ་ཡྻོ་ཏི – ན ཏེ་སུ པ་སུ་ཏོ སི་ཡཱ.
ནི་བྦི་ཛ྄ཛྷ ས་བྦ་སོ ཀཱ་མེཏི. ནི་བྦི་ཛ྄ཛྷཱཏི པ་ཊི་ཝི་ཛ྄ཛྷི་ཏྭཱ. ‘‘ས་བྦེ ས་ངྑཱ་རཱ ཨ་ནི་ཙྩཱ’’ཏི པ་ཊི་ཝི་ཛ྄ཛྷི་ཏྭཱ, ‘‘ས་བྦེ ས་ངྑཱ་རཱ དུ་ཀྑཱ’’ཏི པ་ཊི་ཝི་ཛ྄ཛྷི་ཏྭཱ…པེ… ‘‘ཡཾ ཀི་ཉྩི ས་མུ་ད་ཡ་དྷ་མྨཾ ས་བྦཾ ཏཾ ནི་རོ་དྷ་དྷ་མྨ’’ནྟི པ་ཊི་ཝི་ཛ྄ཛྷི་ཏྭཱ. ས་བྦ་སོཏི ས་བྦེ་ན ས་བྦཾ ས་བྦ་ཐཱ ས་བྦཾ ཨ་སེ་སཾ ནི་སྶེ་སཾ པ་རི་ཡཱ་དི་ཡ་ན་ཝ་ཙ་ན་མེ་ཏཾ – ས་བྦ་སོ་ཏི. ཀཱ་མཱཏི ཨུ་དྡཱ་ན་ཏོ དྭེ ཀཱ་མཱ – ཝ་ཏྠུ་ཀཱ་མཱ ཙ ཀི་ལེ་ས་ཀཱ་མཱ ཙ…པེ… ཨི་མེ ཝུ་ཙྩ་ནྟི ཝ་ཏྠུ་ཀཱ་མཱ…པེ… ཨི་མེ ཝུ་ཙྩ་ནྟི ཀི་ལེ་ས་ཀཱ་མཱ་ཏི – ནི་བྦི་ཛ྄ཛྷ ས་བྦ་སོ ཀཱ་མེ.
སི་ཀྑེ ནི་བྦཱ་ན་མ་ཏྟ་ནོཏི. སི་ཀྑཱཏི ཏི་སྶོ སི་ཀྑཱ – ཨ་དྷི་སཱི་ལ་སི་ཀྑཱ, ཨ་དྷི་ཙི་ཏྟ་སི་ཀྑཱ, ཨ་དྷི་པ་ཉྙཱ་སི་ཀྑཱ…པེ… ཨ་ཡཾ ཨ་དྷི་པ་ཉྙཱ་སི་ཀྑཱ. ནི་བྦཱ་ན་མ་ཏྟ་ནོཏི ཨ་ཏྟ་ནོ རཱ་ག་སྶ ནི་བྦཱ་པ་ནཱ་ཡ དོ་ས་སྶ ནི་བྦཱ་པ་ནཱ་ཡ མོ་ཧ་སྶ ནི་བྦཱ་པ་ནཱ་ཡ…པེ… ས་བྦཱ་ཀུ་ས་ལཱ་བྷི་ས་ངྑཱ་རཱ་ནཾ ས་མཱ་ཡ ཨུ་པ་ས་མཱ་ཡ ཝཱུ་པ་ས་མཱ་ཡ ནི་བྦཱ་པ་ནཱ་ཡ པ་ཊི་ནི་སྶ་གྒཱ་ཡ པ་ཊི་པ་སྶ་དྡྷི་ཡཱ ཨ་དྷི་སཱི་ལ་མྤི སི་ཀྑེ་ཡྻ ཨ་དྷི་ཙི་ཏྟ་མྤི སི་ཀྑེ་ཡྻ ཨ་དྷི་པ་ཉྙ་མྤི སི་ཀྑེ་ཡྻ, ཨི་མཱ ཏི་སྶོ སི་ཀྑཱ་ཡོ ཨཱ་ཝ་ཛྫ་ནྟོ སི་ཀྑེ་ཡྻ ཛཱ་ན་ནྟོ སི་ཀྑེ་ཡྻ…པེ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ནྟོ སི་ཀྑེ་ཡྻ ཨཱ་ཙ་རེ་ཡྻ ས་མཱ་ཙ་རེ་ཡྻ ས་མཱ་དཱ་ཡ ཝ་ཏྟེ་ཡྻཱ་ཏི – སི་ཀྑེ ནི་བྦཱ་ན་མ་ཏྟ་ནོ.
ཏེ་ནཱ་ཧ བྷ་ག་ཝཱ –
‘‘ཏ་ཏྠ སི་ཀྑཱ་ནུ་གཱི་ཡ་ནྟི, ཡཱ་ནི ལོ་ཀེ ག་དྷི་ཏཱ་ནི;
ན ཏེ་སུ པ་སུ་ཏོ སི་ཡཱ, ནི་བྦི་ཛ྄ཛྷ ས་བྦ་སོ ཀཱ་མེ;
སི་ཀྑེ ནི་བྦཱ་ན་མ་ཏྟ་ནོ’’ཏི.
༡༧༦. ས་ཙྩོ སི་ཡཱ ཨ་པྤ་ག་བྦྷོ, ཨ་མཱ་ཡོ རི་ཏྟ་པེ་སུ་ཎོ;
ཨ་ཀྐོ་དྷ་ནོ ལོ་བྷ་པཱ་པཾ, ཝེ་ཝི་ཙྪཾ ཝི་ཏ་རེ མུ་ནི.
ས་ཙྩོ སི་ཡཱ ཨ་པྤ་ག་བྦྷོཏི. ས་ཙྩོ སི་ཡཱཏི ས་ཙྩ་ཝཱ་ཙཱ་ཡ ས་མ་ནྣཱ་ག་ཏོ སི་ཡཱ, ས་མྨཱ་དི་ཊྛི་ཡཱ ས་མ་ནྣཱ་ག་ཏོ སི་ཡཱ, ཨ་རི་ཡེ་ན ཨ་ཊྛ་ངྒི་ཀེ་ན མ་གྒེ་ན ས་མ་ནྣཱ་ག་ཏོ སི་ཡཱ་ཏི – ས་ཙྩོ སི་ཡཱ. ཨ་པྤ་ག་བྦྷོཏི ཏཱི་ཎི པཱ་ག་བྦྷི་ཡཱ་ནི – ཀཱ་ཡི་ཀཾ པཱ་ག་བྦྷི་ཡཾ, ཝཱ་ཙ་སི་ཀཾ པཱ་ག་བྦྷི་ཡཾ, ཙེ་ཏ་སི་ཀཾ པཱ་ག་བྦྷི་ཡཾ…པེ… ཨི་དཾ ཙེ་ཏ་སི་ཀཾ པཱ་ག་བྦྷི་ཡཾ. ཡ་སྶི་མཱ་ནི ཏཱི་ཎི པཱ་ག་བྦྷི་ཡཱ་ནི པ་ཧཱི་ནཱ་ནི ས་མུ་ཙྪི་ནྣཱ་ནི ཝཱུ་པ་ས་ནྟཱ་ནི པ་ཊི་པ་སྶ་དྡྷཱ་ནི ཨ་བྷ་བྦུ་པྤ་ཏྟི་ཀཱ་ནི ཉཱ་ཎ་གྒི་ནཱ ད་ཌྜྷཱ་ནི, སོ ཝུ་ཙྩ་ཏི ཨ་པྤ་ག་བྦྷོ་ཏི – ས་ཙྩོ སི་ཡཱ ཨ་པྤ་ག་བྦྷོ.
ཨ་མཱ་ཡོ རི་ཏྟ་པེ་སུ་ཎོཏི. མཱ་ཡཱ ཝུ་ཙྩ་ཏི ཝ་ཉྩ་ནི་ཀཱ ཙ་རི་ཡཱ. ཨི་དྷེ་ཀ་ཙྩོ ཀཱ་ཡེ་ན དུ་ཙྩ་རི་ཏཾ ཙ་རི་ཏྭཱ ཝཱ་ཙཱ་ཡ དུ་ཙྩ་རི་ཏཾ ཙ་རི་ཏྭཱ མ་ན་སཱ དུ་ཙྩ་རི་ཏཾ ཙ་རི་ཏྭཱ ཏ་སྶ པ་ཊི་ཙྪཱ་ད་ན་ཧེ་ཏུ པཱ་པི་ཀཾ ཨི་ཙྪཾ པ་ཎི་ད་ཧ་ཏི, མཱ མཾ ཛ་ཉྙཱ་ཏི ཨི་ཙྪ་ཏི, མཱ མཾ ཛ་ཉྙཱ་ཏི ས་ངྐ་པྤེ་ཏི, མཱ མཾ ཛ་ཉྙཱ་ཏི ཝཱ་ཙཾ བྷཱ་ས་ཏི, མཱ མཾ ཛ་ཉྙཱ་ཏི ཀཱ་ཡེ་ན པ་ར་ཀྐ་མ་ཏི. ཡཱ ཨེ་ཝ་རཱུ་པཱ མཱ་ཡཱ མཱ་ཡཱ་ཝི་ཏཱ ཨ་ཙྩ་ས་རཱ ཝ་ཉྩ་ནཱ ནི་ཀ་ཏི ནི་ཀི་ར་ཎཱ པ་རི་ཧ་ར་ཎཱ གཱུ་ཧ་ནཱ པ་རི་གཱུ་ཧ་ནཱ ཚཱ་ད་ནཱ པ་རི་ཙྪཱ་ད་ནཱ ཨ་ནུ་ཏྟཱ་ནཱི་ཀ་མྨཾ ཨ་ནཱ་ཝི་ཀ་མྨཾ ཝོ་ཙྪཱ་ད་ནཱ པཱ་པ་ཀི་རི་ཡཱ – ཨ་ཡཾ ཝུ་ཙྩ་ཏི མཱ་ཡཱ. ཡ་སྶེ་སཱ མཱ་ཡཱ པ་ཧཱི་ནཱ ས་མུ་ཙྪི་ནྣཱ ཝཱུ་པ་ས་ནྟཱ པ་ཊི་པ་སྶ་དྡྷཱ ཨ་བྷ་བྦུ་པྤ་ཏྟི་ཀཱ ཉཱ་ཎ་གྒི་ནཱ ད་ཌྜྷཱ, སོ ཝུ་ཙྩ་ཏི ཨ་མཱ་ཡོ. རི་ཏྟ་པེ་སུ་ཎོཏི པེ་སུ་ཉྙ་ནྟི ཨི་དྷེ་ཀ་ཙྩོ པི་སུ་ཎ་ཝཱ་ཙོ ཧོ་ཏི…པེ… ཨེ་ཝཾ བྷེ་དཱ་དྷི་པྤཱ་ཡེ་ན པེ་སུ་ཉྙཾ ཨུ་པ་སཾ་ཧ་ར་ཏི. ཡ་སྶེ་ཏཾ པེ་སུ་ཉྙཾ པ་ཧཱི་ནཾ ས་མུ་ཙྪི་ནྣཾ ཝཱུ་པ་ས་ནྟཾ པ་ཊི་པ་སྶ་དྡྷཾ ཨ་བྷ་བྦུ་པྤ་ཏྟི་ཀཾ ཉཱ་ཎ་གྒི་ནཱ ད་ཌྜྷཾ, སོ ཝུ་ཙྩ་ཏི རི་ཏྟ་པེ་སུ་ཎོ ཝི་ཝི་ཏྟ་པེ་སུ་ཎོ པ་ཝི་ཝི་ཏྟ་པེ་སུ་ཎོ་ཏི – ཨ་མཱ་ཡོ རི་ཏྟ་པེ་སུ་ཎོ.
ཨ་ཀྐོ་དྷ་ནོ ལོ་བྷ་པཱ་པཾ, ཝེ་ཝི་ཙྪཾ ཝི་ཏ་རེ མུ་ནཱིཏི. ཨ་ཀྐོ་དྷ་ནོཏི ཧི ཁོ ཝུ་ཏྟཾ, ཨ་པི ཙ ཀོ་དྷོ ཏཱ་ཝ ཝ་ཏྟ་བྦོ. ད་ས་ཧཱ་ཀཱ་རེ་ཧི ཀོ་དྷོ ཛཱ་ཡ་ཏི. ‘‘ཨ་ན་ཏྠཾ མེ ཨ་ཙ་རཱི’’ཏི ཀོ་དྷོ ཛཱ་ཡ་ཏི…པེ… ཡ་སྶེ་སོ ཀོ་དྷོ པ་ཧཱི་ནོ ས་མུ་ཙྪི་ནྣོ ཝཱུ་པ་ས་ནྟོ པ་ཊི་པ་སྶ་དྡྷོ ཨ་བྷ་བྦུ་པྤ་ཏྟི་ཀོ ཉཱ་ཎ་གྒི་ནཱ ད་ཌྜྷོ, སོ ཝུ་ཙྩ་ཏི ཨ་ཀྐོ་དྷ་ནོ. ཀོ་དྷ་སྶ པ་ཧཱི་ན་ཏྟཱ ཨ་ཀྐོ་དྷ་ནོ, ཀོ་དྷ་ཝ་ཏྠུ་སྶ པ་རི་ཉྙཱ་ཏ་ཏྟཱ ཨ་ཀྐོ་དྷ་ནོ, ཀོ་དྷ་ཧེ་ཏུ་སྶ ཨུ་པ་ཙྪི་ནྣ་ཏྟཱ ཨ་ཀྐོ་དྷ་ནོ. ལོ་བྷོཏི ཡོ ལོ་བྷོ ལུ་བྦྷ་ནཱ ལུ་བྦྷི་ཏ་ཏྟཾ…པེ… ཨ་བྷི་ཛ྄ཛྷཱ ལོ་བྷོ ཨ་ཀུ་ས་ལ་མཱུ་ལཾ. ཝེ་ཝི་ཙྪཾ ཝུ་ཙྩ་ཏི པ་ཉྩ མ་ཙྪ་རི་ཡཱ་ནི – ཨཱ་ཝཱ་ས་མ་ཙྪ་རི་ཡཾ…པེ… གཱ་ཧོ ཝུ་ཙྩ་ཏི མ་ཙྪ་རི་ཡཾ. མུ་ནཱིཏི. མོ་ནཾ ཝུ་ཙྩ་ཏི ཉཱ་ཎཾ…པེ… ས་ངྒ་ཛཱ་ལ་མ་ཏི་ཙྩ སོ མུ་ནི. ཨ་ཀྐོ་དྷ་ནོ ལོ་བྷ་པཱ་པཾ, ཝེ་ཝི་ཙྪཾ ཝི་ཏ་རེ མུ་ནཱིཏི. མུ་ནི ལོ་བྷ་པཱ་པ་ཉྩ ཝེ་ཝི་ཙྪ་ཉྩ ཨ་ཏ་རི ཨུ་ཏྟ་རི པ་ཏ་རི ས་མ་ཏི་ཀྐ་མི ཝཱི་ཏི་ཝ་ཏྟ་ཡཱི་ཏི [ཝཱི་ཏི་ཝ་ཏྟཱི་ཏི (ཀ.)] – ཨ་ཀྐོ་དྷ་ནོ ལོ་བྷ་པཱ་པཾ, ཝེ་ཝི་ཙྪཾ ཝི་ཏ་རེ མུ་ནི.
ཏེ་ནཱ་ཧ བྷ་ག་ཝཱ –
‘‘ས་ཙྩོ སི་ཡཱ ཨ་པྤ་ག་བྦྷོ, ཨ་མཱ་ཡོ རི་ཏྟ་པེ་སུ་ཎོ;
ཨ་ཀྐོ་དྷ་ནོ ལོ་བྷ་པཱ་པཾ, ཝེ་ཝི་ཙྪཾ ཝི་ཏ་རེ མུ་ནཱི’’ཏི.
༡༧༧. ནི་དྡཾ ཏ་ནྡིཾ ས་ཧེ ཐཱི་ནཾ, པ་མཱ་དེ་ན ན སཾ་ཝ་སེ;
ཨ་ཏི་མཱ་ནེ ན ཏི་ཊྛེ་ཡྻ, ནི་བྦཱ་ན་མ་ན་སོ ན་རོ.
ནི་དྡཾ ཏ་ནྡིཾ ས་ཧེ ཐཱི་ནནྟི. ནི་དྡཱཏི ཡཱ ཀཱ་ཡ་སྶ ཨ་ཀ་ལྱ་ཏཱ ཨ་ཀ་མྨ་ཉྙ་ཏཱ ཨོ་ནཱ་ཧོ པ་རི་ཡོ་ནཱ་ཧོ ཨ་ནྟོ་ས་མོ་རོ་དྷོ མི་དྡྷཾ སུ་པྤཾ པ་ཙ་ལཱ་ཡི་ཀཱ སུ་པྤཾ སུ་པྤ་ནཱ སུ་པྤི་ཏ་ཏྟཾ. ཏ་ནྡིནྟི ཡཱ ཏ་ནྡཱི [ཏ་ནྡི (སཱི. སྱཱ. ཀ.)] ཏ་ནྡི་ཡ་ནཱ ཏ་ནྡི་ཡི་ཏ་ཏྟཾ ཏ་ནྡི་མ་ན་ཀ་ཏཱ ཨཱ་ལ་སྱཾ ཨཱ་ལ་སྱཱ་ཡ་ཏཱ ཨཱ་ལ་སྱཱ་ཡི་ཏ་ཏྟཾ. ཐཱི་ནནྟི ཡཱ ཙི་ཏྟ་སྶ ཨ་ཀ་ལྱ་ཏཱ ཨ་ཀ་མྨ་ཉྙ་ཏཱ ཨོ་ལཱི་ཡ་ནཱ ས་ལླཱི་ཡ་ནཱ ལཱི་ནཾ ལཱི་ཡ་ནཱ ལཱི་ཡི་ཏ་ཏྟཾ, ཐི་ནཾ ཐི་ཡ་ནཱ ཐི་ཡི་ཏ་ཏྟཾ ཙི་ཏྟ་སྶ. ནི་དྡཾ ཏ་ནྡིཾ ས་ཧེ ཐཱི་ནནྟི. ནི་དྡ་ཉྩ ཏ་ནྡི་ཉྩ ཐི་ན་ཉྩ ས་ཧེ ས་ཧེ་ཡྻ པ་རི་ས་ཧེ་ཡྻ ཨ་བྷི་བྷ་ཝེ་ཡྻ ཨ་ཛ྄ཛྷོ་ཏྠ་རེ་ཡྻ པ་རི་ཡཱ་དི་ཡེ་ཡྻ མ་དྡེ་ཡྻཱ་ཏི – ནི་དྡཾ ཏ་ནྡིཾ ས་ཧེ ཐཱི་ནཾ.
པ་མཱ་དེ་ན ན སཾ་ཝ་སེཏི. པ་མཱ་དོ ཝ་ཏྟ་བྦོ ཀཱ་ཡ་དུ་ཙྩ་རི་ཏེ ཝཱ ཝ་ཙཱི་དུ་ཙྩ་རི་ཏེ ཝཱ མ་ནོ་དུ་ཙྩ་རི་ཏེ ཝཱ པ་ཉྩ་སུ ཝཱ ཀཱ་མ་གུ་ཎེ་སུ. ཙི་ཏྟ་སྶ ཝོ་ས་གྒོ ཝོ་ས་གྒཱ་ནུ་པྤཱ་ད་ནཾ [ཝོ་སྶ་གྒོ ཝོ་སྶ་གྒཱ་ནུ་པྤཱ་ད་ནཾ (བ་ཧཱུ་སུ)] ཝཱ ཀུ་ས་ལཱ་ནཾ ཝཱ དྷ་མྨཱ་ནཾ བྷཱ་ཝ་ནཱ་ཡ ཨ་ས་ཀྐ་ཙྩ་ཀི་རི་ཡ་ཏཱ ཨ་སཱ་ཏ་ཙྩ་ཀི་རི་ཡ་ཏཱ ཨ་ན་ཊྛི་ཏ་ཀི་རི་ཡ་ཏཱ ཨོ་ལཱི་ན་ཝུ་ཏྟི་ཏཱ ནི་ཀྑི་ཏྟ་ཙྪ་ནྡ་ཏཱ ནི་ཀྑི་ཏྟ་དྷུ་ར་ཏཱ ཨ་ནཱ་སེ་ཝ་ནཱ ཨ་བྷཱ་ཝ་ནཱ ཨ་བ་ཧུ་ལཱི་ཀ་མྨཾ ཨ་ན་དྷི་ཊྛཱ་ནཾ ཨ་ན་ནུ་ཡོ་གོ པ་མཱ་དོ. ཡོ ཨེ་ཝ་རཱུ་པོ པ་མཱ་དོ པ་མ་ཛྫ་ནཱ པ་མ་ཛྫི་ཏ་ཏྟཾ – ཨ་ཡཾ ཝུ་ཙྩ་ཏི པ་མཱ་དོ. པ་མཱ་དེ་ན ན སཾ་ཝ་སེཏི པ་མཱ་དེ་ན ན ཝ་སེ་ཡྻ ན སཾ་ཝ་སེ་ཡྻ ན ཨཱ་ཝ་སེ་ཡྻ ན པ་རི་ཝ་སེ་ཡྻ, པ་མཱ་དཾ པ་ཛ་ཧེ་ཡྻ ཝི་ནོ་དེ་ཡྻ བྱ་ནྟིཾ ཀ་རེ་ཡྻ ཨ་ན་བྷཱ་ཝཾ ག་མེ་ཡྻ, པ་མཱ་དཱ ཨཱ་ར་ཏོ ཨ་སྶ ཝི་ར་ཏོ པ་ཊི་ཝི་ར་ཏོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་རེ་ཡྻཱ་ཏི – པ་མཱ་དེ་ན ན སཾ་ཝ་སེ.
ཨ་ཏི་མཱ་ནེ ན ཏི་ཊྛེ་ཡྻཱཏི. ཨ་ཏི་མཱ་ནོཏི ཨི་དྷེ་ཀ་ཙྩོ པ་རཾ ཨ་ཏི་མ་ཉྙ་ཏི ཛཱ་ཏི་ཡཱ ཝཱ གོ་ཏྟེ་ན ཝཱ…པེ… ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ. ཡོ ཨེ་ཝ་རཱུ་པོ མཱ་ནོ མ་ཉྙ་ནཱ མ་ཉྙི་ཏ་ཏྟཾ ཨུ་ནྣ་ཏི ཨུ་ནྣ་མོ དྷ་ཛོ ས་མྤ་གྒཱ་ཧོ ཀེ་ཏུ་ཀ་མྱ་ཏཱ ཙི་ཏྟ་སྶ – ཨ་ཡཾ ཝུ་ཙྩ་ཏི ཨ་ཏི་མཱ་ནོ. ཨ་ཏི་མཱ་ནེ ན ཏི་ཊྛེ་ཡྻཱཏི. ཨ་ཏི་མཱ་ནེ ན ཏི་ཊྛེ་ཡྻ ན སཾ་ཏི་ཊྛེ་ཡྻ, ཨ་ཏི་མཱ་ནཾ པ་ཛ་ཧེ་ཡྻ ཝི་ནོ་དེ་ཡྻ བྱ་ནྟིཾ ཀ་རེ་ཡྻ ཨ་ན་བྷཱ་ཝཾ ག་མེ་ཡྻ, ཨ་ཏི་མཱ་ནཱ ཨཱ་ར་ཏོ ཨ་སྶ ཝི་ར་ཏོ པ་ཊི་ཝི་ར་ཏོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་རེ་ཡྻཱ་ཏི – ཨ་ཏི་མཱ་ནེ ན ཏི་ཊྛེ་ཡྻ.
ནི་བྦཱ་ན་མ་ན་སོ ན་རོཏི. ཨི་དྷེ་ཀ་ཙྩོ དཱ་ནཾ དེ་ནྟོ སཱི་ལཾ ས་མཱ་དི་ཡ་ནྟོ ཨུ་པོ་ས་ཐ་ཀ་མྨཾ ཀ་རོ་ནྟོ པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛ་པེ་ནྟོ པ་རི་ཝེ་ཎཾ ས་མྨ་ཛྫ་ནྟོ ཙེ་ཏི་ཡཾ ཝ་ནྡ་ནྟོ ཙེ་ཏི་ཡེ ག་ནྡྷ་མཱ་ལཾ ཨཱ་རོ་པེ་ནྟོ ཙེ་ཏི་ཡཾ པ་ད་ཀྑི་ཎཾ ཀ་རོ་ནྟོ ཡཾ ཀི་ཉྩི ཏེ་དྷཱ་ཏུ་ཀཾ ཀུ་ས་ལཱ་བྷི་ས་ངྑཱ་རཾ ཨ་བྷི་ས་ངྑ་རོ་ནྟོ ན ག་ཏི་ཧེ་ཏུ ན ཨུ་པ་པ་ཏྟི་ཧེ་ཏུ ན པ་ཊི་ས་ནྡྷི་ཧེ་ཏུ ན བྷ་ཝ་ཧེ་ཏུ ན སཾ་སཱ་ར་ཧེ་ཏུ ན ཝ་ཊྚ་ཧེ་ཏུ, ས་བྦཾ ཏཾ ཝི་སཾ་ཡོ་གཱ་དྷི་པྤཱ་ཡོ ནི་བྦཱ་ན་ནི་ནྣོ ནི་བྦཱ་ན་པོ་ཎོ ནི་བྦཱ་ན་པ་བྦྷཱ་རོ ཨ་བྷི་ས་ངྑ་རོ་ཏཱི་ཏི. ཨེ་ཝ་མྤི ནི་བྦཱ་ན་མ་ན་སོ ན་རོ. ཨ་ཐ ཝཱ ས་བྦ་ས་ངྑཱ་ར་དྷཱ་ཏུ་ཡཱ ཙི་ཏྟཾ པ་ཊི་ཝཱ་པེ་ཏྭཱ [པ་ཊི་ཝཱ་སེ་ཏྭཱ (ཀ.)] ཨ་མ་ཏཱ་ཡ དྷཱ་ཏུ་ཡཱ ཙི་ཏྟཾ ཨུ་པ་སཾ་ཧ་ར་ཏི – ‘‘ཨེ་ཏཾ ས་ནྟཾ ཨེ་ཏཾ པ་ཎཱི་ཏཾ ཡ་དི་དཾ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ན’’ནྟི. ཨེ་ཝ་མྤི ནི་བྦཱ་ན་མ་ན་སོ ན་རོ.
‘‘ན པ་ཎྜི་ཏཱ ཨུ་པ་དྷི་སུ་ཁ་སྶ ཧེ་ཏུ, ད་ད་ནྟི དཱ་ནཱ་ནི པུ་ན་བྦྷ་ཝཱ་ཡ;
ཀཱ་མ་ཉྩ ཏེ ཨུ་པ་དྷི་པ་རི་ཀྑ་ཡཱ་ཡ, ད་ད་ནྟི དཱ་ནཾ ཨ་པུ་ན་བྦྷ་ཝཱ་ཡ.
‘‘ན པ་ཎྜི་ཏཱ ཨུ་པ་དྷི་སུ་ཁ་སྶ ཧེ་ཏུ, བྷཱ་ཝེ་ནྟི ཛྷཱ་ནཱ་ནི པུ་ན་བྦྷ་ཝཱ་ཡ;
ཀཱ་མ་ཉྩ ཏེ ཨུ་པ་དྷི་པ་རི་ཀྑ་ཡཱ་ཡ, བྷཱ་ཝེ་ནྟི ཛྷཱ་ནཾ ཨ་པུ་ན་བྦྷ་ཝཱ་ཡ.
‘‘ཏེ ནི་བྦུ་ཏྟིཾ ཨཱ་སི་ས་མཱ་ན་སཱ [ཨཱ་སིཾ་ས་མཱ་ནཱ (སཱི.), ཨ་བྷི་མཱ་ནཱ (སྱཱ.)] ད་ད་ནྟི, ཏ་ནྣི་ནྣ་ཙི་ཏྟཱ [ཏ་ནྣི་ནྣཱ ཏ་ཉྩི་ཏྟཱ (ཀ.)] ཏ་ད་དྷི་མུ་ཏྟཱ;
ན་ཛྫོ ཡ་ཐཱ སཱ་ག་ར་མ་ཛ྄ཛྷུ་པེ་ཏཱ [སཱ་ག་ར་མ་ཛ྄ཛྷ་ག་ཏཱ (སྱཱ.)], བྷ་ཝ་ནྟི ནི་བྦཱ་ན་པ་རཱ་ཡ་ནཱ ཏེ’’ཏི.
ནི་བྦཱ་ན་མ་ན་སོ ན་རོ. ཏེ་ནཱ་ཧ བྷ་ག་ཝཱ –
‘‘ནི་དྡཾ ཏ་ནྡི ས་ཧེ ཐཱི་ནཾ, པ་མཱ་དེ་ན ན སཾ་ཝ་སེ;
ཨ་ཏི་མཱ་ནེ ན ཏི་ཊྛེ་ཡྻ, ནི་བྦཱ་ན་མ་ན་སོ ན་རོ’’ཏི.
༡༧༨. མོ་ས་ཝ་ཛྫེ ན ནི་ཡྻེ་ཐ, [ནཱི་ཡེ་ཐ (ཀ.)] རཱུ་པེ སྣེ་ཧཾ ན ཀུ་བྦ་ཡེ;
མཱ་ན་ཉྩ པ་རི་ཛཱ་ནེ་ཡྻ, སཱ་ཧ་སཱ ཝི་ར་ཏོ ཙ་རེ.
མོ་ས་ཝ་ཛྫེ ན ནི་ཡྻེ་ཐཱཏི. མོ་ས་ཝ་ཛྫཾ ཝུ་ཙྩ་ཏི མུ་སཱ་ཝཱ་དོ. ཨི་དྷེ་ཀ་ཙྩོ ས་བྷ་གྒ་ཏོ ཝཱ པ་རི་ས་གྒ་ཏོ ཝཱ ཉཱ་ཏི་མ་ཛ྄ཛྷ་ག་ཏོ ཝཱ པཱུ་ག་མ་ཛ྄ཛྷ་ག་ཏོ ཝཱ རཱ་ཛ་ཀུ་ལ་མ་ཛ྄ཛྷ་ག་ཏོ ཝཱ ཨ་བྷི་ནཱི་ཏོ ས་ཀྑི་པུ་ཊྛོ – ‘‘ཨེ་ཧ་མྦྷོ པུ་རི་ས, ཡཾ ཛཱ་ནཱ་སི ཏཾ ཝ་དེ་ཧཱི’’ཏི, སོ ཨ་ཛཱ་ནཾ ཝཱ ཨཱ་ཧ – ‘‘ཛཱ་ནཱ་མཱི’’ཏི, ཛཱ་ནཾ ཝཱ ཨཱ་ཧ – ‘‘ན ཛཱ་ནཱ་མཱི’’ཏི, ཨ་པ་སྶཾ ཝཱ ཨཱ་ཧ – ‘‘པ་སྶཱ་མཱི’’ཏི, པ་སྶཾ ཝཱ ཨཱ་ཧ – ‘‘ན པ་སྶཱ་མཱི’’ཏི. ཨི་ཏི ཨ་ཏྟ་ཧེ་ཏུ ཝཱ པ་ར་ཧེ་ཏུ ཝཱ ཨཱ་མི་ས་ཀི་ཉྩི་ཀྑ་ཧེ་ཏུ ཝཱ ས་མྤ་ཛཱ་ན་མུ་སཱ བྷཱ་སི་ཏཱ ཧོ་ཏི – ཨི་དཾ ཝུ་ཙྩ་ཏི མོ་ས་ཝ་ཛྫཾ. ཨ་པི ཙ ཏཱི་ཧཱ་ཀཱ་རེ་ཧི…པེ… ཙ་ཏཱུ་ཧཱ་ཀཱ་རེ་ཧི… པ་ཉྩ་ཧཱ་ཀཱ་རེ་ཧི… ཚ་ཧཱ་ཀཱ་རེ་ཧི… ས་ཏྟ་ཧཱ་ཀཱ་རེ་ཧི… ཨ་ཊྛ་ཧཱ་ཀཱ་རེ་ཧི…པེ… ཨི་མེ་ཧི ཨ་ཊྛ་ཧཱ་ཀཱ་རེ་ཧི མུ་སཱ་ཝཱ་དོ ཧོ་ཏི. མོ་ས་ཝ་ཛྫེ ན ནི་ཡྻེ་ཐཱཏི. མོ་ས་ཝ་ཛྫེ ན ཡཱ་ཡེ་ཡྻ ན ནི་ཡྻཱ་ཡེ་ཡྻ ན ཝ་ཧེ་ཡྻ ན སཾ་ཧ་རེ་ཡྻ, མོ་ས་ཝ་ཛྫཾ པ་ཛ་ཧེ་ཡྻ ཝི་ནོ་དེ་ཡྻ བྱ་ནྟིཾ ཀ་རེ་ཡྻ ཨ་ན་བྷཱ་ཝཾ ག་མེ་ཡྻ, མོ་ས་ཝ་ཛྫཱ ཨཱ་ར་ཏོ ཨ་སྶ ཝི་ར་ཏོ པ་ཊི་ཝི་ར་ཏོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་རེ་ཡྻཱ་ཏི – མོ་ས་ཝ་ཛྫེ ན ནི་ཡྻེ་ཐ.
རཱུ་པེ སྣེ་ཧཾ ན ཀུ་བྦ་ཡེཏི. རཱུ་པནྟི ཙ་ཏྟཱ་རོ ཙ མ་ཧཱ་བྷཱུ་ཏཱ, ཙ་ཏུ་ནྣ་ཉྩ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ རཱུ་པཾ. རཱུ་པེ སྣེ་ཧཾ ན ཀུ་བྦ་ཡེཏི. རཱུ་པེ སྣེ་ཧཾ ན ཀ་རེ་ཡྻ ཚ་ནྡཾ ན ཀ་རེ་ཡྻ པེ་མཾ ན ཀ་རེ་ཡྻ རཱ་གཾ ན ཀ་རེ་ཡྻ ན ཛ་ནེ་ཡྻ ན ས་ཉྫ་ནེ་ཡྻ ན ནི་བྦ་ཏྟེ་ཡྻ ནཱ་བྷི་ནི་བྦ་ཏྟེ་ཡྻཱ་ཏི – རཱུ་པེ སྣེ་ཧཾ ན ཀུ་བྦ་ཡེ.
མཱ་ན་ཉྩ པ་རི་ཛཱ་ནེ་ཡྻཱཏི. མཱ་ནོཏི ཨེ་ཀ་ཝི་དྷེ་ན མཱ་ནོ – ཡཱ ཙི་ཏྟ་སྶ ཨུ་ནྣ་ཏི. དུ་ཝི་དྷེ་ན མཱ་ནོ – ཨ་ཏྟུ་ཀྐཾ་ས་ན་མཱ་ནོ, པ་ར་ཝ་མྦྷ་ན་མཱ་ནོ. ཏི་ཝི་དྷེ་ན མཱ་ནོ – ‘‘སེ་ཡྻོ་ཧ་མ་སྨཱི’’ཏི མཱ་ནོ, ‘‘ས་དི་སོ་ཧ་མ་སྨཱི’’ཏི མཱ་ནོ, ‘‘ཧཱི་ནོ་ཧ་མ་སྨཱི’’ཏི མཱ་ནོ. ཙ་ཏུ་ཝི་དྷེ་ན མཱ་ནོ – ལཱ་བྷེ་ན མཱ་ནཾ ཛ་ནེ་ཏི, ཡ་སེ་ན མཱ་ནཾ ཛ་ནེ་ཏི, པ་སཾ་སཱ་ཡ མཱ་ནཾ ཛ་ནེ་ཏི, སུ་ཁེ་ན མཱ་ནཾ ཛ་ནེ་ཏི. པ་ཉྩ་ཝི་དྷེ་ན མཱ་ནོ – ‘‘ལཱ་བྷི་མྷི མ་ནཱ་པི་ཀཱ་ནཾ རཱུ་པཱ་ན’’ནྟི མཱ་ནཾ ཛ་ནེ་ཏི, ‘‘ལཱ་བྷི་མྷི མ་ནཱ་པི་ཀཱ་ནཾ ས་དྡཱ་ནཾ…པེ… ག་ནྡྷཱ་ནཾ… ར་སཱ་ནཾ… ཕོ་ཊྛ་བྦཱ་ན’’ནྟི མཱ་ནཾ ཛ་ནེ་ཏི. ཚ་བྦི་དྷེ་ན མཱ་ནོ – ཙ་ཀྑུ་ས་མྤ་དཱ་ཡ མཱ་ནཾ ཛ་ནེ་ཏི, སོ་ཏ་ས་མྤ་དཱ་ཡ…པེ… གྷཱ་ན་ས་མྤ་དཱ་ཡ… ཛི་ཝ྄ཧཱ་ས་མྤ་དཱ་ཡ… ཀཱ་ཡ་ས་མྤ་དཱ་ཡ… མ་ནོ་ས་མྤ་དཱ་ཡ མཱ་ནཾ ཛ་ནེ་ཏི. ས་ཏྟ་ཝི་དྷེ་ན མཱ་ནོ – ཨ་ཏི་མཱ་ནོ, མཱ་ནཱ་ཏི་མཱ་ནོ, ཨོ་མཱ་ནོ, ས་དི་ས་མཱ་ནོ, ཨ་དྷི་མཱ་ནོ, ཨ་སྨི་མཱ་ནོ, མི་ཙྪཱ་མཱ་ནོ. ཨ་ཊྛ་ཝི་དྷེ་ན མཱ་ནོ – ལཱ་བྷེ་ན མཱ་ནཾ ཛ་ནེ་ཏི, ཨ་ལཱ་བྷེ་ན ཨོ་མཱ་ནཾ ཛ་ནེ་ཏི, ཡ་སེ་ན མཱ་ནཾ ཛ་ནེ་ཏི, ཨ་ཡ་སེ་ན ཨོ་མཱ་ནཾ ཛ་ནེ་ཏི, པ་སཾ་སཱ་ཡ མཱ་ནཾ ཛ་ནེ་ཏི, ནི་ནྡཱ་ཡ ཨོ་མཱ་ནཾ ཛ་ནེ་ཏི, སུ་ཁེ་ན མཱ་ནཾ ཛ་ནེ་ཏི, དུ་ཀྑེ་ན ཨོ་མཱ་ནཾ ཛ་ནེ་ཏི. ན་ཝ་ཝི་དྷེ་ན མཱ་ནོ – སེ་ཡྻ་སྶ ‘‘སེ་ཡྻོ་ཧ་མ་སྨཱི’’ཏི མཱ་ནོ, སེ་ཡྻ་སྶ ‘‘ས་དི་སོ་ཧ་མ་སྨཱི’’ཏི མཱ་ནོ, སེ་ཡྻ་སྶ ‘‘ཧཱི་ནོ་ཧ་མ་སྨཱི’’ཏི མཱ་ནོ, ས་དི་ས་སྶ ‘‘སེ་ཡྻོ་ཧ་མ་སྨཱི’’ཏི མཱ་ནོ, ས་དི་ས་སྶ ‘‘ས་དི་སོ་ཧ་མ་སྨཱི’’ཏི མཱ་ནོ, ས་དི་ས་སྶ ‘‘ཧཱི་ནོ་ཧ་མ་སྨཱི’’ཏི མཱ་ནོ, ཧཱི་ན་སྶ ‘‘སེ་ཡྻོ་ཧ་མ་སྨཱི’’ཏི མཱ་ནོ, ཧཱི་ན་སྶ ‘‘ས་དི་སོ་ཧ་མ་སྨཱི’’ཏི མཱ་ནོ, ཧཱི་ན་སྶ ‘‘ཧཱི་ནོ་ཧ་མ་སྨཱི’’ཏི མཱ་ནོ. ད་ས་ཝི་དྷེ་ན མཱ་ནོ – ཨི་དྷེ་ཀ་ཙྩོ མཱ་ནཾ ཛ་ནེ་ཏི ཛཱ་ཏི་ཡཱ ཝཱ གོ་ཏྟེ་ན ཝཱ…པེ… ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ. ཡོ ཨེ་ཝ་རཱུ་པོ མཱ་ནོ མ་ཉྙ་ནཱ མ་ཉྙི་ཏ་ཏྟཾ ཨུ་ནྣ་ཏི ཨུ་ནྣ་མོ དྷ་ཛོ ས་མྤ་གྒཱ་ཧོ ཀེ་ཏུ་ཀ་མྱ་ཏཱ ཙི་ཏྟ་སྶ – ཨ་ཡཾ ཝུ་ཙྩ་ཏི མཱ་ནོ.
མཱ་ན་ཉྩ པ་རི་ཛཱ་ནེ་ཡྻཱཏི. མཱ་ནཾ ཏཱི་ཧི པ་རི་ཉྙཱ་ཧི པ་རི་ཛཱ་ནེ་ཡྻ – ཉཱ་ཏ་པ་རི་ཉྙཱ་ཡ, ཏཱི་ར་ཎ་པ་རི་ཉྙཱ་ཡ, པ་ཧཱ་ན་པ་རི་ཉྙཱ་ཡ. ཀ་ཏ་མཱ ཉཱ་ཏ་པ་རི་ཉྙཱ? མཱ་ནཾ ཛཱ་ནཱ་ཏི ཨ་ཡཾ ཨེ་ཀ་ཝི་དྷེ་ན མཱ་ནོ – ཡཱ ཙི་ཏྟ་སྶ ཨུ་ནྣ་ཏི. ཨ་ཡཾ དུ་ཝི་དྷེ་ན མཱ་ནོ – ཨ་ཏྟུ་ཀྐཾ་ས་ན་མཱ་ནོ པ་ར་ཝ་མྦྷ་ན་མཱ་ནོ…པེ… ཨ་ཡཾ ད་ས་ཝི་དྷེ་ན མཱ་ནོ – ཨི་དྷེ་ཀ་ཙྩོ མཱ་ནཾ ཛ་ནེ་ཏི ཛཱ་ཏི་ཡཱ ཝཱ གོ་ཏྟེ་ན ཝཱ…པེ… ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ་ཏི ཛཱ་ནཱ་ཏི པ་སྶ་ཏི – ཨ་ཡཾ ཉཱ་ཏ་པ་རི་ཉྙཱ.