༥༢༢. ས་ར་བྷ་ངྒ་ཛཱ་ཏ་ཀཾ (༢)
༥༠. ‘‘ཨ་ལ་ངྐ་ཏཱ ཀུ་ཎྜ་ལི་ནོ སུ་ཝ་ཏྠཱ, ཝེ་ལུ༹་རི་ཡ་མུ་ཏྟཱ་ཐ་རུ་ཁ་གྒ་བ་ནྡྷཱ [བ་དྡྷཱ (པཱི.)];
ར་ཐེ་ས་བྷཱ ཏི་ཊྛ་ཐ ཀེ ནུ ཏུ་མྷེ, ཀ་ཐཾ ཝོ ཛཱ་ན་ནྟི མ་ནུ་སྶ་ལོ་ཀེ’’.
༥༡. ‘‘ཨ་ཧ་མ་ཊྛ་ཀོ བྷཱི་མ་ར་ཐོ པ་ནཱ་ཡཾ, ཀཱ་ལི་ངྒ་རཱ་ཛཱ པ་ན ཨུ་གྒ་ཏོ་ཡཾ [ཨུ་གྒ་ཏོ ཨ་ཡཾ (པཱི.), ཨུ་གྒ་ཏཱ་ཡཾ (ཀ.)];
སུ་ས་ཉྙ་ཏཱ་ནཾ ཨི་སཱི་ནཾ [སུ་ས་ཉྙ་ཏཱ་ནི་སི་ནཾ (པཱི.)] ད་སྶ་ནཱ་ཡ, ཨི་དྷཱ་ག་ཏཱ པུ་ཙྪི་ཏཱ་ཡེ་མྷ པ་ཉྷེ’’.
༥༢. ‘‘ཝེ་ཧཱ་ཡ་སཾ ཏི་ཊྛ་སི [ཏི་ཊྛ་ཏི (པཱི.)] ཨ་ནྟ་ལི་ཀྑེ, པ་ཐ་དྡྷུ་ནོ པ་ནྣ་ར་སེ་ཝ ཙ་ནྡོ;
པུ་ཙྪཱ་མི ཏཾ ཡ་ཀྑ མ་ཧཱ་ནུ་བྷཱ་ཝ, ཀ་ཐཾ ཏཾ ཛཱ་ན་ནྟི མ་ནུ་སྶ་ལོ་ཀེ’’.
༥༣. ‘‘ཡ་མཱ་ཧུ དེ་ཝེ་སུ སུ་ཛ་མྤ་ཏཱི་ཏི, མ་གྷ་ཝཱ་ཏི ཏཾ ཨཱ་ཧུ མ་ནུ་སྶ་ལོ་ཀེ;
ས དེ་ཝ་རཱ་ཛཱ ཨི་ད་མ་ཛྫ པ་ཏྟོ, སུ་ས་ཉྙ་ཏཱ་ནཾ ཨི་སཱི་ནཾ ད་སྶ་ནཱ་ཡ’’.
༥༤. ‘‘དཱུ་རེ སུ་ཏཱ ནོ ཨི་ས་ཡོ ས་མཱ་ག་ཏཱ, མ་ཧི་དྡྷི་ཀཱ ཨི་དྡྷི་གུ་ཎཱུ་པ་པ་ནྣཱ;
ཝ་ནྡཱ་མི ཏེ ཨ་ཡི་རེ པ་ས་ནྣ་ཙི་ཏྟོ, ཡེ ཛཱི་ཝ་ལོ་ཀེ་ཏྠ མ་ནུ་སྶ་སེ་ཊྛཱ’’.
༥༥. ག་ནྡྷོ ཨི་སཱི་ནཾ ཙི་ར་དི་ཀྑི་ཏཱ་ནཾ [ད་ཀྑི་ཏཱ་ནཾ (སྱཱ. པཱི.)], ཀཱ་ཡཱ ཙུ་ཏོ ག་ཙྪ་ཏི མཱ་ལུ་ཏེ་ན;
ཨི་ཏོ པ་ཊི་ཀྐ་མྨ ས་ཧ་སྶ་ནེ་ཏྟ, ག་ནྡྷོ ཨི་སཱི་ནཾ ཨ་སུ་ཙི དེ་ཝ་རཱ་ཛ’’.
༥༦. ‘‘ག་ནྡྷོ ཨི་སཱི་ནཾ ཙི་ར་དི་ཀྑི་ཏཱ་ནཾ, ཀཱ་ཡཱ ཙུ་ཏོ ག་ཙྪ་ཏུ མཱ་ལུ་ཏེ་ན;
ཝི་ཙི་ཏྲ་པུ་པྥཾ སུ་ར་བྷིཾ་ཝ མཱ་ལཾ, ག་ནྡྷ་ཉྩ ཨེ་ཏཾ པཱ་ཊི་ཀ་ངྑཱ་མ བྷ་ནྟེ;
ན ཧེ་ཏྠ དེ་ཝཱ པ་ཊི་ཀྐཱུ་ལ་ས་ཉྙི་ནོ’’.
༥༧. ‘‘པུ་རི་ནྡ་དོ བྷཱུ་ཏ་པ་ཏཱི ཡ་ས་སྶཱི, དེ་ཝཱ་ན་མི་ནྡོ ས་ཀྐོ [ཨི་དཾ པ་དཾ ན་ཏྠི (སཱི. སྱཱ. པཱི. པོ་ཏྠ་ཀེ་སུ)] མ་གྷ་ཝཱ སུ་ཛ་མྤ་ཏི;
ས དེ་ཝ་རཱ་ཛཱ ཨ་སུ་ར་ག་ཎ་པྤ་མ་དྡ་ནོ, ཨོ་ཀཱ་ས་མཱ་ཀ་ངྑ་ཏི པ་ཉྷ པུ་ཙྪི་ཏུཾ.
༥༨. ‘‘ཀོ ནེ་ཝི་མེ་སཾ ཨི་དྷ པ་ཎྜི་ཏཱ་ནཾ, པ་ཉྷེ པུ་ཊྛོ ནི་པུ་ཎེ བྱཱ་ཀ་རི་སྶ་ཏི;
ཏི་ཎྞ་ཉྩ ར་ཉྙཾ མ་ནུ་ཛཱ་དྷི་པཱ་ནཾ, དེ་ཝཱ་ན་མི་ནྡ་སྶ ཙ ཝཱ་ས་ཝ་སྶ’’.
༥༩. ‘‘ཨ་ཡཾ ཨི་སི [ཨི་སཱི (སཱི. པཱི.)] ས་ར་བྷ་ངྒོ ཏ་པ་སྶཱི [ཡ་ས་སྶཱི (སཱི.)], ཡ་ཏོ ཛཱ་ཏོ ཝི་ར་ཏོ མེ་ཐུ་ན་སྨཱ;
ཨཱ་ཙེ་ར་པུ་ཏྟོ [ཨཱ་ཙ་རི་ཡ་པུ་ཏྟོ (པཱི. ཀ.)] སུ་ཝི་ནཱི་ཏ་རཱུ་པོ, སོ ནེ་སཾ པ་ཉྷཱ་ནི ཝི་ཡཱ་ཀ་རི་སྶ་ཏི’’.
༦༠. ‘‘ཀོ་ཎྜ་ཉྙ པ་ཉྷཱ་ནི ཝི་ཡཱ་ཀ་རོ་ཧི, ཡཱ་ཙ་ནྟི ཏཾ ཨི་ས་ཡོ སཱ་དྷུ་རཱུ་པཱ;
ཀོ་ཎྜ་ཉྙ ཨེ་སོ མ་ནུ་ཛེ་སུ དྷ་མྨོ, ཡཾ ཝུ་དྡྷ [ཝ་དྡྷ (པཱི.), བུ་དྡྷ (ཀ.)] མཱ་ག་ཙྪ་ཏི ཨེ་ས བྷཱ་རོ’’.
༦༡. ‘‘ཀ་ཏཱ་ཝ་ཀཱ་སཱ པུ་ཙྪ་ནྟུ བྷོ་ནྟོ, ཡཾ ཀི་ཉྩི པ་ཉྷཾ མ་ན་སཱ་བྷི་པ་ཏྠི་ཏཾ;
ཨ་ཧ་ཉྷི ཏཾ ཏཾ ཝོ ཝི་ཡཱ་ཀ་རི་སྶཾ, ཉ་ཏྭཱ ས་ཡཾ ལོ་ཀ་མི་མཾ པ་ར་ཉྩ’’.
༦༢. ‘‘ཏ་ཏོ ཙ མ་གྷ་ཝཱ ས་ཀྐོ, ཨ་ཏྠ་ད་སྶཱི པུ་རི་ནྡ་དོ;
ཨ་པུ་ཙྪི པ་ཋ་མཾ པ་ཉྷཾ, ཡ་ཉྩཱ་སི ཨ་བྷི་པ་ཏྠི་ཏཾ’’.
༦༣. ‘‘ཀིཾ སཱུ ཝ་དྷི་ཏྭཱ ན ཀ་དཱ་ཙི སོ་ཙ་ཏི, ཀི་སྶ་པྤ་ཧཱ་ནཾ ཨི་ས་ཡོ ཝ་ཎྞ་ཡ་ནྟི;
ཀ་སྶཱི་དྷ ཝུ་ཏྟཾ ཕ་རུ་སཾ ཁ་མེ་ཐ, ཨ་ཀྑཱ་ཧི མེ ཀོ་ཎྜ་ཉྙ ཨེ་ཏ་མ་ཏྠཾ’’.
༦༤. ‘‘ཀོ་དྷཾ ཝ་དྷི་ཏྭཱ ན ཀ་དཱ་ཙི སོ་ཙ་ཏི, མ་ཀྑ་པྤ་ཧཱ་ནཾ ཨི་ས་ཡོ ཝ་ཎྞ་ཡ་ནྟི;
ས་བྦེ་སཾ ཝུ་ཏྟཾ ཕ་རུ་སཾ ཁ་མེ་ཐ, ཨེ་ཏཾ ཁ་ནྟིཾ ཨུ་ཏྟ་མ་མཱ་ཧུ ས་ནྟོ’’.
༦༥. ‘‘ས་ཀྐཱ ཨུ་བྷི་ནྣཾ [ཧི དྭི་ནྣཾ (པཱི.)] ཝ་ཙ་ནཾ ཏི་ཏི་ཀྑི་ཏུཾ, ས་དི་ས་སྶ ཝཱ སེ་ཊྛ་ཏ་ར་སྶ [སེ་ཊྛ་ན་ར་སྶ (པཱི.)] ཝཱ་པི;
ཀ་ཐཾ ནུ ཧཱི་ན་སྶ ཝ་ཙོ ཁ་མེ་ཐ, ཨ་ཀྑཱ་ཧི མེ ཀོ་ཎྜ་ཉྙ ཨེ་ཏ་མ་ཏྠཾ’’.
༦༦. ‘‘བྷ་ཡཱ ཧི སེ་ཊྛ་སྶ ཝ་ཙོ ཁ་མེ་ཐ, སཱ་ར་མྦྷ་ཧེ་ཏཱུ པ་ན སཱ་དི་ས་སྶ;
ཡོ ཙཱི་དྷ ཧཱི་ན་སྶ ཝ་ཙོ ཁ་མེ་ཐ, ཨེ་ཏཾ ཁ་ནྟིཾ ཨུ་ཏྟ་མ་མཱ་ཧུ ས་ནྟོ’’.
༦༧. ‘‘ཀ་ཐཾ ཝི་ཛ་ཉྙཱ ཙ་ཏུ་པ་ཏྠ་རཱུ་པཾ [ཙ་ཏུ་མ་ཊྛ་རཱུ་པཾ (སྱཱ. པཱི.)], སེ་ཊྛཾ ས་རི་ཀྑཾ ཨ་ཐ་ཝཱ་པི ཧཱི་ནཾ;
ཝི་རཱུ་པ་རཱུ་པེ་ན ཙ་ར་ནྟི ས་ནྟོ, ཏ་སྨཱ ཧི ས་བྦེ་སཾ ཝ་ཙོ ཁ་མེ་ཐ’’.
༦༨. ‘‘ན ཧེ་ཏ་མ་ཏྠཾ མ་ཧ་ཏཱི་པི སེ་ནཱ, ས་རཱ་ཛི་ཀཱ ཡུ་ཛ྄ཛྷ་མཱ་ནཱ ལ་བྷེ་ཐ;
ཡཾ ཁ་ནྟི་མཱ ས་པྤུ་རི་སོ ལ་བྷེ་ཐ, ཁ་ནྟཱི བ་ལ་སྶཱུ་པ་ས་མ་ནྟི ཝེ་རཱ’’.
༦༩. ‘‘སུ་བྷཱ་སི་ཏཾ ཏེ ཨ་ནུ་མོ་དི་ཡཱ་ན, ཨ་ཉྙཾ ཏཾ པུ་ཙྪཱ་མི ཏ་དི་ངྒྷ བྲཱུ་ཧི;
ཡ་ཐཱ ཨ་ཧུཾ [ཨ་ཧཱུ (སཱི. སྱཱ. པཱི.)] ད་ཎྜ་ཀཱི ནཱ་ལི༹་ཀེ་རོ [ནཱ་ལི༹་ཀཱི་རོ (སཱི. སྱཱ. པཱི.)], ཨ་ཐ་ཛྫུ་ནོ ཀ་ལཱ་བུ ཙཱ་པི རཱ་ཛཱ;
ཏེ་སཾ ག་ཏིཾ བྲཱུ་ཧི སུ་པཱ་པ་ཀ་མྨི་ནཾ, ཀ་ཏྠཱུ་པ་པ་ནྣཱ ཨི་སི་ནཾ ཝི་ཧེ་ཋ་ཀཱ’’.
༧༠. ‘‘ཀི་ས་ཉྷི [ཀི་སཾ་པི (པཱི.)] ཝ་ཙྪཾ ཨ་ཝ་ཀི་རི་ཡ ད་ཎྜ་ཀཱི, ཨུ་ཙྪི་ནྣ་མཱུ་ལོ ས་ཛ་ནོ ས་ར་ཊྛོ;
ཀུ་ཀྐུ་ལ༹་ནཱ་མེ ནི་ར་ཡ་མྷི པ་ཙྩ་ཏི, ཏ་སྶ ཕུ་ལི་ངྒཱ་ནི པ་ཏ་ནྟི ཀཱ་ཡེ.
༧༡. ‘‘ཡོ ས་ཉྙ་ཏེ པ་བྦ་ཛི་ཏེ ཨ་ཧེ་ཋ་ཡི [ཨ་ཝ་ཉྩ་སི (པཱི.)], དྷ་མྨཾ བྷ་ཎ་ནྟེ ས་མ་ཎེ ཨ་དཱུ་ས་ཀེ;
ཏཾ ནཱ་ལི༹་ཀེ་རཾ སུ་ན་ཁཱ པ་ར་ཏྠ, ས་ངྒ་མྨ ཁཱ་ད་ནྟི ཝི་ཕ་ནྡ་མཱ་ནཾ.
༧༢. ‘‘ཨ་ཐ་ཛྫུ་ནོ ནི་ར་ཡེ ས་ཏྟི་སཱུ་ལེ, ཨ་ཝཾ་སི་རོ པ་ཏི་ཏོ ཨུ་དྡྷཾ་པཱ་དོ [ཨུ་དྡྷ་པཱ་དོ (སྱཱ.), ཨ་དྡྷ་པཱ་དོ (པཱི.)];
ཨ་ངྒཱི་ར་སཾ གོ་ཏ་མཾ ཧེ་ཋ་ཡི་ཏྭཱ, ཁ་ནྟིཾ ཏ་པ་སྶིཾ ཙི་ར་བྲ་ཧྨ་ཙཱ་རིཾ.
༧༣. ‘‘ཡོ ཁ་ཎྜ་སོ པ་བྦ་ཛི་ཏཾ ཨ་ཚེ་ད་ཡི, ཁ་ནྟིཾ ཝ་ད་ནྟཾ ས་མ་ཎཾ ཨ་དཱུ་ས་ཀཾ;
ཀ་ལཱ་བུ་ཝཱི་ཙིཾ ཨུ་པ་པ་ཛྫ པ་ཙྩ་ཏི, མ་ཧཱ་པ་ཏཱ་པཾ [མ་ཧཱ་བྷི་ཏཱ་པཾ (པཱི.)] ཀ་ཊུ་ཀཾ བྷ་ཡཱ་ན་ཀཾ.
༧༤. ‘‘ཨེ་ཏཱ་ནི སུ་ཏྭཱ ནི་ར་ཡཱ་ནི པ་ཎྜི་ཏོ, ཨ་ཉྙཱ་ནི པཱ་པི་ཊྛ་ཏ་རཱ་ནི ཙེ་ཏྠ;
དྷ་མྨཾ ཙ་རེ ས་མ་ཎ་བྲཱ་ཧྨ་ཎེ་སུ, ཨེ་ཝ་ངྐ་རོ ས་གྒ་མུ་པེ་ཏི ཋཱ་ནཾ’’.
༧༥. ‘‘སུ་བྷཱ་སི་ཏཾ ཏེ ཨ་ནུ་མོ་དི་ཡཱ་ན, ཨ་ཉྙཾ ཏཾ པུ་ཙྪཱ་མི ཏ་དི་ངྒྷ བྲཱུ་ཧི;
ཀ་ཐཾ་ཝི་དྷཾ སཱི་ལ་ཝ་ནྟཾ ཝ་ད་ནྟི, ཀ་ཐཾ་ཝི་དྷཾ པ་ཉྙ་ཝ་ནྟཾ ཝ་ད་ནྟི;
ཀ་ཐཾ་ཝི་དྷཾ ས་པྤུ་རི་སཾ ཝ་ད་ནྟི, ཀ་ཐཾ་ཝི་དྷཾ ནོ སི་རི ནོ ཛ་ཧཱ་ཏི’’.
༧༦. ‘‘ཀཱ་ཡེ་ན ཝཱ་ཙཱ་ཡ ཙ ཡོ’དྷ [ཡོ ཙ (པཱི.)] ས་ཉྙ་ཏོ, མ་ན་སཱ ཙ ཀི་ཉྩི ན ཀ་རོ་ཏི པཱ་པཾ;
ན ཨ་ཏྟ་ཧེ་ཏཱུ ཨ་ལི་ཀཾ བྷ་ཎེ་ཏི [བྷ་ཎཱ་ཏི (སཱི. སྱཱ. པཱི.)], ཏ་ཐཱ་ཝི་དྷཾ སཱི་ལ་ཝ་ནྟཾ ཝ་ད་ནྟི.
༧༧. ‘‘ག་མྦྷཱི་ར་པ་ཉྷཾ མ་ན་སཱ་བྷི་ཙི་ནྟ་ཡཾ [མ་ན་སཱ ཝི་ཙི་ནྟ་ཡཾ (སཱི.)], ནཱ་ཙྩཱ་ཧི་ཏཾ ཀ་མྨ ཀ་རོ་ཏི ལུ་དྡཾ;
ཀཱ་ལཱ་ག་ཏཾ [ཀཱ་ལཱ་བྷ་ཏཾ (པཱི.)] ཨ་ཏྠ་པ་དཾ ན རི་ཉྩ་ཏི, ཏ་ཐཱ་ཝི་དྷཾ པ་ཉྙ་ཝ་ནྟཾ ཝ་ད་ནྟི.
༧༨. ‘‘ཡོ ཝེ ཀ་ཏ་ཉྙཱུ ཀ་ཏ་ཝེ་དི དྷཱི་རོ, ཀ་ལྱཱ་ཎ་མི་ཏྟོ ད་ལ༹ྷ་བྷ་ཏྟི ཙ ཧོ་ཏི;
དུ་ཁི་ཏ་སྶ ས་ཀྐ་ཙྩ ཀ་རོ་ཏི ཀི་ཙྩཾ, ཏ་ཐཱ་ཝི་དྷཾ ས་པྤུ་རི་སཾ ཝ་ད་ནྟི.
༧༩. ‘‘ཨེ་ཏེ་ཧི ས་བྦེ་ཧི གུ་ཎེ་ཧུ་པེ་ཏོ, ས་དྡྷོ མུ་དཱུ སཾ་ཝི་བྷཱ་གཱི ཝ་ད་ཉྙཱུ;
ས་ངྒཱ་ཧ་ཀཾ ས་ཁི་ལཾ ས་ཎྷ་ཝཱ་ཙཾ, ཏ་ཐཱ་ཝི་དྷཾ ནོ སི་རི ནོ ཛ་ཧཱ་ཏི’’.
༨༠. ‘‘སུ་བྷཱ་སི་ཏཾ ཏེ ཨ་ནུ་མོ་དི་ཡཱ་ན, ཨ་ཉྙཾ ཏཾ པུ་ཙྪཱ་མི ཏ་དི་ངྒྷ བྲཱུ་ཧི;
སཱི་ལཾ སི་རི་ཉྩཱ་པི ས་ཏ་ཉྩ དྷ་མྨཾ, པ་ཉྙ་ཉྩ ཀཾ སེ་ཊྛ་ཏ་རཾ ཝ་ད་ནྟི’’.
༨༡. ‘‘པ་ཉྙཱ ཧི སེ་ཊྛཱ ཀུ་ས་ལཱ ཝ་ད་ནྟི, ན་ཀྑ་ཏྟ་རཱ་ཛཱ་རི་ཝ ཏཱ་ར་ཀཱ་ནཾ;
སཱི་ལཾ སཱི་རཱི ཙཱ་པི ས་ཏ་ཉྩ དྷ་མྨོ [དྷ་མྨཱ (པཱི.)], ཨ་ནྭཱ་ཡི་ཀཱ པ་ཉྙ་ཝ་ཏོ བྷ་ཝ་ནྟི’’.
༨༢. ‘‘སུ་བྷཱ་སི་ཏཾ ཏེ ཨ་ནུ་མོ་དི་ཡཱ་ན, ཨ་ཉྙཾ ཏཾ པུ་ཙྪཱ་མི ཏ་དི་ངྒྷ བྲཱུ་ཧི;
ཀ་ཐཾ་ཀ་རོ ཀི་ནྟི་ཀ་རོ ཀི་མཱ་ཙ་རཾ, ཀིཾ སེ་ཝ་མཱ་ནོ ལ་བྷ་ཏཱི་དྷ པ་ཉྙཾ;
པ་ཉྙཱ་ཡ དཱ་ནི་པྤ་ཊི་པཾ [དཱ་ནི པ་ཊི་པ་དཾ (སཱི. སྱཱ. པཱི.)] ཝ་དེ་ཧི, ཀ་ཐཾ་ཀ་རོ པ་ཉྙ་ཝཱ ཧོ་ཏི མ་ཙྩོ’’.
༨༣. ‘‘སེ་ཝེ་ཐ ཝུ་དྡྷེ ནི་པུ་ཎེ བ་ཧུ་སྶུ་ཏེ, ཨུ་གྒཱ་ཧ་ཀོ ཙ པ་རི་པུ་ཙྪ་ཀོ སི་ཡཱ;
སུ་ཎེ་ཡྻ ས་ཀྐ་ཙྩ སུ་བྷཱ་སི་ཏཱ་ནི, ཨེ་ཝཾ་ཀ་རོ པ་ཉྙ་ཝཱ ཧོ་ཏི མ་ཙྩོ.
༨༤. ‘‘ པ་ཉྙ་ཝཱ ཀཱ་མ་གུ་ཎེ ཨ་ཝེ་ཀྑ་ཏི, ཨ་ནི་ཙྩ་ཏོ དུ་ཀྑ་ཏོ རོ་ག་ཏོ ཙ;
ཨེ་ཝཾ ཝི་པ་སྶཱི པ་ཛ་ཧཱ་ཏི ཚ་ནྡཾ, དུ་ཀྑེ་སུ ཀཱ་མེ་སུ མ་ཧ་བྦྷ་ཡེ་སུ.
༨༥. ‘‘ས ཝཱི་ཏ་རཱ་གོ པ་ཝི་ནེ་ཡྻ དོ་སཾ, མེ་ཏྟཾ [མེ་ཏྟ (སྱཱ. ཀ.)] ཙི་ཏྟཾ བྷཱ་ཝ་ཡེ [བྷཱ་ཝེ་ཡྻ (སཱི. སྱཱ. ཀ.)] ཨ་པྤ་མཱ་ཎཾ;
ས་བྦེ་སུ བྷཱུ་ཏེ་སུ ནི་དྷཱ་ཡ ད་ཎྜཾ, ཨ་ནི་ནྡི་ཏོ བྲ་ཧྨ་མུ་པེ་ཏི ཋཱ་ནཾ’’.
༨༦. ‘‘མ་ཧ་ཏྠི་ཡཾ [མ་ཧི་དྡྷི་ཡཾ (སཱི. སྱཱ. པཱི.)] ཨཱ་ག་མ་ནཾ ཨ་ཧོ་སི, ཏ་ཝ་མ་ཊྛ་ཀཱ [མ་ཊྛ་ཀ (སཱི. སྱཱ. ཀ.)] བྷཱི་མ་ར་ཐ་སྶ ཙཱ་པི;
ཀཱ་ལི་ངྒ་རཱ་ཛ་སྶ ཙ ཨུ་གྒ་ཏ་སྶ, ས་བྦེ་ས ཝོ ཀཱ་མ་རཱ་གོ པ་ཧཱི་ནོ’’.
༨༧. ‘‘ཨེ་ཝ་མེ་ཏཾ པ་ར་ཙི་ཏྟ་ཝེ་དི, ས་བྦེ་ས ནོ ཀཱ་མ་རཱ་གོ པ་ཧཱི་ནོ;
ཀ་རོ་ཧི ཨོ་ཀཱ་ས་མ་ནུ་གྒ་ཧཱ་ཡ, ཡ་ཐཱ ག་ཏིཾ ཏེ ཨ་བྷི་ས་མྦྷ་ཝེ་མ’’.
༨༨. ‘‘ཀ་རོ་མི ཨོ་ཀཱ་ས་མ་ནུ་གྒ་ཧཱ་ཡ, ཏ་ཐཱ ཧི ཝོ ཀཱ་མ་རཱ་གོ པ་ཧཱི་ནོ;
ཕ་རཱ་ཐ ཀཱ་ཡཾ ཝི་པུ་ལཱ་ཡ པཱི་ཏི་ཡཱ, ཡ་ཐཱ ག་ཏིཾ མེ ཨ་བྷི་ས་མྦྷ་ཝེ་ཐ’’.
༨༩. ‘‘ས་བྦཾ ཀ་རི་སྶཱ་མ ཏ་ཝཱ་ནུ་སཱ་ས་ནིཾ, ཡཾ ཡཾ ཏུ་ཝཾ ཝ་ཀྑ་སི བྷཱུ་རི་པ་ཉྙ;
ཕ་རཱ་མ ཀཱ་ཡཾ ཝི་པུ་ལཱ་ཡ པཱི་ཏི་ཡཱ, ཡ་ཐཱ ག་ཏིཾ ཏེ ཨ་བྷི་ས་མྦྷ་ཝེ་མ’’.
༩༠. ‘‘ཀ་ཏཱ་ཡ [ཀ་ཏཱ་ཡཾ (སཱི. པཱི.)] ཝ་ཙྪ་སྶ ཀི་ས་སྶ པཱུ་ཛཱ, ག་ཙྪ་ནྟུ བྷོ་ནྟོ ཨི་ས་ཡོ སཱ་དྷུ་རཱུ་པཱ;
ཛྷཱ་ནེ ར་ཏཱ ཧོ་ཐ ས་དཱ ས་མཱ་ཧི་ཏཱ, ཨེ་སཱ ར་ཏཱི པ་བྦ་ཛི་ཏ་སྶ སེ་ཊྛཱ’’.
༩༡. ‘‘སུ་ཏྭཱ་ན གཱ་ཐཱ པ་ར་མ་ཏྠ་སཾ་ཧི་ཏཱ, སུ་བྷཱ་སི་ཏཱ ཨི་སི་ནཱ པ་ཎྜི་ཏེ་ན;
ཏེ ཝེ་ད་ཛཱ་ཏཱ ཨ་ནུ་མོ་ད་མཱ་ནཱ, པ་ཀྐཱ་མུ [པ་ཀྐ་མུ (ཀ.)] དེ་ཝཱ དེ་ཝ་པུ་རཾ ཡ་ས་སྶི་ནོ.
༩༢. ‘‘གཱ་ཐཱ ཨི་མཱ ཨ་ཏྠ་ཝ་ཏཱི སུ་བྱ་ཉྫ་ནཱ, སུ་བྷཱ་སི་ཏཱ ཨི་སི་ནཱ པ་ཎྜི་ཏེ་ན;
ཡོ ཀོ་ཙི་མཱ ཨ་ཊྛི་ཀ་ཏྭཱ [ཨ་ཊྛིཾ ཀ་ཏྭཱ (ཀ.)] སུ་ཎེ་ཡྻ, ལ་བྷེ་ཐ པུ་བྦཱ་པ་རི་ཡཾ ཝི་སེ་སཾ;
ལ་དྡྷཱ་ན པུ་བྦཱ་པ་རི་ཡཾ ཝི་སེ་སཾ, ཨ་ད་སྶ་ནཾ མ་ཙྩུ་རཱ་ཛ་སྶ ག་ཙྪེ’’.
༩༣. ‘‘སཱ་ལི་སྶ་རོ སཱ་རི་པུ་ཏྟོ, མེ་ཎྜི་སྶ་རོ ཙ ཀ་སྶ་པོ;
པ་བྦ་ཏོ ཨ་ནུ་རུ་དྡྷོ ཙ, ཀ་ཙྩཱ་ཡ་ནོ ཙ དེ་ཝ་ལོ [དེ་ཝི་ལོ (སྱཱ. ཀ.)].
༩༤. ‘‘ཨ་ནུ་སི་སྶོ ཙ ཨཱ་ན་ནྡོ, ཀི་ས་ཝ་ཙྪོ ཙ ཀོ་ལི་ཏོ;
ནཱ་ར་དོ ཨུ་དཱ་ཡཱི ཐེ་རོ [ནཱ་ར་དོ པུ་ཎྞོ མ་ནྟཱ་ནཱི་པུ་ཏྟོ (སཱི.)], པ་རི་སཱ བུ་དྡྷ་པ་རི་སཱ;
ས་ར་བྷ་ངྒོ ལོ་ཀ་ནཱ་ཐོ, ཨེ་ཝཾ དྷཱ་རེ་ཐ ཛཱ་ཏ་ཀ’’ནྟི.
ས་ར་བྷ་ངྒ་ཛཱ་ཏ་ཀཾ དུ་ཏི་ཡཾ.