༡༡. ར་ཊྛ་པཱ་ལ་ཏྠེ་ར་ཨ་པ་དཱ་ནཾ

༡༧༩. ‘‘པ་དུ་མུ་ཏྟ་ར་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;

ཝ་ར་ནཱ་གོ མ་ཡཱ དི་ནྣོ, ཨཱི་སཱ་ད་ནྟོ ཨུ་རཱུ་ལ༹ྷ་ཝཱ.

༡༨༠. ‘‘སེ་ཏ་ཙྪ་ཏྟོ་པ་སོ་བྷི་ཏོ, ས་ཀ་པྤ་ནོ [སཱི་ད་བྦ་ནོ (སཱི.)] ས་ཧ་ཏྠི་པོ;

ཨ་གྒྷཱ་པེ་ཏྭཱ་ན ཏཾ ས་བྦཾ, ས་ངྒྷཱ་རཱ་མཾ ཨ་ཀཱ་ར་ཡིཾ.

༡༨༡. ‘‘ཙ་ཏུ་པ་ཉྙཱ་ས་ས་ཧ་སྶཱ་ནི, པཱ་སཱ་དེ ཀཱ་ར་ཡིཾ ཨ་ཧཾ;

མ་ཧོ་གྷ་དཱ་ནཾ [མ་ཧ་གྒྷ་ཉྩ (སཱི.), མ་ཡཱ བྷ་ཏྟཾ (ཀ.) ཨ་པ. ཐེ་ར ༡.༢.༩༩] ཀ་རི་ཏྭཱ་ན, ནི་ཡྻཱ་དེ་སིཾ མ་ཧེ་སི་ནོ.

༡༨༢. ‘‘ཨ་ནུ་མོ་དི མ་ཧཱ་ཝཱི་རོ, ས་ཡ་མྦྷཱུ ཨ་གྒ་པུ་གྒ་ལོ;

ས་བྦེ ཛ་ནེ ཧཱ་ས་ཡ་ནྟོ, དེ་སེ་སི ཨ་མ་ཏཾ པ་དཾ.

༡༨༣. ‘‘ཏཾ མེ བུ་དྡྷོ ཝི་ཡཱ་ཀཱ་སི, ཛ་ལ་ཛུ་ཏྟ་མ་ནཱ་མ་ཀོ;

བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.

༡༨༤. ‘‘‘ཙ་ཏུ་པ་ཉྙཱ་ས་ས་ཧ་སྶཱ་ནི, པཱ་སཱ་དེ ཀཱ་ར་ཡཱི ཨ་ཡཾ;

ཀ་ཐ་ཡི་སྶཱ་མི ཝི་པཱ་ཀཾ, སུ་ཎཱ་ཐ མ་མ བྷཱ་ས་ཏོ.

༡༨༥. ‘‘‘ཨ་ཊྛཱ་ར་ས་ས་ཧ་སྶཱ་ནི, ཀཱུ་ཊཱ་གཱ་རཱ བྷ་ཝི་སྶ་རེ;

བྱ་མྷུ་ཏྟ་མ་མྷི ནི་བྦ་ཏྟཱ, ས་བྦ་སོ་ཎྞ་མ་ཡཱ ཙ ཏེ.

༡༨༦. ‘‘‘པ་ཉྙཱ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི;

ཨ་ཊྛ་པ་ཉྙཱ་ས་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི.

༡༨༧. ‘‘‘ཀ་པྤ་ས་ཏ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;

གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.

༡༨༨. ‘‘‘དེ་ཝ་ལོ་ཀཱ ཙ་ཝི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;

ཨ་ཌྜྷེ ཀུ་ལེ མ་ཧཱ་བྷོ་གེ, ནི་བྦ་ཏྟི་སྶ་ཏི ཏཱ་ཝ་དེ.

༡༨༩. ‘‘‘སོ པ་ཙྪཱ པ་བྦ་ཛི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;

ར་ཊྛ་པཱ་ལོ་ཏི ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ.

༡༩༠. ‘‘‘པ་དྷཱ་ན་པ་ཧི་ཏ་ཏྟོ སོ, ཨུ་པ་ས་ནྟོ ནི་རཱུ་པ་དྷི;

ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.

༡༩༡. ‘‘ཨུ་ཊྛཱ་ཡ ཨ་བྷི་ནི་ཀྑ་མྨ, ཛ་ཧི་ཏཱ བྷོ་ག་ས་མྤ་དཱ;

ཁེ་ལ༹་པི་ཎྜེ་ཝ བྷོ་ག་མྷི, པེ་མཾ མ་ཡ྄ཧཾ ན ཝི་ཛྫ་ཏི.

༡༩༢. ‘‘ཝཱི་རི་ཡཾ མེ དྷུ་ར་དྷོ་ར་ཡ྄ཧཾ, ཡོ་ག་ཀྑེ་མཱ་དྷི་ཝཱ་ཧ་ནཾ;

དྷཱ་རེ་མི ཨ་ནྟི་མཾ དེ་ཧཾ, ས་མྨཱ་ས་མྦུ་དྡྷ་སཱ་ས་ནེ.

༡༩༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.

༡༩༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.

༡༩༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ ར་ཊྛ་པཱ་ལོ ཐེ་རོ ཨི་མཱ གཱ་ཐཱ་ཡོ

ཨ་བྷཱ་སི་ཏྠཱ་ཏི.

ར་ཊྛ་པཱ་ལ་ཏྠེ་ར་སྶཱ་པ་དཱ་ནཾ ཨེ་ཀཱ་ད་ས་མཾ.

ཡ་ས་ཝ་གྒོ ཚ་པ་ཉྙཱ་ས་མོ.