༧. དུ་ཏི་ཡ་སེ་ཁ་སུ་ཏྟཾ

༡༧. ཝུ་ཏྟ་ཉྷེ་ཏཾ བྷ་ག་ཝ་ཏཱ, ཝུ་ཏྟ་མ་ར་ཧ་ཏཱ་ཏི མེ སུ་ཏཾ –

‘‘སེ་ཁ་སྶ, བྷི་ཀྑ་ཝེ, བྷི་ཀྑུ་ནོ ཨ་པྤ་ཏྟ་མཱ་ན་ས་སྶ ཨ་ནུ་ཏྟ་རཾ ཡོ་ག་ཀྑེ་མཾ པ་ཏྠ་ཡ་མཱ་ན་སྶ ཝི་ཧ་ར་ཏོ བཱ་ཧི་རཾ ཨ་ངྒ་ནྟི ཀ་རི་ཏྭཱ ནཱ་ཉྙཾ ཨེ་ཀ་ངྒ་མྤི ས་མ་ནུ་པ་སྶཱ་མི ཡཾ ཨེ་ཝཾ བ་ཧཱུ་པ་ཀཱ་རཾ ཡ་ཐ་ཡི་དཾ, བྷི་ཀྑ་ཝེ, ཀ་ལྱཱ་ཎ་མི་ཏྟ་ཏཱ. ཀ་ལྱཱ་ཎ་མི་ཏྟོ, བྷི་ཀྑ་ཝེ, བྷི་ཀྑུ ཨ་ཀུ་ས་ལཾ པ་ཛ་ཧ་ཏི, ཀུ་ས་ལཾ བྷཱ་ཝེ་ཏཱི’’ཏི. ཨེ་ཏ་མ་ཏྠཾ བྷ་ག་ཝཱ ཨ་ཝོ་ཙ. ཏ་ཏྠེ་ཏཾ ཨི་ཏི ཝུ་ཙྩ་ཏི –

‘‘ཀ་ལྱཱ་ཎ་མི་ཏྟོ ཡོ བྷི་ཀྑུ, ས་པྤ་ཏི་སྶོ ས་གཱ་ར་ཝོ;

ཀ་རཾ མི་ཏྟཱ་ནཾ ཝ་ཙ་ནཾ, ས་མྤ་ཛཱ་ནོ པ་ཏི་སྶ་ཏོ;

པཱ་པུ་ཎེ ཨ་ནུ་པུ་བྦེ་ན, ས་བྦ་སཾ་ཡོ་ཛ་ན་ཀྑ་ཡ’’ནྟི.

ཨ་ཡ་མྤི ཨ་ཏྠོ ཝུ་ཏྟོ བྷ་ག་ཝ་ཏཱ, ཨི་ཏི མེ སུ་ཏ་ནྟི. ས་ཏྟ་མཾ.