༩. ཝ་ན་ཝ་ཙྪ་ཏྠེ་ར་ཨ་པ་དཱ་ནཾ
༢༥༡. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༢༥༢. ‘‘ཏ་དཱ་ཧཾ པ་བྦ་ཛི་ཏྭཱ་ན, ཏ་སྶ བུ་དྡྷ་སྶ སཱ་ས་ནེ;
ཡཱ་ཝ་ཛཱི་ཝཾ ཙ་རི་ཏྭཱ་ན, བྲ་ཧྨ་ཙཱ་རཾ ཏ་ཏོ ཙུ་ཏོ.
༢༥༣. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༢༥༤. ‘‘ཏ་ཏོ ཙུ་ཏོ ཨ་ར་ཉྙ་མྷི, ཀ་པོ་ཏོ ཨཱ་ས་ཧཾ ཏ་ཧིཾ;
ཝ་ས་ཏེ གུ་ཎ་ས་མྤ་ནྣོ, བྷི་ཀྑུ ཛྷཱ་ན་ར་ཏོ ས་དཱ.
༢༥༥. ‘‘མེ་ཏྟ་ཙི་ཏྟོ ཀཱ་རུ་ཎི་ཀོ, ས་དཱ པ་མུ་དི་ཏཱ་ན་ནོ;
ཨུ་པེ་ཀྑ་ཀོ མ་ཧཱ་ཝཱི་རོ, ཨ་པྤ་མ་ཉྙཱ་སུ ཀོ་ཝི་དོ.
༢༥༦. ‘‘ཝི་ནཱི་ཝ་ར་ཎ་ས་ངྐ་པྤེ, ས་བྦ་ས་ཏྟ་ཧི་ཏཱ་ས་ཡེ;
ཝི་ས་ཊྛོ ན་ཙི་རེ་ནཱ་སིཾ, ཏ་སྨིཾ སུ་ག་ཏ་སཱ་ཝ་ཀེ.
༢༥༧. ‘‘ཨུ་པེ་ཙྩ པཱ་ད་མཱུ་ལ་མྷི, ནི་སི་ནྣ་སྶ ཏ་དཱ་སྶ་མེ;
ཀ་དཱ་ཙི སཱ་མི་སཾ དེ་ཏི, དྷ་མྨཾ དེ་སེ་སི ཙེ་ཀ་དཱ.
༢༥༨. ‘‘ཏ་དཱ ཝི་པུ་ལ་པེ་མེ་ན, ཨུ་པཱ་སི་ཏྭཱ ཛི་ན་ཏྲ་ཛཾ;
ཏ་ཏོ ཙུ་ཏོ ག་ཏོ ས་གྒཾ, པ་ཝཱ་སོ ས་གྷ་རཾ ཡ་ཐཱ.
༢༥༩. ‘‘ས་གྒཱ ཙུ་ཏོ མ་ནུ་སྶེ་སུ, ནི་བྦ་ཏྟོ པུ་ཉྙ་ཀ་མྨུ་ནཱ;
ཨ་གཱ་རཾ ཚ་ཌྜ་ཡི་ཏྭཱ་ན, པ་བྦ་ཛིཾ བ་ཧུ་སོ ཨ་ཧཾ.
༢༦༠. ‘‘ས་མ་ཎོ ཏཱ་པ་སོ ཝི་པྤོ, པ་རི་བྦ་ཛོ ཏ་ཐེ་ཝ་ཧཾ;
ཧུ་ཏྭཱ ཝ་སིཾ ཨ་ར་ཉྙ་མྷི, ཨ་ནེ་ཀ་ས་ཏ་སོ ཨ་ཧཾ.
༢༦༡. ‘‘པ་ཙྪི་མེ ཙ བྷ་ཝེ དཱ་ནི, ར་མྨེ ཀ་པི་ལ་ཝ་ཏྠ་ཝེ;
ཝ་ཙྪ་གོ་ཏྟོ དི་ཛོ ཏ་སྶ, ཛཱ་ཡཱ་ཡ ཨ་ཧ་མོ་ཀྐ་མིཾ.
༢༦༢. ‘‘མཱ་ཏུ མེ དོ་ཧ་ལོ༹ ཨཱ་སི, ཏི་རོ་ཀུ་ཙྪི་ག་ཏ་སྶ མེ;
ཛཱ་ཡ་མཱ་ན་ས་མཱི་པ་མྷི, ཝ་ན་ཝཱ་སཱ་ཡ ནི་ཙྪ་ཡོ.
༢༦༣. ‘‘ཏ་ཏོ མེ ཨ་ཛ་ནཱི མཱ་ཏཱ, ར་མ་ཎཱི་ཡེ ཝ་ན་ནྟ་རེ;
ག་བྦྷ་ཏོ ནི་ཀྑ་མ་ནྟཾ མཾ, ཀཱ་སཱ་ཡེ་ན པ་ཊི་གྒ་ཧུཾ.
༢༦༤. ‘‘ཏ་ཏོ ཀུ་མཱ་རོ སི་དྡྷ་ཏྠོ, ཛཱ་ཏོ ས་ཀྱ་ཀུ་ལ་དྡྷ་ཛོ;
ཏ་སྶ མི་ཏྟོ པི་ཡོ ཨཱ་སིཾ, སཾ་ཝི་ས་ཊྛོ སུ་མཱ་ནི་ཡོ.
༢༦༥. ‘‘ས་ཏྟ་སཱ་རེ་བྷི་ནི་ཀྑ་ནྟེ, ཨོ་ཧཱ་ཡ ཝི་པུ་ལཾ ཡ་སཾ;
ཨ་ཧ་མྤི པ་བྦ་ཛི་ཏྭཱ་ན, ཧི་མ་ཝ་ནྟ་མུ་པཱ་ག་མིཾ.
༢༦༦. ‘‘ཝ་ནཱ་ལ་ཡཾ བྷཱ་ཝ་ནཱི་ཡཾ, ཀ་སྶ་པཾ དྷུ་ཏ་ཝཱ་དི་ཀཾ;
དི་སྭཱ སུ་ཏྭཱ ཛི་ནུ་པྤཱ་དཾ, ཨུ་པེ་སིཾ ན་ར་སཱ་ར་ཐིཾ.
༢༦༧. ‘‘སོ མེ དྷ་མྨ་མ་དེ་སེ་སི, ས་བྦ་ཏྠཾ ས་མྤ་ཀཱ་ས་ཡཾ;
ཏ་ཏོ་ཧཾ པ་བྦ་ཛི་ཏྭཱ་ན, ཝ་ན་མེ་ཝ པུ་ནཱ་ག་མཾ [པུ་ནཱ་ག་མིཾ (སཱི. པཱི.), པུ་ནོ་ཀྐ་མཾ (སྱཱ.)].
༢༦༨. ‘‘ཏ་ཏྠཱ་པྤ་མ་ཏྟོ ཝི་ཧ་རཾ, ཚ་ལ༹་བྷི་ཉྙཱ ཨ་ཕ་སྶ་ཡིཾ [ཨ་པ་སྶ་ཡིཾ (སྱཱ. ཀ.)];
ཨ་ཧོ སུ་ལ་དྡྷ་ལཱ་བྷོ་མྷི, སུ་མི་ཏྟེ་ནཱ་ནུ་ཀ་མྤི་ཏོ.
༢༦༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༧༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༧༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝ་ན་ཝ་ཙྪོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཝ་ན་ཝ་ཙྪ་ཏྠེ་ར་སྶཱ་པ་དཱ་ནཾ ན་ཝ་མཾ.