༡༠. ཙཱུ་ལ༹་སུ་ག་ནྡྷ་ཏྠེ་ར་ཨ་པ་དཱ་ནཾ
༢༧༢. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༢༧༣. ‘‘ཨ་ནུ་བྱ་ཉྫ་ན་ས་མྤ་ནྣོ, བཱ་ཏྟིཾ་ས་ཝ་ར་ལ་ཀྑ་ཎོ;
བྱཱ་མ་པྤ་བྷཱ་པ་རི་ཝུ་ཏོ, རཾ་སི་ཛཱ་ལ་ས་མོ་ཏྠ་ཊོ.
༢༧༤. ‘‘ཨ་སྶཱ་སེ་ཏཱ ཡ་ཐཱ ཙ་ནྡོ, སཱུ་རི་ཡོ་ཝ པ་བྷ་ངྐ་རོ;
ནི་བྦཱ་པེ་ཏཱ ཡ་ཐཱ མེ་གྷོ, སཱ་ག་རོ་ཝ གུ་ཎཱ་ཀ་རོ.
༢༧༥. ‘‘དྷ་ར་ཎཱི་རི་ཝ སཱི་ལེ་ན, ཧི་མ་ཝཱ་ཝ ས་མཱ་དྷི་ནཱ;
ཨཱ་ཀཱ་སོ ཝི་ཡ པ་ཉྙཱ་ཡ, ཨ་ས་ངྒོ ཨ་ནི་ལོ ཡ་ཐཱ.
༢༧༦. ‘‘ཏ་དཱ་ཧཾ བཱ་རཱ་ཎ་སི་ཡཾ, ཨུ་པ་པ་ནྣོ མ་ཧཱ་ཀུ་ལེ;
པ་ཧཱུ་ཏ་དྷ་ན་དྷ་ཉྙ་སྨིཾ, ནཱ་ནཱ་ར་ཏ་ན་ས་ཉྩ་ཡེ.
༢༧༧. ‘‘མ་ཧ་ཏཱ པ་རི་ཝཱ་རེ་ན, ནི་སི་ནྣཾ ལོ་ཀ་ནཱ་ཡ་ཀཾ;
ཨུ་པེ་ཙྩ དྷ་མྨ་མ་སྶོ་སིཾ, ཨ་མ་ཏཾ་ཝ མ་ནོ་ཧ་རཾ.
༢༧༨. ‘‘དྭ་ཏྟིཾ་ས་ལ་ཀྑ་ཎ་དྷ་རོ, ས་ན་ཀྑ་ཏྟོ་ཝ ཙ་ནྡི་མཱ;
ཨ་ནུ་བྱ་ཉྫ་ན་ས་མྤ་ནྣོ, སཱ་ལ་རཱ་ཛཱ་ཝ ཕུ་ལླི་ཏོ.
༢༧༩. ‘‘རཾ་སི་ཛཱ་ལ་པ་རི་ཀྑི་ཏྟོ, དི་ཏྟོ་ཝ ཀ་ན་ཀཱ་ཙ་ལོ;
བྱཱ་མ་པྤ་བྷཱ་པ་རི་ཝུ་ཏོ, ས་ཏ་རཾ་སཱི དི་ཝཱ་ཀ་རོ.
༢༨༠. ‘‘སོ་ཎྞཱ་ན་ནོ ཛི་ན་ཝ་རོ, ས་མ་ཎཱི་ཝ [ར་མྨ་ཎཱི་ཝ (སྱཱ.)] སི་ལུ་ཙྩ་ཡོ;
ཀ་རུ་ཎཱ་པུ་ཎྞ་ཧ་ད་ཡོ, གུ་ཎེ་ན ཝི་ཡ སཱ་ག་རོ.
༢༨༡. ‘‘ལོ་ཀ་ཝི་སྶུ་ཏ་ཀི་ཏྟི ཙ, སི་ནེ་རཱུ་ཝ ན་གུ་ཏྟ་མོ;
ཡ་ས་སཱ ཝི་ཏྠ་ཏོ ཝཱི་རོ, ཨཱ་ཀཱ་ས་ས་དི་སོ མུ་ནི.
༢༨༢. ‘‘ཨ་ས་ངྒ་ཙི་ཏྟོ ས་བྦ་ཏྠ, ཨ་ནི་ལོ ཝི་ཡ ནཱ་ཡ་ཀོ;
པ་ཏི་ཊྛཱ ས་བྦ་བྷཱུ་ཏཱ་ནཾ, མ་ཧཱི་ཝ མུ་ནི་ས་ཏྟ་མོ.
༢༨༣. ‘‘ཨ་ནུ་པ་ལི་ཏྟོ ལོ་ཀེ་ན, ཏོ་ཡེ་ན པ་དུ་མཾ ཡ་ཐཱ;
ཀུ་ཝཱ་ད་ག་ཙྪ་ད་ཧ་ནོ, ཨ་གྒི་ཁ་ནྡྷོ་ཝ སོ་བྷ་སི [སོ་བྷ་ཏི (སཱི.), སོ ཝ་སི (སྱཱ. ཀ.)].
༢༨༤. ‘‘ཨ་ག་དྷོ ཝི་ཡ ས་བྦ་ཏྠ, ཀི་ལེ་ས་ཝི་ས་ནཱ་ས་ཀོ;
ག་ནྡྷ་མཱ་ད་ན་སེ་ལོ་ཝ, གུ་ཎ་ག་ནྡྷ་ཝི་བྷཱུ་སི་ཏོ.
༢༨༥. ‘‘གུ་ཎཱ་ནཾ ཨཱ་ཀ་རོ ཝཱི་རོ, ར་ཏ་ནཱ་ནཾ་ཝ སཱ་ག་རོ;
སི་ནྡྷཱུ་ཝ ཝ་ན་རཱ་ཛཱི་ནཾ, ཀི་ལེ་ས་མ་ལ་ཧཱ་ར་ཀོ.
༢༨༦. ‘‘ཝི་ཛ་ཡཱི་ཝ མ་ཧཱ་ཡོ་དྷོ, མཱ་ར་སེ་ནཱ་ཝ་མ་དྡ་ནོ;
ཙ་ཀྐ་ཝ་ཏྟཱི་ཝ སོ རཱ་ཛཱ, བོ་ཛ྄ཛྷ་ངྒ་ར་ཏ་ནི་སྶ་རོ.
༢༨༧. ‘‘མ་ཧཱ་བྷི་ས་ཀྐ་ས་ངྐཱ་སོ, དོ་ས་བྱཱ་དྷི་ཏི་ཀི་ཙྪ་ཀོ;
ས་ལླ་ཀ་ཏྟོ ཡ་ཐཱ ཝེ་ཛྫོ, དི་ཊྛི་ག་ཎྜ་ཝི་ཕཱ་ལ་ཀོ.
༢༨༨. ‘‘སོ ཏ་དཱ ལོ་ཀ་པ་ཛྫོ་ཏོ, ས་ན་རཱ་མ་ར་ས་ཀྐ་ཏོ;
པ་རི་སཱ་སུ ན་རཱ་དི་ཙྩོ, དྷ་མྨཾ དེ་ས་ཡ་ཏེ ཛི་ནོ.
༢༨༩. ‘‘དཱ་ནཾ ད་ཏྭཱ མ་ཧཱ་བྷོ་གོ, སཱི་ལེ་ན སུ་ག་ཏཱུ་པ་གོ;
བྷཱ་ཝ་ནཱ་ཡ ཙ ནི་བྦཱ་ཏི, ཨི་ཙྩེ་ཝ་མ་ནུ་སཱ་ས་ཐ.
༢༩༠. ‘‘དེ་ས་ནཾ ཏཾ མ་ཧ་སྶཱ་དཾ, ཨཱ་དི་མ་ཛ྄ཛྷ་ནྟ་སོ་བྷ་ཎཾ;
སུ་ཎ་ནྟི པ་རི་སཱ ས་བྦཱ, ཨ་མ་ཏཾ་ཝ མ་ཧཱ་ར་སཾ.
༢༩༡. ‘‘སུ་ཏྭཱ སུ་མ་དྷུ་རཾ དྷ་མྨཾ, པ་ས་ནྣོ ཛི་ན་སཱ་ས་ནེ;
སུ་ག་ཏཾ ས་ར་ཎཾ ག་ནྟྭཱ, ཡཱ་ཝ་ཛཱི་ཝཾ ན་མ་སྶ་ཧཾ.
༢༩༢. ‘‘མུ་ནི་ནོ ག་ནྡྷ་ཀུ་ཊི་ཡཱ, ཨོ་པུ་ཉྫེ་སིཾ [ཨུ་བྦ་ཊྚེ་སིཾ (སྱཱ.)] ཏ་དཱ མ་ཧིཾ;
ཙ་ཏུ་ཛྫཱ་ཏེ་ན ག་ནྡྷེ་ན, མཱ་སེ ཨ་ཊྛ དི་ནེ་སྭ་ཧཾ.
༢༩༣. ‘‘པ་ཎི་དྷཱ་ཡ སུ་ག་ནྡྷ་ཏྟཾ, ས་རཱི་ར་ཝི་སྶ་ག་ནྡྷི་ནོ [ས་རཱི་ར་སྶ ཝི་ག་ནྡྷི་ནོ (སཱི. སྱཱ. པཱི.)];
ཏ་དཱ ཛི་ནོ ཝི་ཡཱ་ཀཱ་སི, སུ་ག་ནྡྷ་ཏ་ནུ་ལཱ་བྷི་ཏཾ.
༢༩༤. ‘‘‘ཡོ ཡཾ ག་ནྡྷ་ཀུ་ཊི་བྷཱུ་མིཾ, ག་ནྡྷེ་ནོ་པུ་ཉྫ་ཏེ ས་ཀིཾ;
ཏེ་ན ཀ་མྨ་ཝི་པཱ་ཀེ་ན, ཨུ་པ་པ་ནྣོ ཏ་ཧིཾ ཏ་ཧིཾ.
༢༩༥. ‘‘‘སུ་ག་ནྡྷ་དེ་ཧོ ས་བྦ་ཏྠ, བྷ་ཝི་སྶ་ཏི ཨ་ཡཾ ན་རོ;
གུ་ཎ་ག་ནྡྷ་ཡུ་ཏྟོ ཧུ་ཏྭཱ, ནི་བྦཱ་ཡི་སྶ་ཏི་ནཱ་ས་ཝོ’.
༢༩༦. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༢༩༧. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏོ ཝི་པྤ་ཀུ་ལེ ཨ་ཧཾ;
ག་བྦྷཾ མེ ཝ་ས་ཏོ མཱ་ཏཱ, དེ་ཧེ་ནཱ་སི སུ་ག་ནྡྷི་ཏཱ.
༢༩༨. ‘‘ཡ་དཱ ཙ མཱ་ཏུ་ཀུ་ཙྪི་མྷཱ, ནི་ཀྑ་མཱ་མི ཏ་དཱ པུ་རཱི [པུ་རཾ (སྱཱ. ཀ.)];
སཱ་ཝ་ཏྠི་ས་བྦ་ག་ནྡྷེ་ཧི, ཝཱ་སི་ཏཱ ཝི་ཡ ཝཱ་ཡ་ཐ.
༢༩༩. ‘‘པུ་པྥ་ཝ་སྶ་ཉྩ སུ་ར་བྷི, དི་བྦ་ག་ནྡྷཾ མ་ནོ་ར་མཾ;
དྷཱུ་པཱ་ནི ཙ མ་ཧ་གྒྷཱ་ནི, ཨུ་པ་ཝཱ་ཡིཾ་སུ ཏཱ་ཝ་དེ.
༣༠༠. ‘‘དེ་ཝཱ ཙ ས་བྦ་ག་ནྡྷེ་ཧི, དྷཱུ་པ་པུ་པྥེ་ཧི ཏཾ གྷ་རཾ;
ཝཱ་ས་ཡིཾ་སུ སུ་ག་ནྡྷེ་ན, ཡ་སྨིཾ ཛཱ་ཏོ ཨ་ཧཾ གྷ་རེ.
༣༠༡. ‘‘ཡ་དཱ ཙ ཏ་རུ་ཎོ བྷ་དྡོ, པ་ཋ་མེ ཡོ་བྦ་ནེ ཋི་ཏོ;
ཏ་དཱ སེ་ལཾ [སེ་སཾ (སྱཱ.)] ས་པ་རི་སཾ, ཝི་ནེ་ཏྭཱ ན་ར་སཱ་ར་ཐི.
༣༠༢. ‘‘ཏེ་ཧི ས་བྦེ་ཧི པ་རི་ཝུ་ཏོ [ས་ཧི་ཏོ (སཱི. སྱཱ. པཱི.)], སཱ་ཝ་ཏྠི་པུ་ར་མཱ་ག་ཏོ;
ཏ་དཱ བུ་དྡྷཱ་ནུ་བྷཱ་ཝཾ ཏཾ, དི་སྭཱ པ་བྦ་ཛི་ཏོ ཨ་ཧཾ.
༣༠༣. ‘‘སཱི་ལཾ ས་མཱ་དྷི་པ་ཉྙ་ཉྩ, ཝི་མུ་ཏྟི་ཉྩ ཨ་ནུ་ཏྟ་རཾ;
བྷཱ་ཝེ་ཏྭཱ ཙ་ཏུ་རོ དྷ་མྨེ, པཱ་པུ་ཎིཾ ཨཱ་ས་ཝ་ཀྑ་ཡཾ.
༣༠༤. ‘‘ཡ་དཱ པ་བྦ་ཛི་ཏོ ཙཱ་ཧཾ, ཡ་དཱ ཙ ཨ་ར་ཧཱ ཨ་ཧུཾ;
ནི་བྦཱ་ཡི་སྶཾ ཡ་དཱ ཙཱ་ཧཾ, ག་ནྡྷ་ཝ་སྶོ ཏ་དཱ ཨ་ཧུ.
༣༠༥. ‘‘ས་རཱི་ར་ག་ནྡྷོ ཙ ས་དཱ་ཏི་སེ་ཏི [ས་དཱ ཝཱ་སེ་ཏི (ཀ.)] མེ, མ་ཧཱ་ར་ཧཾ ཙ་ནྡ་ན་ཙ་མྤ་ཀུ་པྤ་ལཾ;
ཏ་ཐེ་ཝ ག་ནྡྷེ ཨི་ཏ་རེ ཙ ས་བྦ་སོ, པ་ས་ཡ྄ཧ ཝཱ་ཡཱ་མི ཏ་ཏོ ཏ་ཧིཾ [ཡ་ཧིཾ (སྱཱ.)] ཏ་ཧིཾ.
༣༠༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༣༠༧. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༠༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཙཱུ་ལ༹་སུ་ག་ནྡྷོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཙཱུ་ལ༹་སུ་ག་ནྡྷ་ཏྠེ་ར་སྶཱ་པ་དཱ་ནཾ ད་ས་མཾ.
བྷ་དྡི་ཡ་ཝ་གྒོ པ་ཉྩ་པ་ཉྙཱ་ས་མོ.