༡༦. སཱ་རི་པུ་ཏྟ་སུ་ཏྟ་ནི་དྡེ་སོ
ཨ་ཐ སཱ་རི་པུ་ཏྟ་སུ་ཏྟ་ནི་དྡེ་སཾ ཝ་ཀྑ་ཏི –
༡༩༠. ན མེ དི་ཊྛོ ཨི་ཏོ པུ་བྦེ, [ཨི་ཙྩཱ་ཡ་སྨཱ སཱ་རི་པུ་ཏྟོ]
ན སུ་ཏོ ཨུ་ད ཀ་སྶ་ཙི;
ཨེ་ཝཾ ཝ་གྒུ་ཝ་དོ ས་ཏྠཱ, ཏུ་སི་ཏཱ ག་ཎི་མཱ་ག་ཏོ.
ན མེ དི་ཊྛོ ཨི་ཏོ པུ་བྦེཏི. ཨི་ཏོ པུ་བྦེ མེ མ་ཡཱ ན དི་ཊྛ་པུ་བྦོ སོ བྷ་ག་ཝཱ ཨི་མི་ནཱ ཙ་ཀྑུ་ནཱ ཨི་མི་ནཱ ཨ་ཏྟ་བྷཱ་ཝེ་ན. ཡ་དཱ བྷ་ག་ཝཱ ཏཱ་ཝ་ཏིཾ་ས་བྷ་ཝ་ནེ པཱ་རི་ཙྪ་ཏྟ་ཀ་མཱུ་ལེ པ་ཎྜུ་ཀ་མྦ་ལ་སི་ལཱ་ཡཾ ཝ་སྶཾ་ཝུ་ཏྠོ [ཝ་སྶཾ་ཝུ་ཊྛོ (སྱཱ.)] དེ་ཝ་ག་ཎ་པ་རི་ཝུ་ཏོ མ་ཛ྄ཛྷེ མ་ཎི་མ་ཡེ་ན སོ་པཱ་ཎེ་ན ས་ངྐ་སྶ་ན་ག་རཾ ཨོ་ཏི་ཎྞོ ཨི་མཾ ད་སྶ་ནཾ པུ་བྦེ ན དི་ཊྛོ་ཏི – ན མེ དི་ཊྛོ ཨི་ཏོ པུ་བྦེ.
ཨི་ཙྩཱ་ཡ་སྨཱ སཱ་རི་པུ་ཏྟོཏི. ཨི་ཙྩཱཏི པ་ད་ས་ནྡྷི པ་ད་སཾ་ས་གྒོ པ་ད་པཱ་རི་པཱུ་རཱི ཨ་ཀྑ་ར་ས་མ་ཝཱ་ཡོ བྱ་ཉྫ་ན་སི་ལི་ཊྛ་ཏཱ པ་དཱ་ནུ་པུ་བྦ་ཏཱ་པེ་ཏཾ – ཨི་ཙྩཱ་ཏི. ཨཱ་ཡ་སྨཱཏི པི་ཡ་ཝ་ཙ་ནཾ ག་རུ་ཝ་ཙ་ནཾ ས་གཱ་ར་ཝ་ས་པྤ་ཏི་སྶ་ཝ་ཙ་ན་མེ་ཏཾ – ཨཱ་ཡ་སྨཱ་ཏི. སཱ་རི་པུ་ཏྟོཏི ཏ་སྶ ཐེ་ར་སྶ ནཱ་མཾ ས་ངྑཱ ས་མ་ཉྙཱ པ་ཉྙ་ཏྟི ཝོ་ཧཱ་རོ ནཱ་མཾ ནཱ་མ་ཀ་མྨཾ ནཱ་མ་དྷེ་ཡྻཾ ནི་རུ་ཏྟི བྱ་ཉྫ་ནཾ ཨ་བྷི་ལཱ་པོ་ཏི – ཨི་ཙྩཱ་ཡ་སྨཱ སཱ་རི་པུ་ཏྟོ.
ན སུ་ཏོ ཨུ་ད ཀ་སྶ་ཙཱིཏི. ནཱཏི པ་ཊི་ཀྑེ་པོ. ཨུ་དཱཏི པ་ད་ས་ནྡྷི པ་ད་སཾ་ས་གྒོ པ་ད་པཱ་རི་པཱུ་རཱི ཨ་ཀྑ་ར་ས་མ་ཝཱ་ཡོ བྱ་ཉྫ་ན་སི་ལི་ཊྛ་ཏཱ པ་དཱ་ནུ་པུ་བྦ་ཏཱ་པེ་ཏཾ – ཨུ་དཱ་ཏི. ཀ་སྶ་ཙཱིཏི ཁ་ཏྟི་ཡ་སྶ ཝཱ བྲཱ་ཧྨ་ཎ་སྶ ཝཱ ཝེ་སྶ་སྶ ཝཱ སུ་དྡ་སྶ ཝཱ ག་ཧ་ཊྛ་སྶ ཝཱ པ་བྦ་ཛི་ཏ་སྶ ཝཱ དེ་ཝ་སྶ ཝཱ མ་ནུ་སྶ་སྶ ཝཱ་ཏི – ན སུ་ཏོ ཨུ་ད ཀ་སྶ་ཙི.
ཨེ་ཝཾ ཝ་གྒུ་ཝ་དོ ས་ཏྠཱཏི. ཨེ་ཝཾ ཝ་གྒུ་ཝ་དོ མ་དྷུ་ར་ཝ་དོ པེ་མ་ནཱི་ཡ་ཝ་དོ ཧ་ད་ཡ་ངྒ་མ་ཝ་དོ ཀ་ར་ཝཱི་ཀ་རུ་ཏ་མ་ཉྫུ་གྷོ་སོ [ཀ་ར་ཝི་ཀ་རུ་ད་མ་ཉྫུ་སྶ་རོ (སྱཱ.)]. ཨ་ཊྛ་ངྒ་ས་མ་ནྣཱ་ག་ཏོ ཁོ པ་ན ཏ་སྶ བྷ་ག་ཝ་ཏོ མུ་ཁ་ཏོ གྷོ་སོ ནི་ཙྪ་ར་ཏི – ཝི་ས་ཊྛོ ཙ ཝི་ཉྙེ་ཡྻོ ཙ མ་ཉྫུ ཙ ས་ཝ་ནཱི་ཡོ ཙ བི་ནྡུ ཙ ཨ་ཝི་སཱ་རཱི ཙ ག་མྦྷཱི་རོ ཙ ནི་ནྣཱ་དི ཙ. ཡ་ཐཱ པ་རི་སཾ ཁོ པ་ན སོ བྷ་ག་ཝཱ ས་རེ་ན ཝི་ཉྙཱ་པེ་ཏི, ན ཨ་སྶ བ་ཧི་དྡྷཱ པ་རི་སཱ་ཡ གྷོ་སོ ནི་ཙྪ་ར་ཏི, བྲ་ཧྨ་སྶ་རོ ཁོ པ་ན སོ བྷ་ག་ཝཱ ཀ་ར་ཝཱི་ཀ་བྷཱ་ཎཱི་ཏི – ཨེ་ཝཾ ཝ་གྒུ་ཝ་དོ.
ས་ཏྠཱཏི ས་ཏྠཱ བྷ་ག་ཝཱ ས་ཏྠ་ཝཱ་ཧོ. ཡ་ཐཱ ས་ཏྠ་ཝཱ་ཧོ ས་ཏྟེ ཀ་ནྟཱ་རཾ ཏཱ་རེ་ཏི, ཙོ་ར་ཀ་ནྟཱ་རཾ ཏཱ་རེ་ཏི, ཝཱ་ལ༹་ཀ་ནྟཱ་རཾ ཏཱ་རེ་ཏི, དུ་བྦྷི་ཀྑ་ཀ་ནྟཱ་རཾ ཏཱ་རེ་ཏི, ནི་རུ་ད་ཀ་ཀ་ནྟཱ་རཾ ཏཱ་རེ་ཏི ཨུ་ཏྟཱ་རེ་ཏི ནི་ཏྟཱ་རེ་ཏི པ་ཏཱ་རེ་ཏི ཁེ་མ་ནྟ་བྷཱུ་མིཾ ས་མྤཱ་པེ་ཏི; ཨེ་ཝ་མེ་ཝ བྷ་ག་ཝཱ ས་ཏྠ་ཝཱ་ཧོ ས་ཏྟེ ཀ་ནྟཱ་རཾ ཏཱ་རེ་ཏི, ཛཱ་ཏི་ཀ་ནྟཱ་རཾ ཏཱ་རེ་ཏི, ཛ་རཱ་ཀ་ནྟཱ་རཾ ཏཱ་རེ་ཏི, བྱཱ་དྷི་ཀ་ནྟཱ་རཾ…པེ… མ་ར་ཎ་ཀ་ནྟཱ་རཾ… སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་ས་ཀ་ནྟཱ་རཾ ཏཱ་རེ་ཏི རཱ་ག་ཀ་ནྟཱ་རཾ ཏཱ་རེ་ཏི དོ་ས་ཀ་ནྟཱ་རཾ… མོ་ཧ་ཀ་ནྟཱ་རཾ… མཱ་ན་ཀ་ནྟཱ་རཾ… དི་ཊྛི་ཀ་ནྟཱ་རཾ… ཀི་ལེ་ས་ཀ་ནྟཱ་རཾ… དུ་ཙྩ་རི་ཏ་ཀ་ནྟཱ་རཾ ཏཱ་རེ་ཏི, རཱ་ག་ག་ཧ་ནཾ ཏཱ་རེ་ཏི, དོ་ས་ག་ཧ་ནཾ… མོ་ཧ་ག་ཧ་ནཾ… མཱ་ན་ག་ཧ་ནཾ… དི་ཊྛི་ག་ཧ་ནཾ… ཀི་ལེ་ས་ག་ཧ་ནཾ… དུ་ཙྩ་རི་ཏ་ག་ཧ་ནཾ ཏཱ་རེ་ཏི ཨུ་ཏྟཱ་རེ་ཏི ནི་ཏྟཱ་རེ་ཏི པ་ཏཱ་རེ་ཏི ཁེ་མ་ནྟཾ ཨ་མ་ཏཾ ནི་བྦཱ་ནཾ ས་མྤཱ་པེ་ཏཱི་ཏི. ཨེ་ཝ་མྤི བྷ་ག་ཝཱ ས་ཏྠ་ཝཱ་ཧོ.
ཨ་ཐ ཝཱ བྷ་ག་ཝཱ ནེ་ཏཱ ཝི་ནེ་ཏཱ ཨ་ནུ་ནེ་ཏཱ པ་ཉྙ་པེ་ཏཱ ནི་ཛ྄ཛྷཱ་པེ་ཏཱ པེ་ཀྑེ་ཏཱ པ་སཱ་དེ་ཏཱ་ཏི. ཨེ་ཝ་མྤི བྷ་ག་ཝཱ ས་ཏྠ་ཝཱ་ཧོ.
ཨ་ཐ ཝཱ བྷ་ག་ཝཱ ཨ་ནུ་པྤ་ནྣ་སྶ མ་གྒ་སྶ ཨུ་པྤཱ་དེ་ཏཱ, ཨ་ས་ཉྫཱ་ཏ་སྶ མ་གྒ་སྶ ས་ཉྫ་ནེ་ཏཱ, ཨ་ན་ཀྑཱ་ཏ་སྶ མ་གྒ་སྶ ཨ་ཀྑཱ་ཏཱ, མ་གྒ་ཉྙཱུ མ་གྒ་ཝི་དཱུ མ་གྒ་ཀོ་ཝི་དོ མ་གྒཱ་ནུ་གཱ ཙ པ་ན ཨེ་ཏ་ར་ཧི སཱ་ཝ་ཀཱ ཝི་ཧ་ར་ནྟི པ་ཙྪཱ ས་མ་ནྣཱ་ག་ཏཱ་ཏི. ཨེ་ཝ་མྤི བྷ་ག་ཝཱ ས་ཏྠ་ཝཱ་ཧོ་ཏི – ཨེ་ཝཾ ཝ་གྒུ་ཝ་དོ ས་ཏྠཱ.
ཏུ་སི་ཏཱ ག་ཎི་མཱ་ག་ཏོཏི. བྷ་ག་ཝཱ ཏུ་སི་ཏ་ཀཱ་ཡཱ ཙ་ཝི་ཏྭཱ ས་ཏོ ས་མྤ་ཛཱ་ནོ མཱ་ཏུ་ཀུ་ཙྪིཾ ཨོ་ཀྐ་ནྟོ་ཏི. ཨེ་ཝ་མྤི ཏུ་སི་ཏཱ ག་ཎི་མཱ་ག་ཏོ.
ཨ་ཐ ཝཱ དེ་ཝཱ ཝུ་ཙྩ་ནྟི ཏུ་སི་ཏཱ. ཏེ ཏུ་ཊྛཱ ས་ནྟུ་ཊྛཱ ཨ་ཏྟ་མ་ནཱ པ་མུ་དི་ཏཱ པཱི་ཏི་སོ་མ་ན་སྶ་ཛཱ་ཏཱ དེ་ཝ་ལོ་ཀ་ཏོ ག་ཎིཾ ཨཱ་ག་ཏོ་ཏི. ཨེ་ཝ་མྤི ཏུ་སི་ཏཱ ག་ཎི་མཱ་ག་ཏོ. ཨ་ཐ ཝཱ ཨ་ར་ཧ་ནྟོ ཝུ་ཙྩ་ནྟི ཏུ་སི་ཏཱ. ཏེ ཏུ་ཊྛཱ ས་ནྟུ་ཊྛཱ ཨ་ཏྟ་མ་ནཱ པ་རི་པུ་ཎྞ་ས་ངྐ་པྤཱ ཨ་ར་ཧ་ནྟཱ་ནཾ ག་ཎིཾ ཨཱ་ག་ཏོ་ཏི. ཨེ་ཝ་མྤི ཏུ་སི་ཏཱ ག་ཎི་མཱ་ག་ཏོ. ག་ཎཱིཏི ག་ཎཱི བྷ་ག་ཝཱ. ག་ཎཱ་ཙ་རི་ཡོ་ཏི ག་ཎཱི, ག་ཎ་སྶ ས་ཏྠཱ་ཏི ག་ཎཱི, ག་ཎཾ པ་རི་ཧ་ར་ཏཱི་ཏི ག་ཎཱི, ག་ཎཾ ཨོ་ཝ་ད་ཏཱི་ཏི ག་ཎཱི, ག་ཎ་མ་ནུ་སཱ་ས་ཏཱི་ཏི ག་ཎཱི, ཝི་སཱ་ར་དོ ག་ཎཾ ཨུ་པ་ས་ངྐ་མ་ཏཱི་ཏི ག་ཎཱི, ག་ཎ་སྶ [ག་ཎོ་སྶ (སཱི.)] སུ་སྶཱུ་ས་ཏི སོ་ཏཾ ཨོ་ད་ཧ་ཏི ཨ་ཉྙཱ ཙི་ཏྟཾ ཨུ་པ་ཊྛ་པེ་ཏཱི་ཏི ག་ཎཱི, ག་ཎཾ ཨ་ཀུ་ས་ལཱ ཝུ་ཊྛཱ་པེ་ཏྭཱ ཀུ་ས་ལེ པ་ཏི་ཊྛཱ་པེ་ཏཱི་ཏི ག་ཎཱི, བྷི་ཀྑུ་ག་ཎ་སྶ ག་ཎཱི, བྷི་ཀྑུ་ནི་ག་ཎ་སྶ ག་ཎཱི, ཨུ་པཱ་ས་ཀ་ག་ཎ་སྶ ག་ཎཱི, ཨུ་པཱ་སི་ཀཱ་ག་ཎ་སྶ ག་ཎཱི, རཱ་ཛ་ག་ཎ་སྶ ག་ཎཱི, ཁ་ཏྟི་ཡ་ག་ཎ་སྶ… བྲཱ་ཧྨ་ཎ་ག་ཎ་སྶ… ཝེ་སྶ་ག་ཎ་སྶ… སུ་དྡ་ག་ཎ་སྶ… དེ་ཝ་ག་ཎ་སྶ… བྲ་ཧྨ་ག་ཎ་སྶ ག་ཎཱི, ས་ངྒྷཱི ག་ཎཱི ག་ཎཱ་ཙ་རི་ཡོ. ཨཱ་ག་ཏོཏི ཨུ་པ་ག་ཏོ ས་མུ་པ་ག་ཏོ ས་མུ་པ་པ་ནྣོ [ས་མྤ་ཏྟོ (སྱཱ. ཀ.)] ས་ངྐ་སྶ་ན་ག་ར་ནྟི – ཏུ་སི་ཏཱ ག་ཎི་མཱ་ག་ཏོ.
ཏེ་ནཱ་ཧ ཐེ་རོ སཱ་རི་པུ་ཏྟོ –
‘‘ན མེ དི་ཊྛོ ཨི་ཏོ པུ་བྦེ, [ཨི་ཙྩཱ་ཡ་སྨཱ སཱ་རི་པུ་ཏྟོ]
ན སུ་ཏོ ཨུ་ད ཀ་སྶ་ཙི;
ཨེ་ཝཾ ཝ་གྒུ་ཝ་དོ ས་ཏྠཱ, ཏུ་སི་ཏཱ ག་ཎི་མཱ་ག་ཏོ’’ཏི.
༡༩༡. ས་དེ་ཝ་ཀ་སྶ ལོ་ཀ་སྶ, ཡ་ཐཱ དི་སྶ་ཏི ཙ་ཀྑུ་མཱ;
ས་བྦཾ ཏ་མཾ ཝི་ནོ་དེ་ཏྭཱ, ཨེ་ཀོ་ཝ ར་ཏི་མ་ཛ྄ཛྷ་གཱ.
ས་དེ་ཝ་ཀ་སྶ ལོ་ཀ་སྶཱཏི ས་དེ་ཝ་ཀ་སྶ ལོ་ཀ་སྶ ས་མཱ་ར་ཀ་སྶ ས་བྲ་ཧྨ་ཀ་སྶ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡཱ་ཏི – ས་དེ་ཝ་ཀ་སྶ ལོ་ཀ་སྶ.
ཡ་ཐཱ དི་སྶ་ཏི ཙ་ཀྑུ་མཱཏི ཡ་ཐཱ བྷ་ག་ཝ་ནྟཾ ཏཱ་ཝ་ཏིཾ་ས་བྷ་ཝ་ནེ པཱ་རི་ཙྪ་ཏྟ་ཀ་མཱུ་ལེ པ་ཎྜུ་ཀ་མྦ་ལ་སི་ལཱ་ཡཾ ནི་སི་ནྣཾ དྷ་མྨཾ དེ་སེ་ནྟཾ དེ་ཝ་ཏཱ པ་སྶ་ནྟི ཏ་ཐཱ མ་ནུ་སྶཱ པ་སྶ་ནྟི. ཡ་ཐཱ མ་ནུ་སྶཱ པ་སྶ་ནྟི ཏ་ཐཱ དེ་ཝ་ཏཱ པ་སྶ་ནྟི. ཡ་ཐཱ དེ་ཝཱ་ནཾ དི་སྶ་ཏི ཏ་ཐཱ མ་ནུ་སྶཱ་ནཾ དི་སྶ་ཏི. ཡ་ཐཱ མ་ནུ་སྶཱ་ནཾ དི་སྶ་ཏི ཏ་ཐཱ དེ་ཝཱ་ནཾ དི་སྶ་ཏཱི་ཏི. ཨེ་ཝ་མྤི ཡ་ཐཱ དི་སྶ་ཏི ཙ་ཀྑུ་མཱ. ཡ་ཐཱ ཝཱ པ་ནེ་ཀེ བྷོ་ནྟོ ས་མ་ཎ་བྲཱ་ཧྨ་ཎཱ ཨ་ད་ནྟཱ ད་ནྟ་ཝ་ཎྞེ་ན དི་སྶ་ནྟི, ཨ་ས་ནྟཱ ས་ནྟ་ཝ་ཎྞེ་ན དི་སྶ་ནྟི, ཨ་ནུ་པ་ས་ནྟཱ ཨུ་པ་ས་ནྟ་ཝ་ཎྞེ་ན དི་སྶ་ནྟི, ཨ་ནི་བྦུ་ཏཱ ནི་བྦུ་ཏ་ཝ་ཎྞེ་ན དི་སྶ་ནྟི.
‘‘པ་ཏི་རཱུ་པ་ཀོ མ་ཏྟི་ཀཱ་ཀུ་ཎྜ་ལོ་ཝ, ལོ་ཧ་ཌྜྷ་མཱ་སོ་ཝ [ལོ་ཧ་མཱ་སོ་ཝ (སྱཱ.)] སུ་ཝ་ཎྞ་ཚ་ནྣོ;
ཙ་ར་ནྟི ལོ་ཀེ པ་རི་ཝཱ་ར་ཚ་ནྣཱ, ཨ་ནྟོ ཨ་སུ་དྡྷཱ བ་ཧི སོ་བྷ་མཱ་ནཱ’’ཏི [ཨ་ཡཾ གཱ་ཐཱ སཾ. ནི. ༡.༡༢༢ དི་སྶ་ཏི].
ན བྷ་ག་ཝཱ ཨེ་ཝཾ དི་སྶ་ཏི. བྷ་ག་ཝཱ བྷཱུ་ཏེ་ན ཏ་ཙྪེ་ན ཏ་ཐེ་ན ཡཱ་ཐཱ་ཝེ་ན ཨ་ཝི་པ་རཱི་ཏེ་ན ས་བྷཱ་ཝེ་ན ད་ནྟོ ད་ནྟ་ཝ་ཎྞེ་ན དི་སྶ་ཏི, ས་ནྟོ ས་ནྟ་ཝ་ཎྞེ་ན དི་སྶ་ཏི, ཨུ་པ་ས་ནྟོ ཨུ་པ་ས་ནྟ་ཝ་ཎྞེ་ན དི་སྶ་ཏི, ནི་བྦུ་ཏོ ནི་བྦུ་ཏ་ཝ་ཎྞེ་ན དི་སྶ་ཏི, ཨ་ཀ་པྤི་ཏ་ཨི་རི་ཡཱ་པ་ཐཱ ཙ བུ་དྡྷཱ བྷ་ག་ཝ་ནྟོ པ་ཎི་དྷི་ས་མྤ་ནྣཱ་ཏི. ཨེ་ཝ་མྤི ཡ་ཐཱ དི་སྶ་ཏི ཙ་ཀྑུ་མཱ.
ཨ་ཐ ཝཱ བྷ་ག་ཝཱ ཝི་སུ་དྡྷ་ས་དྡོ ག་ཏ་ཀི་ཏྟི་ས་དྡ་སི་ལོ་ཀོ [བྷ་ཊ་ཀི་ཏྟི་ས་དྡ་སི་ལོ་ཀོ (སྱཱ.)] ནཱ་ག་བྷ་ཝ་ནེ ཙ སུ་པ་ཎྞ་བྷ་ཝ་ནེ ཙ ཡ་ཀྑ་བྷ་ཝ་ནེ ཙ ཨ་སུ་ར་བྷ་ཝ་ནེ ཙ ག་ནྡྷ་བྦ་བྷ་ཝ་ནེ ཙ མ་ཧཱ་རཱ་ཛ་བྷ་ཝ་ནེ ཙ ཨི་ནྡ་བྷ་ཝ་ནེ ཙ བྲ་ཧྨ་བྷ་ཝ་ནེ ཙ དེ་ཝ་བྷ་ཝ་ནེ ཙ ཨེ་དི་སོ ཙ ཏཱ་དི་སོ ཙ ཏ་ཏོ ཙ བྷི་ཡྻོ་ཏི. ཨེ་ཝ་མྤི ཡ་ཐཱ དི་སྶ་ཏི ཙ་ཀྑུ་མཱ.
ཨ་ཐ ཝཱ བྷ་ག་ཝཱ ད་ས་ཧི བ་ལེ་ཧི ས་མ་ནྣཱ་ག་ཏོ, ཙ་ཏཱུ་ཧི ཝེ་སཱ་ར་ཛྫེ་ཧི, ཙ་ཏཱུ་ཧི པ་ཊི་ས་མྦྷི་དཱ་ཧི, ཚ་ཧི ཨ་བྷི་ཉྙཱ་ཧི, ཚ་ཧི བུ་དྡྷ་དྷ་མྨེ་ཧི, ཏེ་ཛེ་ན ཙ བ་ལེ་ན ཙ གུ་ཎེ་ན ཙ ཝཱི་རི་ཡེ་ན ཙ པ་ཉྙཱ་ཡ ཙ དི་སྶ་ཏི ཉཱ་ཡ་ཏི པ་ཉྙཱ་ཡ་ཏི.
‘‘དཱུ་རེ ས་ནྟོ པ་ཀཱ་སེ་ནྟི, ཧི་མ་ཝ་ནྟོ་ཝ པ་བྦ་ཏོ;
ཨ་ས་ནྟེ་ཏྠ ན དི་སྶ་ནྟི, ར་ཏྟིཾ ཁི་ཏྟཱ [ར་ཏྟི་ཁི་ཏྟཱ (སཱི.) དྷ. པ. ༣༠༤] ཡ་ཐཱ ས་རཱ’’ཏི.
ཨེ་ཝ་མྤི ཡ་ཐཱ དི་སྶ་ཏི ཙ་ཀྑུ་མཱ.
ཙ་ཀྑུ་མཱཏི བྷ་ག་ཝཱ པ་ཉྩ་ཧི ཙ་ཀྑཱུ་ཧི ཙ་ཀྑུ་མཱ – མཾ་ས་ཙ་ཀྑུ་ནཱ་པི ཙ་ཀྑུ་མཱ, དི་བྦ་ཙ་ཀྑུ་ནཱ་པི ཙ་ཀྑུ་མཱ, པ་ཉྙཱ་ཙ་ཀྑུ་ནཱ་པི ཙ་ཀྑུ་མཱ, བུ་དྡྷ་ཙ་ཀྑུ་ནཱ་པི ཙ་ཀྑུ་མཱ, ས་མ་ནྟ་ཙ་ཀྑུ་ནཱ་པི ཙ་ཀྑུ་མཱ.
ཀ་ཐཾ བྷ་ག་ཝཱ མཾ་ས་ཙ་ཀྑུ་ནཱ་པི ཙ་ཀྑུ་མཱ? མཾ་ས་ཙ་ཀྑུ་མྷི བྷ་ག་ཝ་ཏོ པ་ཉྩ ཝ་ཎྞཱ སཾ་ཝི་ཛྫ་ནྟི – ནཱི་ལོ ཙ ཝ་ཎྞོ, པཱི་ཏ་ཀོ ཙ ཝ་ཎྞོ, ལོ་ཧི་ཏ་ཀོ ཙ ཝ་ཎྞོ, ཀ་ཎྷོ ཙ ཝ་ཎྞོ, ཨོ་དཱ་ཏོ ཙ ཝ་ཎྞོ. ཨ་ཀྑི་ལོ་མཱ་ནི ཙ བྷ་ག་ཝ་ཏོ. ཡ་ཏྠ ཙ ཨ་ཀྑི་ལོ་མཱ་ནི པ་ཏི་ཊྛི་ཏཱ་ནི ཏཾ ནཱི་ལཾ ཧོ་ཏི སུ་ནཱི་ལཾ པཱ་སཱ་དི་ཀཾ ད་སྶ་ནེ་ཡྻཾ ཨུ་མཱ་པུ་པྥ་ས་མཱ་ནཾ. ཏ་སྶ པ་ར་ཏོ པཱི་ཏ་ཀཾ ཧོ་ཏི སུ་པཱི་ཏ་ཀཾ སུ་ཝ་ཎྞ་ཝ་ཎྞཾ པཱ་སཱ་དི་ཀཾ ད་སྶ་ནེ་ཡྻཾ ཀ་ཎི་ཀཱ་ར་པུ་པྥ་ས་མཱ་ནཾ. ཨུ་བྷ་ཏོ ཨ་ཀྑི་ཀཱུ་ཊཱ་ནི བྷ་ག་ཝ་ཏོ ལོ་ཧི་ཏ་ཀཱ་ནི ཧོ་ནྟི སུ་ལོ་ཧི་ཏ་ཀཱ་ནི པཱ་སཱ་དི་ཀཱ་ནི ད་སྶ་ནེ་ཡྻཱ་ནི ཨི་ནྡ་གོ་པ་ཀ་ས་མཱ་ནཱ་ནི. མ་ཛ྄ཛྷེ ཀ་ཎྷཾ ཧོ་ཏི སུ་ཀ་ཎྷཾ ཨ་ལཱུ་ཁཾ སུ་དྡྷཾ པཱ་སཱ་དི་ཀཾ ད་སྶ་ནེ་ཡྻཾ ཨ་དྡཱ་རི་ཊྛ་ཀ་ས་མཱ་ནཾ. ཏ་སྶ པ་ར་ཏོ ཨོ་དཱ་ཏཾ ཧོ་ཏི སུ་ཨོ་དཱ་ཏཾ སེ་ཏཾ པ་ཎྜ་རཾ པཱ་སཱ་དི་ཀཾ ད་སྶ་ནེ་ཡྻཾ ཨོ་ས་དྷི་ཏཱ་ར་ཀ་ས་མཱ་ནཾ. ཏེ་ན བྷ་ག་ཝཱ པཱ་ཀ་ཏི་ཀེ་ན མཾ་ས་ཙ་ཀྑུ་ནཱ ཨ་ཏྟ་བྷཱ་ཝ་པ་རི་ཡཱ་པ་ནྣེ་ན པུ་རི་མ་སུ་ཙ་རི་ཏ་ཀ་མྨཱ་བྷི་ནི་བྦ་ཏྟེ་ན ས་མ་ནྟཱ ཡོ་ཛ་ནཾ པ་སྶ་ཏི དི་ཝཱ ཙེ་ཝ ར་ཏྟི་ཉྩ. ཡ་དཱ་པི ཙ་ཏུ་ར་ངྒ་ས་མ་ནྣཱ་ག་ཏོ ཨ་ནྡྷ་ཀཱ་རོ ཧོ་ཏི སཱུ་རི་ཡོ ཙ ཨ་ཏྠ་ངྒ་ཏོ ཧོ་ཏི; ཀཱ་ལ༹་པ་ཀྑོ ཙ ཨུ་པོ་ས་ཐོ ཧོ་ཏི, ཏི་བྦོ ཙ ཝ་ན་ས་ཎྜོ ཧོ་ཏི, མ་ཧཱ ཙ ཀཱ་ལ༹་མེ་གྷོ ཨ་བྦྷུ་ཊྛི་ཏོ ཧོ་ཏི. ཨེ་ཝ་རཱུ་པེ་པི ཙ་ཏུ་ར་ངྒ་ས་མ་ནྣཱ་ག་ཏེ ཨ་ནྡྷ་ཀཱ་རེ ས་མ་ནྟཱ ཡོ་ཛ་ནཾ པ་སྶ་ཏི. ན་ཏྠི སོ ཀུ་ཊྚོ ཝཱ ཀ་ཝཱ་ཊཾ ཝཱ པཱ་ཀཱ་རོ ཝཱ པ་བྦ་ཏོ ཝཱ ག་ཙྪོ ཝཱ ལ་ཏཱ ཝཱ ཨཱ་ཝ་ར་ཎཾ རཱུ་པཱ་ནཾ ད་སྶ་ནཱ་ཡ. ཨེ་ཀ་ཉྩེ ཏི་ལ་ཕ་ལཾ ནི་མི་ཏྟཾ ཀ་ཏྭཱ ཏི་ལ་ཝཱ་ཧེ པ་ཀྑི་པེ་ཡྻ, ཏ་ཉྙེ་ཝ ཏི་ལ་ཕ་ལཾ ཨུ་དྡྷ་རེ་ཡྻ. ཨེ་ཝཾ པ་རི་སུ་དྡྷཾ བྷ་ག་ཝ་ཏོ པཱ་ཀ་ཏི་ཀ་མཾ་ས་ཙ་ཀྑུ. ཨེ་ཝཾ བྷ་ག་ཝཱ མཾ་ས་ཙ་ཀྑུ་ནཱ་པི ཙ་ཀྑུ་མཱ.
ཀ་ཐཾ བྷ་ག་ཝཱ དི་བྦེ་ན ཙ་ཀྑུ་ནཱ་པི ཙ་ཀྑུ་མཱ? བྷ་ག་ཝཱ དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶ་ཏི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ; ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་ཏི – ‘‘ཨི་མེ ཝ་ཏ བྷོ་ནྟོ ས་ཏྟཱ ཀཱ་ཡ་དུ་ཙྩ་རི་ཏེ་ན ས་མ་ནྣཱ་ག་ཏཱ ཝ་ཙཱི་དུ་ཙྩ་རི་ཏེ་ན ས་མ་ནྣཱ་ག་ཏཱ མ་ནོ་དུ་ཙྩ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨུ་པ་ཝཱ་ད་ཀཱ མི་ཙྪཱ་དི་ཊྛི་ཀཱ མི་ཙྪཱ་དི་ཊྛི་ཀ་མྨ་ས་མཱ་དཱ་ནཱ, ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཱ; ཨི་མེ ཝཱ པ་ན བྷོ་ནྟོ ས་ཏྟཱ ཀཱ་ཡ་སུ་ཙ་རི་ཏེ་ན ས་མ་ནྣཱ་ག་ཏཱ ཝ་ཙཱི་སུ་ཙ་རི་ཏེ་ན ས་མ་ནྣཱ་ག་ཏཱ མ་ནོ་སུ་ཙ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨ་ནུ་པ་ཝཱ་ད་ཀཱ ས་མྨཱ་དི་ཊྛི་ཀཱ ས་མྨཱ་དི་ཊྛི་ཀ་མྨ་ས་མཱ་དཱ་ནཱ, ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ’’ཏི. ཨི་ཏི དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶ་ཏི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ; ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་ཏི. ཨཱ་ཀ་ངྑ་མཱ་ནོ ཙ བྷ་ག་ཝཱ ཨེ་ཀ་མྤི ལོ་ཀ་དྷཱ་ཏུཾ པ་སྶེ་ཡྻ, དྭེ་པི ལོ་ཀ་དྷཱ་ཏུ་ཡོ པ་སྶེ་ཡྻ, ཏི་སྶོ་པི ལོ་ཀ་དྷཱ་ཏུ་ཡོ པ་སྶེ་ཡྻ, ཙ་ཏ་སྶོ་པི ལོ་ཀ་དྷཱ་ཏུ་ཡོ པ་སྶེ་ཡྻ, པ་ཉྩ་པི ལོ་ཀ་དྷཱ་ཏུ་ཡོ པ་སྶེ་ཡྻ, ད་ས་པི ལོ་ཀ་དྷཱ་ཏུ་ཡོ པ་སྶེ་ཡྻ, ཝཱི་ས་མྤི [ཝཱི་ས་ཏི་མྤི (སཱི.)] ལོ་ཀ་དྷཱ་ཏུ་ཡོ པ་སྶེ་ཡྻ, ཏིཾ་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, ཙ་ཏྟཱ་ལཱི་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, པ་ཉྙཱ་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, ས་ཏ་མྤི ལོ་ཀ་དྷཱ་ཏུཾ པ་སྶེ་ཡྻ, ས་ཧ་སྶི་མྤི ཙཱུ་ལ༹་ནི་ཀཾ ལོ་ཀ་དྷཱ་ཏུཾ པ་སྶེ་ཡྻ, དྭི་ས་ཧ་སྶི་མྤི མ་ཛ྄ཛྷི་མི་ཀཾ ལོ་ཀ་དྷཱ་ཏུཾ པ་སྶེ་ཡྻ, ཏི་ས་ཧ་སྶི་མྤི ལོ་ཀ་དྷཱ་ཏུཾ པ་སྶེ་ཡྻ, མ་ཧཱ་ས་ཧ་སྶི་མྤི ལོ་ཀ་དྷཱ་ཏུཾ པ་སྶེ་ཡྻ, ཡཱ་ཝ་ཏ་ཀཾ པ་ན ཨཱ་ཀ་ངྑེ་ཡྻ ཏཱ་ཝ་ཏ་ཀཾ པ་སྶེ་ཡྻ. ཨེ་ཝཾ པ་རི་སུ་དྡྷཾ བྷ་ག་ཝ་ཏོ དི་བྦ་ཙ་ཀྑུ. ཨེ་ཝཾ བྷ་ག་ཝཱ དི་བྦེ་ན ཙ་ཀྑུ་ནཱ་པི ཙ་ཀྑུ་མཱ.
ཀ་ཐཾ བྷ་ག་ཝཱ པ་ཉྙཱ་ཙ་ཀྑུ་ནཱ་པི ཙ་ཀྑུ་མཱ? བྷ་ག་ཝཱ མ་ཧཱ་པ་ཉྙོ པུ་ཐུ་པ་ཉྙོ ཧཱ་ས་པ་ཉྙོ ཛ་ཝ་ན་པ་ཉྙོ ཏི་ཀྑ་པ་ཉྙོ ནི་བྦེ་དྷི་ཀ་པ་ཉྙོ པ་ཉྙཱ་པ་བྷེ་ད་ཀུ་ས་ལོ པ་བྷི་ནྣ་ཉཱ་ཎོ ཨ་དྷི་ག་ཏ་པ་ཊི་ས་མྦྷི་དོ ཙ་ཏུ་ཝེ་སཱ་ར་ཛྫ་པྤ་ཏྟོ ད་ས་བ་ལ་དྷཱ་རཱི པུ་རི་སཱ་ས་བྷོ པུ་རི་ས་སཱི་ཧོ པུ་རི་ས་ནཱ་གོ པུ་རི་སཱ་ཛ་ཉྙོ པུ་རི་ས་དྷོ་ར་ཡ྄ཧོ ཨ་ན་ནྟ་ཉཱ་ཎོ ཨ་ན་ནྟ་ཏེ་ཛོ ཨ་ན་ནྟ་ཡ་སོ ཨ་ཌྜྷོ མ་ཧ་དྡྷ་ནོ དྷ་ན་ཝཱ ནེ་ཏཱ ཝི་ནེ་ཏཱ ཨ་ནུ་ནེ་ཏཱ པ་ཉྙ་པེ་ཏཱ ནི་ཛ྄ཛྷཱ་པེ་ཏཱ པེ་ཀྑེ་ཏཱ པ་སཱ་དེ་ཏཱ. སོ ཧི བྷ་ག་ཝཱ ཨ་ནུ་པྤ་ནྣ་སྶ མ་གྒ་སྶ ཨུ་པྤཱ་དེ་ཏཱ, ཨ་ས་ཉྫཱ་ཏ་སྶ མ་གྒ་སྶ ས་ཉྫ་ནེ་ཏཱ, ཨ་ན་ཀྑཱ་ཏ་སྶ མ་གྒ་སྶ ཨ་ཀྑཱ་ཏཱ, མ་གྒ་ཉྙཱུ མ་གྒ་ཝི་དཱུ མ་གྒ་ཀོ་ཝི་དོ མ་གྒཱ་ནུ་གཱ ཙ པ་ན ཨེ་ཏ་ར་ཧི སཱ་ཝ་ཀཱ ཝི་ཧ་ར་ནྟི པ་ཙྪཱ ས་མ་ནྣཱ་ག་ཏཱ.
སོ ཧི བྷ་ག་ཝཱ ཛཱ་ནཾ ཛཱ་ནཱ་ཏི, པ་སྶཾ པ་སྶ་ཏི, ཙ་ཀྑུ་བྷཱུ་ཏོ ཉཱ་ཎ་བྷཱུ་ཏོ དྷ་མྨ་བྷཱུ་ཏོ བྲ་ཧྨ་བྷཱུ་ཏོ ཝ་ཏྟཱ པ་ཝ་ཏྟཱ ཨ་ཏྠ་སྶ ནི་ནྣེ་ཏཱ ཨ་མ་ཏ་སྶ དཱ་ཏཱ དྷ་མྨ་སྶཱ་མཱི ཏ་ཐཱ་ག་ཏོ. ན་ཏྠི ཏ་སྶ བྷ་ག་ཝ་ཏོ ཨ་ཉྙཱ་ཏཾ ཨ་དི་ཊྛཾ ཨ་ཝི་དི་ཏཾ ཨ་ས་ཙྪི་ཀ་ཏཾ ཨ་ཕ་སྶི་ཏཾ པ་ཉྙཱ་ཡ. ཨ་ཏཱི་ཏཾ ཨ་ནཱ་ག་ཏཾ པ་ཙྩུ་པྤ་ནྣཾ ཨུ་པཱ་དཱ་ཡ ས་བྦེ དྷ་མྨཱ ས་བྦཱ་ཀཱ་རེ་ན བུ་དྡྷ་སྶ བྷ་ག་ཝ་ཏོ ཉཱ་ཎ་མུ་ཁེ ཨཱ་པཱ་ཐཾ ཨཱ་ག་ཙྪ་ནྟི. ཡཾ ཀི་ཉྩི ནེ་ཡྻཾ ནཱ་མ ཨ་ཏྠི ཛཱ་ནི་ཏ་བྦཾ [ཨ་ཏྠི དྷ་མྨཾ ཛཱ་ནི་ཏ་བྦཾ (ཀ.) མ་ཧཱ་ནི. ༡༥༦] ཨ་ཏྟ་ཏྠོ ཝཱ, པ་ར་ཏྠོ ཝཱ, ཨུ་བྷ་ཡ་ཏྠོ ཝཱ, དི་ཊྛ་དྷ་མྨི་ཀོ ཝཱ ཨ་ཏྠོ, ས་མྤ་རཱ་ཡི་ཀོ ཝཱ ཨ་ཏྠོ, ཨུ་ཏྟཱ་ནོ ཝཱ ཨ་ཏྠོ, ག་མྦྷཱི་རོ ཝཱ ཨ་ཏྠོ, གཱུ་ལ༹ྷོ ཝཱ ཨ་ཏྠོ, པ་ཊི་ཙྪ་ནྣོ ཝཱ ཨ་ཏྠོ, ནེ་ཡྻོ ཝཱ ཨ་ཏྠོ, ནཱི་ཏོ ཝཱ ཨ་ཏྠོ, ཨ་ན་ཝ་ཛྫོ ཝཱ ཨ་ཏྠོ, ནི་ཀྐི་ལེ་སོ ཝཱ ཨ་ཏྠོ, ཝོ་དཱ་ནོ ཝཱ ཨ་ཏྠོ, པ་ར་མ་ཏྠོ ཝཱ ཨ་ཏྠོ, ས་བྦཾ ཏཾ ཨ་ནྟོ་བུ་དྡྷ་ཉཱ་ཎེ པ་རི་ཝ་ཏྟ་ཏི.
ཨ་ཏཱི་ཏེ བུ་དྡྷ་སྶ བྷ་ག་ཝ་ཏོ ཨ་པྤ་ཊི་ཧ་ཏཾ ཉཱ་ཎཾ, ཨ་ནཱ་ག་ཏེ ཨ་པྤ་ཊི་ཧ་ཏཾ ཉཱ་ཎཾ, པ་ཙྩུ་པྤ་ནྣེ ཨ་པྤ་ཊི་ཧ་ཏཾ ཉཱ་ཎཾ. ས་བྦཾ ཀཱ་ཡ་ཀ་མྨཾ བུ་དྡྷ་སྶ བྷ་ག་ཝ་ཏོ ཉཱ་ཎཱ་ནུ་པ་རི་ཝ་ཏྟི. ས་བྦཾ ཝ་ཙཱི་ཀ་མྨཾ… ས་བྦཾ མ་ནོ་ཀ་མྨཾ བུ་དྡྷ་སྶ བྷ་ག་ཝ་ཏོ ཉཱ་ཎཱ་ནུ་པ་རི་ཝ་ཏྟི. ཡཱ་ཝ་ཏ་ཀཾ ནེ་ཡྻཾ ཏཱ་ཝ་ཏ་ཀཾ ཉཱ་ཎཾ, ཡཱ་ཝ་ཏ་ཀཾ ཉཱ་ཎཾ ཏཱ་ཝ་ཏ་ཀཾ ནེ་ཡྻཾ; ནེ་ཡྻ་པ་རི་ཡ་ནྟི་ཀཾ ཉཱ་ཎཾ, ཉཱ་ཎ་པ་རི་ཡ་ནྟི་ཀཾ ནེ་ཡྻཾ; ནེ་ཡྻཾ ཨ་ཏི་ཀྐ་མི་ཏྭཱ ཉཱ་ཎཾ ན་པྤ་ཝ་ཏྟ་ཏི, ཉཱ་ཎཾ ཨ་ཏི་ཀྐ་མི་ཏྭཱ ནེ་ཡྻ་པ་ཐོ ན་ཏྠི; ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ ཏེ དྷ་མྨཱ. ཡ་ཐཱ དྭི་ནྣཾ ས་མུ་གྒ་པ་ཊ་ལཱ་ནཾ ས་མྨཱ་ཕུ་སི་ཏཱ་ནཾ ཧེ་ཊྛི་མཾ ས་མུ་གྒ་པ་ཊ་ལཾ ཨུ་པ་རི་མཾ ནཱ་ཏི་ཝ་ཏྟ་ཏི, ཨུ་པ་རི་མཾ ས་མུ་གྒ་པ་ཊ་ལཾ ཧེ་ཊྛི་མཾ ནཱ་ཏི་ཝ་ཏྟ་ཏི, ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ; ཨེ་ཝ་མེ་ཝཾ བུ་དྡྷ་སྶ བྷ་ག་ཝ་ཏོ ནེ་ཡྻ་ཉྩ ཉཱ་ཎ་ཉྩ ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ. ཡཱ་ཝ་ཏ་ཀཾ ནེ་ཡྻཾ ཏཱ་ཝ་ཏ་ཀཾ ཉཱ་ཎཾ, ཡཱ་ཝ་ཏ་ཀཾ ཉཱ་ཎཾ ཏཱ་ཝ་ཏ་ཀཾ ནེ་ཡྻཾ, ནེ་ཡྻ་པ་རི་ཡ་ནྟི་ཀཾ ཉཱ་ཎཾ, ཉཱ་ཎ་པ་རི་ཡ་ནྟི་ཀཾ ནེ་ཡྻཾ; ནེ་ཡྻཾ ཨ་ཏི་ཀྐ་མི་ཏྭཱ ཉཱ་ཎཾ ན པ་ཝ་ཏྟ་ཏི, ཉཱ་ཎཾ ཨ་ཏི་ཀྐ་མི་ཏྭཱ ནེ་ཡྻ་པ་ཐོ ན་ཏྠི; ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ ཏེ དྷ་མྨཱ.
ས་བྦ་དྷ་མྨེ་སུ བུ་དྡྷ་སྶ བྷ་ག་ཝ་ཏོ ཉཱ་ཎཾ པ་ཝ་ཏྟ་ཏི. ས་བྦེ དྷ་མྨཱ བུ་དྡྷ་སྶ བྷ་ག་ཝ་ཏོ ཨཱ་ཝ་ཛྫ་ན་པ་ཊི་བ་དྡྷཱ ཨཱ་ཀ་ངྑ་པ་ཊི་བ་དྡྷཱ མ་ན་སི་ཀཱ་ར་པ་ཊི་བ་དྡྷཱ ཙི་ཏྟུ་པྤཱ་ད་པ་ཊི་བ་དྡྷཱ. ས་བྦ་ས་ཏྟེ་སུ བུ་དྡྷ་སྶ བྷ་ག་ཝ་ཏོ ཉཱ་ཎཾ པ་ཝ་ཏྟ་ཏི. ས་བྦེ་སཾ ས་ཏྟཱ་ནཾ བྷ་ག་ཝཱ ཨཱ་ས་ཡཾ ཛཱ་ནཱ་ཏི, ཨ་ནུ་ས་ཡཾ ཛཱ་ནཱ་ཏི, ཙ་རི་ཏཾ ཛཱ་ནཱ་ཏི, ཨ་དྷི་མུ་ཏྟིཾ ཛཱ་ནཱ་ཏི, ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ བྷ་བྦཱ་བྷ་བྦེ ས་ཏྟེ པ་ཛཱ་ནཱ་ཏི. ས་དེ་ཝ་ཀོ ལོ་ཀོ ས་མཱ་ར་ཀོ ས་བྲ་ཧྨ་ཀོ ས་སྶ་མ་ཎ་བྲཱ་ཧྨ་ཎཱི པ་ཛཱ ས་དེ་ཝ་མ་ནུ་སྶཱ ཨ་ནྟོ་བུ་དྡྷ་ཉཱ་ཎེ པ་རི་ཝ་ཏྟ་ཏི.
ཡ་ཐཱ ཡེ ཀེ་ཙི མ་ཙྪ་ཀ་ཙྪ་པཱ ཨ་ནྟ་མ་སོ ཏི་མི་ཏི་མི་ངྒ་ལཾ ཨུ་པཱ་དཱ་ཡ ཨ་ནྟོ་མ་ཧཱ་ས་མུ་དྡེ པ་རི་ཝ་ཏྟ་ནྟི; ཨེ་ཝ་མེ་ཝ ས་དེ་ཝ་ཀོ ལོ་ཀོ ས་མཱ་ར་ཀོ ས་བྲ་ཧྨ་ཀོ ས་སྶ་མ་ཎ་བྲཱ་ཧྨ་ཎཱི པ་ཛཱ ས་དེ་ཝ་མ་ནུ་སྶཱ ཨ་ནྟོ་བུ་དྡྷ་ཉཱ་ཎེ པ་རི་ཝ་ཏྟ་ཏི. ཡ་ཐཱ ཡེ ཀེ་ཙི པ་ཀྑཱི ཨ་ནྟ་མ་སོ ག་རུ་ལ༹ཾ ཝེ་ན་ཏེ་ཡྻཾ ཨུ་པཱ་དཱ་ཡ ཨཱ་ཀཱ་ས་སྶ པ་དེ་སེ པ་རི་ཝ་ཏྟ་ནྟི; ཨེ་ཝ་མེ་ཝ ཡེ་པི ཏེ སཱ་རི་པུ་ཏྟ་ས་མཱ པ་ཉྙཱ་ཡ ཏེ་པི བུ་དྡྷ་ཉཱ་ཎ་སྶ པ་དེ་སེ པ་རི་ཝ་ཏྟ་ནྟི; བུ་དྡྷ་ཉཱ་ཎཾ དེ་ཝ་མ་ནུ་སྶཱ་ནཾ པ་ཉྙཾ ཕ་རི་ཏྭཱ ཨ་བྷི་བྷ་ཝི་ཏྭཱ ཏི་ཊྛ་ཏི. ཡེ་པི ཏེ ཁ་ཏྟི་ཡ་པ་ཎྜི་ཏཱ བྲཱ་ཧྨ་ཎ་པ་ཎྜི་ཏཱ ག་ཧ་པ་ཏི་པ་ཎྜི་ཏཱ ས་མ་ཎ་པ་ཎྜི་ཏཱ ནི་པུ་ཎཱ ཀ་ཏ་པ་ར་པྤ་ཝཱ་དཱ ཝཱ་ལ་ཝེ་དྷི་རཱུ་པཱ ཝོ་བྷི་ནྡ་ནྟཱ མ་ཉྙེ ཙ་ར་ནྟི པ་ཉྙཱ་ག་ཏེ་ན དི་ཊྛི་ག་ཏཱ་ནི, ཏེ པ་ཉྷེ ཨ་བྷི་ས་ངྑ་རི་ཏྭཱ ཨ་བྷི་ས་ངྑ་རི་ཏྭཱ ཏ་ཐཱ་ག་ཏཾ ཨུ་པ་ས་ངྐ་མི་ཏྭཱ པུ་ཙྪ་ནྟི གཱུ་ལ༹ྷཱ་ནི ཙ པ་ཊི་ཙྪ་ནྣཱ་ནི ཙ. ཀ་ཐི་ཏཱ ཝི་ས་ཛྫི་ཏཱ་ཝ ཏེ པ་ཉྷཱ བྷ་ག་ཝ་ཏཱ ཧོ་ནྟི ནི་དྡི་ཊྛ་ཀཱ་ར་ཎཱ ཨུ་པ་ཀྑི་ཏྟ་ཀཱ ཙ. ཏེ བྷ་ག་ཝ་ཏོ ས་མྤ་ཛྫ་ནྟི. ཨ་ཐ ཁོ བྷ་ག་ཝཱ་ཝ ཏ་ཏྠ ཨ་ཏི་རོ་ཙ་ཏི, ཡ་དི་དཾ པ་ཉྙཱ་ཡཱ་ཏི. ཨེ་ཝཾ བྷ་ག་ཝཱ པ་ཉྙཱ་ཙ་ཀྑུ་ནཱ་པི ཙ་ཀྑུ་མཱ.
ཀ་ཐཾ བྷ་ག་ཝཱ བུ་དྡྷ་ཙ་ཀྑུ་ནཱ་པི ཙ་ཀྑུ་མཱ? བྷ་ག་ཝཱ བུ་དྡྷ་ཙ་ཀྑུ་ནཱ ལོ་ཀཾ ཝོ་ལོ་ཀེ་ནྟོ [ཨོ་ལོ་ཀེ་ནྟོ (སཱི.)] ཨ་དྡ་ས ས་ཏྟེ ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ ཨ་པྤེ་ཀ་ཙྩེ པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ ཨ་པྤེ་ཀ་ཙྩེ ན་པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ. སེ་ཡྻ་ཐཱ་པི ནཱ་མ ཨུ་པྤ་ལི་ནི་ཡཾ ཝཱ པ་དུ་མི་ནི་ཡཾ ཝཱ པུ་ཎྜ་རཱི་ཀི་ནི་ཡཾ ཝཱ ཨ་པྤེ་ཀ་ཙྩཱ་ནི ཨུ་པྤ་ལཱ་ནི ཝཱ པ་དུ་མཱ་ནི ཝཱ པུ་ཎྜ་རཱི་ཀཱ་ནི ཝཱ ཨུ་ད་ཀེ ཛཱ་ཏཱ་ནི ཨུ་ད་ཀེ སཾ་ཝ་ཌྜྷཱ་ནི ཨུ་ད་ཀཱ་ནུ་གྒ་ཏཱ་ནི ཨ་ནྟོ་ནི་མུ་གྒ་པོ་སཱི་ནི, ཨ་པྤེ་ཀ་ཙྩཱ་ནི ཨུ་པྤ་ལཱ་ནི ཝཱ པ་དུ་མཱ་ནི ཝཱ པུ་ཎྜ་རཱི་ཀཱ་ནི ཝཱ ཨུ་ད་ཀེ ཛཱ་ཏཱ་ནི ཨུ་ད་ཀེ སཾ་ཝ་ཌྜྷཱ་ནི ས་མོ་ད་ཀཾ ཋི་ཏཱ་ནི, ཨ་པྤེ་ཀ་ཙྩཱ་ནི ཨུ་པྤ་ལཱ་ནི ཝཱ པ་དུ་མཱ་ནི ཝཱ པུ་ཎྜ་རཱི་ཀཱ་ནི ཝཱ ཨུ་ད་ཀེ ཛཱ་ཏཱ་ནི ཨུ་ད་ཀེ སཾ་ཝ་ཌྜྷཱ་ནི ཨུ་ད་ཀཾ ཨ་ཙྩུ་གྒ་མྨ ཏི་ཊྛ་ནྟི ཨ་ནུ་པ་ལི་ཏྟཱ་ནི ཨུ་ད་ཀེ་ན; ཨེ་ཝ་མེ་ཝཾ བྷ་ག་ཝཱ བུ་དྡྷ་ཙ་ཀྑུ་ནཱ ལོ་ཀཾ ཝོ་ལོ་ཀེ་ནྟོ ཨ་དྡ་ས ས་ཏྟེ ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ ཨ་པྤེ་ཀ་ཙྩེ པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ ཨ་པྤེ་ཀ་ཙྩེ ན་པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ. ཛཱ་ནཱ་ཏི བྷ་ག་ཝཱ – ‘‘ཨ་ཡཾ པུ་གྒ་ལོ རཱ་ག་ཙ་རི་ཏོ, ཨ་ཡཾ དོ་ས་ཙ་རི་ཏོ, ཨ་ཡཾ མོ་ཧ་ཙ་རི་ཏོ, ཨ་ཡཾ ཝི་ཏ་ཀྐ་ཙ་རི་ཏོ, ཨ་ཡཾ ས་དྡྷཱ་ཙ་རི་ཏོ, ཨ་ཡཾ ཉཱ་ཎ་ཙ་རི་ཏོ’’ཏི. རཱ་ག་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨ་སུ་བྷ་ཀ་ཐཾ ཀ་ཐེ་ཏི; དོ་ས་ཙ་རི་ཏ་སྶ བྷ་ག་ཝཱ པུ་གྒ་ལ་སྶ མེ་ཏྟཱ་བྷཱ་ཝ་ནཾ ཨཱ་ཙི་ཀྑ་ཏི; མོ་ཧ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨུ་དྡེ་སེ པ་རི་པུ་ཙྪཱ་ཡ ཀཱ་ལེ་ན དྷ་མྨ་སྶ་ཝ་ནེ ཀཱ་ལེ་ན དྷ་མྨ་སཱ་ཀ་ཙྪཱ་ཡ ག་རུ་སཾ་ཝཱ་སེ ནི་ཝེ་སེ་ཏི; ཝི་ཏ་ཀྐ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨཱ་ནཱ་པཱ་ན་སྶ་ཏིཾ ཨཱ་ཙི་ཀྑ་ཏི; ས་དྡྷཱ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ པ་སཱ་ད་ནཱི་ཡཾ ནི་མི་ཏྟཾ ཨཱ་ཙི་ཀྑ་ཏི བུ་དྡྷ་སུ་བོ་དྷིཾ དྷ་མྨ་སུ་དྷ་མྨ་ཏཾ ས་ངྒྷ་སུ་པྤ་ཊི་པ་ཏྟིཾ སཱི་ལཱ་ནི ཙ ཨ་ཏྟ་ནོ; ཉཱ་ཎ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཝི་པ་སྶ་ནཱ་ནི་མི་ཏྟཾ ཨཱ་ཙི་ཀྑ་ཏི ཨ་ནི་ཙྩཱ་ཀཱ་རཾ དུ་ཀྑཱ་ཀཱ་རཾ ཨ་ན་ཏྟཱ་ཀཱ་རཾ.
‘‘སེ་ལེ ཡ་ཐཱ པ་བྦ་ཏ་མུ་དྡྷ་ནི་ཊྛི་ཏོ, ཡ་ཐཱ་པི པ་སྶེ ཛ་ན་ཏཾ ས་མ་ནྟ་ཏོ;
ཏ་ཐཱུ་པ་མཾ དྷ་མྨ་མ་ཡཾ སུ་མེ་དྷ, པཱ་སཱ་ད་མཱ་རུ་ཡ྄ཧ ས་མ་ནྟ་ཙ་ཀྑུ;
སོ་ཀཱ་ཝ་ཏི་ཎྞཾ ཛ་ན་ཏ་མ་པེ་ཏ་སོ་ཀོ, ཨ་ཝེ་ཀྑ་སྶུ ཛཱ་ཏི་ཛ་རཱ་བྷི་བྷཱུ་ཏ’’ནྟི.
ཨེ་ཝཾ བྷ་ག་ཝཱ བུ་དྡྷ་ཙ་ཀྑུ་ནཱ་པི ཙ་ཀྑུ་མཱ.
ཀ་ཐཾ བྷ་ག་ཝཱ ས་མ་ནྟ་ཙ་ཀྑུ་ནཱ་པི ཙ་ཀྑུ་མཱ? ས་མ་ནྟ་ཙ་ཀྑུ ཝུ་ཙྩ་ཏི ས་བྦ་ཉྙུ་ཏ་ཉཱ་ཎཾ. བྷ་ག་ཝཱ ས་བྦ་ཉྙུ་ཏ་ཉཱ་ཎེ་ན ཨུ་པེ་ཏོ ས་མུ་པེ་ཏོ ཨུ་པ་ག་ཏོ ས་མུ་པ་ག་ཏོ ཨུ་པ་པ་ནྣོ ས་མུ་པ་པ་ནྣོ ས་མ་ནྣཱ་ག་ཏོ.
‘‘ན ཏ་སྶ ཨ་དི་ཊྛ་མི་དྷ་ཏྠི ཀི་ཉྩི, ཨ་ཐོ ཨ་ཝི་ཉྙཱ་ཏ་མ་ཛཱ་ནི་ཏ་བྦཾ;
ས་བྦཾ ཨ་བྷི་ཉྙཱ་སི ཡ་ད་ཏྠི ནེ་ཡྻཾ, ཏ་ཐཱ་ག་ཏོ ཏེ་ན ས་མ་ནྟ་ཙ་ཀྑཱུ’’ཏི.
ཨེ་ཝཾ བྷ་ག་ཝཱ ས་མ་ནྟ་ཙ་ཀྑུ་ནཱ་པི ཙ་ཀྑུ་མཱ་ཏི – ཡ་ཐཱ དི་སྶ་ཏི ཙ་ཀྑུ་མཱ.
ས་བྦཾ ཏ་མཾ ཝི་ནོ་དེ་ཏྭཱཏི ས་བྦཾ རཱ་ག་ཏ་མཾ དོ་ས་ཏ་མཾ མོ་ཧ་ཏ་མཾ མཱ་ན་ཏ་མཾ དི་ཊྛི་ཏ་མཾ ཀི་ལེ་ས་ཏ་མཾ དུ་ཙྩ་རི་ཏ་ཏ་མཾ ཨ་ནྡྷ་ཀ་ར་ཎཾ ཨ་ཙ་ཀྑུ་ཀ་ར་ཎཾ ཨ་ཉྙཱ་ཎ་ཀ་ར་ཎཾ པ་ཉྙཱ་ནི་རོ་དྷི་ཀཾ ཝི་གྷཱ་ཏ་པ་ཀྑི་ཀཾ ཨ་ནི་བྦཱ་ན་སཾ་ཝ་ཏྟ་ནི་ཀཾ ནུ་དི་ཏྭཱ པ་ནུ་དི་ཏྭཱ ཛ་ཧི་ཏྭཱ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མེ་ཏྭཱ་ཏི – ས་བྦཾ ཏ་མཾ ཝི་ནོ་དེ་ཏྭཱ.
ཨེ་ཀོ་ཝ ར་ཏི་མ་ཛ྄ཛྷ་གཱཏི. ཨེ་ཀོཏི བྷ་ག་ཝཱ པ་བྦ་ཛྫཱ་ས་ངྑཱ་ཏེ་ན ཨེ་ཀོ, ཨ་དུ་ཏི་ཡ་ཊྛེ་ན ཨེ་ཀོ, ཏ་ཎྷཱ་ཡ པ་ཧཱ་ན་ཊྛེ་ན ཨེ་ཀོ, ཨེ་ཀ་ནྟ་ཝཱི་ཏ་རཱ་གོ་ཏི ཨེ་ཀོ, ཨེ་ཀ་ནྟ་ཝཱི་ཏ་དོ་སོ་ཏི ཨེ་ཀོ, ཨེ་ཀ་ནྟ་ཝཱི་ཏ་མོ་ཧོ་ཏི ཨེ་ཀོ, ཨེ་ཀ་ནྟ་ནི་ཀྐི་ལེ་སོ་ཏི ཨེ་ཀོ, ཨེ་ཀཱ་ཡ་ན་མ་གྒཾ ག་ཏོ་ཏི ཨེ་ཀོ, ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ་ཏི ཨེ་ཀོ.
ཀ་ཐཾ བྷ་ག་ཝཱ པ་བྦ་ཛྫཱ་ས་ངྑཱ་ཏེ་ན ཨེ་ཀོ? བྷ་ག་ཝཱ ད་ཧ་རོ་ཝ ས་མཱ་ནོ སུ་སུ ཀཱ་ལ༹་ཀེ་སོ བྷ་དྲེ་ན [བྷ་དྡེ་ན (སྱཱ.)] ཡོ་བྦ་ནེ་ན ས་མ་ནྣཱ་ག་ཏོ པ་ཋ་མེ་ན ཝ་ཡ་སཱ ཨ་ཀཱ་མ་ཀཱ་ནཾ མཱ་ཏཱ་པི་ཏཱུ་ནཾ ཨ་སྶུ་མུ་ཁཱ་ནཾ རུ་ད་ནྟཱ་ནཾ ཝི་ལ་པ་ནྟཱ་ནཾ ཉཱ་ཏི་ས་ངྒྷཾ པ་ཧཱ་ཡ ས་བྦཾ གྷ་རཱ་ཝཱ་ས་པ་ལི་བོ་དྷཾ ཚི་ནྡི་ཏྭཱ པུ་ཏྟ་དཱ་ར་པ་ལི་བོ་དྷཾ ཚི་ནྡི་ཏྭཱ ཉཱ་ཏི་པ་ལི་བོ་དྷཾ ཚི་ནྡི་ཏྭཱ མི་ཏྟཱ་མ་ཙྩ་པ་ལི་བོ་དྷཾ ཚི་ནྡི་ཏྭཱ ས་ནྣི་དྷི་པ་ལི་བོ་དྷཾ ཚི་ནྡི་ཏྭཱ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏྭཱ ཨ་ཀི་ཉྩ་ན་བྷཱ་ཝཾ ཨུ་པ་ག་ནྟྭཱ ཨེ་ཀོ ཙ་ར་ཏི ཝི་ཧ་ར་ཏི ཨི་རི་ཡ་ཏི ཝ་ཏྟ་ཏི པཱ་ལེ་ཏི ཡ་པེ་ཏི ཡཱ་པེ་ཏི – ཨེ་ཝཾ བྷ་ག་ཝཱ པ་བྦ་ཛྫཱ་ས་ངྑཱ་ཏེ་ན ཨེ་ཀོ.
ཀ་ཐཾ བྷ་ག་ཝཱ ཨ་དུ་ཏི་ཡ་ཊྛེ་ན ཨེ་ཀོ? སོ ཨེ་ཝཾ པ་བྦ་ཛི་ཏོ ས་མཱ་ནོ ཨེ་ཀོ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ཏི ཨ་པྤ་ས་དྡཱ་ནི ཨ་པྤ་ནི་གྒྷོ་སཱ་ནི ཝི་ཛ་ན་ཝཱ་ཏཱ་ནི མ་ནུ་སྶ་རཱ་ཧ་སྶེ་ཡྻ་ཀཱ་ནི པ་ཊི་ས་ལླཱ་ན་སཱ་རུ་པྤཱ་ནི. སོ ཨེ་ཀོ ཙ་ར་ཏི, ཨེ་ཀོ ག་ཙྪ་ཏི, ཨེ་ཀོ ཏི་ཊྛ་ཏི, ཨེ་ཀོ ནི་སཱི་ད་ཏི, ཨེ་ཀོ སེ་ཡྻཾ ཀ་པྤེ་ཏི, ཨེ་ཀོ གཱ་མཾ པི་ཎྜཱ་ཡ པ་ཝི་ས་ཏི, ཨེ་ཀོ པ་ཊི་ཀྐ་མ་ཏི, ཨེ་ཀོ ར་ཧོ ནི་སཱི་ད་ཏི, ཨེ་ཀོ ཙ་ངྐ་མཾ ཨ་དྷི་ཊྛཱ་ཏི, ཨེ་ཀོ ཙ་ར་ཏི ཝི་ཧ་ར་ཏི ཨི་རི་ཡ་ཏི ཝ་ཏྟ་ཏི པཱ་ལེ་ཏི ཡ་པེ་ཏི ཡཱ་པེ་ཏི – ཨེ་ཝཾ བྷ་ག་ཝཱ ཨ་དུ་ཏི་ཡ་ཊྛེ་ན ཨེ་ཀོ.
ཀ་ཐཾ བྷ་ག་ཝཱ ཏ་ཎྷཱ་ཡ པ་ཧཱ་ན་ཊྛེ་ན ཨེ་ཀོ? སོ ཨེ་ཝཾ ཨེ་ཀོ ཨ་དུ་ཏི་ཡོ ཨ་པྤ་མ་ཏྟོ ཨཱ་ཏཱ་པཱི པ་ཧི་ཏ་ཏྟོ ཝི་ཧ་ར་ནྟོ ན་ཛྫཱ ནེ་ར་ཉྫ་རཱ་ཡ ཏཱི་རེ བོ་དྷི་རུ་ཀྑ་མཱུ་ལེ མ་ཧཱ་པ་དྷཱ་ནཾ པ་ད་ཧ་ནྟོ མཱ་རཾ ས་སེ་ནཾ ཀ་ཎྷཾ ན་མུ་ཙིཾ པ་མ་ཏྟ་བ་ནྡྷུཾ ཝི་དྷ་མི་ཏྭཱ ཏ་ཎྷཱ་ཛཱ་ལི་ནིཾ ཝི་ས་རི་ཏཾ ཝི་ས་ཏྟི་ཀཾ པ་ཛ་ཧ་སི ཝི་ནོ་དེ་སི བྱ་ནྟིཾ ཨ་ཀཱ་སི ཨ་ན་བྷཱ་ཝཾ ག་མེ་སི.
‘‘ཏ་ཎྷཱ་དུ་ཏི་ཡོ པུ་རི་སོ, དཱི་གྷ་མ་དྡྷཱ་ན་སཾ་ས་རཾ;
ཨི་ཏྠ་བྷཱ་ཝ་ཉྙ་ཐཱ་བྷཱ་ཝཾ [ཨི་ཏྠཾ བྷཱ་ཝ་ཉྙ་ཐཱ་བྷཱ་ཝཾ (ཀ.) ཨི་ཏི་ཝུ. ༡༥, ༡༠༥], སཾ་སཱ་རཾ ནཱ་ཏི་ཝ་ཏྟ་ཏི.
‘‘ཨེ་ཏ་མཱ་དཱི་ན་ཝཾ ཉ་ཏྭཱ, ཏ་ཎྷཾ དུ་ཀྑ་སྶ ས་མྦྷ་ཝཾ;
ཝཱི་ཏ་ཏ་ཎྷོ ཨ་ནཱ་དཱ་ནོ, ས་ཏོ བྷི་ཀྑུ པ་རི་བྦ་ཛེ’’ཏི.
ཨེ་ཝཾ བྷ་ག་ཝཱ ཏ་ཎྷཱ་ཡ པ་ཧཱ་ན་ཊྛེ་ན ཨེ་ཀོ.
ཀ་ཐཾ བྷ་ག་ཝཱ ཨེ་ཀ་ནྟ་ཝཱི་ཏ་རཱ་གོ་ཏི ཨེ་ཀོ? རཱ་ག་སྶ པ་ཧཱི་ན་ཏྟཱ ཨེ་ཀ་ནྟ་ཝཱི་ཏ་རཱ་གོ་ཏི ཨེ་ཀོ, དོ་ས་སྶ པ་ཧཱི་ན་ཏྟཱ ཨེ་ཀ་ནྟ་ཝཱི་ཏ་དོ་སོ་ཏི ཨེ་ཀོ, མོ་ཧ་སྶ པ་ཧཱི་ན་ཏྟཱ ཨེ་ཀ་ནྟ་ཝཱི་ཏ་མོ་ཧོ་ཏི ཨེ་ཀོ, ཀི་ལེ་སཱ་ནཾ པ་ཧཱི་ན་ཏྟཱ ཨེ་ཀ་ནྟ་ནི་ཀྐི་ལེ་སོ་ཏི ཨེ་ཀོ.
ཀ་ཐཾ བྷ་ག་ཝཱ ཨེ་ཀཱ་ཡ་ན་མ་གྒཾ ག་ཏོ་ཏི ཨེ་ཀོ? ཨེ་ཀཱ་ཡ་ན་མ་གྒོ ཝུ་ཙྩ་ཏི ཙ་ཏྟཱ་རོ ས་ཏི་པ་ཊྛཱ་ནཱ ཙ་ཏྟཱ་རོ ས་མྨ་པྤ་དྷཱ་ནཱ ཙ་ཏྟཱ་རོ ཨི་དྡྷི་པཱ་དཱ པ་ཉྩི་ནྡྲི་ཡཱ་ནི པ་ཉྩ བ་ལཱ་ནི ས་ཏྟ བོ་ཛ྄ཛྷ་ངྒཱ ཨ་རི་ཡོ ཨ་ཊྛ་ངྒི་ཀོ མ་གྒོ.
‘‘ཨེ་ཀཱ་ཡ་ནཾ ཛཱ་ཏི་ཁ་ཡ་ནྟ་ད་སྶཱི, མ་གྒཾ པ་ཛཱ་ནཱ་ཏི ཧི་ཏཱ་ནུ་ཀ་མྤཱི;
ཨེ་ཏེ་ན མ་གྒེ་ན ཏ་རིཾ་སུ [ཨ་ཏ་རིཾ་སུ (སྱཱ.)] པུ་བྦེ, ཏ་རི་སྶ་ནྟི ཡེ ཙ ཏ་ར་ནྟི ཨོ་གྷ’’ནྟི.
ཨེ་ཝཾ བྷ་ག་ཝཱ ཨེ་ཀཱ་ཡ་ན་མ་གྒཾ ག་ཏོ་ཏི ཨེ་ཀོ.
ཀ་ཐཾ བྷ་ག་ཝཱ ཨེ་ཀོ ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ་ཏི ཨེ་ཀོ? བོ་དྷི ཝུ་ཙྩ་ཏི ཙ་ཏཱུ་སུ མ་གྒེ་སུ ཉཱ་ཎཾ པ་ཉྙི་ནྡྲི་ཡཾ པ་ཉྙཱ་བ་ལཾ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཝཱི་མཾ་སཱ ཝི་པ་སྶ་ནཱ ས་མྨཱ་དི་ཊྛི. བྷ་ག་ཝཱ ཏེ་ན བོ་དྷི་ཉཱ་ཎེ་ན ‘‘ས་བྦེ ས་ངྑཱ་རཱ ཨ་ནི་ཙྩཱ’’ཏི བུ་ཛ྄ཛྷི, ‘‘ས་བྦེ ས་ངྑཱ་རཱ དུ་ཀྑཱ’’ཏི བུ་ཛ྄ཛྷི, ‘‘ས་བྦེ དྷ་མྨཱ ཨ་ན་ཏྟཱ’’ཏི བུ་ཛ྄ཛྷི, ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’ཏི བུ་ཛ྄ཛྷི…པེ… ‘‘ཛཱ་ཏི་པ་ཙྩ་ཡཱ ཛ་རཱ་མ་ར་ཎ’’ནྟི བུ་ཛ྄ཛྷི; ‘‘ཨ་ཝི་ཛྫཱ་ནི་རོ་དྷཱ ས་ངྑཱ་ར་ནི་རོ་དྷོ’’ཏི བུ་ཛ྄ཛྷི…པེ… ‘‘ཛཱ་ཏི་ནི་རོ་དྷཱ ཛ་རཱ་མ་ར་ཎ་ནི་རོ་དྷོ’’ཏི བུ་ཛ྄ཛྷི; ‘‘ཨི་དཾ དུ་ཀྑ’’ནྟི བུ་ཛ྄ཛྷི, ‘‘ཨ་ཡཾ དུ་ཀྑ་ས་མུ་ད་ཡོ’’ཏི བུ་ཛ྄ཛྷི, ‘‘ཨ་ཡཾ དུ་ཀྑ་ནི་རོ་དྷོ’’ཏི བུ་ཛ྄ཛྷི, ‘‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’’ཏི བུ་ཛ྄ཛྷི; ‘‘ཨི་མེ ཨཱ་ས་ཝཱ’’ཏི བུ་ཛ྄ཛྷི…པེ… ‘‘ཨ་ཡཾ ཨཱ་ས་ཝ་ནི་རོ་དྷ་གཱ་མི་ནཱི པ་ཊི་པ་དཱ’’ཏི བུ་ཛ྄ཛྷི; ‘‘ཨི་མེ དྷ་མྨཱ པ་རི་ཉྙེ་ཡྻཱ’’ཏི བུ་ཛ྄ཛྷི… པ་ཧཱ་ཏ་བྦཱ་ཏི… བྷཱ་ཝེ་ཏ་བྦཱ་ཏི… ས་ཙྪི་ཀཱ་ཏ་བྦཱ་ཏི བུ་ཛ྄ཛྷི, ཚ་ནྣཾ ཕ་སྶཱ་ཡ་ཏ་ནཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ བུ་ཛ྄ཛྷི, པ་ཉྩ་ནྣཾ ཨུ་པཱ་དཱ་ན་ཀྑ་ནྡྷཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ བུ་ཛ྄ཛྷི, ཙ་ཏུ་ནྣཾ མ་ཧཱ་བྷཱུ་ཏཱ་ནཾ ས་མུ་ད་ཡ་ཉྩ ཨ་ཏྠ་ངྒ་མ་ཉྩ ཨ་སྶཱ་ད་ཉྩ ཨཱ་དཱི་ན་ཝ་ཉྩ ནི་སྶ་ར་ཎ་ཉྩ བུ་ཛ྄ཛྷི, ‘‘ཡཾ ཀི་ཉྩི ས་མུ་ད་ཡ་དྷ་མྨཾ, ས་བྦཾ ཏཾ ནི་རོ་དྷ་དྷ་མྨ’’ནྟི བུ་ཛ྄ཛྷི.
ཨ་ཐ ཝཱ ཡཾ ཀི་ཉྩི བུ་ཛ྄ཛྷི་ཏ་བྦཾ ཨ་ནུ་བུ་ཛ྄ཛྷི་ཏ་བྦཾ པ་ཊི་བུ་ཛ྄ཛྷི་ཏ་བྦཾ ས་མྦུ་ཛ྄ཛྷི་ཏ་བྦཾ ཨ་དྷི་ག་ནྟ་བྦཾ ཕ་སྶི་ཏ་བྦཾ ས་ཙྪི་ཀཱ་ཏ་བྦཾ, ས་བྦཾ ཏཾ ཏེ་ན བོ་དྷི་ཉཱ་ཎེ་ན བུ་ཛ྄ཛྷི ཨ་ནུ་བུ་ཛ྄ཛྷི པ་ཊི་བུ་ཛ྄ཛྷི ས་མྦུ་ཛ྄ཛྷི ས་མྨཱ་བུ་ཛ྄ཛྷི ཨ་དྷི་ག་ཙྪི ཕ་སྶེ་སི ས་ཙྪཱ་ཀཱ་སི. ཨེ་ཝཾ བྷ་ག་ཝཱ ཨེ་ཀོ ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ་ཏི ཨེ་ཀོ.
ར་ཏི་མ་ཛ྄ཛྷ་གཱཏི. ར་ཏིནྟི ནེ་ཀྑ་མྨ་ར་ཏིཾ ཝི་ཝེ་ཀ་ར་ཏིཾ ཨུ་པ་ས་མ་ར་ཏིཾ ས་མྦོ་དྷི་ར་ཏིཾ ཨ་ཛ྄ཛྷ་གཱ ས་མ་ཛ྄ཛྷ་གཱ ཨ་དྷི་ག་ཙྪི ཕ་སྶེ་སི ས་ཙྪཱ་ཀཱ་སཱི་ཏི – ཨེ་ཀོ་ཝ ར་ཏི་མ་ཛ྄ཛྷ་གཱ.
ཏེ་ནཱ་ཧ ཐེ་རོ སཱ་རི་པུ་ཏྟོ –
‘‘ས་དེ་ཝ་ཀ་སྶ ལོ་ཀ་སྶ, ཡ་ཐཱ དི་སྶ་ཏི ཙ་ཀྑུ་མཱ;
ས་བྦཾ ཏ་མཾ ཝི་ནོ་དེ་ཏྭཱ, ཨེ་ཀོ་ཝ ར་ཏི་མ་ཛ྄ཛྷ་གཱ’’ཏི.
༡༩༢. ཏཾ བུ་དྡྷཾ ཨ་སི་ཏཾ ཏཱ་དིཾ, ཨ་ཀུ་ཧཾ ག་ཎི་མཱ་ག་ཏཾ;
བ་ཧཱུ་ན་མི་དྷ བ་དྡྷཱ་ནཾ, ཨ་ཏྠི པ་ཉྷེ་ན ཨཱ་ག་མཾ.
ཏཾ བུ་དྡྷཾ ཨ་སི་ཏཾ ཏཱ་དིནྟི. བུ་དྡྷོཏི ཡོ སོ བྷ་ག་ཝཱ ས་ཡ་མྦྷཱུ ཨ་ནཱ་ཙ་རི་ཡ་ཀོ པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ སཱ་མཾ ས་ཙྩཱ་ནི ཨ་བྷི་ས་མྦུ་ཛ྄ཛྷི, ཏ་ཏྠ ཙ ས་བྦ་ཉྙུ་ཏཾ པཱ་པུ་ཎི [པ་ཏྟོ (སྱཱ.)], བ་ལེ་སུ ཙ ཝ་སཱི་བྷཱ་ཝཾ པཱ་པུ་ཎི. བུ་དྡྷོཏི ཀེ་ན་ཊྛེ་ན བུ་དྡྷོ? བུ་ཛ྄ཛྷི་ཏཱ ས་ཙྩཱ་ནཱི་ཏི བུ་དྡྷོ, བོ་དྷེ་ཏཱ པ་ཛཱ་ཡཱ་ཏི བུ་དྡྷོ, ས་བྦ་ཉྙུ་ཏཱ་ཡ བུ་དྡྷོ, ས་བྦ་ད་སྶཱ་ཝི་ཏཱ་ཡ བུ་དྡྷོ, ཨ་ན་ཉྙ་ནེ་ཡྻ་ཏཱ་ཡ བུ་དྡྷོ, ཝི་ས་ཝི་ཏཱ་ཡ བུ་དྡྷོ, ཁཱི་ཎཱ་ས་ཝ་ས་ངྑཱ་ཏེ་ན བུ་དྡྷོ, ནི་རུ་པ་ཀྐི་ལེ་ས་ས་ངྑཱ་ཏེ་ན བུ་དྡྷོ, ཨེ་ཀ་ནྟ་ཝཱི་ཏ་རཱ་གོ་ཏི བུ་དྡྷོ, ཨེ་ཀ་ནྟ་ཝཱི་ཏ་དོ་སོ་ཏི བུ་དྡྷོ, ཨེ་ཀ་ནྟ་ཝཱི་ཏ་མོ་ཧོ་ཏི བུ་དྡྷོ, ཨེ་ཀ་ནྟ་ནི་ཀྐི་ལེ་སོ་ཏི བུ་དྡྷོ, ཨེ་ཀཱ་ཡ་ན་མ་གྒཾ ག་ཏོ་ཏི བུ་དྡྷོ, ཨེ་ཀོ ཨ་ནུ་ཏྟ་རཾ ས་མྨཱ་ས་མྦོ་དྷིཾ ཨ་བྷི་ས་མྦུ་དྡྷོ་ཏི བུ་དྡྷོ, ཨ་བུ་དྡྷི་ཝི་ཧ་ཏ་ཏྟཱ བུ་དྡྷི་པ་ཊི་ལཱ་བྷ་ཏྟཱ བུ་དྡྷོ. བུ་དྡྷོ་ཏི ནེ་ཏཾ མཱ་ཏ་རཱ ཀ་ཏཾ ན པི་ཏ་རཱ ཀ་ཏཾ, ན བྷཱ་ཏ་རཱ ཀ་ཏཾ, ན བྷ་གི་ནི་ཡཱ ཀ་ཏཾ, ན མི་ཏྟཱ་མ་ཙྩེ་ཧི ཀ་ཏཾ, ན ཉཱ་ཏི་སཱ་ལོ་ཧི་ཏེ་ཧི ཀ་ཏཾ, ན ས་མ་ཎ་བྲཱ་ཧྨ་ཎེ་ཧི ཀ་ཏཾ, ན དེ་ཝ་ཏཱ་ཧི ཀ་ཏཾ. ཝི་མོ་ཀྑ་ནྟི་ཀ་མེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ བོ་དྷི་ཡཱ མཱུ་ལེ ས་ཧ ས་བྦ་ཉྙུ་ཏ་ཉཱ་ཎ་སྶ པ་ཊི་ལཱ་བྷཱ ས་ཙྪི་ཀཱ པ་ཉྙ་ཏྟི, ཡ་དི་དཾ བུ་དྡྷོ་ཏི – ཏཾ བུ་དྡྷཾ. ཨ་སི་ཏནྟི དྭེ ནི་སྶ་ཡཱ – ཏ་ཎྷཱ་ནི་སྶ་ཡོ ཙ དི་ཊྛི་ནི་སྶ་ཡོ ཙ. ཀ་ཏ་མོ ཏ་ཎྷཱ་ནི་སྶ་ཡོ? ཡཱ་ཝ ཏ་ཎྷཱ་ས་ངྑཱ་ཏེ་ན སཱི་མ་ཀ་ཏཾ ཨོ་དྷི་ཀ་ཏཾ [པ་རི་ཡཱ་དི་ཀ་ཏཾ (སྱཱ.)] པ་རི་ཡ་ནྟ་ཀ་ཏཾ པ་རི་གྒ་ཧི་ཏཾ མ་མཱ་ཡི་ཏཾ – ཨི་དཾ མ་མ, ཨེ་ཏཾ མ་མ, ཨེ་ཏྟ་ཀཾ མ་མ, ཨེ་ཏྟཱ་ཝ་ཏཱ མ་མ, མ་མ རཱུ་པཱ ས་དྡཱ ག་ནྡྷཱ ར་སཱ ཕོ་ཊྛ་བྦཱ, ཨ་ཏྠ་ར་ཎཱ པཱ་ཝུ་ར་ཎཱ དཱ་སི་དཱ་སཱ ཨ་ཛེ་ལ༹་ཀཱ ཀུ་ཀྐུ་ཊ་སཱུ་ཀ་རཱ ཧ་ཏྠི་ག་ཝཱ་སྶ་ཝ་ལ༹་ཝཱ, ཁེ་ཏྟཾ ཝ་ཏྠུཾ ཧི་ར་ཉྙཾ སུ་ཝ་ཎྞཾ, གཱ་མ་ནི་ག་མ་རཱ་ཛ་དྷཱ་ནི་ཡོ ར་ཊྛ་ཉྩ ཛ་ན་པ་དོ ཙ ཀོ་སོ ཙ ཀོ་ཊྛཱ་གཱ་ར་ཉྩ, ཀེ་ཝ་ལ་མྤི མ་ཧཱ་པ་ཐ་ཝིཾ ཏ་ཎྷཱ་ཝ་སེ་ན མ་མཱ་ཡ་ཏི, ཡཱ་ཝ་ཏཱ ཨ་ཊྛ་ས་ཏཾ ཏ་ཎྷཱ་ཝི་ཙ་རི་ཏཾ – ཨ་ཡཾ ཏ་ཎྷཱ་ནི་སྶ་ཡོ.
ཀ་ཏ་མོ དི་ཊྛི་ནི་སྶ་ཡོ? ཝཱི་ས་ཏི་ཝ་ཏྠུ་ཀཱ ས་ཀྐཱ་ཡ་དི་ཊྛི, ད་ས་ཝ་ཏྠུ་ཀཱ མི་ཙྪཱ་དི་ཊྛི, ད་ས་ཝ་ཏྠུ་ཀཱ ཨ་ནྟ་གྒཱ་ཧི་ཀཱ དི་ཊྛི. ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ དི་ཊྛི་ག་ཧ་ནཾ དི་ཊྛི་ཀ་ནྟཱ་རོ དི་ཊྛི་ཝི་སཱུ་ཀཱ་ཡི་ཀཾ དི་ཊྛི་ཝི་པྥ་ནྡི་ཏཾ དི་ཊྛི་ས་ཉྙོ་ཛ་ནཾ གཱ་ཧོ པ་ཊི་གྒཱ་ཧོ ཨ་བྷི་ནི་ཝེ་སོ པ་རཱ་མཱ་སོ ཀུ་མྨ་གྒོ མི་ཙྪཱ་པ་ཐོ མི་ཙྪ་ཏྟཾ ཏི་ཏྠཱ་ཡ་ཏ་ནཾ ཝི་པ་རི་ཡཱ་ས་གྒཱ་ཧོ ཝི་པ་རཱི་ཏ་གྒཱ་ཧོ ཝི་པ་ལླཱ་ས་གྒཱ་ཧོ མི་ཙྪཱ་གཱ་ཧོ ‘‘ཨ་ཡཱ་ཐཱ་ཝ་ཀ་སྨིཾ ཡཱ་ཐཱ་ཝ་ཀ’’ནྟི གཱ་ཧོ ཡཱ་ཝ་ཏཱ དྭཱ་ས་ཊྛི དི་ཊྛི་ག་ཏཱ་ནི – ཨ་ཡཾ དི་ཊྛི་ནི་སྶ་ཡོ.
བུ་དྡྷ་སྶ བྷ་ག་ཝ་ཏོ ཏ་ཎྷཱ་ནི་སྶ་ཡོ པ་ཧཱི་ནོ, དི་ཊྛི་ནི་སྶ་ཡོ པ་ཊི་ནི་སྶ་ཊྛོ; ཏ་ཎྷཱ་ནི་སྶ་ཡ་སྶ པ་ཧཱི་ན་ཏྟཱ དི་ཊྛི་ནི་སྶ་ཡ་སྶ པ་ཊི་ནི་སྶ་ཊྛ་ཏྟཱ བྷ་ག་ཝཱ ཙ་ཀྑུཾ ཨ་སི་ཏོ, སོ་ཏཾ… གྷཱ་ནཾ… ཛི་ཝ྄ཧཾ… ཀཱ་ཡཾ… མ་ནཾ ཨ་སི་ཏོ, རཱུ་པེ… ས་དྡེ… ག་ནྡྷེ… ར་སེ… ཕོ་ཊྛ་བྦེ… ཀུ་ལཾ… ག་ཎཾ… ཨཱ་ཝཱ་སཾ… ལཱ་བྷཾ… ཡ་སཾ… པ་སཾ་སཾ… སུ་ཁཾ… ཙཱི་ཝ་རཾ… པི་ཎྜ་པཱ་ཏཾ… སེ་ནཱ་ས་ནཾ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ… ཀཱ་མ་དྷཱ་ཏུཾ… རཱུ་པ་དྷཱ་ཏུཾ… ཨ་རཱུ་པ་དྷཱ་ཏུཾ … ཀཱ་མ་བྷ་ཝཾ… རཱུ་པ་བྷ་ཝཾ… ཨ་རཱུ་པ་བྷ་ཝཾ… ས་ཉྙཱ་བྷ་ཝཾ… ཨ་ས་ཉྙཱ་བྷ་ཝཾ… ནེ་ཝ་ས་ཉྙཱ་ནཱ་ས་ཉྙཱ་བྷ་ཝཾ… ཨེ་ཀ་ཝོ་ཀཱ་ར་བྷ་ཝཾ… ཙ་ཏུ་ཝོ་ཀཱ་ར་བྷ་ཝཾ… པ་ཉྩ་ཝོ་ཀཱ་ར་བྷ་ཝཾ… ཨ་ཏཱི་ཏཾ… ཨ་ནཱ་ག་ཏཾ… པ་ཙྩུ་པྤ་ནྣཾ… དི་ཊྛ་སུ་ཏ་མུ་ཏ་ཝི་ཉྙཱ་ཏ་བྦེ དྷ་མྨེ ཨ་སི་ཏོ ཨ་ནི་སྶི་ཏོ ཨ་ན་ལླཱི་ནོ ཨ་ནུ་པ་ག་ཏོ ཨ་ན་ཛ྄ཛྷོ་སི་ཏོ ཨ་ན་དྷི་མུ་ཏྟོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་ར་ཏཱི་ཏི – ཏཾ བུ་དྡྷཾ ཨ་སི་ཏཾ.
ཏཱ་དིནྟི བྷ་ག་ཝཱ པ་ཉྩ་ཧཱ་ཀཱ་རེ་ཧི ཏཱ་དཱི – ཨི་ཊྛཱ་ནི་ཊྛེ ཏཱ་དཱི, ཙ་ཏྟཱ་ཝཱི་ཏི ཏཱ་དཱི, ཏི་ཎྞཱ་ཝཱི་ཏི ཏཱ་དཱི, མུ་ཏྟཱ་ཝཱི་ཏི ཏཱ་དཱི, ཏཾ་ནི་དྡེ་སཱ ཏཱ་དཱི.
ཀ་ཐཾ བྷ་ག་ཝཱ ཨི་ཊྛཱ་ནི་ཊྛེ ཏཱ་དཱི? བྷ་ག་ཝཱ ལཱ་བྷེ་པི ཏཱ་དཱི, ཨ་ལཱ་བྷེ་པི ཏཱ་དཱི, ཡ་སེ་པི ཏཱ་དཱི, ཨ་ཡ་སེ་པི ཏཱ་དཱི, པ་སཾ་སཱ་ཡ་པི ཏཱ་དཱི ནི་ནྡཱ་ཡ་པི ཏཱ་དཱི, སུ་ཁེ་པི ཏཱ་དཱི, དུ་ཀྑེ་པི ཏཱ་དཱི; ཨེ་ཀ་ཙྩེ བཱ་ཧཾ ག་ནྡྷེ་ན ལི་མྤེ་ཡྻུཾ, ཨེ་ཀ་ཙྩེ བཱ་ཧཾ ཝཱ་སི་ཡཱ ཏ་ཙྪེ་ཡྻུཾ, ཨ་མུ་ཀ་སྨིཾ ན་ཏྠི རཱ་གོ, ཨ་མུ་ཀ་སྨིཾ ན་ཏྠི པ་ཊི་གྷཾ, ཨ་ནུ་ན་ཡ་པ་ཊི་གྷ་ཝི་པྤ་ཧཱི་ནོ ཨུ་གྒྷཱ་ཏི་ནི་གྒྷཱ་ཏི་ཝཱི་ཏི་ཝ་ཏྟོ ཨ་ནུ་རོ་དྷ་ཝི་རོ་དྷཾ ས་མ་ཏི་ཀྐ་ནྟོ. ཨེ་ཝཾ བྷ་ག་ཝཱ ཨི་ཊྛཱ་ནི་ཊྛེ ཏཱ་དཱི.
ཀ་ཐཾ བྷ་ག་ཝཱ ཙ་ཏྟཱ་ཝཱི་ཏི ཏཱ་དཱི? བྷ་ག་ཝ་ཏཱ [བྷ་ག་ཝ་ཏོ (སྱཱ.)] རཱ་གོ ཙ་ཏྟོ ཝ་ནྟོ མུ་ཏྟོ པ་ཧཱི་ནོ པ་ཊི་ནི་སྶ་ཊྛོ, དོ་སོ…པེ… མོ་ཧོ… ཀོ་དྷོ… ཨུ་པ་ནཱ་ཧོ… མ་ཀྑོ… པ་ལཱ༹་སོ… ཨི་སྶཱ… མ་ཙྪ་རི་ཡཾ… མཱ་ཡཱ… སཱ་ཋེ་ཡྻཾ… ཐ་མྦྷོ… སཱ་ར་མྦྷོ… མཱ་ནོ… ཨ་ཏི་མཱ་ནོ… མ་དོ… པ་མཱ་དོ… ས་བྦེ ཀི་ལེ་སཱ… ས་བྦེ དུ་ཙྩ་རི་ཏཱ… ས་བྦེ ད་ར་ཐཱ… ས་བྦེ པ་རི་ལཱ༹་ཧཱ… ས་བྦེ ས་ནྟཱ་པཱ … ས་བྦཱ་ཀུ་ས་ལཱ་བྷི་ས་ངྑཱ་རཱ ཙ་ཏྟཱ ཝ་ནྟཱ མུ་ཏྟཱ པ་ཧཱི་ནཱ པ་ཊི་ནི་སྶ་ཊྛཱ. ཨེ་ཝཾ བྷ་ག་ཝཱ ཙ་ཏྟཱ་ཝཱི་ཏི ཏཱ་དཱི.
ཀ་ཐཾ བྷ་ག་ཝཱ ཏི་ཎྞཱ་ཝཱི་ཏི ཏཱ་དཱི? བྷ་ག་ཝཱ ཀཱ་མོ་གྷཾ ཏི་ཎྞོ, བྷ་ཝོ་གྷཾ ཏི་ཎྞོ, དི་ཊྛོ་གྷཾ ཏི་ཎྞོ, ཨ་ཝི་ཛྫོ་གྷཾ ཏི་ཎྞོ, ས་བྦཾ སཾ་སཱ་ར་པ་ཐཾ ཏི་ཎྞོ ཨུ་ཏྟི་ཎྞོ ནི་ཏྟི་ཎྞོ ཨ་ཏི་ཀྐ་ནྟོ ས་མ་ཏི་ཀྐ་ནྟོ ཝཱི་ཏི་ཝ་ཏྟོ. སོ ཝུ་ཊྛ་ཝཱ་སོ ཙི་ཎྞ་ཙ་ར་ཎོ ག་ཏ་དྡྷོ ག་ཏ་དི་སོ ག་ཏ་ཀོ་ཊི་ཡོ པཱ་ལི་ཏ་བྲ་ཧྨ་ཙ་རི་ཡོ ཨུ་ཏྟ་མ་དི་ཊྛི་པྤ་ཏྟོ བྷཱ་ཝི་ཏ་མ་གྒོ པ་ཧཱི་ན་ཀི་ལེ་སོ པ་ཊི་ཝི་དྡྷཱ་ཀུ་པྤོ ས་ཙྪི་ཀ་ཏ་ནི་རོ་དྷོ. དུ་ཀྑཾ ཏ་སྶ པ་རི་ཉྙཱ་ཏཾ, ས་མུ་ད་ཡོ པ་ཧཱི་ནོ, མ་གྒོ བྷཱ་ཝི་ཏོ, ནི་རོ་དྷོ ས་ཙྪི་ཀ་ཏོ, ཨ་བྷི་ཉྙེ་ཡྻཾ ཨ་བྷི་ཉྙཱ་ཏཾ, པ་རི་ཉྙེ་ཡྻཾ པ་རི་ཉྙཱ་ཏཾ, པ་ཧཱ་ཏ་བྦཾ པ་ཧཱི་ནཾ, བྷཱ་ཝེ་ཏ་བྦཾ བྷཱ་ཝི་ཏཾ, ས་ཙྪི་ཀཱ་ཏ་བྦཾ ས་ཙྪི་ཀ་ཏཾ. སོ ཨུ་ཀྑི་ཏྟ་པ་ལི༹་གྷོ [ཨུ་ཀྑི་ཏྟ་པ་ལི་གྷོ (སྱཱ. ཀ.) མ་ཧཱ་ནི. ༦] སཾ་ཀི་ཎྞ་པ་རི་ཀྑོ ཨ་བྦཱུ་ལ༹ྷེ་སི་ཀོ ནི་ར་གྒ་ལོ༹ ཨ་རི་ཡོ པ་ནྣ་དྡྷ་ཛོ པ་ནྣ་བྷཱ་རོ ཝི་ས་ཉྙུ་ཏྟོ པ་ཉྩ་ངྒ་ཝི་པྤ་ཧཱི་ནོ ཚ་ལ༹་ངྒ་ས་མ་ནྣཱ་ག་ཏོ ཨེ་ཀཱ་ར་ཀྑོ ཙ་ཏུ་རཱ་པ་སྶེ་ནོ པ་ནུ་ཎྞ་པ་ཙྩེ་ཀ་ས་ཙྩོ ས་མ་ཝ་ཡ་ས་ཊྛེ་ས་ནོ ཨ་ནཱ་ཝི་ལ་ས་ངྐ་པྤོ པ་སྶ་དྡྷ་ཀཱ་ཡ་ས་ངྑཱ་རོ སུ་ཝི་མུ་ཏྟ་ཙི་ཏྟོ སུ་ཝི་མུ་ཏྟ་པ་ཉྙོ ཀེ་ཝ་ལཱི ཝུ་སི་ཏ་ཝཱ ཨུ་ཏྟ་མ་པུ་རི་སོ པ་ར་མ་པུ་རི་སོ པ་ར་མ་པ་ཏྟི་པྤ་ཏྟོ. སོ ནེ་ཝཱ་ཙི་ན་ཏི, ནཱ་པ་ཙི་ན་ཏི; ཨ་པ་ཙི་ནི་ཏྭཱ ཋི་ཏོ ནེ་ཝ པ་ཛ་ཧ་ཏི, ན ཨུ་པཱ་དི་ཡ་ཏི; པ་ཛ་ཧི་ཏྭཱ ཋི་ཏོ ནེ་ཝ སཾ་སི་བྦ་ཏི, ན ཨུ་སི་ནེ་ཏི; ཝི་སི་ནེ་ཏྭཱ ཋི་ཏོ ནེ་ཝ ཝི་དྷཱུ་པེ་ཏི, ན ས་ནྡྷཱུ་པེ་ཏི; ཝི་དྷཱུ་པེ་ཏྭཱ ཋི་ཏོ, ཨ་སེ་ཁེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ, ཨ་སེ་ཁེ་ན ས་མཱ་དྷི་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ, ཨ་སེ་ཁེ་ན པ་ཉྙཱ་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ, ཨ་སེ་ཁེ་ན ཝི་མུ་ཏྟི་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ, ཨ་སེ་ཁེ་ན ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ, ས་ཙྩཾ ས་མྤ་ཊི་པཱ་དི་ཡི་ཏྭཱ ཋི་ཏོ, ཨེ་ཛཾ ས་མ་ཏི་ཀྐ་མི་ཏྭཱ ཋི་ཏོ, ཀི་ལེ་ས་གྒིཾ པ་རི་ཡཱ་དི་ཡི་ཏྭཱ ཋི་ཏོ, ཨ་པ་རི་ག་མ་ན་ཏཱ་ཡ ཋི་ཏོ, ཀ་ཊཾ ས་མཱ་དཱ་ཡ ཋི་ཏོ, མུ་ཏྟ་པ་ཊི་སེ་ཝ་ན་ཏཱ་ཡ ཋི་ཏོ, མེ་ཏྟཱ་ཡ པཱ་རི་སུ་དྡྷི་ཡཱ ཋི་ཏོ, ཀ་རུ་ཎཱ་ཡ པཱ་རི་སུ་དྡྷི་ཡཱ ཋི་ཏོ, མུ་དི་ཏཱ་ཡ པཱ་རི་སུ་དྡྷི་ཡཱ ཋི་ཏོ, ཨུ་པེ་ཀྑཱ་ཡ པཱ་རི་སུ་དྡྷི་ཡཱ ཋི་ཏོ, ཨ་ཙྩ་ནྟ་པཱ་རི་སུ་དྡྷི་ཡཱ ཋི་ཏོ, ཨ་ཏ་མྨ་ཡ་ཏཱ་ཡ པཱ་རི་སུ་དྡྷི་ཡཱ ཋི་ཏོ, ཝི་མུ་ཏྟ་ཏྟཱ ཋི་ཏོ, ས་ནྟུ་སི་ཏ་ཏྟཱ ཋི་ཏོ, ཁ་ནྡྷ་པ་རི་ཡ་ནྟེ ཋི་ཏོ, དྷཱ་ཏུ་པ་རི་ཡ་ནྟེ ཋི་ཏོ, ཨཱ་ཡ་ཏ་ན་པ་རི་ཡ་ནྟེ ཋི་ཏོ, ག་ཏི་པ་རི་ཡ་ནྟེ ཋི་ཏོ, ཨུ་པ་པ་ཏྟི་པ་རི་ཡ་ནྟེ ཋི་ཏོ, པ་ཊི་ས་ནྡྷི་པ་རི་ཡ་ནྟེ ཋི་ཏོ, བྷ་ཝ་པ་རི་ཡ་ནྟེ ཋི་ཏོ, སཾ་སཱ་ར་པ་རི་ཡ་ནྟེ ཋི་ཏོ, ཝ་ཊྚ་པ་རི་ཡ་ནྟེ ཋི་ཏོ, ཨ་ནྟི་མེ བྷ་ཝེ ཋི་ཏོ, ཨ་ནྟི་མེ ས་མུ་སྶ་ཡེ ཋི་ཏོ, ཨ་ནྟི་མ་དེ་ཧ་དྷ་རོ བྷ་ག་ཝཱ.
‘‘ཏ་སྶཱ་ཡཾ པ་ཙྪི་མ་ཀོ བྷ་ཝོ, ཙ་རི་མོ་ཡཾ ས་མུ་སྶ་ཡོ;
ཛཱ་ཏི་མ་ར་ཎ་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ’’ཏི.
ཨེ་ཝཾ བྷ་ག་ཝཱ ཏི་ཎྞཱ་ཝཱི་ཏི ཏཱ་དཱི.
ཀ་ཐཾ བྷ་ག་ཝཱ མུ་ཏྟཱ་ཝཱི་ཏི ཏཱ་དཱི? བྷ་ག་ཝ་ཏོ རཱ་གཱ ཙི་ཏྟཾ མུ་ཏྟཾ ཝི་མུ་ཏྟཾ སུ་ཝི་མུ་ཏྟཾ, དོ་སཱ ཙི་ཏྟཾ… མོ་ཧཱ ཙི་ཏྟཾ… ཀོ་དྷཱ… ཨུ་པ་ནཱ་ཧཱ… མ་ཀྑཱ… པ་ལཱ༹་སཱ… ཨི་སྶཱ་ཡ… མ་ཙྪ་རི་ཡཱ… མཱ་ཡཱ་ཡ… སཱ་ཋེ་ཡྻཱ… ཐ་མྦྷཱ… སཱ་ར་མྦྷཱ… མཱ་ནཱ… ཨ་ཏི་མཱ་ནཱ… མ་དཱ… པ་མཱ་དཱ… ས་བྦ་ཀི་ལེ་སེ་ཧི… ས་བྦ་དུ་ཙྩ་རི་ཏེ་ཧི… ས་བྦ་ད་ར་ཐེ་ཧི… ས་བྦ་པ་རི་ལཱ༹་ཧེ་ཧི… ས་བྦ་ས་ནྟཱ་པེ་ཧི… ས་བྦཱ་ཀུ་ས་ལཱ་བྷི་ས་ངྑཱ་རེ་ཧི ཙི་ཏྟཾ མུ་ཏྟཾ ཝི་མུ་ཏྟཾ སུ་ཝི་མུ་ཏྟཾ. ཨེ་ཝཾ བྷ་ག་ཝཱ མུ་ཏྟཱ་ཝཱི་ཏི ཏཱ་དཱི.
ཀ་ཐཾ བྷ་ག་ཝཱ ཏཾ་ནི་དྡེ་སཱ ཏཱ་དཱི? བྷ་ག་ཝཱ སཱི་ལེ ས་ཏི སཱི་ལ་ཝཱ་ཏི ཏཾ་ནི་དྡེ་སཱ ཏཱ་དཱི, ས་དྡྷཱ་ཡ ས་ཏི ས་དྡྷོ་ཏི ཏཾ་ནི་དྡེ་སཱ ཏཱ་དཱི, ཝཱི་རི་ཡེ ས་ཏི ཝཱི་རི་ཡ་ཝཱ་ཏི ཏཾ་ནི་དྡེ་སཱ ཏཱ་དཱི, ས་ཏི་ཡཱ ས་ཏི ས་ཏི་མཱ་ཏི ཏཾ་ནི་དྡེ་སཱ ཏཱ་དཱི, ས་མཱ་དྷི་སྨིཾ ས་ཏི ས་མཱ་ཧི་ཏོ་ཏི ཏཾ་ནི་དྡེ་སཱ ཏཱ་དཱི, པ་ཉྙཱ་ཡ ས་ཏི པ་ཉྙ་ཝཱ་ཏི ཏཾ་ནི་དྡེ་སཱ ཏཱ་དཱི, ཝི་ཛྫཱ་ཡ ས་ཏི ཏེ་ཝི་ཛྫོ་ཏི ཏཾ་ནི་དྡེ་སཱ ཏཱ་དཱི, ཨ་བྷི་ཉྙཱ་ཡ ས་ཏི ཚ་ལ༹་བྷི་ཉྙོ་ཏི ཏཾ་ནི་དྡེ་སཱ ཏཱ་དཱི, ད་ས་བ་ལེ ས་ཏི ད་ས་བ་ལོ་ཏི ཏཾ་ནི་དྡེ་སཱ ཏཱ་དཱི. ཨེ་ཝཾ བྷ་ག་ཝཱ ཏཾ་ནི་དྡེ་སཱ ཏཱ་དཱི་ཏི – ཏཾ བུ་དྡྷཾ ཨ་སི་ཏཾ ཏཱ་དིཾ.
ཨ་ཀུ་ཧཾ ག་ཎི་མཱ་ག་ཏནྟི. ཨ་ཀུ་ཧོཏི ཏཱི་ཎི ཀུ་ཧ་ན་ཝ་ཏྠཱུ་ནི – པ་ཙྩ་ཡ་པ་ཊི་སེ་ཝ་ན་ས་ངྑཱ་ཏཾ ཀུ་ཧ་ན་ཝ་ཏྠུ, ཨི་རི་ཡཱ་པ་ཐ་ས་ངྑཱ་ཏཾ ཀུ་ཧ་ན་ཝ་ཏྠུ, སཱ་མ་ནྟ་ཛ་པྤ་ན་ས་ངྑཱ་ཏཾ ཀུ་ཧ་ན་ཝ་ཏྠུ.
ཀ་ཏ་མཾ པ་ཙྩ་ཡ་པ་ཊི་སེ་ཝ་ན་ས་ངྑཱ་ཏཾ ཀུ་ཧ་ན་ཝ་ཏྠུ? ཨི་དྷ ག་ཧ་པ་ཏི་ཀཱ བྷི་ཀྑུཾ ནི་མ་ནྟེ་ནྟི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རེ་ཧི. སོ པཱ་པི་ཙྪོ ཨི་ཙྪཱ་པ་ཀ་ཏོ ཨ་ཏྠི་ཀོ [ཨ་ཏི་ཏྟི་ཀོ (སཱི.), ཨི་ཏྠི་ཀོ (སྱཱ.), པུ་རཱ་བྷེ་ད་སུ་ཏྟ་ནི་དྡེ་སེ པཱ་ཋ་ནཱ་ན་ཏྟཾ ན་ཏྠི] ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ནཾ བྷི་ཡྻོ་ཀ་མྱ་ཏཾ ཨུ་པཱ་དཱ་ཡ ཙཱི་ཝ་རཾ པ་ཙྩ་ཀྑཱ་ཏི, པི་ཎྜ་པཱ་ཏཾ པ་ཙྩ་ཀྑཱ་ཏི, སེ་ནཱ་ས་ནཾ པ་ཙྩ་ཀྑཱ་ཏི, གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ པ་ཙྩ་ཀྑཱ་ཏི. སོ ཨེ་ཝ་མཱ་ཧ – ‘‘ཀིཾ ས་མ་ཎ་སྶ མ་ཧ་གྒྷེ་ན ཙཱི་ཝ་རེ་ན! ཨེ་ཏཾ སཱ་རུ་པྤཾ, ཡཾ ས་མ་ཎོ སུ་སཱ་ནཱ ཝཱ ས་ངྐཱ་ར་ཀཱུ་ཊཱ ཝཱ པཱ་པ་ཎི་ཀཱ ཝཱ ན་ནྟ་ཀཱ་ནི ཨུ་ཙྩི་ནི་ཏྭཱ ས་ངྒྷཱ་ཊིཾ ཀ་རི་ཏྭཱ དྷཱ་རེ་ཡྻ. ཀིཾ ས་མ་ཎ་སྶ མ་ཧ་གྒྷེ་ན པི་ཎྜ་པཱ་ཏེ་ན! ཨེ་ཏཾ སཱ་རུ་པྤཾ, ཡཾ ས་མ་ཎོ ཨུ་ཉྪཱ་ཙ་རི་ཡཱ་ཡ པི་ཎྜི་ཡཱ་ལོ་པེ་ན ཛཱི་ཝི་ཏཾ ཀ་པྤེ་ཡྻ. ཀིཾ ས་མ་ཎ་སྶ མ་ཧ་གྒྷེ་ན སེ་ནཱ་ས་ནེ་ན! ཨེ་ཏཾ སཱ་རུ་པྤཾ, ཡཾ ས་མ་ཎོ རུ་ཀྑ་མཱུ་ལི་ཀོ ཝཱ ཨ་སྶ སོ་སཱ་ནི་ཀོ ཝཱ ཨ་བྦྷོ་ཀཱ་སི་ཀོ ཝཱ. ཀིཾ ས་མ་ཎ་སྶ མ་ཧ་གྒྷེ་ན གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རེ་ན! ཨེ་ཏཾ སཱ་རུ་པྤཾ, ཡཾ ས་མ་ཎོ པཱུ་ཏི་མུ་ཏྟེ་ན ཧ་རི་ཏ་ཀཱི་ཁ་ཎྜེ་ན ཨོ་ས་དྷཾ ཀ་རེ་ཡྻཱ’’ཏི ཏ་དུ་པཱ་དཱ་ཡ ལཱུ་ཁཾ ཙཱི་ཝ་རཾ དྷཱ་རེ་ཏི, ལཱུ་ཁཾ པི་ཎྜ་པཱ་ཏཾ པ་རི་བྷུ་ཉྫ་ཏི, ལཱུ་ཁཾ སེ་ནཱ་ས་ནཾ པ་ཊི་སེ་ཝ་ཏི, ལཱུ་ཁཾ གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ པ་ཊི་སེ་ཝ་ཏི. ཏ་མེ་ནཾ ག་ཧ་པ་ཏི་ཀཱ ཨེ་ཝཾ ཛཱ་ན་ནྟི – ‘‘ཨ་ཡཾ ས་མ་ཎོ ཨ་པྤི་ཙྪོ ས་ནྟུ་ཊྛོ པ་ཝི་ཝི་ཏྟོ ཨ་སཾ་ས་ཊྛོ ཨཱ་ར་དྡྷ་ཝཱི་རི་ཡོ དྷུ་ཏ་ཝཱ་དོ’’ཏི བྷི་ཡྻོ བྷི་ཡྻོ ནི་མ་ནྟེ་ནྟི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རེ་ཧི. སོ ཨེ་ཝ་མཱ་ཧ – ‘‘ཏི་ཎྞཾ ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི, ས་དྡྷཱ་ཡ ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི, དེ་ཡྻ་དྷ་མྨ་སྶ ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི, ད་ཀྑི་ཎེ་ཡྻཱ་ནཾ ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི. ཏུ་མྷཱ་ཀ་ཉྩེ་ཝཱ་ཡཾ ས་དྡྷཱ ཨ་ཏྠི, དེ་ཡྻ་དྷ་མྨོ ཙ སཾ་ཝི་ཛྫ་ཏི, ཨ་ཧ་ཉྩ པ་ཊི་གྒཱ་ཧ་ཀོ. ས་ཙེ ཨ་ཧཾ ན པ་ཊི་གྒ་ཧེ་སྶཱ་མི, ཨེ་ཝཾ ཏུ་མྷེ པུ་ཉྙེ་ན པ་རི་བཱ་ཧི་རཱ [པ་ཊི་བཱ་ཧི་རཱ (ཀ.)] བྷ་ཝི་སྶ་ཐ, ན མ་ཡ྄ཧཾ ཨི་མི་ནཱ ཨ་ཏྠོ, ཨ་པི ཙ ཏུ་མྷཱ་ཀཾ་ཡེ་ཝ ཨ་ནུ་ཀ་མྤཱ་ཡ པ་ཊི་གྒ་ཎྷཱ་མཱི’’ཏི. ཏ་དུ་པཱ་དཱ་ཡ བ་ཧུ་མྤི ཙཱི་ཝ་རཾ པ་ཊི་གྒ་ཎྷཱ་ཏི [པ་ཊི་ག་ཎྷ་ཏི (སཱི.)], བ་ཧུ་མྤི པི་ཎྜ་པཱ་ཏཾ པ་ཊི་གྒ་ཎྷཱ་ཏི, བ་ཧུ་མྤི སེ་ནཱ་ས་ནཾ པ་ཊི་གྒ་ཎྷཱ་ཏི, བ་ཧུ་མྤི གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ པ་ཊི་གྒ་ཎྷཱ་ཏི. ཡཱ ཨེ་ཝ་རཱུ་པཱ བྷཱ་ཀུ་ཊི་ཀཱ བྷཱ་ཀུ་ཊི་ཡཾ ཀུ་ཧ་ནཱ ཀུ་ཧཱ་ཡ་ནཱ ཀུ་ཧི་ཏ་ཏྟཾ – ཨི་དཾ པ་ཙྩ་ཡ་པ་ཊི་སེ་ཝ་ན་ས་ངྑཱ་ཏཾ ཀུ་ཧ་ན་ཝ་ཏྠུ.
ཀ་ཏ་མཾ ཨི་རི་ཡཱ་པ་ཐ་ས་ངྑཱ་ཏཾ ཀུ་ཧ་ན་ཝ་ཏྠུ? ཨི་དྷེ་ཀ་ཙྩོ པཱ་པི་ཙྪོ ཨི་ཙྪཱ་པ་ཀ་ཏོ ས་མྦྷཱ་ཝ་ནཱ་དྷི་པྤཱ་ཡོ, ‘‘ཨེ་ཝཾ མཾ ཛ་ནོ ས་མྦྷཱ་ཝེ་སྶ་ཏཱི’’ཏི ག་མ་ནཾ ས་ཎྛ་པེ་ཏི, ཋཱ་ནཾ ས་ཎྛ་པེ་ཏི, ནི་ས་ཛྫཾ ས་ཎྛ་པེ་ཏི, ས་ཡ་ནཾ ས་ཎྛ་པེ་ཏི, པ་ཎི་དྷཱ་ཡ ག་ཙྪ་ཏི, པ་ཎི་དྷཱ་ཡ ཏི་ཊྛ་ཏི, པ་ཎི་དྷཱ་ཡ ནི་སཱི་ད་ཏི, པ་ཎི་དྷཱ་ཡ སེ་ཡྻཾ ཀ་པྤེ་ཏི, ས་མཱ་ཧི་ཏོ ཝི་ཡ ག་ཙྪ་ཏི, ས་མཱ་ཧི་ཏོ ཝི་ཡ ཏི་ཊྛ་ཏི, ས་མཱ་ཧི་ཏོ ཝི་ཡ ནི་སཱི་ད་ཏི, ས་མཱ་ཧི་ཏོ ཝི་ཡ སེ་ཡྻཾ ཀ་པྤེ་ཏི, ཨཱ་པཱ་ཐ་ཀ་ཛ྄ཛྷཱ་ཡཱི་ཝ ཧོ་ཏི. ཡཱ ཨེ་ཝ་རཱུ་པཱ ཨི་རི་ཡཱ་པ་ཐ་སྶ ཨཱ་ཋ་པ་ནཱ ཋ་པ་ནཱ ས་ཎྛ་པ་ནཱ བྷཱ་ཀུ་ཊི་ཀཱ བྷཱ་ཀུ་ཊི་ཡཾ ཀུ་ཧ་ནཱ ཀུ་ཧཱ་ཡ་ནཱ ཀུ་ཧི་ཏ་ཏྟཾ – ཨི་དཾ ཨི་རི་ཡཱ་པ་ཐ་ས་ངྑཱ་ཏཾ ཀུ་ཧ་ན་ཝ་ཏྠུ.
ཀ་ཏ་མཾ སཱ་མ་ནྟ་ཛ་པྤ་ན་ས་ངྑཱ་ཏཾ ཀུ་ཧ་ན་ཝ་ཏྠུ? ཨི་དྷེ་ཀ་ཙྩོ པཱ་པི་ཙྪོ ཨི་ཙྪཱ་པ་ཀ་ཏོ ས་མྦྷཱ་ཝ་ནཱ་དྷི་པྤཱ་ཡོ ‘‘ཨེ་ཝཾ མཾ ཛ་ནོ ས་མྦྷཱ་ཝེ་སྶ་ཏཱི’’ཏི, ཨ་རི་ཡ་དྷ་མྨ་ས་ནྣི་སྶི་ཏཾ ཝཱ་ཙཾ བྷཱ་ས་ཏི. ‘‘ཡོ ཨེ་ཝ་རཱུ་པཾ ཙཱི་ཝ་རཾ དྷཱ་རེ་ཏི སོ ས་མ་ཎོ མ་ཧེ་ས་ཀྑོ’’ཏི བྷ་ཎ་ཏི; ‘‘ཡོ ཨེ་ཝ་རཱུ་པཾ པ་ཏྟཾ དྷཱ་རེ་ཏི… ལོ་ཧ་ཐཱ་ལ་ཀཾ དྷཱ་རེ་ཏི… དྷ་མྨ་ཀ་ར་ཎཾ [དྷ་མྨ་ཀ་ར་ཀཾ (སཱི. སྱཱ.) ཨ་བྷི་དྷཱ་ན་པྤ་དཱི་པི་ཀཱ་བྷི་ན་ཝ་ནི་སྶ་ཡཾ ཨོ་ལོ་ཀེ་ཏ་བྦཾ] དྷཱ་རེ་ཏི… པ་རི་སྶཱ་ཝ་ནཾ དྷཱ་རེ་ཏི… ཀུ་ཉྩི་ཀཾ དྷཱ་རེ་ཏི… ཨུ་པཱ་ཧ་ནཾ དྷཱ་རེ་ཏི… ཀཱ་ཡ་བ་ནྡྷ་ནཾ དྷཱ་རེ་ཏི… ཨཱ་ཡོ་གཾ དྷཱ་རེ་ཏི, སོ ས་མ་ཎོ མ་ཧེ་ས་ཀྑོ’’ཏི བྷ་ཎ་ཏི; ‘‘ཡ་སྶ ཨེ་ཝ་རཱུ་པོ ཨུ་པ་ཛ྄ཛྷཱ་ཡོ སོ ས་མ་ཎོ མ་ཧེ་ས་ཀྑོ’’ཏི བྷ་ཎ་ཏི; ‘‘ཡ་སྶ ཨེ་ཝ་རཱུ་པོ ཨཱ་ཙ་རི་ཡོ… ཨེ་ཝ་རཱུ་པཱ ས་མཱ་ནུ་པ་ཛ྄ཛྷཱ་ཡ་ཀཱ… ས་མཱ་ནཱ་ཙ་རི་ཡ་ཀཱ… མི་ཏྟཱ… ས་ནྡི་ཊྛཱ… ས་མྦྷ་ཏྟཱ… ས་ཧཱ་ཡཱ, སོ ས་མ་ཎོ མ་ཧེ་ས་ཀྑོ’’ཏི བྷ་ཎ་ཏི; ‘‘ཡོ ཨེ་ཝ་རཱུ་པེ ཝི་ཧཱ་རེ ཝ་ས་ཏི, སོ ས་མ་ཎོ མ་ཧེ་ས་ཀྑོ’’ཏི བྷ་ཎ་ཏི; ‘‘ཡོ ཨེ་ཝ་རཱུ་པེ ཨ་ཌྜྷ་ཡོ་གེ ཝ་ས་ཏི… པཱ་སཱ་དེ ཝ་ས་ཏི… ཧ་མྨི་ཡེ ཝ་ས་ཏི… གུ་ཧཱ་ཡཾ ཝ་ས་ཏི… ལེ་ཎེ ཝ་ས་ཏི… ཀུ་ཊི་ཡཱ ཝ་ས་ཏི… ཀཱུ་ཊཱ་གཱ་རེ ཝ་ས་ཏི… ཨ་ཊྚེ ཝ་ས་ཏི … མཱ་ལེ༹ ཝ་ས་ཏི… ཨུ་དྡ་ཎྜེ ཝ་ས་ཏི… ཨུ་པ་ཊྛཱ་ན་སཱ་ལཱ་ཡཾ ཝ་ས་ཏི… མ་ཎྜ་པེ ཝ་ས་ཏི… རུ་ཀྑ་མཱུ་ལེ ཝ་ས་ཏི, སོ ས་མ་ཎོ མ་ཧེ་ས་ཀྑོ’’ཏི བྷ་ཎ་ཏི.
ཨ་ཐ ཝཱ ཀོ་ར་ཛི་ཀ་ཀོ་ར་ཛི་ཀོ, བྷཱ་ཀུ་ཊི་ཀ་བྷཱ་ཀུ་ཊི་ཀོ, ཀུ་ཧ་ཀ་ཀུ་ཧ་ཀོ, ལ་པ་ཀ་ལ་པ་ཀོ, མུ་ཁ་ས་མྦྷཱ་ཝི་ཏོ ‘‘ཨ་ཡཾ ས་མ་ཎོ ཨི་མཱ་སཾ ཨེ་ཝ་རཱུ་པཱ་ནཾ ཝི་ཧཱ་ར་ས་མཱ་པ་ཏྟཱི་ནཾ ལཱ་བྷཱི’’ཏི. ཏཱ་དི་སཾ ག་མྦྷཱི་རཾ གཱུ་ལ༹ྷཾ ནི་པུ་ཎཾ པ་ཊི་ཙྪ་ནྣཾ ལོ་ཀུ་ཏྟ་རཾ སུ་ཉྙ་ཏཱ་པ་ཊི་ས་ཉྙུ་ཏྟཾ ཀ་ཐཾ ཀ་ཐེ་ཏི. ཡཱ ཨེ་ཝ་རཱུ་པཱ བྷཱ་ཀུ་ཊི་ཀཱ བྷཱ་ཀུ་ཊི་ཡཾ ཀུ་ཧ་ནཱ ཀུ་ཧཱ་ཡ་ནཱ ཀུ་ཧི་ཏ་ཏྟཾ – ཨི་དཾ སཱ་མ་ནྟ་ཛ་པྤ་ན་ས་ངྑཱ་ཏཾ ཀུ་ཧ་ན་ཝ་ཏྠུ. བུ་དྡྷ་སྶ བྷ་ག་ཝ་ཏོ ཨི་མཱ་ནི ཏཱི་ཎི ཀུ་ཧ་ན་ཝ་ཏྠཱུ་ནི པ་ཧཱི་ནཱ་ནི ས་མུ་ཙྪི་ནྣཱ་ནི ཝཱུ་པ་ས་ནྟཱ་ནི པ་ཊི་པ་སྶ་དྡྷཱ་ནི ཨ་བྷ་བྦུ་པྤ་ཏྟི་ཀཱ་ནི ཉཱ་ཎ་གྒི་ནཱ ད་ཌྜྷཱ་ནི. ཏ་སྨཱ བུ་དྡྷོ ཨ་ཀུ་ཧོ་ཏི – ཨ་ཀུ་ཧཾ.
ག་ཎི་མཱ་ག་ཏནྟི. ག་ཎཱིཏི ག་ཎཱི བྷ་ག་ཝཱ. ག་ཎཱ་ཙ་རི་ཡོ་ཏི ག་ཎཱི, ག་ཎ་སྶ ས་ཏྠཱ་ཏི ག་ཎཱི, ག་ཎཾ པ་རི་ཧ་ར་ཏཱི་ཏི ག་ཎཱི, ག་ཎཾ ཨོ་ཝ་ད་ཏཱི་ཏི ག་ཎཱི, ག་ཎཾ ཨ་ནུ་སཱ་ས་ཏཱི་ཏི ག་ཎཱི, ཝི་སཱ་ར་དོ ག་ཎཾ ཨུ་པ་ས་ངྐ་མ་ཏཱི་ཏི ག་ཎཱི, ག་ཎ་སྶ སུ་སྶཱུ་ས་ཏི སོ་ཏཾ ཨོ་ད་ཧ་ཏི ཨ་ཉྙཱ ཙི་ཏྟཾ ཨུ་པ་ཊྛ་པེ་ཏཱི་ཏི ག་ཎཱི, ག་ཎཾ ཨ་ཀུ་ས་ལཱ ཝུ་ཊྛཱ་པེ་ཏྭཱ ཀུ་ས་ལེ པ་ཏི་ཊྛཱ་པེ་ཏཱི་ཏི ག་ཎཱི, བྷི་ཀྑུ་ག་ཎ་སྶ ག་ཎཱི, བྷི་ཀྑུ་ནཱི་ག་ཎ་སྶ ག་ཎཱི, ཨུ་པཱ་ས་ཀ་ག་ཎ་སྶ ག་ཎཱི, ཨུ་པཱ་སི་ཀཱ་ག་ཎ་སྶ ག་ཎཱི, རཱ་ཛ་ག་ཎ་སྶ ག་ཎཱི, ཁ་ཏྟི་ཡ་ག་ཎ་སྶ ག་ཎཱི, བྲཱ་ཧྨ་ཎ་ག་ཎ་སྶ ག་ཎཱི, ཝེ་སྶ་ག་ཎ་སྶ ག་ཎཱི, སུ་དྡ་ག་ཎ་སྶ ག་ཎཱི, བྲ་ཧྨ་ག་ཎ་སྶ ག་ཎཱི, དེ་ཝ་ག་ཎ་སྶ ག་ཎཱི, ས་ངྒྷིཾ [སཾ་གྷ་ག་ཎ་སྶ ག་ཎཱི (སཱི.)] ག་ཎིཾ ག་ཎཱ་ཙ་རི་ཡཾ. ཨཱ་ག་ཏནྟི ཨུ་པ་ག་ཏཾ ས་མུ་པ་ག་ཏཾ ས་མུ་པ་པ་ནྣཾ [ས་མྤ་ཏྟཾ (བ་ཧཱུ་སུ)] ས་ངྐ་སྶ་ན་ག་ར་ནྟི – ཨ་ཀུ་ཧཾ ག་ཎི་མཱ་ག་ཏཾ.
བ་ཧཱུ་ན་མི་དྷ བ་དྡྷཱ་ནནྟི. བ་ཧཱུ་ནཾ ཁ་ཏྟི་ཡཱ་ནཾ བྲཱ་ཧྨ་ཎཱ་ནཾ ཝེ་སྶཱ་ནཾ སུ་དྡཱ་ནཾ ག་ཧ་ཊྛཱ་ནཾ པ་བྦ་ཛི་ཏཱ་ནཾ དེ་ཝཱ་ནཾ མ་ནུ་སྶཱ་ནཾ. བ་དྡྷཱ་ནནྟི བ་དྡྷཱ་ནཾ བ་དྡྷ་ཙ་རཱ་ནཾ པ་རི་ཙཱ་ར་ཀཱ་ནཾ སི་སྶཱ་ན་ནྟི – བ་ཧཱུ་ན་མི་དྷ བ་དྡྷཱ་ནཾ.
ཨ་ཏྠི པ་ཉྷེ་ན ཨཱ་ག་མནྟི. པ་ཉྷེ་ན ཨ་ཏྠི་ཀོ ཨཱ་ག་ཏོ་མྷི [ཨ་ཏྠི་ཀཱ་མྷ ཨཱ་ག་ཏཱ (སཱི. ཀ.) ཨེ་ཝ་མཱི་དི་སེ་སུ དྭཱི་སུ པ་དེ་སུ་པི བ་ཧུ་ཝ་ཙ་ནེ་ན], པ་ཉྷཾ པུ་ཙྪི་ཏུ་ཀཱ་མོ ཨཱ་ག་ཏོ་མྷི, པ་ཉྷཾ སོ་ཏུ་ཀཱ་མོ ཨཱ་ག་ཏོ་མྷཱི་ཏི. ཨེ་ཝ་མྤི ཨ་ཏྠི པ་ཉྷེ་ན ཨཱ་ག་མཾ. ཨ་ཐ ཝཱ པ་ཉྷ་ཏྠི་ཀཱ་ནཾ པ་ཉྷཾ པུ་ཙྪི་ཏུ་ཀཱ་མཱ་ནཾ པ་ཉྷཾ སོ་ཏུ་ཀཱ་མཱ་ནཾ ཨཱ་ག་མ་ནཾ ཨ་བྷི་ཀྐ་མ་ནཾ ཨུ་པ་ས་ངྐ་མ་ནཾ པ་ཡི་རུ་པཱ་ས་ནཾ [པ་ཡི་རུ་པཱ་ས་ནཱ (སྱཱ. ཀ.)] སི་ཡཱ ཨ་ཏྠཱི་ཏི. ཨེ་ཝ་མྤི ཨ་ཏྠི པ་ཉྷེ་ན ཨཱ་ག་མཾ. ཨ་ཐ ཝཱ པ་ཉྷཱ་ག་མོ ཏུ་ཡ྄ཧཾ ཨ་ཏྠི, ཏྭ་མྤི པ་ཧུ [ཨི་མཱ་ནི ཏཱི་ཎི པ་དཱ་ནི ན་ཏྠི སྱཱ. པོ་ཏྠ་ཀེ], ཏྭ་མ་སི ཨ་ལ་མ་ཏྠོ མ་ཡཱ པུ་ཙྪི་ཏཾ ཀ་ཐེ་ཏུཾ ཝི་ས་ཛྫེ་ཏུཾ ‘‘ཝ་ཧ་སྶེ་ཏཾ བྷཱ་ར’’ནྟི. ཨེ་ཝ་མྤི ཨ་ཏྠི པ་ཉྷེ་ན ཨཱ་ག་མཾ.
ཏེ་ནཱ་ཧ ཐེ་རོ སཱ་རི་པུ་ཏྟོ –
‘‘ཏཾ བུ་དྡྷཾ ཨ་སི་ཏཾ ཏཱ་དིཾ, ཨ་ཀུ་ཧཾ ག་ཎི་མཱ་ག་ཏཾ;
བ་ཧཱུ་ན་མི་དྷ བ་དྡྷཱ་ནཾ, ཨ་ཏྠི པ་ཉྷེ་ན ཨཱ་ག་མ’’ནྟི.
༡༩༣. བྷི་ཀྑུ་ནོ ཝི་ཛི་གུ་ཙྪ་ཏོ, བྷ་ཛ་ཏོ རི་ཏྟ་མཱ་ས་ནཾ;
རུ་ཀྑ་མཱུ་ལཾ སུ་སཱ་ནཾ ཝཱ, པ་བྦ་ཏཱ་ནཾ གུ་ཧཱ་སུ ཝཱ.
བྷི་ཀྑུ་ནོ ཝི་ཛི་གུ་ཙྪ་ཏོཏི. བྷི་ཀྑུ་ནོཏི པུ་ཐུ་ཛྫ་ན་ཀ་ལྱཱ་ཎ་སྶ ཝཱ བྷི་ཀྑུ་ནོ སེ་ཀྑ་སྶ ཝཱ བྷི་ཀྑུ་ནོ. ཝི་ཛི་གུ་ཙྪ་ཏོཏི ཛཱ་ཏི་ཡཱ ཝི་ཛི་གུ་ཙྪ་ཏོ, ཛ་རཱ་ཡ… བྱཱ་དྷི་ནཱ… མ་ར་ཎེ་ན… སོ་ཀེ་ཧི… པ་རི་དེ་ཝེ་ཧི… དུ་ཀྑེ་ཧི… དོ་མ་ན་སྶེ་ཧི… ཨུ་པཱ་ཡཱ་སེ་ཧི ཝི་ཛི་གུ་ཙྪ་ཏོ, ནེ་ར་ཡི་ཀེ་ན དུ་ཀྑེ་ན… ཏི་ར་ཙྪཱ་ན་ཡོ་ནི་ཀེ་ན དུ་ཀྑེ་ན… པེ་ཏྟི་ཝི་ས་ཡི་ཀེ་ན དུ་ཀྑེ་ན… མཱ་ནུ་སི་ཀེ་ན [མཱ་ནུ་ས་ཀེ་ན (སཱི. སྱཱ.) མ་ཧཱ་ནི. ༡༧༡] དུ་ཀྑེ་ན… ག་བྦྷོ་ཀྐ་ནྟི་མཱུ་ལ་ཀེ་ན དུ་ཀྑེ་ན… ག་བྦྷ་ཊྛི་ཏི་མཱུ་ལ་ཀེ་ན དུ་ཀྑེ་ན… ག་བྦྷ་ཝུ་ཊྛཱ་ན་མཱུ་ལ་ཀེ་ན དུ་ཀྑེ་ན… ཛཱ་ཏ་སྶཱུ་པ་ནི་བ་ནྡྷ་ཀེ་ན དུ་ཀྑེ་ན… ཛཱ་ཏ་སྶ པ་རཱ་དྷེ་ཡྻ་ཀེ་ན དུ་ཀྑེ་ན… ཨ་ཏྟཱུ་པ་ཀྐ་མེ་ན དུ་ཀྑེ་ན… པ་རཱུ་པ་ཀྐ་མེ་ན དུ་ཀྑེ་ན… དུ་ཀྑ་དུ་ཀྑེ་ན… ས་ངྑཱ་ར་དུ་ཀྑེ་ན … ཝི་པ་རི་ཎཱ་མ་དུ་ཀྑེ་ན… ཙ་ཀྑུ་རོ་གེ་ན དུ་ཀྑེ་ན… སོ་ཏ་རོ་གེ་ན དུ་ཀྑེ་ན… གྷཱ་ན་རོ་གེ་ན དུ་ཀྑེ་ན… ཛི་ཝ྄ཧཱ་རོ་གེ་ན དུ་ཀྑེ་ན… ཀཱ་ཡ་རོ་གེ་ན དུ་ཀྑེ་ན… སཱི་ས་རོ་གེ་ན དུ་ཀྑེ་ན… ཀ་ཎྞ་རོ་གེ་ན དུ་ཀྑེ་ན… མུ་ཁ་རོ་གེ་ན དུ་ཀྑེ་ན… ད་ནྟ་རོ་གེ་ན དུ་ཀྑེ་ན… ཀཱ་སེ་ན… སཱ་སེ་ན… པི་ནཱ་སེ་ན… ཌཱ་ཧེ་ན… ཛ་རེ་ན… ཀུ་ཙྪི་རོ་གེ་ན… མུ་ཙྪཱ་ཡ… པ་ཀྑ་ནྡི་ཀཱ་ཡ… སཱུ་ལཱ་ཡ… ཝི་སཱུ་ཙི་ཀཱ་ཡ… ཀུ་ཊྛེ་ན… ག་ཎྜེ་ན… ཀི་ལཱ་སེ་ན… སོ་སེ་ན… ཨ་པ་མཱ་རེ་ན… ད་དྡུ་ཡཱ… ཀ་ཎྜུ་ཡཱ… ཀ་ཙྪུ་ཡཱ… ར་ཁ་སཱ་ཡ… ཝི་ཏ་ཙྪི་ཀཱ་ཡ… ལོ་ཧི་ཏེ་ན… པི་ཏྟེ་ན… མ་དྷུ་མེ་ཧེ་ན… ཨཾ་སཱ་ཡ… པི་ལ༹་ཀཱ་ཡ… བྷ་ག་ནྡ་ལེ་ན… པི་ཏྟ་ས་མུ་ཊྛཱ་ནེ་ན ཨཱ་བཱ་དྷེ་ན… སེ་མྷ་ས་མུ་ཊྛཱ་ནེ་ན ཨཱ་བཱ་དྷེ་ན… ཝཱ་ཏ་ས་མུ་ཊྛཱ་ནེ་ན ཨཱ་བཱ་དྷེ་ན… ས་ནྣི་པཱ་ཏི་ཀེ་ན ཨཱ་བཱ་དྷེ་ན… ཨུ་ཏུ་པ་རི་ཎཱ་མ་ཛེ་ན ཨཱ་བཱ་དྷེ་ན… ཝི་ས་མ་པ་རི་ཧཱ་ར་ཛེ་ན ཨཱ་བཱ་དྷེ་ན… ཨོ་པ་ཀྐ་མི་ཀེ་ན ཨཱ་བཱ་དྷེ་ན… ཀ་མྨ་ཝི་པཱ་ཀ་ཛེ་ན ཨཱ་བཱ་དྷེ་ན… སཱི་ཏེ་ན… ཨུ་ཎྷེ་ན… ཛི་གྷ་ཙྪཱ་ཡ… པི་པཱ་སཱ་ཡ… ཨུ་ཙྩཱ་རེ་ན … པ་སྶཱ་ཝེ་ན… ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶེ་ན དུ་ཀྑེ་ན… མཱ་ཏུ་མ་ར་ཎེ་ན དུ་ཀྑེ་ན… པི་ཏུ་མ་ར་ཎེ་ན དུ་ཀྑེ་ན… བྷཱ་ཏུ་མ་ར་ཎེ་ན… བྷ་གི་ནི་མ་ར་ཎེ་ན… པུ་ཏྟ་མ་ར་ཎེ་ན … དྷཱི་ཏུ་མ་ར་ཎེ་ན… ཉཱ་ཏི་བྱ་ས་ནེ་ན… བྷོ་ག་བྱ་ས་ནེ་ན… རོ་ག་བྱ་ས་ནེ་ན… སཱི་ལ་བྱ་ས་ནེ་ན… དི་ཊྛི་བྱ་ས་ནེ་ན དུ་ཀྑེ་ན ཝི་ཛི་གུ་ཙྪ་ཏོ ཨ་ཊྚཱི་ཡ་ཏོ ཧ་རཱ་ཡ་ཏོ ཛི་གུ་ཙྪ་ཏོ་ཏི – བྷི་ཀྑུ་ནོ ཝི་ཛི་གུ་ཙྪ་ཏོ.
བྷ་ཛ་ཏོ རི་ཏྟ་མཱ་ས་ནནྟི. ཨཱ་ས་ནཾ ཝུ་ཙྩ་ཏི ཡ་ཏྠ ནི་སཱི་ད་ཏི – མ་ཉྩོ པཱི་ཋཾ བྷི་སི ཏ་ཊྚི་ཀཱ ཙ་མྨ་ཁ་ཎྜོ ཏི་ཎ་ས་ནྠཱ་རོ པ་ཎྞ་ས་ནྠཱ་རོ པ་ལཱ་ལ་ས་ནྠཱ་རོ [པ་ལཱ་ས་ས་ནྠཱ་རོ (སཱི. སྱཱ.)]. ཏཾ ཨཱ་ས་ནཾ ཨ་ས་པྤཱ་ཡ་རཱུ་པ་ད་སྶ་ནེ་ན རི་ཏྟཾ ཝི་ཝི་ཏྟཾ པ་ཝི་ཝི་ཏྟཾ, ཨ་ས་པྤཱ་ཡ་ས་དྡ་སྶ་ཝ་ནེ་ན རི་ཏྟཾ ཝི་ཝི་ཏྟཾ པ་ཝི་ཝི་ཏྟཾ, ཨ་ས་པྤཱ་ཡེ་ཧི པ་ཉྩ་ཧི ཀཱ་མ་གུ་ཎེ་ཧི རི་ཏྟཾ ཝི་ཝི་ཏྟཾ པ་ཝི་ཝི་ཏྟཾ. ཏཾ པ་ཝི་ཝི་ཏྟཾ ཨཱ་ས་ནཾ བྷ་ཛ་ཏོ ས་མྦྷ་ཛ་ཏོ སེ་ཝ་ཏོ ནི་སེ་ཝ་ཏོ སཾ་སེ་ཝ་ཏོ པ་ཊི་སེ་ཝ་ཏོ་ཏི – བྷ་ཛ་ཏོ རི་ཏྟ་མཱ་ས་ནཾ.
རུ་ཀྑ་མཱུ་ལཾ སུ་སཱ་ནཾ ཝཱཏི. རུ་ཀྑ་མཱུ་ལཾ་ཡེ་ཝ རུ་ཀྑ་མཱུ་ལཾ, སུ་སཱ་ནཾ་ཡེ་ཝ སུ་སཱ་ན་ནྟི – རུ་ཀྑ་མཱུ་ལཾ སུ་སཱ་ནཾ ཝཱ. པ་བྦ་ཏཱ་ནཾ གུ་ཧཱ་སུ ཝཱཏི. པ་བྦ་ཏཱ་ཡེ་ཝ པ་བྦ་ཏཱ, ཀ་ནྡ་རཱ་ཡེ་ཝ ཀ་ནྡ་རཱ, གི་རི་གུ་ཧཱ་ཡེ་ཝ གི་རི་གུ་ཧཱ. པ་བྦ་ཏ་ནྟ་རི་ཀཱ་ཡོ ཝུ་ཙྩ་ནྟི པ་བྦ་ཏ་པ་བྦྷཱ་རཱ་ཏི – པ་བྦ་ཏཱ་ནཾ གུ་ཧཱ་སུ ཝཱ.
ཏེ་ནཱ་ཧ ཐེ་རོ སཱ་རི་པུ་ཏྟོ –
‘‘བྷི་ཀྑུ་ནོ ཝི་ཛི་གུ་ཙྪ་ཏོ, བྷ་ཛ་ཏོ རི་ཏྟ་མཱ་ས་ནཾ;
རུ་ཀྑ་མཱུ་ལཾ སུ་སཱ་ནཾ ཝཱ, པ་བྦ་ཏཱ་ནཾ གུ་ཧཱ་སུ ཝཱ’’ཏི.
༡༩༤. ཨུ་ཙྩཱ་ཝ་ཙེ་སུ ས་ཡ་ནེ་སུ, ཀི་ཝ་ནྟོ [གཱི་ཝ་ནྟོ (སྱཱ.) མོ་གྒ་ལླཱ་ན་བྱཱ་ཀ་ར་ཎཾ ཨོ་ལོ་ཀེ་ཏ་བྦཾ] ཏ་ཏྠ བྷེ་ར་ཝཱ;
ཡེ ཧི བྷི་ཀྑུ ན ཝེ་དྷེ་ཡྻ, ནི་གྒྷོ་སེ ས་ཡ་ནཱ་ས་ནེ.
ཨུ་ཙྩཱ་ཝ་ཙེ་སུ ས་ཡ་ནེ་སཱུཏི. ཨུ་ཙྩཱ་ཝ་ཙེ་སཱུཏི ཨུ་ཙྩཱ་ཝ་ཙེ་སུ ཧཱི་ན་པྤ་ཎཱི་ཏེ་སུ ཚེ་ཀ་པཱ་པ་ཀེ་སུ. ས་ཡ་ནཾ ཝུ་ཙྩ་ཏི སེ་ནཱ་ས་ནཾ ཝི་ཧཱ་རོ ཨ་ཌྜྷ་ཡོ་གོ པཱ་སཱ་དོ ཧ་མྨི་ཡཾ གུ་ཧཱ་ཏི – ཨུ་ཙྩཱ་ཝ་ཙེ་སུ ས་ཡ་ནེ་སུ. ཀི་ཝ་ནྟོ ཏ་ཏྠ བྷེ་ར་ཝཱཏི. ཀི་ཝ་ནྟོཏི ཀི་ཝ་ནྟོ [ཀུ་ཝ་ནྟོ (སཱི.), གཱི་ཝ་ནྟོ (སྱཱ.)] ཀཱུ་ཛ་ནྟོ ན་ད་ནྟོ ས་དྡཾ ཀ་རོ་ནྟོ. ཨ་ཐ ཝཱ ཀི་ཝ་ནྟོཏི ཀ་ཏི ཀི་ཏྟ་ཀཱ ཀཱི་ཝ་ཏ་ཀཱ ཀཱི་ཝ་བ་ཧུ་ཀཱ ཏེ. བྷེ་ར་ཝཱཏི སཱི་ཧཱ བྱ་གྒྷཱ དཱི་པཱི ཨ་ཙྪཱ ཏ་ར་ཙྪཱ ཀོ་ཀཱ མ་ཧིཾ་སཱ ཧ་ཏྠཱི ཨ་ཧི ཝི་ཙྪི་ཀཱ ས་ཏ་པ་དཱི, ཙོ་རཱ ཝཱ ཨ་སྶུ མཱ་ན་ཝཱ ཝཱ ཀ་ཏ་ཀ་མྨཱ ཝཱ ཨ་ཀ་ཏ་ཀ་མྨཱ ཝཱ་ཏི – ཀི་ཝ་ནྟོ ཏ་ཏྠ བྷེ་ར་ཝཱ.
ཡེ ཧི བྷི་ཀྑུ ན ཝེ་དྷེ་ཡྻཱཏི. ཡེ ཧཱིཏི ཡེ ཧི བྷེ་ར་ཝེ པ་སྶི་ཏྭཱ ཝཱ སུ་ཎི་ཏྭཱ ཝཱ ན ཝེ་དྷེ་ཡྻ ན་པྤ་ཝེ་དྷེ་ཡྻ ན ས་མྤ་ཝེ་དྷེ་ཡྻ ན ཏ་སེ་ཡྻ ན ཨུ་ཏྟ་སེ་ཡྻ ན པ་རི་ཏྟ་སེ་ཡྻ ན བྷཱ་ཡེ་ཡྻ ན ས་ནྟཱ་སཾ ཨཱ་པ་ཛྫེ་ཡྻ, ཨ་བྷཱི་རཱུ ཨ་སྶ ཨ་ཙྪ་མྦྷཱི ཨ་ནུ་ཏྲཱ་སཱི ཨ་པ་ལཱ་ཡཱི, པ་ཧཱི་ན་བྷ་ཡ་བྷེ་ར་ཝོ ཝི་ག་ཏ་ལོ་མ་ཧཾ་སོ ཝི་ཧ་རེ་ཡྻཱ་ཏི – ཡེ ཧི བྷི་ཀྑུ ན ཝེ་དྷེ་ཡྻ.
ནི་གྒྷོ་སེ ས་ཡ་ནཱ་ས་ནེཏི. ཨ་པྤ་ས་དྡེ ཨ་པྤ་ནི་གྒྷོ་སེ ཝི་ཛ་ན་ཝཱ་ཏེ མ་ནུ་སྶ་རཱ་ཧ་སྶེ་ཡྻ་ཀེ པ་ཊི་ས་ལླཱ་ན་སཱ་རུ་པྤེ སེ་ནཱ་ས་ནེ་ཏི – ནི་གྒྷོ་སེ ས་ཡ་ནཱ་ས་ནེ.
ཏེ་ནཱ་ཧ ཐེ་རོ སཱ་རི་པུ་ཏྟོ –
‘‘ཨུ་ཙྩཱ་ཝ་ཙེ་སུ ས་ཡ་ནེ་སུ, ཀི་ཝ་ནྟོ ཏ་ཏྠ བྷེ་ར་ཝཱ;
ཡེ ཧི བྷི་ཀྑུ ན ཝེ་དྷེ་ཡྻ, ནི་གྒྷོ་སེ ས་ཡ་ནཱ་ས་ནེ’’ཏི.
༡༩༥. ཀ་ཏི པ་རི་སྶ་ཡཱ ལོ་ཀེ, ག་ཙྪ་ཏོ ཨ་ག་ཏཾ དི་སཾ;
ཡེ བྷི་ཀྑུ ཨ་བྷི་ས་མྦྷ་ཝེ, པ་ནྟ་མྷི ས་ཡ་ནཱ་ས་ནེ.
ཀ་ཏི པ་རི་སྶ་ཡཱ ལོ་ཀེཏི. ཀ་ཏཱིཏི ཀ་ཏི ཀི་ཏྟ་ཀཱ ཀཱི་ཝ་ཏ་ཀཱ ཀཱི་ཝ་བ་ཧུ་ཀཱ. པ་རི་སྶ་ཡཱཏི དྭེ པ་རི་སྶ་ཡཱ – པཱ་ཀ་ཊ་པ་རི་སྶ་ཡཱ ཙ པ་ཊི་ཙྪ་ནྣ་པ་རི་སྶ་ཡཱ ཙ. ཀ་ཏ་མེ པཱ་ཀ་ཊ་པ་རི་སྶ་ཡཱ? སཱི་ཧཱ བྱ་གྒྷཱ དཱི་པཱི ཨ་ཙྪཱ ཏ་ར་ཙྪཱ ཀོ་ཀཱ མ་ཧིཾ་སཱ ཧ་ཏྠཱི ཨ་ཧི ཝི་ཙྪི་ཀཱ ས་ཏ་པ་དཱི, ཙོ་རཱ ཝཱ ཨ་སྶུ མཱ་ན་ཝཱ ཝཱ ཀ་ཏ་ཀ་མྨཱ ཝཱ ཨ་ཀ་ཏ་ཀ་མྨཱ ཝཱ, ཙ་ཀྑུ་རོ་གོ སོ་ཏ་རོ་གོ གྷཱ་ན་རོ་གོ ཛི་ཝ྄ཧཱ་རོ་གོ ཀཱ་ཡ་རོ་གོ སཱི་ས་རོ་གོ ཀ་ཎྞ་རོ་གོ མུ་ཁ་རོ་གོ ད་ནྟ་རོ་གོ ཀཱ་སོ སཱ་སོ པི་ནཱ་སོ ཌཱ་ཧོ ཛ་རོ ཀུ་ཙྪི་རོ་གོ མུ་ཙྪཱ པ་ཀྑ་ནྡི་ཀཱ སཱུ་ལཱ ཝི་སཱུ་ཙི་ཀཱ ཀུ་ཊྛཾ ག་ཎྜོ ཀི་ལཱ་སོ སོ་སོ ཨ་པ་མཱ་རོ ད་དྡུ ཀ་ཎྜུ ཀ་ཙྪུ ར་ཁ་སཱ ཝི་ཏ་ཙྪི་ཀཱ ལོ་ཧི་ཏཾ པི་ཏྟཾ མ་དྷུ་མེ་ཧོ ཨཾ་སཱ པི་ལ༹་ཀཱ བྷ་ག་ནྡ་ལཱ, པི་ཏྟ་ས་མུ་ཊྛཱ་ནཱ ཨཱ་བཱ་དྷཱ…པེ… སཱི་ཏཾ ཨུ་ཎྷཾ ཛི་གྷ་ཙྪཱ པི་པཱ་སཱ ཨུ་ཙྩཱ་རོ པ་སྶཱ་ཝོ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶཱ – ཨི་མེ ཝུ་ཙྩ་ནྟི པཱ་ཀ་ཊ་པ་རི་སྶ་ཡཱ.
ཀ་ཏ་མེ པ་ཊི་ཙྪ་ནྣ་པ་རི་སྶ་ཡཱ? ཀཱ་ཡ་དུ་ཙྩ་རི་ཏཾ ཝ་ཙཱི་དུ་ཙྩ་རི་ཏཾ མ་ནོ་དུ་ཙྩ་རི་ཏཾ ཀཱ་མ་ཙྪ་ནྡ་ནཱི་ཝ་ར་ཎཾ བྱཱ་པཱ་ད་ནཱི་ཝ་ར་ཎཾ ཐི་ན་མི་དྡྷ་ནཱི་ཝ་ར་ཎཾ ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ ཝི་ཙི་ཀི་ཙྪཱ་ནཱི་ཝ་ར་ཎཾ རཱ་གོ དོ་སོ མོ་ཧོ ཀོ་དྷོ ཨུ་པ་ནཱ་ཧོ མ་ཀྑོ པ་ལཱ༹་སོ ཨི་སྶཱ མ་ཙྪ་རི་ཡཾ མཱ་ཡཱ སཱ་ཋེ་ཡྻཾ ཐ་མྦྷོ སཱ་ར་མྦྷོ མཱ་ནོ ཨ་ཏི་མཱ་ནོ མ་དོ པ་མཱ་དོ, ས་བྦེ ཀི་ལེ་སཱ ས་བྦེ དུ་ཙྩ་རི་ཏཱ ས་བྦེ ད་ར་ཐཱ ས་བྦེ པ་རི་ལཱ༹་ཧཱ ས་བྦེ ས་ནྟཱ་པཱ ས་བྦཱ་ཀུ་ས་ལཱ་བྷི་ས་ངྑཱ་རཱ – ཨི་མེ ཝུ་ཙྩ་ནྟི པ་ཊི་ཙྪ་ནྣ་པ་རི་སྶ་ཡཱ.
པ་རི་སྶ་ཡཱཏི ཀེ་ན་ཊྛེ་ན པ་རི་སྶ་ཡཱ? པ་རི་ས་ཧ་ནྟཱི་ཏི པ་རི་སྶ་ཡཱ, པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི པ་རི་སྶ་ཡཱ, ཏ་ཏྲཱ་ས་ཡཱ་ཏི པ་རི་སྶ་ཡཱ.
ཀ་ཐཾ པ་རི་ས་ཧ་ནྟཱི་ཏི པ་རི་སྶ་ཡཱ? ཏེ པ་རི་སྶ་ཡཱ ཏཾ པུ་གྒ་ལཾ ས་ཧ་ནྟི པ་རི་ས་ཧ་ནྟི ཨ་བྷི་བྷ་ཝ་ནྟི ཨ་ཛ྄ཛྷོ་ཏྠ་ར་ནྟི པ་རི་ཡཱ་དི་ཡ་ནྟི མ་དྡ་ནྟི. ཨེ་ཝཾ པ་རི་ས་ཧ་ནྟཱི་ཏི – པ་རི་སྶ་ཡཱ.
ཀ་ཐཾ པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི པ་རི་སྶ་ཡཱ? ཏེ པ་རི་སྶ་ཡཱ ཀུ་ས་ལཱ་ནཾ དྷ་མྨཱ་ནཾ ཨ་ནྟ་རཱ་ཡཱ་ཡ པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ་སཾ ཀུ་ས་ལཱ་ནཾ དྷ་མྨཱ་ནཾ? ས་མྨཱ་པ་ཊི་པ་དཱ་ཡ ཨ་ནུ་ལོ་མ་པ་ཊི་པ་དཱ་ཡ ཨ་པ་ཙྩ་ནཱི་ཀ་པ་ཊི་པ་དཱ་ཡ ཨ་ཝི་རུ་དྡྷ་པ་ཊི་པ་དཱ་ཡ ཨ་ནྭ་ཏྠ་པ་ཊི་པ་དཱ་ཡ དྷ་མྨཱ་ནུ་དྷ་མྨ་པ་ཊི་པ་དཱ་ཡ སཱི་ལེ་སུ པ་རི་པཱུ་ར་ཀཱ་རི་ཏཱ་ཡ ཨི་ནྡྲི་ཡེ་སུ གུ་ཏྟ་དྭཱ་ར་ཏཱ་ཡ བྷོ་ཛ་ནེ མ་ཏྟ་ཉྙུ་ཏཱ་ཡ ཛཱ་ག་རི་ཡཱ་ནུ་ཡོ་ག་སྶ ས་ཏི་ས་མྤ་ཛ་ཉྙ་སྶ ཙ་ཏུ་ནྣཾ ས་ཏི་པ་ཊྛཱ་ནཱ་ནཾ བྷཱ་ཝ་ནཱ་ནུ་ཡོ་ག་སྶ ཙ་ཏུ་ནྣཾ ས་མྨ་པྤ་དྷཱ་ནཱ་ནཾ ཙ་ཏུ་ནྣཾ ཨི་དྡྷི་པཱ་དཱ་ནཾ པ་ཉྩ་ནྣཾ ཨི་ནྡྲི་ཡཱ་ནཾ པ་ཉྩ་ནྣཾ བ་ལཱ་ནཾ ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨ་རི་ཡ་སྶ ཨ་ཊྛ་ངྒི་ཀ་སྶ མ་གྒ་སྶ བྷཱ་ཝ་ནཱ་ནུ་ཡོ་ག་སྶ – ཨི་མེ་སཾ ཀུ་ས་ལཱ་ནཾ དྷ་མྨཱ་ནཾ ཨ་ནྟ་རཱ་ཡཱ་ཡ པ་རི་ཧཱ་ནཱ་ཡ སཾ་ཝ་ཏྟ་ནྟི. ཨེ་ཝཾ པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི – པ་རི་སྶ་ཡཱ.
ཀ་ཐཾ ཏ་ཏྲཱ་ས་ཡཱ་ཏི པ་རི་སྶ་ཡཱ? ཏ་ཏྠེ་ཏེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི ཨ་ཏྟ་བྷཱ་ཝ་ས་ནྣི་སྶ་ཡཱ. ཡ་ཐཱ བི་ལེ བི་ལཱ་ས་ཡཱ པཱ་ཎཱ ས་ཡ་ནྟི, ད་ཀེ ད་ཀཱ་ས་ཡཱ པཱ་ཎཱ ས་ཡ་ནྟི, ཝ་ནེ ཝ་ནཱ་ས་ཡཱ པཱ་ཎཱ ས་ཡ་ནྟི, རུ་ཀྑེ རུ་ཀྑཱ་ས་ཡཱ པཱ་ཎཱ ས་ཡ་ནྟི; ཨེ་ཝ་མེ་ཝ ཏ་ཏྠེ་ཏེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི ཨ་ཏྟ་བྷཱ་ཝ་ས་ནྣི་སྶ་ཡཱ་ཏི. ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘སཱ་ནྟེ་ཝཱ་སི་ཀོ, བྷི་ཀྑ་ཝེ, བྷི་ཀྑུ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏི. ཀ་ཐ་ཉྩ, བྷི་ཀྑ་ཝེ, བྷི་ཀྑུ སཱ་ནྟེ་ཝཱ་སི་ཀོ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏི? ཨི་དྷ, བྷི་ཀྑ་ཝེ, བྷི་ཀྑུ་ནོ ཙ་ཀྑུ་ནཱ རཱུ་པཾ དི་སྭཱ ཨུ་པྤ་ཛྫ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ ས་ར་ས་ངྐ་པྤཱ ས་ཉྙོ་ཛ་ནི་ཡཱ, ཏྱ་སྶ ཨ་ནྟོ ཝ་ས་ནྟི ཨ་ནྭཱ་སྶ་ཝ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ནྟེ་ཝཱ་སི་ཀོ་ཏི ཝུ་ཙྩ་ཏི. ཏེ ནཾ ས་མུ་དཱ་ཙ་ར་ནྟི, ས་མུ་དཱ་ཙ་ར་ནྟི ནཾ པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ཙ་རི་ཡ་ཀོ་ཏི ཝུ་ཙྩ་ཏི.
‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ་ནོ སོ་ཏེ་ན ས་དྡཾ སུ་ཏྭཱ…པེ… གྷཱ་ནེ་ན ག་ནྡྷཾ གྷཱ་ཡི་ཏྭཱ… ཛི་ཝ྄ཧཱ་ཡ ར་སཾ སཱ་ཡི་ཏྭཱ… ཀཱ་ཡེ་ན ཕོ་ཊྛ་བྦཾ ཕུ་སི་ཏྭཱ… མ་ན་སཱ དྷ་མྨཾ ཝི་ཉྙཱ་ཡ ཨུ་པྤ་ཛྫ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ ས་ར་ས་ངྐ་པྤཱ ས་ཉྙོ་ཛ་ནི་ཡཱ, ཏྱ་སྶ ཨ་ནྟོ ཝ་ས་ནྟི ཨ་ནྭཱ་སྶ་ཝ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ནྟེ་ཝཱ་སི་ཀོ་ཏི ཝུ་ཙྩ་ཏི. ཏེ ནཾ ས་མུ་དཱ་ཙ་ར་ནྟི, ས་མུ་དཱ་ཙ་ར་ནྟི ནཾ པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ཙ་རི་ཡ་ཀོ་ཏི ཝུ་ཙྩ་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ སཱ་ནྟེ་ཝཱ་སི་ཀོ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏཱི’’ཏི. ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘ཏ་ཡོ་མེ, བྷི་ཀྑ་ཝེ, ཨ་ནྟ་རཱ་མ་ལཱ ཨ་ནྟ་རཱ་ཨ་མི་ཏྟཱ ཨ་ནྟ་རཱ་ས་པ་ཏྟཱ ཨ་ནྟ་རཱ་ཝ་དྷ་ཀཱ ཨ་ནྟ་རཱ་པ་ཙྩ་ཏྠི་ཀཱ. ཀ་ཏ་མེ ཏ་ཡོ? ལོ་བྷོ, བྷི་ཀྑ་ཝེ, ཨ་ནྟ་རཱ་མ་ལོ ཨ་ནྟ་རཱ་ཨ་མི་ཏྟོ ཨ་ནྟ་རཱ་ས་པ་ཏྟོ ཨ་ནྟ་རཱ་ཝ་དྷ་ཀོ ཨ་ནྟ་རཱ་པ་ཙྩ་ཏྠི་ཀོ, དོ་སོ, བྷི་ཀྑ་ཝེ…པེ… མོ་ཧོ, བྷི་ཀྑ་ཝེ, ཨ་ནྟ་རཱ་མ་ལོ ཨ་ནྟ་རཱ་ཨ་མི་ཏྟོ ཨ་ནྟ་རཱ་ས་པ་ཏྟོ ཨ་ནྟ་རཱ་ཝ་དྷ་ཀོ ཨ་ནྟ་རཱ་པ་ཙྩ་ཏྠི་ཀོ. ཨི་མེ ཁོ, བྷི་ཀྑ་ཝེ, ཏ་ཡོ ཨ་ནྟ་རཱ་མ་ལཱ ཨ་ནྟ་རཱ་ཨ་མི་ཏྟཱ ཨ་ནྟ་རཱ་ས་པ་ཏྟཱ ཨ་ནྟ་རཱ་ཝ་དྷ་ཀཱ ཨ་ནྟ་རཱ་པ་ཙྩ་ཏྠི་ཀཱ’’.
‘‘ཨ་ན་ཏྠ་ཛ་ན་ནོ ལོ་བྷོ, ལོ་བྷོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘ལུ་དྡྷོ ཨ་ཏྠཾ ན ཛཱ་ནཱ་ཏི, ལུ་དྡྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ [ཨ་ནྡྷ་ཏ་མཾ (སྱཱ. ཀ.) མ་ཧཱ་ནི. ༡༥༦; ཨི་ཏི་ཝུ. ༨༨] ཏ་དཱ ཧོ་ཏི, ཡཾ ལོ་བྷོ ས་ཧ་ཏེ ན་རཾ.
‘‘ཨ་ན་ཏྠ་ཛ་ན་ནོ དོ་སོ, དོ་སོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘ཀུ་དྡྷོ ཨ་ཏྠཾ ན ཛཱ་ནཱ་ཏི, ཀུ་དྡྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ ཏ་དཱ ཧོ་ཏི, ཡཾ དོ་སོ ས་ཧ་ཏེ ན་རཾ.
‘‘ཨ་ན་ཏྠ་ཛ་ན་ནོ མོ་ཧོ, མོ་ཧོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘མཱུ་ལ༹ྷོ ཨ་ཏྠཾ ན ཛཱ་ནཱ་ཏི, མཱུ་ལ༹ྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ ཏ་དཱ ཧོ་ཏི, ཡཾ མོ་ཧོ ས་ཧ་ཏེ ན་ར’’ནྟི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ. ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘ཏ་ཡོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨཱ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནཱ ཨུ་པྤ་ཛྫ་ནྟི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. ཀ་ཏ་མེ ཏ་ཡོ? ལོ་བྷོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨོ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནོ ཨུ་པྤ་ཛྫ་ཏི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ; དོ་སོ ཁོ, མ་ཧཱ་རཱ་ཛ…པེ… མོ་ཧོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨོ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནོ ཨུ་པྤ་ཛྫ་ཏི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. ཨི་མེ ཁོ, མ་ཧཱ་རཱ་ཛ, ཏ་ཡོ པུ་རི་ས་སྶ དྷ་མྨཱ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནཱ ཨུ་པྤ་ཛྫ་ནྟི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡཱ’’ཏི.
‘‘ལོ་བྷོ དོ་སོ ཙ མོ་ཧོ ཙ, པུ་རི་སཾ པཱ་པ་ཙེ་ཏ་སཾ;
ཧིཾ་ས་ནྟི ཨ་ཏྟ་ས་མྦྷཱུ་ཏཱ, ཏ་ཙ་སཱ་རཾ་ཝ ས་མྥ་ལ’’ནྟི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘རཱ་གོ ཙ དོ་སོ ཙ ཨི་ཏོ་ནི་དཱ་ནཱ, ཨ་ར་ཏཱི ར་ཏཱི ལོ་མ་ཧཾ་སོ ཨི་ཏོ་ཛཱ;
ཨི་ཏོ ས་མུ་ཊྛཱ་ཡ མ་ནོ་ཝི་ཏ་ཀྐཱ, ཀུ་མཱ་ར་ཀཱ དྷ་ངྐ་མི་ཝོ་སྶ་ཛ་ནྟཱི’’ཏི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ. ལོ་ཀེཏི མ་ནུ་སྶ་ལོ་ཀེ་ཏི – ཀ་ཏི པ་རི་སྶ་ཡཱ ལོ་ཀེ.
ག་ཙྪ་ཏོ ཨ་ག་ཏཾ དི་སནྟི. ཨ་ག་ཏཱ དི་སཱ ཝུ་ཙྩ་ཏི ཨ་མ་ཏཾ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཨ་ག་ཏ་པུ་བྦཱ སཱ དི་སཱ ན སཱ དི་སཱ ག་ཏ་པུ་བྦཱ ཨི་མི་ནཱ དཱི་གྷེ་ན ཨ་དྡྷུ་ནཱ.
‘‘ས་མ་ཏི་ཏྟི་ཀཾ ཨ་ན་ཝ་སེ་སཾ, ཏེ་ལ་པ་ཏྟཾ ཡ་ཐཱ པ་རི་ཧ་རེ་ཡྻ;
ཨེ་ཝཾ ས་ཙི་ཏྟ་མ་ནུ་ར་ཀྑེ, པ་ཏྠ་ཡཱ་ནོ [པ་ཏྠ་ཡ་མཱ་ནོ (སྱཱ.)] དི་སཾ ཨ་ག་ཏ་པུ་བྦཾ’’.
ཨ་ག་ཏ་པུ་བྦཾ དི་སཾ ཝ་ཛ་ཏོ ག་ཙྪ་ཏོ ཨ་བྷི་ཀྐ་མ་ཏོ་ཏི – ག་ཙྪ་ཏོ ཨ་ག་ཏཾ དི་སཾ.
ཡེ བྷི་ཀྑུ ཨ་བྷི་ས་མྦྷ་ཝེཏི. ཡེཏི ཡེ པ་རི་སྶ་ཡེ ཨ་བྷི་ས་མྦྷ་ཝེ་ཡྻ ཨ་བྷི་བྷ་ཝེ་ཡྻ ཨ་ཛ྄ཛྷོ་ཏྠ་རེ་ཡྻ པ་རི་ཡཱ་དི་ཡེ་ཡྻ མ་དྡེ་ཡྻཱ་ཏི – ཡེ བྷི་ཀྑུ ཨ་བྷི་ས་མྦྷ་ཝེ.
པ་ནྟ་མྷི ས་ཡ་ནཱ་ས་ནེཏི. ཨ་ནྟེ པ་ནྟེ པ་རི་ཡ་ནྟེ སེ་ལ་ནྟེ ཝཱ ཝ་ན་ནྟེ ཝཱ ན་ད་ནྟེ ཝཱ ཨུ་ད་ཀ་ནྟེ ཝཱ ཡ་ཏྠ ན ཀ་སཱི་ཡ་ཏི ན ཝ་པཱི་ཡ་ཏི, ཛ་ན་ནྟཾ ཨ་ཏི་ཀྐ་མི་ཏྭཱ མ་ནུ་སྶཱ་ནཾ ཨ་ནུ་པ་ཙཱ་རེ སེ་ནཱ་ས་ནེ་ཏི – པ་ནྟ་མྷི ས་ཡ་ནཱ་ས་ནེ.
ཏེ་ནཱ་ཧ ཐེ་རོ སཱ་རི་པུ་ཏྟོ –