༢. ཛཱི་ཝི་ཀ་སུ་ཏྟཾ

༩༡. ཝུ་ཏྟ་ཉྷེ་ཏཾ བྷ་ག་ཝ་ཏཱ, ཝུ་ཏྟ་མ་ར་ཧ་ཏཱ་ཏི མེ སུ་ཏཾ –

‘‘ཨ་ནྟ་མི་དཾ, བྷི་ཀྑ་ཝེ, ཛཱི་ཝི་ཀཱ་ནཾ ཡ་དི་དཾ པི་ཎྜོ་ལྱཾ. ཨ་བྷི་སཱ་པོ་ཡཾ [ཨ་བྷི་སཱ་པཱ་ཡཾ (སཱི.), ཨ་བྷི་ལཱ་པཱ་ཡཾ (སྱཱ. པཱི.), ཨ་བྷི་ས་པཱ་ཡཾ (ཀ.)], བྷི་ཀྑ་ཝེ, ལོ་ཀ་སྨིཾ – ‘པི་ཎྜོ་ལོ ཝི་ཙ་ར་སི པ་ཏྟ་པཱ་ཎཱི’ཏི. ཏ་ཉྩ ཁོ ཨེ་ཏཾ, བྷི་ཀྑ་ཝེ, ཀུ་ལ་པུ་ཏྟཱ ཨུ་པེ་ནྟི ཨ་ཏྠ་ཝ་སི་ཀཱ, ཨ་ཏྠ་ཝ་སཾ པ་ཊི་ཙྩ; ནེ་ཝ རཱ་ཛཱ་བྷི་ནཱི་ཏཱ, ན ཙོ་རཱ་བྷི་ནཱི་ཏཱ, ན ཨི་ཎ་ཊྚཱ, ན བྷ་ཡ་ཊྚཱ, ན ཨཱ་ཛཱི་ཝི་ཀཱ་པ་ཀ་ཏཱ. ཨ་པི ཙ ཁོ ‘ཨོ་ཏི་ཎྞ་མྷཱ ཛཱ་ཏི་ཡཱ ཛ་རཱ་ཡ མ་ར་ཎེ་ན སོ་ཀེ་ཧི པ་རི་དེ་ཝེ་ཧི དུ་ཀྑེ་ཧི དོ་མ་ན་སྶེ་ཧི ཨུ་པཱ་ཡཱ་སེ་ཧི དུ་ཀྑོ་ཏི་ཎྞཱ དུ་ཀྑ་པ་རེ་ཏཱ, ཨ་པྤེ་ཝ ནཱ་མ ཨི་མ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ཨ་ནྟ་ཀི་རི་ཡཱ པ་ཉྙཱ་ཡེ་ཐཱ’ཏི. ཨེ་ཝཾ པ་བྦ་ཛི་ཏོ ཙཱ་ཡཾ, བྷི་ཀྑ་ཝེ, ཀུ་ལ་པུ་ཏྟོ སོ ཙ ཧོ་ཏི ཨ་བྷི་ཛ྄ཛྷཱ་ལུ ཀཱ་མེ་སུ ཏི་བྦ་སཱ་རཱ་གོ, བྱཱ་པ་ནྣ་ཙི་ཏྟོ པ་དུ་ཊྛ་མ་ན་ས་ངྐ་པྤོ, མུ་ཊྛ་སྶ་ཏི ཨ་ས་མྤ་ཛཱ་ནོ ཨ་ས་མཱ་ཧི་ཏོ ཝི་བྦྷ་ནྟ་ཙི་ཏྟོ པཱ་ཀ་ཏི་ནྡྲི་ཡོ. སེ་ཡྻ་ཐཱ་པི, བྷི་ཀྑ་ཝེ, ཚ་ཝཱ་ལཱ་ཏཾ ཨུ་བྷ་ཏོ་པ་དི་ཏྟཾ མ་ཛ྄ཛྷེ གཱུ་ཐ་ག་ཏཾ ནེ་ཝ གཱ་མེ ཀ་ཊྛ་ཏྠཾ ཕ་ར་ཏི ན ཨ་ར་ཉྙེः ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི གི་ཧི་བྷོ་གཱ པ་རི་ཧཱི་ནོ སཱ་མ་ཉྙ་ཏྠ་ཉྩ ན པ་རི་པཱུ་རེ་ཏཱི’’ཏི. ཨེ་ཏ་མ་ཏྠཾ བྷ་ག་ཝཱ ཨ་ཝོ་ཙ. ཏ་ཏྠེ་ཏཾ ཨི་ཏི ཝུ་ཙྩ་ཏི –

‘‘གི་ཧི་བྷོ་གཱ པ་རི་ཧཱི་ནོ, སཱ་མ་ཉྙ་ཏྠ་ཉྩ དུ་བྦྷ་གོ;

པ་རི་དྷཾ་ས་མཱ་ནོ པ་ཀི་རེ་ཏི, ཚ་ཝཱ་ལཱ་ཏཾ་ཝ ན་སྶ་ཏི.

‘‘ཀཱ་སཱ་ཝ་ཀ་ཎྛཱ བ་ཧ་ཝོ, པཱ་པ་དྷ་མྨཱ ཨ་ས་ཉྙ་ཏཱ;

པཱ་པཱ པཱ་པེ་ཧི ཀ་མྨེ་ཧི, ནི་ར་ཡཾ ཏེ ཨུ་པ་པ་ཛྫ་རེ.

‘‘སེ་ཡྻོ ཨ་ཡོ་གུ་ལོ༹ བྷུ་ཏྟོ, ཏ་ཏྟོ ཨ་གྒི་སི་ཁཱུ་པ་མོ;

ཡ་ཉྩེ བྷུ་ཉྫེ་ཡྻ དུ་སྶཱི་ལོ, ར་ཊྛ་པི་ཎྜ་མ་ས་ཉྙ་ཏོ’’ཏི.

ཨ་ཡ་མྤི ཨ་ཏྠོ ཝུ་ཏྟོ བྷ་ག་ཝ་ཏཱ, ཨི་ཏི མེ སུ་ཏ་ནྟི. དུ་ཏི་ཡཾ.