༥༣༤. མ་ཧཱ་ཧཾ་ས་ཛཱ་ཏ་ཀཾ (༢)
༨༩. ‘‘ཨེ་ཏེ ཧཾ་སཱ པ་ཀྐ་མ་ནྟི, ཝ་ཀྐ་ངྒཱ བྷ་ཡ་མེ་རི་ཏཱ;
ཧ་རི་ཏྟ་ཙ ཧེ་མ་ཝ་ཎྞ, ཀཱ་མཾ སུ་མུ་ཁ པ་ཀྐ་མ.
༩༠. ‘‘ཨོ་ཧཱ་ཡ མཾ ཉཱ་ཏི་ག་ཎཱ, ཨེ་ཀཾ པཱ་ས་ཝ་སཾ ག་ཏཾ;
ཨ་ན་པེ་ཀྑ་མཱ་ནཱ ག་ཙྪ་ནྟི, ཀིཾ ཨེ་ཀོ ཨ་ཝ་ཧཱི་ཡ་སི.
༩༡. ‘‘པ་ཏེ་ཝ པ་ཏ་ཏཾ སེ་ཊྛ, ན་ཏྠི བ་དྡྷེ ས་ཧཱ་ཡ་ཏཱ;
མཱ ཨ་ནཱི་གྷཱ་ཡ ཧཱ་པེ་སི, ཀཱ་མཾ སུ་མུ་ཁ པ་ཀྐ་མ’’.
༩༢. ‘‘ནཱ་ཧཾ དུ་ཀྑ་པ་རེ་ཏོ་པི [དུ་ཀྑ་པ་རེ་ཏོ’’ཏི (ཛཱ. ༡.༡༥.༡༣༦) ཨ་ཊྛ་ཀ་ཐཱ་ཡོ ཨོ་ལོ་ཀེ་ཏ་བྦཱ], དྷ་ཏ་ར་ཊྛ ཏུ་ཝཾ [ཏ་ཝཾ (སཱི. པཱི.)] ཛ་ཧེ;
ཛཱི་ཝི་ཏཾ མ་ར་ཎཾ ཝཱ མེ, ཏ་ཡཱ ས་དྡྷིཾ བྷ་ཝི་སྶ་ཏི.
༩༣. ‘‘ནཱ་ཧཾ དུ་ཀྑ་པ་རེ་ཏོ་པི, དྷ་ཏ་ར་ཊྛ ཏུ་ཝཾ ཛ་ཧེ;
ན མཾ ཨ་ན་རི་ཡ་སཾ་ཡུ་ཏྟེ, ཀ་མྨེ ཡོ་ཛེ་ཏུ་མ་ར་ཧ་སི.
༩༤. ‘‘ས་ཀུ་མཱ་རོ ས་ཁཱ ཏྱ་སྨི, ས་ཙི་ཏྟེ ཙ་སྨི ཏེ [ས་མི་ཏེ (པཱི.), ཏྱ་སྨི ཏེ (ཀ.)] ཋི་ཏོ;
ཉཱ་ཏོ སེ་ནཱ་པ་ཏི ཏྱཱ་ཧཾ, ཧཾ་སཱ་ནཾ པ་ཝ་རུ་ཏྟ་མ.
༩༥. ‘‘ཀ་ཐཾ ཨ་ཧཾ ཝི་ཀ་ཏྠི་སྶཾ [ཝི་ཀ་ཏྟི་སྶཾ (པཱི.)], ཉཱ་ཏི་མ་ཛ྄ཛྷེ ཨི་ཏོ ག་ཏོ;
ཏཾ ཧི་ཏྭཱ པ་ཏ་ཏཾ སེ་ཊྛ, ཀིཾ ཏེ ཝ་ཀྑཱ་མི་ཏོ ག་ཏོ;
ཨི་དྷ པཱ་ཎཾ ཙ་ཛི་སྶཱ་མི, ནཱ་ན་རི་ཡཾ [ན ཨ་ན་རི་ཡཾ (པཱི.)] ཀ་ཏྟུ་མུ་སྶ་ཧེ’’.
༩༦. ‘‘ཨེ་སོ ཧི དྷ་མྨོ སུ་མུ་ཁ, ཡཾ ཏྭཾ ཨ་རི་ཡ་པ་ཐེ ཋི་ཏོ;
ཡོ བྷ་ཏྟཱ་རཾ ས་ཁཱ་རཾ མཾ, ན པ་རི་ཙྩ་ཏྟུ་མུ་སྶ་ཧེ.
༩༧. ‘‘ཏ་ཉྷི མེ པེ་ཀྑ་མཱ་ན་སྶ, བྷ་ཡཾ ན་ཏྭེ་ཝ ཛཱ་ཡ་ཏི;
ཨ་དྷི་ག་ཙྪ་སི ཏྭཾ མ་ཡ྄ཧཾ, ཨེ་ཝཾ བྷཱུ་ཏ་སྶ ཛཱི་ཝི་ཏཾ’’.
༩༨. ‘‘ཨི་ཙྩེ་ཝཾ [ཨི་ཙྩེ་ཝ (སཱི. པཱི.)] མ་ནྟ་ཡ་ནྟཱ་ནཾ, ཨ་རི་ཡཱ་ནཾ ཨ་རི་ཡ་ཝུ་ཏྟི་ནཾ;
ད་ཎྜ་མཱ་དཱ་ཡ ནེ་སཱ་དོ, ཨཱ་པ་ཏཱི [ཨཱ་པ་དཱི (ཀ.)] ཏུ་རི་ཏོ བྷུ་སཾ.
༩༩. ‘‘ཏ་མཱ་པ་ཏ་ནྟཾ དི་སྭཱ་ན, སུ་མུ་ཁོ ཨ་ཏི་བྲཱུ་ཧ་ཡི [ཨ་པ་རི་བྲཱུ་ཧ་ཡི (སཱི. པཱི.)];
ཨ་ཊྛཱ་སི པུ་ར་ཏོ ར་ཉྙོ, ཧཾ་སོ ཝི་སྶཱ་ས་ཡཾ བྱ་དྷཾ [བྱ་ཐཾ (སཱི. སྱཱ. པཱི.)].
༡༠༠. ‘‘མཱ བྷཱ་ཡི པ་ཏ་ཏཾ སེ་ཊྛ, ན ཧི བྷཱ་ཡ་ནྟི ཏཱ་དི་སཱ;
ཨ་ཧཾ ཡོ་གཾ པ་ཡུ་ཉྫི་སྶཾ, ཡུ་ཏྟཾ དྷ་མྨཱུ་པ་སཾ་ཧི་ཏཾ;
ཏེ་ན པ་རི་ཡཱ་པ་དཱ་ནེ་ན [པ་རི་ཡཱ་དཱ་ནེ་ན (ཀ.)], ཁི་པྤཾ པཱ་སཱ པ་མོ་ཀྑ་སི’’.
༡༠༡. ‘‘ཏ་སྶ ཏཾ ཝ་ཙ་ནཾ སུ་ཏྭཱ, སུ་མུ་ཁ་སྶ སུ་བྷཱ་སི་ཏཾ;
པ་ཧ་ཊྛ་ལོ་མོ ནེ་སཱ་དོ, ཨ་ཉྫ་ལི་སྶ པ་ཎཱ་མ་ཡི.
༡༠༢. ‘‘ན མེ སུ་ཏཾ ཝཱ དི་ཊྛཾ ཝཱ, བྷཱ་ས་ནྟོ མཱ་ནུ་སིཾ དི་ཛོ;
ཨ་རི་ཡཾ བྲུ་ཝཱ་ནོ [བྲཱུ་ཧ་ནྟོ (སྱཱ. ཀ.)] ཝ་ཀྐ་ངྒོ, ཙ་ཛ་ནྟོ མཱ་ནུ་སིཾ གི་རཾ.
༡༠༣. ‘‘ཀི་ནྣུ ཏཱ་ཡཾ དི་ཛོ ཧོ་ཏི, མུ་ཏྟོ བ་དྡྷཾ ཨུ་པཱ་ས་སི;
ཨོ་ཧཱ་ཡ ས་ཀུ་ཎཱ ཡ་ནྟི, ཀིཾ ཨེ་ཀོ ཨ་ཝ་ཧཱི་ཡ་སི’’.
༡༠༤. ‘‘རཱ་ཛཱ མེ སོ དི་ཛཱ་མི་ཏྟ, སེ་ནཱ་པ་ཙྩ་སྶ ཀཱ་ར་ཡིཾ;
ཏ་མཱ་པ་དེ པ་རི་ཙྩ་ཏྟུཾ, ནུ་སྶ་ཧེ ཝི་ཧ་གཱ་དྷི་པཾ.
༡༠༥. ‘‘མ་ཧཱ་ག་ཎཱ་ཡ བྷ་ཏྟཱ མེ, མཱ ཨེ་ཀོ བྱ་ས་ནཾ ཨ་གཱ;
ཏ་ཐཱ ཏཾ ས་མྨ ནེ་སཱ་ད, བྷ་ཏྟཱ་ཡཾ ཨ་བྷི་ཏོ ར་མེ’’.
༡༠༦. ‘‘ཨ་རི་ཡ་ཝ་ཏྟ་སི ཝ་ཀྐ་ངྒ, ཡོ པི་ཎྜ་མ་པ་ཙཱ་ཡ་སི;
ཙ་ཛཱ་མི ཏེ ཏཾ བྷ་ཏྟཱ་རཾ, ག་ཙྪ་ཐཱུ་བྷོ [ག་ཙྪ་ཏུ བྷོ (པཱི.)] ཡ་ཐཱ་སུ་ཁཾ’’.
༡༠༧. ‘‘ས་ཙེ ཨ་ཏྟ་པྤ་ཡོ་གེ་ན, ཨོ་ཧི་ཏོ ཧཾ་ས་པ་ཀྑི་ནཾ;
པ་ཊི་ག་ཎྷཱ་མ ཏེ ས་མྨ, ཨེ་ཏཾ ཨ་བྷ་ཡ་ད་ཀྑི་ཎཾ.
༡༠༨. ‘‘ནོ ཙེ ཨ་ཏྟ་པྤ་ཡོ་གེ་ན, ཨོ་ཧི་ཏོ ཧཾ་ས་པ་ཀྑི་ནཾ;
ཨ་ནི་སྶ་རོ མུ་ཉྩ་མ་མྷེ, ཐེ་ཡྻཾ ཀ་ཡི་རཱ་སི ལུ་དྡ་ཀ’’.
༡༠༩. ‘‘ཡ་སྶ ཏྭཾ བྷ་ཏ་ཀོ [བྷ་ཊ་ཀོ (ཀ.)] ར་ཉྙོ, ཀཱ་མཾ ཏ་སྶེ་ཝ པཱ་པ་ཡ;
ཏ་ཏྠ སཾ་ཡ་མ་ནོ [སཾ་ཡ་མཱ་ནོ (པཱི.)] རཱ་ཛཱ, ཡ་ཐཱ་བྷི་ཉྙཾ ཀ་རི་སྶ་ཏི’’.
༡༡༠. ‘‘ཨི་ཙྩེ་ཝཾ ཝུ་ཏྟོ ནེ་སཱ་དོ, ཧེ་མ་ཝ་ཎྞེ ཧ་རི་ཏྟ་ཙེ;
ཨུ་བྷོ ཧ་ཏྠེ་ཧི ས་ངྒ་ཡ྄ཧ [པ་གྒ་ཡ྄ཧ (སྱཱ. ཀ.)], པ་ཉྫ་རེ ཨ་ཛ྄ཛྷ་ཝོ་ད་ཧི.
༡༡༡. ‘‘ཏེ པ་ཉྫ་ར་ག་ཏེ པ་ཀྑཱི, ཨུ་བྷོ བྷ་སྶ་ར་ཝ་ཎྞི་ནེ;
སུ་མུ་ཁཾ དྷ་ཏ་ར་ཊྛ་ཉྩ, ལུ་དྡོ ཨཱ་དཱ་ཡ པ་ཀྐ་མི’’.
༡༡༢. ‘‘ཧ་རཱི་ཡ་མཱ་ནོ དྷ་ཏ་ར་ཊྛོ, སུ་མུ་ཁཾ ཨེ་ཏ་ད་བྲ་ཝི;
བཱ་ལ༹ྷཾ བྷཱ་ཡཱ་མི སུ་མུ་ཁ, སཱ་མཱ་ཡ ལ་ཀྑ་ཎཱུ་རུ་ཡཱ;
ཨ་སྨཱ་ཀཾ ཝ་དྷ་མ་ཉྙཱ་ཡ, ཨ་ཐ་ཏྟཱ་ནཾ ཝ་དྷི་སྶ་ཏི.
༡༡༣. ‘‘པཱ་ཀ་ཧཾ་སཱ ཙ སུ་མུ་ཁ, སུ་ཧེ་མཱ ཧེ་མ་སུ་ཏྟ་ཙཱ;
ཀོ་ཉྩཱི ས་མུ་དྡ་ཏཱི་རེ་ཝ, ཀ་པ་ཎཱ ནཱུ་ན རུ་ཙྪ་ཏི’’.
༡༡༤. ‘‘ཨེ་ཝཾ མ་ཧ་ནྟོ ལོ་ཀ་སྶ, ཨ་པྤ་མེ་ཡྻོ མ་ཧཱ་ག་ཎཱི;
ཨེ་ཀི་ཏྠི་མ་ནུ་སོ་ཙེ་ཡྻ, ན་ཡི་དཾ པ་ཉྙ་ཝ་ཏཱ་མི་ཝ.
༡༡༥. ‘‘ཝཱ་ཏོ་ཝ ག་ནྡྷ་མཱ་དེ་ཏི, ཨུ་བྷ་ཡཾ ཚེ་ཀ་པཱ་པ་ཀཾ;
བཱ་ལོ ཨཱ་མ་ཀ་པ་ཀྐཾ་ཝ, ལོ་ལོ ཨ་ནྡྷོ་ཝ ཨཱ་མི་སཾ.
༡༡༦. ‘‘ཨ་ཝི་ནི་ཙྪ་ཡ་ཉྙུ ཨ་ཏྠེ་སུ, མ་ནྡོ་ཝ པ་ཊི་བྷཱ་སི [པ་ཊི་བྷཱ་ཏི (ཀ.)] མཾ;
ཀི་ཙྩཱ་ཀི་ཙྩཾ ན ཛཱ་ནཱ་སི, ས་མྤ་ཏྟོ ཀཱ་ལ་པ་རི་ཡཱ་ཡཾ.
༡༡༧. ‘‘ཨ་ཌྜྷུ་མྨ་ཏྟོ ཨུ་དཱི་རེ་སི, ཡོ སེ་ཡྻཱ མ་ཉྙ་སི་ཏྠི་ཡོ;
བ་ཧུ་སཱ་དྷཱ་ར་ཎཱ ཧེ་ཏཱ, སོ་ཎྜཱ་ནཾ་ཝ སུ་རཱ་གྷ་རཾ.
༡༡༨. ‘‘མཱ་ཡཱ ཙེ་སཱ མ་རཱི་ཙཱི ཙ, སོ་ཀོ རོ་གོ ཙུ་པ་དྡ་ཝོ;
ཁ་རཱ ཙ བ་ནྡྷ་ནཱ ཙེ་ཏཱ, མ་ཙྩུ་པཱ་སཱ གུ་ཧཱ་ས་ཡཱ [པ་ཙྩུ་པཱ་སོ གུ་ཧཱ་ས་ཡོ (སཱི. པཱི.)];
ཏཱ་སུ ཡོ ཝི་སྶ་སེ པོ་སོ, སོ ན་རེ་སུ ན་རཱ་དྷ་མོ’’.
༡༡༩. ‘‘ཡཾ ཝུ་དྡྷེ་ཧི ཨུ་པ་ཉྙཱ་ཏཾ, ཀོ ཏཾ ནི་ནྡི་ཏུ་མ་ར་ཧ་ཏི;
མ་ཧཱ་བྷཱུ་ཏི་ཏྠི་ཡོ ནཱ་མ, ལོ་ཀ་སྨིཾ ཨུ་ད་པ་ཛྫི་སུཾ.
༡༢༠. ‘‘ཁི་ཌྜཱ པ་ཎི་ཧི་ཏཱ ཏྱཱ་སུ, ར་ཏི ཏྱཱ་སུ པ་ཏི་ཊྛི་ཏཱ;
བཱི་ཛཱ་ནི ཏྱཱ་སུ རཱུ་ཧ་ནྟི, ཡ་དི་དཾ ས་ཏྟཱ པ་ཛཱ་ཡ་རེ;
ཏཱ་སུ ཀོ ནི་བྦི་དེ [ནི་བྦི་ཛེ (ཀ.)] པོ་སོ, པཱ་ཎ་མཱ་ས་ཛྫ པཱ་ཎི་བྷི [པཱ་ཎ་ཧི (སཱི.)].
༡༢༡. ‘‘ཏྭ་མེ་ཝ ན་ཉྙོ སུ་མུ་ཁ, ཐཱི་ནཾ ཨ་ཏྠེ་སུ ཡུ་ཉྫ་སི;
ཏ་སྶ ཏྱ་ཛྫ བྷ་ཡེ ཛཱ་ཏེ, བྷཱི་ཏེ་ན ཛཱ་ཡ་ཏེ མ་ཏི.
༡༢༢. ‘‘ས་བྦོ ཧི སཾ་ས་ཡཾ པ་ཏྟོ, བྷ་ཡཾ བྷཱི་རུ ཏི་ཏི་ཀྑ་ཏི;
པ་ཎྜི་ཏཱ ཙ མ་ཧ་ནྟཱ་ནོ [མ་ཧ་ཏྟཱ་ནོ (སཱི.)], ཨ་ཏྠེ ཡུ་ཉྫ་ནྟི དུ་ཡྻུ་ཛེ.
༡༢༣. ‘‘ཨེ་ཏ་ད་ཏྠཱ་ཡ རཱ་ཛཱ་ནོ, སཱུ་ར་མི་ཙྪ་ནྟི མ་ནྟི་ནཾ;
པ་ཊི་བཱ་ཧ་ཏི ཡཾ སཱུ་རོ, ཨཱ་པ་དཾ ཨ་ཏྟ་པ་རི་ཡཱ་ཡཾ.
༡༢༤. ‘‘མཱ ནོ ཨ་ཛྫ ཝི་ཀ་ནྟིཾ་སུ, ར་ཉྙོ སཱུ་དཱ མ་ཧཱ་ན་སེ;
ཏ་ཐཱ ཧི ཝ་ཎྞོ པ་ཏྟཱ་ནཾ, ཕ་ལཾ ཝེ་ལུ༹ཾ་ཝ ཏཾ ཝ་དྷི.
༡༢༥. ‘‘མུ་ཏྟོ་པི ན ཨི་ཙྪི [ནི་ཙྪ་སི (ཀ.)] ཨུ་ཌྜེ་ཏུཾ [ཨོ་ཌྜེ་ཏུཾ (སཱི.)], ས་ཡཾ བ་ནྡྷཾ ཨུ་པཱ་ག་མི;
སོ་པ་ཛྫ སཾ་ས་ཡཾ པ་ཏྟོ, ཨ་ཏྠཾ ག་ཎྷཱ་ཧི མཱ མུ་ཁཾ’’.
༡༢༦. ‘‘སོ ཏཾ [ཏྭཾ (སྱཱ. པཱི.)] ཡོ་གཾ པ་ཡུ་ཉྫ་སྶུ, ཡུ་ཏྟཾ དྷ་མྨཱུ་པ་སཾ་ཧི་ཏཾ [དྷ་མྨོ་པ་ས་ཉྷི་ཏཾ (ཀ.)];
ཏ་ཝ པ་རི་ཡཱ་པ་དཱ་ནེ་ན, མ་མ པཱ་ཎེ་ས་ནཾ ཙ་ར’’.
༡༢༧. ‘‘མཱ བྷཱ་ཡི པ་ཏ་ཏཾ སེ་ཊྛ, ན ཧི བྷཱ་ཡ་ནྟི ཏཱ་དི་སཱ;
ཨ་ཧཾ ཡོ་གཾ པ་ཡུ་ཉྫི་སྶཾ, ཡུ་ཏྟཾ དྷ་མྨཱུ་པ་སཾ་ཧི་ཏཾ [དྷ་མྨོ་པ་ས་ཉྷི་ཏཾ (ཀ.)];
མ་མ པ་རི་ཡཱ་པ་དཱ་ནེ་ན, ཁི་པྤཾ པཱ་སཱ པ་མོ་ཀྑ་སི’’.
༡༢༨. ‘‘སོ [ས (སཱི.)] ལུ་དྡོ ཧཾ་ས་ཀཱ་ཛེ་ན [ཧཾ་ས་ཀཱ་ཙེ་ན (པཱི.)], རཱ་ཛ་དྭཱ་རཾ ཨུ་པཱ་ག་མི;
པ་ཊི་ཝེ་དེ་ཐ མཾ ར་ཉྙོ, དྷ་ཏ་ར་ཊྛཱ་ཡ་མཱ་ག་ཏོ’’.
༡༢༩. ‘‘ཏེ དི་སྭཱ པུ་ཉྙ་སཾ་ཀཱ་སེ, ཨུ་བྷོ ལ་ཀྑ་ཎ་ས་མྨ་ཏེ [ལ་ཀྑ་ཉྙཱ་ས་མྨ་ཏེ (སཱི. པཱི.)];
ཁ་ལུ སཾ་ཡ་མ་ནོ རཱ་ཛཱ, ཨ་མ་ཙྩེ ཨ་ཛ྄ཛྷ་བྷཱ་ས་ཐ.
༡༣༠. ‘‘དེ་ཐ ལུ་དྡ་སྶ ཝ་ཏྠཱ་ནི, ཨ་ནྣཾ པཱ་ན་ཉྩ བྷོ་ཛ་ནཾ;
ཀཱ་མཾ ཀ་རོ ཧི་ར་ཉྙ་སྶ, ཡཱ་ཝ་ནྟོ ཨེ་ས ཨི་ཙྪ་ཏི’’.
༡༣༡. ‘‘དི་སྭཱ ལུ་དྡཾ པ་ས་ནྣ་ཏྟཾ, ཀཱ་སི་རཱ་ཛཱ ཏ་ད་བྲ་ཝི;
ཡ་དྱཱ་ཡཾ [ཡ་དཱ་ཡཾ (སཱི. སྱཱ. པཱི.)] ས་མྨ ཁེ་མ་ཀ, པུ་ཎྞཱ ཧཾ་སེ་ཧི ཏི་ཊྛ་ཏི.
༡༣༢. ‘‘ཀ་ཐཾ རུ་ཙི་མ་ཛ྄ཛྷ་ག་ཏཾ, པཱ་ས་ཧ་ཏྠོ ཨུ་པཱ་ག་མི;
ཨོ་ཀི་ཎྞཾ ཉཱ་ཏི་ས་ངྒྷེ་ཧི, ནི་མྨ་ཛ྄ཛྷི་མཾ [ནི་མ་ཛ྄ཛྷི་མཾ (སཱི. པཱི. ཀ.)] ཀ་ཐཾ ག་ཧི’’.
༡༣༣. ‘‘ཨ་ཛྫ མེ ས་ཏྟ་མཱ ར་ཏྟི, ཨ་ད་ནཱ་ནི [ཨཱ་དཱ་ནཱ་ནི (སྱཱ. པཱི. ཀ.)] ཨུ་པཱ་ས་ཏོ [ཨུ་པཱ་ག་ཏོ (ཀ.)];
པ་ད་མེ་ཏ་སྶ ཨ་ནྭེ་སཾ, ཨ་པྤ་མ་ཏྟོ གྷ་ཊ་སྶི་ཏོ.
༡༣༤. ‘‘ཨ་ཐ་སྶ པ་ད་མ་དྡ་ཀྑིཾ, ཙ་ར་ཏོ ཨ་ད་ནེ་ས་ནཾ;
ཏ་ཏྠཱ་ཧཾ ཨོ་ད་ཧིཾ པཱ་སཾ, ཨེ་ཝཾ ཏཾ [ཨེ་ཝེ་ཏཾ (སཱི. པཱི.)] དི་ཛ་མ་གྒ་ཧིཾ’’.
༡༣༥. ‘‘ལུ་དྡ དྭེ ཨི་མེ ས་ཀུ་ཎཱ, ཨ་ཐ ཨེ་ཀོ་ཏི བྷཱ་ས་སི;
ཙི་ཏྟཾ ནུ ཏེ ཝི་པ་རི་ཡ་ཏྟཾ [ཝི་པ་རི་ཡ་ཏྠཾ (པཱི.)], ཨ་དུ ཀི་ནྣུ ཛི་གཱི་ས་སི’’ [ཛི་གིཾ་ས་སི (སཱི. པཱི.)].
༡༣༦. ‘‘ཡ་སྶ ལོ་ཧི་ཏ་ཀཱ ཏཱ་ལཱ, ཏ་པ་ནཱི་ཡ་ནི་བྷཱ སུ་བྷཱ;
ཨུ་རཾ སཾ་ཧ་ཙྩ ཏི་ཊྛ་ནྟི, སོ མེ བ་ནྡྷཾ ཨུ་པཱ་ག་མི.
༡༣༧. ‘‘ཨ་ཐཱ་ཡཾ བྷ་སྶ་རོ པ་ཀྑཱི, ཨ་བ་དྡྷོ བ་དྡྷ་མཱ་ཏུ་རཾ;
ཨ་རི་ཡཾ བྲུ་ཝཱ་ནོ ཨ་ཊྛཱ་སི, ཙ་ཛ་ནྟོ མཱ་ནུ་སིཾ གི་རཾ’’.
༡༣༨. ‘‘ཨ་ཐ ཀིཾ [ཨ་ཐ ཀི་ནྣུ (སཱི. པཱི.), ཀ་ཐཾ ནུ (སྱཱ.)] དཱ་ནི སུ་མུ་ཁ, ཧ་ནུཾ སཾ་ཧ་ཙྩ ཏི་ཊྛ་སི;
ཨ་དུ མེ པ་རི་སཾ པ་ཏྟོ, བྷ་ཡཱ བྷཱི་ཏོ ན བྷཱ་ས་སི’’.
༡༣༩. ‘‘ནཱ་ཧཾ ཀཱ་སི་པ་ཏི བྷཱི་ཏོ, ཨོ་ག་ཡ྄ཧ པ་རི་སཾ ཏ་ཝ;
ནཱ་ཧཾ བྷ་ཡཱ ན བྷཱ་སི་སྶཾ, ཝཱ་ཀྱཾ ཨ་ཏྠ་མྷི ཏཱ་དི་སེ’’.
༡༤༠. ‘‘ན ཏེ ཨ་བྷི་ས་རཾ པ་སྶེ, ན ར་ཐེ ན་པི པ་ཏྟི་ཀེ;
ནཱ་སྶ ཙ་མྨཾ ཝ ཀཱི་ཊཾ ཝཱ, ཝ་མྨི་ཏེ ཙ དྷ་ནུ་གྒ་ཧེ.
༡༤༡. ‘‘ན ཧི་ར་ཉྙཾ སུ་ཝ་ཎྞཾ ཝཱ, ན་ག་རཾ ཝཱ སུ་མཱ་པི་ཏཾ;
ཨོ་ཀི་ཎྞ་པ་རི་ཁཾ དུ་གྒཾ, ད་ལ༹ྷ་མ་ཊྚཱ་ལ་ཀོ་ཊྛ་ཀཾ;
ཡ་ཏྠ པ་ཝི་ཊྛོ སུ་མུ་ཁ, བྷཱ་ཡི་ཏ་བྦཾ ན བྷཱ་ཡ་སི’’.
༡༤༢. ‘‘ན མེ ཨ་བྷི་ས་རེ་ན་ཏྠོ, ན་ག་རེ་ན དྷ་ནེ་ན ཝཱ;
ཨ་པ་ཐེ་ན པ་ཐཾ ཡཱ་མ, ཨ་ནྟ་ལི་ཀྑེ་ཙ་རཱ མ་ཡཾ.
༡༤༣. ‘‘སུ་ཏཱ ཙ པ་ཎྜི་ཏཱ ཏྱ་མྷཱ, ནི་པུ་ཎཱ ཨ་ཏྠ་ཙི་ནྟ་ཀཱ [ཙ་ཏྠ་ཙི་ནྟ་ཀཱ (ཀ.)];
བྷཱ་སེ་མ་ཏྠ་ཝ་ཏིཾ ཝཱ་ཙཾ, ས་ཙྩེ ཙ་སྶ པ་ཏི་ཊྛི་ཏོ.
༡༤༤. ‘‘ཀི་ཉྩ ཏུ་ཡ྄ཧཾ ཨ་ས་ཙྩ་སྶ, ཨ་ན་རི་ཡ་སྶ ཀ་རི་སྶ་ཏི;
མུ་སཱ་ཝཱ་དི་སྶ ལུ་དྡ་སྶ, བྷ་ཎི་ཏ་མྤི སུ་བྷཱ་སི་ཏཾ’’.
༡༤༥. ‘‘ཏཾ བྲཱ་ཧྨ་ཎཱ་ནཾ ཝ་ཙ་ནཱ, ཨི་མཾ ཁེ་མ་མ་ཀཱ་ར་ཡི [ཁེ་མི་ཀཱ་ར་ཡི (སཱི. པཱི.)];
ཨ་བྷ་ཡ་ཉྩ ཏ་ཡཱ གྷུ་ཊྛཾ, ཨི་མཱ་ཡོ ད་ས་དྷཱ དི་སཱ.
༡༤༦. ‘‘ཨོ་ག་ཡ྄ཧ ཏེ པོ་ཀྑ་ར་ཎིཾ, ཝི་པྤ་ས་ནྣོ་ད་ཀཾ སུ་ཙིཾ;
པ་ཧཱུ་ཏཾ ཙཱ་ད་ནཾ ཏ་ཏྠ, ཨ་ཧིཾ་སཱ ཙེ་ཏྠ པ་ཀྑི་ནཾ.
༡༤༧. ‘‘ཨི་དཾ སུ་ཏྭཱ་ན ནི་གྒྷོ་སཾ, ཨཱ་ག་ཏ་མྷ ཏ་ཝ་ནྟི་ཀེ;
ཏེ ཏེ བ་ནྡྷ་སྨ པཱ་སེ་ན, ཨེ་ཏཾ ཏེ བྷཱ་སི་ཏཾ མུ་སཱ.
༡༤༨. ‘‘མུ་སཱ་ཝཱ་དཾ པུ་ར་ཀྑ་ཏྭཱ, ཨི་ཙྪཱ་ལོ་བྷ་ཉྩ པཱ་པ་ཀཾ;
ཨུ་བྷོ ས་ནྡྷི་མ་ཏི་ཀྐ་མྨ, ཨ་སཱ་ཏཾ ཨུ་པ་པ་ཛྫ་ཏི’’.
༡༤༩. ‘‘ནཱ་པ་ར་ཛ྄ཛྷཱ་མ སུ་མུ་ཁ, ན་པི ལོ་བྷཱ་ཝ མ་གྒ་ཧིཾ;
སུ་ཏཱ ཙ པ་ཎྜི་ཏཱ་ཏྱ་ཏྠ, ནི་པུ་ཎཱ ཨ་ཏྠ་ཙི་ནྟ་ཀཱ.
༡༥༠. ‘‘ཨ་པྤེ་ཝ་ཏྠ་ཝ་ཏིཾ ཝཱ་ཙཾ, བྱཱ་ཧ་རེ་ཡྻུཾ [བྱཱ་ཀ་རེ་ཡྻུཾ (སཱི. པཱི.)] ཨི་དྷཱ་ག་ཏཱ;
ཏ་ཐཱ ཏཾ ས་མྨ ནེ་སཱ་དོ, ཝུ་ཏྟོ སུ་མུ་ཁ མ་གྒ་ཧི’’.
༡༥༡. ‘‘ནེ་ཝ བྷཱི་ཏཱ [བྷཱུ་ཏཱ (སྱཱ. ཀ.)] ཀཱ་སི་པ་ཏི, ཨུ་པ་ནཱི་ཏ་སྨི ཛཱི་ཝི་ཏེ;
བྷཱ་སེ་མ་ཏྠ་ཝ་ཏིཾ ཝཱ་ཙཾ, ས་མྤ་ཏྟཱ ཀཱ་ལ་པ་རི་ཡཱ་ཡཾ.
༡༥༢. ‘‘ཡོ མི་གེ་ན མི་གཾ ཧ་ནྟི, པ་ཀྑིཾ ཝཱ པ་ན པ་ཀྑི་ནཱ;
སུ་ཏེ་ན ཝཱ སུ་ཏཾ ཀི་ཎྱཱ [ཀི་ཎེ (སཱི. པཱི.)], ཀིཾ ཨ་ན་རི་ཡ་ཏ་རཾ ཏ་ཏོ.
༡༥༣. ‘‘ཡོ ཙཱ་རི་ཡ་རུ་དཾ [ཙ ཨ་རི་ཡ་རུ་དཾ (སཱི. པཱི.)] བྷཱ་སེ, ཨ་ན་རི་ཡ་དྷ་མྨ་ཝ་སྶི་ཏོ [ཨ་ན་རི་ཡ་དྷ་མྨ་མ་ཝ་སྶི་ཏོ (སཱི.)];
ཨུ་བྷོ སོ དྷཾ་ས་ཏེ ལོ་ཀཱ, ཨི་དྷ ཙེ་ཝ པ་ར་ཏྠ ཙ.
༡༥༤. ‘‘ན མ་ཛྫེ་ཐ ཡ་སཾ པ་ཏྟོ, ན བྱཱ་དྷེ [བྱ་ཐེ (སཱི. པཱི.)] པ་ཏྟ་སཾ་ས་ཡཾ;
ཝཱ་ཡ་མེ་ཐེ་ཝ ཀི་ཙྩེ་སུ, སཾ་ཝ་རེ ཝི་ཝ་རཱ་ནི ཙ.
༡༥༥. ‘‘ཡེ ཝུ་དྡྷཱ ཨ་བྦྷ་ཏི་ཀྐ་ནྟཱ [ནཱ་བྦྷ་ཙི་ཀྑ་ནྟཱ (ཀ.)], ས་མྤ་ཏྟཱ ཀཱ་ལ་པ་རི་ཡཱ་ཡཾ;
ཨི་དྷ དྷ་མྨཾ ཙ་རི་ཏྭཱ་ན, ཨེ་ཝཾ་ཏེ [ཨེ་ཝེ་ཏེ (སཱི. པཱི.)] ཏི་དི་ཝཾ ག་ཏཱ.
༡༥༦. ‘‘ཨི་དཾ སུ་ཏྭཱ ཀཱ་སི་པ་ཏི, དྷ་མྨ་མ་ཏྟ་ནི པཱ་ལ་ཡ;
དྷ་ཏ་ར་ཊྛ་ཉྩ མུ་ཉྩཱ་ཧི, ཧཾ་སཱ་ནཾ པ་ཝ་རུ་ཏྟ་མཾ’’.
༡༥༧. ‘‘ཨཱ་ཧ་ར་ནྟུ་ད་ཀཾ པ་ཛྫཾ, ཨཱ་ས་ན་ཉྩ མ་ཧཱ་ར་ཧཾ;
པ་ཉྫ་ར་ཏོ པ་མོ་ཀྑཱ་མི, དྷ་ཏ་ར་ཊྛཾ ཡ་ས་སྶི་ནཾ.
༡༥༨. ‘‘ཏ་ཉྩ སེ་ནཱ་པ་ཏིཾ དྷཱི་རཾ, ནི་པུ་ཎཾ ཨ་ཏྠ་ཙི་ནྟ་ཀཾ;
ཡོ སུ་ཁེ སུ་ཁི་ཏོ ར་ཉྙེ [ར་ཉྙོ (སཱི. སྱཱ. པཱི. ཀ.)], དུ་ཀྑི་ཏེ ཧོ་ཏི དུ་ཀྑི་ཏོ.
༡༥༩. ‘‘ཨེ་དི་སོ ཁོ ཨ་ར་ཧ་ཏི, པི་ཎྜ་མ་སྣཱ་ཏུ བྷ་ཏྟུ་ནོ;
ཡ་ཐཱ་ཡཾ སུ་མུ་ཁོ ར་ཉྙོ, པཱ་ཎ་སཱ་དྷཱ་ར་ཎོ ས་ཁཱ’’.