༡༢. པ་དུ་མུ་ཏྟ་ར་བུ་དྡྷ་ཝཾ་སོ
༡. ནཱ་ར་ད་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
པ་དུ་མུ་ཏྟ་རོ ནཱ་མ ཛི་ནོ, ཨ་ཀྑོ་བྷོ སཱ་ག་རཱུ་པ་མོ.
༢. མ་ཎྜ་ཀ་པྤོ་ཝ སོ ཨཱ་སི, ཡ་མྷི བུ་དྡྷོ ཨ་ཛཱ་ཡ་ཐ;
ཨུ་སྶ་ནྣ་ཀུ་ས་ལཱ ཛ་ན་ཏཱ, ཏ་མྷི ཀ་པྤེ ཨ་ཛཱ་ཡ་ཐ.
༣. པ་དུ་མུ་ཏྟ་ར་སྶ བྷ་ག་ཝ་ཏོ, པ་ཋ་མེ དྷ་མྨ་དེ་ས་ནེ;
ཀོ་ཊི་ས་ཏ་ས་ཧ་སྶཱ་ནཾ, དྷ་མྨཱ་བྷི་ས་མ་ཡོ ཨ་ཧུ.
༤. ཏ་ཏོ པ་ར་མྤི ཝ་སྶ་ནྟེ, ཏ་པྤ་ཡ་ནྟེ ཙ པཱ་ཎི་ནེ;
ས་ཏྟ་ཏིཾ་ས་ས་ཏ་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ཡ་མྷི ཀཱ་ལེ མ་ཧཱ་ཝཱི་རོ, ཨཱ་ན་ནྡཾ ཨུ་པ་ས་ངྐ་མི;
པི་ཏུ་ས་ནྟི་ཀཾ ཨུ་པ་ག་ནྟྭཱ, ཨཱ་ཧ་ནཱི ཨ་མ་ཏ་དུ་ནྡུ་བྷིཾ.
༦. ཨཱ་ཧ་ཏེ ཨ་མ་ཏ་བྷེ་རི་མྷི, ཝ་སྶ་ནྟེ དྷ་མྨ་ཝུ་ཊྛི་ཡཱ;
པ་ཉྙཱ་ས་ས་ཏ་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༧. ཨོ་ཝཱ་ད་ཀོ ཝི་ཉྙཱ་པ་ཀོ, ཏཱ་ར་ཀོ ས་བྦ་པཱ་ཎི་ནཾ;
དེ་ས་ནཱ་ཀུ་ས་ལོ བུ་དྡྷོ, ཏཱ་རེ་སི ཛ་ན་ཏཾ བ་ཧུཾ.
༨. ས་ནྣི་པཱ་ཏཱ ཏ་ཡོ ཨཱ་སུཾ, པ་དུ་མུ་ཏྟ་ར་སྶ ས་ཏྠུ་ནོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ.
༩. ཡ་དཱ བུ་དྡྷོ ཨ་ས་མ་ས་མོ, ཝ་སི ཝེ་བྷཱ་ར་པ་བྦ་ཏེ;
ན་ཝུ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༡༠. པུ་ན ཙཱ་རི་ཀཾ པ་ཀྐ་ནྟེ, གཱ་མ་ནི་ག་མ་ར་ཊྛ་ཏོ;
ཨ་སཱི་ཏི་ཀོ་ཊི་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ.
༡༡. ཨ་ཧཾ ཏེ་ན ས་མ་ཡེ་ན, ཛ་ཊི་ལོ ནཱ་མ ར་ཊྛི་ཀོ;
ས་མྦུ་དྡྷ་པྤ་མུ་ཁཾ ས་ངྒྷཾ, ས་བྷ་ཏྟཾ དུ་སྶ་མ་དཱ་ས་ཧཾ.
༡༢. སོ་པི མཾ བུ་དྡྷོ བྱཱ་ཀཱ་སི, ས་ངྒྷ་མ་ཛ྄ཛྷེ ནི་སཱི་དི་ཡ;
‘‘ས་ཏ་ས་ཧ་སྶི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༣. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༤. ཏ་སྶཱ་པི ཝ་ཙ་ནཾ སུ་ཏྭཱ, ཨུ་ཏྟ་རིཾ ཝ་ཏ་མ་དྷི་ཊྛ་ཧིཾ;
ཨ་ཀཱ་སིཾ ཨུ་གྒ་ད་ལ༹ྷཾ དྷི་ཏིཾ, ད་ས་པཱ་ར་མི་པཱུ་རི་ཡཱ.
༡༥. བྱཱ་ཧ་ཏཱ ཏི་ཏྠི་ཡཱ ས་བྦེ, ཝི་མ་ནཱ དུ་མྨ་ནཱ ཏ་དཱ;
ན ཏེ་སཾ ཀེ་ཙི པ་རི་ཙ་ར་ནྟི, ར་ཊྛ་ཏོ ནི་ཙྪུ་བྷ་ནྟི ཏེ.
༡༦. ས་བྦེ ཏ་ཏྠ ས་མཱ་ག་ནྟྭཱ, ཨུ་པ་ག་ཙྪུཾ བུ་དྡྷ་ས་ནྟི་ཀེ;
ཏུ་ཝཾ ནཱ་ཐོ མ་ཧཱ་ཝཱི་ར, ས་ར་ཎཾ ཧོ་ཧི ཙ་ཀྑུ་མ.
༡༧. ཨ་ནུ་ཀ་མྤ་ཀོ ཀཱ་རུ་ཎི་ཀོ, ཧི་ཏེ་སཱི ས་བྦ་པཱ་ཎི་ནཾ;
ས་མྤ་ཏྟེ ཏི་ཏྠི་ཡེ ས་བྦེ, པ་ཉྩ་སཱི་ལེ པ་ཏི་ཊྛ་པི.
༡༨. ཨེ་ཝཾ ནི་རཱ་ཀུ་ལཾ ཨཱ་སི, སུ་ཉྙ་ཏཾ ཏི་ཏྠི་ཡེ་ཧི ཏཾ;
ཝི་ཙི་ཏྟཾ ཨ་ར་ཧ་ནྟེ་ཧི, ཝ་སཱི་བྷཱུ་ཏེ་ཧི ཏཱ་དི་ཧི.
༡༩. ན་ག་རཾ ཧཾ་ས་ཝ་ཏཱི ནཱ་མ, ཨཱ་ན་ནྡོ ནཱ་མ ཁ་ཏྟི་ཡོ;
སུ་ཛཱ་ཏཱ ནཱ་མ ཛ་ནི་ཀཱ, པ་དུ་མུ་ཏྟ་ར་སྶ ས་ཏྠུ་ནོ.
༢༠. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ན་ར་ཝཱ་ཧ་ནོ ཡ་སོ ཝ་ས་ཝ་ཏྟཱི [ནཱ་རི་ཝཱ་ཧ་ནོ ཡ་ས་ཝ་ཏཱི (སྱཱ. ཀཾ.)], ཏ་ཡོ པཱ་སཱ་ད་མུ་ཏྟ་མཱ.
༢༡. ཏི་ཙ་ཏྟཱ་རཱི་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
ཝ་སུ་ད་ཏྟཱ ནཱ་མ ནཱ་རཱི, ཨུ་ཏྟ་མོ ནཱ་མ ཨ་ཏྲ་ཛོ.
༢༢. ནི་མི་ཏྟེ ཙ་ཏུ་རོ དི་སྭཱ, པཱ་སཱ་དེ་ནཱ་བྷི་ནི་ཀྑ་མི;
ས་ཏྟཱ་ཧཾ པ་དྷཱ་ན་ཙཱ་རཾ, ཨ་ཙ་རཱི པུ་རི་སུ་ཏྟ་མོ.
༢༣. བྲ་ཧྨུ་ནཱ ཡཱ་ཙི་ཏོ ས་ནྟོ, པ་དུ་མུ་ཏྟ་རོ ཝི་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, མི་ཐི་ལུ་ཡྻཱ་ན་མུ་ཏྟ་མེ.
༢༤. དེ་ཝ་ལོ ཙ སུ་ཛཱ་ཏོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
སུ་མ་ནོ ནཱ་མུ་པ་ཊྛཱ་ཀོ, པ་དུ་མུ་ཏྟ་ར་སྶ མ་ཧེ་སི་ནོ.
༢༥. ཨ་མི་ཏཱ ཙ ཨ་ས་མཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ས་ལ་ལོ་ཏི པ་ཝུ་ཙྩ་ཏི.
༢༦. ཝི་ཏི་ཎྞོ ཙེ་ཝ [ཨ་མི་ཏོ ཙེ་ཝ (སྱཱ.)] ཏི་སྶོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ཧ་ཊྛཱ ཙེ་ཝ ཝི་ཙི་ཏྟཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༧. ཨ་ཊྛ་པ་ཎྞཱ་ས་ར་ཏ་ནཾ, ཨ་ཙྩུ་གྒ་ཏོ མ་ཧཱ་མུ་ནི;
ཀ་ཉྩ་ན་གྒྷི་ཡ་ས་ངྐཱ་སོ, དྭ་ཏྟིཾ་ས་ཝ་ར་ལ་ཀྑ་ཎོ.
༢༨. ཀུ་ཊྚཱ ཀ་ཝཱ་ཊཱ བྷི་ཏྟཱི ཙ, རུ་ཀྑཱ ན་ག་སི་ལུ་ཙྩ་ཡཱ;
ན ཏ་སྶཱ་ཝ་ར་ཎཾ ཨ་ཏྠི, ས་མ་ནྟཱ དྭཱ་ད་ས་ཡོ་ཛ་ནེ.
༢༩. ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༣༠. ས་ནྟཱ་རེ་ཏྭཱ བ་ཧུ་ཛ་ནཾ, ཚི་ནྡི་ཏྭཱ ས་བྦ་སཾ་ས་ཡཾ;
ཛ་ལི་ཏྭཱ ཨ་གྒི་ཀྑ་ནྡྷོ་ཝ ནི་བྦུ་ཏོ སོ ས་སཱ་ཝ་ཀོ.
༣༡. པ་དུ་མུ་ཏྟ་རོ ཛི་ནོ བུ་དྡྷོ, ན་ནྡཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཐཱུ་པ་ཝ་རོ, དྭཱ་ད་སུ་བྦེ་དྷ་ཡོ་ཛ་ནོ་ཏི.
པ་དུ་མུ་ཏྟ་ར་སྶ བྷ་ག་ཝ་ཏོ ཝཾ་སོ ད་ས་མོ.