༡༥༩. མོ་ར་ཛཱ་ཏ་ཀཾ (༢-༡-༩)
༡༧. ཨུ་དེ་ཏ་ཡཾ ཙ་ཀྑུ་མཱ ཨེ་ཀ་རཱ་ཛཱ, ཧ་རི་སྶ་ཝ་ཎྞོ པ་ཐ་ཝི་པྤ་བྷཱ་སོ [པ་ཋ་ཝི་པྤ་བྷཱ་སོ (སཱི. སྱཱ. པཱི.)];
ཏཾ ཏཾ ན་མ་སྶཱ་མི ཧ་རི་སྶ་ཝ་ཎྞཾ པ་ཐ་ཝི་པྤ་བྷཱ་སཾ, ཏ་ཡཱ་ཛྫ གུ་ཏྟཱ ཝི་ཧ་རེ་མུ དི་ཝ་སཾ.
ཡེ བྲཱ་ཧྨ་ཎཱ ཝེ་ད་གཱུ ས་བྦ་དྷ་མྨེ, ཏེ མེ ན་མོ ཏེ ཙ མཾ པཱ་ལ་ཡ་ནྟུ;
ན་མ་ཏྠུ བུ་དྡྷཱ་ནཾ [བུ་དྡྷཱ་ན (?)] ན་མ་ཏྠུ བོ་དྷི་ཡཱ, ན་མོ ཝི་མུ་ཏྟཱ་ནཾ [ཝི་མུ་ཏྟཱ་ན (?)] ན་མོ ཝི་མུ་ཏྟི་ཡཱ;
ཨི་མཾ སོ པ་རི་ཏྟཾ ཀ་ཏྭཱ, མོ་རོ ཙ་ར་ཏི ཨེ་ས་ནཱ.
༡༨. ཨ་པེ་ཏ་ཡཾ ཙ་ཀྑུ་མཱ ཨེ་ཀ་རཱ་ཛཱ, ཧ་རི་སྶ་ཝ་ཎྞོ པ་ཐ་ཝི་པྤ་བྷཱ་སོ;
ཏཾ ཏཾ ན་མྨ་སྶཱ་མི ཧ་རི་སྶ་ཝ་ཎྞཾ པ་ཐ་ཝི་པྤ་བྷཱ་སཾ, ཏ་ཡཱ་ཛྫ གུ་ཏྟཱ ཝི་ཧ་རེ་མུ ར་ཏྟིཾ.
ཡེ བྲཱ་ཧྨ་ཎཱ ཝེ་ད་གཱུ ས་བྦ་དྷ་མྨེ, ཏེ མེ ན་མོ ཏེ ཙ མཾ པཱ་ལ་ཡ་ནྟུ;
ན་མ་ཏྠུ བུ་དྡྷཱ་ནཾ ན་མ་ཏྠུ བོ་དྷི་ཡཱ, ན་མོ ཝི་མུ་ཏྟཱ་ནཾ ན་མོ ཝི་མུ་ཏྟི་ཡཱ;
ཨི་མཾ སོ པ་རི་ཏྟཾ ཀ་ཏྭཱ, མོ་རོ ཝཱ་ས་མ་ཀ་པྤ་ཡཱི་ཏི.
མོ་ར་ཛཱ་ཏ་ཀཾ ན་ཝ་མཾ.