༤. ཝ་ངྒཱི་ས་ཏྠེ་ར་ཨ་པ་དཱ་ནཾ
༩༦. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨེ་སུ ཙ་ཀྑུ་མཱ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༩༧. ‘‘ཡ་ཐཱ་པི སཱ་ག་རེ ཨཱུ་མི, ག་ག་ནེ ཝི་ཡ ཏཱ་ར་ཀཱ;
ཨེ་ཝཾ པཱ་ཝ་ཙ་ནཾ ཏ་སྶ, ཨ་ར་ཧ་ནྟེ་ཧི ཙི་ཏྟི་ཏཾ.
༩༨. ‘‘ས་དེ་ཝཱ་སུ་ར་ནཱ་གེ་ཧི, མ་ནུ་ཛེ་ཧི པུ་ར་ཀྑ་ཏོ;
ས་མ་ཎ་བྲཱ་ཧྨ་ཎཱ་ཀི་ཎྞེ, ཛ་ན་མ་ཛ྄ཛྷེ ཛི་ནུ་ཏྟ་མོ.
༩༩. ‘‘པ་བྷཱ་ཧི ཨ་ནུ་ར་ཉྫ་ནྟོ, ལོ་ཀེ [ལོ་ཀཾ (སཱི.)] ལོ་ཀ་ནྟ་གཱུ ཛི་ནོ;
ཝ་ཙ་ནེ་ན ཝི་བོ་དྷེ་ནྟོ, ཝེ་ནེ་ཡྻ་པ་དུ་མཱ་ནི སོ.
༡༠༠. ‘‘ཝེ་སཱ་ར་ཛྫེ་ཧི ས་མྤ་ནྣོ, ཙ་ཏཱུ་ཧི པུ་རི་སུ་ཏྟ་མོ;
པ་ཧཱི་ན་བྷ་ཡ་སཱ་ར་ཛྫོ, ཁེ་མ་པྤ་ཏྟོ ཝི་སཱ་ར་དོ.
༡༠༡. ‘‘ཨཱ་ས་བྷཾ པ་ཝ་རཾ ཋཱ་ནཾ, བུ་དྡྷ་བྷཱུ་མི་ཉྩ ཀེ་ཝ་ལཾ;
པ་ཊི་ཛཱ་ནཱ་ཏི ལོ་ཀ་གྒོ, ན་ཏྠི ས་ཉྩོ་ད་ཀོ ཀྭ་ཙི.
༡༠༢. ‘‘སཱི་ཧ་ནཱ་ད་མ་ས་མྦྷཱི་ཏཾ, ན་ད་ཏོ ཏ་སྶ ཏཱ་དི་ནོ;
དེ་ཝོ ན་རོ ཝཱ བྲ་ཧྨཱ ཝཱ, པ་ཊི་ཝ་ཏྟཱ ན ཝི་ཛྫ་ཏི.
༡༠༣. ‘‘དེ་སེ་ནྟོ པ་ཝ་རཾ དྷ་མྨཾ, ས་ནྟཱ་རེ་ནྟོ ས་དེ་ཝ་ཀཾ;
དྷ་མྨ་ཙ་ཀྐཾ པ་ཝ་ཏྟེ་ཏི, པ་རི་སཱ་སུ ཝི་སཱ་ར་དོ.
༡༠༤. ‘‘པ་ཊི་བྷཱ་ན་ཝ་ཏཾ ཨ་གྒཾ, སཱ་ཝ་ཀཾ སཱ་དྷུ་ས་མྨ་ཏཾ;
གུ་ཎཾ བ་ཧུཾ པ་ཀི་ཏྟེ་ཏྭཱ, ཨེ་ཏ་ད་གྒེ ཋ་པེ་སི ཏཾ.
༡༠༥. ‘‘ཏ་དཱ་ཧཾ ཧཾ་ས་ཝ་ཏི་ཡཾ, བྲཱ་ཧྨ་ཎོ སཱ་དྷུ་ས་མྨ་ཏོ;
ས་བྦ་ཝེ་ད་ཝི་དཱུ ཛཱ་ཏོ, ཝཱ་གཱི་སོ ཝཱ་དི་སཱུ་ད་ནོ.
༡༠༦. ‘‘ཨུ་པེ་ཙྩ ཏཾ མ་ཧཱ་ཝཱི་རཾ, སུ་ཏྭཱ་ཧཾ དྷ་མྨ་དེ་ས་ནཾ;
པཱི་ཏི་ཝ་རཾ པ་ཊི་ལ་བྷིཾ, སཱ་ཝ་ཀ་སྶ གུ་ཎེ ར་ཏོ.
༡༠༧. ‘‘ནི་མ་ནྟེ་ཏྭཱ་ཝ སུ་ག་ཏཾ, ས་ས་ངྒྷཾ ལོ་ཀ་ན་ནྡ་ནཾ;
ས་ཏྟཱ་ཧཾ བྷོ་ཛ་ཡི་ཏྭཱ་ཧཾ, དུ་སྶེ་ཧ་ཙྪཱ་ད་ཡིཾ ཏ་དཱ.
༡༠༨. ‘‘ནི་པ་ཙྩ སི་ར་སཱ པཱ་དེ, ཀ་ཏོ་ཀཱ་སོ ཀ་ཏ་ཉྫ་ལཱི;
ཨེ་ཀ་མ་ནྟཾ ཋི་ཏོ ཧ་ཊྛོ, ས་ནྠ་ཝིཾ ཛི་ན་མུ་ཏྟ་མཾ.
༡༠༩. ‘‘‘ན་མོ ཏེ ཝཱ་དི་མ་དྡ་ན [ཝཱ་དི་ས་དྡུ་ལ (སཱི. པཱི.), ཝཱ་དི་སཱུ་ད་ན (སྱཱ.)], ན་མོ ཏེ ཨི་སི་ས་ཏྟ་མ [པུ་རི་སུ་ཏྟ་མ (སཱི. པཱི.)];
ན་མོ ཏེ ས་བྦ་ལོ་ཀ་གྒ, ན་མོ ཏེ ཨ་བྷ་ཡ་ངྐ་ར.
༡༡༠. ‘‘‘ན་མོ ཏེ མཱ་ར་མ་ཐ་ན [མཱ་ར་མ་ས་ན (ཨ་ཊྛ.)], ན་མོ ཏེ དི་ཊྛི་སཱུ་ད་ན;
ན་མོ ཏེ ས་ནྟི་སུ་ཁ་ད, ན་མོ ཏེ ས་ར་ཎ་ངྐ་ར.
༡༡༡. ‘‘‘ཨ་ནཱ་ཐཱ་ནཾ བྷ་ཝཾ ནཱ་ཐོ, བྷཱི་ཏཱ་ནཾ ཨ་བྷ་ཡ་པྤ་དོ;
ཝི་སྶཱ་མ་བྷཱུ་མི [ཝི་སྶཱ་སཾ བྷཱུ་མི (སྱཱ.), ཝི་སྶཱ་ན་བྷཱུ་མི (པཱི.)] ས་ནྟཱ་ནཾ, ས་ར་ཎཾ ས་ར་ཎེ་སི་ནཾ’.
༡༡༢. ‘‘ཨེ་ཝ་མཱ་དཱི་ཧི ས་མྦུ་དྡྷཾ, ས་ནྠ་ཝི་ཏྭཱ མ་ཧཱ་གུ་ཎཾ;
ཨ་ཝོ་ཙཾ ཝཱ་དི་སཱུ་ད་སྶ [ཝཱ་དི་སཱུ་ར་སྶ (སཱི. སྱཱ. པཱི.)], ག་ཏིཾ པ་པྤོ་མི བྷི་ཀྑུ་ནོ.
༡༡༣. ‘‘ཏ་དཱ ཨ་ཝོ་ཙ བྷ་ག་ཝཱ, ཨ་ན་ནྟ་པ་ཊི་བྷཱ་ན་ཝཱ;
‘ཡོ སོ བུ་དྡྷཾ ཨ་བྷོ་ཛེ་སི, ས་ཏྟཱ་ཧཾ ས་ཧ་སཱ་ཝ་ཀཾ.
༡༡༤. ‘‘‘གུ་ཎ་ཉྩ མེ པ་ཀི་ཏྟེ་སི, པ་ས་ནྣོ སེ་ཧི པཱ་ཎི་བྷི;
ཨེ་སོ པ་ཏྠ་ཡ་ཏེ ཋཱ་ནཾ, ཝཱ་དི་སཱུ་ད་སྶ བྷི་ཀྑུ་ནོ.
༡༡༥. ‘‘‘ཨ་ནཱ་ག་ཏ་མྷི ཨ་དྡྷཱ་ནེ, ལ་ཙྪ་སེ ཏཾ མ་ནོ་ར་ཐཾ;
དེ་ཝ་མཱ་ནུ་ས་ས་མྤ་ཏྟིཾ, ཨ་ནུ་བྷོ་ཏྭཱ ཨ་ན་པྤ་ཀཾ.
༡༡༦. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༡༡༧. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ཝ་ངྒཱི་སོ ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༡༡༨. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
པ་ཙྩ་ཡེ་ཧི ཨུ་པ་ཊྛཱ་སིཾ, མེ་ཏྟ་ཙི་ཏྟོ ཏ་ཐཱ་ག་ཏཾ.
༡༡༩. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏུ་སི་ཏཾ [ཏཱ་ཝ་ཏིཾ་སཾ (སྱཱ.)] ཨ་ག་མཱ་ས་ཧཾ.
༡༢༠. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏོ ཝི་པྤ་ཀུ་ལེ [པ་རི་བྦཱ་ཛ་ཀུ་ལེ (སཱི. སྱཱ. པཱི.)] ཨ་ཧཾ;
པ་ཙྩཱ་ཛཱ་ཏོ [ས་མྤ་ཏྟོ ཙ (ཀ.)] ཡ་དཱ ཨཱ་སིཾ, ཛཱ་ཏི་ཡཱ ས་ཏྟ་ཝ་སྶི་ཀོ.
༡༢༡. ‘‘ས་བྦ་ཝེ་ད་ཝི་དཱུ ཛཱ་ཏོ, ཝཱ་ད་ས་ཏྠ་ཝི་སཱ་ར་དོ;
ཝཱ་དི་སྶ་རོ [ཝ་གྒུ་སྶ་རོ (སྱཱ. པཱི.)] ཙི་ཏྟ་ཀ་ཐཱི, པ་ར་ཝཱ་ད་པྤ་མ་དྡ་ནོ.
༡༢༢. ‘‘ཝ་ངྒེ ཛཱ་ཏོ་ཏི ཝ་ངྒཱི་སོ, ཝ་ཙ་ནེ ཨི་སྶ་རོ་ཏི ཝཱ;
ཝ་ངྒཱི་སོ ཨི་ཏི མེ ནཱ་མཾ, ཨ་བྷ་ཝཱི ལོ་ཀ་ས་མྨ་ཏཾ.
༡༢༣. ‘‘ཡ་དཱ་ཧཾ ཝི་ཉྙུ་ཏཾ པ་ཏྟོ, ཋི་ཏོ པ་ཋ་མ་ཡོ་བྦ་ནེ;
ཏ་དཱ རཱ་ཛ་ག་ཧེ ར་མྨེ, སཱ་རི་པུ་ཏྟ་མ་ཧ་དྡ་སཾ [མ་ཐ་དྡ་སཾ (སཱི. པཱི.), ཙ ཨ་དྡ་སཾ (སྱཱ.)].
པ་ཉྩ་ཝཱི་ས་ཏི་མཾ བྷཱ་ཎ་ཝཱ་རཾ.
༡༢༤. ‘‘པི་ཎྜཱ་ཡ ཝི་ཙ་ར་ནྟཾ ཏཾ, པ་ཏྟ་པཱ་ཎིཾ སུ་སཾ་ཝུ་ཏཾ;
ཨ་ལོ་ལ་ཀྑིཾ མི་ཏ་བྷཱ་ཎིཾ, ཡུ་ག་མ་ཏྟཾ ནི་ད་ཀྑི་ཏཾ [ནི་རི་ཀྑ་ཏཾ (སཱི. པཱི.), ཨུ་དི་ཀྑ་ཏཾ (སྱཱ.)].
༡༢༥. ‘‘ཏཾ དི་སྭཱ ཝི་མྷི་ཏོ ཧུ་ཏྭཱ, ཨ་ཝོ་ཙཾ མ་མ་ནུ་ཙྪ་ཝཾ [མ་ན་ནུ་ཙྪ་ཝཾ (སཱི. སྱཱ.)];
ཀ་ཎི་ཀཱ་རཾ་ཝ ནི་ཙི་ཏཾ [ཀ་ཎི་ཀཱ་ར་པ་རི་ཙི་ཏཾ (པཱི.), ཁ་ཎི་ཀཾ ཋཱ་ན་ར་ཙི་ཏཾ (སཱི.)], ཙི་ཏྟཾ གཱ་ཐཱ་པ་དཾ ཨ་ཧཾ.
༡༢༦. ‘‘ཨཱ་ཙི་ཀྑི སོ མེ ས་ཏྠཱ་རཾ, ས་མྦུ་དྡྷཾ ལོ་ཀ་ནཱ་ཡ་ཀཾ;
ཏ་དཱ སོ པ་ཎྜི་ཏོ ཝཱི་རོ, ཨུ་ཏྟ་རིཾ [ཨུ་ཏྟ་རཾ (སཱི. པཱི.)] ས་མ་ཝོ་ཙ མེ.
༡༢༧. ‘‘ཝི་རཱ་ག་སཾ་ཧི་ཏཾ ཝཱ་ཀྱཾ, ཀ་ཏྭཱ དུ་དྡ་ས་མུ་ཏྟ་མཾ;
ཝི་ཙི་ཏྟ་པ་ཊི་བྷཱ་ནེ་ཧི, ཏོ་སི་ཏོ ཏེ་ན ཏཱ་དི་ནཱ.
༡༢༨. ‘‘ནི་པ་ཙྩ སི་ར་སཱ པཱ་དེ, ‘པ་བྦཱ་ཛེ་ཧཱི’ཏི མཾ བྲ་ཝི;
ཏ་ཏོ མཾ ས མ་ཧཱ་པ་ཉྙོ, བུ་དྡྷ་སེ་ཊྛ་མུ་པཱ་ན་ཡི.
༡༢༩. ‘‘ནི་པ་ཙྩ སི་ར་སཱ པཱ་དེ, ནི་སཱི་དིཾ ས་ཏྠུ ས་ནྟི་ཀེ;
མ་མཱ་ཧ ཝ་ད་ཏཾ སེ་ཊྛོ, ཀ་ཙྩི ཝ་ངྒཱི་ས ཛཱ་ནཱ་སི [ས་ཙྩཾ ཝ་ངྒཱི་ས ཀ་ཙྩི ཏེ (སྱཱ.)].
༡༣༠. ‘‘ཀི་ཉྩི སི་པྤ་ནྟི ཏ་སྶཱ་ཧཾ, ‘ཛཱ་ནཱ་མཱི’ཏི ཙ ཨ་བྲ་ཝིཾ;
མ་ཏ་སཱི་སཾ ཝ་ན་ཙྪུ་དྡྷཾ, ཨ་པི བཱ་ར་ས་ཝ་སྶི་ཀཾ;
ཏ་ཝ ཝི་ཛྫཱ་ཝི་སེ་སེ་ན, ས་ཙེ ས་ཀྐོ་སི ཝཱ་ཙ་ཡ [བྷཱ་ས་ཡ (སཱི. པཱི.)].
༡༣༡. ‘‘ཨཱ་མོ་ཏི མེ པ་ཊི་ཉྙཱ་ཏེ, ཏཱི་ཎི སཱི་སཱ་ནི ད་སྶ་ཡི;
ནི་ར་ཡ་ན་ར་དེ་ཝེ་སུ, ཨུ་པ་པ་ནྣེ ཨ་ཝཱ་ཙ་ཡིཾ.
༡༣༢. ‘‘ཏ་དཱ ཁཱི་ཎཱ་ས་ཝ་སྶེ་ཝ [པ་ཙྩེ་ཀ་བུ་དྡྷ་སྶ (སཱི. པཱི.)], སཱི་སཾ ད་སྶེ་སི ནཱ་ཡ་ཀོ;
ཏ་ཏོ་ཧཾ ཝི་ཧ་ཏཱ་ར་བྦྷོ, པ་བྦ་ཛྫཾ ས་མ་ཡཱ་ཙི་སཾ.
༡༣༣. ‘‘པ་བྦ་ཛི་ཏྭཱ་ན སུ་ག་ཏཾ, ས་ནྠ་ཝཱ་མི ཏ་ཧིཾ ཏ་ཧིཾ;
ཏ་ཏོ མཾ ཀ་བྦ་ཝི་ཏྟོ་སི [ཀ་ཝི་ཙི་ཏྟོ་ཏི (སྱཱ. པཱི.)], ཨུ་ཛ྄ཛྷཱ་ཡ་ནྟི་ཧ བྷི་ཀྑ་ཝོ.
༡༣༤. ‘‘ཏ་ཏོ ཝཱི་མཾ་ས་ན་ཏྠཾ མེ, ཨཱ་ཧ བུ་དྡྷོ ཝི་ནཱ་ཡ་ཀོ;
ཏ་ཀྐི་ཀཱ པ་ནི་མཱ གཱ་ཐཱ, ཋཱ་ན་སོ པ་ཊི་བྷ་ནྟི ཏཾ.
༡༣༥. ‘‘ན ཀ་བྦ་ཝི་ཏྟོ་ཧཾ ཝཱི་ར, ཋཱ་ན་སོ པ་ཊི་བྷ་ནྟི མཾ;
ཏེ་ན ཧི དཱ་ནི ཝ་ངྒཱི་ས, ཋཱ་ན་སོ ས་ནྠ་ཝཱ་ཧི མཾ.
༡༣༦. ‘‘ཏ་དཱ་ཧཾ ས་ནྠ་ཝིཾ ཝཱི་རཾ, གཱ་ཐཱ་ཧི ཨི་སི་ས་ཏྟ་མཾ;
ཋཱ་ན་སོ མེ ཏ་དཱ ཏུ་ཊྛོ, ཛི་ནོ ཨ་གྒེ ཋ་པེ་སི མཾ.
༡༣༧. ‘‘པ་ཊི་བྷཱ་ནེ་ན ཙི་ཏྟེ་ན, ཨ་ཉྙེ་ས་མ་ཏི་མ་ཉྙ་ཧཾ;
པེ་ས་ལེ ཏེ་ན སཾ་ཝི་གྒོ, ཨ་ར་ཧ་ཏྟ་མ་པཱ་པུ་ཎིཾ.
༡༣༨. ‘‘‘པ་ཊི་བྷཱ་ན་ཝ་ཏཾ ཨ་གྒོ, ཨ་ཉྙོ ཀོ་ཙི ན ཝི་ཛྫ་ཏི;
ཡ་ཐཱ་ཡཾ བྷི་ཀྑུ ཝ་ངྒཱི་སོ, ཨེ་ཝཾ དྷཱ་རེ་ཐ བྷི་ཀྑ་ཝོ’.
༡༣༩. ‘‘ས་ཏ་ས་ཧ་སྶེ ཀ་ཏཾ ཀ་མྨཾ, ཕ་ལཾ ད་སྶེ་སི མེ ཨི་དྷ;
སུ་མུ་ཏྟོ ས་ར་ཝེ་གོ་ཝ ཀི་ལེ་སེ ཛྷཱ་པ་ཡིཾ མ་མ.
༡༤༠. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༤༡. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༤༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཝ་ངྒཱི་སོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཝ་ངྒཱི་ས་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.