༥. བཱ་ལ་ཝ་གྒོ
༦༠. དཱི་གྷཱ ཛཱ་ག་ར་ཏོ ར་ཏྟི, དཱི་གྷཾ ས་ནྟ་སྶ ཡོ་ཛ་ནཾ;
དཱི་གྷོ བཱ་ལཱ་ནཾ སཾ་སཱ་རོ, ས་དྡྷ་མྨཾ ཨ་ཝི་ཛཱ་ན་ཏཾ.
༦༡. ཙ་ར་ཉྩེ ནཱ་དྷི་ག་ཙྪེ་ཡྻ, སེ་ཡྻཾ ས་དི་ས་མ་ཏྟ་ནོ;
ཨེ་ཀ་ཙ་རི་ཡཾ [ཨེ་ཀ་ཙ་རི་ཡཾ (ཀ.)] ད་ལ༹ྷཾ ཀ་ཡི་རཱ, ན་ཏྠི བཱ་ལེ ས་ཧཱ་ཡ་ཏཱ.
༦༢. པུ་ཏྟཱ མ་ཏྠི དྷ་ན་མྨ་ཏྠི [པུ་ཏྟ་མ་ཏྠི དྷ་ན་མ་ཏྠི (ཀ.)], ཨི་ཏི བཱ་ལོ ཝི་ཧ་ཉྙ་ཏི;
ཨ་ཏྟཱ ཧི [ཨ་ཏྟཱ་པི (?)] ཨ་ཏྟ་ནོ ན་ཏྠི, ཀུ་ཏོ པུ་ཏྟཱ ཀུ་ཏོ དྷ་ནཾ.
༦༣. ཡོ བཱ་ལོ མ་ཉྙ་ཏི བཱ་ལྱཾ, པ་ཎྜི་ཏོ ཝཱ་པི ཏེ་ན སོ;
བཱ་ལོ ཙ པ་ཎྜི་ཏ་མཱ་ནཱི, ས ཝེ ‘‘བཱ་ལོ’’ཏི ཝུ་ཙྩ་ཏི.
༦༤. ཡཱ་ཝ་ཛཱི་ཝ་མྤི ཙེ བཱ་ལོ, པ་ཎྜི་ཏཾ པ་ཡི་རུ་པཱ་ས་ཏི;
ན སོ དྷ་མྨཾ ཝི་ཛཱ་ནཱ་ཏི, ད་བྦཱི སཱུ་པ་ར་སཾ ཡ་ཐཱ.
༦༥. མུ་ཧུ་ཏྟ་མ་པི ཙེ ཝི་ཉྙཱུ, པ་ཎྜི་ཏཾ པ་ཡི་རུ་པཱ་ས་ཏི;
ཁི་པྤཾ དྷ་མྨཾ ཝི་ཛཱ་ནཱ་ཏི, ཛི་ཝ྄ཧཱ སཱུ་པ་ར་སཾ ཡ་ཐཱ.
༦༦. ཙ་ར་ནྟི བཱ་ལཱ དུ་མྨེ་དྷཱ, ཨ་མི་ཏྟེ་ནེ་ཝ ཨ་ཏྟ་ནཱ;
ཀ་རོ་ནྟཱ པཱ་པ་ཀཾ ཀ་མྨཾ, ཡཾ ཧོ་ཏི ཀ་ཊུ་ཀ་པྥ་ལཾ.
༦༧. ན ཏཾ ཀ་མྨཾ ཀ་ཏཾ སཱ་དྷུ, ཡཾ ཀ་ཏྭཱ ཨ་ནུ་ཏ་པྤ་ཏི;
ཡ་སྶ ཨ་སྶུ་མུ་ཁོ རོ་དཾ, ཝི་པཱ་ཀཾ པ་ཊི་སེ་ཝ་ཏི.
༦༨. ཏ་ཉྩ ཀ་མྨཾ ཀ་ཏཾ སཱ་དྷུ, ཡཾ ཀ་ཏྭཱ ནཱ་ནུ་ཏ་པྤ་ཏི;
ཡ་སྶ པ་ཏཱི་ཏོ སུ་མ་ནོ, ཝི་པཱ་ཀཾ པ་ཊི་སེ་ཝ་ཏི.
༦༩. མ་དྷུ་ཝཱ [མ་དྷུཾ ཝཱ (དཱི. ནི. ཊཱི་ཀཱ ༡)] མ་ཉྙ་ཏི བཱ་ལོ, ཡཱ་ཝ པཱ་པཾ ན པ་ཙྩ་ཏི;
ཡ་དཱ ཙ པ་ཙྩ་ཏི པཱ་པཾ, བཱ་ལོ [ཨ་ཐ བཱ་ལོ (སཱི. སྱཱ.) ཨ་ཐ (?)] དུ་ཀྑཾ ནི་ག་ཙྪ་ཏི.
༧༠. མཱ་སེ མཱ་སེ ཀུ་ས་གྒེ་ན, བཱ་ལོ བྷུ་ཉྫེ་ཡྻ བྷོ་ཛ་ནཾ;
ན སོ ས་ངྑཱ་ཏ་དྷ་མྨཱ་ནཾ [ས་ངྑ་ཏ་དྷ་མྨཱ་ནཾ (སཱི. པཱི. ཀ.)], ཀ་ལཾ ཨ་གྒྷ་ཏི སོ་ལ༹་སིཾ.
༧༡. ན ཧི པཱ་པཾ ཀ་ཏཾ ཀ་མྨཾ, ས་ཛྫུ ཁཱི་རཾ་ཝ མུ་ཙྩ་ཏི;
ཌ་ཧ་ནྟཾ བཱ་ལ་མ་ནྭེ་ཏི, བྷ་སྨ་ཙྪ་ནྣོ་ཝ [བྷ་སྨཱ་ཚ་ནྣོ་ཝ (སཱི. པཱི. ཀ.)] པཱ་ཝ་ཀོ.
༧༢. ཡཱ་ཝ་དེ་ཝ ཨ་ན་ཏྠཱ་ཡ, ཉ་ཏྟཾ [ཉཱ་ཏཾ (?)] བཱ་ལ་སྶ ཛཱ་ཡ་ཏི;
ཧ་ནྟི བཱ་ལ་སྶ སུ་ཀྐཾ་སཾ, མུ་དྡྷ་མ་སྶ ཝི་པཱ་ཏ་ཡཾ.
༧༣. ཨ་ས་ནྟཾ བྷཱ་ཝ་ན་མི་ཙྪེ་ཡྻ [ཨ་ས་ནྟཾ བྷཱ་ཝ་མི་ཙྪེ་ཡྻ (སྱཱ.), ཨ་ས་ནྟ་བྷཱ་ཝ་ན་མི་ཙྪེ་ཡྻ (ཀ.)], པུ་རེ་ཀྑཱ་ར་ཉྩ བྷི་ཀྑུ་སུ;
ཨཱ་ཝཱ་སེ་སུ ཙ ཨི་སྶ་རི་ཡཾ, པཱུ་ཛཱ པ་ར་ཀུ་ལེ་སུ ཙ.
༧༤. མ་མེ་ཝ ཀ་ཏ མ་ཉྙ་ནྟུ, གི་ཧཱི་པ་བྦ་ཛི་ཏཱ ཨུ་བྷོ;
མ་མེ་ཝཱ་ཏི་ཝ་སཱ ཨ་སྶུ, ཀི་ཙྩཱ་ཀི་ཙྩེ་སུ ཀི་སྨི་ཙི;
ཨི་ཏི བཱ་ལ་སྶ ས་ངྐ་པྤོ, ཨི་ཙྪཱ མཱ་ནོ ཙ ཝ་ཌྜྷ་ཏི.
༧༥. ཨ་ཉྙཱ ཧི ལཱ་བྷཱུ་པ་ནི་སཱ, ཨ་ཉྙཱ ནི་བྦཱ་ན་གཱ་མི་ནཱི;
ཨེ་ཝ་མེ་ཏཾ ཨ་བྷི་ཉྙཱ་ཡ, བྷི་ཀྑུ བུ་དྡྷ་སྶ སཱ་ཝ་ཀོ;
ས་ཀྐཱ་རཾ ནཱ་བྷི་ན་ནྡེ་ཡྻ, ཝི་ཝེ་ཀ་མ་ནུ་བྲཱུ་ཧ་ཡེ.
བཱ་ལ་ཝ་གྒོ པ་ཉྩ་མོ ནི་ཊྛི་ཏོ.