༢. པ་དུ་མ་ངྒ་པ་ཉྷོ

༢. ‘‘བྷ་ནྟེ ནཱ་ག་སེ་ན, ‘པ་དུ་མ་སྶ ཏཱི་ཎི ཨ་ངྒཱ་ནི ག་ཧེ་ཏ་བྦཱ་ནཱི’ཏི ཡཾ ཝ་དེ་སི, ཀ་ཏ་མཱ་ནི ཏཱ་ནི ཏཱི་ཎི ཨ་ངྒཱ་ནི ག་ཧེ་ཏ་བྦཱ་ནཱི’’ཏི? ‘‘ཡ་ཐཱ, མ་ཧཱ་རཱ་ཛ, པ་དུ་མཾ ཨུ་ད་ཀེ ཛཱ་ཏཾ ཨུ་ད་ཀེ སཾ་ཝ་དྡྷཾ ཨ་ནུ་པ་ལི་ཏྟཾ ཨུ་ད་ཀེ་ན, ཨེ་ཝ་མེ་ཝ ཁོ, མ་ཧཱ་རཱ་ཛ, ཡོ་གི་ནཱ ཡོ་གཱ་ཝ་ཙ་རེ་ན ཀུ་ལེ ག་ཎེ ལཱ་བྷེ ཡ་སེ ས་ཀྐཱ་རེ ས་མྨཱ་ན་ནཱ་ཡ པ་རི་བྷོ་ག་པ་ཙྩ་ཡེ་སུ ཙ ས་བྦ་ཏྠ ཨ་ནུ་པ་ལི་ཏྟེ་ན བྷ་ཝི་ཏ་བྦཾ. ཨི་དཾ, མ་ཧཱ་རཱ་ཛ, པ་དུ་མ་སྶ པ་ཋ་མཾ ཨ་ངྒཾ ག་ཧེ་ཏ་བྦཾ.

‘‘པུ་ན ཙ་པ་རཾ, མ་ཧཱ་རཱ་ཛ, པ་དུ་མཾ ཨུ་ད་ཀཱ ཨ་ཙྩུ་གྒ་མྨ ཋཱ་ཏི. ཨེ་ཝ་མེ་ཝ ཁོ, མ་ཧཱ་རཱ་ཛ, ཡོ་གི་ནཱ ཡོ་གཱ་ཝ་ཙ་རེ་ན ས་བྦ་ལོ་ཀཾ ཨ་བྷི་བྷ་ཝི་ཏྭཱ ཨ་ཙྩུ་གྒ་མྨ ལོ་ཀུ་ཏྟ་ར་དྷ་མྨེ ཋཱ་ཏ་བྦཾ. ཨི་དཾ, མ་ཧཱ་རཱ་ཛ, པ་དུ་མ་སྶ དུ་ཏི་ཡཾ ཨ་ངྒཾ ག་ཧེ་ཏ་བྦཾ.

‘‘པུ་ན ཙ་པ་རཾ, མ་ཧཱ་རཱ་ཛ, པ་དུ་མཾ ཨ་པྤ་མ་ཏྟ་ཀེ་ན་པི ཨ་ནི་ལེ་ན ཨེ་རི་ཏཾ ཙ་ལ་ཏི. ཨེ་ཝ་མེ་ཝ ཁོ, མ་ཧཱ་རཱ་ཛ, ཡོ་གི་ནཱ ཡོ་གཱ་ཝ་ཙ་རེ་ན ཨ་པྤ་མ་ཏྟ་ཀེ་སུ་པི ཀི་ལེ་སེ་སུ སཾ་ཡ་མོ ཀ་ར་ཎཱི་ཡོ, བྷ་ཡ་ད་སྶཱ་ཝི་ནཱ ཝི་ཧ་རི་ཏ་བྦཾ. ཨི་དཾ, མ་ཧཱ་རཱ་ཛ, པ་དུ་མ་སྶ ཏ་ཏི་ཡཾ ཨ་ངྒཾ ག་ཧེ་ཏ་བྦཾ. བྷཱ་སི་ཏ་མྤེ་ཏཾ, མ་ཧཱ་རཱ་ཛ, བྷ་ག་ཝ་ཏཱ དེ་ཝཱ་ཏི་དེ་ཝེ་ན ‘ཨ་ཎུ་མ་ཏྟེ་སུ ཝ་ཛྫེ་སུ བྷ་ཡ་ད་སྶཱ་ཝཱི ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སཱུ’ཏི.

པ་དུ་མ་ངྒ་པ་ཉྷོ དུ་ཏི་ཡོ.