༡༤. ཏུ་ཝ་ཊྚ་ཀ་སུ་ཏྟ་ནི་དྡེ་སོ
ཨ་ཐ ཏུ་ཝ་ཊྚ་ཀ་སུ་ཏྟ་ནི་དྡེ་སཾ ཝ་ཀྑ་ཏི –
༡༥༠. པུ་ཙྪཱ་མི ཏཾ ཨཱ་དི་ཙྩ་བ་ནྡྷུ, [ཨཱ་དི་ཙྩ་བ་ནྡྷཱུ (སཱི. སྱཱ.)] ཝི་ཝེ་ཀཾ ས་ནྟི་པ་ད་ཉྩ མ་ཧེ་སི [མ་ཧེ་སིཾ (སཱི. སྱཱ.)] ;
ཀ་ཐཾ དི་སྭཱ ནི་བྦཱ་ཏི བྷི་ཀྑུ, ཨ་ནུ་པཱ་དི་ཡཱ་ནོ ལོ་ཀ་སྨིཾ ཀི་ཉྩི.
པུ་ཙྪཱ་མི ཏཾ ཨཱ་དི་ཙྩ་བ་ནྡྷཱུཏི. པུ་ཙྪཱཏི ཏི་སྶོ པུ་ཙྪཱ – ཨ་དི་ཊྛ་ཛོ་ཏ་ནཱ པུ་ཙྪཱ, དི་ཊྛ་སཾ་ས་ནྡ་ནཱ པུ་ཙྪཱ, ཝི་མ་ཏི་ཙྪེ་ད་ནཱ པུ་ཙྪཱ. ཀ་ཏ་མཱ ཨ་དི་ཊྛ་ཛོ་ཏ་ནཱ པུ་ཙྪཱ? པ་ཀ་ཏི་ཡཱ ལ་ཀྑ་ཎཾ ཨ་ཉྙཱ་ཏཾ ཧོ་ཏི ཨ་དི་ཊྛཾ ཨ་ཏུ་ལི་ཏཾ ཨ་ཏཱི་རི་ཏཾ ཨ་ཝི་བྷཱུ་ཏཾ ཨ་ཝི་བྷཱ་ཝི་ཏཾ, ཏ་སྶ ཉཱ་ཎཱ་ཡ ད་སྶ་ནཱ་ཡ ཏུ་ལ་ནཱ་ཡ ཏཱི་ར་ཎཱ་ཡ ཝི་བྷཱ་ཝ་ནཱ་ཡ པ་ཉྷཾ པུ་ཙྪ་ཏི – ཨ་ཡཾ ཨ་དི་ཊྛ་ཛོ་ཏ་ནཱ པུ་ཙྪཱ. ཀ་ཏ་མཱ དི་ཊྛ་སཾ་ས་ནྡ་ནཱ པུ་ཙྪཱ? པ་ཀ་ཏི་ཡཱ ལ་ཀྑ་ཎཾ ཉཱ་ཏཾ ཧོ་ཏི དི་ཊྛཾ ཏུ་ལི་ཏཾ ཏཱི་རི་ཏཾ ཝི་བྷཱུ་ཏཾ ཝི་བྷཱ་ཝི་ཏཾ, ཨ་ཉྙེ་ཧི པ་ཎྜི་ཏེ་ཧི ས་དྡྷིཾ སཾ་ས་ནྡ་ན་ཏྠཱ་ཡ པ་ཉྷཾ པུ་ཙྪ་ཏི – ཨ་ཡཾ དི་ཊྛ་སཾ་ས་ནྡ་ནཱ པུ་ཙྪཱ. ཀ་ཏ་མཱ ཝི་མ་ཏི་ཙྪེ་ད་ནཱ པུ་ཙྪཱ? པ་ཀ་ཏི་ཡཱ སཾ་ས་ཡ་པ་ཀྑ་ནྡོ [སཾ་ས་ཡ་པ་ཀྑ་ནྣོ (སཱི. སྱཱ.)] ཧོ་ཏི ཝི་མ་ཏི་པ་ཀྑ་ནྡོ དྭེ་ལ༹ྷ་ཀ་ཛཱ་ཏོ, ‘‘ཨེ་ཝཾ ནུ ཁོ, ན ནུ ཁོ, ཀིཾ ནུ ཁོ, ཀ་ཐཾ ནུ ཁོ’’ཏི སོ ཝི་མ་ཏི་ཙྪེ་ད་ན་ཏྠཱ་ཡ པ་ཉྷཾ པུ་ཙྪ་ཏི – ཨ་ཡཾ ཝི་མ་ཏི་ཙྪེ་ད་ནཱ པུ་ཙྪཱ. ཨི་མཱ ཏི་སྶོ པུ་ཙྪཱ.
ཨ་པ་རཱ་པི ཏི་སྶོ པུ་ཙྪཱ – མ་ནུ་སྶ་པུ་ཙྪཱ, ཨ་མ་ནུ་སྶ་པུ་ཙྪཱ, ནི་མྨི་ཏ་པུ་ཙྪཱ. ཀ་ཏ་མཱ མ་ནུ་སྶ་པུ་ཙྪཱ? མ་ནུ་སྶཱ བུ་དྡྷཾ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ པ་ཉྷཾ པུ་ཙྪ་ནྟི, བྷི་ཀྑཱུ པུ་ཙྪ་ནྟི, བྷི་ཀྑུ་ནི་ཡོ པུ་ཙྪ་ནྟི, ཨུ་པཱ་ས་ཀཱ པུ་ཙྪ་ནྟི, ཨུ་པཱ་སི་ཀཱ་ཡོ པུ་ཙྪ་ནྟི, རཱ་ཛཱ་ནོ པུ་ཙྪ་ནྟི, ཁ་ཏྟི་ཡཱ པུ་ཙྪ་ནྟི, བྲཱ་ཧྨ་ཎཱ པུ་ཙྪ་ནྟི, ཝེ་སྶཱ པུ་ཙྪ་ནྟི, སུ་དྡཱ པུ་ཙྪ་ནྟི, ག་ཧ་ཊྛཱ པུ་ཙྪ་ནྟི, པ་བྦ་ཛི་ཏཱ པུ་ཙྪ་ནྟི – ཨ་ཡཾ མ་ནུ་སྶ་པུ་ཙྪཱ. ཀ་ཏ་མཱ ཨ་མ་ནུ་སྶ་པུ་ཙྪཱ? ཨ་མ་ནུ་སྶཱ བུ་དྡྷཾ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ པ་ཉྷཾ པུ་ཙྪ་ནྟི, ནཱ་གཱ པུ་ཙྪ་ནྟི, སུ་པ་ཎྞཱ པུ་ཙྪ་ནྟི, ཡ་ཀྑཱ པུ་ཙྪ་ནྟི, ཨ་སུ་རཱ པུ་ཙྪ་ནྟི, ག་ནྡྷ་བྦཱ པུ་ཙྪ་ནྟི, མ་ཧཱ་རཱ་ཛཱ་ནོ པུ་ཙྪ་ནྟི, ཨི་ནྡཱ པུ་ཙྪ་ནྟི, བྲ་ཧྨཱ་ནོ པུ་ཙྪ་ནྟི, དེ་ཝ་ཏཱ་ཡོ པུ་ཙྪ་ནྟི – ཨ་ཡཾ ཨ་མ་ནུ་སྶ་པུ་ཙྪཱ. ཀ་ཏ་མཱ ནི་མྨི་ཏ་པུ་ཙྪཱ? ཡཾ བྷ་ག་ཝཱ རཱུ་པཾ ཨ་བྷི་ནི་མྨི་ནཱ་ཏི མ་ནོ་མ་ཡཾ ས་བྦ་ངྒ་པ་ཙྩ་ངྒཾ ཨ་ཧཱི་ནི་ནྡྲི་ཡཾ ཏཾ སོ ནི་མྨི་ཏོ བུ་དྡྷཾ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ པ་ཉྷཾ པུ་ཙྪ་ཏི, བྷ་ག་ཝཱ ཏ་སྶ [ན་ཏྠི སཱི. སྱཱ. པོ་ཏྠ་ཀེ་སུ] ཝི་ས་ཛྫེ་ཏི – ཨ་ཡཾ ནི་མྨི་ཏ་པུ་ཙྪཱ. ཨི་མཱ ཏི་སྶོ པུ་ཙྪཱ.
ཨ་པ་རཱ་པི ཏི་སྶོ པུ་ཙྪཱ – ཨ་ཏྟ་ཏྠ་པུ་ཙྪཱ, པ་ར་ཏྠ་པུ་ཙྪཱ, ཨུ་བྷ་ཡ་ཏྠ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – དི་ཊྛ་དྷ་མྨི་ཀ་ཏྠ་པུ་ཙྪཱ, ས་མྤ་རཱ་ཡི་ཀ་ཏྠ་པུ་ཙྪཱ, པ་ར་མ་ཏྠ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ཨ་ན་ཝ་ཛྫ་ཏྠ་པུ་ཙྪཱ, ནི་ཀྐི་ལེ་ས་ཏྠ་པུ་ཙྪཱ [ནི་ཀྑེ་པ་ཏྠ་པུ་ཙྪཱ (སཱི. ཀ.)], ཝོ་དཱ་ན་ཏྠ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ཨ་ཏཱི་ཏ་པུ་ཙྪཱ, ཨ་ནཱ་ག་ཏ་པུ་ཙྪཱ, པ་ཙྩུ་པྤ་ནྣ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ཨ་ཛ྄ཛྷ་ཏྟ་པུ་ཙྪཱ, བ་ཧི་དྡྷཱ་པུ་ཙྪཱ, ཨ་ཛ྄ཛྷ་ཏྟ་བ་ཧི་དྡྷཱ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ཀུ་ས་ལ་པུ་ཙྪཱ, ཨ་ཀུ་ས་ལ་པུ་ཙྪཱ, ཨ་བྱཱ་ཀ་ཏ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ཁ་ནྡྷ་པུ་ཙྪཱ, དྷཱ་ཏུ་པུ་ཙྪཱ, ཨཱ་ཡ་ཏ་ན་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ས་ཏི་པ་ཊྛཱ་ན་པུ་ཙྪཱ, ས་མྨ་པྤ་དྷཱ་ན་པུ་ཙྪཱ, ཨི་དྡྷི་པཱ་ད་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – ཨི་ནྡྲི་ཡ་པུ་ཙྪཱ, བ་ལ་པུ་ཙྪཱ, བོ་ཛ྄ཛྷ་ངྒ་པུ་ཙྪཱ. ཨ་པ་རཱ་པི ཏི་སྶོ པུ་ཙྪཱ – མ་གྒ་པུ་ཙྪཱ, ཕ་ལ་པུ་ཙྪཱ, ནི་བྦཱ་ན་པུ་ཙྪཱ.
པུ་ཙྪཱ་མི ཏནྟི པུ་ཙྪཱ་མི ཏཾ ཡཱ་ཙཱ་མི ཏཾ ཨ་ཛ྄ཛྷེ་སཱ་མི ཏཾ པ་སཱ་དེ་མི ཏཾ, ‘‘ཀ་ཐ་ཡ་སྶུ མེ’’ཏི – པུ་ཙྪཱ་མི ཏཾ. ཨཱ་དི་ཙྩ་བ་ནྡྷཱུཏི. ཨཱ་དི་ཙྩོ ཝུ་ཙྩ་ཏི སཱུ་རི་ཡོ [སུ་རི་ཡོ (སཱི. སྱཱ.)]. སཱུ་རི་ཡོ གོ་ཏ་མོ གོ་ཏྟེ་ན, བྷ་ག་ཝཱ་པི གོ་ཏ་མོ གོ་ཏྟེ་ན, བྷ་ག་ཝཱ སཱུ་རི་ཡ་སྶ གོ་ཏྟ་ཉཱ་ཏ་ཀོ གོ་ཏྟ་བ་ནྡྷུ; ཏ་སྨཱ བུ་དྡྷོ ཨཱ་དི་ཙྩ་བ་ནྡྷཱུ་ཏི – པུ་ཙྪཱ་མི ཏཾ ཨཱ་དི་ཙྩ་བ་ནྡྷུ.
ཝི་ཝེ་ཀཾ ས་ནྟི་པ་ད་ཉྩ མ་ཧེ་སཱིཏི. ཝི་ཝེ་ཀཱཏི ཏ་ཡོ ཝི་ཝེ་ཀཱ – ཀཱ་ཡ་ཝི་ཝེ་ཀོ, ཙི་ཏྟ་ཝི་ཝེ་ཀོ, ཨུ་པ་དྷི་ཝི་ཝེ་ཀོ. ཀ་ཏ་མོ ཀཱ་ཡ་ཝི་ཝེ་ཀོ? ཨི་དྷ བྷི་ཀྑུ ཝི་ཝི་ཏྟཾ སེ་ནཱ་ས་ནཾ བྷ་ཛ་ཏི ཨ་ར་ཉྙཾ རུ་ཀྑ་མཱུ་ལཾ པ་བྦ་ཏཾ ཀ་ནྡ་རཾ གི་རི་གུ་ཧཾ སུ་སཱ་ནཾ ཝ་ན་པ་ཏྠཾ ཨ་བྦྷོ་ཀཱ་སཾ པ་ལཱ་ལ་པུ་ཉྫཾ ཀཱ་ཡེ་ན ཝི་ཝི་ཏྟེ་ན ཝི་ཧ་ར་ཏི. སོ ཨེ་ཀོ ག་ཙྪ་ཏི, ཨེ་ཀོ ཏི་ཊྛ་ཏི, ཨེ་ཀོ ནི་སཱི་ད་ཏི, ཨེ་ཀོ སེ་ཡྻཾ ཀ་པྤེ་ཏི, ཨེ་ཀོ གཱ་མཾ པི་ཎྜཱ་ཡ པ་ཝི་ས་ཏི, ཨེ་ཀོ པ་ཊི་ཀྐ་མ་ཏི, ཨེ་ཀོ ར་ཧོ ནི་སཱི་ད་ཏི, ཨེ་ཀོ ཙ་ངྐ་མཾ ཨ་དྷི་ཊྛཱ་ཏི, ཨེ་ཀོ ཙ་ར་ཏི ཝི་ཧ་ར་ཏི ཨི་རི་ཡ་ཏི ཝ་ཏྟ་ཏི པཱ་ལེ་ཏི ཡ་པེ་ཏི ཡཱ་པེ་ཏི – ཨ་ཡཾ ཀཱ་ཡ་ཝི་ཝེ་ཀོ.
ཀ་ཏ་མོ ཙི་ཏྟ་ཝི་ཝེ་ཀོ? པ་ཋ་མཾ ཛྷཱ་ནཾ ས་མཱ་པ་ནྣ་སྶ ནཱི་ཝ་ར་ཎེ་ཧི ཙི་ཏྟཾ ཝི་ཝི་ཏྟཾ ཧོ་ཏི, དུ་ཏི་ཡཾ ཛྷཱ་ནཾ ས་མཱ་པ་ནྣ་སྶ ཝི་ཏ་ཀྐ་ཝི་ཙཱ་རེ་ཧི ཙི་ཏྟཾ ཝི་ཝི་ཏྟཾ ཧོ་ཏི, ཏ་ཏི་ཡཾ ཛྷཱ་ནཾ ས་མཱ་པ་ནྣ་སྶ པཱི་ཏི་ཡཱ ཙི་ཏྟཾ ཝི་ཝི་ཏྟཾ ཧོ་ཏི, ཙ་ཏུ་ཏྠཾ ཛྷཱ་ནཾ ས་མཱ་པ་ནྣ་སྶ སུ་ཁ་དུ་ཀྑེ་ཧི ཙི་ཏྟཾ ཝི་ཝི་ཏྟཾ ཧོ་ཏི, ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མཱ་པ་ནྣ་སྶ རཱུ་པ་ས་ཉྙཱ་ཡ པ་ཊི་གྷ་ས་ཉྙཱ་ཡ ནཱ་ན་ཏྟ་ས་ཉྙཱ་ཡ ཙི་ཏྟཾ ཝི་ཝི་ཏྟཾ ཧོ་ཏི, ཝི་ཉྙཱ་ཎ་ཉྩཱ་ཡ་ཏ་ནཾ ས་མཱ་པ་ནྣ་སྶ ཨཱ་ཀཱ་སཱ་ན་ཉྩཱ་ཡ་ཏ་ན་ས་ཉྙཱ་ཡ ཙི་ཏྟཾ ཝི་ཝི་ཏྟཾ ཧོ་ཏི, ཨཱ་ཀི་ཉྩ་ཉྙཱ་ཡ་ཏ་ནཾ ས་མཱ་པ་ནྣ་སྶ ཝི་ཉྙཱ་ཎ་ཉྩཱ་ཡ་ཏ་ན་ས་ཉྙཱ་ཡ ཙི་ཏྟཾ ཝི་ཝི་ཏྟཾ ཧོ་ཏི, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མཱ་པ་ནྣ་སྶ ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ་ཡ ཙི་ཏྟཾ ཝི་ཝི་ཏྟཾ ཧོ་ཏི. སོ་ཏཱ་པ་ནྣ་སྶ ས་ཀྐཱ་ཡ་དི་ཊྛི་ཡཱ ཝི་ཙི་ཀི་ཙྪཱ་ཡ སཱི་ལ་བྦ་ཏ་པ་རཱ་མཱ་སཱ དི་ཊྛཱ་ནུ་ས་ཡཱ ཝི་ཙི་ཀི་ཙྪཱ་ནུ་ས་ཡཱ, ཏ་དེ་ཀ་ཊྛེ་ཧི ཙ ཀི་ལེ་སེ་ཧི ཙི་ཏྟཾ ཝི་ཝི་ཏྟཾ ཧོ་ཏི. ས་ཀ་དཱ་གཱ་མི་སྶ ཨོ་ལཱ༹་རི་ཀཱ ཀཱ་མ་རཱ་ག་ས་ཉྙོ་ཛ་ནཱ པ་ཊི་གྷ་ས་ཉྙོ་ཛ་ནཱ ཨོ་ལཱ༹་རི་ཀཱ ཀཱ་མ་རཱ་གཱ་ནུ་ས་ཡཱ པ་ཊི་གྷཱ་ནུ་ས་ཡཱ, ཏ་དེ་ཀ་ཊྛེ་ཧི ཙ ཀི་ལེ་སེ་ཧི ཙི་ཏྟཾ ཝི་ཝི་ཏྟཾ ཧོ་ཏི. ཨ་ནཱ་གཱ་མི་སྶ ཨ་ནུ་ས་ཧ་ག་ཏཱ ཀཱ་མ་རཱ་ག་ས་ཉྙོ་ཛ་ནཱ པ་ཊི་གྷ་ས་ཉྙོ་ཛ་ནཱ ཨ་ནུ་ས་ཧ་ག་ཏཱ ཀཱ་མ་རཱ་གཱ་ནུ་ས་ཡཱ པ་ཊི་གྷཱ་ནུ་ས་ཡཱ, ཏ་དེ་ཀ་ཊྛེ་ཧི ཙ ཀི་ལེ་སེ་ཧི ཙི་ཏྟཾ ཝི་ཝི་ཏྟཾ ཧོ་ཏི. ཨ་ར་ཧ་ཏོ རཱུ་པ་རཱ་གཱ ཨ་རཱུ་པ་རཱ་གཱ མཱ་ནཱ ཨུ་དྡྷ་ཙྩཱ ཨ་ཝི་ཛྫཱ་ཡ མཱ་ནཱ་ནུ་ས་ཡཱ བྷ་ཝ་རཱ་གཱ་ནུ་ས་ཡཱ ཨ་ཝི་ཛྫཱ་ནུ་ས་ཡཱ, ཏ་དེ་ཀ་ཊྛེ་ཧི ཙ ཀི་ལེ་སེ་ཧི བ་ཧི་དྡྷཱ ཙ ས་བྦ་ནི་མི་ཏྟེ་ཧི ཙི་ཏྟཾ ཝི་ཝི་ཏྟཾ ཧོ་ཏི – ཨ་ཡཾ ཙི་ཏྟ་ཝི་ཝེ་ཀོ.
ཀ་ཏ་མོ ཨུ་པ་དྷི་ཝི་ཝེ་ཀོ? ཨུ་པ་དྷི ཝུ་ཙྩ་ཏི ཀི་ལེ་སཱ ཙ ཁ་ནྡྷཱ ཙ ཨ་བྷི་ས་ངྑཱ་རཱ ཙ. ཨུ་པ་དྷི་ཝི་ཝེ་ཀོ ཝུ་ཙྩ་ཏི ཨ་མ་ཏཾ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ – ཨ་ཡཾ ཨུ་པ་དྷི་ཝི་ཝེ་ཀོ. ཀཱ་ཡ་ཝི་ཝེ་ཀོ ཙ ཝི་ཝེ་ཀ་ཊྛ་ཀཱ་ཡཱ་ནཾ [ཝཱུ་པ་ཀ་ཊྛ་ཀཱ་ཡཱ་ནཾ (སཱི.)] ནེ་ཀྑ་མྨཱ་བྷི་ར་ཏཱ་ནཾ, ཙི་ཏྟ་ཝི་ཝེ་ཀོ ཙ པ་རི་སུ་དྡྷ་ཙི་ཏྟཱ་ནཾ པ་ར་མ་ཝོ་དཱ་ན་པ་ཏྟཱ་ནཾ, ཨུ་པ་དྷི་ཝི་ཝེ་ཀོ ཙ ནི་རུ་པ་དྷཱི་ནཾ པུ་གྒ་ལཱ་ནཾ ཝི་ས་ངྑཱ་ར་ག་ཏཱ་ནཾ. ས་ནྟཱིཏི ཨེ་ཀེ་ན ཨཱ་ཀཱ་རེ་ན ས་ནྟི་པི ས་ནྟི་པ་ད་མྤི ཏཾ་ཡེ་ཝ ཨ་མ་ཏཾ ནི་བྦཱ་ནཾ, ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ས་ནྟ་མེ་ཏཾ པ་དཾ, པ་ཎཱི་ཏ་མེ་ཏཾ པ་དཾ, ཡ་དི་དཾ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ན’’ནྟི. ཨ་ཐ ཨ་པ་རེ་ན ཨཱ་ཀཱ་རེ་ན ཡེ དྷ་མྨཱ ས་ནྟཱ་དྷི་ག་མཱ་ཡ ས་ནྟི་ཕུ་ས་ནཱ་ཡ ས་ནྟི་ས་ཙྪི་ཀི་རི་ཡཱ་ཡ སཾ་ཝ་ཏྟ་ནྟི, སེ་ཡྻ་ཐི་དཾ – ཙ་ཏྟཱ་རོ ས་ཏི་པ་ཊྛཱ་ནཱ, ཙ་ཏྟཱ་རོ ས་མྨ་པྤ་དྷཱ་ནཱ, ཙ་ཏྟཱ་རོ ཨི་དྡྷི་པཱ་དཱ, པ་ཉྩི་ནྡྲི་ཡཱ་ནི, པ་ཉྩ བ་ལཱ་ནི, ས་ཏྟ བོ་ཛ྄ཛྷ་ངྒཱ, ཨ་རི་ཡོ ཨ་ཊྛ་ངྒི་ཀོ མ་གྒོ – ཨི་མེ ཝུ་ཙྩ་ནྟི ས་ནྟི་པ་དཾ ཏཱ་ཎ་པ་དཾ ལེ་ཎ་པ་དཾ ས་ར་ཎ་པ་དཾ ཨ་བྷ་ཡ་པ་དཾ ཨ་ཙྩུ་ཏ་པ་དཾ ཨ་མ་ཏ་པ་དཾ ནི་བྦཱ་ན་པ་དཾ.
མ་ཧེ་སཱིཏི མ་ཧེ་སི བྷ་ག་ཝཱ. མ་ཧ་ནྟཾ སཱི་ལ་ཀྑ་ནྡྷཾ ཨེ་སཱི ག་ཝེ་སཱི པ་རི་ཡེ་སཱི་ཏི མ་ཧེ་སི, མ་ཧ་ནྟཾ ས་མཱ་དྷི་ཀྑ་ནྡྷཾ…པེ… མ་ཧ་ནྟཾ པ་ཉྙཱ་ཀྑ་ནྡྷཾ… མ་ཧ་ནྟཾ ཝི་མུ་ཏྟི་ཀྑ་ནྡྷཾ… མ་ཧ་ནྟཾ ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷཾ ཨེ་སཱི ག་ཝེ་སཱི པ་རི་ཡེ་སཱི་ཏི མ་ཧེ་སི; མ་ཧ་ཏོ ཏ་མོ་ཀཱ་ཡ་སྶ པ་དཱ་ལ་ནཾ, མ་ཧ་ཏོ ཝི་པ་ལླཱ་ས་སྶ བྷེ་ད་ནཾ, མ་ཧ་ཏོ ཏ་ཎྷཱ་ས་ལླ་སྶ ཨ་བྦ་ཧ་ནཾ [ཨ་བྦཱུ་ཧ་ནཾ (སཱི. སྱཱ.), ཨ་བྦྷུ་ཧ་ནཾ (ཀ.)], མ་ཧ་ཏོ དི་ཊྛི་ས་ངྒྷཱ་ཏ་སྶ ཝི་ནི་ཝེ་ཋ་ནཾ, མ་ཧ་ཏོ མཱ་ན་དྷ་ཛ་སྶ པ་པཱ་ཏ་ནཾ [པ་ཝཱ་ཧ་ནཾ (སྱཱ.)], མ་ཧ་ཏོ ཨ་བྷི་ས་ངྑཱ་ར་སྶ ཝཱུ་པ་ས་མཾ, མ་ཧ་ཏོ ཨོ་གྷ་སྶ ནི་ཏྠ་ར་ཎཾ, མ་ཧ་ཏོ བྷཱ་ར་སྶ ནི་ཀྑེ་པ་ནཾ, མ་ཧ་ཏོ སཾ་སཱ་ར་ཝ་ཊྚ་སྶ ཨུ་པ་ཙྪེ་དཾ, མ་ཧ་ཏོ ས་ནྟཱ་པ་སྶ ནི་བྦཱ་པ་ནཾ, མ་ཧ་ཏོ པ་རི་ལཱ༹་ཧ་སྶ པ་ཊི་པ་སྶ་དྡྷིཾ, མ་ཧ་ཏོ དྷ་མྨ་དྷ་ཛ་སྶ ཨུ་སྶཱ་པ་ནཾ ཨེ་སཱི ག་ཝེ་སཱི པ་རི་ཡེ་སཱི་ཏི མ་ཧེ་སི, མ་ཧ་ནྟེ ས་ཏི་པ་ཊྛཱ་ནེ མ་ཧ་ནྟེ ས་མྨ་པྤ་དྷཱ་ནེ མ་ཧ་ནྟེ ཨི་དྡྷི་པཱ་དེ མ་ཧ་ནྟཱ་ནི ཨི་ནྡྲི་ཡཱ་ནི མ་ཧ་ནྟཱ་ནི བ་ལཱ་ནི མ་ཧ་ནྟེ བོ་ཛ྄ཛྷ་ངྒེ མ་ཧ་ནྟཾ ཨ་རི་ཡཾ ཨ་ཊྛ་ངྒི་ཀཾ མ་གྒཾ མ་ཧ་ནྟཾ པ་ར་མ་ཏྠཾ ཨ་མ་ཏཾ ནི་བྦཱ་ནཾ ཨེ་སཱི ག་ཝེ་སཱི པ་རི་ཡེ་སཱི་ཏི མ་ཧེ་སི; མ་ཧེ་ས་ཀྑེ་ཧི ཝཱ ས་ཏྟེ་ཧི ཨེ་སི་ཏོ ག་ཝེ་སི་ཏོ པ་རི་ཡེ་སི་ཏོ ཀ་ཧཾ བུ་དྡྷོ ཀ་ཧཾ བྷ་ག་ཝཱ ཀ་ཧཾ དེ་ཝ་དེ་ཝོ ཀ་ཧཾ ན་རཱ་ས་བྷོ་ཏི མ་ཧེ་སཱི་ཏི – ཝི་ཝེ་ཀཾ ས་ནྟི་པ་ད་ཉྩ མ་ཧེ་སི.
ཀ་ཐཾ དི་སྭཱ ནི་བྦཱ་ཏི བྷི་ཀྑཱུཏི. ཀ་ཐཾ དི་སྭཱ པ་སྶི་ཏྭཱ ཏུ་ལ་ཡི་ཏྭཱ ཏཱི་ར་ཡི་ཏྭཱ ཝི་བྷཱ་ཝ་ཡི་ཏྭཱ ཝི་བྷཱུ་ཏཾ ཀ་ཏྭཱ ཨ་ཏྟ་ནོ རཱ་གཾ ནི་བྦཱ་པེ་ཏི, དོ་སཾ ནི་བྦཱ་པེ་ཏི, མོ་ཧཾ ནི་བྦཱ་པེ་ཏི, ཀོ་དྷཾ…པེ… ཨུ་པ་ནཱ་ཧཾ… མ་ཀྑཾ… པ་ལཱ༹་སཾ… ཨི་སྶཾ… མ་ཙྪ་རི་ཡཾ… མཱ་ཡཾ… སཱ་ཋེ་ཡྻཾ… ཐ་མྦྷཾ… སཱ་ར་མྦྷཾ… མཱ་ནཾ… ཨ་ཏི་མཱ་ནཾ… མ་དཾ… པ་མཱ་དཾ… ས་བྦེ ཀི་ལེ་སེ… ས་བྦེ དུ་ཙྩ་རི་ཏེ… ས་བྦེ ད་ར་ཐེ… ས་བྦེ པ་རི་ལཱ༹་ཧེ… ས་བྦེ ས་ནྟཱ་པེ … ས་བྦཱ་ཀུ་ས་ལཱ་བྷི་ས་ངྑཱ་རེ ནི་བྦཱ་པེ་ཏི ས་མེ་ཏི ཨུ་པ་ས་མེ་ཏི ཝཱུ་པ་ས་མེ་ཏི པ་ཊི་པ་སྶ་མྦྷེ་ཏི. བྷི་ཀྑཱུཏི པུ་ཐུ་ཛྫ་ན་ཀ་ལྱཱ་ཎ་ཀོ ཝཱ བྷི་ཀྑུ སེ་ཁོ ཝཱ བྷི་ཀྑཱུ་ཏི – ཀ་ཐཾ དི་སྭཱ ནི་བྦཱ་ཏི བྷི་ཀྑུ.
ཨ་ནུ་པཱ་དི་ཡཱ་ནོ ལོ་ཀ་སྨིཾ ཀི་ཉྩཱིཏི. ཙ་ཏཱུ་ཧི ཨུ་པཱ་དཱ་ནེ་ཧི ཨ་ནུ་པཱ་དི་ཡ་མཱ་ནོ ཨ་ག་ཎྷ་ཡ་མཱ་ནོ ཨ་པ་རཱ་མ་ས་མཱ་ནོ ཨ་ན་བྷི་ནི་ཝི་ས་མཱ་ནོ. ལོ་ཀ་སྨིནྟི ཨ་པཱ་ཡ་ལོ་ཀེ མ་ནུ་སྶ་ལོ་ཀེ དེ་ཝ་ལོ་ཀེ, ཁ་ནྡྷ་ལོ་ཀེ དྷཱ་ཏུ་ལོ་ཀེ ཨཱ་ཡ་ཏ་ན་ལོ་ཀེ. ཀི་ཉྩཱིཏི ཀི་ཉྩི རཱུ་པ་ག་ཏཾ ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏ་ནྟི – ཨ་ནུ་པཱ་དི་ཡཱ་ནོ ལོ་ཀ་སྨིཾ ཀི་ཉྩི.
ཏེ་ནཱ་ཧ སོ ནི་མྨི་ཏོ –
‘‘པུ་ཙྪཱ་མི ཏཾ ཨཱ་དི་ཙྩ་བ་ནྡྷུ, ཝི་ཝེ་ཀཾ ས་ནྟི་པ་ད་ཉྩ མ་ཧེ་སི;
ཀ་ཐཾ དི་སྭཱ ནི་བྦཱ་ཏི བྷི་ཀྑུ, ཨ་ནུ་པཱ་དི་ཡཱ་ནོ ལོ་ཀ་སྨིཾ ཀི་ཉྩཱི’’ཏི.
༡༥༡. མཱུ་ལཾ པ་པ་ཉྩ་ས་ངྑཱ་ཡ, [ཨི་ཏི བྷ་ག་ཝཱ]
མ་ནྟཱ ཨ་སྨཱི་ཏི ས་བྦ་མུ་པ་རུ་ནྡྷེ [ས་བྦ་མུ་པ་རུ་དྡྷེ (སྱཱ.)] ;
ཡཱ ཀཱ་ཙི ཏ་ཎྷཱ ཨ་ཛ྄ཛྷ་ཏྟཾ, ཏཱ་སཾ ཝི་ན་ཡཱ ས་དཱ ས་ཏོ སི་ཀྑེ.
མཱུ་ལཾ པ་པ་ཉྩ་ས་ངྑཱ་ཡ, [ཨི་ཏི བྷ་ག་ཝཱ] མ་ནྟཱ ཨ་སྨཱི་ཏི ས་བྦ་མུ་པ་རུ་ནྡྷེཏི. པ་པ་ཉྩཱ་ཡེ་ཝ པ་པ་ཉྩ་ས་ངྑཱ. ཏ་ཎྷཱ་པ་པ་ཉྩ་ས་ངྑཱ དི་ཊྛི་པ་པ་ཉྩ་ས་ངྑཱ. ཀ་ཏ་མཾ ཏ་ཎྷཱ་པ་པ་ཉྩ་སྶ མཱུ་ལཾ? ཨ་ཝི་ཛྫཱ་མཱུ་ལཾ, ཨ་ཡོ་ནི་སོ་མ་ན་སི་ཀཱ་རོ མཱུ་ལཾ, ཨ་སྨི་མཱ་ནོ མཱུ་ལཾ, ཨ་ཧི་རི་ཀཾ མཱུ་ལཾ, ཨ་ནོ་ཏྟ་པྤཾ མཱུ་ལཾ, ཨུ་དྡྷ་ཙྩཾ མཱུ་ལཾ – ཨི་དཾ ཏ་ཎྷཱ་པ་པ་ཉྩ་སྶ མཱུ་ལཾ. ཀ་ཏ་མཾ དི་ཊྛི་པ་པ་ཉྩ་སྶ མཱུ་ལཾ? ཨ་ཝི་ཛྫཱ་མཱུ་ལཾ, ཨ་ཡོ་ནི་སོ་མ་ན་སི་ཀཱ་རོ མཱུ་ལཾ, ཨ་སྨི་མཱ་ནོ མཱུ་ལཾ, ཨ་ཧི་རི་ཀཾ མཱུ་ལཾ, ཨ་ནོ་ཏྟ་པྤཾ མཱུ་ལཾ, ཨུ་དྡྷ་ཙྩཾ མཱུ་ལཾ – ཨི་དཾ དི་ཊྛི་པ་པ་ཉྩ་སྶ མཱུ་ལཾ.
བྷ་ག་ཝཱཏི གཱ་ར་ཝཱ་དྷི་ཝ་ཙ་ནཾ. ཨ་པི ཙ བྷ་གྒ་རཱ་གོ་ཏི བྷ་ག་ཝཱ, བྷ་གྒ་དོ་སོ་ཏི བྷ་ག་ཝཱ, བྷ་གྒ་མོ་ཧོ་ཏི བྷ་ག་ཝཱ, བྷ་གྒ་མཱ་ནོ་ཏི བྷ་ག་ཝཱ, བྷ་གྒ་དི་ཊྛཱི་ཏི བྷ་ག་ཝཱ, བྷ་གྒ་ཀ་ཎྜ་ཀོ་ཏི བྷ་ག་ཝཱ, བྷ་གྒ་ཀི་ལེ་སོ་ཏི བྷ་ག་ཝཱ, བྷ་ཛི ཝི་བྷ་ཛི པ་ཝི་བྷ་ཛི དྷ་མྨ་ར་ཏ་ན་ནྟི བྷ་ག་ཝཱ, བྷ་ཝཱ་ནཾ ཨ་ནྟ་ཀ་རོ་ཏི བྷ་ག་ཝཱ, བྷཱ་ཝི་ཏ་ཀཱ་ཡོ བྷཱ་ཝི་ཏ་སཱི་ལོ བྷཱ་ཝི་ཏ་ཙི་ཏྟོ བྷཱ་ཝི་ཏ་པ་ཉྙོ་ཏི བྷ་ག་ཝཱ; བྷཱ་གཱི ཝཱ བྷ་ག་ཝཱ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི ཨ་པྤ་ས་དྡཱ་ནི ཨ་པྤ་ནི་གྒྷོ་སཱ་ནི ཝི་ཛ་ན་ཝཱ་ཏཱ་ནི མ་ནུ་སྶ་རཱ་ཧ་སྶེ་ཡྻ་ཀཱ་ནི པ་ཊི་ས་ལླཱ་ན་སཱ་རུ་པྤཱ་ནཱི་ཏི བྷ་ག་ཝཱ, བྷཱ་གཱི ཝཱ བྷ་ག་ཝཱ ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ན་ནྟི བྷ་ག་ཝཱ, བྷཱ་གཱི ཝཱ བྷ་ག་ཝཱ ཨ་ཏྠ་ར་ས་སྶ དྷ་མྨ་ར་ས་སྶ ཝི་མུ་ཏྟི་ར་ས་སྶ ཨ་དྷི་སཱི་ལ་སྶ ཨ་དྷི་ཙི་ཏྟ་སྶ ཨ་དྷི་པ་ཉྙཱ་ཡཱ་ཏི བྷ་ག་ཝཱ, བྷཱ་གཱི ཝཱ བྷ་ག་ཝཱ ཙ་ཏུ་ནྣཾ ཛྷཱ་ནཱ་ནཾ ཙ་ཏུ་ནྣཾ ཨ་པྤ་མ་ཉྙཱ་ནཾ ཙ་ཏུ་ནྣཾ ཨ་རཱུ་པ་ས་མཱ་པ་ཏྟཱི་ན་ནྟི བྷ་ག་ཝཱ, བྷཱ་གཱི ཝཱ བྷ་ག་ཝཱ ཨ་ཊྛ་ནྣཾ ཝི་མོ་ཀྑཱ་ནཾ ཨ་ཊྛ་ནྣཾ ཨ་བྷི་བྷཱ་ཡ་ཏ་ནཱ་ནཾ ན་ཝ་ནྣཾ ཨ་ནུ་པུ་བྦ་ཝི་ཧཱ་ར་ས་མཱ་པ་ཏྟཱི་ན་ནྟི བྷ་ག་ཝཱ, བྷཱ་གཱི ཝཱ བྷ་ག་ཝཱ ད་ས་ནྣཾ ས་ཉྙཱ་བྷཱ་ཝ་ནཱ་ནཾ ད་ས་ནྣཾ ཀ་སི་ཎ་ས་མཱ་པ་ཏྟཱི་ནཾ ཨཱ་ནཱ་པཱ་ན་སྶ་ཏི་ས་མཱ་དྷི་སྶ ཨ་སུ་བྷ་ས་མཱ་པ་ཏྟི་ཡཱ་ཏི བྷ་ག་ཝཱ, བྷཱ་གཱི ཝཱ བྷ་ག་ཝཱ ཙ་ཏུ་ནྣཾ ས་ཏི་པ་ཊྛཱ་ནཱ་ནཾ ཙ་ཏུ་ནྣཾ ས་མྨ་པྤ་དྷཱ་ནཱ་ནཾ ཙ་ཏུ་ནྣཾ ཨི་དྡྷི་པཱ་དཱ་ནཾ པ་ཉྩ་ནྣཾ ཨི་ནྡྲི་ཡཱ་ནཾ པ་ཉྩ་ནྣཾ བ་ལཱ་ནཾ ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨ་རི་ཡ་སྶ ཨ་ཊྛ་ངྒི་ཀ་སྶ མ་གྒ་སྶཱ་ཏི བྷ་ག་ཝཱ, བྷཱ་གཱི ཝཱ བྷ་ག་ཝཱ ད་ས་ནྣཾ ཏ་ཐཱ་ག་ཏ་བ་ལཱ་ནཾ ཙ་ཏུ་ནྣཾ ཝེ་སཱ་ར་ཛྫཱ་ནཾ ཙ་ཏུ་ནྣཾ པ་ཊི་ས་མྦྷི་དཱ་ནཾ ཚ་ནྣཾ ཨ་བྷི་ཉྙཱ་ནཾ ཚ་ནྣཾ བུ་དྡྷ་དྷ་མྨཱ་ན་ནྟི བྷ་ག་ཝཱ, བྷ་ག་ཝཱ་ཏི ནེ་ཏཾ ནཱ་མཾ མཱ་ཏ་རཱ ཀ་ཏཾ ན པི་ཏ་རཱ ཀ་ཏཾ ན བྷཱ་ཏ་རཱ ཀ་ཏཾ ན བྷ་གི་ནི་ཡཱ ཀ་ཏཾ ན མི་ཏྟཱ་མ་ཙྩེ་ཧི ཀ་ཏཾ ན ཉཱ་ཏི་སཱ་ལོ་ཧི་ཏེ་ཧི ཀ་ཏཾ ན ས་མ་ཎ་བྲཱ་ཧྨ་ཎེ་ཧི ཀ་ཏཾ ན དེ་ཝ་ཏཱ་ཧི ཀ་ཏཾ; ཝི་མོ་ཀྑ་ནྟི་ཀ་མེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ བོ་དྷི་ཡཱ མཱུ་ལེ ས་ཧ ས་བྦ་ཉྙུ་ཏ་ཉཱ་ཎ་སྶ པ་ཊི་ལཱ་བྷཱ ས་ཙྪི་ཀཱ པ་ཉྙ་ཏྟི ཡ་དི་དཾ བྷ་ག་ཝཱ་ཏི – མཱུ་ལཾ པ་པ་ཉྩ་ས་ངྑཱ་ཡ ཨི་ཏི བྷ་ག་ཝཱ.
མ་ནྟཱ ཨ་སྨཱི་ཏི ས་བྦ་མུ་པ་རུ་ནྡྷེཏི. མ་ནྟཱ ཝུ་ཙྩ་ཏི པ་ཉྙཱ. ཡཱ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི. ཨ་སྨཱིཏི རཱུ་པེ ཨ་སྨཱི་ཏི མཱ་ནོ ཨ་སྨཱི་ཏི ཚ་ནྡོ ཨ་སྨཱི་ཏི ཨ་ནུ་ས་ཡོ; ཝེ་ད་ནཱ་ཡ… ས་ཉྙཱ་ཡ… ས་ངྑཱ་རེ་སུ… ཝི་ཉྙཱ་ཎེ ཨ་སྨཱི་ཏི མཱ་ནོ ཨ་སྨཱི་ཏི ཚ་ནྡོ ཨ་སྨཱི་ཏི ཨ་ནུ་ས་ཡོ་ཏི. མཱུ་ལཾ པ་པ་ཉྩ་ས་ངྑཱ་ཡ ཨི་ཏི བྷ་ག་ཝཱ. མ་ནྟཱ ཨ་སྨཱི་ཏི ས་བྦ་མུ་པ་རུ་ནྡྷེཏི. པ་པ་ཉྩ་ས་ངྑཱ་ཡ མཱུ་ལ་ཉྩ ཨ་སྨི་མཱ་ན་ཉྩ མ་ནྟཱ་ཡ ས་བྦཾ རུ་ནྡྷེ་ཡྻ ཨུ་པ་རུ་ནྡྷེ་ཡྻ ནི་རོ་དྷེ་ཡྻ ཝཱུ་པ་ས་མེ་ཡྻ ཨ་ཏྠ་ངྒ་མེ་ཡྻ པ་ཊི་པ་སྶ་མྦྷེ་ཡྻཱ་ཏི – མཱུ་ལཾ པ་པ་ཉྩ་ས་ངྑཱ་ཡ ཨི་ཏི བྷ་ག་ཝཱ, མ་ནྟཱ ཨ་སྨཱི་ཏི ས་བྦ་མུ་པ་རུ་ནྡྷེ.
ཡཱ ཀཱ་ཙི ཏ་ཎྷཱ ཨ་ཛ྄ཛྷ་ཏྟནྟི. ཡཱ ཀཱ་ཙཱིཏི ས་བྦེ་ན ས་བྦཾ ས་བྦ་ཐཱ ས་བྦཾ ཨ་སེ་སཾ ནི་སྶེ་སཾ པ་རི་ཡཱ་དི་ཡ་ན་ཝ་ཙ་ན་མེ་ཏཾ – ཡཱ ཀཱ་ཙཱི་ཏི. ཏ་ཎྷཱཏི རཱུ་པ་ཏ་ཎྷཱ…པེ… དྷ་མྨ་ཏ་ཎྷཱ. ཨ་ཛ྄ཛྷ་ཏྟནྟི ཨ་ཛ྄ཛྷ་ཏྟ་ས་མུ་ཊྛཱ་ནཱ ཝཱ [ཨ་ཛ྄ཛྷ་ཏྟཾ ས་མུ་ཊྛཱ་ཏི (སྱཱ.)] སཱ ཏ་ཎྷཱ་ཏི – ཨ་ཛ྄ཛྷ་ཏྟཾ. ཨ་ཐ ཝཱ ཨ་ཛ྄ཛྷ་ཏྟི་ཀཾ ཝུ་ཙྩ་ཏི ཙི་ཏྟཾ. ཡཾ ཙི་ཏྟཾ མ་ནོ མཱ་ན་སཾ ཧ་ད་ཡཾ པ་ཎྜ་རཾ མ་ནོ མ་ནཱ་ཡ་ཏ་ནཾ མ་ནི་ནྡྲི་ཡཾ ཝི་ཉྙཱ་ཎཾ ཝི་ཉྙཱ་ཎ་ཀྑ་ནྡྷོ ཏ་ཛྫཱ མ་ནོ་ཝི་ཉྙཱ་ཎ་དྷཱ་ཏུ. ཙི་ཏྟེ་ན སཱ ཏ་ཎྷཱ ས་ཧ་ག་ཏཱ ས་ཧ་ཛཱ་ཏཱ སཾ་ས་ཊྛཱ ས་མྤ་ཡུ་ཏྟཱ ཨེ་ཀུ་པྤཱ་དཱ ཨེ་ཀ་ནི་རོ་དྷཱ ཨེ་ཀ་ཝ་ཏྠུ་ཀཱ ཨེ་ཀཱ་ར་མྨ་ཎཱ་ཏི་པི ཨ་ཛ྄ཛྷ་ཏྟ་ནྟི – ཡཱ ཀཱ་ཙི ཏ་ཎྷཱ ཨ་ཛ྄ཛྷ་ཏྟཾ.
ཏཱ་སཾ ཝི་ན་ཡཱ ས་དཱ ས་ཏོ སི་ཀྑེཏི. ས་དཱཏི ས་དཱ ས་བྦ་དཱ ས་བྦ་ཀཱ་ལཾ ནི་ཙྩ་ཀཱ་ལཾ དྷུ་ཝ་ཀཱ་ལཾ, ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ པོ་ངྑཱ་ནུ་པོ་ངྑཾ ཨུ་ད་ཀཱུ་མི་ག་ཛཱ་ཏཾ ཨ་ཝཱི་ཙི་ས་ནྟ་ཏི་ས་ཧི་ཏཾ ཕུ་སི་ཏཾ, པུ་རེ་བྷ་ཏྟཾ པ་ཙྪཱ་བྷ་ཏྟཾ, པུ་རི་མཾ ཡཱ་མཾ མ་ཛ྄ཛྷི་མཾ ཡཱ་མཾ པ་ཙྪི་མཾ ཡཱ་མཾ, ཀཱ་ལེ༹ ཛུ་ཎྷེ, ཝ་སྶེ ཧེ་མ་ནྟེ གི་མྷེ, པུ་རི་མེ ཝ་ཡོ་ཁ་ནྡྷེ མ་ཛ྄ཛྷི་མེ ཝ་ཡོ་ཁ་ནྡྷེ པ་ཙྪི་མེ ཝ་ཡོ་ཁ་ནྡྷེ. ས་ཏོཏི ཙ་ཏཱུ་ཧི ཀཱ་ར་ཎེ་ཧི ས་ཏོ – ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ནཾ བྷཱ་ཝེ་ནྟོ ས་ཏོ, ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ནཾ བྷཱ་ཝེ་ནྟོ ས་ཏོ. ཨ་པ་རེ་ཧི་པི ཙ་ཏཱུ་ཧི ཀཱ་ར་ཎེ་ཧི ས་ཏོ – ཨ་ས་ཏི པ་རི་ཝ་ཛྫ་ནཱ་ཡ ས་ཏོ, ས་ཏི་ཀ་ར་ཎཱི་ཡཱ་ནཾ དྷ་མྨཱ་ནཾ ཀ་ཏ་ཏྟཱ ས་ཏོ, ས་ཏི་པ་ཊི་པ་ཀྑཱ་ནཾ དྷ་མྨཱ་ནཾ ཧ་ཏ་ཏྟཱ ས་ཏོ, ས་ཏི་ནི་མི་ཏྟཱ་ནཾ ཨ་ས་མྨུ་ཊྛ་ཏྟཱ ས་ཏོ. ཨ་པ་རེ་ཧི་པི ཙ་ཏཱུ་ཧི ཀཱ་ར་ཎེ་ཧི ས་ཏོ – ས་ཏི་ཡཱ ས་མ་ནྣཱ་ག་ཏ་ཏྟཱ ས་ཏོ, ས་ཏི་ཡཱ ཝ་སི་ཏ་ཏྟཱ ས་ཏོ, ས་ཏི་ཡཱ པཱ་གུ་ཉྙ་ཏཱ་ཡ ས་ཏོ, ས་ཏི་ཡཱ ཨ་པ་ཙྩོ་རོ་ཧ་ན་ཏཱ་ཡ ས་ཏོ. ཨ་པ་རེ་ཧི་པི ཙ་ཏཱུ་ཧི ཀཱ་ར་ཎེ་ཧི ས་ཏོ – ས་ཏྟ་ཏྟཱ ས་ཏོ, ས་ནྟ་ཏྟཱ ས་ཏོ, ས་མི་ཏ་ཏྟཱ ས་ཏོ, ས་ནྟ་དྷ་མྨ་ས་མ་ནྣཱ་ག་ཏ་ཏྟཱ ས་ཏོ. བུ་དྡྷཱ་ནུ་སྶ་ཏི་ཡཱ ས་ཏོ, དྷ་མྨཱ་ནུ་སྶ་ཏི་ཡཱ ས་ཏོ, ས་ངྒྷཱ་ནུ་སྶ་ཏི་ཡཱ ས་ཏོ, སཱི་ལཱ་ནུ་སྶ་ཏི་ཡཱ ས་ཏོ, ཙཱ་གཱ་ནུ་སྶ་ཏི་ཡཱ ས་ཏོ, དེ་ཝ་ཏཱ་ནུ་སྶ་ཏི་ཡཱ ས་ཏོ, ཨཱ་ནཱ་པཱ་ན་སྶ་ཏི་ཡཱ ས་ཏོ, མ་ར་ཎ་སྶ་ཏི་ཡཱ ས་ཏོ, ཀཱ་ཡ་ག་ཏཱ་ས་ཏི་ཡཱ ས་ཏོ, ཨུ་པ་ས་མཱ་ནུ་སྶ་ཏི་ཡཱ ས་ཏོ. ཡཱ ས་ཏི ཨ་ནུ་སྶ་ཏི པ་ཊི་སྶ་ཏི, ས་ཏི ས་ར་ཎ་ཏཱ དྷཱ་ར་ཎ་ཏཱ ཨ་པི་ལཱ་པ་ན་ཏཱ ཨ་ས་མྨུ་སྶ་ན་ཏཱ, ས་ཏི ས་ཏི་ནྡྲི་ཡཾ ས་ཏི་བ་ལཾ ས་མྨཱ་ས་ཏི ས་ཏི་ས་མྦོ་ཛ྄ཛྷ་ངྒོ ཨེ་ཀཱ་ཡ་ན་མ་གྒོ – ཨ་ཡཾ ཝུ་ཙྩ་ཏི ས་ཏི. ཨི་མཱ་ཡ ས་ཏི་ཡཱ ཨུ་པེ་ཏོ ས་མུ་པེ་ཏོ, ཨུ་པ་ག་ཏོ ས་མུ་པ་ག་ཏོ, ཨུ་པ་པ་ནྣོ ས་མུ་པ་པ་ནྣོ, ས་མ་ནྣཱ་ག་ཏོ སོ ཝུ་ཙྩ་ཏི ས་ཏོ.
སི་ཀྑེཏི ཏི་སྶོ སི་ཀྑཱ – ཨ་དྷི་སཱི་ལ་སི་ཀྑཱ, ཨ་དྷི་ཙི་ཏྟ་སི་ཀྑཱ, ཨ་དྷི་པ་ཉྙཱ་སི་ཀྑཱ. ཀ་ཏ་མཱ ཨ་དྷི་སཱི་ལ་སི་ཀྑཱ? ཨི་དྷ བྷི་ཀྑུ སཱི་ལ་ཝཱ ཧོ་ཏི, པཱ་ཏི་མོ་ཀྑ་སཾ་ཝ་ར་སཾ་ཝུ་ཏོ ཝི་ཧ་ར་ཏི ཨཱ་ཙཱ་ར་གོ་ཙ་ར་ས་མྤ་ནྣོ, ཨ་ཎུ་མ་ཏྟེ་སུ ཝ་ཛྫེ་སུ བྷ་ཡ་ད་སྶཱ་ཝཱི, ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ, ཁུ་དྡ་ཀོ སཱི་ལ་ཀྑ་ནྡྷོ… མ་ཧ་ནྟོ སཱི་ལ་ཀྑ་ནྡྷོ, སཱི་ལཾ པ་ཏི་ཊྛཱ ཨཱ་དི ཙ་ར་ཎཾ སཾ་ཡ་མོ སཾ་ཝ་རོ མུ་ཁཾ པ་མུ་ཁཾ ཀུ་ས་ལཱ་ནཾ དྷ་མྨཱ་ནཾ ས་མཱ་པ་ཏྟི་ཡཱ – ཨ་ཡཾ ཨ་དྷི་སཱི་ལ་སི་ཀྑཱ.
ཀ་ཏ་མཱ ཨ་དྷི་ཙི་ཏྟ་སི་ཀྑཱ? ཨི་དྷ བྷི་ཀྑུ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ ཨ་ཛ྄ཛྷ་ཏྟཾ ས་མྤ་སཱ་ད་ནཾ ཙེ་ཏ་སོ ཨེ་ཀོ་དི་བྷཱ་ཝཾ ཨ་ཝི་ཏ་ཀྐཾ ཨ་ཝི་ཙཱ་རཾ ས་མཱ་དྷི་ཛཾ པཱི་ཏི་སུ་ཁཾ དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. པཱི་ཏི་ཡཱ ཙ ཝི་རཱ་གཱ ཨུ་པེ་ཀྑ་ཀོ ཙ ཝི་ཧ་ར་ཏི ས་ཏོ ཙ ས་མྤ་ཛཱ་ནོ སུ་ཁ་ཉྩ ཀཱ་ཡེ་ན པ་ཊི་སཾ་ཝེ་དེ་ཏི, ཡཾ ཏཾ ཨ་རི་ཡཱ ཨཱ་ཙི་ཀྑ་ནྟི ‘‘ཨུ་པེ་ཀྑ་ཀོ ས་ཏི་མཱ སུ་ཁ་ཝི་ཧཱ་རཱི’’ཏི ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. སུ་ཁ་སྶ ཙ པ་ཧཱ་ནཱ དུ་ཀྑ་སྶ ཙ པ་ཧཱ་ནཱ པུ་བྦེ་ཝ སོ་མ་ན་སྶ་དོ་མ་ན་སྶཱ་ནཾ ཨ་ཏྠ་ངྒ་མཱ ཨ་དུ་ཀྑ་མ་སུ་ཁཾ ཨུ་པེ་ཀྑཱ་ས་ཏི་པཱ་རི་སུ་དྡྷིཾ ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི – ཨ་ཡཾ ཨ་དྷི་ཙི་ཏྟ་སི་ཀྑཱ.
ཀ་ཏ་མཱ ཨ་དྷི་པ་ཉྙཱ་སི་ཀྑཱ? ཨི་དྷ བྷི་ཀྑུ པ་ཉྙ་ཝཱ ཧོ་ཏི, ཨུ་ད་ཡ་ཏྠ་གཱ་མི་ནི་ཡཱ པ་ཉྙཱ་ཡ ས་མ་ནྣཱ་ག་ཏོ ཨ་རི་ཡཱ་ཡ ནི་བྦེ་དྷི་ཀཱ་ཡ ས་མྨཱ་དུ་ཀྑ་ཀྑ་ཡ་གཱ་མི་ནི་ཡཱ. སོ ཨི་དཾ དུ་ཀྑ་ནྟི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཡཾ དུ་ཀྑ་ས་མུ་ད་ཡོ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཡཾ དུ་ཀྑ་ནི་རོ་དྷོ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨི་མེ ཨཱ་ས་ཝཱ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཡཾ ཨཱ་ས་ཝ་ས་མུ་ད་ཡོ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཡཾ ཨཱ་ས་ཝ་ནི་རོ་དྷོ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨ་ཡཾ ཨཱ་ས་ཝ་ནི་རོ་དྷ་གཱ་མི་ནཱི པ་ཊི་པ་དཱ་ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི – ཨ་ཡཾ ཨ་དྷི་པ་ཉྙཱ་སི་ཀྑཱ.
ཏཱ་སཾ ཝི་ན་ཡཱ ས་དཱ ས་ཏོ སི་ཀྑེཏི. ཏཱ་སཾ ཏ་ཎྷཱ་ནཾ ཝི་ན་ཡཱ་ཡ པ་ཊི་ཝི་ན་ཡཱ་ཡ པ་ཧཱ་ནཱ་ཡ ཝཱུ་པ་ས་མཱ་ཡ པ་ཊི་ནི་སྶ་གྒཱ་ཡ པ་ཊི་པ་སྶ་དྡྷི་ཡཱ ཨ་དྷི་སཱི་ལ་མྤི སི་ཀྑེ་ཡྻ, ཨ་དྷི་ཙི་ཏྟ་མྤི སི་ཀྑེ་ཡྻ, ཨ་དྷི་པ་ཉྙ་མྤི སི་ཀྑེ་ཡྻ; ཨི་མཱ ཏི་སྶོ སི་ཀྑཱ་ཡོ ཨཱ་ཝ་ཛྫ་ནྟོ སི་ཀྑེ་ཡྻ, པ་ཛཱ་ན་ནྟོ སི་ཀྑེ་ཡྻ, པ་སྶ་ནྟོ སི་ཀྑེ་ཡྻ, པ་ཙྩ་ཝེ་ཀྑ་ནྟོ སི་ཀྑེ་ཡྻ, ཙི་ཏྟཾ ཨ་དྷི་ཊྛ་ཧ་ནྟོ སི་ཀྑེ་ཡྻ, ས་དྡྷཱ་ཡ ཨ་དྷི་མུ་ཙྩ་ནྟོ སི་ཀྑེ་ཡྻ, ཝཱི་རི་ཡཾ པ་གྒ་ཎྷ་ནྟོ སི་ཀྑེ་ཡྻ, ས་ཏིཾ ཨུ་པ་ཊྛ་པེ་ནྟོ སི་ཀྑེ་ཡྻ, ཙི་ཏྟཾ ས་མཱ་ད་ཧ་ནྟོ སི་ཀྑེ་ཡྻ, པ་ཉྙཱ་ཡ པ་ཛཱ་ན་ནྟོ སི་ཀྑེ་ཡྻ, ཨ་བྷི་ཉྙེ་ཡྻཾ ཨ་བྷི་ཛཱ་ན་ནྟོ སི་ཀྑེ་ཡྻ, པ་རི་ཉྙེ་ཡྻཾ པ་རི་ཛཱ་ན་ནྟོ སི་ཀྑེ་ཡྻ, པ་ཧཱ་ཏ་བྦཾ པ་ཛ་ཧ་ནྟོ སི་ཀྑེ་ཡྻ, བྷཱ་ཝེ་ཏ་བྦཾ བྷཱ་ཝེ་ནྟོ སི་ཀྑེ་ཡྻ, ས་ཙྪི་ཀཱ་ཏ་བྦཾ ས་ཙྪི་ཀ་རོ་ནྟོ སི་ཀྑེ་ཡྻ ཨཱ་ཙ་རེ་ཡྻ ས་མཱ་ཙ་རེ་ཡྻ ས་མཱ་དཱ་ཡ ཝ་ཏྟེ་ཡྻཱ་ཏི – ཏཱ་སཾ ཝི་ན་ཡཱ ས་དཱ ས་ཏོ སི་ཀྑེ.
ཏེ་ནཱ་ཧ བྷ་ག་ཝཱ –
‘‘མཱུ་ལཾ པ་པ་ཉྩ་ས་ངྑཱ་ཡ, [ཨི་ཏི བྷ་ག་ཝཱ]
མ་ནྟཱ ཨ་སྨཱི་ཏི ས་བྦ་མུ་པ་རུ་ནྡྷེ;
ཡཱ ཀཱ་ཙི ཏ་ཎྷཱ ཨ་ཛ྄ཛྷ་ཏྟཾ, ཏཱ་སཾ ཝི་ན་ཡཱ ས་དཱ ས་ཏོ སི་ཀྑེ’’ཏི.
༡༥༢. ཡཾ ཀི་ཉྩི དྷ་མྨ་མ་བྷི་ཛ་ཉྙཱ, ཨ་ཛ྄ཛྷ་ཏྟཾ ཨ་ཐ ཝཱ་པི བ་ཧི་དྡྷཱ;
ན ཏེ་ན ཐཱ་མཾ ཀུ་བྦེ་ཐ, ན ཧི སཱ ནི་བྦུ་ཏི ས་ཏཾ ཝུ་ཏྟཱ.
ཡཾ ཀི་ཉྩི དྷ་མྨ་མ་བྷི་ཛ་ཉྙཱ ཨ་ཛ྄ཛྷ་ཏྟནྟི. ཡཾ ཀི་ཉྩི ཨ་ཏྟ་ནོ གུ་ཎཾ ཛཱ་ནེ་ཡྻ ཀུ་ས་ལེ ཝཱ དྷ་མྨེ ཨ་བྱཱ་ཀ་ཏེ ཝཱ དྷ་མྨེ. ཀ་ཏ་མེ ཨ་ཏྟ་ནོ གུ་ཎཱ? ཨུ་ཙྩཱ ཀུ་ལཱ པ་བྦ་ཛི་ཏོ ཝཱ ཨ་སྶཾ [ཨ་སྶ (སྱཱ.)], མ་ཧཱ་བྷོ་ག་ཀུ་ལཱ པ་བྦ་ཛི་ཏོ ཝཱ ཨ་སྶཾ, ཨུ་ལཱ༹་ར་བྷོ་ག་ཀུ་ལཱ པ་བྦ་ཛི་ཏོ ཝཱ ཨ་སྶཾ, ཉཱ་ཏོ ཡ་ས་སྶཱི ས་ག་ཧ་ཊྛ་པ་བྦ་ཛི་ཏཱ་ན་ནྟི ཝཱ ཨ་སྶཾ, ལཱ་བྷི་མྷི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ན་ནྟི ཝཱ ཨ་སྶཾ, སུ་ཏྟ་ནྟི་ཀོ ཝཱ ཨ་སྶཾ, ཝི་ན་ཡ་དྷ་རོ ཝཱ ཨ་སྶཾ, དྷ་མྨ་ཀ་ཐི་ཀོ ཝཱ ཨ་སྶཾ, ཨཱ་ར་ཉྙི་ཀོ ཝཱ ཨ་སྶཾ, པི་ཎྜ་པཱ་ཏི་ཀོ ཝཱ ཨ་སྶཾ, པཾ་སུ་ཀཱུ་ལི་ཀོ ཝཱ ཨ་སྶཾ, ཏེ་ཙཱི་ཝ་རི་ཀོ ཝཱ ཨ་སྶཾ, ས་པ་དཱ་ན་ཙཱ་རི་ཀོ ཝཱ ཨ་སྶཾ, ཁ་ལུ་པ་ཙྪཱ་བྷ་ཏྟི་ཀོ ཝཱ ཨ་སྶཾ, ནེ་ས་ཛྫི་ཀོ ཝཱ ཨ་སྶཾ, ཡ་ཐཱ་ས་ནྠ་ཏི་ཀོ ཝཱ ཨ་སྶཾ, པ་ཋ་མ་སྶ ཛྷཱ་ན་སྶ ལཱ་བྷཱི་ཏི ཝཱ ཨ་སྶཾ, དུ་ཏི་ཡ་སྶ ཛྷཱ་ན་སྶ ལཱ་བྷཱི་ཏི ཝཱ ཨ་སྶཾ, ཏ་ཏི་ཡ་སྶ ཛྷཱ་ན་སྶ ལཱ་བྷཱི་ཏི ཝཱ ཨ་སྶཾ, ཙ་ཏུ་ཏྠ་སྶ ཛྷཱ་ན་སྶ ལཱ་བྷཱི་ཏི ཝཱ ཨ་སྶཾ, ཨཱ་ཀཱ་སཱ་ན་ཉྩཱ་ཡ་ཏ་ན་ས་མཱ་པ་ཏྟི་ཡཱ ལཱ་བྷཱི་ཏི ཝཱ ཨ་སྶཾ, ཝི་ཉྙཱ་ཎ་ཉྩཱ་ཡ་ཏ་ན་ས་མཱ་པ་ཏྟི་ཡཱ… ཨཱ་ཀི་ཉྩ་ཉྙཱ་ཡ་ཏ་ན་ས་མཱ་པ་ཏྟི་ཡཱ… ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་མཱ་པ་ཏྟི་ཡཱ ལཱ་བྷཱི་ཏི ཝཱ ཨ་སྶཾ – ཨི་མེ ཝུ་ཙྩ་ནྟི ཨ་ཏྟ་ནོ གུ་ཎཱ. ཡཾ ཀི་ཉྩི ཨ་ཏྟ་ནོ གུ་ཎཾ ཛཱ་ནེ་ཡྻ ཨཱ་ཛཱ་ནེ་ཡྻ ཝི་ཛཱ་ནེ་ཡྻ པ་ཊི་ཝི་ཛཱ་ནེ་ཡྻ པ་ཊི་ཝི་ཛ྄ཛྷེ་ཡྻཱ་ཏི – ཡཾ ཀི་ཉྩི དྷ་མྨ་མ་བྷི་ཛ་ཉྙཱ ཨ་ཛ྄ཛྷ་ཏྟཾ. ཨ་ཐ ཝཱ་པི བ་ཧི་དྡྷཱཏི. ཨུ་པ་ཛ྄ཛྷཱ་ཡ་སྶ ཝཱ ཨཱ་ཙ་རི་ཡ་སྶ ཝཱ ཏེ གུ་ཎཱ ཨ་སྶཱུ་ཏི [ཨ་སྶཱུ་ཏི ཨ་ཛ྄ཛྷ་ཏྟཾ (བ་ཧཱུ་སུ)] – ཨ་ཐ ཝཱ་པི བ་ཧི་དྡྷཱ.
ན ཏེ་ན ཐཱ་མཾ ཀུ་བྦེ་ཐཱཏི. ཨ་ཏྟ་ནོ ཝཱ གུ་ཎེ་ན པ་རེ་སཾ ཝཱ གུ་ཎེ་ན ཐཱ་མཾ ན ཀ་རེ་ཡྻ, ཐ་མྦྷཾ ན ཀ་རེ་ཡྻ, མཱ་ནཾ ན ཀ་རེ་ཡྻ, ཨུ་ནྣ་ཏིཾ ན ཀ་རེ་ཡྻ, ཨུ་ནྣ་མཾ ན ཀ་རེ་ཡྻ, ན ཏེ་ན མཱ་ནཾ ཛ་ནེ་ཡྻ, ན ཏེ་ན ཐ་དྡྷོ ཨ་སྶ པ་ཏྠ་དྡྷོ པ་གྒ་ཧི་ཏ་སི་རོ་ཏི – ན ཏེ་ན ཐཱ་མཾ ཀུ་བྦེ་ཐ.
ན ཧི སཱ ནི་བྦུ་ཏི ས་ཏཾ ཝུ་ཏྟཱཏི. ས་ཏཱ་ནཾ ས་ནྟཱ་ནཾ ས་པྤུ་རི་སཱ་ནཾ བུ་དྡྷཱ་ནཾ བུ་དྡྷ་སཱ་ཝ་ཀཱ་ནཾ པ་ཙྩེ་ཀ་བུ་དྡྷཱ་ནཾ སཱ ནི་བྦུ་ཏཱི་ཏི ན ཝུ་ཏྟཱ ན པ་ཝུ་ཏྟཱ ན ཨཱ་ཙི་ཀྑི་ཏཱ ན དེ་སི་ཏཱ ན པ་ཉྙ་པི་ཏཱ ན པ་ཊྛ་པི་ཏཱ ན ཝི་ཝ་ཊཱ ན ཝི་བྷ་ཏྟཱ ན ཨུ་ཏྟཱ་ནཱི་ཀ་ཏཱ ན་པྤ་ཀཱ་སི་ཏཱ་ཏི – ན ཧི སཱ ནི་བྦུ་ཏི ས་ཏཾ ཝུ་ཏྟཱ.
ཏེ་ནཱ་ཧ བྷ་ག་ཝཱ –
‘‘ཡཾ ཀི་ཉྩི དྷ་མྨ་མ་བྷི་ཛ་ཉྙཱ, ཨ་ཛ྄ཛྷ་ཏྟཾ ཨ་ཐ ཝཱ་པི བ་ཧི་དྡྷཱ;
ན ཏེ་ན ཐཱ་མཾ ཀུ་བྦེ་ཐ, ན ཧི སཱ ནི་བྦུ་ཏི ས་ཏཾ ཝུ་ཏྟཱ’’ཏི.
༡༥༣. སེ་ཡྻོ ན ཏེ་ན མ་ཉྙེ་ཡྻ, ནཱི་ཙེ་ཡྻོ ཨ་ཐ ཝཱ་པི ས་རི་ཀྑོ;
ཕུ་ཊྛོ ཨ་ནེ་ཀ་རཱུ་པེ་ཧི, ནཱ་ཏུ་མཱ་ནཾ ཝི་ཀ་པྤ་ཡཾ ཏི་ཊྛེ.
སེ་ཡྻོ ན ཏེ་ན མ་ཉྙེ་ཡྻཱཏི. ‘‘སེ་ཡྻོ་ཧ་མ་སྨཱི’’ཏི ཨ་ཏི་མཱ་ནཾ ན ཛ་ནེ་ཡྻ ཛཱ་ཏི་ཡཱ ཝཱ གོ་ཏྟེ་ན ཝཱ ཀོ་ལ་པུ་ཏྟི་ཡེ་ན ཝཱ ཝ་ཎྞ་པོ་ཀྑ་ར་ཏཱ་ཡ ཝཱ དྷ་ནེ་ན ཝཱ ཨ་ཛ྄ཛྷེ་ནེ་ན ཝཱ ཀ་མྨཱ་ཡ་ཏ་ནེ་ན ཝཱ སི་པྤཱ་ཡ་ཏ་ནེ་ན ཝཱ ཝི་ཛྫཱ་ཊྛཱ་ནེ་ན ཝཱ སུ་ཏེ་ན ཝཱ པ་ཊི་བྷཱ་ནེ་ན ཝཱ ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ་ཏི – སེ་ཡྻོ ན ཏེ་ན མ་ཉྙེ་ཡྻ.
ནཱི་ཙེ་ཡྻོ ཨ་ཐ ཝཱ་པི ས་རི་ཀྑོཏི. ‘‘ཧཱི་ནོ་ཧ་མ་སྨཱི’’ཏི ཨོ་མཱ་ནཾ ན ཛ་ནེ་ཡྻ ཛཱ་ཏི་ཡཱ ཝཱ གོ་ཏྟེ་ན ཝཱ…པེ… ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ. ‘‘ས་དི་སོ་ཧ་མ་སྨཱི’’ཏི མཱ་ནཾ ན ཛ་ནེ་ཡྻ ཛཱ་ཏི་ཡཱ ཝཱ གོ་ཏྟེ་ན ཝཱ ཀོ་ལ་པུ་ཏྟི་ཡེ་ན ཝཱ ཝ་ཎྞ་པོ་ཀྑ་ར་ཏཱ་ཡ ཝཱ དྷ་ནེ་ན ཝཱ ཨ་ཛ྄ཛྷེ་ནེ་ན ཝཱ ཀ་མྨཱ་ཡ་ཏ་ནེ་ན ཝཱ སི་པྤཱ་ཡ་ཏ་ནེ་ན ཝཱ ཝི་ཛྫཱ་ཊྛཱ་ནེ་ན ཝཱ སུ་ཏེ་ན ཝཱ པ་ཊི་བྷཱ་ནེ་ན ཝཱ ཨ་ཉྙ་ཏ་ར་ཉྙ་ཏ་རེ་ན ཝཱ ཝ་ཏྠུ་ནཱ་ཏི – ནཱི་ཙེ་ཡྻོ ཨ་ཐ ཝཱ་པི ས་རི་ཀྑོ.
ཕུ་ཊྛོ ཨ་ནེ་ཀ་རཱུ་པེ་ཧཱིཏི. ཨ་ནེ་ཀ་ཝི་དྷེ་ཧི ཨཱ་ཀཱ་རེ་ཧི ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ་ཏི – ཕུ་ཊྛོ ཨ་ནེ་ཀ་རཱུ་པེ་ཧི.
ནཱ་ཏུ་མཱ་ནཾ ཝི་ཀ་པྤ་ཡཾ ཏི་ཊྛེཏི. ཨཱ་ཏུ་མཱ ཝུ་ཙྩ་ཏི ཨ་ཏྟཱ. ཨ་ཏྟཱ་ནཾ ཀ་པྤེ་ནྟོ ཝི་ཀ་པྤེ་ནྟོ ཝི་ཀ་པྤཾ ཨཱ་པ་ཛྫ་ནྟོ ན ཏི་ཊྛེ་ཡྻཱ་ཏི – ནཱ་ཏུ་མཱ་ནཾ ཝི་ཀ་པྤ་ཡཾ ཏི་ཊྛེ.
ཏེ་ནཱ་ཧ བྷ་ག་ཝཱ –
‘‘སེ་ཡྻོ ན ཏེ་ན མ་ཉྙེ་ཡྻ, ནཱི་ཙེ་ཡྻོ ཨ་ཐ ཝཱ་པི ས་རི་ཀྑོ;
ཕུ་ཊྛོ ཨ་ནེ་ཀ་རཱུ་པེ་ཧི, ནཱ་ཏུ་མཱ་ནཾ ཝི་ཀ་པྤ་ཡཾ ཏི་ཊྛེ’’ཏི.
༡༥༤. ཨ་ཛ྄ཛྷ་ཏྟ་མེ་ཝུ་པ་ས་མེ, ན ཨ་ཉྙ་ཏོ བྷི་ཀྑུ ས་ནྟི་མེ་སེ་ཡྻ;
ཨ་ཛ྄ཛྷ་ཏྟཾ ཨུ་པ་ས་ནྟ་སྶ, ན་ཏྠི ཨ་ཏྟཱ [ཨ་ཏྟཾ (སྱཱ.)] ཀུ་ཏོ ནི་ར་ཏྟཱ [ནི་ར་ཏྟཾ (སྱཱ.)] ཝཱ.
ཨ་ཛ྄ཛྷ་ཏྟ་མེ་ཝུ་པ་ས་མེཏི. ཨ་ཛ྄ཛྷ་ཏྟཾ རཱ་གཾ ས་མེ་ཡྻ, དོ་སཾ ས་མེ་ཡྻ, མོ་ཧཾ ས་མེ་ཡྻ, ཀོ་དྷཾ…པེ… ཨུ་པ་ནཱ་ཧཾ… མ་ཀྑཾ… པ་ལཱ༹་སཾ… ཨི་སྶཾ… མ་ཙྪ་རི་ཡཾ… མཱ་ཡཾ… སཱ་ཋེ་ཡྻཾ… ཐ་མྦྷཾ… སཱ་ར་མྦྷཾ … མཱ་ནཾ… ཨ་ཏི་མཱ་ནཾ… མ་དཾ… པ་མཱ་དཾ… ས་བྦེ ཀི་ལེ་སེ… ས་བྦེ དུ་ཙྩ་རི་ཏེ… ས་བྦེ ད་ར་ཐེ… ས་བྦེ པ་རི་ལཱ༹་ཧེ… ས་བྦེ ས་ནྟཱ་པེ… ས་བྦཱ་ཀུ་ས་ལཱ་བྷི་ས་ངྑཱ་རེ ས་མེ་ཡྻ ཨུ་པ་ས་མེ་ཡྻ ཝཱུ་པ་ས་མེ་ཡྻ ནི་བྦཱ་པེ་ཡྻ པ་ཊི་པ་སྶ་མྦྷེ་ཡྻཱ་ཏི – ཨ་ཛ྄ཛྷ་ཏྟ་མེ་ཝུ་པ་ས་མེ.
ན ཨ་ཉྙ་ཏོ བྷི་ཀྑུ ས་ནྟི་མེ་སེ་ཡྻཱཏི. ཨ་ཉྙ་ཏོ ཨ་སུ་དྡྷི་མ་གྒེ་ན, མི་ཙྪཱ་པ་ཊི་པ་དཱ་ཡ, ཨ་ནི་ཡྻཱ་ན་པ་ཏེ་ན, ཨ་ཉྙ་ཏྲ ས་ཏི་པ་ཊྛཱ་ནེ་ཧི, ཨ་ཉྙ་ཏྲ ས་མྨ་པྤ་དྷཱ་ནེ་ཧི, ཨ་ཉྙ་ཏྲ ཨི་དྡྷི་པཱ་དེ་ཧི, ཨ་ཉྙ་ཏྲ ཨི་ནྡྲི་ཡེ་ཧི, ཨ་ཉྙ་ཏྲ བ་ལེ་ཧི, ཨ་ཉྙ་ཏྲ བོ་ཛ྄ཛྷ་ངྒེ་ཧི, ཨ་ཉྙ་ཏྲ ཨ་རི་ཡཱ ཨ་ཊྛ་ངྒི་ཀཱ མ་གྒཱ ས་ནྟིཾ ཨུ་པ་ས་ནྟིཾ ཝཱུ་པ་ས་ནྟིཾ ནི་བྦུ་ཏིཾ པ་ཊི་པ་སྶ་དྡྷིཾ ན ཨེ་སེ་ཡྻ ན ག་ཝེ་སེ་ཡྻ ན པ་རི་ཡེ་སེ་ཡྻཱ་ཏི – ན ཨ་ཉྙ་ཏོ བྷི་ཀྑུ ས་ནྟི་མེ་སེ་ཡྻ.
ཨ་ཛ྄ཛྷ་ཏྟཾ ཨུ་པ་ས་ནྟ་སྶཱཏི. ཨ་ཛ྄ཛྷ་ཏྟཾ རཱ་གཾ ས་ནྟ་སྶ, དོ་སཾ ས་ནྟ་སྶ, མོ་ཧཾ ས་ནྟ་སྶ…པེ… ས་བྦཱ་ཀུ་ས་ལཱ་བྷི་ས་ངྑཱ་རེ ས་ནྟ་སྶ ཨུ་པ་ས་ནྟ་སྶ ཝཱུ་པ་ས་ནྟ་སྶ ནི་བྦུ་ཏ་སྶ པ་ཊི་པ་སྶ་དྡྷི་ཡཱ་ཏི – ཨ་ཛ྄ཛྷ་ཏྟཾ ཨུ་པ་ས་ནྟ་སྶ.
ན་ཏྠི ཨ་ཏྟཱ ཀུ་ཏོ ནི་ར་ཏྟཱ ཝཱཏི. ན་ཏྠཱིཏི པ་ཊི་ཀྑེ་པོ. ཨ་ཏྟཱཏི ཨ་ཏྟ་དི་ཊྛི ན་ཏྠི; ནི་ར་ཏྟཱཏི ཨུ་ཙྪེ་ད་དི་ཊྛི ན་ཏྠི. ཨ་ཏྟཱཏི ག་ཧི་ཏཾ ན་ཏྠི; ནི་ར་ཏྟཱཏི མུ་ཉྩི་ཏ་བྦཾ ན་ཏྠི. ཡ་སྶ་ཏྠི ག་ཧི་ཏཾ, ཏ་སྶ་ཏྠི མུ་ཉྩི་ཏ་བྦཾ. ཏ་སྶ ག་ཧི་ཏཾ གཱ་ཧཾ མུ་ཉྩ་ནཾ ས་མ་ཏི་ཀྐ་ནྟོ ཨ་ར་ཧཱ ཝུ་དྡྷི་པཱ་རི་ཧཱ་ནི་ཝཱི་ཏི་ཝ་ཏྟོ. སོ ཝུ་ཊྛ་ཝཱ་སོ ཙི་ཎྞ་ཙ་ར་ཎོ…པེ… ཛཱ་ཏི་མ་ར་ཎ་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ་ཏི – ན་ཏྠི ཨ་ཏྟཱ ཀུ་ཏོ ནི་ར་ཏྟཱ ཝཱ.
ཏེ་ནཱ་ཧ བྷ་ག་ཝཱ –
‘‘ཨ་ཛ྄ཛྷ་ཏྟ་མེ་ཝུ་པ་ས་མེ, ན ཨ་ཉྙ་ཏོ བྷི་ཀྑུ ས་ནྟི་མེ་སེ་ཡྻ;
ཨ་ཛ྄ཛྷ་ཏྟཾ ཨུ་པ་ས་ནྟ་སྶ, ན་ཏྠི ཨ་ཏྟཱ ཀུ་ཏོ ནི་ར་ཏྟཱ ཝཱ’’ཏི.
༡༥༥. མ་ཛ྄ཛྷེ ཡ་ཐཱ ས་མུ་དྡ་སྶ, ཨཱུ་མི ནོ ཛཱ་ཡ་ཏཱི ཋི་ཏོ ཧོ་ཏི;
ཨེ་ཝཾ ཋི་ཏོ ཨ་ནེ་ཛ་སྶ, ཨུ་སྶ་དཾ བྷི་ཀྑུ ན ཀ་རེ་ཡྻ [ཀ་རེ (སཱི.)] ཀུ་ཧི་ཉྩི.
མ་ཛ྄ཛྷེ ཡ་ཐཱ ས་མུ་དྡ་སྶ, ཨཱུ་མི ནོ ཛཱ་ཡ་ཏཱི ཋི་ཏོ ཧོ་ཏཱིཏི. ས་མུ་དྡོ ཙ་ཏུ་རཱ་སཱི་ཏི་ཡོ་ཛ་ན་ས་ཧ་སྶཱ་ནི ཨུ་བྦེ་དྷེ་ན ག་མྦྷཱི་རོ. ཧེ་ཊྛཱ ཙ་ཏྟཱ་རཱི་ས་ཡོ་ཛ་ན་ས་ཧ་སྶཱ་ནི ཨུ་ད་ཀཾ མ་ཙྪ་ཀ་ཙྪ་པེ་ཧི ཀ་མྤ་ཏི. ཨུ་པ་རི ཙ་ཏྟཱ་རཱི་ས་ཡོ་ཛ་ན་ས་ཧ་སྶཱ་ནི ཨུ་ད་ཀཾ ཝཱ་ཏེ་ཧི ཀ་མྤ་ཏི. མ་ཛ྄ཛྷེ ཙ་ཏྟཱ་རཱི་ས་ཡོ་ཛ་ན་ས་ཧ་སྶཱ་ནི ཨུ་ད་ཀཾ ན ཀ་མྤ་ཏི ན ཝི་ཀ་མྤ་ཏི ན ཙ་ལ་ཏི ན ཝེ་དྷ་ཏི ན་པྤ་ཝེ་དྷ་ཏི ན ས་མྤ་ཝེ་དྷ་ཏི. ཨ་ནེ་རི་ཏོ ཨ་གྷ་ཊྚི་ཏོ ཨ་ཙ་ལི་ཏོ ཨ་ལུ་ལི༹་ཏོ ཨ་བྷ་ནྟོ ཝཱུ་པ་ས་ནྟོ ཏ་ཏྲ ཨཱུ་མི ནོ ཛཱ་ཡ་ཏི, ཋི་ཏོ ཧོ་ཏི ས་མུ་དྡོ་ཏི. ཨེ་ཝ་མྤི མ་ཛ྄ཛྷེ ཡ་ཐཱ ས་མུ་དྡ་སྶ ཨཱུ་མི ནོ ཛཱ་ཡ་ཏཱི ཋི་ཏོ ཧོ་ཏི.
ཨ་ཐ ཝཱ ས་ཏྟ་ནྣཾ པ་བྦ་ཏཱ་ནཾ ཨ་ནྟ་རི་ཀཱ་སུ ས་ཏྟ་སཱི་ད་ནྟ་རཱ མ་ཧཱ་ས་མུ་དྡཱ. [སཱི་ད་ནྟ་ར་ས་མུ་དྡོ (སྱཱ.)] ཏ་ཏྲ ཨུ་ད་ཀཾ ན ཀ་མྤ་ཏི ན ཝི་ཀ་མྤ་ཏི ན ཙ་ལ་ཏི ན ཝེ་དྷ་ཏི ན་པྤ་ཝེ་དྷ་ཏི ན ས་མྤ་ཝེ་དྷ་ཏི. ཨ་ནེ་རི་ཏོ ཨ་གྷ་ཊྚི་ཏོ ཨ་ཙ་ལི་ཏོ ཨ་ལུ་ལི༹་ཏོ ཨ་བྷ་ནྟོ ཝཱུ་པ་ས་ནྟོ ཏ་ཏྲ ཨཱུ་མི ནོ ཛཱ་ཡ་ཏི, ཋི་ཏོ ཧོ་ཏི ས་མུ་དྡོ་ཏི. ཨེ་ཝ་མྤི མ་ཛ྄ཛྷེ ཡ་ཐཱ ས་མུ་དྡ་སྶ ཨཱུ་མི ནོ ཛཱ་ཡ་ཏཱི ཋི་ཏོ ཧོ་ཏི.
ཨེ་ཝཾ ཋི་ཏོ ཨ་ནེ་ཛ་སྶཱཏི. ཨེ་ཝནྟི ཨོ་པ་མྨ་ས་མྤ་ཊི་པཱ་ད་ནཾ. ཋི་ཏོཏི ལཱ་བྷེ་པི ན ཀ་མྤ་ཏི, ཨ་ལཱ་བྷེ་པི ན ཀ་མྤ་ཏི, ཡ་སེ་པི ན ཀ་མྤ་ཏི, ཨ་ཡ་སེ་པི ན ཀ་མྤ་ཏི, པ་སཾ་སཱ་ཡ་པི ན ཀ་མྤ་ཏི, ནི་ནྡཱ་ཡ་པི ན ཀ་མྤ་ཏི, སུ་ཁེ་པི ན ཀ་མྤ་ཏི, དུ་ཀྑེ་པི ན ཀ་མྤ་ཏི ན ཝི་ཀ་མྤ་ཏི ན ཙ་ལ་ཏི ན ཝེ་དྷ་ཏི ན་པྤ་ཝེ་དྷ་ཏི ན ས་མྤ་ཝེ་དྷ་ཏཱི་ཏི – ཨེ་ཝཾ ཋི་ཏོ. ཨ་ནེ་ཛ་སྶཱཏི ཨེ་ཛཱ ཝུ་ཙྩ་ཏི ཏ་ཎྷཱ. ཡོ རཱ་གོ སཱ་རཱ་གོ…པེ… ཨ་བྷི་ཛ྄ཛྷཱ ལོ་བྷོ ཨ་ཀུ་ས་ལ་མཱུ་ལཾ. ཡ་སྶེ་སཱ ཨེ་ཛཱ ཏ་ཎྷཱ པ་ཧཱི་ནཱ ཨུ་ཙྪི་ནྣཱ ས་མུ་ཙྪི་ནྣཱ ཝཱུ་པ་ས་ནྟཱ པ་ཊི་པ་སྶ་དྡྷཱ ཨ་བྷ་བྦུ་པྤ་ཏྟི་ཀཱ ཉཱ་ཎ་གྒི་ནཱ ད་ཌྜྷཱ, སོ ཝུ་ཙྩ་ཏི ཨ་ནེ་ཛོ. ཨེ་ཛཱ་ཡ པ་ཧཱི་ན་ཏྟཱ ཨ་ནེ་ཛོ; སོ ལཱ་བྷེ་པི ན ཨི་ཉྫ་ཏི, ཨ་ལཱ་བྷེ་པི ན ཨི་ཉྫ་ཏི, ཡ་སེ་པི ན ཨི་ཉྫ་ཏི, ཨ་ཡ་སེ་པི ན ཨི་ཉྫ་ཏི, པ་སཾ་སཱ་ཡ་པི ན ཨི་ཉྫ་ཏི, ནི་ནྡཱ་ཡ་པི ན ཨི་ཉྫ་ཏི, སུ་ཁེ་པི ན ཨི་ཉྫ་ཏི, དུ་ཀྑེ་པི ན ཨི་ཉྫ་ཏི, ན ཙ་ལ་ཏི ན ཝེ་དྷ་ཏི ན་པྤ་ཝེ་དྷ་ཏི ན ས་མྤ་ཝེ་དྷ་ཏཱི་ཏི – ཨེ་ཝཾ ཋི་ཏོ ཨ་ནེ་ཛ་སྶ.
ཨུ་སྶ་དཾ བྷི་ཀྑུ ན ཀ་རེ་ཡྻ ཀུ་ཧི་ཉྩཱིཏི. ཨུ་སྶ་དཱཏི ས་ཏྟུ་སྶ་དཱ – རཱ་གུ་སྶ་དཾ [རཱ་གུ་སྶ་དོ (སྱཱ.)], དོ་སུ་སྶ་དཾ, མོ་ཧུ་སྶ་དཾ, མཱ་ནུ་སྶ་དཾ, དི་ཊྛུ་སྶ་དཾ, ཀི་ལེ་སུ་སྶ་དཾ, ཀ་མྨུ་སྶ་དཾ ན ཀ་རེ་ཡྻ ན ཛ་ནེ་ཡྻ ན ས་ཉྫ་ནེ་ཡྻ ན ནི་བྦ་ཏྟེ་ཡྻ ནཱ་བྷི་ནི་བྦ་ཏྟེ་ཡྻ. ཀུ་ཧི་ཉྩཱིཏི ཀུ་ཧི་ཉྩི ཀི་སྨི་ཉྩི ཀ་ཏྠ་ཙི ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ཨ་ཛ྄ཛྷ་ཏྟ་བ་ཧི་དྡྷཱ ཝཱ་ཏི – ཨུ་སྶ་དཾ བྷི་ཀྑུ ན ཀ་རེ་ཡྻ ཀུ་ཧི་ཉྩི.
ཏེ་ནཱ་ཧ བྷ་ག་ཝཱ –
‘‘མ་ཛ྄ཛྷེ ཡ་ཐཱ ས་མུ་དྡ་སྶ, ཨཱུ་མི ནོ ཛཱ་ཡ་ཏཱི ཋི་ཏོ ཧོ་ཏི;
ཨེ་ཝཾ ཋི་ཏོ ཨ་ནེ་ཛ་སྶ, ཨུ་སྶ་དཾ བྷི་ཀྑུ ན ཀ་རེ་ཡྻ ཀུ་ཧི་ཉྩཱི’’ཏི.
༡༥༦. ཨ་ཀི་ཏྟ་ཡཱི ཝི་ཝ་ཊ་ཙ་ཀྑུ, ས་ཀྑི་དྷ་མྨཾ པ་རི་སྶ་ཡ་ཝི་ན་ཡཾ;
པ་ཊི་པ་དཾ ཝ་དེ་ཧི བྷ་དྡ་ནྟེ, པཱ་ཏི་མོ་ཀྑཾ ཨ་ཐ ཝཱ་པི ས་མཱ་དྷིཾ.
ཨ་ཀི་ཏྟ་ཡཱི ཝི་ཝ་ཊ་ཙ་ཀྑཱུཏི. ཨ་ཀི་ཏྟ་ཡཱིཏི ཀི་ཏྟི་ཏཾ ཨཱ་ཙི་ཀྑི་ཏཾ དེ་སི་ཏཾ པ་ཉྙ་པི་ཏཾ པ་ཊྛ་པི་ཏཾ ཝི་ཝ་ཊཾ ཝི་བྷ་ཏྟཾ ཨུ་ཏྟཱ་ནཱི་ཀ་ཏཾ པ་ཀཱ་སི་ཏ་ནྟི – ཨ་ཀི་ཏྟ་ཡི [ཨ་ཀི་ཏྟ་ཡཱི་ཏི ཨ་ཀི་ཏྟ་ཡི པ་རི་ཀི་ཏྟ་ཡི ཨཱ་ཙི་ཀྑི དེ་སེ་སི པ་ཉྙ་པེ་སི པ་ཊྛ་པེ་སི ཝི་ཝ་རི ཝི་བྷ་ཛི ཨུ་ཏྟཱ་ནི་མ་ཀཱ་སི པ་ཀཱ་སེ་སཱི་ཏི ཨ་ཀི་ཏྟ་ཡི (སྱཱ.)]. ཝི་ཝ་ཊ་ཙ་ཀྑཱུཏི བྷ་ག་ཝཱ པ་ཉྩ་ཧི ཙ་ཀྑཱུ་ཧི ཝི་ཝ་ཊ་ཙ་ཀྑུ – མཾ་ས་ཙ་ཀྑུ་ནཱ་པི ཝི་ཝ་ཊ་ཙ་ཀྑུ, དི་བྦེ་ན ཙ་ཀྑུ་ནཱ་པི ཝི་ཝ་ཊ་ཙ་ཀྑུ, པ་ཉྙཱ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ, བུ་དྡྷ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ, ས་མ་ནྟ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ.
ཀ་ཐཾ བྷ་ག་ཝཱ མཾ་ས་ཙ་ཀྑུ་ནཱ་པི ཝི་ཝ་ཊ་ཙ་ཀྑུ? མཾ་ས་ཙ་ཀྑུ་མྷི་པི བྷ་ག་ཝ་ཏོ པ་ཉྩ ཝ་ཎྞཱ སཾ་ཝི་ཛྫ་ནྟི – ནཱི་ལོ ཙ ཝ་ཎྞོ, པཱི་ཏ་ཀོ ཙ ཝ་ཎྞོ, ལོ་ཧི་ཏ་ཀོ ཙ ཝ་ཎྞོ, ཀ་ཎྷོ ཙ ཝ་ཎྞོ, ཨོ་དཱ་ཏོ ཙ ཝ་ཎྞོ. ཨ་ཀྑི་ལོ་མཱ་ནི ཙ བྷ་ག་ཝ་ཏོ ཡ་ཏྠ ཙ ཨ་ཀྑི་ལོ་མཱ་ནི པ་ཏི་ཊྛི་ཏཱ་ནི ཏཾ ནཱི་ལཾ ཧོ་ཏི སུ་ནཱི་ལཾ པཱ་སཱ་དི་ཀཾ ད་སྶ་ནེ་ཡྻཾ ཨུ་མཱ་པུ་པྥ་ས་མཱ་ནཾ [ཨུ་མྨཱ་པུ་པྥ་ས་མཱ་ནཾ (སཱི. ཀ.), ཨུ་མྨཱ་ར་པུ་པྥ་ས་མཱ་ནཾ (སྱཱ.)]. ཏ་སྶ པ་ར་ཏོ པཱི་ཏ་ཀཾ ཧོ་ཏི སུ་པཱི་ཏ་ཀཾ སུ་ཝ་ཎྞ་ཝ་ཎྞཾ པཱ་སཱ་དི་ཀཾ ད་སྶ་ནེ་ཡྻཾ ཀ་ཎི་ཀཱ་ར་པུ་པྥ་ས་མཱ་ནཾ. ཨུ་བྷ་ཡ་ཏོ ཙ ཨ་ཀྑི་ཀཱུ་ཊཱ་ནི བྷ་ག་ཝ་ཏོ ལོ་ཧི་ཏ་ཀཱ་ནི ཧོ་ནྟི སུ་ལོ་ཧི་ཏ་ཀཱ་ནི པཱ་སཱ་དི་ཀཱ་ནི ད་སྶ་ནེ་ཡྻཱ་ནི ཨི་ནྡ་གོ་པ་ཀ་ས་མཱ་ནཱ་ནི. མ་ཛ྄ཛྷེ ཀ་ཎྷཾ ཧོ་ཏི སུ་ཀ་ཎྷཾ ཨ་ལཱུ་ཁཾ སི་ནི་དྡྷཾ པཱ་སཱ་དི་ཀཾ ད་སྶ་ནེ་ཡྻཾ ཨ་དྡཱ་རི་ཊྛ་ཀ་ས་མཱ་ནཾ [ཨ་ལཱ༹་རི་ཊྛ་ཀ་ས་མཱ་ནཾ (སྱཱ.)]. ཏ་སྶ པ་ར་ཏོ ཨོ་དཱ་ཏཾ ཧོ་ཏི སུ་ཨོ་དཱ་ཏཾ སེ་ཏཾ པ་ཎྜ་རཾ པཱ་སཱ་དི་ཀཾ ད་སྶ་ནེ་ཡྻཾ ཨོ་ས་དྷི་ཏཱ་ར་ཀ་ས་མཱ་ནཾ. ཏེ་ན བྷ་ག་ཝཱ པཱ་ཀ་ཏི་ཀེ་ན མཾ་ས་ཙ་ཀྑུ་ནཱ ཨ་ཏྟ་བྷཱ་ཝ་པ་རི་ཡཱ་པ་ནྣེ་ན པུ་རི་མ་སུ་ཙ་རི་ཏ་ཀ་མྨཱ་བྷི་ནི་བྦ་ཏྟེ་ན ས་མ་ནྟཱ ཡོ་ཛ་ནཾ པ་སྶ་ཏི དི་ཝཱ ཙེ་ཝ ར་ཏྟི་ཉྩ. ཡ་དཱ ཧི་པི ཙ་ཏུ་ར་ངྒ་ས་མ་ནྣཱ་ག་ཏོ ཨ་ནྡྷ་ཀཱ་རོ ཧོ་ཏི. སཱུ་རི་ཡོ ཝཱ ཨ་ཏྠ་ངྒ་ཏོ ཧོ་ཏི. ཀཱ་ལ༹་པ་ཀྑོ ཙ ཨུ་པོ་ས་ཐོ ཧོ་ཏི. ཏི་བྦོ ཙ ཝ་ན་ས་ཎྜོ ཧོ་ཏི. མ་ཧཱ ཙ ཀཱ་ལ༹་མེ་གྷོ [ཨ་ཀཱ་ལ་མེ་གྷོ (སྱཱ.)] ཨ་བྦྷུ་ཊྛི་ཏོ ཧོ་ཏི. ཨེ་ཝ་རཱུ་པེ་པི ཙ་ཏུ་ར་ངྒ་ས་མ་ནྣཱ་ག་ཏེ ཨ་ནྡྷ་ཀཱ་རེ ས་མ་ནྟཱ ཡོ་ཛ་ནཾ པ་སྶ་ཏི. ན་ཏྠི སོ ཀུ་ཊྚོ [ཀུ་ཌྜོ (སཱི.)] ཝཱ ཀ་ཝཱ་ཊཾ ཝཱ པཱ་ཀཱ་རོ ཝཱ པ་བྦ་ཏོ ཝཱ ག་ཙྪོ ཝཱ ལ་ཏཱ ཝཱ ཨཱ་ཝ་ར་ཎཾ རཱུ་པཱ་ནཾ ད་སྶ་ནཱ་ཡ. ཨེ་ཀ་ཉྩེ ཏི་ལ་ཕ་ལཾ ནི་མི་ཏྟཾ ཀ་ཏྭཱ ཏི་ལ་ཝཱ་ཧེ པ་ཀྑི་པེ་ཡྻ. ཏ་ཉྙེ་ཝ ཏི་ལ་ཕ་ལཾ ཨུ་དྡྷ་རེ་ཡྻ. ཨེ་ཝཾ པ་རི་སུ་དྡྷཾ བྷ་ག་ཝ་ཏོ པཱ་ཀ་ཏི་ཀཾ མཾ་ས་ཙ་ཀྑུ. ཨེ་ཝཾ བྷ་ག་ཝཱ མཾ་ས་ཙ་ཀྑུ་ནཱ་པི ཝི་ཝ་ཊ་ཙ་ཀྑུ.
ཀ་ཐཾ བྷ་ག་ཝཱ དི་བྦེ་ན ཙ་ཀྑུ་ནཱ་པི ཝི་ཝ་ཊ་ཙ་ཀྑུ? བྷ་ག་ཝཱ དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶ་ཏི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ. ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་ཏི – ‘‘ཨི་མེ ཝ་ཏ བྷོ་ནྟོ ས་ཏྟཱ ཀཱ་ཡ་དུ་ཙྩ་རི་ཏེ་ན ས་མ་ནྣཱ་ག་ཏཱ ཝ་ཙཱི་དུ་ཙྩ་རི་ཏེ་ན ས་མ་ནྣཱ་ག་ཏཱ མ་ནོ་དུ་ཙྩ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨུ་པ་ཝཱ་ད་ཀཱ མི་ཙྪཱ་དི་ཊྛི་ཀཱ མི་ཙྪཱ་དི་ཊྛི་ཀ་མྨ་ས་མཱ་དཱ་ནཱ, ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཱ. ཨི་མེ ཝཱ པ་ན བྷོ་ནྟོ ས་ཏྟཱ ཀཱ་ཡ་སུ་ཙ་རི་ཏེ་ན ས་མ་ནྣཱ་ག་ཏཱ ཝ་ཙཱི་སུ་ཙ་རི་ཏེ་ན ས་མ་ནྣཱ་ག་ཏཱ མ་ནོ་སུ་ཙ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨ་ནུ་པ་ཝཱ་ད་ཀཱ ས་མྨཱ་དི་ཊྛི་ཀཱ ས་མྨཱ་དི་ཊྛི་ཀ་མྨ་ས་མཱ་དཱ་ནཱ, ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ’’ཏི. ཨི་ཏི དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶ་ཏི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ; ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་ཏི. ཨཱ་ཀ་ངྑ་མཱ་ནོ ཙ བྷ་ག་ཝཱ ཨེ་ཀ་མྤི ལོ་ཀ་དྷཱ་ཏུཾ པ་སྶེ་ཡྻ, དྭེ་པི ལོ་ཀ་དྷཱ་ཏུ་ཡོ པ་སྶེ་ཡྻ, ཏི་སྶོ་པི ལོ་ཀ་དྷཱ་ཏུ་ཡོ པ་སྶེ་ཡྻ, ཙ་ཏ་སྶོ་པི ལོ་ཀ་དྷཱ་ཏུ་ཡོ པ་སྶེ་ཡྻ, པ་ཉྩ་པི ལོ་ཀ་དྷཱ་ཏུ་ཡོ པ་སྶེ་ཡྻ, ད་ས་པི ལོ་ཀ་དྷཱ་ཏུ་ཡོ པ་སྶེ་ཡྻ, ཝཱི་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, ཏིཾ་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, ཙ་ཏྟཱ་ལཱི་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, པ་ཉྙཱ་ས་མྤི ལོ་ཀ་དྷཱ་ཏུ་ཡོ པ་སྶེ་ཡྻ, ས་ཏ་མྤི ལོ་ཀ་དྷཱ་ཏུ་ཡོ པ་སྶེ་ཡྻ, ས་ཧ་སྶི་མྤི ཙཱུ་ལ༹་ནི་ཀཾ ལོ་ཀ་དྷཱ་ཏུཾ པ་སྶེ་ཡྻ, དྭི་ས་ཧ་སྶི་མྤི མ་ཛ྄ཛྷི་མི་ཀཾ ལོ་ཀ་དྷཱ་ཏུཾ པ་སྶེ་ཡྻ, ཏི་ས་ཧ་སྶི་མྤི ལོ་ཀ་དྷཱ་ཏུཾ པ་སྶེ་ཡྻ, མ་ཧཱ་ས་ཧ་སྶི་མྤི [ཏི་ས་ཧ་སྶིཾ མ་ཧཱ་ས་ཧ་སྶི་མྤི (སཱི. ཀ.)] ལོ་ཀ་དྷཱ་ཏུཾ པ་སྶེ་ཡྻ. ཡཱ་ཝ་ཏ་ཀཾ ཝཱ པ་ན ཨཱ་ཀ་ངྑེ་ཡྻ ཏཱ་ཝ་ཏ་ཀཾ པ་སྶེ་ཡྻ. ཨེ་ཝཾ པ་རི་སུ་དྡྷཾ བྷ་ག་ཝ་ཏོ དི་བྦ་ཙ་ཀྑུ. ཨེ་ཝཾ བྷ་ག་ཝཱ དི་བྦེ་ན ཙ་ཀྑུ་ནཱ་པི ཝི་ཝ་ཊ་ཙ་ཀྑུ.
ཀ་ཐཾ བྷ་ག་ཝཱ པ་ཉྙཱ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ? བྷ་ག་ཝཱ མ་ཧཱ་པ་ཉྙོ པུ་ཐུ་པ་ཉྙོ ཧཱ་ས་པ་ཉྙོ ཛ་ཝ་ན་པ་ཉྙོ ཏི་ཀྑ་པ་ཉྙོ ནི་བྦེ་དྷི་ཀ་པ་ཉྙོ པ་ཉྙཱ་པ་བྷེ་ད་ཀུ་ས་ལོ པ་བྷི་ནྣ་ཉཱ་ཎོ ཨ་དྷི་ག་ཏ་པ་ཊི་ས་མྦྷི་དོ ཙ་ཏུ་ཝེ་སཱ་ར་ཛྫ་པྤ་ཏྟོ ད་ས་བ་ལ་དྷཱ་རཱི པུ་རི་སཱ་ས་བྷོ པུ་རི་ས་སཱི་ཧོ པུ་རི་ས་ནཱ་གོ པུ་རི་སཱ་ཛ་ཉྙོ པུ་རི་ས་དྷོ་ར་ཡ྄ཧོ ཨ་ན་ནྟ་ཉཱ་ཎོ ཨ་ན་ནྟ་ཏེ་ཛོ ཨ་ན་ནྟ་ཡ་སོ ཨ་ཌྜྷོ མ་ཧ་དྡྷ་ནོ དྷ་ན་ཝཱ ནེ་ཏཱ ཝི་ནེ་ཏཱ ཨ་ནུ་ནེ་ཏཱ པ་ཉྙཱ་པེ་ཏཱ ཨ་ནི་ཛ྄ཛྷཱ་པེ་ཏཱ པེ་ཀྑེ་ཏཱ པ་སཱ་དེ་ཏཱ. སོ ཧི བྷ་ག་ཝཱ ཨ་ནུ་པྤ་ནྣ་སྶ མ་གྒ་སྶ ཨུ་པྤཱ་དེ་ཏཱ, ཨ་ས་ཉྫཱ་ཏ་སྶ མ་གྒ་སྶ ས་ཉྫ་ནེ་ཏཱ, ཨ་ན་ཀྑཱ་ཏ་སྶ མ་གྒ་སྶ ཨ་ཀྑཱ་ཏཱ, མ་གྒ་ཉྙཱུ མ་གྒ་ཝི་དཱུ མ་གྒ་ཀོ་ཝི་དོ མ་གྒཱ་ནུ་གཱ ཙ པ་ན ཨེ་ཏ་ར་ཧི སཱ་ཝ་ཀཱ ཝི་ཧ་ར་ནྟི པ་ཙྪཱ ས་མ་ནྣཱ་ག་ཏཱ.
སོ ཧི བྷ་ག་ཝཱ ཛཱ་ནཾ ཛཱ་ནཱ་ཏི པ་སྶཾ པ་སྶ་ཏི, ཙ་ཀྑུ་བྷཱུ་ཏོ ཉཱ་ཎ་བྷཱུ་ཏོ དྷ་མྨ་བྷཱུ་ཏོ བྲ་ཧྨ་བྷཱུ་ཏོ ཝ་ཏྟཱ པ་ཝ་ཏྟཱ ཨ་ཏྠ་སྶ ནི་ནྣེ་ཏཱ ཨ་མ་ཏ་སྶ དཱ་ཏཱ དྷ་མྨ་སྶཱ་མཱི ཏ་ཐཱ་ག་ཏོ. ན་ཏྠི ཏ་སྶ བྷ་ག་ཝ་ཏོ ཨ་ཉྙཱ་ཏཾ ཨ་དི་ཊྛཾ ཨ་ཝི་དི་ཏཾ ཨ་ས་ཙྪི་ཀ་ཏཾ ཨ་ཕ་སྶི་ཏཾ པ་ཉྙཱ་ཡ. ཨ་ཏཱི་ཏཾ ཨ་ནཱ་ག་ཏཾ པ་ཙྩུ་པྤ་ནྣཾ [ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཾ (སྱཱ.) མ་ཧཱ་ནི. ༦༩] ཨུ་པཱ་དཱ་ཡ ས་བྦེ དྷ་མྨཱ ས་བྦཱ་ཀཱ་རེ་ན བུ་དྡྷ་སྶ བྷ་ག་ཝ་ཏོ ཉཱ་ཎ་མུ་ཁེ ཨཱ་པཱ་ཐཾ ཨཱ་ག་ཙྪ་ནྟི. ཡཾ ཀི་ཉྩི ནེ་ཡྻཾ ནཱ་མ ཨ་ཏྠི ཛཱ་ནི་ཏ་བྦཾ [ཨ་ཏྠི དྷ་མྨཾ ཛཱ་ནི་ཏ་བྦཾ (སཱི. ཀ.)] ཨ་ཏྟ་ཏྠོ ཝཱ པ་ར་ཏྠོ ཝཱ ཨུ་བྷ་ཡ་ཏྠོ ཝཱ དི་ཊྛ་དྷ་མྨི་ཀོ ཝཱ ཨ་ཏྠོ ས་མྤ་རཱ་ཡི་ཀོ ཝཱ ཨ་ཏྠོ ཨུ་ཏྟཱ་ནོ ཝཱ ཨ་ཏྠོ ག་མྦྷཱི་རོ ཝཱ ཨ་ཏྠོ གཱུ་ལ༹ྷོ ཝཱ ཨ་ཏྠོ པ་ཊི་ཙྪ་ནྣོ ཝཱ ཨ་ཏྠོ ནེ་ཡྻོ ཝཱ ཨ་ཏྠོ ནཱི་ཏོ ཝཱ ཨ་ཏྠོ ཨ་ན་ཝ་ཛྫོ ཝཱ ཨ་ཏྠོ ནི་ཀྐི་ལེ་སོ ཝཱ ཨ་ཏྠོ ཝོ་དཱ་ནོ ཝཱ ཨ་ཏྠོ པ་ར་མ་ཏྠོ ཝཱ ཨ་ཏྠོ, ས་བྦཾ ཏཾ [པ་ར་མ་ཏྠོ ཝཱ, ས་བྦ་ནྟཾ (སྱཱ.)] ཨ་ནྟོ་བུ་དྡྷ་ཉཱ་ཎེ པ་རི་ཝ་ཏྟ་ཏི.
ས་བྦཾ ཀཱ་ཡ་ཀ་མྨཾ བུ་དྡྷ་སྶ བྷ་ག་ཝ་ཏོ ཉཱ་ཎཱ་ནུ་པ་རི་ཝ་ཏྟི ས་བྦཾ ཝ་ཙཱི་ཀ་མྨཾ… ས་བྦཾ མ་ནོ་ཀ་མྨཾ… ཨ་ཏཱི་ཏེ བུ་དྡྷ་སྶ བྷ་ག་ཝ་ཏོ ཨ་པྤ་ཊི་ཧ་ཏཾ ཉཱ་ཎཾ, ཨ་ནཱ་ག་ཏེ པ་ཙྩུ་པྤ་ནྣེ ཨ་པྤ་ཊི་ཧ་ཏཾ ཉཱ་ཎཾ. ཡཱ་ཝ་ཏ་ཀཾ ནེ་ཡྻཾ ཏཱ་ཝ་ཏ་ཀཾ ཉཱ་ཎཾ, ཡཱ་ཝ་ཏ་ཀཾ ཉཱ་ཎཾ ཏཱ་ཝ་ཏ་ཀཾ ནེ་ཡྻཾ; ནེ་ཡྻ་པ་རི་ཡ་ནྟི་ཀཾ ཉཱ་ཎཾ ཉཱ་ཎ་པ་རི་ཡ་ནྟི་ཀཾ ནེ་ཡྻཾ, ནེ་ཡྻཾ ཨ་ཏི་ཀྐ་མི་ཏྭཱ ཉཱ་ཎཾ ན་པྤ་ཝ་ཏྟ་ཏི, ཉཱ་ཎཾ ཨ་ཏི་ཀྐ་མི་ཏྭཱ ནེ་ཡྻ་པ་ཐོ ན་ཏྠི. ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ ཏེ དྷ་མྨཱ. ཡ་ཐཱ དྭི་ནྣཾ ས་མུ་གྒ་པ་ཊ་ལཱ་ནཾ ས་མྨཱ་ཕུ་སི་ཏཱ་ནཾ ཧེ་ཊྛི་མཾ ས་མུ་གྒ་པ་ཊ་ལཾ ཨུ་པ་རི་མཾ ནཱ་ཏི་ཝ་ཏྟ་ཏི, ཨུ་པ་རི་མཾ ས་མུ་གྒ་པ་ཊ་ལཾ ཧེ་ཊྛི་མཾ ནཱ་ཏི་ཝ་ཏྟ་ཏི, ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ; ཨེ་ཝ་མེ་ཝ བུ་དྡྷ་སྶ བྷ་ག་ཝ་ཏོ ནེ་ཡྻ་ཉྩ ཉཱ་ཎ་ཉྩ ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ. ཡཱ་ཝ་ཏ་ཀཾ ནེ་ཡྻཾ ཏཱ་ཝ་ཏ་ཀཾ ཉཱ་ཎཾ, ཡཱ་ཝ་ཏ་ཀཾ ཉཱ་ཎཾ ཏཱ་ཝ་ཏ་ཀཾ ནེ་ཡྻཾ; ནེ་ཡྻ་པ་རི་ཡ་ནྟི་ཀཾ ཉཱ་ཎཾ ཉཱ་ཎ་པ་རི་ཡ་ནྟི་ཀཾ ནེ་ཡྻཾ. ནེ་ཡྻཾ ཨ་ཏི་ཀྐ་མི་ཏྭཱ ཉཱ་ཎཾ ན་པྤ་ཝ་ཏྟ་ཏི, ཉཱ་ཎཾ ཨ་ཏི་ཀྐ་མི་ཏྭཱ ནེ་ཡྻ་པ་ཐོ ན་ཏྠི. ཨ་ཉྙ་མ་ཉྙ་པ་རི་ཡ་ནྟ་ཊྛཱ་ཡི་ནོ ཏེ དྷ་མྨཱ.
ས་བྦ་དྷ་མྨེ་སུ བུ་དྡྷ་སྶ བྷ་ག་ཝ་ཏོ ཉཱ་ཎཾ པ་ཝ་ཏྟ་ཏི. ས་བྦེ དྷ་མྨཱ བུ་དྡྷ་སྶ བྷ་ག་ཝ་ཏོ ཨཱ་ཝ་ཛྫ་ན་པ་ཊི་བ་དྡྷཱ ཨཱ་ཀ་ངྑ་པ་ཊི་བ་དྡྷཱ མ་ན་སི་ཀཱ་ར་པ་ཊི་བ་དྡྷཱ ཙི་ཏྟུ་པྤཱ་ད་པ་ཊི་བ་དྡྷཱ. ས་བྦ་ས་ཏྟེ་སུ བུ་དྡྷ་སྶ བྷ་ག་ཝ་ཏོ ཉཱ་ཎཾ པ་ཝ་ཏྟ་ཏི. ས་བྦེ་སཾ ས་ཏྟཱ་ནཾ བྷ་ག་ཝཱ ཨཱ་ས་ཡཾ ཛཱ་ནཱ་ཏི, ཨ་ནུ་ས་ཡཾ ཛཱ་ནཱ་ཏི, ཙ་རི་ཏཾ ཛཱ་ནཱ་ཏི, ཨ་དྷི་མུ་ཏྟིཾ ཛཱ་ནཱ་ཏི, ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ བྷ་བྦཱ་བྷ་བྦེ ས་ཏྟེ པ་ཛཱ་ནཱ་ཏི. ས་དེ་ཝ་ཀོ ལོ་ཀོ ས་མཱ་ར་ཀོ ས་བྲ་ཧྨ་ཀོ ས་སྶ་མ་ཎ་བྲཱ་ཧྨ་ཎཱི པ་ཛཱ ས་དེ་ཝ་མ་ནུ་སྶཱ ཨ་ནྟོ་བུ་དྡྷ་ཉཱ་ཎེ པ་རི་ཝ་ཏྟ་ཏི [པ་རི་ཝ་ཏྟ་ནྟི (ཀ.) པ་སཱུ་ར་སུ་ཏྟ་ནི་དྡེ་སེ ཨ་ཝ་སཱ་ནེ་པི].
ཡ་ཐཱ ཡེ ཀེ་ཙི མ་ཙྪ་ཀ་ཙྪ་པཱ ཨ་ནྟ་མ་སོ ཏི་མི་ཏི་མི་ངྒ་ལཾ ཨུ་པཱ་དཱ་ཡ ཨ་ནྟོ་མ་ཧཱ་ས་མུ་དྡེ པ་རི་ཝ་ཏྟ་ནྟི; ཨེ་ཝ་མེ་ཝ ས་དེ་ཝ་ཀོ ལོ་ཀོ ས་མཱ་ར་ཀོ ས་བྲ་ཧྨ་ཀོ ས་སྶ་མ་ཎ་བྲཱ་ཧྨ་ཎཱི པ་ཛཱ ས་དེ་ཝ་མ་ནུ་སྶཱ ཨ་ནྟོ་བུ་དྡྷ་ཉཱ་ཎེ པ་རི་ཝ་ཏྟ་ཏི [པ་རི་ཝ་ཏྟ་ནྟི (ཀ.) པ་སཱུ་ར་སུ་ཏྟ་ནི་དྡེ་སེ ཨ་ཝ་སཱ་ནེ་པི]. ཡ་ཐཱ ཡེ ཀེ་ཙི པ་ཀྑཱི ཨ་ནྟ་མ་སོ ག་རུ་ལ༹ཾ ཝེ་ན་ཏེ་ཡྻཾ ཨུ་པཱ་དཱ་ཡ ཨཱ་ཀཱ་ས་སྶ པ་དེ་སེ པ་རི་ཝ་ཏྟ་ནྟི; ཨེ་ཝ་མེ་ཝ ཡེ་པི ཏེ སཱ་རི་པུ་ཏྟ་ས་མཱ པ་ཉྙཱ་ཡ ཏེ་པི བུ་དྡྷ་ཉཱ་ཎ་སྶ པ་དེ་སེ པ་རི་ཝ་ཏྟ་ནྟི; བུ་དྡྷ་ཉཱ་ཎཾ དེ་ཝ་མ་ནུ་སྶཱ་ནཾ པ་ཉྙཾ ཕ་རི་ཏྭཱ ཨ་བྷི་བྷ་ཝི་ཏྭཱ ཏི་ཊྛ་ཏི. ཡེ་པི ཏེ ཁ་ཏྟི་ཡ་པ་ཎྜི་ཏཱ བྲཱ་ཧྨ་ཎ་པ་ཎྜི་ཏཱ ག་ཧ་པ་ཏི་པ་ཎྜི་ཏཱ ས་མ་ཎ་པ་ཎྜི་ཏཱ ནི་པུ་ཎཱ ཀ་ཏ་པ་ར་པྤ་ཝཱ་དཱ ཝཱ་ལ་ཝེ་དྷི་རཱུ་པཱ ཝོ་བྷི་ནྡ་ནྟཱ མ་ཉྙེ ཙ་ར་ནྟི པ་ཉྙཱ་ག་ཏེ་ན དི་ཊྛི་ག་ཏཱ་ནི, ཏེ པ་ཉྷཾ ཨ་བྷི་ས་ངྑ་རི་ཏྭཱ ཨ་བྷི་ས་ངྑ་རི་ཏྭཱ ཏ་ཐཱ་ག་ཏཾ ཨུ་པ་ས་ངྐ་མི་ཏྭཱ པུ་ཙྪ་ནྟི གཱུ་ལ༹ྷཱ་ནི ཙ པ་ཊི་ཙྪ་ནྣཱ་ནི ཙ. ཀ་ཐི་ཏཱ ཝི་ས་ཛྫི་ཏཱ ཙ ཏེ པ་ཉྷཱ བྷ་ག་ཝ་ཏཱ ཧོ་ནྟི ནི་དྡི་ཊྛ་ཀཱ་ར་ཎཱ. ཨུ་པ་ཀྑི་ཏྟ་ཀཱ ཙ ཏེ བྷ་ག་ཝ་ཏོ ས་མྤ་ཛྫ་ནྟི. ཨ་ཐ ཁོ བྷ་ག་ཝཱ ཏ་ཏྠ ཨ་ཏི་རོ་ཙ་ཏི ཡ་དི་དཾ པ་ཉྙཱ་ཡཱ་ཏི. ཨེ་ཝཾ བྷ་ག་ཝཱ པ་ཉྙཱ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ.
ཀ་ཐཾ བྷ་ག་ཝཱ བུ་དྡྷ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ? བྷ་ག་ཝཱ བུ་དྡྷ་ཙ་ཀྑུ་ནཱ ལོ་ཀཾ ཝོ་ལོ་ཀེ་ནྟོ ཨ་དྡ་ས ས་ཏྟེ ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ ཨ་པྤེ་ཀ་ཙྩེ པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ, ཨ་པྤེ་ཀ་ཙྩེ ན པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ. སེ་ཡྻ་ཐཱ་པི ནཱ་མ ཨུ་པྤ་ལི་ནི་ཡཾ ཝཱ པ་དུ་མི་ནི་ཡཾ ཝཱ པུ་ཎྜ་རཱི་ཀི་ནི་ཡཾ ཝཱ ཨ་པྤེ་ཀ་ཙྩཱ་ནི ཨུ་པྤ་ལཱ་ནི ཝཱ པ་དུ་མཱ་ནི ཝཱ པུ་ཎྜ་རཱི་ཀཱ་ནི ཝཱ ཨུ་ད་ཀེ ཛཱ་ཏཱ་ནི ཨུ་ད་ཀེ སཾ་ཝ་ཌྜྷཱ་ནི ཨུ་ད་ཀཱ ཨ་ནུ་གྒ་ཏཱ་ནི ཨ་ནྟོ་ནི་མུ་གྒ་པོ་སཱི་ནི, ཨ་པྤེ་ཀ་ཙྩཱ་ནི ཨུ་པྤ་ལཱ་ནི ཝཱ པ་དུ་མཱ་ནི ཝཱ པུ་ཎྜ་རཱི་ཀཱ་ནི ཝཱ ཨུ་ད་ཀེ ཛཱ་ཏཱ་ནི ཨུ་ད་ཀེ སཾ་ཝ་ཌྜྷཱ་ནི ས་མོ་ད་ཀཾ ཋི་ཏཱ་ནི, ཨ་པྤེ་ཀ་ཙྩཱ་ནི ཨུ་པྤ་ལཱ་ནི ཝཱ པ་དུ་མཱ་ནི ཝཱ པུ་ཎྜ་རཱི་ཀཱ་ནི ཝཱ ཨུ་ད་ཀེ ཛཱ་ཏཱ་ནི ཨུ་ད་ཀེ སཾ་ཝ་ཌྜྷཱ་ནི ཨུ་ད་ཀཱ ཨ་ཙྩུ་གྒ་མྨ ཏི་ཊྛ་ནྟི ཨ་ནུ་པ་ལི་ཏྟཱ་ནི ཨུ་ད་ཀེ་ན; ཨེ་ཝ་མེ་ཝ བྷ་ག་ཝཱ བུ་དྡྷ་ཙ་ཀྑུ་ནཱ ལོ་ཀཾ ཝོ་ལོ་ཀེ་ནྟོ ཨ་དྡ་ས ས་ཏྟེ ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ ཨ་པྤེ་ཀ་ཙྩེ པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ, ཨ་པྤེ་ཀ་ཙྩེ ན པ་ར་ལོ་ཀ་ཝ་ཛྫ་བྷ་ཡ་ད་སྶཱ་ཝི་ནོ ཝི་ཧ་ར་ནྟེ. ཛཱ་ནཱ་ཏི བྷ་ག་ཝཱ – ‘‘ཨ་ཡཾ པུ་གྒ་ལོ རཱ་ག་ཙ་རི་ཏོ, ཨ་ཡཾ དོ་ས་ཙ་རི་ཏོ, ཨ་ཡཾ མོ་ཧ་ཙ་རི་ཏོ, ཨ་ཡཾ ཝི་ཏ་ཀྐ་ཙ་རི་ཏོ, ཨ་ཡཾ ས་དྡྷཱ་ཙ་རི་ཏོ, ཨ་ཡཾ ཉཱ་ཎ་ཙ་རི་ཏོ’’ཏི. རཱ་ག་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨ་སུ་བྷ་ཀ་ཐཾ ཀ་ཐེ་ཏི; དོ་ས་ཙ་རི་ཏ་སྶ བྷ་ག་ཝཱ པུ་གྒ་ལ་སྶ མེ་ཏྟཱ་བྷཱ་ཝ་ནཾ ཨཱ་ཙི་ཀྑ་ཏི; མོ་ཧ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨུ་དྡེ་སེ པ་རི་པུ་ཙྪཱ་ཡ ཀཱ་ལེ་ན དྷ་མྨ་སྶ་ཝ་ནེ ཀཱ་ལེ་ན དྷ་མྨ་སཱ་ཀ་ཙྪཱ་ཡ ག་རུ་སཾ་ཝཱ་སེ ནི་ཝེ་སེ་ཏི; ཝི་ཏ་ཀྐ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨཱ་ནཱ་པཱ་ན་སྶ་ཏིཾ ཨཱ་ཙི་ཀྑ་ཏི; ས་དྡྷཱ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ པ་སཱ་ད་ནཱི་ཡཾ ནི་མི་ཏྟཾ ཨཱ་ཙི་ཀྑ་ཏི བུ་དྡྷ་སུ་བོ་དྷིཾ [བུ་དྡྷ་སུ་བུ་དྡྷ་ཏཾ (ཀ.)] དྷ་མྨ་སུ་དྷ་མྨ་ཏཾ ས་ངྒྷ་སུ་པྤ་ཊི་པ་ཏྟིཾ སཱི་ལཱ་ནི ཙ; ཨ་ཏྟ་ནོ ཉཱ་ཎ་ཙ་རི་ཏ་སྶ བྷ་ག་ཝཱ པུ་གྒ་ལ་སྶ ཨཱ་ཙི་ཀྑ་ཏི ཝི་པ་སྶ་ནཱ་ནི་མི་ཏྟཾ ཨ་ནི་ཙྩཱ་ཀཱ་རཾ དུ་ཀྑཱ་ཀཱ་རཾ ཨ་ན་ཏྟཱ་ཀཱ་རཾ.
‘‘སེ་ལེ ཡ་ཐཱ པ་བྦ་ཏ་མུ་དྡྷ་ནི་ཊྛི་ཏོ, ཡ་ཐཱ་པི པ་སྶེ ཛ་ན་ཏཾ ས་མ་ནྟ་ཏོ;
ཏ་ཐཱུ་པ་མཾ དྷ་མྨ་མ་ཡཾ སུ་མེ་དྷ, པཱ་སཱ་ད་མཱ་རུ་ཡ྄ཧ ས་མ་ནྟ་ཙ་ཀྑུ;
སོ་ཀཱ་ཝ་ཏི་ཎྞཾ ཛ་ན་ཏ་མ་པེ་ཏ་སོ་ཀོ, ཨ་ཝེ་ཀྑ་སྶུ ཛཱ་ཏི་ཛ་རཱ་བྷི་བྷཱུ་ཏ’’ནྟི.
ཨེ་ཝཾ བྷ་ག་ཝཱ བུ་དྡྷ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ.
ཀ་ཐཾ བྷ་ག་ཝཱ ས་མ་ནྟ་ཙ་ཀྑུ་ནཱ་པི ཝི་ཝ་ཊ་ཙ་ཀྑུ? ས་མ་ནྟ་ཙ་ཀྑུ ཝུ་ཙྩ་ཏི ས་བྦ་ཉྙུ་ཏ་ཉཱ་ཎཾ. བྷ་ག་ཝཱ ས་བྦ་ཉྙུ་ཏ་ཉཱ་ཎེ་ན ཨུ་པེ་ཏོ ས་མུ་པེ་ཏོ ཨུ་པ་ག་ཏོ ས་མུ་པ་ག་ཏོ ཨུ་པ་པ་ནྣོ ས་མུ་པ་པ་ནྣོ ས་མ་ནྣཱ་ག་ཏོ.
‘‘ན ཏ་སྶ ཨ་དི་ཊྛ་མི་དྷ་ཏྠི ཀི་ཉྩི, ཨ་ཐོ ཨ་ཝི་ཉྙཱ་ཏ་མ་ཛཱ་ནི་ཏ་བྦཾ;
ས་བྦཾ ཨ་བྷི་ཉྙཱ་སི ཡ་ད་ཏྠི ནེ་ཡྻཾ, ཏ་ཐཱ་ག་ཏོ ཏེ་ན ས་མ་ནྟ་ཙ་ཀྑཱུ’’ཏི.
ཨེ་ཝཾ བྷ་ག་ཝཱ ས་མ་ནྟ་ཙ་ཀྑུ་ནཱ་པི ཝི་ཝ་ཊ་ཙ་ཀྑཱུ་ཏི – ཨ་ཀི་ཏྟ་ཡི ཝི་ཝ་ཊ་ཙ་ཀྑུ.
ས་ཀྑི་དྷ་མྨཾ པ་རི་སྶ་ཡ་ཝི་ན་ཡནྟི. ས་ཀྑི་དྷ་མྨནྟི ན ཨི་ཏི་ཧི་ཏི་ཧཾ, ན ཨི་ཏི་ཀི་རཱ་ཡ, ན པ་ར་མྤ་རཱ་ཡ, ན པི་ཊ་ཀ་ས་མྤ་དཱ་ཡ, ན ཏ་ཀྐ་ཧེ་ཏུ, ན ན་ཡ་ཧེ་ཏུ, ན ཨཱ་ཀཱ་ར་པ་རི་ཝི་ཏ་ཀྐེ་ན, ན དི་ཊྛི་ནི་ཛ྄ཛྷཱ་ན་ཀྑ་ནྟི་ཡཱ སཱ་མཾ ས་ཡ་མ་བྷི་ཉྙཱ་ཏཾ ཨ་ཏྟ་པ་ཙྩ་ཀྑཾ དྷ་མྨ་ནྟི – ས་ཀྑི་དྷ་མྨཾ. པ་རི་སྶ་ཡ་ཝི་ན་ཡནྟི. པ་རི་སྶ་ཡཱཏི དྭེ པ་རི་སྶ་ཡཱ – པཱ་ཀ་ཊ་པ་རི་སྶ་ཡཱ ཙ པ་ཊི་ཙྪ་ནྣ་པ་རི་སྶ་ཡཱ ཙ. ཀ་ཏ་མེ པཱ་ཀ་ཊ་པ་རི་སྶ་ཡཱ? སཱི་ཧཱ བྱ་གྒྷཱ དཱི་པཱི ཨ་ཙྪཱ ཏ་ར་ཙྪཱ ཀོ་ཀཱ མ་ཧིཾ་སཱ [གོ་མ་ཧི་སཱ (སྱཱ.) མ་ཧཱ་ནི. ༥] ཧ་ཏྠཱི ཨ་ཧི ཝི་ཙྪི་ཀཱ ས་ཏ་པ་དཱི, ཙོ་རཱ ཝཱ ཨ་སྶུ མཱ་ན་ཝཱ ཝཱ ཀ་ཏ་ཀ་མྨཱ ཝཱ ཨ་ཀ་ཏ་ཀ་མྨཱ ཝཱ, ཙ་ཀྑུ་རོ་གོ སོ་ཏ་རོ་གོ གྷཱ་ན་རོ་གོ ཛི་ཝ྄ཧཱ་རོ་གོ ཀཱ་ཡ་རོ་གོ སཱི་ས་རོ་གོ ཀ་ཎྞ་རོ་གོ མུ་ཁ་རོ་གོ ད་ནྟ་རོ་གོ ཀཱ་སོ སཱ་སོ པི་ནཱ་སོ ཌཱ་ཧོ [ཌ་ཧོ (སཱི. སྱཱ.) མ་ཧཱ་ནི. ༥] ཛ་རོ ཀུ་ཙྪི་རོ་གོ མུ་ཙྪཱ པ་ཀྑ་ནྡི་ཀཱ སཱུ་ལཱ ཝི་སཱུ་ཙི་ཀཱ ཀུ་ཊྛཾ ག་ཎྜོ ཀི་ལཱ་སོ སོ་སོ ཨ་པ་མཱ་རོ ད་དྡུ ཀ་ཎྜུ ཀ་ཙྪུ ར་ཁ་སཱ ཝི་ཏ་ཙྪི་ཀཱ ལོ་ཧི་ཏ་པི་ཏྟཾ [ལོ་ཧི་ཏཾ པི་ཏྟཾ (སྱཱ. ཀ.)] མ་དྷུ་མེ་ཧོ ཨཾ་སཱ པི་ལ༹་ཀཱ བྷ་ག་ནྡ་ལཱ, པི་ཏྟ་ས་མུ་ཊྛཱ་ནཱ ཨཱ་བཱ་དྷཱ སེ་མྷ་ས་མུ་ཊྛཱ་ནཱ ཨཱ་བཱ་དྷཱ ཝཱ་ཏ་ས་མུ་ཊྛཱ་ནཱ ཨཱ་བཱ་དྷཱ ས་ནྣི་པཱ་ཏི་ཀཱ ཨཱ་བཱ་དྷཱ ཨུ་ཏུ་པ་རི་ཎཱ་མ་ཛཱ ཨཱ་བཱ་དྷཱ ཝི་ས་མ་པ་རི་ཧཱ་ར་ཛཱ ཨཱ་བཱ་དྷཱ ཨོ་པ་ཀྐ་མི་ཀཱ ཨཱ་བཱ་དྷཱ ཀ་མྨ་ཝི་པཱ་ཀ་ཛཱ ཨཱ་བཱ་དྷཱ, སཱི་ཏཾ ཨུ་ཎྷཾ ཛི་གྷ་ཙྪཱ པི་པཱ་སཱ ཨུ་ཙྩཱ་རོ པ་སྶཱ་ཝོ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶཱ ཨི་ཏི ཝཱ – ཨི་མེ ཝུ་ཙྩ་ནྟི པཱ་ཀ་ཊ་པ་རི་སྶ་ཡཱ.
ཀ་ཏ་མེ པ་ཊི་ཙྪ་ནྣ་པ་རི་སྶ་ཡཱ? ཀཱ་ཡ་དུ་ཙྩ་རི་ཏཾ ཝ་ཙཱི་དུ་ཙྩ་རི་ཏཾ མ་ནོ་དུ་ཙྩ་རི་ཏཾ ཀཱ་མ་ཙྪ་ནྡ་ནཱི་ཝ་ར་ཎཾ བྱཱ་པཱ་ད་ནཱི་ཝ་ར་ཎཾ ཐི་ན་མི་དྡྷ་ནཱི་ཝ་ར་ཎཾ ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ ཝི་ཙི་ཀི་ཙྪཱ་ནཱི་ཝ་ར་ཎཾ རཱ་གོ དོ་སོ མོ་ཧོ ཀོ་དྷོ ཨུ་པ་ནཱ་ཧོ མ་ཀྑོ པ་ལཱ༹་སོ ཨི་སྶཱ མ་ཙྪ་རི་ཡཾ མཱ་ཡཱ སཱ་ཋེ་ཡྻཾ ཐ་མྦྷོ སཱ་ར་མྦྷོ མཱ་ནོ ཨ་ཏི་མཱ་ནོ མ་དོ པ་མཱ་དོ, ས་བྦེ ཀི་ལེ་སཱ ས་བྦེ དུ་ཙྩ་རི་ཏཱ ས་བྦེ ད་ར་ཐཱ ས་བྦེ པ་རི་ལཱ༹་ཧཱ ས་བྦེ ས་ནྟཱ་པཱ ས་བྦཱ་ཀུ་ས་ལཱ་བྷི་ས་ངྑཱ་རཱ – ཨི་མེ ཝུ་ཙྩ་ནྟི པ་ཊི་ཙྪ་ནྣ་པ་རི་སྶ་ཡཱ.
པ་རི་སྶ་ཡཱཏི ཀེ་ན་ཊྛེ་ན པ་རི་སྶ་ཡཱ? པ་རི་ས་ཧ་ནྟཱི་ཏི པ་རི་སྶ་ཡཱ, པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི པ་རི་སྶ་ཡཱ, ཏ་ཏྲཱ་ས་ཡཱ་ཏི པ་རི་སྶ་ཡཱ. ཀ་ཐཾ པ་རི་ས་ཧ་ནྟཱི་ཏི པ་རི་སྶ་ཡཱ? ཏེ པ་རི་སྶ་ཡཱ ཏཾ པུ་གྒ་ལཾ ས་ཧ་ནྟི པ་རི་ས་ཧ་ནྟི ཨ་བྷི་བྷ་ཝ་ནྟི ཨ་ཛ྄ཛྷོ་ཏྠ་ར་ནྟི པ་རི་ཡཱ་དི་ཡ་ནྟི མ་དྡ་ནྟི. ཨེ་ཝཾ པ་རི་ས་ཧ་ནྟཱི་ཏི – པ་རི་སྶ་ཡཱ.
ཀ་ཐཾ པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི པ་རི་སྶ་ཡཱ? ཏེ པ་རི་སྶ་ཡཱ ཀུ་ས་ལཱ་ནཾ དྷ་མྨཱ་ནཾ ཨ་ནྟ་རཱ་ཡཱ་ཡ པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ་སཾ ཀུ་ས་ལཱ་ནཾ དྷ་མྨཱ་ནཾ? ས་མྨཱ་པ་ཊི་པ་དཱ་ཡ ཨ་ནུ་ལོ་མ་པ་ཊི་པ་དཱ་ཡ ཨ་པ་ཙྩ་ནཱི་ཀ་པ་ཊི་པ་དཱ་ཡ ཨ་ཝི་རུ་དྡྷ་པ་ཊི་པ་དཱ་ཡ ཨ་ནྭ་ཏྠ་པ་ཊི་པ་དཱ་ཡ དྷ་མྨཱ་ནུ་དྷ་མྨ་པ་ཊི་པ་དཱ་ཡ སཱི་ལེ་སུ པ་རི་པཱུ་ར་ཀཱ་རི་ཏཱ་ཡ ཨི་ནྡྲི་ཡེ་སུ གུ་ཏྟ་དྭཱ་ར་ཏཱ་ཡ བྷོ་ཛ་ནེ མ་ཏྟ་ཉྙུ་ཏཱ་ཡ ཛཱ་ག་རི་ཡཱ་ནུ་ཡོ་ག་སྶ ས་ཏི་ས་མྤ་ཛ་ཉྙ་སྶ ཙ་ཏུ་ནྣཾ ས་ཏི་པ་ཊྛཱ་ནཱ་ནཾ བྷཱ་ཝ་ནཱ་ནུ་ཡོ་ག་སྶ ཙ་ཏུ་ནྣཾ ས་མྨ་པྤ་དྷཱ་ནཱ་ནཾ ཙ་ཏུ་ནྣཾ ཨི་དྡྷི་པཱ་དཱ་ནཾ པ་ཉྩ་ནྣཾ ཨི་ནྡྲི་ཡཱ་ནཾ པ་ཉྩ་ནྣཾ བ་ལཱ་ནཾ ས་ཏྟ་ནྣཾ བོ་ཛ྄ཛྷ་ངྒཱ་ནཾ ཨ་རི་ཡ་སྶ ཨ་ཊྛ་ངྒི་ཀ་སྶ མ་གྒ་སྶ བྷཱ་ཝ་ནཱ་ནུ་ཡོ་ག་སྶ – ཨི་མེ་སཾ ཀུ་ས་ལཱ་ནཾ དྷ་མྨཱ་ནཾ ཨ་ནྟ་རཱ་ཡཱ་ཡ པ་རི་ཧཱ་ནཱ་ཡ སཾ་ཝ་ཏྟ་ནྟི. ཨེ་ཝ་མྤི པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི – པ་རི་སྶ་ཡཱ.
ཀ་ཐཾ ཏ་ཏྲཱ་ས་ཡཱ་ཏི པ་རི་སྶ་ཡཱ? ཏ་ཏྠེ་ཏེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི ཨ་ཏྟ་བྷཱ་ཝ་ས་ནྣི་སྶ་ཡཱ. ཡ་ཐཱ བི་ལེ བི་ལཱ་ས་ཡཱ པཱ་ཎཱ ས་ཡ་ནྟི, ད་ཀེ ད་ཀཱ་ས་ཡཱ པཱ་ཎཱ ས་ཡ་ནྟི, ཝ་ནེ ཝ་ནཱ་ས་ཡཱ པཱ་ཎཱ ས་ཡ་ནྟི, རུ་ཀྑེ རུ་ཀྑཱ་ས་ཡཱ པཱ་ཎཱ ས་ཡ་ནྟི; ཨེ་ཝ་མེ་ཝ ཏ་ཏྠེ་ཏེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི ཨ་ཏྟ་བྷཱ་ཝ་ས་ནྣི་སྶ་ཡཱ་ཏི. ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘སཱ་ནྟེ་ཝཱ་སི་ཀོ, བྷི་ཀྑ་ཝེ, བྷི་ཀྑུ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏི. ཀ་ཐ་ཉྩ, བྷི་ཀྑ་ཝེ, བྷི་ཀྑུ སཱ་ནྟེ་ཝཱ་སི་ཀོ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏི? ཨི་དྷ, བྷི་ཀྑ་ཝེ, བྷི་ཀྑུ་ནོ ཙ་ཀྑུ་ནཱ རཱུ་པཾ དི་སྭཱ ཨུ་པྤ་ཛྫ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ ས་ར་ས་ངྐ་པྤཱ ས་ཉྙོ་ཛ་ནི་ཡཱ, ཏྱ་སྶ ཨ་ནྟོ ཝ་ས་ནྟི ཨ་ནྭཱ་སྶ་ཝ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ནྟེ་ཝཱ་སི་ཀོ་ཏི ཝུ་ཙྩ་ཏི. ཏེ ནཾ ས་མུ་དཱ་ཙ་ར་ནྟི, ས་མུ་དཱ་ཙ་ར་ནྟི [ས་མུ་དཱ་ཙཱ་རེ་ནྟི (སཱི.)] ནཾ པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ཙ་རི་ཡ་ཀོ་ཏི ཝུ་ཙྩ་ཏི.
‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ་ནོ སོ་ཏེ་ན ས་དྡཾ སུ་ཏྭཱ…པེ… གྷཱ་ནེ་ན ག་ནྡྷཾ གྷཱ་ཡི་ཏྭཱ… ཛི་ཝ྄ཧཱ་ཡ ར་སཾ སཱ་ཡི་ཏྭཱ… ཀཱ་ཡེ་ན ཕོ་ཊྛ་བྦཾ ཕུ་སི་ཏྭཱ … མ་ན་སཱ དྷ་མྨཾ ཝི་ཉྙཱ་ཡ ཨུ་པྤ་ཛྫ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ ས་ར་ས་ངྐ་པྤཱ ས་ཉྙོ་ཛ་ནི་ཡཱ, ཏྱ་སྶ ཨ་ནྟོ ཝ་ས་ནྟི ཨ་ནྭཱ་སྶ་ཝ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ནྟེ་ཝཱ་སི་ཀོ་ཏི ཝུ་ཙྩ་ཏི. ཏེ ནཾ ས་མུ་དཱ་ཙ་ར་ནྟི, ས་མུ་དཱ་ཙ་ར་ནྟི ནཾ པཱ་པ་ཀཱ ཨ་ཀུ་ས་ལཱ དྷ་མྨཱ་ཏི. ཏ་སྨཱ སཱ་ཙ་རི་ཡ་ཀོ་ཏི ཝུ་ཙྩ་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ སཱ་ནྟེ་ཝཱ་སི་ཀོ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏཱི’’ཏི. ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཏ་ཡོ་མེ, བྷི་ཀྑ་ཝེ, ཨ་ནྟ་རཱ་མ་ལཱ ཨ་ནྟ་རཱ་ཨ་མི་ཏྟཱ ཨ་ནྟ་རཱ་ས་པ་ཏྟཱ ཨ་ནྟ་རཱ་ཝ་དྷ་ཀཱ ཨ་ནྟ་རཱ་པ་ཙྩ་ཏྠི་ཀཱ. ཀ་ཏ་མེ ཏ་ཡོ? ལོ་བྷོ, བྷི་ཀྑ་ཝེ, ཨ་ནྟ་རཱ་མ་ལོ [ཨ་ནྟ་རཱ་མ་ལཾ (སཱི. ཀ.) ཨི་ཏི་ཝུ. ༨༨] ཨ་ནྟ་རཱ་ཨ་མི་ཏྟོ ཨ་ནྟ་རཱ་ས་པ་ཏྟོ ཨ་ནྟ་རཱ་ཝ་དྷ་ཀོ ཨ་ནྟ་རཱ་པ་ཙྩ་ཏྠི་ཀོ; དོ་སོ, བྷི་ཀྑ་ཝེ…པེ… མོ་ཧོ, བྷི་ཀྑ་ཝེ, ཨ་ནྟ་རཱ་མ་ལོ ཨ་ནྟ་རཱ་ཨ་མི་ཏྟོ ཨ་ནྟ་རཱ་ས་པ་ཏྟོ ཨ་ནྟ་རཱ་ཝ་དྷ་ཀོ ཨ་ནྟ་རཱ་པ་ཙྩ་ཏྠི་ཀོ. ཨི་མེ ཁོ, བྷི་ཀྑ་ཝེ, ཏ་ཡོ ཨ་ནྟ་རཱ་མ་ལཱ ཨ་ནྟ་རཱ་ཨ་མི་ཏྟཱ ཨ་ནྟ་རཱ་ས་པ་ཏྟཱ ཨ་ནྟ་རཱ་ཝ་དྷ་ཀཱ ཨ་ནྟ་རཱ་པ་ཙྩ་ཏྠི་ཀཱ’’ཏི.
‘‘ཨ་ན་ཏྠ་ཛ་ན་ནོ ལོ་བྷོ, ལོ་བྷོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘ལུ་དྡྷོ ཨ་ཏྠཾ ན ཛཱ་ནཱ་ཏི, ལུ་དྡྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ [ཨ་ནྡྷ་ཏ་མཾ (སྱཱ.) ཨི་ཏི་ཝུ. ༨༨] ཏ་དཱ ཧོ་ཏི, ཡཾ ལོ་བྷོ ས་ཧ་ཏེ ན་རཾ.
‘‘ཨ་ན་ཏྠ་ཛ་ན་ནོ དོ་སོ, དོ་སོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘ཀུ་དྡྷོ ཨ་ཏྠཾ ན ཛཱ་ནཱ་ཏི, ཀུ་དྡྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ ཏ་དཱ ཧོ་ཏི, ཡཾ དོ་སོ ས་ཧ་ཏེ ན་རཾ.
‘‘ཨ་ན་ཏྠ་ཛ་ན་ནོ མོ་ཧོ, མོ་ཧོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘མཱུ་ལ༹ྷོ ཨ་ཏྠཾ ན ཛཱ་ནཱ་ཏི, མཱུ་ལ༹ྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ ཏ་དཱ ཧོ་ཏི, ཡཾ མོ་ཧོ ས་ཧ་ཏེ ན་ར’’ནྟི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཏ་ཡོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨཱ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནཱ ཨུ་པྤ་ཛྫ་ནྟི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. ཀ་ཏ་མེ ཏ་ཡོ? ལོ་བྷོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨོ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནོ ཨུ་པྤ་ཛྫ་ཏི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ; དོ་སོ ཁོ, མ་ཧཱ་རཱ་ཛ…པེ… མོ་ཧོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨོ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནོ ཨུ་པྤ་ཛྫ་ཏི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. ཨི་མེ ཁོ, མ་ཧཱ་རཱ་ཛ, ཏ་ཡོ པུ་རི་ས་སྶ དྷ་མྨཱ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནཱ ཨུ་པྤ་ཛྫ་ནྟི ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ.
‘‘ལོ་བྷོ དོ་སོ ཙ མོ་ཧོ ཙ, པུ་རི་སཾ པཱ་པ་ཙེ་ཏ་སཾ;
ཧིཾ་ས་ནྟི ཨ་ཏྟ་ས་མྦྷཱུ་ཏཱ, ཏ་ཙ་སཱ་རཾ་ཝ ས་མྥ་ལ’’ནྟི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘རཱ་གོ ཙ དོ་སོ ཙ ཨི་ཏོ ནི་དཱ་ནཱ, ཨ་ར་ཏཱི ར་ཏཱི ལོ་མ་ཧཾ་སོ ཨི་ཏོ་ཛཱ;
ཨི་ཏོ ས་མུ་ཊྛཱ་ཡ མ་ནོ་ཝི་ཏ་ཀྐཱ, ཀུ་མཱ་ར་ཀཱ དྷ་ངྐ་མི་ཝོ་སྶ་ཛ་ནྟཱི’’ཏི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
པ་རི་སྶ་ཡ་ཝི་ན་ཡནྟི པ་རི་སྶ་ཡ་ཝི་ན་ཡཾ པ་རི་སྶ་ཡ་པྤ་ཧཱ་ནཾ པ་རི་སྶ་ཡ་ཝཱུ་པ་ས་མཾ པ་རི་སྶ་ཡ་པ་ཊི་ནི་སྶ་གྒཾ པ་རི་སྶ་ཡ་པ་ཊི་པ་སྶ་དྡྷིཾ ཨ་མ་ཏཾ ནི་བྦཱ་ན་ནྟི – ས་ཀྑི་དྷ་མྨཾ པ་རི་སྶ་ཡ་ཝི་ན་ཡཾ.
པ་ཊི་པ་དཾ ཝ་དེ་ཧི བྷ་དྡ་ནྟེཏི. པ་ཊི་པ་དཾ ཝ་དེ་ཧི – ས་མྨཱ་པ་ཊི་པ་དཾ ཨ་ནུ་ལོ་མ་པ་ཊི་པ་དཾ ཨ་པ་ཙྩ་ནཱི་ཀ་པ་ཊི་པ་དཾ ཨ་ཝི་རུ་དྡྷ་པ་ཊི་པ་དཾ ཨ་ནྭ་ཏྠ་པ་ཊི་པ་དཾ དྷ་མྨཱ་ནུ་དྷ་མྨ་པ་ཊི་པ་དཾ སཱི་ལེ་སུ པ་རི་པཱུ་ར་ཀཱ་རི་ཏཾ ཨི་ནྡྲི་ཡེ་སུ གུ་ཏྟ་དྭཱ་ར་ཏཾ བྷོ་ཛ་ནེ མ་ཏྟ་ཉྙུ་ཏཾ ཛཱ་ག་རི་ཡཱ་ནུ་ཡོ་གཾ ས་ཏི་ས་མྤ་ཛ་ཉྙཾ ཙ་ཏྟཱ་རོ ས་ཏི་པ་ཊྛཱ་ནེ ཙ་ཏྟཱ་རོ ས་མྨ་པྤ་དྷཱ་ནེ ཙ་ཏྟཱ་རོ ཨི་དྡྷི་པཱ་དེ པ་ཉྩི་ནྡྲི་ཡཱ་ནི པ་ཉྩ བ་ལཱ་ནི ས་ཏྟ བོ་ཛ྄ཛྷ་ངྒེ ཨ་རི་ཡཾ ཨ་ཊྛ་ངྒི་ཀཾ མ་གྒཾ ནི་བྦཱ་ན་ཉྩ ནི་བྦཱ་ན་གཱ་མི་ནི་ཉྩ པ་ཊི་པ་དཾ ཝ་དེ་ཧི ཨཱ་ཙི་ཀྑ དེ་སེ་ཧི པ་ཉྙ་པེ་ཧི པ་ཊྛ་པེ་ཧི ཝི་ཝ་ར ཝི་བྷ་ཛ ཨུ་ཏྟཱ་ནཱི་ཀ་རོ་ཧི པ་ཀཱ་སེ་ཧཱི་ཏི – པ་ཊི་པ་དཾ ཝ་དེ་ཧི. བྷ་དྡ་ནྟེཏི སོ ནི་མྨི་ཏོ བུ་དྡྷཾ བྷ་ག་ཝ་ནྟཾ ཨཱ་ལ་པ་ཏི. ཨ་ཐ ཝཱ ཡཾ ཏྭཾ དྷ་མྨཾ ཨཱ་ཙི་ཀྑ་སི དེ་སེ་སི པ་ཉྙ་པེ་སི པ་ཊྛ་པེ་སི ཝི་ཝ་རི ཝི་བྷ་ཛི ཨུ་ཏྟཱ་ནཱི་ཨ་ཀཱ་སི པ་ཀཱ་སེ་སི ས་བྦཾ ཏཾ སུ་ནྡ་རཾ བྷ་དྡ་ཀཾ ཀ་ལྱཱ་ཎཾ ཨ་ན་ཝ་ཛྫཾ སེ་ཝི་ཏ་བྦ་ནྟི – པ་ཊི་པ་དཾ ཝ་དེ་ཧི བྷ་དྡ་ནྟེ.
པཱ་ཏི་མོ་ཀྑཾ ཨ་ཐ ཝཱ་པི ས་མཱ་དྷིནྟི. པཱ་ཏི་མོ་ཀྑནྟི སཱི་ལཾ པ་ཏི་ཊྛཱ ཨཱ་དི ཙ་ར་ཎཾ སཾ་ཡ་མོ སཾ་ཝ་རོ མུ་ཁཾ པ་མུ་ཁཾ ཀུ་ས་ལཱ་ནཾ དྷ་མྨཱ་ནཾ ས་མཱ་པ་ཏྟི་ཡཱ. ཨ་ཐ ཝཱ་པི ས་མཱ་དྷིནྟི ཡཱ ཙི་ཏྟ་སྶ ཋི་ཏི ས་ཎྛི་ཏི ཨ་ཝ་ཊྛི་ཏི ཨ་ཝི་སཱ་ཧཱ་རོ ཨ་ཝི་ཀྑེ་པོ ཨ་ཝི་སཱ་ཧ་ཏ་མཱ་ན་ས་ཏཱ ས་མ་ཐོ ས་མཱ་དྷི་ནྡྲི་ཡཾ ས་མཱ་དྷི་བ་ལཾ ས་མྨཱ་ས་མཱ་དྷཱི་ཏི – པཱ་ཏི་མོ་ཀྑཾ ཨ་ཐ ཝཱ་པི ས་མཱ་དྷིཾ.
ཏེ་ནཱ་ཧ སོ ནི་མྨི་ཏོ –
‘‘ཨ་ཀི་ཏྟ་ཡཱི ཝི་ཝ་ཊ་ཙ་ཀྑུ, ས་ཀྑི་དྷ་མྨཾ པ་རི་སྶ་ཡ་ཝི་ན་ཡཾ;
པ་ཊི་པ་དཾ ཝ་དེ་ཧི བྷ་དྡ་ནྟེ, པཱ་ཏི་མོ་ཀྑཾ ཨ་ཐ ཝཱ་པི ས་མཱ་དྷི’’ནྟི.
༡༥༧. ཙ་ཀྑཱུ་ཧི ནེ་ཝ ལོ་ལ་སྶ, གཱ་མ་ཀ་ཐཱ་ཡ ཨཱ་ཝ་ར་ཡེ སོ་ཏཾ;
ར་སེ ཙ ནཱ་ནུ་གི་ཛ྄ཛྷེ་ཡྻ, ན ཙ མ་མཱ་ཡེ་ཐ ཀི་ཉྩི ལོ་ཀ་སྨིཾ.
ཙ་ཀྑཱུ་ཧི ནེ་ཝ ལོ་ལ་སྶཱཏི. ཀ་ཐཾ ཙ་ཀྑུ་ལོ་ལོ་ཏི? ཨི་དྷེ་ཀ་ཙྩོ ཙ་ཀྑུ་ལོ་ལི་ཡེ་ན ས་མ་ནྣཱ་ག་ཏོ ཧོ་ཏི – ‘‘ཨ་དི་ཊྛཾ ད་ཀྑི་ཏ་བྦཾ, དི་ཊྛཾ ས་མ་ཏི་ཀྐ་མི་ཏ་བྦ’’ནྟི ཨཱ་རཱ་མེ་ན ཨཱ་རཱ་མཾ ཨུ་ཡྻཱ་ནེ་ན ཨུ་ཡྻཱ་ནཾ གཱ་མེ་ན གཱ་མཾ ནི་ག་མེ་ན ནི་ག་མཾ ན་ག་རེ་ན ན་ག་རཾ ར་ཊྛེ་ན ར་ཊྛཾ ཛ་ན་པ་དེ་ན ཛ་ན་པ་དཾ དཱི་གྷ་ཙཱ་རི་ཀཾ ཨ་ན་ཝ་ཊྛི་ཏ་ཙཱ་རི་ཀཾ [ཨ་ན་ཝ་ཏྠི་ཏ་ཙཱ་རི་ཀཾ (སཱི. སྱཱ.)] ཨ་ནུ་ཡུ་ཏྟོ ཙ ཧོ་ཏི རཱུ་པ་སྶ ད་སྶ་ནཱ་ཡ. ཨེ་ཝ་མྤི ཙ་ཀྑུ་ལོ་ལོ ཧོ་ཏི.
ཨ་ཐ ཝཱ བྷི་ཀྑུ ཨ་ནྟ་ར་གྷ་རཾ པ་ཝི་ཊྛོ ཝཱི་ཐིཾ པ་ཊི་པ་ནྣོ ཨ་སཾ་ཝུ་ཏོ ག་ཙྪ་ཏི ཧ་ཏྠིཾ ཨོ་ལོ་ཀེ་ནྟོ, ཨ་སྶཾ ཨོ་ལོ་ཀེ་ནྟོ, ར་ཐཾ ཨོ་ལོ་ཀེ་ནྟོ, པ་ཏྟིཾ ཨོ་ལོ་ཀེ་ནྟོ, ཨི་ཏྠི་ཡོ ཨོ་ལོ་ཀེ་ནྟོ, པུ་རི་སེ ཨོ་ལོ་ཀེ་ནྟོ, ཀུ་མཱ་ར་ཀེ ཨོ་ལོ་ཀེ་ནྟོ, ཀུ་མཱ་རི་ཀཱ་ཡོ ཨོ་ལོ་ཀེ་ནྟོ, ཨ་ནྟ་རཱ་པ་ཎཾ ཨོ་ལོ་ཀེ་ནྟོ, གྷ་ར་མུ་ཁཱ་ནི ཨོ་ལོ་ཀེ་ནྟོ, ཨུ་དྡྷཾ ཨོ་ལོ་ཀེ་ནྟོ, ཨ་དྷོ ཨོ་ལོ་ཀེ་ནྟོ, དི་སཱ་ཝི་དི་སཾ ཝི་པེ་ཀྑ་མཱ་ནོ ག་ཙྪ་ཏི. ཨེ་ཝ་མྤི ཙ་ཀྑུ་ལོ་ལོ ཧོ་ཏི.
ཨ་ཐ ཝཱ བྷི་ཀྑུ ཙ་ཀྑུ་ནཱ རཱུ་པཾ དི་སྭཱ ནི་མི་ཏྟ་གྒཱ་ཧཱི ཧོ་ཏི ཨ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ ཙ་ཀྑུ་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ ན པ་ཊི་པ་ཛྫ་ཏི, ན ར་ཀྑ་ཏི ཙ་ཀྑུ་ནྡྲི་ཡཾ, ཙ་ཀྑུ་ནྡྲི་ཡེ ན སཾ་ཝ་རཾ ཨཱ་པ་ཛྫ་ཏི. ཨེ་ཝ་མྤི ཙ་ཀྑུ་ལོ་ལོ ཧོ་ཏི.
ཡ་ཐཱ ཝཱ པ་ནེ་ཀེ བྷོ་ནྟོ ས་མ་ཎ་བྲཱ་ཧྨ་ཎཱ ས་དྡྷཱ་དེ་ཡྻཱ་ནི བྷོ་ཛ་ནཱ་ནི བྷུ་ཉྫི་ཏྭཱ ཏེ ཨེ་ཝ་རཱུ་པཾ ཝི་སཱུ་ཀ་ད་སྶ་ནཾ ཨ་ནུ་ཡུ་ཏྟཱ ཝི་ཧ་ར་ནྟི, སེ་ཡྻ་ཐི་དཾ – ན་ཙྩཾ གཱི་ཏཾ ཝཱ་དི་ཏཾ པེ་ཀྑཾ ཨ་ཀྑཱ་ནཾ པཱ་ཎི་སྶ་རཾ ཝེ་ཏཱ་ལ༹ཾ ཀུ་མྦྷ་ཐཱུ་ཎཾ [ཀུ་མྦྷ་ཐཱུ་ནཾ (སཱི. སྱཱ. ཀ.)] སོ་བྷ་ན་ཀཾ [སོ་བྷ་ན་ག་ར་ཀཾ (སཱི. སྱཱ.)] ཙ་ཎྜཱ་ལཾ ཝཾ་སཾ དྷོ་ཝ་ནཾ ཧ་ཏྠི་ཡུ་དྡྷཾ ཨ་སྶ་ཡུ་དྡྷཾ མ་ཧིཾ་ས་ཡུ་དྡྷཾ [མ་ཧི་ས་ཡུ་དྡྷཾ (སཱི. སྱཱ.)] ཨུ་ས་བྷ་ཡུ་དྡྷཾ ཨ་ཛ་ཡུ་དྡྷཾ མེ་ཎྜ་ཡུ་དྡྷཾ ཀུ་ཀྐུ་ཊ་ཡུ་དྡྷཾ ཝ་ཊྚ་ཀ་ཡུ་དྡྷཾ ད་ཎྜ་ཡུ་དྡྷཾ མུ་ཊྛི་ཡུ་དྡྷཾ ནི་བྦུ་དྡྷཾ ཨུ་ཡྻོ་དྷི་ཀཾ བ་ལ་གྒཾ སེ་ནཱ་བྱཱུ་ཧཾ ཨ་ནཱི་ཀ་ད་སྶ་ནཾ ཨི་ཏི ཝཱ. ཨེ་ཝ་མྤི ཙ་ཀྑུ་ལོ་ལོ ཧོ་ཏི.
ཀ་ཐཾ ན ཙ་ཀྑུ་ལོ་ལོ ཧོ་ཏི? ཨི་དྷ བྷི་ཀྑུ ཨ་ནྟ་ར་གྷ་རཾ པ་ཝི་ཊྛོ ཝཱི་ཐིཾ པ་ཊི་པ་ནྣོ སཾ་ཝུ་ཏོ ག་ཙྪ་ཏི ན ཧ་ཏྠིཾ ཨོ་ལོ་ཀེ་ནྟོ, ན ཨ་སྶཾ ཨོ་ལོ་ཀེ་ནྟོ, ན ར་ཐཾ ཨོ་ལོ་ཀེ་ནྟོ, ན པ་ཏྟིཾ ཨོ་ལོ་ཀེ་ནྟོ, ན ཨི་ཏྠི་ཡོ ཨོ་ལོ་ཀེ་ནྟོ, ན པུ་རི་སེ ཨོ་ལོ་ཀེ་ནྟོ, ན ཀུ་མཱ་ར་ཀེ ཨོ་ལོ་ཀེ་ནྟོ, ན ཀུ་མཱ་རི་ཀཱ་ཡོ ཨོ་ལོ་ཀེ་ནྟོ, ན ཨ་ནྟ་རཱ་པ་ཎཾ ཨོ་ལོ་ཀེ་ནྟོ, ན གྷ་ར་མུ་ཁཱ་ནི ཨོ་ལོ་ཀེ་ནྟོ, ན ཨུ་དྡྷཾ ཨོ་ལོ་ཀེ་ནྟོ, ན ཨ་དྷོ ཨོ་ལོ་ཀེ་ནྟོ, ན དི་སཱ་ཝི་དི་སཱ་ཝི་པེ་ཀྑ་མཱ་ནོ ག་ཙྪ་ཏི. ཨེ་ཝ་མྤི ན ཙ་ཀྑུ་ལོ་ལོ ཧོ་ཏི.
ཨ་ཐ ཝཱ བྷི་ཀྑུ ཙ་ཀྑུ་ནཱ རཱུ་པཾ དི་སྭཱ ན ནི་མི་ཏྟ་གྒཱ་ཧཱི ཧོ་ཏི ནཱ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ ཙ་ཀྑུ་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ པ་ཊི་པ་ཛྫ་ཏི, ར་ཀྑ་ཏི ཙ་ཀྑུ་ནྡྲི་ཡཾ, ཙ་ཀྑུ་ནྡྲི་ཡེ སཾ་ཝ་རཾ ཨཱ་པ་ཛྫ་ཏི. ཨེ་ཝ་མྤི ན ཙ་ཀྑུ་ལོ་ལོ ཧོ་ཏི.
ཡ་ཐཱ ཝཱ པ་ནེ་ཀེ བྷོ་ནྟོ ས་མ་ཎ་བྲཱ་ཧྨ་ཎཱ ས་དྡྷཱ་དེ་ཡྻཱ་ནི བྷོ་ཛ་ནཱ་ནི བྷུ་ཉྫི་ཏྭཱ ཏེ ཨེ་ཝ་རཱུ་པཾ ཝི་སཱུ་ཀ་ད་སྶ་ནཾ ཨ་ན་ནུ་ཡུ་ཏྟཱ ཝི་ཧ་ར་ནྟི, སེ་ཡྻ་ཐི་དཾ – ན་ཙྩཾ གཱི་ཏཾ ཝཱ་དི་ཏཾ པེ་ཀྑཾ ཨ་ཀྑཱ་ནཾ…པེ… ཨ་ནཱི་ཀ་ད་སྶ་ནཾ ཨི་ཏི ཝཱ. ཨེ་ཝ་རཱུ་པཱ ཝི་སཱུ་ཀ་ད་སྶ་ནཱ པ་ཊི་ཝི་ར་ཏོ ཧོ་ཏི. ཨེ་ཝ་མྤི ན ཙ་ཀྑུ་ལོ་ལོ ཧོ་ཏི.
ཙ་ཀྑཱུ་ཧི ནེ་ཝ ལོ་ལ་སྶཱཏི. ཙ་ཀྑུ་ལོ་ལི་ཡཾ པ་ཛ་ཧེ་ཡྻ ཝི་ནོ་དེ་ཡྻ བྱ་ནྟིཾ ཀ་རེ་ཡྻ ཨ་ན་བྷཱ་ཝཾ ག་མེ་ཡྻ, ཙ་ཀྑུ་ལོ་ལི་ཡཱ ཨཱ་ར་ཏོ ཨ་སྶ ཝི་ར་ཏོ པ་ཊི་ཝི་ར་ཏོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་རེ་ཡྻཱ་ཏི – ཙ་ཀྑཱུ་ཧི ནེ་ཝ ལོ་ལ་སྶ.
གཱ་མ་ཀ་ཐཱ་ཡ ཨཱ་ཝ་ར་ཡེ སོ་ཏནྟི. གཱ་མ་ཀ་ཐཱ ཝུ་ཙྩ་ཏི བཱ་ཏྟིཾ་ས ཏི་ར་ཙྪཱ་ན་ཀ་ཐཱ, སེ་ཡྻ་ཐི་དཾ – རཱ་ཛ་ཀ་ཐཱ ཙོ་ར་ཀ་ཐཱ མ་ཧཱ་མ་ཏྟ་ཀ་ཐཱ སེ་ནཱ་ཀ་ཐཱ བྷ་ཡ་ཀ་ཐཱ ཡུ་དྡྷ་ཀ་ཐཱ ཨ་ནྣ་ཀ་ཐཱ པཱ་ན་ཀ་ཐཱ ཝ་ཏྠ་ཀ་ཐཱ ཡཱ་ན་ཀ་ཐཱ ས་ཡ་ན་ཀ་ཐཱ མཱ་ལཱ་ཀ་ཐཱ ག་ནྡྷ་ཀ་ཐཱ ཉཱ་ཏི་ཀ་ཐཱ གཱ་མ་ཀ་ཐཱ ནི་ག་མ་ཀ་ཐཱ ན་ག་ར་ཀ་ཐཱ ཛ་ན་པ་ད་ཀ་ཐཱ ཨི་ཏྠི་ཀ་ཐཱ [ཨི་ཏྠི་ཀ་ཐཱ པུ་རི་ས་ཀ་ཐཱ (བ་ཧཱུ་སུ)] སཱུ་ར་ཀ་ཐཱ ཝི་སི་ཁཱ་ཀ་ཐཱ ཀུ་མྦྷ་ཊྛཱ་ན་ཀ་ཐཱ པུ་བྦ་པེ་ཏ་ཀ་ཐཱ ནཱ་ན་ཏྟ་ཀ་ཐཱ ལོ་ཀ་ཀྑཱ་ཡི་ཀཱ ས་མུ་དྡ་ཀྑཱ་ཡི་ཀཱ ཨི་ཏི་བྷ་ཝཱ་བྷ་ཝ་ཀ་ཐཱ ཨི་ཏི ཝཱ. གཱ་མ་ཀ་ཐཱ་ཡ ཨཱ་ཝ་ར་ཡེ སོ་ཏནྟི. གཱ་མ་ཀ་ཐཱ་ཡ སོ་ཏཾ ཨཱ་ཝ་རེ་ཡྻ ནི་ཝཱ་རེ་ཡྻ སཾ་ཝ་རེ་ཡྻ ར་ཀྑེ་ཡྻ གོ་པེ་ཡྻ པི་ད་ཧེ་ཡྻ པ་ཙྪི་ནྡེ་ཡྻཱ་ཏི – གཱ་མ་ཀ་ཐཱ་ཡ ཨཱ་ཝ་ར་ཡེ སོ་ཏཾ.
ར་སེ ཙ ནཱ་ནུ་གི་ཛ྄ཛྷེ་ཡྻཱཏི. ར་སེ ཙཱཏི མཱུ་ལ་ར་སོ ཁ་ནྡྷ་ར་སོ ཏ་ཙ་ར་སོ པ་ཏྟ་ར་སོ པུ་པྥ་ར་སོ ཕ་ལ་ར་སོ ཨ་མྦི་ལཾ མ་དྷུ་རཾ ཏི་ཏྟ་ཀཾ ཀ་ཊུ་ཀཾ ལོ་ཎི་ཀཾ ཁཱ་རི་ཀཾ ལ་མྦི་ཀཾ ཀ་སཱ་ཝོ སཱ་དུ ཨ་སཱ་དུ སཱི་ཏཾ ཨུ་ཎྷཾ. ས་ནྟེ་ཀེ ས་མ་ཎ་བྲཱ་ཧྨ་ཎཱ ར་ས་གི་དྡྷཱ; ཏེ ཛི་ཝ྄ཧ་གྒེ་ན ར་ས་གྒཱ་ནི པ་རི་ཡེ་ས་ནྟཱ ཨཱ་ཧི་ཎྜ་ནྟི, ཏེ ཨ་མྦི་ལཾ ལ་བྷི་ཏྭཱ ཨ་ན་མྦི་ལཾ པ་རི་ཡེ་ས་ནྟི, ཨ་ན་མྦི་ལཾ ལ་བྷི་ཏྭཱ ཨ་མྦི་ལཾ པ་རི་ཡེ་ས་ནྟི…པེ… སཱི་ཏཾ ལ་བྷི་ཏྭཱ ཨུ་ཎྷཾ པ་རི་ཡེ་ས་ནྟི, ཨུ་ཎྷཾ ལ་བྷི་ཏྭཱ སཱི་ཏཾ པ་རི་ཡེ་ས་ནྟི. ཏེ ཡཾ ཡཾ ལ་བྷི་ཏྭཱ ཏེ་ན ཏེ་ན ན ཏུ་སྶ་ནྟི, ཨ་པ་རཱ་པ་རཾ པ་རི་ཡེ་ས་ནྟི, མ་ནཱ་པི་ཀེ་སུ ར་སེ་སུ ར་ཏྟཱ གི་དྡྷཱ ག་དྷི་ཏཱ མུ་ཙྪི་ཏཱ ཨ་ཛ྄ཛྷོ་ས་ནྣཱ ལ་གྒཱ ལ་གྒི་ཏཱ པ་ལི་བུ་དྡྷཱ. ཡ་སྶེ་སཱ ར་ས་ཏ་ཎྷཱ པ་ཧཱི་ནཱ ས་མུ་ཙྪི་ནྣཱ…པེ… ཉཱ་ཎ་གྒི་ནཱ ད་ཌྜྷཱ, སོ པ་ཊི་ས་ངྑཱ ཡོ་ནི་སོ ཨཱ་ཧཱ་རཾ ཨཱ་ཧཱ་རེ་ཏི ནེ་ཝ ད་ཝཱ་ཡ…པེ… ཨ་ན་ཝ་ཛྫ་ཏཱ ཙ ཕཱ་སུ་ཝི་ཧཱ་རོ ཙཱ་ཏི.
ཡ་ཐཱ ཝ་ཎཾ ཨཱ་ལི་མྤེ་ཡྻ ཡཱ་ཝ་དེ་ཝ ཨཱ་རུ་ཧ་ཎ་ཏྠཱ་ཡ [ཨཱ་རུ་ཧ་ན་ཏྠཱ་ཡ (ཀ.) པུ་རཱ་བྷེ་ད་སུ་ཏྟ་ནི་དྡེ་སེ ས་ཏྟ་མ་གཱ་ཐཱ་ཝ་ཎྞ་ནཱ་ཡཾ], ཡ་ཐཱ ཝཱ པ་ན ཨ་ཀྑཾ ཨ་བྦྷ་ཉྫེ་ཡྻ ཡཱ་ཝ་དེ་ཝ བྷཱ་ར་སྶ ནི་ཏྠ་ར་ཎ་ཏྠཱ་ཡ, ཡ་ཐཱ ཝཱ པུ་ཏྟ་མཾ་སཾ ཨཱ་ཧཱ་རཾ ཨཱ་ཧཱ་རེ་ཡྻ ཡཱ་ཝ་དེ་ཝ ཀ་ནྟཱ་ར་སྶ ནི་ཏྠ་ར་ཎ་ཏྠཱ་ཡ; ཨེ་ཝ་མེ་ཝཾ བྷི་ཀྑུ པ་ཊི་ས་ངྑཱ ཡོ་ནི་སོ ཨཱ་ཧཱ་རཾ ཨཱ་ཧཱ་རེ་ཏི ནེ་ཝ ད་ཝཱ་ཡ…པེ… ཨ་ན་ཝ་ཛྫ་ཏཱ ཙ ཕཱ་སུ་ཝི་ཧཱ་རོ ཙཱ་ཏི ར་ས་ཏ་ཎྷཾ པ་ཛ་ཧེ་ཡྻ ཝི་ནོ་དེ་ཡྻ བྱ་ནྟིཾ ཀ་རེ་ཡྻ ཨ་ན་བྷཱ་ཝཾ ག་མེ་ཡྻ, ར་ས་ཏ་ཎྷཱ་ཡ ཨཱ་ར་ཏོ ཨ་སྶ ཝི་ར་ཏོ པ་ཊི་ཝི་ར་ཏོ ནི་ཀྑ་ནྟོ ནི་སྶ་ཊོ ཝི་པྤ་མུ་ཏྟོ ཝི་ས་ཉྙུ་ཏྟོ ཝི་མ་རི་ཡཱ་དི་ཀ་ཏེ་ན ཙེ་ཏ་སཱ ཝི་ཧ་རེ་ཡྻཱ་ཏི – ར་སེ ཙ ནཱ་ནུ་གི་ཛ྄ཛྷེ་ཡྻ.
ན ཙ མ་མཱ་ཡེ་ཐ ཀི་ཉྩི ལོ་ཀ་སྨིནྟི. མ་མ་ཏྟཱཏི དྭེ མ་མ་ཏྟཱ – ཏ་ཎྷཱ་མ་མ་ཏྟ་ཉྩ དི་ཊྛི་མ་མ་ཏྟ་ཉྩ …པེ… ཨི་དཾ ཏ་ཎྷཱ་མ་མ་ཏྟཾ…པེ… ཨི་དཾ དི་ཊྛི་མ་མ་ཏྟཾ. ཏ་ཎྷཱ་མ་མ་ཏྟཾ པ་ཧཱ་ཡ དི་ཊྛི་མ་མ་ཏྟཾ པ་ཊི་ནི་སྶ་ཛྫི་ཏྭཱ ཙ་ཀྑུཾ ན མ་མཱ་ཡེ་ཡྻ ན ག་ཎྷེ་ཡྻ ན པ་རཱ་མ་སེ་ཡྻ ནཱ་བྷི་ནི་ཝི་སེ་ཡྻ; སོ་ཏཾ… གྷཱ་ནཾ… ཛི་ཝ྄ཧཾ… ཀཱ་ཡཾ… རཱུ་པེ… ས་དྡེ… ག་ནྡྷེ… ར་སེ… ཕོ་ཊྛ་བྦེ… ཀུ་ལཾ… ག་ཎཾ… ཨཱ་ཝཱ་སཾ… ལཱ་བྷཾ… ཡ་སཾ… པ་སཾ་སཾ… སུ་ཁཾ… ཙཱི་ཝ་རཾ… པི་ཎྜ་པཱ་ཏཾ… སེ་ནཱ་ས་ནཾ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ… ཀཱ་མ་དྷཱ་ཏུཾ… རཱུ་པ་དྷཱ་ཏུཾ… ཨ་རཱུ་པ་དྷཱ་ཏུཾ… ཀཱ་མ་བྷ་ཝཾ… རཱུ་པ་བྷ་ཝཾ… ཨ་རཱུ་པ་བྷ་ཝཾ… ས་ཉྙཱ་བྷ་ཝཾ… ཨ་ས་ཉྙཱ་བྷ་ཝཾ… ནེ་ཝ་ས་ཉྙཱ་ནཱ་ས་ཉྙཱ་བྷ་ཝཾ … ཨེ་ཀ་ཝོ་ཀཱ་ར་བྷ་ཝཾ… ཙ་ཏུ་ཝོ་ཀཱ་ར་བྷ་ཝཾ… པ་ཉྩ་ཝོ་ཀཱ་ར་བྷ་ཝཾ … ཨ་ཏཱི་ཏཾ… ཨ་ནཱ་ག་ཏཾ… པ་ཙྩུ་པྤ་ནྣཾ… དི་ཊྛ་སུ་ཏ་མུ་ཏ་ཝི་ཉྙཱ་ཏ་བྦེ དྷ་མྨེ ན མ་མཱ་ཡེ་ཡྻ ན ག་ཎྷེ་ཡྻ ན པ་རཱ་མ་སེ་ཡྻ ནཱ་བྷི་ནི་ཝི་སེ་ཡྻ. ཀི་ཉྩཱིཏི ཀི་ཉྩི རཱུ་པ་ག་ཏཾ ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ. ལོ་ཀ་སྨིནྟི ཨ་པཱ་ཡ་ལོ་ཀེ…པེ… ཨཱ་ཡ་ཏ་ན་ལོ་ཀེ་ཏི – ན ཙ མ་མཱ་ཡེ་ཐ ཀི་ཉྩི ལོ་ཀ་སྨིཾ.
ཏེ་ནཱ་ཧ བྷ་ག་ཝཱ –
‘‘ཙ་ཀྑཱུ་ཧི ནེ་ཝ ལོ་ལ་སྶ, གཱ་མ་ཀ་ཐཱ་ཡ ཨཱ་ཝ་ར་ཡེ སོ་ཏཾ;
ར་སེ ཙ ནཱ་ནུ་གི་ཛ྄ཛྷེ་ཡྻ, ན ཙ མ་མཱ་ཡེ་ཐ ཀི་ཉྩི ལོ་ཀ་སྨི’’ནྟི.
༡༥༨. ཕ་སྶེ་ན ཡ་དཱ ཕུ་ཊྛ་སྶ, པ་རི་དེ་ཝཾ བྷི་ཀྑུ ན ཀ་རེ་ཡྻ ཀུ་ཧི་ཉྩི;
བྷ་ཝ་ཉྩ ནཱ་བྷི་ཛ་པྤེ་ཡྻ, བྷེ་ར་ཝེ་སུ ཙ ན ས་མྤ་ཝེ་དྷེ་ཡྻ.
ཕ་སྶེ་ན ཡ་དཱ ཕུ་ཊྛ་སྶཱཏི. ཕ་སྶོཏི རོ་ག་ཕ་སྶོ. རོ་ག་ཕ་སྶེ་ན ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ ཨ་སྶ; ཙ་ཀྑུ་རོ་གེ་ན ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ ཨ་སྶ, སོ་ཏ་རོ་གེ་ན…པེ… གྷཱ་ན་རོ་གེ་ན… ཛི་ཝ྄ཧཱ་རོ་གེ་ན… ཀཱ་ཡ་རོ་གེ་ན… སཱི་ས་རོ་གེ་ན… ཀ་ཎྞ་རོ་གེ་ན… མུ་ཁ་རོ་གེ་ན… ད་ནྟ་རོ་གེ་ན… ཀཱ་སེ་ན… སཱ་སེ་ན… པི་ནཱ་སེ་ན… ཌཱ་ཧེ་ན… ཛ་རེ་ན… ཀུ་ཙྪི་རོ་གེ་ན… མུ་ཙྪཱ་ཡ… པ་ཀྑ་ནྡི་ཀཱ་ཡ… སཱུ་ལཱ་ཡ… ཝི་སཱུ་ཙི་ཀཱ་ཡ… ཀུ་ཊྛེ་ན… ག་ཎྜེ་ན… ཀི་ལཱ་སེ་ན… སོ་སེ་ན… ཨ་པ་མཱ་རེ་ན… ད་དྡུ་ཡཱ… ཀ་ཎྜུ་ཡཱ … ཀ་ཙྪུ་ཡཱ… ར་ཁ་སཱ་ཡ… ཝི་ཏ་ཙྪི་ཀཱ་ཡ… ལོ་ཧི་ཏེ་ན… པི་ཏྟེ་ན… མ་དྷུ་མེ་ཧེ་ན… ཨཾ་སཱ་ཡ… པི་ལ༹་ཀཱ་ཡ… བྷ་ག་ནྡ་ལེ་ན… པི་ཏྟ་ས་མུ་ཊྛཱ་ནེ་ན ཨཱ་བཱ་དྷེ་ན… སེ་མྷ་ས་མུ་ཊྛཱ་ནེ་ན ཨཱ་བཱ་དྷེ་ན… ཝཱ་ཏ་ས་མུ་ཊྛཱ་ནེ་ན ཨཱ་བཱ་དྷེ་ན… ས་ནྣི་པཱ་ཏི་ཀེ་ན ཨཱ་བཱ་དྷེ་ན… ཨུ་ཏུ་པ་རི་ཎཱ་མ་ཛེ་ན ཨཱ་བཱ་དྷེ་ན… ཝི་ས་མ་པ་རི་ཧཱ་ར་ཛེ་ན ཨཱ་བཱ་དྷེ་ན… ཨོ་པ་ཀྐ་མི་ཀེ་ན ཨཱ་བཱ་དྷེ་ན… ཀ་མྨ་ཝི་པཱ་ཀ་ཛེ་ན ཨཱ་བཱ་དྷེ་ན… སཱི་ཏེ་ན… ཨུ་ཎྷེ་ན… ཛི་གྷ་ཙྪཱ་ཡ… པི་པཱ་སཱ་ཡ… ཨུ་ཙྩཱ་རེ་ན… པ་སྶཱ་ཝེ་ན… ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶེ་ཧི ཕུ་ཊྛོ པ་རེ་ཏོ ས་མོ་ཧི་ཏོ ས་མ་ནྣཱ་ག་ཏོ ཨ་སྶཱ་ཏི – ཕ་སྶེ་ན ཡ་དཱ ཕུ་ཊྛ་སྶ.
པ་རི་དེ་ཝཾ བྷི་ཀྑུ ན ཀ་རེ་ཡྻ ཀུ་ཧི་ཉྩཱིཏི. ཨཱ་དེ་ཝཾ པ་རི་དེ་ཝཾ ཨཱ་དེ་ཝ་ནཾ པ་རི་དེ་ཝ་ནཾ ཨཱ་དེ་ཝི་ཏ་ཏྟཾ པ་རི་དེ་ཝི་ཏ་ཏྟཾ ཝཱ་ཙཱ པ་ལཱ་པཾ ཝི་པྤ་ལཱ་པཾ ལཱ་ལ་པྤཾ ལཱ་ལ་པྤཱ་ཡ་ནཾ ལཱ་ལ་པྤཱ་ཡི་ཏ་ཏྟཾ ན ཀ་རེ་ཡྻ ན ཛ་ནེ་ཡྻ ན ས་ཉྫ་ནེ་ཡྻ ན ནི་བྦ་ཏྟེ་ཡྻ ནཱ་བྷི་ནི་བྦ་ཏྟེ་ཡྻ. ཀུ་ཧི་ཉྩཱིཏི ཀུ་ཧི་ཉྩི ཀི་མྷི་ཙི ཀ་ཏྠ་ཙི ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ཨ་ཛ྄ཛྷ་ཏྟ་བ་ཧི་དྡྷཱ ཝཱ་ཏི – པ་རི་དེ་ཝཾ བྷི་ཀྑུ ན ཀ་རེ་ཡྻ ཀུ་ཧི་ཉྩི.
བྷ་ཝ་ཉྩ ནཱ་བྷི་ཛ་པྤེ་ཡྻཱཏི. ཀཱ་མ་བྷ་ཝཾ ན ཛ་པྤེ་ཡྻ, རཱུ་པ་བྷ་ཝཾ ན ཛ་པྤེ་ཡྻ, ཨ་རཱུ་པ་བྷ་ཝཾ ན ཛ་པྤེ་ཡྻ ན པ་ཛ་པྤེ་ཡྻ ནཱ་བྷི་ཛ་པྤེ་ཡྻཱ་ཏི – བྷ་ཝ་ཉྩ ནཱ་བྷི་ཛ་པྤེ་ཡྻ.
བྷེ་ར་ཝེ་སུ ཙ ན ས་མྤ་ཝེ་དྷེ་ཡྻཱཏི. བྷེ་ར་ཝཱཏི ཨེ་ཀེ་ནཱ་ཀཱ་རེ་ན བྷ་ཡ་མྤི བྷེ་ར་ཝ་མྤི ཏ་ཉྙེ་ཝ. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཨེ་ཏཾ ནཱུ་ན ཏཾ བྷ་ཡཾ བྷེ་ར་ཝཾ ན ཛ་ཧེ ཨཱ་ག་ཙྪ་ཏཱི’’ཏི. བ་ཧི་དྡྷཱ་ར་མྨ་ཎཾ ཝུ་ཏྟཾ སཱི་ཧཱ བྱ་གྒྷཱ དཱི་པཱི ཨ་ཙྪཱ ཏ་ར་ཙྪཱ ཀོ་ཀཱ མ་ཧིཾ་སཱ ཨ་སྶཱ ཧ་ཏྠཱི ཨ་ཧི ཝི་ཙྪི་ཀཱ ས་ཏ་པ་དཱི, ཙོ་རཱ ཝཱ ཨ་སྶུ མཱ་ན་ཝཱ ཝཱ ཀ་ཏ་ཀ་མྨཱ ཝཱ ཨ་ཀ་ཏ་ཀ་མྨཱ ཝཱ. ཨ་ཐཱ་པ་རེ་ན ཨཱ་ཀཱ་རེ་ན བྷ་ཡཾ ཝུ་ཙྩ་ཏི ཨ་ཛ྄ཛྷ་ཏྟི་ཀཾ ཙི་ཏྟ་ས་མུ་ཊྛཱ་ནཾ བྷ་ཡཾ བྷ་ཡཱ་ན་ཀཾ ཚ་མྦྷི་ཏ་ཏྟཾ ལོ་མ་ཧཾ་སོ ཙེ་ཏ་སོ ཨུ་བྦེ་གོ ཨུ་ཏྲཱ་སོ, ཛཱ་ཏི་བྷ་ཡཾ ཛ་རཱ་བྷ་ཡཾ བྱཱ་དྷི་བྷ་ཡཾ མ་ར་ཎ་བྷ་ཡཾ རཱ་ཛ་བྷ་ཡཾ ཙོ་ར་བྷ་ཡཾ ཨ་གྒི་བྷ་ཡཾ ཨུ་ད་ཀ་བྷ་ཡཾ ཨ་ཏྟཱ་ནུ་ཝཱ་ད་བྷ་ཡཾ པ་རཱ་ནུ་ཝཱ་ད་བྷ་ཡཾ ད་ཎྜ་བྷ་ཡཾ དུ་གྒ་ཏི་བྷ་ཡཾ ཨཱུ་མི་བྷ་ཡཾ ཀུ་མྦྷཱི་ལ་བྷ་ཡཾ ཨཱ་ཝ་ཊྚ་བྷ་ཡཾ སུ་སུ་ཀཱ་བྷ་ཡཾ [སུཾ་སུ་ཀཱ་བྷ་ཡཾ (སྱཱ.)] ཨཱ་ཛཱི་ཝི་ཀ་བྷ་ཡཾ ཨ་སི་ལོ་ཀ་བྷ་ཡཾ པ་རི་སཱ་ཡ སཱ་ར་ཛྫ་བྷ་ཡཾ མ་ད་ན་བྷ་ཡཾ དུ་གྒ་ཏི་བྷ་ཡཾ བྷ་ཡཾ བྷ་ཡཱ་ན་ཀཾ ཚ་མྦྷི་ཏ་ཏྟཾ ལོ་མ་ཧཾ་སོ ཙེ་ཏ་སོ ཨུ་བྦེ་གོ ཨུ་ཏྲཱ་སོ. བྷེ་ར་ཝེ་སུ ཙ ན ས་མྤ་ཝེ་དྷེ་ཡྻཱཏི བྷེ་ར་ཝེ པ་སྶི་ཏྭཱ ཝཱ སུ་ཎི་ཏྭཱ ཝཱ ན ཝེ་དྷེ་ཡྻ ན པ་ཝེ་དྷེ་ཡྻ ན ས་མྤ་ཝེ་དྷེ་ཡྻ ན ཏ་སེ་ཡྻ ན ཨུ་ཏྟ་སེ་ཡྻ ན པ་རི་ཏ་སེ་ཡྻ ན བྷཱ་ཡེ་ཡྻ ན ས་ནྟཱ་སཾ ཨཱ་པ་ཛྫེ་ཡྻ, ཨ་བྷཱི་རཱུ ཨ་སྶ ཨ་ཚ་མྦྷཱི ཨ་ནུ་ཏྲཱ་སཱི ཨ་པ་ལཱ་ཡཱི, པ་ཧཱི་ན་བྷ་ཡ་བྷེ་ར་ཝོ ཝི་ག་ཏ་ལོ་མ་ཧཾ་སོ ཝི་ཧ་རེ་ཡྻཱ་ཏི – བྷེ་ར་ཝེ་སུ ཙ ན ས་མྤ་ཝེ་དྷེ་ཡྻ.
ཏེ་ནཱ་ཧ བྷ་ག་ཝཱ –
‘‘ཕ་སྶེ་ན ཡ་དཱ ཕུ་ཊྛ་སྶ, པ་རི་དེ་ཝཾ བྷི་ཀྑུ ན ཀ་རེ་ཡྻ ཀུ་ཧི་ཉྩི;
བྷ་ཝ་ཉྩ ནཱ་བྷི་ཛ་པྤེ་ཡྻ, བྷེ་ར་ཝེ་སུ ཙ ན ས་མྤ་ཝེ་དྷེ་ཡྻཱ’’ཏི.
༡༥༩. ཨ་ནྣཱ་ན་མ་ཐོ པཱ་ནཱ་ནཾ, ཁཱ་ད་ནཱི་ཡཱ་ན་མ་ཐོ་པི ཝ་ཏྠཱ་ནཾ;
ལ་དྡྷཱ ན ས་ནྣི་དྷིཾ ཀ་ཡི་རཱ, ན ཙ པ་རི་ཏྟ་སེ ཏཱ་ནི ཨ་ལ་བྷ་མཱ་ནོ.