༥༦. ཡ་ས་ཝ་གྒོ
༡. ཡ་ས་ཏྠེ་ར་ཨ་པ་དཱ་ནཾ
༡. ‘‘མ་ཧཱ་ས་མུ་དྡཾ ཨོ་གྒ་ཡ྄ཧ, བྷ་ཝ་ནཾ མེ སུ་ནི་མྨི་ཏཾ;
སུ་ནི་མྨི་ཏཱ པོ་ཀྑ་ར་ཎཱི, ཙ་ཀྐ་ཝཱ་ཀཱུ་པ་ཀཱུ་ཛི་ཏཱ.
༢. ‘‘མ་ནྡཱ་ར་ཀེ་ཧི ས་ཉྪ་ནྣཱ, པ་དུ་མུ་པྤ་ལ་ཀེ་ཧི ཙ;
ན་དཱི ཙ ས་ནྡ་ཏེ ཏ་ཏྠ, སུ་པ་ཏི་ཏྠཱ མ་ནོ་ར་མཱ.
༣. ‘‘མ་ཙྪ་ཀ་ཙྪ་པ་ས་ཉྪ་ནྣཱ, ནཱ་ནཱ་དི་ཛ་ས་མོ་ཏྠ་ཊཱ [ནཱ་ནཱ་མི་ག་ས་མོ་ཏྠ་ཊཱ (སྱཱ.)];
མ་ཡཱུ་ར་ཀོ་ཉྩཱ་བྷི་རུ་དཱ, ཀོ་ཀི་ལཱ་དཱི་ཧི ཝ་གྒུ་ཧི.
༤. ‘‘པཱ་རེ་ཝ་ཏཱ ར་ཝི་ཧཾ་སཱ, ཙ་ཀྐ་ཝཱ་ཀཱ ན་དཱི་ཙ་རཱ;
ཏི་ཏྟི་རཱ སཱ་ལི༹་ཀཱ ཙེ་ཏྠ, པཱ་ཝ་ཀཱ [ས་མྦ་ཀཱ (ཀ.)] ཛཱི་ཝཾ་ཛཱི་ཝ་ཀཱ.
༥. ‘‘ཧཾ་སཱ་ཀོ་ཉྩཱ་བྷི་ན་དི་ཏཱ, ཀོ་སི་ཡཱ པི་ངྒ་ལཱ [པི་ངྒ་ལཱི (སཱི.), སི་ངྒ་ལཱི, སི་ངྒྷ་ལཱི (ཀ.)] བ་ཧཱུ;
ས་ཏྟ་ར་ཏ་ན་ས་མྤ་ནྣཱ, མ་ཎི་མུ་ཏྟ་པ་ཝཱ་ལི༹་ཀཱ.
༦. ‘‘ས་བྦེ སོ་ཎྞ་མ་ཡཱ རུ་ཀྑཱ, ནཱ་ནཱ་ཁ་ནྡྷ་ས་མེ་རི་ཏཱ;
ཨུ་ཛྫོ་ཏེ་ནྟི དི་ཝཱ་ར་ཏྟིཾ, བྷ་ཝ་ནཾ ས་བྦ་ཀཱ་ལི་ཀཾ.
༧. ‘‘ས་ཊྛི་ཏུ་རི་ཡ་ས་ཧ་སྶཱ་ནི, སཱ་ཡཾ པཱ་ཏོ པ་ཝ་ཛྫ་རེ;
སོ་ལ༹་སི་ཏྠི་ས་ཧ་སྶཱ་ནི, པ་རི་ཝཱ་རེ་ནྟི མཾ ས་དཱ.
༨. ‘‘ཨ་བྷི་ནི་ཀྑ་མྨ བྷ་ཝ་ནཱ, སུ་མེ་དྷཾ ལོ་ཀ་ནཱ་ཡ་ཀཾ;
པ་ས་ནྣ་ཙི་ཏྟོ སུ་མ་ནོ, ཝ་ནྡ་ཡིཾ ཏཾ [ས་བྦ་ད་སྶིཾ (ཀ.)] མ་ཧཱ་ཡ་སཾ.
༩. ‘‘ས་མྦུ་དྡྷཾ ཨ་བྷི་ཝཱ་དེ་ཏྭཱ, ས་ས་ངྒྷཾ ཏཾ ནི་མ་ནྟ་ཡིཾ;
ཨ་དྷི་ཝཱ་སེ་སི སོ དྷཱི་རོ, སུ་མེ་དྷོ ལོ་ཀ་ནཱ་ཡ་ཀོ.
༡༠. ‘‘མ་མ དྷ་མྨ་ཀ་ཐཾ ཀ་ཏྭཱ, ཨུ་ཡྻོ་ཛེ་སི མ་ཧཱ་མུ་ནི;
ས་མྦུ་དྡྷཾ ཨ་བྷི་ཝཱ་དེ་ཏྭཱ, བྷ་ཝ་ནཾ མེ ཨུ་པཱ་ག་མིཾ.
༡༡. ‘‘ཨཱ་མ་ནྟ་ཡིཾ པ་རི་ཛ་ནཾ, ས་བྦེ ས་ནྣི་པ་ཏུཾ ཏ་དཱ;
‘པུ་བྦ་ཎྷ་ས་མ་ཡཾ བུ་དྡྷོ, བྷ་ཝ་ནཾ ཨཱ་ག་མི་སྶ་ཏི’.
༡༢. ‘‘‘ལཱ་བྷཱ ཨ་མྷཾ སུ་ལ་དྡྷཱ ནོ, ཡེ ཝ་སཱ་མ ཏ་ཝ་ནྟི་ཀེ;
མ་ཡ་མྤི བུ་དྡྷ་སེ་ཊྛ་སྶ, པཱུ་ཛ་ཡི་སྶཱ་མ ས་ཏྠུ་ནོ’.
༡༣. ‘‘ཨ་ནྣཾ པཱ་ནཾ པ་ཊྛ་པེ་ཏྭཱ, ཀཱ་ལཾ ཨཱ་རོ་ཙ་ཡིཾ ཨ་ཧཾ;
ཝ་སཱི་ས་ཏ་ས་ཧ་སྶེ་ཧི, ཨུ་པེ་སི ལོ་ཀ་ནཱ་ཡ་ཀོ.
༡༤. ‘‘པ་ཉྩ་ངྒི་ཀེ་ཧི ཏུ་རི་ཡེ་ཧི, པ་ཙྩུ་གྒ་མ་མ་ཀཱ་ས་ཧཾ;
ས་བྦ་སོ་ཎྞ་མ་ཡེ པཱི་ཋེ, ནི་སཱི་དི པུ་རི་སུ་ཏྟ་མོ.
༡༥. ‘‘ཨུ་པ་རི་ཙྪ་ད་ནཾ ཨཱ་སི, ས་བྦ་སོ་ཎྞ་མ་ཡཾ ཏ་དཱ;
བཱི་ཛ་ནཱི་ཡོ པ་ཝཱ་ཡ་ནྟི, བྷི་ཀྑུ་ས་ངྒྷཾ ཨ་ནུ་ཏྟ་རཾ.
༡༦. ‘‘པ་ཧཱུ་ཏེ་ན་ནྣ་པཱ་ནེ་ན, བྷི་ཀྑུ་ས་ངྒྷཾ ཨ་ཏ་པྤ་ཡིཾ;
པ་ཙྩེ་ཀ་དུ་སྶ་ཡུ་ག་ལེ, བྷི་ཀྑུ་ས་ངྒྷ་སྶ་དཱ་ས་ཧཾ.
༡༧. ‘‘ཡཾ ཝ་དེ་ཏི སུ་མེ་དྷོ སོ, ཨཱ་ཧུ་ཏཱི་ནཾ པ་ཊི་གྒ་ཧོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༡༨. ‘‘‘ཡོ མཾ ཨ་ནྣེ་ན པཱ་ནེ་ན, ས་བྦེ ཨི་མེ ཙ ཏ་པྤ་ཡི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༡༩. ‘‘‘ཨ་ཊྛཱ་ར་སེ ཀ་པྤ་ས་ཏེ, དེ་ཝ་ལོ་ཀེ ར་མི་སྶ་ཏི;
ས་ཧ་སྶ་ཀྑ་ཏྟུཾ རཱ་ཛཱ་ཡཾ, ཙ་ཀྐ་ཝ་ཏྟཱི བྷ་ཝི་སྶ་ཏི.
༢༠. ‘‘‘ཨུ་པ་ག་ཙྪ་ཏི ཡཾ ཡོ་ནིཾ, དེ་ཝ་ཏྟཾ ཨ་ཐ མཱ་ནུ་སཾ;
ས་བྦ་སོ་ཎྞ་མ་ཡཾ ཏ་སྶ, ཚ་ད་ནཾ དྷཱ་ར་ཡི་སྶ་ཏི.
༢༡. ‘‘‘ཏིཾ་ས་ཀ་པྤ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༢༢. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ.
༢༣. ‘‘‘བྷི་ཀྑུ་ས་ངྒྷེ ནི་སཱི་དི་ཏྭཱ, སཱི་ཧ་ནཱ་དཾ ན་དི་སྶ་ཏི’;
ཙི་ཏ་ཀེ ཚ་ཏྟཾ དྷཱ་རེ་ནྟི, ཧེ་ཊྛཱ ཚ་ཏྟ་མྷི ཌ་ཡ྄ཧ་ཐ.
༢༤. ‘‘སཱ་མ་ཉྙཾ མེ ཨ་ནུ་པྤ་ཏྟཾ, ཀི་ལེ་སཱ ཛྷཱ་པི་ཏཱ མ་ཡཱ;
མ་ཎྜ་པེ རུ་ཀྑ་མཱུ་ལེ ཝཱ, ས་ནྟཱ་སོ མེ ན ཝི་ཛྫ་ཏི.
༢༥. ‘‘ཏིཾ་ས་ཀ་པྤ་ས་ཧ་སྶ་མྷི, ཡཾ དཱ་ན་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ས་བྦ་དཱ་ན་སྶི་དཾ ཕ་ལཾ.
༢༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༢༧. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༢༨. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཡ་སོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཡ་ས་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ན་དཱི་ཀ་སྶ་པ་ཏྠེ་ར་ཨ་པ་དཱ་ནཾ
༢༩. ‘‘པ་དུ་མུ་ཏྟ་ར་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
པི་ཎྜ་ཙཱ་རཾ ཙ་ར་ནྟ་སྶ, ཝཱ་ར་ཏོ ཨུ་ཏྟ་མཾ ཡ་སཾ;
ཨ་གྒ་ཕ་ལཾ ག་ཧེ་ཏྭཱ་ན, ཨ་དཱ་སིཾ ས་ཏྠུ་ནོ ཨ་ཧཾ.
༣༠. ‘‘ཏེ་ན ཀ་མྨེ་ན དེ་ཝི་ནྡོ, ལོ་ཀ་ཛེ་ཊྛོ ན་རཱ་ས་བྷོ;
ས་མྤ་ཏྟོ་མྷི ཨ་ཙ་ལཾ ཋཱ་ནཾ, ཧི་ཏྭཱ ཛ་ཡ་པ་རཱ་ཛ་ཡཾ.
༣༡. ‘‘ས་ཏ་ས་ཧ་སྶི་ཏོ ཀ་པྤེ, ཡཾ ཕ་ལཾ ཨ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨ་གྒ་དཱ་ན་སྶི་དཾ ཕ་ལཾ.
༣༢. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༣༣. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ན་དཱི་ཀ་སྶ་པོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ན་དཱི་ཀ་སྶ་པ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ག་ཡཱ་ཀ་སྶ་པ་ཏྠེ་ར་ཨ་པ་དཱ་ནཾ
༣༥. ‘‘ཨ་ཛི་ན་ཙ་མྨ་ཝ་ཏྠོ་ཧཾ [ཨ་ཛི་ན་ཝ་ཏྟཾ ནི་ཝ་ཏྟོ་ཧཾ (སཱི.)], ཁཱ་རི་བྷཱ་ར་དྷ་རོ ཏ་དཱ;
ཁཱ་རི་ཀཾ ཧཱ་ར་ཡི་ཏྭཱ་ན, ཀོ་ལཾ ཨ་ཧཱ་སི ཨ་སྶ་མཾ.
༣༦. ‘‘བྷ་ག་ཝཱ ཏ་མྷི ས་མ་ཡེ, ཨེ་ཀོ ཨ་དུ་ཏི་ཡོ ཛི་ནོ;
མ་མ་སྶ་མཾ ཨུ་པཱ་ག་ཙྪི, ཛོ་ཏེ་ནྟོ ས་བྦ་ཀཱ་ལི་ཀཾ.
༣༧. ‘‘ས་ཀཾ ཙི་ཏྟཾ པ་སཱ་དེ་ཏྭཱ, ཨ་བྷི་ཝཱ་དེ་ཏྭཱ་ན སུ་བྦ་ཏཾ;
ཨུ་བྷོ ཧ་ཏྠེ་ཧི པ་གྒ་ཡ྄ཧ, ཀོ་ལཾ བུ་དྡྷ་སྶ་དཱ་ས་ཧཾ.
༣༨. ‘‘ཨེ་ཀ་ཏིཾ་སེ ཨི་ཏོ ཀ་པྤེ, ཡཾ ཕ་ལཾ ཨ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཀོ་ལ་དཱ་ན་སྶི་དཾ ཕ་ལཾ.
༣༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༤༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༤༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ག་ཡཱ་ཀ་སྶ་པོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ག་ཡཱ་ཀ་སྶ་པ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཀི་མི་ལ་ཏྠེ་ར་ཨ་པ་དཱ་ནཾ
༤༢. ‘‘ནི་བྦུ་ཏེ ཀ་ཀུ་ས་ནྡྷ་མྷི, བྲཱ་ཧྨ་ཎ་མྷི ཝུ་སཱི་མ་ཏི;
ག་ཧེ་ཏྭཱ ས་ལ་ལཾ མཱ་ལཾ, མ་ཎྜ་པཾ ཀཱ་ར་ཡིཾ ཨ་ཧཾ.
༤༣. ‘‘ཏཱ་ཝ་ཏིཾ་སཾ ག་ཏོ ས་ནྟོ, ལ་བྷི་མྷ [ལ་བྷཱ་མི (ཀ.)] བྱ་མྷ་མུ་ཏྟ་མཾ;
ཨ་ཉྙེ དེ་ཝེ་ཏི་རོ་ཙཱ་མི, པུ་ཉྙ་ཀ་མྨ་སྶི་དཾ ཕ་ལཾ.
༤༤. ‘‘དི་ཝཱ ཝཱ ཡ་དི ཝཱ ར་ཏྟིཾ, ཙ་ངྐ་མ་ནྟོ ཋི་ཏོ ཙ་ཧཾ;
ཚ་ནྣོ ས་ལ་ལ་པུ་པྥེ་ཧི, པུ་ཉྙ་ཀ་མྨ་སྶི་དཾ ཕ་ལཾ.
༤༥. ‘‘ཨི་མ་སྨིཾ་ཡེ་ཝ ཀ་པྤ་མྷི, ཡཾ བུ་དྡྷ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༤༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༤༧. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༤༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀི་མི་ལོ [ཀི་མྦི་ལོ (སཱི.)] ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཀི་མི་ལ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. ཝ་ཛྫཱི་པུ་ཏྟ་ཏྠེ་ར་ཨ་པ་དཱ་ནཾ
༤༩. ‘‘ས་ཧ་སྶ་རཾ་སཱི བྷ་ག་ཝཱ, ས་ཡ་མྦྷཱུ ཨ་པ་རཱ་ཛི་ཏོ;
ཝི་ཝེ་ཀཱ ཝུ་ཊྛ་ཧི་ཏྭཱ་ན, གོ་ཙ་རཱ་ཡཱ་བྷི་ནི་ཀྑ་མི.
༥༠. ‘‘ཕ་ལ་ཧ་ཏྠོ ཨ་ཧཾ དི་སྭཱ, ཨུ་པ་ག་ཙྪིཾ ན་རཱ་ས་བྷཾ;
པ་ས་ནྣ་ཙི་ཏྟོ སུ་མ་ནོ, ས་ཝ་ཎྚཾ ཨ་ད་དིཾ ཕ་ལཾ.
༥༡. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ཕ་ལཾ ཨ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཕ་ལ་དཱ་ན་སྶི་དཾ ཕ་ལཾ.
༥༢. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༥༣. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༥༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝ་ཛྫཱི་པུ་ཏྟོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཝ་ཛྫཱི་པུ་ཏྟ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. ཨུ་ཏྟ་ར་ཏྠེ་ར་ཨ་པ་དཱ་ནཾ
༥༥. ‘‘སུ་མེ་དྷོ ནཱ་མ ས་མྦུ་དྡྷོ, བཱ་ཏྟིཾ་ས་ཝ་ར་ལ་ཀྑ་ཎོ;
ཝི་ཝེ་ཀ་ཀཱ་མོ བྷ་ག་ཝཱ, ཧི་མ་ཝ་ནྟ་མུ་པཱ་ག་མི.
༥༦. ‘‘ཨ་ཛ྄ཛྷོ་གཱ་ཧེ་ཏྭཱ ཧི་མ་ཝ་ནྟཾ, ཨ་གྒོ ཀཱ་རུ་ཎི་ཀོ མུ་ནི;
པ་ལླ་ངྐཾ ཨཱ་བྷུ་ཛི་ཏྭཱ་ན, ནི་སཱི་དི པུ་རི་སུ་ཏྟ་མོ.
༥༧. ‘‘ཝི་ཛྫ་དྷ་རོ ཏ་དཱ ཨཱ་སིཾ, ཨ་ནྟ་ལི་ཀྑ་ཙ་རོ ཨ་ཧཾ;
ཏི་སཱུ་ལཾ སུ་ག་ཏཾ ག་ཡ྄ཧ, ག་ཙྪཱ་མི ཨ་མྦ་རེ ཏ་དཱ.
༥༨. ‘‘པ་བྦ་ཏ་གྒེ ཡ་ཐཱ ཨ་གྒི, པུ་ཎྞ་མཱ་ཡེ་ཝ ཙ་ནྡི་མཱ;
ཝ་ནཾ ཨོ་བྷཱ་ས་ཏེ བུ་དྡྷོ, སཱ་ལ་རཱ་ཛཱ་ཝ ཕུ་ལླི་ཏོ.
༥༩. ‘‘ཝ་ན་གྒཱ ནི་ཀྑ་མི་ཏྭཱ་ན, བུ་དྡྷ་རཾ་སཱི་བྷི་དྷཱ་ཝ་རེ [བུ་དྡྷ་རཾ་སཱི ཝི་དྷཱ་ཝ་རེ (སཱི. ཀ.)];
ན་ལ༹་གྒི་ཝ་ཎྞ་ས་ངྐཱ་སཱ [ན་ལ༹་གྒི་ཝ ན་ས་ངྐཱ་སཾ (སཱི.)], དི་སྭཱ ཙི་ཏྟཾ པ་སཱ་ད་ཡིཾ.
༦༠. ‘‘ཝི་ཙི་ནཾ ཨ་དྡ་སཾ པུ་པྥཾ, ཀ་ཎི་ཀཱ་རཾ དེ་ཝ་ག་ནྡྷི་ཀཾ;
ཏཱི་ཎི པུ་པྥཱ་ནི ཨཱ་དཱ་ཡ, བུ་དྡྷ་སེ་ཊྛ་མ་པཱུ་ཛ་ཡིཾ.
༦༡. ‘‘བུ་དྡྷ་སྶ ཨཱ་ནུ་བྷཱ་ཝེ་ན, ཏཱི་ཎི པུ་པྥཱ་ནི མེ ཏ་དཱ;
ཨུ་དྡྷཾ ཝ་ཎྚཱ ཨ་དྷོ་པ་ཏྟཱ, ཚཱ་ཡཾ ཀུ་བྦ་ནྟི ས་ཏྠུ་ནོ.
༦༢. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ ཏཱ་ཝ་ཏིཾ་ས་མ་ག་ཙྪ་ཧཾ.
༦༣. ‘‘ཏ་ཏྠ མེ སུ་ཀ་ཏཾ བྱ་མྷཾ, ཀ་ཎི་ཀཱ་རཱི་ཏི [ཀ་ཎི་ཀཱ་རོ་ཏི (སཱི.)] ཉཱ་ཡ་ཏི;
ས་ཊྛི་ཡོ་ཛ་ན་མུ་བྦེ་དྷཾ, ཏིཾ་ས་ཡོ་ཛ་ན་ཝི་ཏྠ་ཏཾ.
༦༤. ‘‘ས་ཧ་སྶ་ཀ་ཎྜཾ ས་ཏ་བྷེ་ཎྜུ, དྷ་ཛཱ་ལུ ཧ་རི་ཏཱ་མ་ཡཾ;
ས་ཏ་ས་ཧ་སྶ་ནི་ཡྻཱུ་ཧཱ [ས་ཏ་ས་ཧ་སྶཱ་ནི བྱཱུ་ཧཱ་ནི (སཱི.)], བྱ་མྷེ པཱ་ཏུ་བྷ་ཝིཾ་སུ [པཱ་ཏུ་ར་ཧཾ་སུ (སཱི.), པཱ་ཏུ་ར་ཧིཾ་སུ (ཀ.)] མེ.
༦༥. ‘‘སོ་ཎྞ་མ་ཡཱ མ་ཎི་མ་ཡཱ, ལོ་ཧི་ཏ་ངྐ་མ་ཡཱ་པི ཙ;
ཕ་ལི་ཀཱ་པི ཙ པ་ལླ་ངྐཱ, ཡེ་ནི་ཙྪ་ཀཱ ཡ་དི་ཙྪ་ཀཱ.
༦༦. ‘‘མ་ཧཱ་ར་ཧ་ཉྩ ས་ཡ་ནཾ, ཏཱུ་ལི་ཀཱ ཝི་ཀ་ཏཱི་ཡུ་ཏཾ;
ཨུ་དྡྷ་ལོ་མི་ཉྩ ཨེ་ཀ་ནྟཾ, བི་མྦོ་ཧ་ན་ས་མཱ་ཡུ་ཏཾ.
༦༧. ‘‘བྷ་ཝ་ནཱ ནི་ཀྑ་མི་ཏྭཱ་ན, ཙ་ར་ནྟོ དེ་ཝ་ཙཱ་རི་ཀཾ;
ཡ་ཐཱ ཨི་ཙྪཱ་མི [ཡ་ཐཱ ག་ཙྪཱ་མི (སཱི.)] ག་མ་ནཾ, དེ་ཝ་ས་ངྒྷ་པུ་ར་ཀྑ་ཏོ.
༦༨. ‘‘པུ་པྥ་སྶ ཧེ་ཊྛཱ ཏི་ཊྛཱ་མི, ཨུ་པ་རི་ཙྪ་ད་ནཾ མ་མ;
ས་མ་ནྟཱ ཡོ་ཛ་ན་ས་ཏཾ, ཀ་ཎི་ཀཱ་རེ་ཧི ཚཱ་དི་ཏཾ.
༦༩. ‘‘ས་ཊྛི་ཏུ་རི་ཡ་ས་ཧ་སྶཱ་ནི, སཱ་ཡ་པཱ་ཏཾ ཨུ་པ་ཊྛ་ཧུཾ;
པ་རི་ཝཱ་རེ་ནྟི མཾ ནི་ཙྩཾ, ར་ཏྟི་ནྡི་ཝ་མ་ཏ་ནྡི་ཏཱ.
༧༠. ‘‘ཏ་ཏྠ ན་ཙྩེ་ཧི གཱི་ཏེ་ཧི, ཏཱ་ལེ་ཧི ཝཱ་དི་ཏེ་ཧི ཙ;
ར་མཱ་མི ཁི་ཌྜཱ ར་ཏི་ཡཱ, མོ་དཱ་མི ཀཱ་མ་ཀཱ་མ་ཧཾ.