༨. བྷ་དྡ་ཛི་ཏྠེ་ར་ཨ་པ་དཱ་ནཾ
༩༨. ‘‘ཨོ་ག་ཡ྄ཧ ཡཾ པོ་ཀྑ་ར་ཎིཾ, ནཱ་ནཱ་ཀུ་ཉྫ་ར་སེ་ཝི་ཏཾ;
ཨུ་དྡྷ་རཱ་མི བྷི་སཾ ཏ་ཏྠ, གྷཱ་ས་ཧེ་ཏུ ཨ་ཧཾ ཏ་དཱ.
༩༩. ‘‘བྷ་ག་ཝཱ ཏ་མྷི ས་མ་ཡེ, པ་དུ་མུ་ཏྟ་ར་ས་ཝ྄ཧ་ཡོ;
ར་ཏྟ་མྦ་ར་དྷ་རོ བུ་དྡྷོ, ག་ཙྪ་ཏེ ཨ་ནི་ལ་ཉྫ་སེ.
༡༠༠. ‘‘དྷུ་ན་ནྟོ པཾ་སུ་ཀཱུ་ལཱ་ནི, ས་དྡཾ ཨ་སྶོ་ས་ཧཾ ཏ་དཱ;
ཨུ་དྡྷཾ ནི་ཛ྄ཛྷཱ་ཡ་མཱ་ནོ་ཧཾ, ཨ་དྡ་སཾ ལོ་ཀ་ནཱ་ཡ་ཀཾ.
༡༠༡. ‘‘ཏ་ཏྠེ་ཝ ཋི་ཏ་ཀོ ས་ནྟོ, ཨཱ་ཡཱ་ཙིཾ ལོ་ཀ་ནཱ་ཡ་ཀཾ;
མ་དྷུཾ བྷི་སེ་ཧི ས་ཧི་ཏཾ, ཁཱི་རཾ ས་པྤིཾ མུ་ལཱ༹་ལི་ཀཾ [མ་དྷུཾ བྷི་སེ་ཧི པ་ཙ་ཏི, ཁཱི་ར་ས་པྤི མུ་ལཱ་ལི་བྷི (ཀ.) བྷི་ས་དཱ་ཡ་ཀ་ཏྠེ་རཱ་པ་དཱ་ནེ་པི].
༡༠༢. ‘‘པ་ཊི་གྒ་ཎྷཱ་ཏུ མེ བུ་དྡྷོ, ཨ་ནུ་ཀ་མྤཱ་ཡ ཙ་ཀྑུ་མཱ;
ཏ་ཏོ ཀཱ་རུ་ཎི་ཀོ ས་ཏྠཱ, ཨོ་རོ་ཧི་ཏྭཱ མ་ཧཱ་ཡ་སོ.
༡༠༣. ‘‘པ་ཊི་གྒ་ཎྷི མ་མ བྷི་ཀྑཾ, ཨ་ནུ་ཀ་མྤཱ་ཡ ཙ་ཀྑུ་མཱ;
པ་ཊི་གྒ་ཧེ་ཏྭཱ ས་མྦུ་དྡྷོ, ཨ་ཀཱ མེ ཨ་ནུ་མོ་ད་ནཾ.
༡༠༤. ‘‘‘སུ་ཁཱི ཧོ་ཏུ མ་ཧཱ་པུ་ཉྙ, ག་ཏི ཏུ་ཡ྄ཧཾ ས་མི་ཛ྄ཛྷ་ཏུ;
ཨི་མི་ནཱ བྷི་ས་དཱ་ནེ་ན, ལ་བྷ་སྶུ ཝི་པུ་ལཾ སུ་ཁཾ’.
༡༠༥. ‘‘ཨི་དཾ ཝ་ཏྭཱ་ན ས་མྦུ་དྡྷོ, ཛ་ལ་ཛུ་ཏྟ་མ་ནཱ་མ་ཀོ;
བྷི་ཀྑ་མཱ་དཱ་ཡ ས་མྦུ་དྡྷོ, ཨཱ་ཀཱ་སེ་ནཱ་ག་མཱ ཛི་ནོ.
༡༠༦. ‘‘ཏ་ཏོ བྷི་སཾ ག་ཧེ་ཏྭཱ་ན, ཨ་ག་ཙྪིཾ མ་མ ཨ་སྶ་མཾ;
བྷི་སཾ རུ་ཀྑེ ལ་གྒེ་ཏྭཱ་ན, མ་མ དཱ་ནཾ ཨ་ནུ་སྶ་རིཾ.
༡༠༧. ‘‘མ་ཧཱ་ཝཱ་ཏོ ཨུ་ཊྛ་ཧི་ཏྭཱ, ས་ཉྩཱ་ལེ་སི ཝ་ནཾ ཏ་དཱ;
ཨཱ་ཀཱ་སོ ཨ་བྷི་ནཱ་དི་ཏྠ, ཨ་ས་ནཱི ཙ ཕ་ལཱི ཏ་དཱ.
༡༠༨. ‘‘ཏ་ཏོ མེ ཨ་ས་ནཱི་པཱ་ཏོ, མ་ཏྠ་ཀེ ནི་པ་ཏཱི ཏ་དཱ;
སོ་ཧཾ ནི་སི་ནྣ་ཀོ ས་ནྟོ, ཏ་ཏྠ ཀཱ་ལ་ངྐ་ཏོ ཨ་ཧཾ.
༡༠༩. ‘‘པུ་ཉྙ་ཀ་མྨེ་ན ས་ཉྙུ་ཏྟོ, ཏུ་སི་ཏཾ ཨུ་པ་པ་ཛྫ་ཧཾ;
ཀ་ལེ༹་ཝ་རཾ མེ པ་ཏི་ཏཾ, དེ་ཝ་ལོ་ཀེ ར་མཱ་མ་ཧཾ.
༡༡༠. ‘‘ཚ་ལ༹་སཱི་ཏི་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
སཱ་ཡཾ པཱ་ཏཾ ཨུ་པ་ཊྛ་ནྟི, བྷི་ས་དཱ་ན་སྶི་དཾ ཕ་ལཾ.
༡༡༡. ‘‘མ་ནུ་སྶ་ཡོ་ནི་མཱ་ག་ནྟྭཱ, སུ་ཁི་ཏོ ཧོ་མ་ཧཾ ཏ་དཱ;
བྷོ་གཱ མེ ཨཱུ་ན་ཏཱ ན་ཏྠི, བྷི་ས་དཱ་ན་སྶི་དཾ ཕ་ལཾ.
༡༡༢. ‘‘ཨ་ནུ་ཀ་མྤི་ཏ་ཀོ ཏེ་ན, དེ་ཝ་དེ་ཝེ་ན ཏཱ་དི་ནཱ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༡༡༣. ‘‘ས་ཏ་ས་ཧ་སྶི་ཏོ ཀ་པྤེ, ཡཾ བྷི་སཾ ཨ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བྷི་ས་དཱ་ན་སྶི་དཾ ཕ་ལཾ.
༡༡༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༡༥. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༡༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བྷ་དྡ་ཛི་ཏྠེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
བྷ་དྡ་ཛི་ཏྠེ་ར་སྶཱ་པ་དཱ་ནཾ ཨ་ཊྛ་མཾ.