༡. ཀཱ་མ་སུ་ཏྟ་ནི་དྡེ་སོ
༡. ཀཱ་མཾ ཀཱ་མ་ཡ་མཱ་ན་སྶ, ཏ་སྶ ཙེ ཏཾ ས་མི་ཛ྄ཛྷ་ཏི;
ཨ་དྡྷཱ པཱི་ཏི་མ་ནོ ཧོ་ཏི, ལ་དྡྷཱ མ་ཙྩོ ཡ་དི་ཙྪ་ཏི.
ཀཱ་མཾ ཀཱ་མ་ཡ་མཱ་ན་སྶཱཏི ཀཱ་མཱཏི ཨུ་དྡཱ་ན་ཏོ དྭེ ཀཱ་མཱ – ཝ་ཏྠུ་ཀཱ་མཱ ཙ ཀི་ལེ་ས་ཀཱ་མཱ ཙ. ཀ་ཏ་མེ ཝ་ཏྠུ་ཀཱ་མཱ? མ་ནཱ་པི་ཀཱ རཱུ་པཱ མ་ནཱ་པི་ཀཱ ས་དྡཱ མ་ནཱ་པི་ཀཱ ག་ནྡྷཱ མ་ནཱ་པི་ཀཱ ར་སཱ མ་ནཱ་པི་ཀཱ ཕོ་ཊྛ་བྦཱ; ཨ་ཏྠ་ར་ཎཱ པཱ་ཝུ་ར་ཎཱ [པཱ་པུ་ར་ཎཱ (སཱི. སྱཱ.)] དཱ་སི་དཱ་སཱ ཨ་ཛེ་ལ༹་ཀཱ ཀུ་ཀྐུ་ཊ་སཱུ་ཀ་རཱ ཧ་ཏྠི་ག་ཝཱ་སྶ་ཝ་ལ༹་ཝཱ ཁེ་ཏྟཾ ཝ་ཏྠུ ཧི་ར་ཉྙཾ སུ་ཝ་ཎྞཾ གཱ་མ་ནི་ག་མ་རཱ་ཛ་དྷཱ་ནི་ཡོ ར་ཊྛ་ཉྩ ཛ་ན་པ་དོ ཙ ཀོ་སོ ཙ ཀོ་ཊྛཱ་གཱ་ར་ཉྩ, ཡཾ ཀི་ཉྩི ར་ཛ་ནཱི་ཡཾ ཝ་ཏྠུ – ཝ་ཏྠུ་ཀཱ་མཱ.
ཨ་པི ཙ ཨ་ཏཱི་ཏཱ ཀཱ་མཱ ཨ་ནཱ་ག་ཏཱ ཀཱ་མཱ པ་ཙྩུ་པྤ་ནྣཱ ཀཱ་མཱ; ཨ་ཛ྄ཛྷ་ཏྟཱ ཀཱ་མཱ བ་ཧི་དྡྷཱ ཀཱ་མཱ ཨ་ཛ྄ཛྷ་ཏྟ་བ་ཧི་དྡྷཱ ཀཱ་མཱ; ཧཱི་ནཱ ཀཱ་མཱ མ་ཛ྄ཛྷི་མཱ ཀཱ་མཱ པ་ཎཱི་ཏཱ ཀཱ་མཱ; ཨཱ་པཱ་ཡི་ཀཱ ཀཱ་མཱ མཱ་ནུ་སི་ཀཱ ཀཱ་མཱ དི་བྦཱ ཀཱ་མཱ པ་ཙྩུ་པ་ཊྛི་ཏཱ ཀཱ་མཱ; ནི་མྨི་ཏཱ ཀཱ་མཱ ཨ་ནི་མྨི་ཏཱ ཀཱ་མཱ པ་ར་ནི་མྨི་ཏཱ ཀཱ་མཱ; པ་རི་གྒ་ཧི་ཏཱ ཀཱ་མཱ, ཨ་པ་རི་གྒ་ཧི་ཏཱ ཀཱ་མཱ, མ་མཱ་ཡི་ཏཱ ཀཱ་མཱ, ཨ་མ་མཱ་ཡི་ཏཱ ཀཱ་མཱ; ས་བྦེ་པི ཀཱ་མཱ་ཝ་ཙ་རཱ དྷ་མྨཱ, ས་བྦེ་པི རཱུ་པཱ་ཝ་ཙ་རཱ དྷ་མྨཱ, ས་བྦེ་པི ཨ་རཱུ་པཱ་ཝ་ཙ་རཱ དྷ་མྨཱ, ཏ་ཎྷཱ་ཝ་ཏྠུ་ཀཱ ཏ་ཎྷཱ་ར་མྨ་ཎཱ ཀཱ་མ་ནཱི་ཡ་ཊྛེ་ན ར་ཛ་ནཱི་ཡ་ཊྛེ་ན མ་ད་ནཱི་ཡ་ཊྛེ་ན ཀཱ་མཱ – ཨི་མེ ཝུ་ཙྩ་ནྟི ཝ་ཏྠུ་ཀཱ་མཱ.
ཀ་ཏ་མེ ཀི་ལེ་ས་ཀཱ་མཱ? ཚ་ནྡོ ཀཱ་མོ རཱ་གོ ཀཱ་མོ ཚ་ནྡ་རཱ་གོ ཀཱ་མོ; ས་ངྐ་པྤོ ཀཱ་མོ རཱ་གོ ཀཱ་མོ ས་ངྐ་པྤ་རཱ་གོ ཀཱ་མོ; ཡོ ཀཱ་མེ་སུ ཀཱ་མ་ཙྪ་ནྡོ ཀཱ་མ་རཱ་གོ ཀཱ་མ་ན་ནྡཱི ཀཱ་མ་ཏ་ཎྷཱ ཀཱ་མ་སྣེ་ཧོ ཀཱ་མ་པ་རི་ལཱ༹་ཧོ ཀཱ་མ་མུ་ཙྪཱ ཀཱ་མ་ཛ྄ཛྷོ་སཱ་ནཾ ཀཱ་མོ་གྷོ ཀཱ་མ་ཡོ་གོ ཀཱ་མུ་པཱ་དཱ་ནཾ ཀཱ་མ་ཙྪ་ནྡ་ནཱི་ཝ་ར་ཎཾ.
‘‘ཨ་དྡ་སཾ ཀཱ་མ ཏེ མཱུ་ལཾ, ས་ངྐ་པྤཱ ཀཱ་མ ཛཱ་ཡ་སི;
ན ཏཾ ས་ངྐ་པྤ་ཡི་སྶཱ་མི, ཨེ་ཝཾ ཀཱ་མ ན ཧོ་ཧི་སཱི’’ཏི [ན ཧེ་ཧི་སཱི་ཏི (སྱཱ.)]. –
ཨི་མེ ཝུ་ཙྩ་ནྟི ཀི་ལེ་ས་ཀཱ་མཱ. ཀཱ་མ་ཡ་མཱ་ན་སྶཱཏི ཀཱ་མ་ཡ་མཱ་ན་སྶ ཨི་ཙྪ་མཱ་ན་སྶ སཱ་དི་ཡ་མཱ་ན་སྶ པ་ཏྠ་ཡ་མཱ་ན་སྶ པི་ཧ་ཡ་མཱ་ན་སྶ ཨ་བྷི་ཛ་པྤ་མཱ་ན་སྶཱ་ཏི – ཀཱ་མཾ ཀཱ་མ་ཡ་མཱ་ན་སྶ.
ཏ་སྶ ཙེ ཏཾ ས་མི་ཛ྄ཛྷ་ཏཱིཏི. ཏ་སྶ ཙེཏི ཏ་སྶ ཁ་ཏྟི་ཡ་སྶ ཝཱ བྲཱ་ཧྨ་ཎ་སྶ ཝཱ ཝེ་སྶ་སྶ ཝཱ སུ་དྡ་སྶ ཝཱ ག་ཧ་ཊྛ་སྶ ཝཱ པ་བྦ་ཛི་ཏ་སྶ ཝཱ དེ་ཝ་སྶ ཝཱ མ་ནུ་སྶ་སྶ ཝཱ. ཏནྟི ཝ་ཏྠུ་ཀཱ་མཱ ཝུ་ཙྩ་ནྟི – མ་ནཱ་པི་ཀཱ རཱུ་པཱ མ་ནཱ་པི་ཀཱ ས་དྡཱ མ་ནཱ་པི་ཀཱ ག་ནྡྷཱ མ་ནཱ་པི་ཀཱ ར་སཱ མ་ནཱ་པི་ཀཱ ཕོ་ཊྛ་བྦཱ. ས་མི་ཛ྄ཛྷ་ཏཱིཏི ཨི་ཛ྄ཛྷ་ཏི ས་མི་ཛ྄ཛྷ་ཏི ལ་བྷ་ཏི པ་ཊི་ལ་བྷ་ཏི ཨ་དྷི་ག་ཙྪ་ཏི ཝི་ནྡ་ཏཱི་ཏི – ཏ་སྶ ཙེ ཏཾ ས་མི་ཛ྄ཛྷ་ཏི.
ཨ་དྡྷཱ པཱི་ཏི་མ་ནོ ཧོ་ཏཱིཏི. ཨ་དྡྷཱཏི ཨེ་ཀཾ་ས་ཝ་ཙ་ནཾ ནི་སྶཾ་ས་ཡ་ཝ་ཙ་ནཾ ནི་ཀྐ་ངྑཱ་ཝ་ཙ་ནཾ ཨ་དྭེ་ཛ྄ཛྷ་ཝ་ཙ་ནཾ ཨ་དྭེ་ལ༹ྷ་ཀ་ཝ་ཙ་ནཾ ནི་ཡོ་ག་ཝ་ཙ་ནཾ ཨ་པ་ཎྞ་ཀ་ཝ་ཙ་ནཾ ཨ་ཝ་ཏྠཱ་པ་ན་ཝ་ཙ་ན་མེ་ཏཾ – ཨ་དྡྷཱ་ཏི. པཱི་ཏཱིཏི ཡཱ པ་ཉྩ་ཀཱ་མ་གུ་ཎ་པ་ཊི་ས་ཉྙུ་ཏྟཱ པཱི་ཏི པཱ་མུ་ཛྫཾ ཨཱ་མོ་ད་ནཱ པ་མོ་ད་ནཱ ཧཱ་སོ པ་ཧཱ་སོ ཝི་ཏྟི ཏུ་ཊྛི ཨོ་ད་གྱཾ ཨ་ཏྟ་མ་ན་ཏཱ ཨ་བྷི་ཕ་ར་ཎ་ཏཱ ཙི་ཏྟ་སྶ. མ་ནོཏི ཡཾ ཙི་ཏྟཾ མ་ནོ མཱ་ན་སཾ ཧ་ད་ཡཾ པ་ཎྜ་རཾ མ་ནོ མ་ནཱ་ཡ་ཏ་ནཾ མ་ནི་ནྡྲི་ཡཾ ཝི་ཉྙཱ་ཎཾ ཝི་ཉྙཱ་ཎ་ཀྑ་ནྡྷོ ཏ་ཛྫཱ མ་ནོ་ཝི་ཉྙཱ་ཎ་དྷཱ་ཏུ, ཨ་ཡཾ ཝུ་ཙྩ་ཏི མ་ནོ. ཨ་ཡཾ མ་ནོ ཨི་མཱ་ཡ པཱི་ཏི་ཡཱ ས་ཧ་ག་ཏོ ཧོ་ཏི ས་ཧ་ཛཱ་ཏོ སཾ་ས་ཊྛོ ས་མྤ་ཡུ་ཏྟོ ཨེ་ཀུ་པྤཱ་དོ ཨེ་ཀ་ནི་རོ་དྷོ ཨེ་ཀ་ཝ་ཏྠུ་ཀོ ཨེ་ཀཱ་ར་མྨ་ཎོ. པཱི་ཏི་མ་ནོ ཧོ་ཏཱིཏི པཱི་ཏི་མ་ནོ ཧོ་ཏི ཏུ་ཊྛ་མ་ནོ ཧ་ཊྛ་མ་ནོ པ་ཧ་ཊྛ་མ་ནོ ཨ་ཏྟ་མ་ནོ ཨུ་ད་གྒ་མ་ནོ མུ་དི་ཏ་མ་ནོ པ་མོ་དི་ཏ་མ་ནོ ཧོ་ཏཱི་ཏི – ཨ་དྡྷཱ པཱི་ཏི་མ་ནོ ཧོ་ཏི.
ལ་དྡྷཱ མ་ཙྩོ ཡ་དི་ཙྪ་ཏཱིཏི. ལ་དྡྷཱཏི ལ་བྷི་ཏྭཱ པ་ཊི་ལ་བྷི་ཏྭཱ ཨ་དྷི་ག་ནྟྭཱ ཝི་ནྡི་ཏྭཱ. མ་ཙྩོཏི ས་ཏྟོ ན་རོ མཱ་ན་ཝོ པོ་སོ པུ་གྒ་ལོ ཛཱི་ཝོ ཛཱ་གུ [ཛཱ་ཏུ (སྱཱ.), ཛ་གུ (ཀ.)] ཛ་ནྟུ ཨི་ནྡ་གུ [ཧི་ནྡ་གཱུ (སཱི. སྱཱ.)] མ་ནུ་ཛོ. ཡ་དི་ཙྪ་ཏཱིཏི ཡཾ ཨི་ཙྪ་ཏི ཡཾ སཱ་དི་ཡ་ཏི ཡཾ པ་ཏྠེ་ཏི ཡཾ པི་ཧེ་ཏི ཡཾ ཨ་བྷི་ཛ་པྤ་ཏི, རཱུ་པཾ ཝཱ ས་དྡཾ ཝཱ ག་ནྡྷཾ ཝཱ ར་སཾ ཝཱ ཕོ་ཊྛ་བྦཾ ཝཱ་ཏི, ལ་དྡྷཱ མ་ཙྩོ ཡ་དི་ཙྪ་ཏི.
ཏེ་ནཱ་ཧ བྷ་ག་ཝཱ –
‘‘ཀཱ་མཾ ཀཱ་མ་ཡ་མཱ་ན་སྶ, ཏ་སྶ ཙེ ཏཾ ས་མི་ཛ྄ཛྷ་ཏི;
ཨ་དྡྷཱ པཱི་ཏི་མ་ནོ ཧོ་ཏི, ལ་དྡྷཱ མ་ཙྩོ ཡ་དི་ཙྪ་ཏཱི’’ཏི.
༢. ཏ་སྶ ཙེ ཀཱ་མ་ཡཱ་ན་སྶ, ཚ་ནྡ་ཛཱ་ཏ་སྶ ཛ་ནྟུ་ནོ;
ཏེ ཀཱ་མཱ པ་རི་ཧཱ་ཡ་ནྟི, ས་ལླ་ཝི་དྡྷོ་ཝ རུ་པྤ་ཏི.
ཏ་སྶ ཙེ ཀཱ་མ་ཡཱ་ན་སྶཱཏི. ཏ་སྶ ཙེཏི ཏ་སྶ ཁ་ཏྟི་ཡ་སྶ ཝཱ བྲཱ་ཧྨ་ཎ་སྶ ཝཱ ཝེ་སྶ་སྶ ཝཱ སུ་དྡ་སྶ ཝཱ ག་ཧ་ཊྛ་སྶ ཝཱ པ་བྦ་ཛི་ཏ་སྶ ཝཱ དེ་ཝ་སྶ ཝཱ མ་ནུ་སྶ་སྶ ཝཱ. ཀཱ་མ་ཡཱ་ན་སྶཱཏི ཀཱ་མེ ཨི་ཙྪ་མཱ་ན་སྶ སཱ་དི་ཡ་མཱ་ན་སྶ པ་ཏྠ་ཡ་མཱ་ན་སྶ པི་ཧ་ཡ་མཱ་ན་སྶ ཨ་བྷི་ཛ་པྤ་མཱ་ན་སྶ. ཨ་ཐ ཝཱ ཀཱ་མ་ཏ་ཎྷཱ་ཡ ཡཱ་ཡ་ཏི ནི་ཡྻ་ཏི ཝུ་ཡ྄ཧ་ཏི སཾ་ཧ་རཱི་ཡ་ཏི. ཡ་ཐཱ ཧ་ཏྠི་ཡཱ་ནེ་ན ཝཱ ཨ་སྶ་ཡཱ་ནེ་ན ཝཱ གོ་ཡཱ་ནེ་ན ཝཱ ཨ་ཛ་ཡཱ་ནེ་ན ཝཱ མེ་ཎྜ་ཡཱ་ནེ་ན ཝཱ ཨོ་ཊྛ་ཡཱ་ནེ་ན ཝཱ ཁ་ར་ཡཱ་ནེ་ན ཝཱ ཡཱ་ཡ་ཏི ནི་ཡྻ་ཏི ཝུ་ཡ྄ཧ་ཏི སཾ་ཧ་རཱི་ཡ་ཏི; ཨེ་ཝ་མེ་ཝཾ ཀཱ་མ་ཏ་ཎྷཱ་ཡ ཡཱ་ཡ་ཏི ནི་ཡྻ་ཏི ཝུ་ཡ྄ཧ་ཏི སཾ་ཧ་རཱི་ཡ་ཏཱི་ཏི – ཏ་སྶ ཙེ ཀཱ་མ་ཡཱ་ན་སྶ.
ཚ་ནྡ་ཛཱ་ཏ་སྶ ཛ་ནྟུ་ནོཏི. ཚ་ནྡོཏི ཡོ ཀཱ་མེ་སུ ཀཱ་མ་ཙྪ་ནྡོ ཀཱ་མ་རཱ་གོ ཀཱ་མ་ན་ནྡཱི ཀཱ་མ་ཏ་ཎྷཱ ཀཱ་མ་སྣེ་ཧོ ཀཱ་མ་པ་རི་ལཱ༹་ཧོ ཀཱ་མ་མུ་ཙྪཱ ཀཱ་མ་ཛ྄ཛྷོ་སཱ་ནཾ ཀཱ་མོ་གྷོ ཀཱ་མ་ཡོ་གོ ཀཱ་མུ་པཱ་དཱ་ནཾ ཀཱ་མ་ཙྪ་ནྡ་ནཱི་ཝ་ར་ཎཾ, ཏ་སྶ སོ ཀཱ་མ་ཙྪ་ནྡོ ཛཱ་ཏོ ཧོ་ཏི ས་ཉྫཱ་ཏོ ནི་བྦ་ཏྟོ ཨ་བྷི་ནི་བྦ་ཏྟོ པཱ་ཏུ་བྷཱུ་ཏོ. ཛ་ནྟུ་ནོཏི ས་ཏྟ་སྶ ན་ར་སྶ མཱ་ན་ཝ་སྶ པོ་ས་སྶ པུ་གྒ་ལ་སྶ ཛཱི་ཝ་སྶ ཛཱ་གུ་སྶ ཛ་ནྟུ་སྶ ཨི་ནྡ་གུ་སྶ མ་ནུ་ཛ་སྶཱ་ཏི – ཚ་ནྡ་ཛཱ་ཏ་སྶ ཛ་ནྟུ་ནོ.
ཏེ ཀཱ་མཱ པ་རི་ཧཱ་ཡ་ནྟཱིཏི – ཏེ ཝཱ ཀཱ་མཱ པ་རི་ཧཱ་ཡ་ནྟི, སོ ཝཱ ཀཱ་མེ་ཧི པ་རི་ཧཱ་ཡ་ཏི. ཀ་ཐཾ ཏེ ཀཱ་མཱ པ་རི་ཧཱ་ཡ་ནྟི? ཏ་སྶ ཏི་ཊྛ་ནྟ་སྶེ་ཝ ཏེ བྷོ་གེ རཱ་ཛཱ་ནོ ཝཱ ཧ་ར་ནྟི, ཙོ་རཱ ཝཱ ཧ་ར་ནྟི, ཨ་གྒི ཝཱ ད་ཧ་ཏི, ཨུ་ད་ཀཾ ཝཱ ཝ་ཧ་ཏི, ཨ་པྤི་ཡཱ ཝཱ དཱ་ཡཱ་དཱ ཧ་ར་ནྟི, ནི་ཧི་ཏཾ ཝཱ ནཱ་དྷི་ག་ཙྪ་ཏི, དུ་པྤ་ཡུ་ཏྟཱ ཝཱ ཀ་མྨ་ནྟཱ བྷི་ཛྫ་ནྟི, ཀུ་ལེ ཝཱ ཀུ་ལ་ངྒཱ་རོ ཨུ་པྤ་ཛྫ་ཏི, ཡོ ཏེ བྷོ་གེ ཝི་ཀི་ར་ཏི ཝི་དྷ་མ་ཏི [ཝི་དྷ་མེ་ཏི (སྱཱ.)] ཝི་དྡྷཾ་སེ་ཏི ཨ་ནི་ཙྩ་ཏཱ་ཡེ་ཝ ཨ་ཊྛ་མཱི. ཨེ་ཝཾ ཏེ ཀཱ་མཱ ཧཱ་ཡ་ནྟི པ་རི་ཧཱ་ཡ་ནྟི པ་རི་དྷཾ་སེ་ནྟི པ་རི་པ་ཏ་ནྟི ཨ་ནྟ་ར་དྷཱ་ཡ་ནྟི ཝི་པྤ་ལུ་ཛྫ་ནྟི. ཀ་ཐཾ སོ ཀཱ་མེ་ཧི པ་རི་ཧཱ་ཡ་ཏི? ཏི་ཊྛ་ནྟེ་ཝ ཏེ བྷོ་གེ སོ ཙ་ཝ་ཏི མ་ར་ཏི ཝི་པྤ་ལུ་ཛྫ་ཏི. ཨེ་ཝཾ སོ ཀཱ་མེ་ཧི ཧཱ་ཡ་ཏི པ་རི་ཧཱ་ཡ་ཏི པ་རི་དྷཾ་སེ་ཏི པ་རི་པ་ཏ་ཏི ཨ་ནྟ་ར་དྷཱ་ཡ་ཏི ཝི་པྤ་ལུ་ཛྫ་ཏི.
ཙོ་རཱ ཧ་ར་ནྟི རཱ་ཛཱ་ནོ, ཨ་གྒི ད་ཧ་ཏི ན་སྶ་ཏི;
ཨ་ཐ ཨ་ནྟེ་ན ཛ་ཧ་ཏི [ཨ་ཐོ ཨ་ནྟེ་ན ཧེ་ཏི (སྱཱ.), ཨ་ས་ཧ་ནྟེ་ན ད་ཧ་ཏི (ཀ.)], ས་རཱི་རཾ ས་པ་རི་གྒ་ཧཾ;
ཨེ་ཏ་ད་ཉྙཱ་ཡ མེ་དྷཱ་ཝཱི, བྷུ་ཉྫེ་ཐ ཙ ད་དེ་ཐ ཙ.
ད་ཏྭཱ ཙ བྷུ་ཏྭཱ ཙ ཡ་ཐཱ་ནུ་བྷཱ་ཝཾ, ཨ་ནི་ནྡི་ཏོ ས་གྒ་མུ་པེ་ཏི ཋཱ་ན་ནྟི, ཏེ ཀཱ་མཱ པ་རི་ཧཱ་ཡ་ནྟི.
ས་ལླ་ཝི་དྡྷོ་ཝ རུ་པྤ་ཏཱིཏི. ཡ་ཐཱ ཨ་ཡོ་མ་ཡེ་ན ཝཱ ས་ལླེ་ན ཝི་དྡྷོ, ཨ་ཊྛི་མ་ཡེ་ན ཝཱ ས་ལླེ་ན ད་ནྟ་མ་ཡེ་ན ཝཱ ས་ལླེ་ན ཝི་སཱ་ཎ་མ་ཡེ་ན ཝཱ ས་ལླེ་ན ཀ་ཊྛ་མ་ཡེ་ན ཝཱ ས་ལླེ་ན ཝི་དྡྷོ རུ་པྤ་ཏི ཀུ་པྤ་ཏི གྷ་ཊྚཱི་ཡ་ཏི པཱི་ལཱི༹་ཡ་ཏི, བྱཱ་དྷི་ཏོ དོ་མ་ན་སྶི་ཏོ ཧོ་ཏི, ཨེ་ཝ་མེ་ཝ ཝ་ཏྠུ་ཀཱ་མཱ་ནཾ ཝི་པ་རི་ཎཱ་མ་ཉྙ་ཐཱ་བྷཱ་ཝཱ ཨུ་པྤ་ཛྫ་ནྟི སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ. སོ ཀཱ་མ་ས་ལླེ་ན ཙ སོ་ཀ་ས་ལླེ་ན ཙ ཝི་དྡྷོ, རུ་པྤ་ཏི ཀུ་པྤ་ཏི གྷ་ཊྚཱི་ཡ་ཏི པཱི་ལཱི༹་ཡ་ཏི བྱཱ་དྷི་ཏོ དོ་མ་ན་སྶི་ཏོ ཧོ་ཏཱི་ཏི – ས་ལླ་ཝི་དྡྷོ་ཝ རུ་པྤ་ཏི.
ཏེ་ནཱ་ཧ བྷ་ག་ཝཱ –
‘‘ཏ་སྶ ཙེ ཀཱ་མ་ཡཱ་ན་སྶ, ཚ་ནྡ་ཛཱ་ཏ་སྶ ཛ་ནྟུ་ནོ;
ཏེ ཀཱ་མཱ པ་རི་ཧཱ་ཡ་ནྟི, ས་ལླ་ཝི་དྡྷོ་ཝ རུ་པྤ་ཏཱི’’ཏི.
༣. ཡོ ཀཱ་མེ པ་རི་ཝ་ཛྫེ་ཏི, ས་པྤ་སྶེ་ཝ པ་དཱ སི་རོ;
སོ་མཾ ཝི་ས་ཏྟི་ཀཾ ལོ་ཀེ, ས་ཏོ ས་མ་ཏི་ཝ་ཏྟ་ཏི.
ཡོ ཀཱ་མེ པ་རི་ཝ་ཛྫེ་ཏཱིཏི. ཡོཏི ཡོ ཡཱ་དི་སོ ཡ་ཐཱ་ཡུ་ཏྟོ ཡ་ཐཱ་ཝི་ཧི་ཏོ ཡ་ཐཱ་པ་ཀཱ་རོ ཡཾ་ཋཱ་ན་པྤ་ཏྟོ ཡཾ་དྷ་མྨ་ས་མ་ནྣཱ་ག་ཏོ ཁ་ཏྟི་ཡོ ཝཱ བྲཱ་ཧྨ་ཎོ ཝཱ ཝེ་སྶོ ཝཱ སུ་དྡོ ཝཱ ག་ཧ་ཊྛོ ཝཱ པ་བྦ་ཛི་ཏོ ཝཱ དེ་ཝོ ཝཱ མ་ནུ་སྶོ ཝཱ. ཀཱ་མེ པ་རི་ཝ་ཛྫེ་ཏཱིཏི. ཀཱ་མཱཏི ཨུ་དྡཱ་ན་ཏོ དྭེ ཀཱ་མཱ – ཝ་ཏྠུ་ཀཱ་མཱ ཙ ཀི་ལེ་ས་ཀཱ་མཱ ཙ…པེ… ཨི་མེ ཝུ་ཙྩ་ནྟི ཝ་ཏྠུ་ཀཱ་མཱ…པེ… ཨི་མེ ཝུ་ཙྩ་ནྟི ཀི་ལེ་ས་ཀཱ་མཱ. ཀཱ་མེ པ་རི་ཝ་ཛྫེ་ཏཱིཏི དྭཱི་ཧི ཀཱ་ར་ཎེ་ཧི ཀཱ་མེ པ་རི་ཝ་ཛྫེ་ཏི – ཝི་ཀྑ་མྦྷ་ན་ཏོ ཝཱ ས་མུ་ཙྪེ་ད་ཏོ ཝཱ. ཀ་ཐཾ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི? ‘‘ཨ་ཊྛི་ཀ་ངྐ་ལཱུ་པ་མཱ ཀཱ་མཱ ཨ་པྤ་སྶཱ་ད་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘མཾ་ས་པེ་སཱུ་པ་མཱ ཀཱ་མཱ བ་ཧུ་སཱ་དྷཱ་ར་ཎ་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ཏི་ཎུ་ཀྐཱུ་པ་མཱ ཀཱ་མཱ ཨ་ནུ་ད་ཧ་ན་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ཨ་ངྒཱ་ར་ཀཱ་སཱུ་པ་མཱ ཀཱ་མཱ མ་ཧཱ་པ་རི་ལཱ༹་ཧ་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘སུ་པི་ན་ཀཱུ་པ་མཱ ཀཱ་མཱ ཨི་ཏྟ་ར་པ་ཙྩུ་པ་ཊྛཱ་ན་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ཡཱ་ཙི་ཏ་ཀཱུ་པ་མཱ ཀཱ་མཱ ཏཱ་ཝ་ཀཱ་ལི་ཀ་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘རུ་ཀྑ་ཕ་ལཱུ་པ་མཱ ཀཱ་མཱ ས་མྦྷ་ཉྫ་ན་པ་རི་བྷ་ཉྫ་ན་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ཨ་སི་སཱུ་ནཱུ་པ་མཱ ཀཱ་མཱ ཨ་དྷི་ཀུ་ཊྚ་ན་ཊྛེ་ནཱ’’ཏི [ཨ་དྷི་ཀ་ནྟ་ན་ཊྛེ་ནཱ་ཏི (སྱཱ.)] པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ས་ཏྟི་སཱུ་ལཱུ་པ་མཱ ཀཱ་མཱ ཝི་ནི་ཝི་ཛ྄ཛྷ་ན་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ས་པྤ་སི་རཱུ་པ་མཱ ཀཱ་མཱ ས་པྤ་ཊི་བྷ་ཡ་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, ‘‘ཨ་གྒི་ཀྑ་ནྡྷཱུ་པ་མཱ ཀཱ་མཱ མ་ཧཱ་བྷི་ཏཱ་པ་ན་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི.
བུ་དྡྷཱ་ནུ་སྶ་ཏིཾ བྷཱ་ཝེ་ནྟོ་པི ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, དྷ་མྨཱ་ནུ་སྶ་ཏིཾ བྷཱ་ཝེ་ནྟོ་པི…པེ… ས་ངྒྷཱ་ནུ་སྶ་ཏིཾ བྷཱ་ཝེ་ནྟོ་པི… སཱི་ལཱ་ནུ་སྶ་ཏིཾ བྷཱ་ཝེ་ནྟོ་པི… ཙཱ་གཱ་ནུ་སྶ་ཏིཾ བྷཱ་ཝེ་ནྟོ་པི… དེ་ཝ་ཏཱ་ནུ་སྶ་ཏིཾ བྷཱ་ཝེ་ནྟོ་པི… ཨཱ་ནཱ་པཱ་ན་སྶ་ཏིཾ [ཨཱ་ནཱ་པཱ་ན་ས་ཏིཾ (སཱི.)] བྷཱ་ཝེ་ནྟོ་པི… མ་ར་ཎ་སྶ་ཏིཾ བྷཱ་ཝེ་ནྟོ་པི… ཀཱ་ཡ་ག་ཏཱ་ས་ཏིཾ བྷཱ་ཝེ་ནྟོ་པི… ཨུ་པ་ས་མཱ་ནུ་སྶ་ཏིཾ བྷཱ་ཝེ་ནྟོ་པི ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི.
པ་ཋ་མཾ ཛྷཱ་ནཾ བྷཱ་ཝེ་ནྟོ་པི ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི, དུ་ཏི་ཡཾ ཛྷཱ་ནཾ བྷཱ་ཝེ་ནྟོ་པི…པེ… ཏ་ཏི་ཡཾ ཛྷཱ་ནཾ བྷཱ་ཝེ་ནྟོ་པི… ཙ་ཏུ་ཏྠཾ ཛྷཱ་ནཾ བྷཱ་ཝེ་ནྟོ་པི… ཨཱ་ཀཱ་སཱ་ན་ཉྩཱ་ཡ་ཏ་ན་ས་མཱ་པ་ཏྟིཾ བྷཱ་ཝེ་ནྟོ་པི… ཝི་ཉྙཱ་ཎ་ཉྩཱ་ཡ་ཏ་ན་ས་མཱ་པ་ཏྟིཾ བྷཱ་ཝེ་ནྟོ་པི… ཨཱ་ཀི་ཉྩ་ཉྙཱ་ཡ་ཏ་ན་ས་མཱ་པ་ཏྟིཾ བྷཱ་ཝེ་ནྟོ་པི … ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་མཱ་པ་ཏྟིཾ བྷཱ་ཝེ་ནྟོ་པི ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི. ཨེ་ཝཾ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཏི.
ཀ་ཐཾ ས་མུ་ཙྪེ་ད་ཏོ ཀཱ་མེ པ་རི་ཝ་ཛྫེ་ཏི? སོ་ཏཱ་པ་ཏྟི་མ་གྒཾ བྷཱ་ཝེ་ནྟོ་པི ཨ་པཱ་ཡ་ག་མ་ནཱི་ཡེ ཀཱ་མེ ས་མུ་ཙྪེ་ད་ཏོ པ་རི་ཝ་ཛྫེ་ཏི, ས་ཀ་དཱ་གཱ་མི་མ་གྒཾ བྷཱ་ཝེ་ནྟོ་པི ཨོ་ལཱ༹་རི་ཀེ ཀཱ་མེ ས་མུ་ཙྪེ་ད་ཏོ པ་རི་ཝ་ཛྫེ་ཏི, ཨ་ནཱ་གཱ་མི་མ་གྒཾ བྷཱ་ཝེ་ནྟོ་པི ཨ་ནུ་ས་ཧ་ག་ཏེ ཀཱ་མེ ས་མུ་ཙྪེ་ད་ཏོ པ་རི་ཝ་ཛྫེ་ཏི, ཨ་ར་ཧ་ཏྟ་མ་གྒཾ བྷཱ་ཝེ་ནྟོ་པི ས་བྦེ་ན ས་བྦཾ ས་བྦ་ཐཱ ས་བྦཾ ཨ་སེ་སཾ ནི་སྶེ་སཾ ས་མུ་ཙྪེ་ད་ཏོ ཀཱ་མེ པ་རི་ཝ་ཛྫེ་ཏི. ཨེ་ཝཾ ས་མུ་ཙྪེ་ད་ཏོ ཀཱ་མེ པ་རི་ཝ་ཛྫེ་ཏཱི་ཏི – ཡོ ཀཱ་མེ པ་རི་ཝ་ཛྫེ་ཏི.
ས་པྤ་སྶེ་ཝ པ་དཱ སི་རོཏི. ས་པྤོ ཝུ་ཙྩ་ཏི ཨ་ཧི. ཀེ་ན་ཊྛེ་ན ས་པྤོ? སཾ་ས་པྤ་ནྟོ ག་ཙྪ་ཏཱི་ཏི ས་པྤོ; བྷུ་ཛ་ནྟོ ག་ཙྪ་ཏཱི་ཏི བྷུ་ཛ་གོ; ཨུ་རེ་ན ག་ཙྪ་ཏཱི་ཏི ཨུ་ར་གོ; པ་ནྣ་སི་རོ ག་ཙྪ་ཏཱི་ཏི པ་ནྣ་གོ; སི་རེ་ན སུ་པ་ཏཱི་ཏི [ས་པྤ་ཏཱི་ཏི (ཀ.)] ས་རཱི་ས་པོ [སི་རིཾ་ས་པོ (སཱི.)]; བི་ལེ ས་ཡ་ཏཱི་ཏི བི་ལཱ་ས་ཡོ; གུ་ཧཱ་ཡཾ ས་ཡ་ཏཱི་ཏི གུ་ཧཱ་ས་ཡོ; དཱ་ཋཱ ཏ་སྶ ཨཱ་ཝུ་དྷོ་ཏི དཱ་ཋཱ་ཝུ་དྷོ; ཝི་སཾ ཏ་སྶ གྷོ་ར་ནྟི གྷོ་ར་ཝི་སོ; ཛི་ཝ྄ཧཱ ཏ་སྶ དུ་ཝི་དྷཱ་ཏི དྭི་ཛི་ཝ྄ཧོ; དྭཱི་ཧི ཛི་ཝ྄ཧཱ་ཧི ར་སཾ སཱ་ཡ་ཏཱི་ཏི དྭི་ར་ས་ཉྙཱུ. ཡ་ཐཱ པུ་རི་སོ ཛཱི་ཝི་ཏུ་ཀཱ་མོ ཨ་མ་རི་ཏུ་ཀཱ་མོ སུ་ཁ་ཀཱ་མོ དུ་ཀྑ་པ་ཊི་ཀྐཱུ་ལོ པཱ་དེ་ན ས་པྤ་སི་རཾ ཝ་ཛྫེ་ཡྻ ཝི་ཝ་ཛྫེ་ཡྻ པ་རི་ཝ་ཛྫེ་ཡྻ ཨ་བྷི་ནི་ཝ་ཛྫེ་ཡྻ; ཨེ་ཝ་མེ་ཝ སུ་ཁ་ཀཱ་མོ དུ་ཀྑ་པ་ཊི་ཀྐཱུ་ལོ ཀཱ་མེ ཝ་ཛྫེ་ཡྻ ཝི་ཝ་ཛྫེ་ཡྻ པ་རི་ཝ་ཛྫེ་ཡྻ ཨ་བྷི་ནི་ཝ་ཛྫེ་ཡྻཱ་ཏི – ས་པྤ་སྶེ་ཝ པ་དཱ སི་རོ.
སོ་མཾ ཝི་ས་ཏྟི་ཀཾ ལོ་ཀེ, ས་ཏོ ས་མ་ཏི་ཝ་ཏྟ་ཏཱིཏི. སོཏི ཡོ ཀཱ་མེ པ་རི་ཝ་ཛྫེ་ཏི. ཝི་ས་ཏྟི་ཀཱ ཝུ་ཙྩ་ཏི ཏ་ཎྷཱ. ཡོ རཱ་གོ སཱ་རཱ་གོ ཨ་ནུ་ན་ཡོ ཨ་ནུ་རོ་དྷོ ན་ནྡཱི ན་ནྡི་རཱ་གོ, ཙི་ཏྟ་སྶ སཱ་རཱ་གོ ཨི་ཙྪཱ མུ་ཙྪཱ ཨ་ཛ྄ཛྷོ་སཱ་ནཾ གེ་དྷོ པ་ལི་གེ་དྷོ [པ་ལི༹་གེ་དྷོ (སཱི.)] ས་ངྒོ པ་ངྐོ, ཨེ་ཛཱ མཱ་ཡཱ ཛ་ནི་ཀཱ ས་ཉྫ་ན་ནཱི སི་བྦི་ནཱི ཛཱ་ལི་ནཱི ས་རི་ཏཱ ཝི་ས་ཏྟི་ཀཱ, སུ་ཏྟཾ ཝི་ས་ཏཱ ཨཱ་ཡཱུ་ཧི་ནཱི [ཨཱ་ཡཱུ་ཧ་ནཱི (སཱི. སྱཱ.)] དུ་ཏི་ཡཱ པ་ཎི་དྷི བྷ་ཝ་ནེ་ཏྟི, ཝ་ནཾ ཝ་ན་ཐོ ས་ནྡྷ་ཝོ སྣེ་ཧོ ཨ་པེ་ཀྑཱ པ་ཊི་བ་ནྡྷུ, ཨཱ་སཱ ཨཱ་སཱི་ས་ནཱ ཨཱ་སཱི་སི་ཏ་ཏྟཾ, རཱུ་པཱ་སཱ ས་དྡཱ་སཱ ག་ནྡྷཱ་སཱ ར་སཱ་སཱ ཕོ་ཊྛ་བྦཱ་སཱ, ལཱ་བྷཱ་སཱ ཛ་ནཱ་སཱ པུ་ཏྟཱ་སཱ ཛཱི་ཝི་ཏཱ་སཱ, ཛ་པྤཱ པ་ཛ་པྤཱ ཨ་བྷི་ཛ་པྤཱ ཛ་པྤ་ནཱ ཛ་པྤི་ཏ་ཏྟཾ ལོ་ལུ་པྤཾ ལོ་ལུ་པྤཱ་ཡ་ནཱ ལོ་ལུ་པྤཱ་ཡི་ཏ་ཏྟཾ པུ་ཙྪ་ཉྫི་ཀ་ཏཱ སཱ་དྷུ་ཀ་མྱ་ཏཱ, ཨ་དྷ་མྨ་རཱ་གོ ཝི་ས་མ་ལོ་བྷོ ནི་ཀ་ནྟི ནི་ཀཱ་མ་ནཱ པ་ཏྠ་ནཱ པི་ཧ་ནཱ ས་མྤ་ཏྠ་ནཱ, ཀཱ་མ་ཏ་ཎྷཱ བྷ་ཝ་ཏ་ཎྷཱ ཝི་བྷ་ཝ་ཏ་ཎྷཱ, རཱུ་པ་ཏ་ཎྷཱ ཨ་རཱུ་པ་ཏ་ཎྷཱ ནི་རོ་དྷ་ཏ་ཎྷཱ, རཱུ་པ་ཏ་ཎྷཱ ས་དྡ་ཏ་ཎྷཱ ག་ནྡྷ་ཏ་ཎྷཱ ར་ས་ཏ་ཎྷཱ ཕོ་ཊྛ་བྦ་ཏ་ཎྷཱ དྷ་མྨ་ཏ་ཎྷཱ, ཨོ་གྷོ ཡོ་གོ ག་ནྠོ ཨུ་པཱ་དཱ་ནཾ ཨཱ་ཝ་ར་ཎཾ ནཱི་ཝ་ར་ཎཾ ཚ་ད་ནཾ བ་ནྡྷ་ནཾ, ཨུ་པ་ཀྐི་ལེ་སོ ཨ་ནུ་ས་ཡོ པ་རི་ཡུ་ཊྛཱ་ནཾ ལ་ཏཱ ཝེ་ཝི་ཙྪཾ, དུ་ཀྑ་མཱུ་ལཾ དུ་ཀྑ་ནི་དཱ་ནཾ དུ་ཀྑ་པྤ་བྷ་ཝོ མཱ་ར་པཱ་སོ མཱ་ར་བ་ལི༹་སཾ མཱ་ར་ཝི་ས་ཡོ, ཏ་ཎྷཱ་ན་དཱི ཏ་ཎྷཱ་ཛཱ་ལཾ ཏ་ཎྷཱ་ག་དྡུ་ལཾ ཏ་ཎྷཱ་ས་མུ་དྡོ ཨ་བྷི་ཛ྄ཛྷཱ ལོ་བྷོ ཨ་ཀུ་ས་ལ་མཱུ་ལཾ.
ཝི་ས་ཏྟི་ཀཱཏི. ཀེ་ན་ཊྛེ་ན ཝི་ས་ཏྟི་ཀཱ? ཝི་ས་ཏཱ་ཏི ཝི་ས་ཏྟི་ཀཱ; ཝི་སཱ་ལཱ་ཏི ཝི་ས་ཏྟི་ཀཱ; ཝི་ས་ཊཱ་ཏི ཝི་ས་ཏྟི་ཀཱ; ཝི་ས་ཀྐ་ཏཱི་ཏི ཝི་ས་ཏྟི་ཀཱ; ཝི་སཾ་ཧ་ར་ཏཱི་ཏི ཝི་ས་ཏྟི་ཀཱ; ཝི་སཾ་ཝཱ་དི་ཀཱ་ཏི ཝི་ས་ཏྟི་ཀཱ; ཝི་ས་མཱུ་ལཱ་ཏི ཝི་ས་ཏྟི་ཀཱ; ཝི་ས་ཕ་ལཱ་ཏི ཝི་ས་ཏྟི་ཀཱ; ཝི་ས་པ་རི་བྷོ་གོ་ཏི ཝི་ས་ཏྟི་ཀཱ; ཝི་སཱ་ལཱ ཝཱ པ་ན སཱ ཏ་ཎྷཱ རཱུ་པེ ས་དྡེ ག་ནྡྷེ ར་སེ ཕོ་ཊྛ་བྦེ, ཀུ་ལེ ག་ཎེ ཨཱ་ཝཱ་སེ ལཱ་བྷེ ཡ་སེ, པ་སཾ་སཱ་ཡ སུ་ཁེ ཙཱི་ཝ་རེ པི་ཎྜ་པཱ་ཏེ སེ་ནཱ་ས་ནེ གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རེ, ཀཱ་མ་དྷཱ་ཏུ་ཡཱ རཱུ་པ་དྷཱ་ཏུ་ཡཱ ཨ་རཱུ་པ་དྷཱ་ཏུ་ཡཱ, ཀཱ་མ་བྷ་ཝེ རཱུ་པ་བྷ་ཝེ ཨ་རཱུ་པ་བྷ་ཝེ, ས་ཉྙཱ་བྷ་ཝེ ཨ་ས་ཉྙཱ་བྷ་ཝེ ནེ་ཝ་ས་ཉྙཱ་ནཱ་ས་ཉྙཱ་བྷ་ཝེ, ཨེ་ཀ་ཝོ་ཀཱ་ར་བྷ་ཝེ ཙ་ཏུ་ཝོ་ཀཱ་ར་བྷ་ཝེ པ་ཉྩ་ཝོ་ཀཱ་ར་བྷ་ཝེ, ཨ་ཏཱི་ཏེ ཨ་ནཱ་ག་ཏེ པ་ཙྩུ་པྤ་ནྣེ, དི་ཊྛ་སུ་ཏ་མུ་ཏ་ཝི་ཉྙཱ་ཏ་བྦེ་སུ དྷ་མྨེ་སུ ཝི་ས་ཊཱ ཝི་ཏྠ་ཏཱ་ཏི ཝི་ས་ཏྟི་ཀཱ.
ལོ་ཀེཏི ཨ་པཱ་ཡ་ལོ་ཀེ མ་ནུ་སྶ་ལོ་ཀེ དེ་ཝ་ལོ་ཀེ, ཁ་ནྡྷ་ལོ་ཀེ དྷཱ་ཏུ་ལོ་ཀེ ཨཱ་ཡ་ཏ་ན་ལོ་ཀེ. ས་ཏོཏི ཙ་ཏཱུ་ཧི ཀཱ་ར་ཎེ་ཧི ས་ཏོ – ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ནཾ བྷཱ་ཝེ་ནྟོ ས་ཏོ, ཝེ་ད་ནཱ་སུ…པེ… ཙི་ཏྟེ… དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ནཾ བྷཱ་ཝེ་ནྟོ ས་ཏོ.
ཨ་པ་རེ་ཧི་པི ཙ་ཏཱུ་ཧི ཀཱ་ར་ཎེ་ཧི ས་ཏོ – ཨ་ས་ཏི་པ་རི་ཝ་ཛྫ་ནཱ་ཡ ས་ཏོ, ས་ཏི་ཀ་ར་ཎཱི་ཡཱ་ནཾ དྷ་མྨཱ་ནཾ ཀ་ཏ་ཏྟཱ ས་ཏོ, ས་ཏི་པ་རི་བ་ནྡྷཱ་ནཾ དྷ་མྨཱ་ནཾ ཧ་ཏ་ཏྟཱ ས་ཏོ, ས་ཏི་ནི་མི་ཏྟཱ་ནཾ དྷ་མྨཱ་ནཾ ཨ་ས་མྨུ་ཊྛ་ཏྟཱ ས་ཏོ.
ཨ་པ་རེ་ཧི་པི ཙ་ཏཱུ་ཧི ཀཱ་ར་ཎེ་ཧི ས་ཏོ – ས་ཏི་ཡཱ ས་མ་ནྣཱ་ག་ཏ་ཏྟཱ ས་ཏོ, ས་ཏི་ཡཱ ཝ་སི་ཏ་ཏྟཱ ས་ཏོ, ས་ཏི་ཡཱ པཱ་གུ་ཉྙ་ཏཱ་ཡ ས་ཏོ, ས་ཏི་ཡཱ ཨ་པ་ཙྩོ་རོ་ཧ་ཎ་ཏཱ་ཡ [ཨ་པ་ཙྩོ་རོ་པ་ན་ཏཱ་ཡ (སཱི.)] ས་ཏོ.
ཨ་པ་རེ་ཧི་པི ཙ་ཏཱུ་ཧི ཀཱ་ར་ཎེ་ཧི ས་ཏོ – ས་ཏྟ་ཏྟཱ ས་ཏོ, ས་ནྟ་ཏྟཱ ས་ཏོ, ས་མི་ཏ་ཏྟཱ ས་ཏོ, ས་ནྟ་དྷ་མྨ་ས་མ་ནྣཱ་ག་ཏ་ཏྟཱ ས་ཏོ. བུ་དྡྷཱ་ནུ་སྶ་ཏི་ཡཱ ས་ཏོ, དྷ་མྨཱ་ནུ་སྶ་ཏི་ཡཱ ས་ཏོ, ས་ངྒྷཱ་ནུ་སྶ་ཏི་ཡཱ ས་ཏོ, སཱི་ལཱ་ནུ་སྶ་ཏི་ཡཱ ས་ཏོ, ཙཱ་གཱ་ནུ་སྶ་ཏི་ཡཱ ས་ཏོ, དེ་ཝ་ཏཱ་ནུ་སྶ་ཏི་ཡཱ ས་ཏོ, ཨཱ་ནཱ་པཱ་ན་སྶ་ཏི་ཡཱ ས་ཏོ, མ་ར་ཎ་སྶ་ཏི་ཡཱ ས་ཏོ, ཀཱ་ཡ་ག་ཏཱ་ས་ཏི་ཡཱ ས་ཏོ, ཨུ་པ་ས་མཱ་ནུ་སྶ་ཏི་ཡཱ ས་ཏོ. ཡཱ ས་ཏི ཨ་ནུ་སྶ་ཏི པ་ཊི་སྶ་ཏི ས་ཏི ས་ར་ཎ་ཏཱ དྷཱ་ར་ཎ་ཏཱ ཨ་པི་ལཱ་པ་ན་ཏཱ ཨ་ས་མྨུ་སྶ་ན་ཏཱ ས་ཏི ས་ཏི་ནྡྲི་ཡཾ ས་ཏི་བ་ལཾ ས་མྨཱ་ས་ཏི ས་ཏི་ས་མྦོ་ཛ྄ཛྷ་ངྒོ ཨེ་ཀཱ་ཡ་ན་མ་གྒོ, ཨ་ཡཾ ཝུ་ཙྩ་ཏི ས་ཏི. ཨི་མཱ་ཡ ས་ཏི་ཡཱ ཨུ་པེ་ཏོ ཧོ་ཏི ས་མུ་པེ་ཏོ ཨུ་པ་ག་ཏོ ས་མུ་པ་ག་ཏོ ཨུ་པ་པ་ནྣོ ས་མུ་པ་པ་ནྣོ ས་མ་ནྣཱ་ག་ཏོ, སོ ཝུ་ཙྩ་ཏི ས་ཏོ.
སོ་མཾ ཝི་ས་ཏྟི་ཀཾ ལོ་ཀེ, ས་ཏོ ས་མ་ཏི་ཝ་ཏྟ་ཏཱིཏི. ལོ་ཀེ ཝཱ སཱ ཝི་ས་ཏྟི་ཀཱ, ལོ་ཀེ ཝཱ ཏཾ ཝི་ས་ཏྟི་ཀཾ ས་ཏོ ཏ་ར་ཏི ཨུ་ཏྟ་ར་ཏི པ་ཏ་ར་ཏི ས་མ་ཏི་ཀྐ་མ་ཏི ཝཱི་ཏི་ཝ་ཏྟ་ཏཱི་ཏི – སོ་མཾ ཝི་ས་ཏྟི་ཀཾ ལོ་ཀེ, ས་ཏོ ས་མ་ཏི་ཝ་ཏྟ་ཏི.
ཏེ་ནཱ་ཧ བྷ་ག་ཝཱ –
‘‘ཡོ ཀཱ་མེ པ་རི་ཝ་ཛྫེ་ཏི, ས་པྤ་སྶེ་ཝ པ་དཱ སི་རོ;
སོ་མཾ ཝི་ས་ཏྟི་ཀཾ ལོ་ཀེ, ས་ཏོ ས་མ་ཏི་ཝ་ཏྟ་ཏཱི’’ཏི.
༤. ཁེ་ཏྟཾ ཝ་ཏྠུཾ ཧི་ར་ཉྙཾ ཝཱ, ག་ཝཱ་སྶཾ དཱ་ས་པོ་རི་སཾ;
ཐི་ཡོ བ་ནྡྷཱུ པུ་ཐུ ཀཱ་མེ, ཡོ ན་རོ ཨ་ནུ་གི་ཛ྄ཛྷ་ཏི.
ཁེ་ཏྟཾ ཝ་ཏྠུཾ ཧི་ར་ཉྙཾ ཝཱཏི. ཁེ་ཏྟནྟི སཱ་ལི་ཀྑེ་ཏྟཾ ཝཱི་ཧི་ཀྑེ་ཏྟཾ མུ་གྒ་ཀྑེ་ཏྟཾ མཱ་ས་ཀྑེ་ཏྟཾ ཡ་ཝ་ཀྑེ་ཏྟཾ གོ་དྷུ་མ་ཀྑེ་ཏྟཾ ཏི་ལ་ཀྑེ་ཏྟཾ. ཝ་ཏྠུནྟི གྷ་ར་ཝ་ཏྠུཾ ཀོ་ཊྛ་ཀ་ཝ་ཏྠུཾ པུ་རེ་ཝ་ཏྠུཾ པ་ཙྪཱ་ཝ་ཏྠུཾ ཨཱ་རཱ་མ་ཝ་ཏྠུཾ ཝི་ཧཱ་ར་ཝ་ཏྠུཾ. ཧི་ར་ཉྙནྟི ཧི་ར་ཉྙཾ ཝུ་ཙྩ་ཏི ཀ་ཧཱ་པ་ཎོ་ཏི – ཁེ་ཏྟཾ ཝ་ཏྠུཾ ཧི་ར་ཉྙཾ ཝཱ.
ག་ཝཱ་སྶཾ དཱ་ས་པོ་རི་སནྟི. ག་ཝནྟི ག་ཝཱ [གཱ་ཝོ (ཀ.)] ཝུ་ཙྩ་ནྟི. ཨ་སྶཱཏི པ་སུ་ཀཱ་ད་ཡོ ཝུ་ཙྩ་ནྟི. དཱ་སཱཏི ཙ་ཏྟཱ་རོ དཱ་སཱ – ཨ་ནྟོ་ཛཱ་ཏ་ཀོ དཱ་སོ, དྷ་ན་ཀྐཱི་ཏ་ཀོ དཱ་སོ, སཱ་མཾ ཝཱ དཱ་ས་བྱཾ ཨུ་པེ་ཏི, ཨ་ཀཱ་མ་ཀོ ཝཱ དཱ་ས་ཝི་ས་ཡཾ ཨུ་པེ་ཏི.
‘‘ཨཱ་མཱ་ཡ དཱ་སཱ་པི བྷ་ཝ་ནྟི ཧེ་ཀེ, དྷ་ནེ་ན ཀཱི་ཏཱ་པི བྷ་ཝ་ནྟི དཱ་སཱ;
སཱ་མ་ཉྩ ཨེ་ཀེ ཨུ་པ་ཡ་ནྟི དཱ་སྱཾ, བྷ་ཡཱ་པ་ནུ་ཎྞཱ་པི བྷ་ཝ་ནྟི དཱ་སཱ’’ཏི.
པུ་རི་སཱཏི ཏ་ཡོ པུ་རི་སཱ – བྷ་ཏ་ཀཱ, ཀ་མྨ་ཀ་རཱ, ཨུ་པ་ཛཱི་ཝི་ནོ་ཏི – ག་ཝཱ་སྶཾ དཱ་ས་པོ་རི་སཾ.
ཐི་ཡོ བ་ནྡྷཱུ པུ་ཐུ ཀཱ་མེཏི. ཐི་ཡོཏི ཨི་ཏྠི་པ་རི་གྒ་ཧོ ཝུ་ཙྩ་ཏི. བ་ནྡྷཱུཏི ཙ་ཏྟཱ་རོ བ་ནྡྷཱུ – ཉཱ་ཏི་བ་ནྡྷ་ཝཱ་པི བ་ནྡྷུ, གོ་ཏྟ་བ་ནྡྷ་ཝཱ་པི བ་ནྡྷུ, མ་ནྟ་བ་ནྡྷ་ཝཱ་པི བ་ནྡྷུ, སི་པྤ་བ་ནྡྷ་ཝཱ་པི བ་ནྡྷུ. པུ་ཐུ ཀཱ་མེཏི བ་ཧཱུ ཀཱ་མེ. ཨེ་ཏེ པུ་ཐུ ཀཱ་མཱ མ་ནཱ་པི་ཀཱ རཱུ་པཱ…པེ… མ་ནཱ་པི་ཀཱ ཕོ་ཊྛ་བྦཱ་ཏི – ཐི་ཡོ བ་ནྡྷཱུ པུ་ཐུ ཀཱ་མེ.
ཡོ ན་རོ ཨ་ནུ་གི་ཛ྄ཛྷ་ཏཱིཏི. ཡོཏི ཡོ ཡཱ་དི་སོ ཡ་ཐཱ་ཡུ་ཏྟོ ཡ་ཐཱ་ཝི་ཧི་ཏོ ཡ་ཐཱ་པ་ཀཱ་རོ ཡཾ་ཋཱ་ན་པྤ་ཏྟོ ཡཾ་དྷ་མྨ་ས་མ་ནྣཱ་ག་ཏོ ཁ་ཏྟི་ཡོ ཝཱ བྲཱ་ཧྨ་ཎོ ཝཱ ཝེ་སྶོ ཝཱ སུ་དྡོ ཝཱ ག་ཧ་ཊྛོ ཝཱ པ་བྦ་ཛི་ཏོ ཝཱ དེ་ཝོ ཝཱ མ་ནུ་སྶོ ཝཱ. ན་རོཏི ས་ཏྟོ ན་རོ མཱ་ན་ཝོ པོ་སོ པུ་གྒ་ལོ ཛཱི་ཝོ ཛཱ་གུ ཛ་ནྟུ ཨི་ནྡ་གུ མ་ནུ་ཛོ. ཨ་ནུ་གི་ཛ྄ཛྷ་ཏཱིཏི ཀི་ལེ་ས་ཀཱ་མེ་ན ཝ་ཏྠུ་ཀཱ་མེ་སུ གི་ཛ྄ཛྷ་ཏི ཨ་ནུ་གི་ཛ྄ཛྷ་ཏི པ་ལི་གི་ཛ྄ཛྷ་ཏི པ་ལི་བ་ཛ྄ཛྷ་ཏཱི་ཏི – ཡོ ན་རོ ཨ་ནུ་གི་ཛ྄ཛྷ་ཏི.
ཏེ་ནཱ་ཧ བྷ་ག་ཝཱ –
‘‘ཁེ་ཏྟཾ ཝ་ཏྠུཾ ཧི་ར་ཉྙཾ ཝཱ, ག་ཝཱ་སྶཾ དཱ་ས་པོ་རི་སཾ;
ཐི་ཡོ བ་ནྡྷཱུ པུ་ཐུ ཀཱ་མེ, ཡོ ན་རོ ཨ་ནུ་གི་ཛ྄ཛྷ་ཏཱི’’ཏི.
༥. ཨ་བ་ལཱ ནཾ བ་ལཱི་ཡ་ནྟི, མ་དྡ་ནྟེ ནཾ པ་རི་སྶ་ཡཱ;
ཏ་ཏོ ནཾ དུ་ཀྑ་མ་ནྭེ་ཏི, ནཱ་ཝཾ བྷི་ནྣ་མི་ཝོ་ད་ཀཾ.
ཨ་བ་ལཱ ནཾ བ་ལཱི་ཡ་ནྟཱིཏི. ཨ་བ་ལཱཏི ཨ་བ་ལཱ ཀི་ལེ་སཱ དུ་བྦ་ལཱ ཨ་པྤ་བ་ལཱ ཨ་པྤ་ཐཱ་མ་ཀཱ ཧཱི་ནཱ ནི་ཧཱི་ནཱ ( ) [(པ་རི་ཧཱི་ནཱ) (སཱི. སྱཱ.)] ཨོ་མ་ཀཱ ལཱ་མ་ཀཱ ཚ་ཏུ་ཀྐཱ པ་རི་ཏྟཱ. ཏེ ཀི་ལེ་སཱ ཏཾ པུ་གྒ་ལཾ ས་ཧ་ནྟི པ་རི་ས་ཧ་ནྟི ཨ་བྷི་བྷ་ཝ་ནྟི ཨ་ཛ྄ཛྷོ་ཏྠ་ར་ནྟི པ་རི་ཡཱ་དི་ཡ་ནྟི མ་དྡ་ནྟཱི་ཏི, ཨེ་ཝ་མྤི ཨ་བ་ལཱ ནཾ བ་ལཱི་ཡ་ནྟི. ཨ་ཐ ཝཱ, ཨ་བ་ལཾ པུ་གྒ་ལཾ དུ་བྦ་ལཾ ཨ་པྤ་བ་ལཾ ཨ་པྤ་ཐཱ་མ་ཀཾ ཧཱི་ནཾ ནི་ཧཱི་ནཾ ཨོ་མ་ཀཾ ལཱ་མ་ཀཾ ཚ་ཏུ་ཀྐཾ པ་རི་ཏྟཾ, ཡ་སྶ ན་ཏྠི ས་དྡྷཱ་བ་ལཾ ཝཱི་རི་ཡ་བ་ལཾ ས་ཏི་བ་ལཾ ས་མཱ་དྷི་བ་ལཾ པ་ཉྙཱ་བ་ལཾ ཧི་རི་བ་ལཾ ཨོ་ཏྟ་པྤ་བ་ལཾ. ཏེ ཀི་ལེ་སཱ ཏཾ པུ་གྒ་ལཾ ས་ཧ་ནྟི པ་རི་ས་ཧ་ནྟི ཨ་བྷི་བྷ་ཝ་ནྟི ཨ་ཛ྄ཛྷོ་ཏྠ་ར་ནྟི པ་རི་ཡཱ་དི་ཡ་ནྟི མ་དྡ་ནྟཱི་ཏི – ཨེ་ཝ་མྤི ཨ་བ་ལཱ ནཾ བ་ལཱི་ཡ་ནྟཱི་ཏི.
མ་དྡ་ནྟེ ནཾ པ་རི་སྶ་ཡཱཏི. དྭེ པ་རི་སྶ་ཡཱ – པཱ་ཀ་ཊ་པ་རི་སྶ་ཡཱ ཙ པ་ཊི་ཙྪ་ནྣ་པ་རི་སྶ་ཡཱ ཙ. ཀ་ཏ་མེ པཱ་ཀ་ཊ་པ་རི་སྶ་ཡཱ? སཱི་ཧཱ བྱ་གྒྷཱ དཱི་པཱི ཨ་ཙྪཱ ཏ་ར་ཙྪཱ ཀོ་ཀཱ མ་ཧིཾ་སཱ [མ་ཧི་སཱ (སཱི. སྱཱ.)] ཧ་ཏྠཱི ཨ་ཧི་ཝི་ཙྪི་ཀཱ ས་ཏ་པ་དཱི, ཙོ་རཱ ཝཱ ཨ་སྶུ མཱ་ན་ཝཱ ཝཱ ཀ་ཏ་ཀ་མྨཱ ཝཱ ཨ་ཀ་ཏ་ཀ་མྨཱ ཝཱ, ཙ་ཀྑུ་རོ་གོ སོ་ཏ་རོ་གོ གྷཱ་ན་རོ་གོ ཛི་ཝ྄ཧཱ་རོ་གོ ཀཱ་ཡ་རོ་གོ སཱི་ས་རོ་གོ ཀ་ཎྞ་རོ་གོ མུ་ཁ་རོ་གོ ད་ནྟ་རོ་གོ, ཀཱ་སོ སཱ་སོ པི་ནཱ་སོ ཌཱ་ཧོ ཛ་རོ, ཀུ་ཙྪི་རོ་གོ མུ་ཙྪཱ པ་ཀྑ་ནྡི་ཀཱ སཱུ་ལཱ ཝི་སཱུ་ཙི་ཀཱ, ཀུ་ཊྛཾ ག་ཎྜོ ཀི་ལཱ་སོ སོ་སོ ཨ་པ་མཱ་རོ, ད་དྡུ ཀ་ཎྜུ ཀ་ཙྪུ ར་ཁ་སཱ [ར་ཀྑ་སཱ (ཀ.)] ཝི་ཏ་ཙྪི་ཀཱ ལོ་ཧི་ཏ་པི་ཏྟཾ, མ་དྷུ་མེ་ཧོ ཨཾ་སཱ པི་ལ༹་ཀཱ བྷ་ག་ནྡ་ལཱ, པི་ཏྟ་ས་མུ་ཊྛཱ་ནཱ ཨཱ་བཱ་དྷཱ སེ་མྷ་ས་མུ་ཊྛཱ་ནཱ ཨཱ་བཱ་དྷཱ ཝཱ་ཏ་ས་མུ་ཊྛཱ་ནཱ ཨཱ་བཱ་དྷཱ ས་ནྣི་པཱ་ཏི་ཀཱ ཨཱ་བཱ་དྷཱ ཨུ་ཏུ་པ་རི་ཎཱ་མ་ཛཱ ཨཱ་བཱ་དྷཱ ཝི་ས་མ་པ་རི་ཧཱ་ར་ཛཱ ཨཱ་བཱ་དྷཱ, ཨོ་པ་ཀྐ་མི་ཀཱ ཨཱ་བཱ་དྷཱ ཀ་མྨ་ཝི་པཱ་ཀ་ཛཱ ཨཱ་བཱ་དྷཱ, སཱི་ཏཾ ཨུ་ཎྷཾ ཛི་གྷ་ཙྪཱ པི་པཱ་སཱ ཨུ་ཙྩཱ་རོ པ་སྶཱ་ཝོ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶཱ ཨི་ཏི ཝཱ – ཨི་མེ ཝུ་ཙྩ་ནྟི པཱ་ཀ་ཊ་པ་རི་སྶ་ཡཱ.
ཀ་ཏ་མེ པ་ཊི་ཙྪ་ནྣ་པ་རི་སྶ་ཡཱ? ཀཱ་ཡ་དུ་ཙྩ་རི་ཏཾ ཝ་ཙཱི་དུ་ཙྩ་རི་ཏཾ མ་ནོ་དུ་ཙྩ་རི་ཏཾ, ཀཱ་མ་ཙྪ་ནྡ་ནཱི་ཝ་ར་ཎཾ བྱཱ་པཱ་ད་ནཱི་ཝ་ར་ཎཾ ཐི་ན་མི་དྡྷ་ནཱི་ཝ་ར་ཎཾ ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ ཝི་ཙི་ཀི་ཙྪཱ་ནཱི་ཝ་ར་ཎཾ, རཱ་གོ དོ་སོ མོ་ཧོ ཀོ་དྷོ ཨུ་པ་ནཱ་ཧོ མ་ཀྑོ པ་ལཱ༹་སོ ཨི་སྶཱ མ་ཙྪ་རི་ཡཾ, མཱ་ཡཱ སཱ་ཋེ་ཡྻཾ ཐ་མྦྷོ སཱ་ར་མྦྷོ མཱ་ནོ ཨ་ཏི་མཱ་ནོ མ་དོ པ་མཱ་དོ, ས་བྦེ ཀི་ལེ་སཱ ས་བྦེ དུ་ཙྩ་རི་ཏཱ ས་བྦེ ད་ར་ཐཱ ས་བྦེ པ་རི་ལཱ༹་ཧཱ ས་བྦེ ས་ནྟཱ་པཱ ས་བྦཱ་ཀུ་ས་ལཱ་བྷི་ས་ངྑཱ་རཱ – ཨི་མེ ཝུ་ཙྩ་ནྟི པ་ཊི་ཙྪ་ནྣ་པ་རི་སྶ་ཡཱ.
པ་རི་སྶ་ཡཱཏི ཀེ་ན་ཊྛེ་ན པ་རི་སྶ་ཡཱ? པ་རི་ས་ཧ་ནྟཱི་ཏི པ་རི་སྶ་ཡཱ, པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི པ་རི་སྶ་ཡཱ, ཏ་ཏྲཱ་ས་ཡཱ་ཏི པ་རི་སྶ་ཡཱ. ཀ་ཐཾ པ་རི་ས་ཧ་ནྟཱི་ཏི པ་རི་སྶ་ཡཱ? ཏེ པ་རི་སྶ་ཡཱ ཏཾ པུ་གྒ་ལཾ ས་ཧ་ནྟི པ་རི་ས་ཧ་ནྟི ཨ་བྷི་བྷ་ཝ་ནྟི ཨ་ཛ྄ཛྷོ་ཏྠ་ར་ནྟི པ་རི་ཡཱ་དི་ཡ་ནྟི མ་དྡ་ནྟི. ཨེ་ཝཾ པ་རི་ས་ཧ་ནྟཱི་ཏི པ་རི་སྶ་ཡཱ. ཀ་ཐཾ པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི པ་རི་སྶ་ཡཱ? ཏེ པ་རི་སྶ་ཡཱ ཀུ་ས་ལཱ་ནཾ དྷ་མྨཱ་ནཾ ཨ་ནྟ་རཱ་ཡཱ་ཡ པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ་སཾ ཀུ་ས་ལཱ་ནཾ དྷ་མྨཱ་ནཾ? ས་མྨཱ་པ་ཊི་པ་དཱ་ཡ ཨ་ནུ་ལོ་མ་པ་ཊི་པ་དཱ་ཡ ཨ་པ་ཙྩ་ནཱི་ཀ་པ་ཊི་པ་དཱ་ཡ ཨ་ཝི་རུ་དྡྷ་པ་ཊི་པ་དཱ་ཡ ཨ་ནྭ་ཏྠ་པ་ཊི་པ་དཱ་ཡ དྷ་མྨཱ་ནུ་དྷ་མྨ་པ་ཊི་པ་དཱ་ཡ, སཱི་ལེ་སུ པ་རི་པཱུ་རི་ཀཱ་རི་ཏཱ་ཡ ཨི་ནྡྲི་ཡེ་སུ གུ་ཏྟ་དྭཱ་ར་ཏཱ་ཡ བྷོ་ཛ་ནེ མ་ཏྟ་ཉྙུ་ཏཱ་ཡ, ཛཱ་ག་རི་ཡཱ་ནུ་ཡོ་ག་སྶ ས་ཏི་ས་མྤ་ཛ་ཉྙ་སྶ, ཙ་ཏུ་ནྣཾ ས་ཏི་པ་ཊྛཱ་ནཱ་ནཾ བྷཱ་ཝ་ནཱ་ནུ་ཡོ་ག་སྶ ཙ་ཏུ་ནྣཾ ས་མྨ་པྤ་དྷཱ་ནཱ་ནཾ བྷཱ་ཝ་ནཱ་ནུ་ཡོ་ག་སྶ ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝ་ནཱ་ནུ་ཡོ་ག་སྶ, པ་ཉྩ་ནྣཾ ཨི་ནྡྲི་ཡཱ་ནཾ བྷཱ་ཝ་ནཱ་ནུ་ཡོ་ག་སྶ པ་ཉྩ་ནྣཾ བ་ལཱ་ནཾ བྷཱ་ཝ་ནཱ་ནུ་ཡོ་ག་སྶ, ས་ཏྟ་ནྣཾ བོ་ཛ྄ཛྷ་ངྒཱ་ནཾ བྷཱ་ཝ་ནཱ་ནུ་ཡོ་ག་སྶ ཨ་རི་ཡ་སྶ ཨ་ཊྛ་ངྒི་ཀ་སྶ མ་གྒ་སྶ བྷཱ་ཝ་ནཱ་ནུ་ཡོ་ག་སྶ – ཨི་མེ་སཾ ཀུ་ས་ལཱ་ནཾ དྷ་མྨཱ་ནཾ ཨ་ནྟ་རཱ་ཡཱ་ཡ པ་རི་ཧཱ་ནཱ་ཡ སཾ་ཝ་ཏྟ་ནྟི. ཨེ་ཝཾ པ་རི་ཧཱ་ནཱ་ཡ སཾ་ཝ་ཏྟ་ནྟཱི་ཏི – པ་རི་སྶ་ཡཱ.
ཀ་ཐཾ ཏ་ཏྲཱ་ས་ཡཱ་ཏི པ་རི་སྶ་ཡཱ? ཏ་ཏྠེ་ཏེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི ཨ་ཏྟ་བྷཱ་ཝ་ས་ནྣི་སྶ་ཡཱ. ཡ་ཐཱ བི་ལེ བི་ལཱ་ས་ཡཱ པཱ་ཎཱ ས་ཡ་ནྟི, ད་ཀེ ད་ཀཱ་ས་ཡཱ པཱ་ཎཱ ས་ཡ་ནྟི, ཝ་ནེ ཝ་ནཱ་ས་ཡཱ པཱ་ཎཱ ས་ཡ་ནྟི, རུ་ཀྑེ རུ་ཀྑཱ་ས་ཡཱ པཱ་ཎཱ ས་ཡ་ནྟི, ཨེ་ཝ་མེ་ཝ ཏ་ཏྠེ་ཏེ པཱ་པ་ཀཱ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི ཨ་ཏྟ་བྷཱ་ཝ་ས་ནྣི་སྶ་ཡཱ. ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘སཱ་ནྟེ་ཝཱ་སི་ཀོ, བྷི་ཀྑ་ཝེ, བྷི་ཀྑུ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏི. ཀ་ཐ་ཉྩ, བྷི་ཀྑ་ཝེ, བྷི་ཀྑུ སཱ་ནྟེ་ཝཱ་སི་ཀོ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏི? ཨི་དྷ, བྷི་ཀྑ་ཝེ, བྷི་ཀྑུ་ནོ ཙ་ཀྑུ་ནཱ རཱུ་པཾ དི་སྭཱ ཨུ་པྤ་ཛྫ་ནྟི ཡེ པཱ་པ་ཀཱ ཨ་ཀུ་ས་ལཱ དྷ་མྨཱ ས་ར་ས་ངྐ་པྤཱ ས་ཉྙོ་ཛ་ནི་ཡཱ, ཏྱ་སྶ ཨ་ནྟོ ཝ་ས་ནྟི ཨ་ནྭཱ་ས་ཝ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ་ཏི – ཏ་སྨཱ སཱ་ནྟེ་ཝཱ་སི་ཀོ་ཏི ཝུ་ཙྩ་ཏི. ཏེ ནཾ ས་མུ་དཱ་ཙ་ར་ནྟི. ས་མུ་དཱ་ཙ་ར་ནྟི ནཾ པཱ་པ་ཀཱ ཨ་ཀུ་ས་ལཱ དྷ་མྨཱ་ཏི – ཏ་སྨཱ སཱ་ཙ་རི་ཡ་ཀོ་ཏི ཝུ་ཙྩ་ཏི.
‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ་ནོ སོ་ཏེ་ན ས་དྡཾ སུ་ཏྭཱ, གྷཱ་ནེ་ན ག་ནྡྷཾ གྷཱ་ཡི་ཏྭཱ, ཛི་ཝ྄ཧཱ་ཡ ར་སཾ སཱ་ཡི་ཏྭཱ, ཀཱ་ཡེ་ན ཕོ་ཊྛ་བྦཾ ཕུ་སི་ཏྭཱ, མ་ན་སཱ དྷ་མྨཾ ཝི་ཉྙཱ་ཡ ཨུ་པྤ་ཛྫ་ནྟི ཡེ པཱ་པ་ཀཱ ཨ་ཀུ་ས་ལཱ དྷ་མྨཱ ས་ར་ས་ངྐ་པྤཱ ས་ཉྙོ་ཛ་ནི་ཡཱ, ཏྱ་སྶ ཨ་ནྟོ ཝ་ས་ནྟི ཨ་ནྭཱ་ས་ཝ་ནྟི པཱ་པ་ཀཱ ཨ་ཀུ་ས་ལཱ དྷ་མྨཱ་ཏི – ཏ་སྨཱ སཱ་ནྟེ་ཝཱ་སི་ཀོ་ཏི ཝུ་ཙྩ་ཏི. ཏེ ནཾ ས་མུ་དཱ་ཙ་ར་ནྟི. ས་མུ་དཱ་ཙ་ར་ནྟི ནཾ པཱ་པ་ཀཱ ཨ་ཀུ་ས་ལཱ དྷ་མྨཱ་ཏི – ཏ་སྨཱ སཱ་ཙ་རི་ཡ་ཀོ་ཏི ཝུ་ཙྩ་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ སཱ་ནྟེ་ཝཱ་སི་ཀོ སཱ་ཙ་རི་ཡ་ཀོ དུ་ཀྑཾ ན ཕཱ་སུ ཝི་ཧ་ར་ཏཱི’’ཏི. ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘ཏ་ཡོ་མེ, བྷི་ཀྑ་ཝེ, ཨ་ནྟ་རཱ་མ་ལཱ – ཨ་ནྟ་རཱ་ཨ་མི་ཏྟཱ ཨ་ནྟ་རཱ་ས་པ་ཏྟཱ ཨ་ནྟ་རཱ་ཝ་དྷ་ཀཱ ཨ་ནྟ་རཱ་པ་ཙྩ་ཏྠི་ཀཱ. ཀ་ཏ་མེ ཏ་ཡོ? ལོ་བྷོ, བྷི་ཀྑ་ཝེ, ཨ་ནྟ་རཱ་མ་ལཾ [ཨ་ནྟ་རཱ་མ་ལོ (སྱཱ.)] ཨ་ནྟ་རཱ་ཨ་མི་ཏྟོ ཨ་ནྟ་རཱ་ས་པ་ཏྟོ ཨ་ནྟ་རཱ་ཝ་དྷ་ཀོ ཨ་ནྟ་རཱ་པ་ཙྩ་ཏྠི་ཀོ. དོ་སོ…པེ… མོ་ཧོ, བྷི་ཀྑ་ཝེ, ཨ་ནྟ་རཱ་མ་ལཾ ཨ་ནྟ་རཱ་ཨ་མི་ཏྟོ ཨ་ནྟ་རཱ་ས་པ་ཏྟོ ཨ་ནྟ་རཱ་ཝ་དྷ་ཀོ ཨ་ནྟ་རཱ་པ་ཙྩ་ཏྠི་ཀོ. ཨི་མེ ཁོ, བྷི་ཀྑ་ཝེ, ཏ་ཡོ ཨ་ནྟ་རཱ་མ་ལཱ – ཨ་ནྟ་རཱ་ཨ་མི་ཏྟཱ ཨ་ནྟ་རཱ་ས་པ་ཏྟཱ ཨ་ནྟ་རཱ་ཝ་དྷ་ཀཱ ཨ་ནྟ་རཱ་པ་ཙྩ་ཏྠི་ཀཱ.
‘‘ཨ་ན་ཏྠ་ཛ་ན་ནོ ལོ་བྷོ, ལོ་བྷོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘ལུ་དྡྷོ ཨ་ཏྠཾ ན ཛཱ་ནཱ་ཏི, ལུ་དྡྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ [ཨ་ནྡྷ་ཏ་མཾ (སྱཱ. ཀ.)] ཏ་དཱ ཧོ་ཏི, ཡཾ ལོ་བྷོ ས་ཧ་ཏེ ན་རཾ.
‘‘ཨ་ན་ཏྠ་ཛ་ན་ནོ དོ་སོ, དོ་སོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘ཀུ་དྡྷོ ཨ་ཏྠཾ ན ཛཱ་ནཱ་ཏི, ཀུ་དྡྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ ཏ་དཱ ཧོ་ཏི, ཡཾ དོ་སོ ས་ཧ་ཏེ ན་རཾ.
‘‘ཨ་ན་ཏྠ་ཛ་ན་ནོ མོ་ཧོ, མོ་ཧོ ཙི་ཏྟ་པྤ་ཀོ་པ་ནོ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
‘‘མཱུ་ལ༹ྷོ ཨ་ཏྠཾ ན ཛཱ་ནཱ་ཏི, མཱུ་ལ༹ྷོ དྷ་མྨཾ ན པ་སྶ་ཏི;
ཨ་ནྡྷ་ནྟ་མཾ ཏ་དཱ ཧོ་ཏི, ཡཾ མོ་ཧོ ས་ཧ་ཏེ ན་ར’’ནྟི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་མྤི ཧེ་ཏཾ བྷ་ག་ཝ་ཏཱ – ‘‘ཏ་ཡོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨཱ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནཱ ཨུ་པྤ་ཛྫ་ནྟི, ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. ཀ་ཏ་མེ ཏ་ཡོ? ལོ་བྷོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨོ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནོ ཨུ་པྤ་ཛྫ་ཏི, ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. དོ་སོ ཁོ, མ་ཧཱ་རཱ་ཛ…པེ… མོ་ཧོ ཁོ, མ་ཧཱ་རཱ་ཛ, པུ་རི་ས་སྶ དྷ་མྨོ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནོ ཨུ་པྤ་ཛྫ་ཏི, ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ. ཨི་མེ ཁོ, མ་ཧཱ་རཱ་ཛ, ཏ་ཡོ པུ་རི་ས་སྶ དྷ་མྨཱ ཨ་ཛ྄ཛྷ་ཏྟཾ ཨུ་པྤ་ཛྫ་མཱ་ནཱ ཨུ་པྤ་ཛྫ་ནྟི, ཨ་ཧི་ཏཱ་ཡ དུ་ཀྑཱ་ཡ ཨ་ཕཱ་སུ་ཝི་ཧཱ་རཱ་ཡ.
‘‘ལོ་བྷོ དོ་སོ ཙ མོ་ཧོ ཙ, པུ་རི་སཾ པཱ་པ་ཙེ་ཏ་སཾ;
ཧིཾ་ས་ནྟི ཨ་ཏྟ་ས་མྦྷཱུ་ཏཱ, ཏ་ཙ་སཱ་རཾ་ཝ ས་མྥ་ལ’’ནྟི.
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ.
ཝུ་ཏྟ་མྤི ཙེ་ཏཾ བྷ་ག་ཝ་ཏཱ –
‘‘རཱ་གོ ཙ དོ་སོ ཙ ཨི་ཏོ་ནི་དཱ་ནཱ, ཨ་ར་ཏི ར་ཏི ལོ་མ་ཧཾ་སོ ཨི་ཏོ་ཛཱ;
ཨི་ཏོ ས་མུ་ཊྛཱ་ཡ མ་ནོ་ཝི་ཏ་ཀྐཱ, ཀུ་མཱ་ར་ཀཱ དྷ་ངྐ་མི་ཝོ་སྶ་ཛ་ནྟཱི’’ཏི [དྷ་ངྐ་མི་ཝོ་སྶ་ཛྫ་ནྟི (སྱཱ.)].
ཨེ་ཝ་མྤི ཏ་ཏྲཱ་ས་ཡཱ་ཏི – པ་རི་སྶ་ཡཱ. མ་དྡ་ནྟེ ནཾ པ་རི་སྶ་ཡཱཏི. ཏེ པ་རི་སྶ་ཡཱ ཏཾ པུ་གྒ་ལཾ ས་ཧ་ནྟི པ་རི་ས་ཧ་ནྟི ཨ་བྷི་བྷ་ཝ་ནྟི ཨ་ཛ྄ཛྷོ་ཏྠ་ར་ནྟི པ་རི་ཡཱ་དི་ཡ་ནྟི མ་དྡ་ནྟཱི་ཏི – མ་དྡ་ནྟེ ནཾ པ་རི་སྶ་ཡཱ.
ཏ་ཏོ ནཾ དུ་ཀྑ་མ་ནྭེ་ཏཱིཏི. ཏ་ཏོཏི ཏ་ཏོ ཏ་ཏོ པ་རི་སྶ་ཡ་ཏོ ཏཾ པུ་གྒ་ལཾ དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, ཛཱ་ཏི་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, ཛ་རཱ་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, བྱཱ་དྷི་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, མ་ར་ཎ་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་ས་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, ནེ་ར་ཡི་ཀཾ དུ་ཀྑཾ, ཏི་ར་ཙྪཱ་ན་ཡོ་ནི་ཀཾ དུ་ཀྑཾ, པེ་ཏྟི་ཝི་ས་ཡི་ཀཾ དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, མཱ་ནུ་སི་ཀཾ དུ་ཀྑཾ… ག་བྦྷོ་ཀྐ་ནྟི་མཱུ་ལ་ཀཾ དུ་ཀྑཾ… ག་བྦྷེ ཋི་ཏི་མཱུ་ལ་ཀཾ དུ་ཀྑཾ… ག་བྦྷཱ ཝུ་ཊྛཱ་ན་མཱུ་ལ་ཀཾ དུ་ཀྑཾ… ཛཱ་ཏ་སྶཱུ་པ་ནི་བ་ནྡྷ་ཀཾ དུ་ཀྑཾ… ཛཱ་ཏ་སྶ པ་རཱ་དྷེ་ཡྻ་ཀཾ དུ་ཀྑཾ… ཨ་ཏྟཱུ་པ་ཀྐ་མཾ དུ་ཀྑཾ… པ་རཱུ་པ་ཀྐ་མཾ དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, དུ་ཀྑ་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, ས་ངྑཱ་ར་དུ་ཀྑཾ… ཝི་པ་རི་ཎཱ་མ་དུ་ཀྑཾ … ཙ་ཀྑུ་རོ་གོ སོ་ཏ་རོ་གོ གྷཱ་ན་རོ་གོ ཛི་ཝ྄ཧཱ་རོ་གོ ཀཱ་ཡ་རོ་གོ སཱི་ས་རོ་གོ ཀ་ཎྞ་རོ་གོ མུ་ཁ་རོ་གོ ད་ནྟ་རོ་གོ, ཀཱ་སོ སཱ་སོ པི་ནཱ་སོ ཌཱ་ཧོ ཛ་རོ, ཀུ་ཙྪི་རོ་གོ མུ་ཙྪཱ པ་ཀྑ་ནྡི་ཀཱ སཱུ་ལཱ ཝི་སཱུ་ཙི་ཀཱ, ཀུ་ཊྛཾ ག་ཎྜོ ཀི་ལཱ་སོ སོ་སོ ཨ་པ་མཱ་རོ, ད་དྡུ ཀ་ཎྜུ ཀ་ཙྪུ ར་ཁ་སཱ ཝི་ཏ་ཙྪི་ཀཱ ལོ་ཧི་ཏ་པི་ཏྟཾ, མ་དྷུ་མེ་ཧོ ཨཾ་སཱ པི་ལ༹་ཀཱ བྷ་ག་ནྡ་ལཱ པི་ཏྟ་ས་མུ་ཊྛཱ་ནཱ ཨཱ་བཱ་དྷཱ སེ་མྷ་ས་མུ་ཊྛཱ་ནཱ ཨཱ་བཱ་དྷཱ ཝཱ་ཏ་ས་མུ་ཊྛཱ་ནཱ ཨཱ་བཱ་དྷཱ ས་ནྣི་པཱ་ཏི་ཀཱ ཨཱ་བཱ་དྷཱ ཨུ་ཏུ་པ་རི་ཎཱ་མ་ཛཱ ཨཱ་བཱ་དྷཱ ཝི་ས་མ་པ་རི་ཧཱ་ར་ཛཱ ཨཱ་བཱ་དྷཱ, ཨོ་པ་ཀྐ་མི་ཀཱ ཨཱ་བཱ་དྷཱ ཀ་མྨ་ཝི་པཱ་ཀ་ཛཱ ཨཱ་བཱ་དྷཱ, སཱི་ཏཾ ཨུ་ཎྷཾ ཛི་གྷ་ཙྪཱ པི་པཱ་སཱ ཨུ་ཙྩཱ་རོ པ་སྶཱ་ཝོ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶ་དུ་ཀྑཾ… མཱ་ཏུ་མ་ར་ཎཾ དུ་ཀྑཾ… པི་ཏུ་མ་ར་ཎཾ དུ་ཀྑཾ… བྷཱ་ཏུ་མ་ར་ཎཾ དུ་ཀྑཾ… བྷ་གི་ནི་མ་ར་ཎཾ དུ་ཀྑཾ… པུ་ཏྟ་མ་ར་ཎཾ དུ་ཀྑཾ… དྷཱི་ཏུ་མ་ར་ཎཾ དུ་ཀྑཾ … ཉཱ་ཏི་བྱ་ས་ནཾ དུ་ཀྑཾ… བྷོ་ག་བྱ་ས་ནཾ དུ་ཀྑཾ… རོ་ག་བྱ་ས་ནཾ དུ་ཀྑཾ… སཱི་ལ་བྱ་ས་ནཾ དུ་ཀྑཾ… དི་ཊྛི་བྱ་ས་ནཾ དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏཱི་ཏི – ཏ་ཏོ ནཾ དུ་ཀྑ་མ་ནྭེ་ཏི.
ནཱ་ཝཾ བྷི་ནྣ་མི་ཝོ་ད་ཀནྟི. ཡ་ཐཱ བྷི་ནྣཾ ནཱ་ཝཾ ད་ཀ་མེ་སིཾ [ཨུ་ད་ཀ་དཱ་ཡི་ཏོ (སཱི.), ཨུ་ད་ཀཾ ཨ་ནྭཱ་ཡི་ཀཾ (སྱཱ.)] ཏ་ཏོ ཏ་ཏོ ཨུ་ད་ཀཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, པུ་ར་ཏོ་པི ཨུ་ད་ཀཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, པ་ཙྪ་ཏོ་པི… ཧེ་ཊྛ་ཏོ་པི… པ་སྶ་ཏོ་པི ཨུ་ད་ཀཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི; ཨེ་ཝ་མེ་ཝ ཏ་ཏོ ཏ་ཏོ པ་རི་སྶ་ཡ་ཏོ ཏཾ པུ་གྒ་ལཾ དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི, ཛཱ་ཏི་དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏི…པེ… དི་ཊྛི་བྱ་ས་ནཾ དུ་ཀྑཾ ཨ་ནྭེ་ཏི ཨ་ནུ་ག་ཙྪ་ཏི ཨ་ནྭཱ་ཡི་ཀཾ ཧོ་ཏཱི་ཏི – ནཱ་ཝཾ བྷི་ནྣ་མི་ཝོ་ད་ཀཾ.
ཏེ་ནཱ་ཧ བྷ་ག་ཝཱ –
‘‘ཨ་བ་ལཱ ནཾ བ་ལཱི་ཡ་ནྟི, མ་དྡ་ནྟེ ནཾ པ་རི་སྶ་ཡཱ;
ཏ་ཏོ ནཾ དུ་ཀྑ་མ་ནྭེ་ཏི, ནཱ་ཝཾ བྷི་ནྣ་མི་ཝོ་ད་ཀ’’ནྟི.
༦. ཏ་སྨཱ ཛ་ནྟུ ས་དཱ ས་ཏོ, ཀཱ་མཱ་ནི པ་རི་ཝ་ཛྫ་ཡེ;
ཏེ པ་ཧཱ་ཡ ཏ་རེ ཨོ་གྷཾ, ནཱ་ཝཾ སི་ཏྭཱ་ཝ པཱ་ར་གཱུ.
ཏ་སྨཱ ཛ་ནྟུ ས་དཱ ས་ཏོཏི. ཏ་སྨཱཏི ཏ་སྨཱ ཏཾ་ཀཱ་ར་ཎཱ ཏཾ་ཧེ་ཏུ ཏ་པྤ་ཙྩ་ཡཱ ཏཾ་ནི་དཱ་ནཱ ཨེ་ཏཾ ཨཱ་དཱི་ན་ཝཾ ས་མྤ་སྶ་མཱ་ནོ ཀཱ་མེ་སཱུ་ཏི – ཏ་སྨཱ. ཛ་ནྟཱུཏི ས་ཏྟོ ན་རོ མཱ་ན་ཝོ པོ་སོ པུ་གྒ་ལོ ཛཱི་ཝོ ཛཱ་གུ ཛ་ནྟུ ཨི་ནྡ་གུ མ་ནུ་ཛོ. ས་དཱཏི ས་དཱ ས་བྦ་དཱ ས་བྦ་ཀཱ་ལཾ ནི་ཙྩ་ཀཱ་ལཾ དྷུ་ཝ་ཀཱ་ལཾ ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ པོ་ངྑཱ་ནུ་པོ་ངྑཾ ཨུ་ད་ཀཱུ་མི་ཀ་ཛཱ་ཏཾ ཨ་ཝཱི་ཙི ས་ནྟ་ཏི ས་ཧི་ཏཾ ཕ་སྶི་ཏཾ [ཕུ་སི་ཏཾ (སཱི. སྱཱ.)], པུ་རེ་བྷ་ཏྟཾ པ་ཙྪཱ་བྷ་ཏྟཾ པུ་རི་མ་ཡཱ་མཾ མ་ཛ྄ཛྷི་མ་ཡཱ་མཾ པ་ཙྪི་མ་ཡཱ་མཾ, ཀཱ་ལེ༹ ཛུ་ཎྷེ ཝ་སྶེ ཧེ་མ་ནྟེ གི་མྷེ, པུ་རི་མེ ཝ་ཡོ་ཁ་ནྡྷེ མ་ཛ྄ཛྷི་མེ ཝ་ཡོ་ཁ་ནྡྷེ པ་ཙྪི་མེ ཝ་ཡོ་ཁ་ནྡྷེ. ས་ཏོཏི ཙ་ཏཱུ་ཧི ཀཱ་ར་ཎེ་ཧི ས་ཏོ – ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ནཾ བྷཱ་ཝེ་ནྟོ ས་ཏོ, ཝེ་ད་ནཱ་སུ… ཙི་ཏྟེ… དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ནཾ བྷཱ་ཝེ་ནྟོ ས་ཏོ. ཨ་པ་རེ་ཧི ཙ་ཏཱུ་ཧི ཀཱ་ར་ཎེ་ཧི ས་ཏོ…པེ… སོ ཝུ་ཙྩ་ཏི ས་ཏོ་ཏི – ཏ་སྨཱ ཛ་ནྟུ ས་དཱ ས་ཏོ.
ཀཱ་མཱ་ནི པ་རི་ཝ་ཛྫ་ཡེཏི. ཀཱ་མཱཏི ཨུ་དྡཱ་ན་ཏོ དྭེ ཀཱ་མཱ – ཝ་ཏྠུ་ཀཱ་མཱ ཙ ཀི་ལེ་ས་ཀཱ་མཱ ཙ…པེ… ཨི་མེ ཝུ་ཙྩ་ནྟི ཝ་ཏྠུ་ཀཱ་མཱ…པེ… ཨི་མེ ཝུ་ཙྩ་ནྟི ཀི་ལེ་ས་ཀཱ་མཱ. ཀཱ་མཱ་ནི པ་རི་ཝ་ཛྫ་ཡེཏི དྭཱི་ཧི ཀཱ་ར་ཎེ་ཧི ཀཱ་མེ པ་རི་ཝ་ཛྫེ་ཡྻ – ཝི་ཀྑ་མྦྷ་ན་ཏོ ཝཱ ས་མུ་ཙྪེ་ད་ཏོ ཝཱ. ཀ་ཐཾ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཡྻ? ‘‘ཨ་ཊྛི་ཀ་ངྐ་ལཱུ་པ་མཱ ཀཱ་མཱ ཨ་པྤ་སྶཱ་ད་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཡྻ, ‘‘མཾ་ས་པེ་སཱུ་པ་མཱ ཀཱ་མཱ བ་ཧུ་སཱ་དྷཱ་ར་ཎ་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཡྻ, ‘‘ཏི་ཎུ་ཀྐཱུ་པ་མཱ ཀཱ་མཱ ཨ་ནུ་ད་ཧ་ན་ཊྛེ་ནཱ’’ཏི པ་སྶ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཡྻ…པེ… ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་མཱ་པ་ཏྟིཾ བྷཱ་ཝེ་ནྟོ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཡྻ. ཨེ་ཝཾ ཝི་ཀྑ་མྦྷ་ན་ཏོ ཀཱ་མེ པ་རི་ཝ་ཛྫེ་ཡྻ…པེ… ཨེ་ཝཾ ས་མུ་ཙྪེ་ད་ཏོ ཀཱ་མེ པ་རི་ཝ་ཛྫེ་ཡྻཱ་ཏི – ཀཱ་མཱ་ནི པ་རི་ཝ་ཛྫ་ཡེ.
ཏེ པ་ཧཱ་ཡ ཏ་རེ ཨོ་གྷནྟི. ཏེཏི ཝ་ཏྠུ་ཀཱ་མེ པ་རི་ཛཱ་ནི་ཏྭཱ ཀི་ལེ་ས་ཀཱ་མེ པ་ཧཱ་ཡ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མི་ཏྭཱ; ཀཱ་མ་ཙྪ་ནྡ་ནཱི་ཝ་ར་ཎཾ པ་ཧཱ་ཡ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མི་ཏྭཱ; བྱཱ་པཱ་ད་ནཱི་ཝ་ར་ཎཾ…པེ… ཐི་ན་མི་དྡྷ་ནཱི་ཝ་ར་ཎཾ… ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ… ཝི་ཙི་ཀི་ཙྪཱ་ནཱི་ཝ་ར་ཎཾ པ་ཧཱ་ཡ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མི་ཏྭཱ ཀཱ་མོ་གྷཾ བྷ་ཝོ་གྷཾ དི་ཊྛོ་གྷཾ ཨ་ཝི་ཛྫོ་གྷཾ ཏ་རེ་ཡྻ ཨུ་ཏྟ་རེ་ཡྻ པ་ཏ་རེ་ཡྻ ས་མ་ཏི་ཀྐ་མེ་ཡྻ ཝཱི་ཏི་ཝ་ཏྟེ་ཡྻཱ་ཏི – ཏེ པ་ཧཱ་ཡ ཏ་རེ ཨོ་གྷཾ.
ནཱ་ཝཾ སི་ཏྭཱ་ཝ པཱ་ར་གཱུཏི. ཡ་ཐཱ ག་རུ་ཀཾ ནཱ་ཝཾ བྷཱ་རི་ཀཾ ཨུ་ད་ཀཾ སི་ཏྭཱ [སི་ཉྩི་ཏྭཱ (སཱི. སྱཱ.)] ཨོ་སི་ཉྩི་ཏྭཱ ཚ་ཌྜེ་ཏྭཱ ལ་ཧུ་ཀཱ་ཡ ནཱ་ཝཱ་ཡ ཁི་པྤཾ ལ་ཧུཾ ཨ་པྤ་ཀ་སི་རེ་ནེ་ཝ པཱ་རཾ ག་ཙྪེ་ཡྻ; ཨེ་ཝ་མེ་ཝ ཝ་ཏྠུ་ཀཱ་མེ པ་རི་ཛཱ་ནི་ཏྭཱ ཀི་ལེ་ས་ཀཱ་མེ པ་ཧཱ་ཡ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མི་ཏྭཱ; ཀཱ་མ་ཙྪ་ནྡ་ནཱི་ཝ་ར་ཎཾ… བྱཱ་པཱ་ད་ནཱི་ཝ་ར་ཎཾ… ཐི་ན་མི་དྡྷ་ནཱི་ཝ་ར་ཎཾ… ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ… ཝི་ཙི་ཀི་ཙྪཱ་ནཱི་ཝ་ར་ཎཾ པ་ཧཱ་ཡ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མི་ཏྭཱ ཁི་པྤཾ ལ་ཧུཾ ཨ་པྤ་ཀ་སི་རེ་ནེ་ཝ པཱ་རཾ ག་ཙྪེ་ཡྻ. པཱ་རཾ ཝུ་ཙྩ་ཏི ཨ་མ་ཏཾ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. པཱ་རཾ ག་ཙྪེ་ཡྻཱཏི – པཱ་རཾ ཨ་དྷི་ག་ཙྪེ་ཡྻ, པཱ་རཾ ཕུ་སེ་ཡྻ, པཱ་རཾ ས་ཙྪི་ཀ་རེ་ཡྻ. པཱ་ར་གཱུཏི ཡོ་པི པཱ་རཾ ག་ནྟུ་ཀཱ་མོ སོ་པི པཱ་ར་གཱུ; ཡོ་པི པཱ་རཾ ག་ཙྪ་ཏི སོ་པི པཱ་ར་གཱུ; ཡོ་པི པཱ་རཾ ག་ཏོ, སོ་པི པཱ་ར་གཱུ.
ཝུ་ཏྟ་མྤི ཧེ་ཏཾ བྷ་ག་ཝ་ཏཱ –
ཏི་ཎྞོ པཱ་ར་ངྒ་ཏོ ཐ་ལེ ཏི་ཊྛ་ཏི བྲཱ་ཧྨ་ཎོ་ཏི. བྲཱ་ཧྨ་ཎོ་ཏི ཁོ, བྷི་ཀྑ་ཝེ, ཨ་ར་ཧ་ཏོ ཨེ་ཏཾ ཨ་དྷི་ཝ་ཙ་ནཾ. སོ ཨ་བྷི་ཉྙཱ་པཱ་ར་གཱུ པ་རི་ཉྙཱ་པཱ་ར་གཱུ པ་ཧཱ་ན་པཱ་ར་གཱུ བྷཱ་ཝ་ནཱ་པཱ་ར་གཱུ ས་ཙྪི་ཀི་རི་ཡཱ་པཱ་ར་གཱུ ས་མཱ་པ་ཏྟི་པཱ་ར་གཱུ. ཨ་བྷི་ཉྙཱ་པཱ་ར་གཱུ ས་བྦ་དྷ་མྨཱ་ནཾ, པ་རི་ཉྙཱ་པཱ་ར་གཱུ ས་བྦ་དུ་ཀྑཱ་ནཾ, པ་ཧཱ་ན་པཱ་ར་གཱུ ས་བྦ་ཀི་ལེ་སཱ་ནཾ, བྷཱ་ཝ་ནཱ་པཱ་ར་གཱུ ཙ་ཏུ་ནྣཾ ཨ་རི་ཡ་མ་གྒཱ་ནཾ, ས་ཙྪི་ཀི་རི་ཡཱ་པཱ་ར་གཱུ ནི་རོ་དྷ་སྶ, ས་མཱ་པ་ཏྟི་པཱ་ར་གཱུ ས་བྦ་ས་མཱ་པ་ཏྟཱི་ནཾ. སོ ཝ་སི་པྤ་ཏྟོ པཱ་ར་མི་པྤ་ཏྟོ ཨ་རི་ཡ་སྨིཾ སཱི་ལ་སྨིཾ, ཝ་སི་པྤ་ཏྟོ པཱ་ར་མི་པྤ་ཏྟོ ཨ་རི་ཡ་སྨིཾ ས་མཱ་དྷི་སྨིཾ, ཝ་སི་པྤ་ཏྟོ པཱ་ར་མི་པྤ་ཏྟོ ཨ་རི་ཡཱ་ཡ པ་ཉྙཱ་ཡ, ཝ་སི་པྤ་ཏྟོ པཱ་ར་མི་པྤ་ཏྟོ ཨ་རི་ཡཱ་ཡ ཝི་མུ་ཏྟི་ཡཱ. སོ པཱ་རཾ ག་ཏོ པཱ་ར་པྤ་ཏྟོ ཨ་ནྟ་ག་ཏོ ཨ་ནྟ་པྤ་ཏྟོ ཀོ་ཊི་ག་ཏོ ཀོ་ཊི་པྤ་ཏྟོ པ་རི་ཡ་ནྟ་ག་ཏོ པ་རི་ཡ་ནྟ་པྤ་ཏྟོ ཝོ་སཱ་ན་ག་ཏོ ཝོ་སཱ་ན་པྤ་ཏྟོ ཏཱ་ཎ་ག་ཏོ ཏཱ་ཎ་པྤ་ཏྟོ ལེ་ཎ་ག་ཏོ ལེ་ཎ་པྤ་ཏྟོ ས་ར་ཎ་ག་ཏོ ས་ར་ཎ་པྤ་ཏྟོ ཨ་བྷ་ཡ་ག་ཏོ ཨ་བྷ་ཡ་པྤ་ཏྟོ ཨ་ཙྩུ་ཏ་ག་ཏོ ཨ་ཙྩུ་ཏ་པྤ་ཏྟོ ཨ་མ་ཏ་ག་ཏོ ཨ་མ་ཏ་པྤ་ཏྟོ ནི་བྦཱ་ན་ག་ཏོ ནི་བྦཱ་ན་པྤ་ཏྟོ. སོ ཝུ་ཊྛ་ཝཱ་སོ ཙི་ཎྞ་ཙ་ར་ཎོ ག་ཏ་དྡྷོ ག་ཏ་དི་སོ ག་ཏ་ཀོ་ཊི་ཀོ པཱ་ལི་ཏ་བྲ་ཧྨ་ཙ་རི་ཡོ ཨུ་ཏྟ་མ་དི་ཊྛི་པྤ་ཏྟོ བྷཱ་ཝི་ཏ་མ་གྒོ པ་ཧཱི་ན་ཀི་ལེ་སོ པ་ཊི་ཝི་དྡྷཱ་ཀུ་པྤོ ས་ཙྪི་ཀ་ཏ་ནི་རོ་དྷོ, དུ་ཀྑཾ ཏ་སྶ པ་རི་ཉྙཱ་ཏཾ, ས་མུ་ད་ཡོ པ་ཧཱི་ནོ, མ་གྒོ བྷཱ་ཝི་ཏོ, ནི་རོ་དྷོ ས་ཙྪི་ཀ་ཏོ, ཨ་བྷི་ཉྙེ་ཡྻཾ ཨ་བྷི་ཉྙཱ་ཏཾ, པ་རི་ཉྙེ་ཡྻཾ པ་རི་ཉྙཱ་ཏཾ, པ་ཧཱ་ཏ་བྦཾ པ་ཧཱི་ནཾ, བྷཱ་ཝེ་ཏ་བྦཾ བྷཱ་ཝི་ཏཾ, ས་ཙྪི་ཀཱ་ཏ་བྦཾ ས་ཙྪི་ཀ་ཏཾ.
སོ ཨུ་ཀྑི་ཏྟ་པ་ལི་གྷོ སཾ་ཀི་ཎྞ་པ་རི་ཀྑོ ཨ་བྦུ་ལ༹ྷེ་སི་ཀོ ནི་ར་གྒ་ལོ༹ ཨ་རི་ཡོ པ་ནྣ་དྡྷ་ཛོ པ་ནྣ་བྷཱ་རོ ཝི་ས་ཉྙུ་ཏྟོ པ་ཉྩ་ངྒ་ཝི་པྤ་ཧཱི་ནོ ཚ་ལ༹་ངྒ་ས་མ་ནྣཱ་ག་ཏོ ཨེ་ཀཱ་ར་ཀྑོ ཙ་ཏུ་རཱ་པ་སྶེ་ནོ པ་ནུ་ཎྞ་པ་ཙྩེ་ཀ་ས་ཙྩོ ས་མ་ཝ་ཡ་ས་ཊྛེ་ས་ནོ ཨ་ནཱ་ཝི་ལ་ས་ངྐ་པྤོ པ་སྶ་དྡྷ་ཀཱ་ཡ་ས་ངྑཱ་རོ སུ་ཝི་མུ་ཏྟ་ཙི་ཏྟོ སུ་ཝི་མུ་ཏྟ་པ་ཉྙོ ཀེ་ཝ་ལཱི ཝུ་སི་ཏ་ཝཱ ཨུ་ཏྟ་མ་པུ་རི་སོ པ་ར་མ་པུ་རི་སོ པ་ར་མ་པ་ཏྟི་པྤ་ཏྟོ. སོ ནེ་ཝཱ་ཙི་ན་ཏི [ནེ་ཝ ཨཱ་ཙི་ནཱ་ཏི (སཱི. སྱཱ.)] ནཱ་པ་ཙི་ན་ཏི, ཨ་པ་ཙི་ནི་ཏྭཱ ཋི་ཏོ. ནེ་ཝ པ་ཛ་ཧ་ཏི ན ཨུ་པཱ་དི་ཡ་ཏི, པ་ཛ་ཧི་ཏྭཱ ཋི་ཏོ. ནེ་ཝ སཾ་སི་བྦ་ཏི [ནེ་ཝ སི་ནེ་ཏི (སཱི.), ནེ་ཝ ཝི་སཱི་ནེ་ཏི (སྱཱ.)] ན ཨུ་སྶི་ནེ་ཏི, ཝི་སི་ནི་ཏྭཱ ཋི་ཏོ. ནེ་ཝ ཝི་དྷཱུ་པེ་ཏི ན ས་ནྡྷཱུ་པེ་ཏི, ཝི་དྷཱུ་པེ་ཏྭཱ ཋི་ཏོ. ཨ་སེ་ཀྑེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ. ཨ་སེ་ཀྑེ་ན ས་མཱ་དྷི་ཀྑ་ནྡྷེ་ན… ཨ་སེ་ཀྑེ་ན པ་ཉྙཱ་ཀྑ་ནྡྷེ་ན… ཨ་སེ་ཀྑེ་ན ཝི་མུ་ཏྟི་ཀྑ་ནྡྷེ་ན… ཨ་སེ་ཀྑེ་ན ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷེ་ན ས་མ་ནྣཱ་ག་ཏ་ཏྟཱ ཋི་ཏོ. ས་ཙྩཾ ས་མྤ་ཊི་པཱ་དི་ཡི་ཏྭཱ ཋི་ཏོ. ཨེ་ཛཾ ས་མ་ཏི་ཀྐ་མི་ཏྭཱ ཋི་ཏོ. ཀི་ལེ་ས་གྒིཾ པ་རི་ཡཱ་དི་ཡི་ཏྭཱ ཋི་ཏོ, ཨ་པ་རི་ག་མ་ན་ཏཱ་ཡ ཋི་ཏོ, ཀ་ཊཾ ས་མཱ་དཱ་ཡ ཋི་ཏོ, མུ་ཏྟི་པ་ཊི་སེ་ཝ་ན་ཏཱ་ཡ ཋི་ཏོ, མེ་ཏྟཱ་ཡ པཱ་རི་སུ་དྡྷི་ཡཱ ཋི་ཏོ, ཀ་རུ་ཎཱ་ཡ… མུ་དི་ཏཱ་ཡ… ཨུ་པེ་ཀྑཱ་ཡ པཱ་རི་སུ་དྡྷི་ཡཱ ཋི་ཏོ, ཨ་ཙྩ་ནྟ་པཱ་རི་སུ་དྡྷི་ཡཱ ཋི་ཏོ, ཨ་ཀ་མྨ་ཡ་ཏཱ་ཡ [ཨ་ཏ་མྨ་ཡ་ཏཱ་ཡ (སཱི.), ཨ་ཀ་མྨ་ཉྙ་ཏཱ་ཡ (སྱཱ.)] པཱ་རི་སུ་དྡྷི་ཡཱ ཋི་ཏོ, ཝི་མུ་ཏྟ་ཏྟཱ ཋི་ཏོ, ས་ནྟུ་སྶི་ཏ་ཏྟཱ ཋི་ཏོ, ཁ་ནྡྷ་པ་རི་ཡ་ནྟེ ཋི་ཏོ, དྷཱ་ཏུ་པ་རི་ཡ་ནྟེ ཋི་ཏོ, ཨཱ་ཡ་ཏ་ན་པ་རི་ཡ་ནྟེ ཋི་ཏོ, ག་ཏི་པ་རི་ཡ་ནྟེ ཋི་ཏོ, ཨུ་པ་པ་ཏྟི་པ་རི་ཡ་ནྟེ ཋི་ཏོ, པ་ཊི་ས་ནྡྷི་པ་རི་ཡ་ནྟེ ཋི་ཏོ, (བྷ་ཝ་པ་རི་ཡ་ནྟེ ཋི་ཏོ, སཾ་སཱ་ར་པ་རི་ཡ་ནྟེ ཋི་ཏོ ཝ་ཊྚ་པ་རི་ཡ་ནྟེ ཋི་ཏོ, ཨ་ནྟི་མེ བྷ་ཝེ ཋི་ཏོ,) [( ) ན་ཏྠི སཱི་ཧ་ལ༹་པོ་ཏྠ་ཀེ] ཨ་ནྟི་མེ ས་མུ་སྶ་ཡེ ཋི་ཏོ, ཨ་ནྟི་མ་དེ་ཧ་དྷ་རོ ཨ་ར་ཧཱ.
‘‘ཏ་སྶཱ་ཡཾ པ་ཙྪི་མ་ཀོ བྷ་ཝོ, ཙ་རི་མོ་ཡཾ ས་མུ་སྶ་ཡོ;
ཛཱ་ཏི་མ་ར་ཎ་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ’’ཏི.
ནཱ་ཝཾ སི་ཏྭཱ་ཝ པཱ་ར་གཱུ་ཏི. ཏེ་ནཱ་ཧ བྷ་ག་ཝཱ –
‘‘ཏ་སྨཱ ཛ་ནྟུ ས་དཱ ས་ཏོ, ཀཱ་མཱ་ནི པ་རི་ཝ་ཛྫ་ཡེ;
ཏེ པ་ཧཱ་ཡ ཏ་རེ ཨོ་གྷཾ, ནཱ་ཝཾ སི་ཏྭཱ་ཝ པཱ་ར་གཱུ’’ཏི.
ཀཱ་མ་སུ་ཏྟ་ནི་དྡེ་སོ པ་ཋ་མོ.