༧. ཨ་བྷ་ཡ་ཏྠེ་ར་ཨ་པ་དཱ་ནཾ
༡༩༥. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨེ་སུ ཙ་ཀྑུ་མཱ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༡༩༦. ‘‘ས་ར་ཎ་ག་མ་ནེ ཀི་ཉྩི, ནི་ཝེ་སེ་སི ཏ་ཐཱ་ག་ཏོ;
ཀི་ཉྩི སཱི་ལེ ནི་ཝེ་སེ་སི, ད་ས་ཀ་མྨ་པ་ཐུ་ཏྟ་མེ.
༡༩༧. ‘‘དེ་ཏི ཀ་སྶ་ཙི སོ ཝཱི་རོ, སཱ་མ་ཉྙ་ཕ་ལ་མུ་ཏྟ་མཾ;
ས་མཱ་པ་ཏྟཱི ཏ་ཐཱ ཨ་ཊྛ, ཏི་སྶོ ཝི་ཛྫཱ པ་ཝ་ཙྪ་ཏི.
༡༩༨. ‘‘ཚ་ལ༹་བྷི་ཉྙཱ་སུ ཡོ་ཛེ་སི, ཀི་ཉྩི ས་ཏྟཾ ན་རུ་ཏྟ་མོ;
དེ་ཏི ཀ་སྶ་ཙི ནཱ་ཐོ སོ, ཙ་ཏ་སྶོ པ་ཊི་ས་མྦྷི་དཱ.
༡༩༩. ‘‘བོ་དྷ་ནེ་ཡྻཾ པ་ཛཾ དི་སྭཱ, ཨ་ས་ངྑེ་ཡྻ་མྤི ཡོ་ཛ་ནཾ [ཨ་ས་ངྑེ་ཡྻེ་པི ཡོ་ཛ་ནེ སཱི. སྱཱ. པཱི.)];
ཁ་ཎེ་ན ཨུ་པ་ག་ནྟྭཱ་ན, ཝི་ནེ་ཏི ན་ར་སཱ་ར་ཐི.
༢༠༠. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཨ་ཧོ་སིཾ བྲཱ་ཧྨ་ཎ་ཏྲ་ཛོ;
པཱ་ར་གཱུ ས་བྦ་ཝེ་དཱ་ནཾ, ཝེ་ཡྻཱ་ཀ་ར་ཎ་ས་མྨ་ཏོ.
༢༠༡. ‘‘ནི་རུ་ཏྟི་ཡཱ ཙ ཀུ་ས་ལོ, ནི་གྷ་ཎྜུ་མྷི ཝི་སཱ་ར་དོ;
པ་ད་ཀོ ཀེ་ཊུ་བྷ་ཝི་དཱུ, ཚ་ནྡོ་ཝི་ཙི་ཏི་ཀོ་ཝི་དོ.
༢༠༢. ‘‘ཛ་ངྒྷཱ་ཝི་ཧཱ་རཾ ཝི་ཙ་རཾ, ཧཾ་སཱ་རཱ་མ་མུ་པེ་ཙྩ་ཧཾ;
ཨ་དྡ་སཾ ཝ་ར་དཾ [ཝ་ད་ཏཾ (སཱི. པཱི.), པ་ཝ་རཾ (སྱཱ.)] སེ་ཊྛཾ, མ་ཧཱ་ཛ་ན་པུ་ར་ཀྑ་ཏཾ.
༢༠༣. ‘‘དེ་སེ་ནྟཾ ཝི་ར་ཛཾ དྷ་མྨཾ, པ་ཙྩ་ནཱི་ཀ་མ་ཏཱི ཨ་ཧཾ;
ཨུ་པེ་ཏྭཱ ཏ་སྶ ཀ་ལྱཱ་ཎཾ, སུ་ཏྭཱ་ན ཝི་མ་ལཾ ཨ་ཧཾ [ཝཱ་ཀྱཱ་ནི, སུ་ཏྭཱ་ན ཝི་མ་ལཱ་ན་ཧཾ (སཱི. སྱཱ. པཱི.)].
༢༠༤. ‘‘བྱཱ་ཧ་ཏཾ པུ་ན་རུ་ཏྟཾ ཝཱ, ཨ་པ་ཏྠཾ ཝཱ ནི་ར་ཏྠ་ཀཾ;
ནཱ་དྡ་སཾ ཏ་སྶ མུ་ནི་ནོ, ཏ་ཏོ པ་བྦ་ཛི་ཏོ ཨ་ཧཾ.
༢༠༥. ‘‘ན་ཙི་རེ་ནེ་ཝ ཀཱ་ལེ་ན, ས་བྦ་ས་ཏྟ་ཝི་སཱ་ར་དོ;
ནི་པུ་ཎོ བུ་དྡྷ་ཝ་ཙ་ནེ, ཨ་ཧོ་སིཾ གུ་ཎི་ས་མྨ་ཏོ.
༢༠༦. ‘‘ཏ་དཱ ཙ་ཏ་སྶོ གཱ་ཐཱ་ཡོ, ག་ནྠ་ཡི་ཏྭཱ སུ་བྱ་ཉྫ་ནཱ;
ས་ནྠ་ཝི་ཏྭཱ ཏི་ལོ་ཀ་གྒཾ, དེ་ས་ཡི་སྶཾ དི་ནེ དི་ནེ.
༢༠༧. ‘‘ཝི་ར་ཏྟོ་སི མ་ཧཱ་ཝཱི་རོ, སཾ་སཱ་རེ ས་བྷ་ཡེ ཝ་སཾ;
ཀ་རུ་ཎཱ་ཡ ན ནི་བྦཱ་ཡི, ཏ་ཏོ ཀཱ་རུ་ཎི་ཀོ མུ་ནི.
༢༠༨. ‘‘པུ་ཐུ་ཛྫ་ནོ ཝ་ཡོ ས་ནྟོ, ན ཀི་ལེ་ས་ཝ་སོ ཨ་ཧུ;
ས་མྤ་ཛཱ་ནོ ས་ཏི་ཡུ་ཏྟོ, ཏ་སྨཱ ཨེ་སོ ཨ་ཙི་ནྟི་ཡོ.
༢༠༩. ‘‘དུ་བྦ་ལཱ་ནི ཀི་ལེ་སཱ་ནི, ཡ་སྶཱ་ས་ཡ་ག་ཏཱ་ནི མེ;
ཉཱ་ཎ་གྒི་པ་རི་ད་ཌྜྷཱ་ནི, ན ཁཱི་ཡིཾ་སུ ཏ་མ་བྦྷུ་ཏཾ.
༢༡༠. ‘‘ཡོ ས་བྦ་ལོ་ཀ་སྶ ག་རུ, ལོ་ཀོ [ལོ་ཀེ (སྱཱ. ཀ.)] ཡ་སྶ ཏ་ཐཱ ག་རུ;
ཏ་ཐཱ་པི ལོ་ཀཱ་ཙ་རི་ཡོ, ལོ་ཀོ ཏ་སྶཱ་ནུ་ཝ་ཏྟ་ཀོ.
༢༡༡. ‘‘ཨེ་ཝ་མཱ་དཱི་ཧི ས་མྦུ་དྡྷཾ, ཀི་ཏྟ་ཡཾ དྷ་མྨ་དེ་ས་ནཾ;
ཡཱ་ཝ་ཛཱི་ཝཾ ཀ་རི་ཏྭཱ་ན, ག་ཏོ ས་གྒཾ ཏ་ཏོ ཙུ་ཏོ.
༢༡༢. ‘‘ས་ཏ་ས་ཧ་སྶི་ཏོ ཀ་པྤེ, ཡཾ བུ་དྡྷ་མ་བྷི་ཀི་ཏྟ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཀི་ཏྟ་ནཱ་ཡ ཨི་དཾ ཕ་ལཾ.
༢༡༣. ‘‘དེ་ཝ་ལོ་ཀེ མ་ཧཱ་ར་ཛྫཾ, པཱ་དེ་སིཾ ཀ་ཉྩ་ན་གྒྷི་ཡཾ [དི་བྦཱ་ནུ་བྷོ་ཛ་ཧཾ ཏ་དཱ (སྱཱ.), ར་ཛྫཾ པཱ་དེ་སི ཀཾ་ཙ་ཡཾ (སཱི.)];
ཙ་ཀྐ་ཝ་ཏྟཱི མ་ཧཱ་ར་ཛྫཾ, བ་ཧུ་སོ་ནུ་བྷ་ཝིཾ ཨ་ཧཾ.
༢༡༤. ‘‘དུ་ཝེ བྷ་ཝེ པ་ཛཱ་ཡཱ་མི, དེ་ཝ་ཏྟེ ཨ་ཐ མཱ་ནུ་སེ;
ཨ་ཉྙཾ ག་ཏིཾ ན ཛཱ་ནཱ་མི, ཀི་ཏྟ་ནཱ་ཡ ཨི་དཾ ཕ་ལཾ.
༢༡༥. ‘‘དུ་ཝེ ཀུ་ལེ པ་ཛཱ་ཡཱ་མི, ཁ་ཏྟི་ཡེ ཨ་ཐ བྲཱ་ཧྨ་ཎེ;
ནཱི་ཙེ ཀུ་ལེ ན ཛཱ་ཡཱ་མི, ཀི་ཏྟ་ནཱ་ཡ ཨི་དཾ ཕ་ལཾ.
༢༡༦. ‘‘པ་ཙྪི་མེ ཙ བྷ་ཝེ དཱ་ནི, གི་རི་བྦ་ཛ་པུ་རུ་ཏྟ་མེ;
ར་ཉྙོ་ཧཾ བི་མྦི་སཱ་ར་སྶ, པུ་ཏྟོ ནཱ་མེ་ན ཙཱ་བྷ་ཡོ.
༢༡༧. ‘‘པཱ་པ་མི་ཏྟ་ཝ་སཾ ག་ནྟྭཱ, ནི་ག་ཎྛེ་ན ཝི་མོ་ཧི་ཏོ;
པེ་སི་ཏོ ནཱ་ཊ་པུ་ཏྟེ་ན, བུ་དྡྷ་སེ་ཊྛ་མུ་པེ་ཙྩ་ཧཾ.
༢༡༨. ‘‘པུ་ཙྪི་ཏྭཱ ནི་པུ་ཎཾ པ་ཉྷཾ, སུ་ཏྭཱ བྱཱ་ཀ་ར་ཎུ་ཏྟ་མཾ;
པ་བྦ་ཛི་ཏྭཱ་ན ན་ཙི་རཾ, ཨ་ར་ཧ་ཏྟ་མ་པཱ་པུ་ཎིཾ.
༢༡༩. ‘‘ཀི་ཏྟ་ཡི་ཏྭཱ ཛི་ན་ཝ་རཾ, ཀི་ཏྟི་ཏོ ཧོ་མི ས་བྦ་དཱ;
སུ་ག་ནྡྷ་དེ་ཧ་ཝ་ད་ནོ, ཨཱ་སིཾ སུ་ཁ་ས་མ་པྤི་ཏོ.
༢༢༠. ‘‘ཏི་ཀྑ་ཧཱ་ས་ལ་ཧུ་པ་ཉྙོ, མ་ཧཱ་པ་ཉྙོ ཏ་ཐེ་ཝ་ཧཾ;
ཝི་ཙི་ཏྟ་པ་ཊི་བྷཱ་ནོ ཙ, ཏ་སྶ ཀ་མྨ་སྶ ཝཱ་ཧ་སཱ.
༢༢༡. ‘‘ཨ་བྷི་ཏྠ་ཝི་ཏྭཱ པ་དུ་མུ་ཏྟ་རཱ་ཧཾ, པ་ས་ནྣ་ཙི་ཏྟོ ཨ་ས་མཾ ས་ཡ་མྦྷུཾ;
ན ག་ཙྪི ཀ་པྤཱ་ནི ཨ་པཱ་ཡ་བྷཱུ་མིཾ, ས་ཏཾ ས་ཧ་སྶཱ་ནི བ་ལེ་ན ཏ་སྶ.
༢༢༢. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༢༣. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༢༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་བྷ་ཡོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཨ་བྷ་ཡ་ཏྠེ་ར་སྶཱ་པ་དཱ་ནཾ ས་ཏྟ་མཾ.