༦. ཀཱ་ལུ༹་དཱ་ཡི་ཏྠེ་ར་ཨ་པ་དཱ་ནཾ
༡༦༥. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨེ་སུ ཙ་ཀྑུ་མཱ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༡༦༦. ‘‘ནཱ་ཡ་ཀཱ་ནཾ ཝ་རོ ས་ཏྠཱ, གུ་ཎཱ་གུ་ཎ་ཝི་དཱུ ཛི་ནོ;
ཀ་ཏ་ཉྙཱུ ཀ་ཏ་ཝེ་དཱི ཙ, ཏི་ཏྠེ ཡོ་ཛེ་ཏི པཱ་ཎི་ནེ [པཱ་ཎི་ནོ (སཱི. སྱཱ པཱི.)].
༡༦༧. ‘‘ས་བྦ་ཉྙུ་ཏེ་ན ཉཱ་ཎེ་ན, ཏུ་ལ་ཡི་ཏྭཱ ད་ཡཱ་ས་ཡོ;
དེ་སེ་ཏི པ་ཝ་རཾ དྷ་མྨཾ, ཨ་ན་ནྟ་གུ་ཎ་ས་ཉྩ་ཡོ.
༡༦༨. ‘‘ས ཀ་དཱ་ཙི མ་ཧཱ་ཝཱི་རོ, ཨ་ན་ནྟ་ཛི་ན་སཾ་ས་རི [ཨ་ན་ནྟ་ཛ་ན་སཾ་ས་དི (སཱི.), ཨ་ན་ནྟ་ཛ་ན་སཾ་སུ་དྷི (སྱཱ.), ཨ་ན་ནྟ་ཛ་ན་སཾ་ས་རཱི (པཱི.)];
དེ་སེ་ཏི མ་དྷུ་རཾ དྷ་མྨཾ, ཙ་ཏུ་ས་ཙྩཱུ་པ་ས་ཉྷི་ཏཾ.
༡༦༩. ‘‘སུ་ཏྭཱ་ན ཏཾ དྷ་མྨ་ཝ་རཾ, ཨཱ་དི་མ་ཛ྄ཛྷ་ནྟ་སོ་བྷ་ཎཾ;
པཱ་ཎ་ས་ཏ་ས་ཧ་སྶཱ་ནཾ, དྷ་མྨཱ་བྷི་ས་མ་ཡོ ཨ་ཧུ.
༡༧༠. ‘‘ནི་ནྣཱ་དི་ཏཱ ཏ་དཱ བྷཱུ་མི, ག་ཛྫིཾ་སུ ཙ པ་ཡོ་དྷ་རཱ;
སཱ་དྷུ་ཀཱ་རཾ པ་ཝ་ཏྟིཾ་སུ, དེ་ཝ་བྲ་ཧྨ་ན་རཱ་སུ་རཱ.
༡༧༡. ‘‘‘ཨ་ཧོ ཀཱ་རུ་ཎི་ཀོ ས་ཏྠཱ, ཨ་ཧོ ས་དྡྷ་མྨ་དེ་ས་ནཱ;
ཨ་ཧོ བྷ་ཝ་ས་མུ་དྡ་མྷི, ནི་མུ་གྒེ ཨུ་དྡྷ་རཱི ཛི་ནོ’.
༡༧༢. ‘‘ཨེ་ཝཾ པ་ཝེ་ད་ཛཱ་ཏེ་སུ, ས་ན་རཱ་མ་ར་བྲ་ཧྨ་སུ;
ཀུ་ལ་པྤ་སཱ་ད་ཀཱ་ན་གྒཾ, སཱ་ཝ་ཀཾ ཝ་ཎྞ་ཡཱི ཛི་ནོ.
༡༧༣. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཛཱ་ཏོ་མ་ཙྩ་ཀུ་ལེ ཨ་ཧུཾ;
པཱ་སཱ་དི་ཀོ ད་སྶ་ནི་ཡོ, པ་ཧཱུ་ཏ་དྷ་ན་དྷ་ཉྙ་ཝཱ.
༡༧༤. ‘‘ཧཾ་སཱ་རཱ་མ་མུ་པེ་ཙྩཱ་ཧཾ, ཝ་ནྡི་ཏྭཱ ཏཾ ཏ་ཐཱ་ག་ཏཾ;
སུ་ཎི་ཏྭཱ མ་དྷུ་རཾ དྷ་མྨཾ, ཀཱ་རཾ ཀ་ཏྭཱ ཙ ཏཱ་དི་ནོ.
༡༧༥. ‘‘ནི་པ་ཙྩ པཱ་ད་མཱུ་ལེ་ཧཾ, ཨི་མཾ ཝ་ཙ་ན་མ་བྲ་ཝིཾ;
‘ཀུ་ལ་པྤ་སཱ་ད་ཀཱ་ན་གྒོ, ཡོ ཏ་ཡཱ ས་ནྠུ་ཏོ [ཡོ ཏ་ཝ སཱ་ས་ནེ (སྱཱ.)] མུ་ནེ.
༡༧༦. ‘‘‘ཏཱ་དི་སོ ཧོ་མ་ཧཾ ཝཱི་ར [ཏཱ་དི་སོ་ཧཾ མ་ཧཱ་ཝཱི་ར (སྱཱ. ཀ.)], བུ་དྡྷ་སེ་ཊྛ་སྶ སཱ་ས་ནེ’;
ཏ་དཱ མ་ཧཱ་ཀཱ་རུ་ཎི་ཀོ, སི་ཉྩ་ནྟོ ཝཱ མ་ཏེ་ན མཾ.
༡༧༧. ‘‘ཨཱ་ཧ མཾ ‘པུ་ཏྟ ཨུ་ཏྟི་ཊྛ, ལ་ཙྪ་སེ ཏཾ མ་ནོ་ར་ཐཾ;
ཀ་ཐཾ ནཱ་མ ཛི་ནེ ཀཱ་རཾ, ཀ་ཏྭཱ་ན ཝི་ཕ་ལོ སི་ཡཱ.
༡༧༨. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༡༧༩. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ཨུ་དཱ་ཡི ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༡༨༠. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟོ པ་རི་ཙ་རིཾ, པ་ཙྩ་ཡེ་ཧི ཝི་ནཱ་ཡ་ཀཾ.
༡༨༡. ‘‘ཏེ་ན ཀ་མྨ་ཝི་པཱ་ཀེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༨༢. ‘‘པ་ཙྪི་མེ ཙ བྷ་ཝེ དཱ་ནི, ར་མྨེ ཀ་པི་ལ་ཝ་ཏྠ་ཝེ;
ཛཱ་ཏོ མ་ཧཱ་མ་ཙྩ་ཀུ་ལེ, སུ་དྡྷོ་ད་ན་མ་ཧཱི་པ་ཏེ [སུ་དྡྷོ་ད་ནོ མ་ཧཱི་པ་ཏི (སྱཱ.)].
༡༨༣. ‘‘ཏ་དཱ ཨ་ཛཱ་ཡི སི་དྡྷ་ཏྠོ, ར་མྨེ ལུ་མྦི་ནི་ཀཱ་ན་ནེ;
ཧི་ཏཱ་ཡ ས་བྦ་ལོ་ཀ་སྶ, སུ་ཁཱ་ཡ ཙ ན་རཱ་ས་བྷོ.
༡༨༤. ‘‘ཏ་ད་ཧེ་ཝ ཨ་ཧཾ ཛཱ་ཏོ, ས་ཧ ཏེ་ནེ་ཝ ཝ་ཌྜྷི་ཏོ;
པི་ཡོ ས་ཧཱ་ཡོ ད་ཡི་ཏོ, ཝི་ཡ་ཏྟོ ནཱི་ཏི་ཀོ་ཝི་དོ.
༡༨༥. ‘‘ཨེ་ཀཱུ་ན་ཏིཾ་སོ ཝ་ཡ་སཱ, ནི་ཀྑ་མི་ཏྭཱ ཨ་གཱ་ར་ཏོ [ནི་ཀྑ་ནྟོ པ་བྦ་ཛི་ཏྠ་སོ (སཱི. སྱཱ.)];
ཚ་བྦ་སྶཾ ཝཱི་ཏི་ནཱ་མེ་ཏྭཱ, ཨཱ་སི བུ་དྡྷོ ཝི་ནཱ་ཡ་ཀོ.
༡༨༦. ‘‘ཛེ་ཏྭཱ ས་སེ་ན་ཀཾ མཱ་རཾ, ཁེ་པ་ཡི་ཏྭཱ་ན ཨཱ་ས་ཝེ;
བྷ་ཝ་ཎྞ་ཝཾ ཏ་རི་ཏྭཱ་ན, བུ་དྡྷོ ཨཱ་སི ས་དེ་ཝ་ཀེ.
༡༨༧. ‘‘ཨི་སི་ཝ྄ཧ་ཡཾ ག་མི་ཏྭཱ་ན [ཨི་སི་ཝ྄ཧ་ཡཾ པ་ཏ་ནཾ ག་ནྟྭཱ (སྱཱ.)], ཝི་ནེ་ཏྭཱ པ་ཉྩ་ཝ་གྒི་ཡེ;
ཏ་ཏོ ཝི་ནེ་སི བྷ་ག་ཝཱ, ག་ནྟྭཱ ག་ནྟྭཱ ཏ་ཧིཾ ཏ་ཧིཾ.
༡༨༨. ‘‘ཝེ་ནེ་ཡྻེ ཝི་ན་ཡ་ནྟོ སོ, ས་ངྒ་ཎྷ་ནྟོ ས་དེ་ཝ་ཀཾ;
ཨུ་པེ་ཙྩ མ་ག་དྷེ གི་རིཾ [མཱ་ག་ད་གི་རིཾ (སཱི.), མ་ངྒ་ལཱ་གི་རིཾ (པཱི.)], ཝི་ཧ་རི་ཏྠ ཏ་དཱ ཛི་ནོ.
༡༨༩. ‘‘ཏ་དཱ སུ་དྡྷོ་ད་ནེ་ནཱ་ཧཾ, བྷཱུ་མི་པཱ་ལེ་ན པེ་སི་ཏོ;
ག་ནྟྭཱ དི་སྭཱ ད་ས་བ་ལཾ, པ་བྦ་ཛི་ཏྭཱ་ར་ཧཱ ཨ་ཧུཾ.
༡༩༠. ‘‘ཏ་དཱ མ་ཧེ་སིཾ ཡཱ་ཙི་ཏྭཱ, པཱ་པ་ཡིཾ ཀ་པི་ལ་ཝ྄ཧ་ཡཾ;
ཏ་ཏོ པུ་རཱ་ཧཾ ག་ནྟྭཱ་ན, པ་སཱ་དེ་སིཾ མ་ཧཱ་ཀུ་ལཾ.
༡༩༡. ‘‘ཛི་ནོ ཏ་སྨིཾ གུ་ཎེ ཏུ་ཊྛོ, མཾ མ་ཧཱ་པ་རི་སཱ་ཡ སོ [མ་མཱ་ཧ པུ་རི་སཱ་ས་བྷོ (སྱཱ. པཱི.)];
ཀུ་ལ་པྤ་སཱ་ད་ཀཱ་ན་གྒཾ, པ་ཉྙཱ་པེ་སི ཝི་ནཱ་ཡ་ཀོ.
༡༩༢. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༩༣. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༩༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཀཱ་ལུ༹་དཱ་ཡི་ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཀཱ་ལུ༹་དཱ་ཡི་ཏྠེ་ར་སྶཱ་པ་དཱ་ནཾ ཚ་ཊྛཾ.