༩. ཨ་པཱ་ཡི་མྷ་ཝ་གྒོ

༨༡. ཨ་པཱ་ཡི་མྷ ཨ་ན་ཙྩི་མྷ, ཨ་གཱ་ཡི་མྷ རུ་དི་མྷ ཙ;

ཝི་ས་ཉྙི་ཀ་ར་ཎིཾ པི་ཏྭཱ [པཱི་ཏྭཱ (སཱི. སྱཱ. པཱི.)], དི་ཊྛཱ ནཱ་ཧུ་མྷ ཝཱ་ན་རཱ་ཏི.

སུ་རཱ་པཱ་ན་ཛཱ་ཏ་ཀཾ པ་ཋ་མཾ.

༨༢. ཨ་ཏི་ཀྐ་མྨ ར་མ་ཎ་ཀཾ, ས་དཱ་མ་ཏྟ་ཉྩ དཱུ་བྷ་ཀཾ;

སྭཱ་སི པཱ་སཱ་ཎ་མཱ་སཱི་ནོ, ཡ་སྨཱ ཛཱི་ཝཾ ན མོ་ཀྑ་སཱི་ཏི.

མི་ཏྟ་ཝི་ནྡ་ཀ་ཛཱ་ཏ་ཀཾ དུ་ཏི་ཡཾ.

༨༣. མི་ཏྟོ ཧ་ཝེ ས་ཏྟ་པ་དེ་ན ཧོ་ཏི, ས་ཧཱ་ཡོ པ་ན དྭཱ་ད་ས་ཀེ་ན ཧོ་ཏི;

མཱ་ས་ཌྜྷ་མཱ་སེ་ན ཙ ཉཱ་ཏི ཧོ་ཏི, ཏ་ཏུ་ཏྟ་རིཾ ཨ་ཏྟ་ས་མོ་པི ཧོ་ཏི;

སོ་ཧཾ ཀ་ཐཾ ཨ་ཏྟ་སུ་ཁ་སྶ ཧེ་ཏུ, ཙི་ར་ས་ནྠུ་ཏཾ [ཙི་ར་ས་ནྡྷ་ཝཾ (ཀ.), ཙི་ར་ས་ཏྠུ་ནཾ (པཱི.)] ཀཱ་ལ༹་ཀ་ཎྞིཾ ཛ་ཧེ་ཡྻ་ནྟི.

ཀཱ་ལ་ཀ་ཎྞི་ཛཱ་ཏ་ཀཾ ཏ་ཏི་ཡཾ.

༨༤. ཨཱ་རོ་གྱ་མི་ཙྪེ པ་ར་མ་ཉྩ ལཱ་བྷཾ, སཱི་ལ་ཉྩ ཝུ་དྡྷཱ་ནུ་མ་ཏཾ སུ་ཏ་ཉྩ;

དྷ་མྨཱ་ནུ་ཝ་ཏྟཱི ཙ ཨ་ལཱི་ན་ཏཱ ཙ, ཨ་ཏྠ་སྶ དྭཱ་རཱ པ་མུ་ཁཱ ཚ་ལེ༹་ཏེ་ཏི.

ཨ་ཏྠ་སྶ་དྭཱ་ར་ཛཱ་ཏ་ཀཾ ཙ་ཏུ་ཏྠཾ.

༨༥. ཨཱ་ཡ་ཏིཾ དོ་སཾ ནཱ་ཉྙཱ་ཡ, ཡོ ཀཱ་མེ པ་ཊི་སེ་ཝ་ཏི;

ཝི་པཱ་ཀ་ནྟེ ཧ་ན་ནྟི ནཾ, ཀིཾ་པ་ཀྐ་མི་ཝ བྷ་ཀྑི་ཏ་ནྟི.

ཀིཾ་པ་ཀྐ་ཛཱ་ཏ་ཀཾ པ་ཉྩ་མཾ.

༨༦. སཱི་ལཾ ཀི་རེ་ཝ ཀ་ལྱཱ་ཎཾ, སཱི་ལཾ ལོ་ཀེ ཨ་ནུ་ཏྟ་རཾ;

པ་སྶ གྷོ་ར་ཝི་སོ ནཱ་གོ, སཱི་ལ་ཝཱ་ཏི ན ཧ་ཉྙ་ཏཱི་ཏི.

སཱི་ལ་ཝཱི་མཾ་ས་ཀ་ཛཱ་ཏ་ཀཾ ཚ་ཊྛཾ.

༨༧. ཡ་སྶ མ་ངྒ་ལཱ ས་མཱུ་ཧ་ཏཱ་སེ [ས་མཱུ་ཧ་ཏཱ (སཱི. སྱཱ. པཱི. སུ. ནི. ༣༦༢], ཨུ་པྤཱ་ཏཱ [ཨུ་པྤཱ་དཱ (པཱི.)] སུ་པི་ནཱ ཙ ལ་ཀྑ་ཎཱ ཙ;

སོ [ས (སཱི. པཱི. ཀ.)] མ་ངྒ་ལ་དོ་ས་ཝཱི་ཏི་ཝ་ཏྟོ, ཡུ་ག་ཡོ་གཱ་དྷི་ག་ཏོ ན ཛཱ་ཏུ་མེ་ཏཱི་ཏི.

མ་ངྒ་ལ་ཛཱ་ཏ་ཀཾ ས་ཏྟ་མཾ.

༨༨. ཀ་ལྱཱ་ཎི་མེ་ཝ མུ་ཉྩེ་ཡྻ, ན ཧི མུ་ཉྩེ་ཡྻ པཱ་པི་ཀཾ;

མོ་ཀྑོ ཀ་ལྱཱ་ཎི་ཡཱ སཱ་དྷུ, མུ་ཏྭཱ ཏ་པྤ་ཏི པཱ་པི་ཀ་ནྟི.

སཱ་ར་མྦྷ་ཛཱ་ཏ་ཀཾ ཨ་ཊྛ་མཾ.

༨༩. ཝཱ་ཙཱ་ཝ ཀི་ར ཏེ ཨཱ་སི, ས་ཎྷཱ ས་ཁི་ལ་བྷཱ་ཎི་ནོ;

ཏི་ཎ་མ་ཏྟེ ཨ་ས་ཛྫི་ཏྠོ, ནོ ཙ ནི་ཀྑ་ས་ཏཾ ཧ་ར་ནྟི.

ཀུ་ཧ་ཀ་ཛཱ་ཏ་ཀཾ ན་ཝ་མཾ.

༩༠. ཡོ པུ་བྦེ ཀ་ཏ་ཀ་ལྱཱ་ཎོ, ཀ་ཏ་ཏྠོ ནཱ་ཝ་བུ་ཛ྄ཛྷ་ཏི;

པ་ཙྪཱ ཀི་ཙྩེ ས་མུ་པྤ་ནྣེ, ཀ་ཏྟཱ་རཾ ནཱ་དྷི་ག་ཙྪ་ཏཱི་ཏི.

ཨ་ཀ་ཏ་ཉྙུ་ཛཱ་ཏ་ཀཾ ད་ས་མཾ.

ཨ་པཱ་ཡི་མྷ་ཝ་གྒོ ན་ཝ་མོ.

ཏ་སྶུ་དྡཱ་ནཾ –

ཨ་པཱ་ཡི་མྷ ཙ དཱུ་བྷ་ཀཾ ས་ཏྟ་པ་དཾ, ཚ་ལ༹་དྭ་ར ཙ ཨཱ་ཡ་ཏི་ནཱ ཙ པུ་ན;

ཨ་ཧི་སཱི་ལ་ཝ མ་ངྒ་ལི པཱ་པི་ཀ་སྶཱ, ས་ཏཾ་ནི་ཀྑ ཀ་ཏ་ཏྠ་ཝ་རེ་ན ད་སཱ་ཏི.